រាជធានីភ្នំពេញ ៖ សាលាដំបូងរាជធានីភ្នំពេញ កាលពីរសៀលថ្ងៃទី២១ មករា បានបើកសវនាការរឿងក្តីជនជាតិសៀម៥នាក់ លបលួចឆ្លងចូលក្នុងទឹកដីព្រះរាជាណាចក្រកម្ពុជាខុសច្បាប់ និងចូលទីលានយោធា មានបំណងទុច្ចរិត តាមសំណុំរឿងលេខ៣០២៥ ចុះថ្ងៃទី៣០ ធ្នូ ឆ្នាំ២០១០ ។ អង្គសវនាការមានលោកសួស សំអាត ប្រធានក្រុមប្រឹក្សា លោកអឿង សៀង និងលោកជ័យ សុវណ្ណ ចៅក្រមអម ក្នុងនោះតំណាងអយ្យការ គឺលោកសុខ រឿន ព្រះរាជអាជ្ញារងអមសាលាដំបូង ។ សវនាការបានធ្វើឡើងជាសាធារណៈដោយមានការចូលរួមស្តាប់ពីសំណាក់ តំណាងស្ថានទូតថៃ និងសាច់ញាតិជនជាប់ពិរុទ្ធជាតិសៀមមួយចំនួន ព្រមទាំងអ្នកកាសែតជាតិ-អន្តរជាតិផងដែរ ពិសេសក្រុមអ្នកកាសែត និងអ្នកថតទូរទស្សន៍ថៃ ។ សវនាការនេះមានការសាកសួរដេញដោលយ៉ាងយកចិត្តទុកដាក់ពីមេធាវី ការពារក្តី គឺលោកប៉ិច វិច្ឆិកា និងលោករស់ អូន។
ចូលរួម ក្នុងសវនាការនេះដែរ ក៏មានតំណាងនាយកដ្ឋានសន្តិសុខផ្ទៃក្នុងនៃក្រសួងមហាផ្ទៃ និងមន្ត្រីយោធានៅចំណុចចាប់ខ្លួនក្នុងភូមិជោគជ័យ ឃុំអូរ៣ជាន់ ស្រុកអូរជ្រៅ ក៏បានមក២នាក់ផងដែរ ក្នុងការឆ្លើយបំភ្លឺដល់តុលាការ ។ សវនាការ បានធ្វើឡើងចំពោះមុខជនជាប់ពិរុទ្ធជាតិសៀម៥នាក់ ១-ឈ្មោះផានិក វីគិតសេត ហៅណុម តំណាងរាស្ត្រមណ្ឌលបាងកក ២-ឈ្មោះគុជពុនថន ជូសាណា សេរី ជំនួយការលោកផានិក ៣-ឈ្មោះសែមឌីនឡឺក ប៊ូឆា លេខាបក្សឋានសួគ៌ និងផែនដី ៤-ឈ្មោះតាយ ណែមួង ម៉ាកចន អ្នកសារព័ត៌មាន និង៥-ឈ្មោះណា រឿមមុល ជិតវ៉ារ៉ាត់តាណា ជាមេផ្ទះ ។
ប្រធានក្រុមប្រឹក្សាបានប្រកាសអំពីដំណើរនៃអង្គ សវនាការនេះថា ការពិតសំណុំរឿងជនជាតិសៀម៧នាក់ ត្រូវបានតុលាការសាលាដំបូងរាជធានីភ្នំពេញ សំរេចដាក់ពេលជំនុំជម្រះនៅថ្ងៃទី១ កុម្ភៈ ខាងមុខនេះ ។ ប៉ុន្តែដោយមានការដាក់ពាក្យស្នើសុំពីសំណាក់មេធាវី ការពារក្តីឱ្យជនជាតិសៀម៥នាក់ដូចមានឈ្មោះខាងលើ ដើម្បីឱ្យពួកគេបានទៅជួបជុំប្រពន្ធកូន បន្ទាប់ពីទទួលបានការអនុញ្ញាតឱ្យនៅក្រៅឃុំ តែស្ថិតក្រោមការតាមដានរបស់តុលាការ ទើបមានការសំរេចលើកយកការស្នើសុំនោះមកជំនុំជម្រះតែម្តង ។
លោកបាន បញ្ជាក់ទៀតថា បានជាតុលាការលើកយកមកជម្រះតាមការស្នើសុំយ៉ាងតក់ក្រហល់ នេះ តុលាការបានពិនិត្យមើលអង្គហេតុក្នុងសំណុំរឿងជាបទល្មើសមជ្ឈិម មានន័យថា ជាជនអន្តោប្រវេសន៍ខុសច្បាប់ ដូច្នេះបានជាបើកសវនាការមុនកាលកំណត់ ។ លោកសុខ រឿន ព្រះរាជអាជ្ញារង និងជាតំណាងអយ្យការក្នុងសវនាការនេះ បានលើកយកអង្គហេតុដែលបានចោទប្រកាន់ជនជាតិសៀម៥នាក់ ជូនអង្គសវនាការដើម្បីសួរដេញដោលជនជាតិសៀម៥នាក់នោះ ។ លោកព្រះរាជអាជ្ញារងសុខ រឿន បានបន្តថា សវនាការពេលនេះមាន២ករណីដែលពួកគេបានប្រព្រឹត្តខុសនឹងច្បាប់ ព្រះរាជាណាចក្រកម្ពុជា គឺ១-បទល្មើសលបលួចឆ្លងចូលទឹកដីប្រទេសកម្ពុជាដោយគ្មានការអនុ ញ្ញាត និងឆ្លងចូលទីលានយោធាដោយមានបំណងទុច្ចរិត តាមមាត្រា២៩ នៃច្បាប់អន្តោប្រវេសន៍ និងមាត្រា៤៧៣ ក្រមព្រហ្មទណ្ឌថ្មី ។
ដំបូង លោកសុខ រឿន បានសួរដេញដោលលើជនជាតិសៀម ឈ្មោះផានិក វីគិតសេត ហៅណុម ជាតំណាងរាស្ត្រមណ្ឌលបាងកក ដែលចំណុចសំខាន់តំណាងអយ្យការបានចោទប្រកាន់ថា ហេតុអីបានជាលោកឆ្លងចូលដែនដីក្នុងព្រះរាជាណាចក្រកម្ពុជា ដោយគ្មានការអនុញ្ញាត តើមានចេតនា ឬក៏គ្មានចេតនា ។ អ្នកតំណាងរាស្ត្រសៀមរូបនេះបានឆ្លើយថា ការចូលមកនេះ គឺជាការស្នើសុំពីប្រជាពលរដ្ឋសៀមនៅព្រំប្រទល់ដែនឱ្យទៅមើល បង្គោលឡាក់លេខ៤៦ ក្នុងស្រុកអូរជ្រៅនោះ ហើយលោកមិនបានដឹងថា ចូលក្នុងទឹកដីកម្ពុជាទេ ។ សវនាការក៏បានសាកសួរលើជនជាតិសៀមឯទៀតដែរ រួមជាមួយសាក្សីផង ។
- ការប្រកាសសាលក្រម
សវនាការដែលអូសបន្លាយពេលរហូតដល់ម៉ោង៨យប់ថ្ងៃដដែលត្រូវបាន តុលាការប្រកាសទោសជនត្រូវចោទពីការបំពានច្បាប់អន្តោប្រវេសន៍ ជនជាតិសៀមទាំង៥នាក់ ដោយកំណត់ឱ្យម្នាក់ៗជាប់គុក៩ខែ និងបង់ប្រាក់១លានរៀលចូលថវិការដ្ឋ ។ ទោះជាបែបណា សាលក្រមនេះ បានចាត់ការអនុវត្តទោសក្នុងពន្ធនាគារនៅក្នុងរយៈពេលដែលជនត្រូវ ចោទទាំង៥នាក់ បានជាប់ឃុំរួចហើយ និងសល់ប៉ុន្មានត្រូវបានព្យួរទោស ។ ចំណែកសំភារទាំងអស់ត្រូវបានរឹបអូស ។ សាលក្រមនេះក៏បានប្រកាសដែរថា បើជនត្រូវចោទមិនសុខចិត្ត អាចប្តឹងទៅសាលាឧទ្ធរណ៍តាមកំណត់ច្បាប់បាន ។ ខណៈដែលជនជាតិសៀមទាំង៥នាក់ត្រូវបានព្យួរទោសតាមសាលក្រមសាលា ដំបូងនោះ ក៏នៅជនជាតិសៀម២នាក់ទៀត និងត្រូវតុលាការកំណត់បើកសវនាការនៅថ្ងៃទី១ កុម្ភៈ ខាងមុខនេះ ។ ជនជាតិសៀមទាំង២នាក់ ដែលម្នាក់ជាប់ឃុំជាបណ្តោះអាសន្នក្នុងពន្ធនាគារគឺឈ្មោះវីរៈ ស៊ុមខ្វាមឃីត និងអ្នកស្រីរ៉ាត់ទ្រី នៅក្រៅឃុំដែលក្រោយពីជាប់ចោទបំពានច្បាប់អន្តោប្រវេសន៍ក៏ បានជាប់ចោទពីបទចារកម្មផងដែរ ។
គួររំលឹកថា កាលពីថ្ងៃទី២៩ ធ្នូ ឆ្នាំ២០១០ កន្លងទៅនេះ ពួកសៀម៧នាក់បានឆ្លងចូលមកទឹកដីកម្ពុជាដោយខុសច្បាប់ នៅច្រកព្រំប្រទល់ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ហើយត្រូវបានសមត្ថកិច្ចចាប់ខ្លួននាំមកកាន់រាជធានីភ្នំពេញ និងយកទៅឃុំខ្លួនបណ្តោះអាសន្ននៅពន្ធនាគារព្រៃស ។ បន្ទាប់ពីឃាត់ខ្លួនសៀម៧នាក់ តុលាការសាលាដំបូងរាជធានីភ្នំពេញបានចោទប្រកាន់ពីរបទល្មើស គឺឆ្លងចូលដែនដីយោធាខុសច្បាប់ និងជនអន្តោប្រវេសន៍ ។ ក្រោយពីចោទប្រកាន់ និងឃុំខ្លួនជនជាតិសៀមទាំង៧នាក់នោះហើយ មេធាវីការពារក្តីបានដាក់ពាក្យប្តឹងទាស់ទៅលើការសំរេចរបស់ សាលាដំបូងនោះ ។ ក្រោយពីឃុំខ្លួនតុលាការបានរកឃើញបទល្មើសថ្មី១ទៀតលើសៀម២ នាក់ គឺវីរ៉ាក់ស៊ុមខ្វាមឃីត និងរ៉ាត់ទ្រី គឺជាបទល្មើសឧក្រិដ្ឋ ប៉ុន្តែទោះបីជាយ៉ាងណា ក្នុងចំណោមសៀមទាំង៧នាក់ មេធាវីការពារក្តីបានប្រឹងប្រែងជួយជ្រោមជ្រែងតាមផ្លូវច្បាប់ សុំធានាបាននៅក្រៅឃុំបណ្តោះអាសន្ន២នាក់ ដោយមានការសហការជាមួយស្ថានទូតថៃប្រចាំនៅព្រះរាជាណាចក្រ កម្ពុជា ។
- ការកាត់បន្ថយថ្ងៃសវនាការនេះធ្វើឱ្យអ្នកកាសែតថៃប្រញាប់ប្រញាល់មកកម្ពុជា
តាមកាសែតឃុម ឆាត់លឹក របស់ថៃ ថ្ងៃទី២១ មករា បានផ្សាយថា លោកអាប់ភីស៊ីត វេចាជីវ៉ា នាយករដ្ឋមន្ត្រីថៃ បានឆ្លើយតបនឹងសំណួររបស់អ្នកកាសែតដែលសួរថា តើតុលាការកម្ពុជានឹងកាត់ក្តីជនជាតិថៃទាំង៧នាក់ក្នុងថ្ងៃនេះ (២១ មករា) ឬអត់ ? ដោយបញ្ជាក់ថា អាចមានដំណើរការ ។ ចំណែកលោកឆាវានុន អ៊ីនសាហ្គោម៉ាស៊ុត អនុរដ្ឋលេខាធិការក្រសួងការបរទេសថៃ បានឱ្យដឹងពីករណីដែលតុលាការកម្ពុជាបើកសវនាការជនជាតិថៃទាំង៥នាក់ (មិនមែន៧នាក់ )នៅថ្ងៃទី២១ មករាថា តុលាការកម្ពុជាកំណត់ដំណើរការសាកសួរនៅរសៀលថ្ងៃទី២១ មករា ។ លោកឆាវានុន បន្តទៀតថា ប្រសិនបើតុលាការធ្វើការកាត់ក្តី រដ្ឋាភិបាលថៃគ្មានក្តីបារម្ភឡើយ ពីព្រោះមានគំរោងដោះស្រាយ និងជួយសង្គ្រោះជនជាតិថៃទាំង៧នាក់ ឱ្យស្មើភាព ទោះបីពេលនេះកាត់ទោស៥នាក់ក្តី ។
សំរាប់អ្នកស្រីរ៉ាត់ទ្រី និងលោកវីរ៉ាក់ តុលាការកម្ពុជានឹងបើកសវនាការនៅថ្ងៃទី១ កុម្ភៈ ខាងមុខ ។ កាសែតថៃដដែលបានឱ្យដឹងទៀតថា លោកស៊ូថេប ធឿកស៊ូបាន ឧបនាយករដ្ឋមន្ត្រីថៃ មានក្តីរីករាយដែលតុលាការកម្ពុជាកាត់បន្ថយពេលវេលាកាត់ក្តីជនជាតិ ថៃទាំង៥នាក់ មកថ្ងៃទី២១ មករា ខណៈពេលរឿងខាងលើបានកំណត់ធ្វើនៅថ្ងៃទី១ កុម្ភៈ ខាងមុខ ។ លោកស៊ូថេប បញ្ជាក់ថា ការកាត់បន្ថយពេលវេលានេះជាលទ្ធផលនៃកិច្ចព្យាយាមក្នុងការ សហការរវាងរដ្ឋាភិបាលនៃប្រទេសទាំង២ ។ ឧបនាយករដ្ឋមន្ត្រីថៃបានបញ្ជាក់ដូច្នេះថា «យើងត្រូវដោះស្រាយបញ្ហាលើការពិត និងឈរលើគោលការណ៍របស់យើងនិងប្រទេសជិតខាងដែលត្រូវមានវិធី សាស្ត្រដោះស្រាយបញ្ហារួមគ្នា» ។ ទោះជាបែបណាក៏ដោយ ត្រង់ចំណុចនេះ បង្ហាញឱ្យឃើញថា កម្ពុជាមានការយោគយល់ស្ថានភាពដ៏ល្អនិងយល់ថា មិនគួរឱ្យបញ្ហាតូចតាចខាងលើ ក្លាយជារឿងរីករាលដាលប៉ះពាល់ដល់សម្ព័ន្ធភាពរវាងគ្នានឹងគ្នា ។ មានការកត់សំគាល់ថា នៅព្រលានយន្តហោះអន្តរជាតិភ្នំពេញ ក្រុមអ្នកកាសែត និងអ្នកថតទូរទស្សន៍ថៃ បាននាំគ្នាមកកម្ពុជាយ៉ាងត្រហេបត្រហបទាំងកណ្តាលថ្ងៃត្រង់ ដើម្បីធ្វើដំណើរមកកាន់សាលាដំបូងរាជធានីភ្នំពេញឱ្យបានមុនពេល កាត់ក្តីនៅម៉ោង២រសៀល ។ ការនាំគ្នាមកទាំងត្រហេបត្រហបនេះ ដោយសារតែការសំរេចបើកសវនាការដែលសូម្បីតែអ្នកកាសែតខ្មែរក៏ទើប តែដឹងនៅព្រឹកថ្ងៃទី២១ មករាដែរ ៕
ដោយ ៖ កោះឯករាជ្យ
