តាមប្រភពព័ត៌មានពីកាសែតបាងកកប៉ុស្តិ៍នៅថ្ងៃទី២៤ មករា ផ្សាយថា កងទ័ពថៃគំរាមថា ខ្លួននឹងចូលរុះរើផ្ទាំងថ្មចារឹកនៅទល់មុខវត្តកែវសិក្ខាគិរីស្វារៈចេញដោយខ្លួនឯង ប្រសិនបើអាជ្ញាធរកម្ពុជានៅតែមិនព្រមរុះរើចោល ។ ផ្ទាំងថ្មចារឹកនោះមានសរសេរជាអក្សរខ្មែរថា «កងទ័ពថៃឈ្លានពានកម្ពុជា» ដោយមានថ្ងៃ ខែ ឆ្នាំ កំណត់កាលបរិច្ឆេទច្បាស់លាស់ ត្រូវបានបង្កើតឡើងនៅបរិវេណទល់មុខវត្តកែវសិក្ខាគិរីស្វារៈ ដែលបង្ហាញពីការឈ្លានពានរបស់កងទ័ពថៃមកលើកម្ពុជាថ្ងៃទី១៥ កក្កដា ២០០៨ ។
កាសែតបាងកកប៉ុស្តិ៍បានផ្សាយឱ្យដឹងថា មេបញ្ជាការភូមិភាគ២ថៃ លោកថាវ៉ាត់ឆៃ សាមុត សាខន បានស្នើដល់កងទ័ពកម្ពុជាដែលឈរជើងនៅតំបន់វត្តកែវសិក្ខាគិរីស្វារៈឱ្យរុះរើចេញវិញនូវផ្ទាំងថ្មចារឹកនោះ ។ ចំណែកនាយករដ្ឋមន្ត្រីថៃលោកអាប់ភីស៊ីត វ៉េចាជីវ៉ា ក៏បានថ្លែងផងដែរថា រូបលោកនឹងទុកករណីរុះរើផ្ទាំងថ្មចារឹកនោះ ទៅឱ្យកងទ័ពថៃជាអ្នកដោះស្រាយ ។
សម្តេចតេជោនាយករដ្ឋមន្ត្រីហ៊ុន សែន មិនទាន់មានប្រតិកម្មបែបណានៅឡើយទេ ចំពោះការប៉ុនប៉ងរុះរើផ្ទាំងថ្មចារឹកអំពីការចូលឈ្លានពានលើសំណាក់កងទ័ពថៃ មកលើទឹកដីកម្ពុជា...ប៉ុន្តែមជ្ឈដ្ឋានជាតិ-អន្តរជាតិ បានយល់ឃើញថា ប្រសិនបើថៃចង់ធ្វើអ្វីដោយឯកចិត្តនៅក្នុងទឹកដីកម្ពុជានោះ គឺមិនអាចទៅរួចទេ ព្រោះប្រទេសកម្ពុជា មានអធិបតេយ្យភាព បូរណភាពទឹកដីពេញលេញ ម៉ឺងម៉ាត់ មិនអាចប្រទេសណារំលោភបំពានបានទេ...ហើយបើថៃនៅតែរឹងទទឹងចង់ចូលមករុះរើតាមរូបភាពបែបណាមួយនោះ គឺជាការរំលោភបំពានដោយខុសច្បាប់ មិនតែប៉ុណ្ណោះនឹងកើតមានគ្រោះថ្នាក់ដល់ខ្លួនឯងទៀតផង ព្រោះកម្ពុជានឹងប្រើសិទ្ធិស្វ័យការពារ...ទោះជាយ៉ាងណា ថៃប្រហែលជាមិនល្ងង់នោះទេ។
ចំណែកឯទាហានកម្ពុជាវិញកំពុងតែស្ថិតក្នុងលក្ខណៈប្រុងជើងការខ្ពស់ បន្ទាប់ពីទាហានសៀមបានគំរាមប្រើកំលាំងទ័ពចូលមកដកស្លាករបស់កម្ពុជាដែលសរសេរថា «ទាហានថៃឈ្លានពានកម្ពុជា» ដែលកម្ពុជាបានសរសេរនៅលើផ្ទាំងសិលាចារឹកទុកនៅមុខវត្តកែវសិក្ខាគិរីស្វារៈ ។ ការគំរាមរបស់ទាហានសៀមនៅថ្ងៃចន្ទ ទិ២៤ មករា ធ្វើឡើងបន្ទាប់ពីនាយករដ្ឋមន្ត្រីថៃ លោកអាប់ភីស៊ីត វ៉េចាជីវ៉ា កាលពីថ្ងៃអាទិត្យ ម្សិលមិញ បានបញ្ជាឱ្យប្រមុខយោធាថៃ ទាក់ទងទៅកងទ័ពកម្ពុជា ដែលឈរជើងនៅតំបន់ប្រាសាទព្រះវិហារ និងនៅវត្តកែវសិក្ខាគិរីស្វារៈឱ្យរុះរើចេញវិញនូវថ្មចារឹកនោះ ។ លោកអាប់ភីស៊ីត បានលើកឡើងដូច្នេះក្នុងអំឡុងពេលលោកអញ្ជើញចូលរួមក្នុងកម្មវិធីចាក់ផ្សាយតាមទូរទស្សន៍ NBT ប្រចាំសប្តាហ៍របស់លោក ដែលកម្មវិធីនោះមានឈ្មោះថា «ការជឿទុកចិត្តនៅប្រទេសថៃជាមួយនាយករដ្ឋមន្ត្រីអាប់ភីស៊ីត»។
លោកនាយឧត្តមសេនីយ៍គន់ គីម និងលោកជា តារា អគ្គមេបញ្ជាការរងកងយោធពលខេមរភូមិន្ទដែលប្រចាំការនៅលើកំពូលប្រាសាទព្រះវិហារបានមានប្រសាសន៍ថា ទាហានកម្ពុជាមិនអនុញ្ញាតឱ្យទាហានថៃចូលមកដក ឬរុះរើស្លាកថ្មចារឹកស្តី ពីការចូលឈ្លានពានរបស់ទាហានថៃមកលើកម្ពុជានោះទេ ព្រោះស្លាកនេះស្ថិតក្នុងទឹកដីកម្ពុជា ៕
ដោយ ៖ កោះឯករាជ្យ
