ពិធីបុណ្យសមុទ្រ
និង បុណ្យឆ្លង ឆ្នាំសកល ២០១១ ដែលមានការតាំងពិពណ៌និងសំដែងសិល្បៈ
ប្រព្រឹត្តទៅនារាត្រីថ្ងៃ៣១ ឈានចូលថ្ងៃទី១ ខែមករា ឆ្នាំ២០១២ នៅក្រុង
ព្រះសីហនុ ដែលមានមនុស្សប្រមាណជិត ៦ម៉ឺននាក់ ចូលរួម បានទទួល ជោគជ័យ
យ៉ាងធំធេង តាមការរំពឹងទុករបស់ឯកឧត្តម បណ្ឌិត សុខ អាន ។
ថ្លែងបើកការប្រារព្ធពិធីដែលធ្វើឡើងនៅឆ្នេរអូឈើទាល
ខេត្តព្រះសីហនុ នារាត្រី ថ្ងៃទី៣១ ខែធ្នូឆ្នាំ២០១១ ឯកឧត្តម បណ្ឌិត
សុខ អាន បានមានប្រសាសន៍ថា
ខ្ញុំមានជំនឿយ៉ាងមុតមាំថាការរៀបចំពិធីបុណ្យសមុទ្រនេះជារួមចំណែកយ៉ាង
សំខាន់ក្នុងការអភិវឌ្ឍន៍ទេសចរណ៍នៅតំបន់ឆ្នេរសមុទ្រកម្ពុជា។
ឯកឧត្តម បណ្ឌិត សុខ អាន បានមានប្រសាសន៍បញ្ជាក់ថា
ការអនុញ្ញាតដ៍ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន
ឲ្យមានការរៀបចំពិធីបុណ្យសមុទ្រនៅខេត្ត ព្រះសីហនុ
ឆ្នាំនេះឆ្លុះបញ្ចាំងពីការគាំទ្រររបស់រាជរដ្ឋាភិបាលក្នុងការជំរុញកិច្ច
អភិវឌ្ឍន៍ឆ្នេសមុទ្រកម្ពុជា ដែលបាននិងកំពុងដើរតួនាទីយ៉ាងសំខាន់
ជាប៉ូលសេដ្ឋកិច្ច ក្នុងការទាក់ទាញវិនិយោគ
សំរាប់ជំរុញកំណើនសេដ្ឋកិច្ចជាតិនិង
ត្រូវបានចាត់ទុកថាជាគោលដៅទេសចរណ៍ដ៍មានភាពទាក់ទាញរួមចំណែកធ្វើឲ្យ
តំបន់ឆ្នេរសមុទ្រកម្ពុជាមានការវិវត្ត
ប្រែប្រួលមុខមាត់ថ្មីសមជាតារារះនាទិសនិរតីនិង
ជាសមាជិកក្លិបឆ្នេសមុទ្រដែលស្អាតលើសកលលោក។
ក្នុងនាមរាជរដ្ឋាភិបាលនិង ក្នុងនាមសម្តេចតេជោនាយករដ្ឋមន្ត្រី ឯកឧត្តម
បណ្ឌិត សុខ អាន បានកោតសរសើរក្រសួងទេសចរណ៍
ដែលបានខិខំអនុវត្តភារកិច្ចរបស់ខ្លួនប្រកបដោយការទទួលខុសត្រូវ និងសមស្រប
ពិសេសការធ្វើពិពិធកម្មទេសចរណ៍
និងការតភ្ជាប់តំបន់ទេសចរណ៍បេតិកភ័ណ្ឌវប្បធម៌ និងប្រវត្តិសាស្រ្ត
សៀមរាបអង្គរ ទៅនឹងតំបន់ឆ្នេរសមុទ្រកម្ពុជា។ ឯកឧត្តម បណ្ឌិត សុខ អាន
មានប្រសាសន៍ថាការតភ្ជាប់នេះស្តែងឲ្យឃើញកាន់តែច្បាស់តាមរយៈជើងហោះហើរ
សៀមរាប -ព្រះសីហនុ -សៀមរាប របស់ក្រុមហ៊ុន អាកាសចរជាតិ
កម្ពុជាអង្គរអ៊ែរដែលត្រូវបានដាក់សម្ពោធដាក់ឲ្យដំណើរការកាលពីថ្ងៃទី១៩
ខែធ្នូ ឆ្នាំ២០១១
ទាក់ទងនឹងបញ្ហាកំណើនសេដ្ឋកិច្ច ឯកឧត្តម បណ្ឌិត សុខ អាន
បានមានប្រសាសន៍ថា
សំរាប់ឆ្នាំ២០១១នេះទោះបីកម្ពុជាត្រូវប្រឈមមុខនឹងគ្រោះទឹកជំនន់ក៍ដោយ
តាមការព្យាករណ៍ កម្ពុជានៅតែអាចសំរេចបាន កំណើនសេដ្ឋកិច្ចប្រមាណ៦,៤% ដែរ ។
ឯកឧត្តម
ថោង ខុន
រដ្ឋមន្ត្រីក្រសួងទេសចរណ៍បានឲ្យដឹងថា៖ពិធីធ្វើបុណ្យសមុទ្រ
ត្រូវបានធ្វើឡើងក្រោយពេលព្រះរាជាណាចក្រកម្ពុជាបានចូលជាសមាជិក
ក្លឹបនៃប្រទេសដែលមានឆ្នេសមុទ្រស្អាតលើសកលលោក កាលពីខែ ឧសភា ឆ្នាំ ២០១១ ។
ឯកឧត្តម ថោង ខុន បានមានប្រសាសន៍ថា៖« ការធ្វើបុណ្យសមុទ្រនេះ
ទីមួយគឺឃោសនាអំពីសក្តានុពលទេសចរណ៍តំបន់សមុទ្រ។ គ្រប់ប្រទេសទាំងអស់
ក្រោយពីបានធ្វើបុណ្យឆ្នេរហើយតែងតែមានភ្ញៀវទេសចណ៍កើនឡើងយ៉ាងតិច
១៥%។ ឆ្លងតាមបុណ្យនេះ យើងបំផុសស្មារតីប្រជាជន
ស្ថាប័នពាក់ព័ន្ធទាំងអស់ឲ្យចូលរួមការពារ និងអភិវឌ្ឍតំបន់សមុទ្រ»។
ក្នុងការអភិវឌ្ឍន៍វិស័យទេសចរណ៍
កម្ពុជាសម្រេចបានសមិទ្ធផលគួរជាទីមោទនៈ។ នៅឆ្នាំ ២០១០
កម្ពុជាទទួលបានភ្ញៀវទេសចរណ៍អន្តរជាតិ ជាង២,៥លាននាក់ ក្នុងអត្រាកំណើន
១៦%ធៀបក្នុងឆ្នាំ ២០០៩។ ឆ្នាំ ២០១១
ភ្ញៀវទេសចរណ៍កើនឡើងដល់ប្របានជាង២,៨លាននាក់ កើនប្រមាណ១៤%
ធៀបនឹងឆ្នាំ២០១០។
កម្ពុជាសង្ឃឹមថានឹងទទួលបានភ្ញៀវទេសចរណ៍អន្តរជាតិប្រមាណ
៤,៥លាននាក់នៅឆ្នាំ ២០១៥ និងប្រមាណ ៧លាននាក់ ក្នុងឆ្នាំ២០២០ ។
ឯកឧត្តម
បណ្ឌិត សុខ អាន
បានមានប្រសាសន៍ថាការរីកចំរើននៃវិស័យទេសចរណ៍ដែលត្រូវបានចាត់ទុកថាជាមាស
បៃតង
ពិតជាបានរួមចំណែកយ៉ាងខ្លាំងក្នុងការអភិវឌ្ឍន៍សេដ្ឋកិច្ចសង្គមពិសេស
ចូលរួមដល់ការសំរេចបាននូវគោលដៅអភិវឌ្ឍន៍សហសវត្សន៍
របស់អង្គការសហប្រជាជាតិក៍ដូចជាយុទ្ធសាស្រ្តចតុកោណ ដំណាក់កាលទី២
របស់រាជរដ្ឋាភិបាលដើម្បី «កំណើន ការងារ ប្រសិទ្ធភាព និងសមធម៌»។
កម្ពុជាមានឆ្នេរសមុទ្រប្រវែង ប្រមាណជាង ៤០០គ.ម ស្ថិតក្នុងខេត្តព្រះសីហនុ កោះកុង កំពត និងខេត្តកែប។ ឯកឧត្តម បណ្ឌិត សុខ អាន បានមានប្រសាសន៍ថា ខេត្តទាំង៤ នឹងត្រូវផ្លាស់ប្តូរវេនគ្នារៀបចំពីធីបុណ្យសមុទ្រជារាងរាល់ឆ្នាំ។ ក្នុងយុទ្ធនាការផ្សព្វផ្សាយទេសចរណ៍ «កម្ពុជាព្រះរាជាណាចក្រ អច្ឆរិយៈ (Cambodia – Kingdom of Wonder)» និងចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ ឯកឧត្តម បណ្ឌិត សុខ អាន បានអំពាវនាវឲ្យក្រសួងស្ថាប័នពាក់ព័ន្ធ អាជ្ញាធរមូលដ្ឋាននិង បងប្អូនប្រជាពលរដ្ឋមានស្មារតីប្រុងប្រយ័ត្នខ្ពស់ចំពោះ ការអភិវឌ្ឍន៍តំបន់ឆ្នេរធ្វើយ៉ាងណាធានាឲ្យមានការអភិវឌ្ឍន៍បៃតង នៅតំបន់នេះស័ក្តិសមជាសមាជិកក្លឹបឆ្នេរសមុទ្រដ៍ស្រស់ស្អាតលើសកលោក។
