Thursday, November 17, 2011
បទអត្ថាធិប្បាយ ៖ សម រង្ស៊ី ជាមួយនឹងការធ្វើអត្តឃាតនយោបាយ (សម្លាប់ខ្លួនឯង)
ការប៉ុនប៉ងបង្អាក់ដំណើរការទៅមុខនៃរដ្ឋសភាក្នុងការអនុម័តកញ្ចប់ថវិកាជាតិឆ្នាំ ២០១២ តាមរយៈការធ្វើពហិការមិនចូលរួមប្រជុំរបស់អ្នកតំណាងរាស្ត្រទាំង២៦រូបនៃគណបក្ស សម រង្ស៊ី គឺអាចជាការធ្វើអត្តឃាតនយោបាយសម្លាប់ខ្លួនឯង ឬអាចស្មើនឹងការបិទផ្លូវទាំងស្រុងដើម្បីការវិលចូលស្រុកវិញ ឬអាចជាការរុញច្រានលោក សម រង្ស៊ី ឱ្យដួលខ្ទប់ទៅនឹងជញ្ជាំង ឬនឹងអាចនាំឱ្យជួបវាសនាអាក្រក់ គឺការបន្តរស់នៅក្រៅឆាកនយោបាយរហូតដល់ទីបញ្ចប់។
ការធ្វើពហិកាមិនចូលប្រជុំរដ្ឋសភា ដើម្បីអ្វីមួយដែលគណបក្ស សម រង្ស៊ី មានមោទនភាពនឹងការសម្រេចចិត្តនោះ ដោយយល់ថា នឹងនាំឱ្យមាននូវវិបត្តិធម្មនុញ្ញ ឬអធម្មនុញ្ញភាពនៅក្នុងសភា ឬចង់ធ្វើឱ្យសេចក្តីសំរេចរបស់រដ្ឋសភាខ្វះលក្ខណៈស្របច្បាប់ពេញលេញ តាមអ្វីដែលពួកគេផ្អែកលើមាត្រា៧៦ និងមាត្រា៩៥ នៃរដ្ឋធម្មនុញ្ញ ក្នុងបំណងចង់រុញឱ្យរាជរដ្ឋាភិបាលទ័លច្រក ក៏ប៉ុន្តែ គំនិតផ្តួចផ្តើមនោះ គ្រាន់តែជាភាពឆោតល្ងង់នៃការសម្រេចចិត្តផ្នែកនយោបាយរបស់ក្រុមបក្សប្រឆាំងដែលមិនយល់ច្បាស់ពីច្បាប់តែប៉ុណ្ណោះ។
អាក្រក់ជាងនេះទៅទៀត ជាមួយនឹងការប្រើប្រាស់វេទិកាបញ្ចេញមតិ ដែលត្រូវបានបើកចំហរដោយទូលាយ តាមរយៈសន្និសីទសារព័ត៌មាន ពីក្រៅប្រទេស លោក សម រង្ស៊ី បានបន្តប្រដូចសម្តេចតេជោ ហ៊ុន សែន នាយករដ្ឋមន្ត្រីទៅនឹងជោគវាសនារបស់មេដឹកនាំនៃបណ្តាប្រទេសមួយចំនួន ដែលត្រូវបានគេសម្លាប់នាពេលកន្លងមក។ ទង្វើនៃការប្រៀបប្រដូចបែបនេះ គឺជាការប្រមាថយ៉ាងខ្លាំងដល់អាយុជីវិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជាកម្ពុជា ដែលកើតឡើងពីការបោះឆ្នោត ដោយសេរី ត្រឹមត្រូវ និងយុត្តិធម៌ តាមបែបប្រជាធិបតេយ្យសេរីពហុបក្ស និងមានការគាំទ្រដ៏លើសលប់ពីពីប្រជាពលរដ្ឋដែលជាម្ចាស់អំណាច ខុសពីបណ្តាប្រទេសទាំងនោះដែលមានតែការធ្វើរដ្ឋប្រហារដើម្បីកាន់អំណាច មិនធ្លាប់មានការបោះឆ្នោតម្តងណានោះទេ។
តាមការពិត ការធ្វើពហិការបស់បក្សប្រឆាំងមិនចូលប្រជុំសភា ឬការបន្តវាយប្រហារមកលើម្រមុខដឹកនាំប្រទេស វាគ្រាន់តែជាការអនុវត្តផែនការខ្មៅកខ្វក់ ក្នុងការបង្វែរទិសដៅ ញុះញង់ ដុតបញ្ឆេះកំហឹងប្រជាពលរដ្ឋ បង្កើតបញ្ហាពីខាងក្រៅ យកមករំងាប់បញ្ហាខាងក្នុងរបស់គណបក្សប្រឆាំងដែលកំពុងបែកខ្ទេចខ្ទីជាច្រើនចំណែកតែប៉ុណ្ណោះ។ ការដុតបញ្ឆេះកំហឹងដោយចង់ផ្តួលរំលំរាជរដ្ឋាភិបាលបច្ចុប្បន្ន គឺជាការបំផុសសង្រ្គាមចិត្តសាស្ត្រដ៏គ្រោះថ្នាក់ នៃការចង់សំរេចផែនការដែលមិនស្របតាមលទ្ធិប្រជាធិបតេយ្យ ហើយវានឹងបញ្ជាក់យ៉ាងច្បាស់នូវចេតនាដ៏អាក្រក់នៃការជាន់ឈ្លីលើច្បាប់រដ្ឋធម្មនុញ្ញ ក្បត់នឹងឆន្ទៈប្រជាពលរដ្ឋម្ចាស់ឆ្នោត ឬជាការបំផ្លាញផលប្រយោជន៍ជាតិទាំងមូល ជាមួយនឹងការមិនចង់ឱ្យមានការអភិវឌ្ឍន៍ប្រទេស ដែលសកម្មភាពទាំងនោះនឹងមិនអាចកើតមានបានឡើយនៅកម្ពុជា។ រាជរដ្ឋាភិបាលមានកាតព្វកិច្ចយ៉ាងពេញលេញ ដើម្បីការពាររដ្ឋធម្មនុញ្ញ ការពារឯកភាពជាតិ និងស្ថេរភាពនយោបាយ ជាពិសេសសន្តិភាព ដែលពលរដ្ឋកម្ពុជាបានទទួលដោយលំបាកមកនេះមិនឱ្យបាត់បង់នោះទេ។
បើពិពណ៌នាអំពីគម្រោងការទុចរិតរបស់គណបក្ស សម រង្ស៊ី ដែលបង្កើតនូវបញ្ហាតាមរយៈការបើកផ្លូវឱ្យតំណាងរាស្ត្ររបស់ខ្លួនចំនួន៤រូប លាលែងចេញពីតួនាទីជាអ្នកតំណាងរាស្ត្រ គឺគណបក្សសម រង្ស៊ី ប្រាកដជានឹងជួបនូវឧបសគ្គដ៏ធ្ងន់ធ្ងរសង្កត់ពីលើបន្ថែមទៀត ដោយសារហេតុផលនៃការដើរចោលជួរនោះ ហើយការអស់សុពលភាពរបស់
អ្នកតំណាងរាស្ត្រទាំង៤រូប ប្រសិនបើពួកគេពិតជាដើរចេញពីតួនាទីមែននោះ បើយោងតាមច្បាប់បោះឆ្នោតរបស់គណៈកម្មាធិការជាតិរៀបចំការបោះឆ្នោត គឺគណបក្សនយោបាយដទៃនឹងមានសិទ្ធិគ្រប់គ្រាន់ក្នុងការចែកគ្នាទទួលយកកៅអីតំណាងរាស្ត្រនោះដោយស្វ័យប្រវត្តិ។
ក្រុមអ្នកច្បាប់មួយចំនួន បានពន្យល់ថា ការលេងល្បែងនយោបាយពហិកា របស់គណបក្សសម រង្ស៊ី គឺជាការយល់ខុសទាំងស្រុងចំពោះល័ក្ខខ័ណ្ឌនៃតួលេខ១២០នៃចំនួនសភាដែលចែងក្នុងមាត្រា៧៦នៃរដ្ឋធម្មនុញ្ញ ពីព្រោះថា ការធ្វើពហិកាមិនចូលប្រជុំសភាដើម្បីអនុម័តកញ្ចប់ថវិកា នឹងមិនអាចនាំឱ្យមានវិបត្តិធម្មនុញ្ញឡើយ ផ្ទុយទៅវិញវាជាការយល់ព្រមដោយស្មគ្រ័ចិត្តទទួលចាប់កាន់ដុំដែកដ៏ក្តៅ ដោយខ្លួនឯង ដែលកើតចេញពីគំនិតទុទិដ្ឋិនិយមជ្រុល។
ការបកស្រាយច្បាប់រដ្ឋធមនុញ្ញ ដើម្បីបញ្ចប់នូវមន្ទិលសង្ស័យអំពីភាពត្រឹមត្រូវ ច្បាស់លាស់ដែលស្របទៅនឹងគោលការណ៍ច្បាប់របស់ព្រះរាជាណាចក្រកម្ពុជា និងបិទផ្លូវតវ៉ា គឺជាលទ្ធផលដែលបានមកពីការពន្យល់វែកញែករបស់ក្រុមប្រឹក្សាធម្មនុញ្ញរបស់កម្ពុជា។ ភាពជាក់ស្តែងប្រាកដនិយម ហើយបានធ្លាប់កើតមានឡើងក្នុងតំណាក់កាល នៃការឆ្លងកាត់នីតិកាលសម្រាប់អាណត្តិថ្មីរបស់រដ្ឋសភាម្តងៗ កម្ពុជាធ្លាប់បានហែលឆ្លងនូវការដោះស្រាយរកវិធីគន្លឹះនានា ដើម្បីទម្លុះទម្លាយបញ្ចប់វិបត្តិ និងឈានទៅដល់ការបង្កើតបាននូវសភាធម្មនុញ្ញ និងរាជរដ្ឋាភិបាល ។
មាត្រា៧៦ វាក្យខ័ណ្ឌ១ ចែងថា «រដ្ឋសភាមានសមាជិកតំណាងរាស្ត្រយ៉ាងតិច១២០រូប» បន្ទាប់មកវាក្យខ័ណ្ឌ២ បានបញ្ជាក់យ៉ាងច្បាស់ថា អ្នកតំណាងរាស្ត្រយ៉ាងតិច ១២០រូបនេះ ត្រូវបានជ្រើសតាំងតាមរយៈការបោះឆ្នោតជាសកល ដោយសេរី ដោយស្មើភាព ដោយចំពោះ និងតាមវិធីជ្រើសរើសបោះឆ្នោតជាសម្ងាត់។ ដូចនេះ រដ្ឋធម្មនុញ្ញមាត្រា៧៦ មានន័យថា រដ្ឋសភាភ្ជាប់ខ្លួនជាមួយនឹងនីតិកាលបោះឆ្នោត ហើយរដ្ឋសភានៃនីតិកាលនីមួយៗត្រូវបង្កើតឡើងតាមរយៈការបោះឆ្នោតជ្រើសតាំងតំណាងរាស្ត្រក្នុងចំនួនយ៉ាងតិច១២០នាក់ ហើយចំនួននោះក៏ដើម្បីការបង្កើតរដ្ឋសភាដ៏ពេញលេញ ជាអង្គនីតិបញ្ញត្តិ។ រដ្ឋសភាដែលមាននូវលក្ខណៈសម្បត្តិគ្រប់គ្រាន់ត្រូវបានចេញដំណើរពីការបើកសម័យប្រជុំដំបូង នៃនីតិកាលរបស់ខ្លួនតាមការកោះប្រជុំពីព្រះមហាក្សត្រ អនុលោមតាមមាត្រា៨២ វាក្យខ័ណ្ឌ១ នៃរដ្ឋធម្មនុញ្ញ ។ បានសេចក្តីថា «តួលេខ១២០ គឺជាល័ក្ខខ័ណ្ឌសុពលភាពនៃការបង្កើតរដ្ឋសភា តែប៉ុណ្ណោះ»។
រីឯដំណើរការបំពេញការងាររបស់នីតិបញ្ញត្តិវិញ គឺរដ្ឋសភា អាចប្រជុំអនុម័តបាន ឬមិនបាន វាអាស្រ័យលើកូរ៉ុម ហើយល័ក្ខខ័ណ្ឌ កូរ៉ុម បានចែងយ៉ាងច្បាស់នៅក្នុងមាត្រា៨៨ វាក្យខ័ណ្ឌ៣ នៃរដ្ឋធម្មនុញ្ញ ដោយកំណត់ថា កូរ៉ុម ចំនួន២ភាគ៣ នៃសមាជិកសភាទាំងមូល គឺជាល័ក្ខខ័ណ្ឌនៃការប្រជុំរដ្ឋសភា សម្រាប់ការអនុម័តទាំងឡាយណាដែលផ្អែកលើមតិភាគច្រើន២ភាគ៣ នៃសមាជិករដ្ឋសភាទាំងមូល ។ ដូច្នេះ សមាជិកសភារបស់គណបក្សប្រជាជនកម្ពុជាមានចំនួនលើសពី២ភាគ៣ ទៅទៀតនៅក្នុងរដ្ឋសភា ជាទិដ្ឋភាពគតិយុត្តិ រាជរដ្ឋាភិបាល ឬគណបក្សប្រជាជនកម្ពុជានិយាយដោយឡែក និងរដ្ឋសភានិយាយជារួម អាចសំរេចអនុម័តច្បាប់នានា ដោយមិនបង្កជាឧបសគ្គរាំងស្ទះអ្វីទាំងអស់ ដែលក្នុងនោះមានសិទ្ធិគ្រប់គ្រាន់ទាំងការអនុម័តលើវិសោធនកម្មរដ្ឋធម្មនុញ្ញ ការអនុម័តដកអភ័យឯកសិទ្ធិអ្នកតំណាងរាស្ត្រ ការអនុម័តបន្តនីតិកាលរដ្ឋសភាក្នុងពេលប្រទេសជាតិមានសង្គ្រាម។ល។ ដោយឡែកការកំណត់កូរ៉ុមភាគច្រើនដាច់ខាតនៃសមាជិករដ្ឋសភាទាំងមូល គឺជាល័ក្ខខ័ណ្ឌនៃការប្រជុំរដ្ឋសភាសម្រាប់ការអនុម័តទាំងឡាយណាផ្អែកលើមតិភាគច្រើនដាច់ខាតនៃសមាជិករដ្ឋសភាទាំងមូល ដូចជាការអនុម័តលើសេចក្តីព្រាងច្បាប់ ឬសេចក្តីស្នើច្បាប់ ការអនុម័តផ្តល់សេចក្តីទុកចិត្តលើការបង្កើតរាជរដ្ឋាភិបាល ជាដើម។
ដូច្នេះ បើទោះបីជាគណបក្សសម រង្ស៊ី ទាំង២៦រូប សំរេចចិត្តមិនចូលប្រជុំរដ្ឋសភា ដូចតាមការប្រកាសមែនក្តី ក៏មិនអាចទាញទម្លាក់រដ្ឋសភាទៅក្នុងអធម្មនុញ្ញភាពបានដែរ ពីព្រោះរដ្ឋសភានីតិកាលទី៤ បានកើតចេញជារូបរាងពេញលក្ខណៈស្របច្បាប់រួចទៅហើយ និងកំពុងដំណើរការជាប្រក្រតីឈានឆ្ពោះទៅរកការបោះឆ្នោតអាណត្តិខាងមុខទៀត ។
រាជរដ្ឋាភិបាលបច្ចុប្បន្នដែលកើតចេញពីការបោះឆ្នោត ផ្តល់សេចក្តីទុកចិត្តពីប្រជាពលរដ្ឋដ៏ច្រើនលើសលប់ បាន និងកំពុងបោះជំហានឆ្ពោះទៅមុខដោយសមត្ថភាពដំណើរការពេញបរិបូរណ៌ ស្របតាមគោលការណ៍ប្រជាធិបតេយ្យសេរីពហុបក្ស ហើយនៅកម្ពុជាក៏មានគណបក្សនយោបាយជាច្រើនចូលរួមប្រកួតប្រជែងការបោះឆ្នោតយ៉ាងទៀតទាត់៥ឆ្នាំម្តងៗ ប្រព្រឹត្តទៅដោយសេរី ត្រឹមត្រូវ និងយុត្តិធម៌ គឺមិនដូចការប្រឌិតព័ត៌មានមិនពិត ភូតកុហក់បោកប្រាស់ ពីសំណាក់គណបក្ស សម រង្ស៊ី ចង់ប្រែក្លាយសន្តិភាព ទៅរកសង្គ្រាម ដោយប៉ុនប៉ងបង្កើតនូវបញ្ហាចលាចល ដើម្បីបំណងចង់ផ្លាស់ប្តូររបបមួយដោយរំលងឆន្ទៈរបស់ប្រជាពលរដ្ឋបាននោះទេ។
ផ្ទុយទៅវិញ ផែនការពហិកាមិនចូលប្រជុំសភា យុទ្ធវិធីផ្គើនលើផ្លូវច្បាប់ ការប្រដូចថ្នាក់ដឹកនាំកម្ពុជាទៅនឹងមេដឹកនាំនៃបណ្តាប្រទេសមួយចំនួនដែលត្រូវបានសម្លាប់ ដោយគណបក្សសម រង្ស៊ី គឺជាការរំលោភទាំងកំរោលលើសិទ្ធិនយោបាយរបស់សម្តេចហ៊ុន សែន ជាពិសេស គឺជាការប្រមាថយ៉ាងធ្ងន់ធ្ងរដល់អាយុជីវិតរបស់ថ្នាក់ដឹកនាំមួយរូប ដែលជាឥស្សរជននាំមកនូវសន្តិភាពសម្រាប់កម្ពុជា ដែលទង្វើបែបនេះ រាជរដ្ឋាភិបាលមានសិទ្ធិគ្រប់គ្រាន់ក្នុងការចាត់វិធានការផ្លូវច្បាប់ ដើម្បីការពាររដ្ឋធម្មនុញ្ញ និងរក្សាឱ្យបានជាដាច់ខាតនូវតម្លៃនៃសន្តិភាព។
ទីបំផុត ការប៉ុនប៉ងដាក់គំនាបមកលើរាជរដ្ឋាភិបាល ដើម្បីរកច្រកចូលស្រុកសម្រាប់លោក សម រង្ស៊ី ដែលកំពុងនិរទេសខ្លួន គេចចេញពីការទទួលខុសត្រូវផ្លូវច្បាប់នៅពីក្រោយការប្រព្រឹត្តបទល្មើសនានា ត្រូវបានជាប់គាំង ហើយយុទ្ធវិធីបង្កសង្គ្រាម ញុះញង់ បំផ្លាញផលប្រយោជន៍ជាតិ មិនចង់ឱ្យមានការអភិវឌ្ឍន៍ គឺជាកលល្បិចដ៏ពិសពុលក្នុងការបំបែកឯកភាពជាតិ ដើម្បីទាក់ទាញសមាណចិត្តពីបរទេសឱ្យជួយការពារអំពើខុសច្បាប់របស់ខ្លួនតែប៉ុណ្ណោះ។ លទ្ធផល ដែលគណបក្ស សម រង្ស៊ី នឹងទទួលបានមកវិញនោះ គឺស្មើនឹងការធ្វើអត្តឃាតនយោបាយ សម្លាប់ខ្លួនឯង៕
ដោយៈ ពូន សំរេច
ថ្ងៃទី១៧ ខែ វិច្ឆិកា ឆ្នាំ ២០១
Subscribe to:
Posts (Atom)