កាលពីថ្ងៃច័ន្ទ ទី ១៩ ខែ កញ្ញា ឆ្នាំ២០១១
នៅក្នុងវេទិកាអន្តរជាតិស្តីពី «សតវត្សអាស៊ី៖ បញ្ហាប្រឈមនិងក្តីសង្ឃឹម»
ដែលបានត្រូវប្រារព្ធឡើងនៅរាជធានីភ្នំពេញ លោក Mushahid Hussain Sayed
ដែលជាអគ្គលេខាធិការនៃចលនាអ្នកប្រជាធិបតេយ្យនិយមកណ្តាលអន្តរជាតិ
អាស៊ីប៉ាស៊ីហ្វិក (CAPDI) បានពិពណ៌នាយ៉ាងច្បាស់លាស់អំពី «គំរូកម្ពុជា» របស់
CAPDI សម្រាប់ បង្កើតឲ្យមានសន្តិភាព និងដំណោះស្រាយជម្លោះផ្ទៃក្នុង។
សំខាន់បំផុតនោះ នេះគឺជាសារ ដែលឮរន្ទឺដល់គ្រប់ទិសទីនៃទ្វីបអាស៊ី អឺរ៉ុប
អាមេរិកឡាទីន និងអាហ្វ្រិក នៅទីណាក៏ដោយ
ដែលជម្លោះផ្ទៃក្នុងកំពុងតែបំផ្លាញដល់ជីវិតមនុស្ស និងទ្រព្យសម្បត្តិ
ហើយរាំងស្ទះដល់ សន្តិភាព ស្ថិរភាព កំណើនសេដ្ឋកិច្ច
និងការអភិវឌ្ឍឲ្យបានដឹងថាដំណោះស្រាយពិតជាមាន ហើយដែលគួរតែមើលដំណោះស្រាយបែប
«គំរូកម្ពុជា» ដែលបានធ្វើសមាហរណកម្មភាគី
ក្នុងជម្លោះបួនភាគីដែលរួមមានក្រុមរាជានិយម
និងកម្លាំងខ្មែរក្រហមឱ្យទៅជាកម្លាំងប្រដាប់
អាវុធរួមជាតិកម្ពុជាមួយ និងសម្រេចបានសន្តិភាព ស្ថិរភាព និងវិបុលភាព
សម្រាប់ប្រជាជន កម្ពុជាទាំងមូល។ គួរបញ្ជាក់ថា «ស្ថាបនិក» នៃ «គំរូកម្ពុជា»
នេះគឺថ្នាក់ដឹកនាំនៃគណបក្ស ប្រជាជនកម្ពុជា (CPP) ដែលក្នុងចំណោមនោះ
ឥស្សរជនដែលមានកេរ្តិ៍ឈ្មោះល្បីល្បាញ បំផុតគឺសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
CAPDI គឺជាអង្គការតែមួយគត់នៅក្នុងតំបន់អាស៊ីប៉ាស៊ីហ្វិក
ហើយប្រហែលជានៅក្នុង ពិភពលោកផងដែរ
ដែលមិនត្រឹមតែប្រមូលផ្តុំគណបក្សនយោបាយប៉ុណ្ណោះទេ ប៉ុន្តែថែមទាំង
ប្រមូលផ្តុំស្ថាប័នសង្គមស៊ីវិលទៀតផង។ សមាសភាពក្រុមនាយកប្រតិបត្តិនៃ
CAPDI មាន នាយករដ្ឋមន្ត្រីជាច្រើនរូប អតីតប្រធានាធិបតី
និងអតីតនាយករដ្ឋមន្ត្រី មេដឹកនាំសង្គមស៊ីវិល និងពាណិជ្ជកម្មនានា។ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺជាសហប្រធានកិត្តិយស (Co-Chairman Emeritus) ហើយឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី គឺជាអនុប្រធានជាន់ខ្ពស់។
«គំរូកម្ពុជា» ដើម្បីសន្តិភាវូបនីយកម្ម និងដំណោះស្រាយជម្លោះផ្ទៃក្នុងមានលក្ខណៈ ពិសេសជាក់លាក់ប្រាំមួយចំនុចដូចតទៅ៖
១. សន្តិភាពមួយដែលសម្របសម្រួលដោយអង្គការសហប្រជាជាតិ
២. ការបោះឆ្នោតដោយសេរី ក្រោយពីមានបទឈប់បាញ់គ្នា
៣. សមាហរណកម្មភាគីជម្លោះទាំងបួន ទៅជាកងកម្លាំងប្រដាប់អាវុធរួមជាតិមួយ
៤. ការផ្សះផ្សាជាតិដោយមានការបង្កើតរដ្ឋាភិបាលចម្រុះ (ដែលមាននាយករដ្ឋមន្ត្រីពីរ)
៥.
ការអនុវត្តនីតិរដ្ឋជាបណ្តើរៗតាមដំណាក់កាល ដោយមានការបង្កើតឡើងនូវអង្គ
ជំនុំជម្រះវិសាមញ្ញក្នុងតុលាការកម្ពុជា (ECCC)
ដើម្បីកាត់ទោសឧក្រិដ្ឋកម្មដែលប្រព្រឹត្តដោយមេដឹកនាំកំពូលបំផុតនៃរបបប្រល័យពូជសាសន៍កម្ពុជាប្រជាធិបតេយ្យ។
៦. ការសម្រេចបាននូវសន្តិភាព ស្ថិរភាពជាយូរអង្វែង និងភាពជាអ្នកជិតខាងល្អជាមួយ នឹងប្រទេសដទៃ។
ក្នុងចំណោមលក្ខណៈពិសេសខាងលើនេះ គេអាចទទួលបានមេរៀនជាច្រើនគឺ៖
១. ការផ្លាស់ប្តូរផ្នត់គំនិតពី «អ្នកឈ្នះស៊ីដាច់តែម្នាក់ឯង» ទៅជា «នាំគ្នាធ្វើការជាមួយគ្នា»
២. ការទទួលស្គាល់ និងគោរពដល់ភាគីពាក់ព័ន្ធទាំងអស់
៣. តួនាទីដ៏សកម្មរបស់សហគមន៍អន្តរជាតិ
៤. ជំនះភាពជូរចត់នៃអតីតកាល ហើយសន្តោសប្រណី និងបំភ្លេចអតីតកាលជូរចត់ ឈឺចាប់ខ្លោចផ្សារ
៥. ភាពច្នៃប្រឌិតនៃភាគីពាក់ព័ន្ធទាំងអស់
៦. នយោបាយបង្រួបបង្រួមជាតិ
«គំរូកម្ពុជា» ដែលជាគំរូមួយបង្កើតឡើងក្នុងទ្វីបអាស៊ី
បានត្រូវបញ្ជាក់ថាមានប្រសិទ្ធិភាព
យ៉ាងគ្រប់គ្រាន់សម្រាប់ព្យាបាលការឈឺចាប់នៃភាគីជម្លោះ
នាំយកសន្តិភាពឲ្យទៅដល់ទាំង តំបន់ទីក្រុង
និងទាំងគ្រប់តំបន់ដាច់ស្រយាលនៅជនបទ ហើយសម្រាប់ធ្វើឱ្យទទួលបាន
សុខដុមរមនា និងវិបុលភាពសេដ្ឋកិច្ចសម្រាប់ទាំងអស់គ្នា។
រាជធានីភ្នំពេញ ថ្ងៃទី០៦ ខែ តុលា ឆ្នាំ២០១១
អង្គភាពព័ត៌មាន និងប្រតិកម្មរហ័ស
នៃទីស្តីការគណៈរដ្ឋមន្ត្រី