ជាប្រតិកម្មផ្ទុយពីគោលការណ៍ប្រជាធិបតេយ្យ
ដែលអ្នកតំណាងរាស្ត្រគណបក្សប្រឆាំងនិយមចូលចិត្តយកមកប្រើ ដើម្បីបិទបាំងអំពើទុច្ចរិតរបស់ខ្លួន
នៅពេលដែលមធ្យោបាយអាក្រក់ទាំងឡាយទាំងពួងនោះ ត្រូវបានបកស្រាយបំភ្លឺតបតវិញ
បង្ហាញពីការពិត និងបានផ្សព្វផ្សាយជាសាធារណៈ ដោយមន្ត្រីរដ្ឋាភិបាល និងសមាជិកគណបក្សប្រជាជនកម្ពុជា ជាពិសេស អង្គភាពព័ត៌មាន
និងប្រតិកម្មរហ័ស នៃទីស្តីការគណៈរដ្ឋមន្ត្រី ។
ជាទូទៅ គេបានសង្កេតឃើញថា អ្នកនយោបាយប្រឆាំងនៅកម្ពុជា ពុំមានទម្លាប់គោរព និងអនុវត្តឱ្យបានត្រឹមត្រូវតាមតួនាទី
ភារកិច្ចរបស់ខ្លួនជាអ្នកតំណាងរាស្ត្រនោះទេ គឺតែងតែប្រើនូវកលល្បិចបោកប្រាស់ បំភ័ន្តការពិត និងមិនដែលទទួលស្គាល់ម្តងណាឡើយ នូវភាពវិជ្ជមាន
ដែលជាជោគជ័យធំៗរបស់រាជរដ្ឋាភិបាល ក្នុងការ
ធានាបាននូវសុខសន្តិភាពជូនប្រទេសជាតិទាំងមូល
ដូចមាននាពេលបច្ចុប្បន្ននេះទេ។ ពួកគេ មិនត្រឹមតែមិនបានចូលរួមថែរក្សាសន្តិភាព ដែលមានប៉ុណ្ណោះទេ ថែមទាំងបានបង្កើតនូវយុទ្ធនាការវាយប្រហាររិះគន់
ជេរប្រមាថកាតទាន មកលើរាជរដ្ឋាភិបាល
ពីមួយថ្ងៃទៅមួយថ្ងៃកាន់តែខ្លាំងឡើងៗ ដោយពាក្យសម្តីមួលបង្កាច់គ្រប់ទិដ្ឋភាព
និងពុំបានផ្អែកទៅលើមូលដ្ឋានច្បាប់ និងសច្ចៈធម៌ឡើយ ។
ជានិច្ចកាល មហាជន ក្នុង និងក្រៅប្រទេស បានឮនូវការឃោសនាអកុសល
និងការបញ្ចេញមតិ របស់ក្រុមប្រឆាំងយ៉ាងកងរំពង និងដ៏ហួសព្រំដែននៃច្បាប់បានកំណត់
តាមរយៈកិច្ចសម្ភាសន៍ជាមួយវិទ្យុប្រតិកិរិយាមួយចំនួន ដែលកំពុងបំរើឱ្យនយោបាយគណបក្សប្រឆាំងដោយចំហរ
និងពុំបានគិតពីផលប៉ះពាល់ ឬសង្គមបែកបាក់ ដោយសារសម្តី អុជអាល ដុតបញ្ឆេះកំហឹង
របស់អ្នកនយោបាយទាំងនោះឡើយ គឺពួកគេគិតតែពីផលប្រយោជន៍ផ្ទាល់ខ្លួន មិនស្របទៅតាមសុច្ចរិតភាពនៃវិជ្ជាជីវៈ
និងសតិសម្បជញ្ញៈ មនសិការជាតិទេ។
នៅថ្ងៃទី២៦ ខែ តុលា ឆ្នាំ ២០១១ ជាប្រតិកម្មតបជាមួយការបំភ្លឺចំៗ របស់មន្ត្រីជាន់ខ្ពស់រាជរដ្ឋាភិបាល
ស្តីពីសភាពការណ៍បច្ចុប្បន្នភាពកម្ពុជា នៅពីក្រោយការចោទប្រកាន់របស់បក្សប្រឆាំង
និងអង្គការមិនមែនរដ្ឋាភិបាលមួយចំនួនថា រដ្ឋាភិបាលមិនបានគោរពតាមកិច្ចព្រមព្រៀងសន្តិភាពទីក្រុងប៉ារីស
ដែលត្រូវបាន ឯកឧត្តម កែវ រ៉េមី រដ្ឋលេខាធិការ និងជាប្រធានក្រុមអ្នកនាំពាក្យអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បំភ្លឺថា កិច្ចព្រមព្រៀងនោះត្រូវបានរាជរដ្ឋាភិបាលអនុវត្តបានយ៉ាងពេញលេញ
និងបានអនុវត្តដល់ចំនុចកំពូល លើសពីអ្វីដែលមានចែងនៅក្នុងកិច្ចព្រមព្រៀងនោះទៅទៀត ត្រូវបានលោកស្រី មូរ សុខហួរ
ខឹងសម្បារជាមួយនឹងការបកស្រាយនោះ និងបានឆ្លើយតបវិញ
តាមរយៈការផ្សាយរបស់វិទ្យុបរទេសមួយនិយាយជាខេមរភាសា ដោយបានលើកឡើងថា
« អ្នកស្រីមិនចង់ឃើញអង្គភាពប្រតិកម្មរហ័សនេះ
រង់ចាំតែបកស្រាយដើម្បីបិទបាំងភាពអវិជ្ជមាននោះទេ។ជាមួយនឹងការចោទប្រកាន់ថា
មានការធ្លាក់ចុះស្ថានការណ៍ការនៃការគោរពសិទ្ធិមនុស្សនៅកម្ពុជា សិទ្ធិបញ្ចេញមតិ
និងបញ្ហាបូរណភាពទឹកដីជាដើម »។
ការលើកឡើងដូច្នេះ គឺបានបង្ហាញឱ្យឃើញថា លោកស្រី មូរ សុខហួរ កំពុងប្រកាសដេញប្រជាពលរដ្ឋជាង១៤
លាននាក់ចេញពីស្រុកខ្មែរទាំងអស់ ដើម្បីងាយស្រួល លោកស្រីប្រើប្រាស់ប្រជាធិបតេយ្យតែម្នាក់ឯង។
នេះឬ អ្នកតំណាងរាស្ត្រ ដែលអួតខ្លួនថា គោរពតាមលទ្ធិប្រជាធិបតេយ្យ
? ការពិតសម្តី បែបនេះ គឺជាការ បញ្ជាក់ថា លោកស្រី
មូរ សុខហួរ បាន និងកំពុងអនុវត្តជាក់ស្តែងនូវមេរៀនផ្តាច់ការតាមគំរូប៉ុល ពត
ឬជាការប្រកាសខ្លួនជាចំហរអនុវត្តនូវច្បាប់ព្រៃ ដែលមិនត្រូវជាមួយនឹងតថភាពសង្គមខ្មែរឡើយ។
មាត្រា៤១ នៃច្បាប់រដ្ឋធម្មនុញ្ញ បានចែងថា ប្រជាពលរដ្ឋមានសេរីភាពខាងការបញ្ចេញមតិរបស់ខ្លួន។ដូច្នេះ
ប្រជាពលរដ្ឋនឹងមិនអនុញ្ញាតឱ្យសេរីភាពរបស់ខ្លួនដែលធានាដោយច្បាប់ ត្រូវបានដកហូតដោយលោកស្រី
មូរ សុខហួរ នោះបានឡើយ។ ម៉្យាងវិញទៀត វាជាការពុំគួរគប្បីទាល់តែសោះ ដែលលោកស្រី
មូរ សុខហួរ បាននិងកំពុងទទួលបាននូវសិទ្ធិសេរីភាពយ៉ាងពេញលេញ ទាំងសិទ្ធិរស់រានមានជីវិត
ក្រោយថ្ងៃរំដោះ ៧ មករា ឆ្នាំ ១៩៧៩ សិទ្ធិចូលរួមនយោបាយ ការបោះឆ្នោត ការបញ្ចេញមតិ
បង្កើតអង្គការសមាគម និងសិទ្ធិក្នុងការទំនាក់ទំនងជាសាធារណៈនានា ដែលសង្គមផ្តល់ឱ្យ.......។ល។និង។ល។
ការទទួលបាននូវសេរីភាពដ៏លើសលប់ រហូតប្រើប្រាស់សិទ្ធិរបស់ខ្លួនហួសព្រំដែន
លោកស្រីមូរ សុខហួរក៏ធ្លាប់មានរឿងអាស្រូវប្តឹងផ្តល់តាមផ្លូវតុលាការ និងត្រូវបានចោទពីបទបរិហារកេរ្តិ៍
ដោយការបញ្ចេញមតិជ្រុល ប៉ះពាល់ដល់សិទ្ធិសេរីភាពអ្នកដ៏ទៃ ជាពិសេសប៉ះពាល់ដល់កិត្តិយស
និងសេចក្តីថ្លៃថ្នូររបស់ថ្នាក់ដឹកនាំប្រទេស នាពេលកន្លងមក ប៉ុន្តែ បុគ្គលម្នាក់នេះនៅតែចោទថា
កម្ពុជាមានការបំបិទសិទ្ធិសេរីភាពទៅវិញ។ សួរថា ចុះពេលនេះ ហេតុអ្វីបានជា
លោកស្រី មូរ សុខហួរ ប្រកាសហាមប្រាមមន្ត្រីក្នុងជួរថ្នាក់ដឹកនាំនៃរាជរដ្ឋាភិបាលមិនឱ្យបញ្ចេញមតិទៅវិញ ឬក៏ចង់ឱ្យសម្លេងនៃយុទ្ធនាការដើរភូតកុហក់របស់ខ្លួនបានសម្រេច និងសង្គមធ្លាក់ចូលក្នុងគ្រោះមហន្តរាយ
ខ្ទេសខ្ទីអស់ ទើបលោកស្រីទទួលស្គាល់ថា កម្ពុជាមានប្រជាធិបតេយ្យពេញលេញ
?។
ប្រជាធិបតេយ្យមិនមែនជាកម្មសិទ្ធិផ្តាច់មុខរបស់អ្នកណាម្នាក់
គណបក្សនយោបាយណាមួយ បុគ្គលឬក្រុមជនណាមួយ
ហួងហែង យកមកប្រើប្រាស់តែម្នាក់ឯង និងខ្ទប់មាត់អ្នកដ៏ទៃមិនឱ្យនិយាយស្តីនោះទេ។
ប្រជាធិបតេយ្យ មានអត្ថន័យថា « ភាពនៃប្រទេសដែលមានប្រជារាស្ត្រជាអធិបតី
គឺប្រទេស ឬរដ្ឋបាល ដែលមានប្រជាជនជាធំ ក្នុងការរើសតំណាងរបស់ខ្លួនឱ្យជាអ្នកសំរេចកិច្ចការក្នុងប្រទេស
» ។
ព្រះរាជាណាចក្រកម្ពុជា ជាប្រទេសអនុវត្តនយោបាយប្រជាធិបតេយ្យ សេរីពហុបក្ស
។ ប្រជាពលរដ្ឋខ្មែរជាម្ចាស់នៃវាសនា នៃប្រទេសជាតិរបស់ខ្លួន ហើយអំណាចទាំងអស់ជារបស់ប្រជាពលរដ្ឋ។
វាមិនខុសគ្នានោះទេ រវាងអ្នកនយោបាយ និងកីឡាករប្រដាល់ ពេលឡើងសង្វៀនប្រកួត
៖ បើយើងមិនវ៉ៃគេ គឺគេវ៉ៃយើង ហើយយើងប្រាកដជាចាញ់ ប៉ុន្តែ បើយើងវ៉ៃគេ គឺគេនឹងវ៉ៃយើងវិញ
វាជារឿងធម្មតា តែលទ្ធផលចាញ់ ឬឈ្នះ គឺវាអាស្រ័យនឹងភាពរហ័សរហួន ភាពប៉ិនប្រសព្វ
និងការពូកែប្រើស្នៀត ក៏ប៉ុន្តែ ភាគីទាំងពីរចាំបាច់ត្រូវតែគោរពតាមលក្ខខណ្ឌដែលបានកំណត់ដោយច្បាប់នៃរាល់ការប្រកួតនីមួយៗ។
យ៉ាងណាមិញ បុគ្គលជាអ្នកនយោបាយគ្រប់រូប ក៏ត្រូវតែប្រកាន់យកនូវផ្នត់គំនិតដូចគ្នានេះដែរ
បើមាននូវមហិច្ចតាចង់យកឈ្នះដៃគូនយោបាយ គឺត្រូវតែគោរព និងអនុវត្ត ឱ្យបានត្រឹមត្រូវតាមគោលការណ៏ច្បាប់
និងបទដ្ឋានគតិយុត្តនានា និងគិតគូរពីផលប្រយោជន៍ប្រជាពលរដ្ឋជាធំ ជាពិសេស ត្រូវតែគោរពតាមជាដាច់ខាត
«រដ្ឋធម្មនុញ្ញ»ដែលជាច្បាប់កំពូលរបស់ប្រទេស ដោយមិនអាចប្រព្រឹត្តរំលោភបំពានបានឡើយ។
ដូច្នេះ ដើម្បីបញ្ចៀសបាននូវការយល់ខុសពីសំណាក់សាធារណមតិជាតិ និងអន្តរជាតិ
បង្កឡើងដោយការបញ្ចេញមតិភូតកុហករបស់អ្នកនយោបាយទាំងនោះ ទើបមានការបកស្រាយបំភ្លឺជាហូរហែររបស់មន្ត្រីរាជរដ្ឋាភិបាល ស្របតាមច្បាប់រដ្ឋធម្មនុញ្ញ
ក្នុងកាតព្វកិច្ចត្រូវតែឆ្លើយតបទៅនឹងមតិផ្ទុយនានា
ដែលមានចរិតញុះញង់ បង្កភាពចលាចលសង្គម និងការជំរុញឱ្យប្រព្រឹត្តបទល្មើសបំពានច្បាប់ ។
យ៉ាងណាមិញ រាល់ការបកស្រាយបំភ្លឺរបស់មន្ត្រីអង្គភាពព័ត៌មាន និងប្រតិកម្មរហ័ស
នៃទីស្តីការគណៈរដ្ឋមន្ត្រី ទៅកាន់សាធារណមតិ ជាតិ និងអន្តរជាតិ គឺបានធ្វើឡើងដោយមានមូលដ្ឋានច្បាស់លាស់
ជាលក្ខណៈផ្លូវច្បាប់ ស្របតាមគោលនយោបាយរបស់រាជរដ្ឋាភិបាល និងដើម្បីទប់ស្តាត់នូវរាល់មតិរបស់មជ្ឈដ្ឋាននានា
ដែលមានចរិតអវិជ្ជមាន និងក៏ដើម្បីរក្សា និងការពារកិត្យានុភាពរបស់រាជរដ្ឋាភិបាល
សំដៅលើកកំពស់អត្តសញ្ញាណជាតិ ក៏ដូចជាការរក្សាបាននូវសុខសន្តិភាព ស្ថិរភាពនយោបាយ
សណ្តាប់ធា្នប់សាធារណៈ ជាពិសេស ប្រឆាំងដាច់ខាតរាល់សកម្មភាពទាំងឡាយណាដែលរំលោភលើច្បាប់រដ្ឋធម្មនុញ្ញ
និងការង្កើតចលនាប្រឆាំងនានា ដែលប៉ុនប៉ងរុញច្រានសង្គមកម្ពុជាឱ្យធា្លក់ចូលទៅក្នុងភាពចលាចល។
ដូច្នេះ ប្រតិកម្មរបស់លោកស្រី មូរ សុខហួរ ជុំវិញការបកស្រាយរបស់មន្ត្រីរាជរដ្ឋាភិបាលដែលបានផ្តល់នូវព័ត៌មានពិត
ឥតលំអៀងដល់មហាជន អំពីជោគជ័យ និងសមិទ្ធផលយ៉ាងច្រើនសន្ធឹកសន្ធាប់របស់រាជរដ្ឋាភិបាល
និងការពិតអំពីសន្តិភាពដែលពលរដ្ឋកម្ពុជាទទួលបាននាពេលបច្ចុប្បន្ន ប៉ុន្តែ បែជាត្រូវបានដកហូតសិទ្ធិសេរីភាពមិនឱ្យបញ្ចេញមតិដោយអ្នកតំណាងរាស្ត្រគណបក្សសម
រង្ស៊ី
គឺបានន័យថា លោកស្រី មូរ សុខហួរ កំពុងរស់នៅជាមួយប្រជាធិបតេយ្យតែម្នាក់ឯង
និងការបង្ខំឱ្យពលរដ្ឋខ្មែរជឿលើការបោកប្រាស់របស់ខ្លួន ដែលឈានទៅរកការវឹកវរក្នុងសង្គម
ឬចាត់ទុកថា លោកស្រីកំពុងប្រកាសសង្គ្រាមប្រឆាំងនឹងផ្លូវច្បាប់៕
ដោយៈ ពូន សំរេច