សាកលវិទ្យាល័យពុទ្ធិសាស្រ្តដែលមានឯកឧត្តម សុខ ពុទ្ធិវុធ ជាសាកលវិទ្យាធិការ
និងអង្គការមូលនិធិគាំទ្រការអប់រំអន្តរជាតិកម្ពុជា (CIESF)
មានលោកសាស្រ្តាចារ្យ ហ៊ីឌឺអូ អូឃូបុ
(Hideo Okhubo)
ជាប្រធានបានប្រារព្ធការប្រកួតផ្តាច់ព្រ័ត្រ និងប្រគល់រង្វាន់ចំពោះ “ការប្រកួតគម្រោងអាជីវកម្មខ្នាតនិងមធ្យមថា្នក់ជាតិឆ្នាំ
២០១១” នៅថ្ងៃសៅរ៍ទី ២៨ ខែមករា ឆ្នាំ ២០១២ នៅវេលាម៉ោង១៨:00-២០:00
នៅសណ្ឋាគារភ្នំពេញក្រោមអធិបតីភាពឯកឧត្តម ពេជ្រ សោភ័ណ រដ្ឋលេខាធិការក្រសួងការងារ
និងបណ្តុះបណ្តាលវិជ្ជាជីវៈតំណាងដ៏ខ្ពង់ខ្ពស់របស់ឯកឧត្តមបណ្ឌិត សុខ អាន ឧបនាយករដ្ឋមន្រ្តី
រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី។
នេះជាលើកទីពីរហើយដែលសាកលវិទ្យាល័យពុទ្ធិសាស្រ្ត(UP)
និងមូលនិធិគាំទ្រការអប់រំអន្តរជាតិកម្ពុជា(CIESF) បានសហការរៀបចំការប្រកួតនេះ
ដោយមានការសហការពីសាកលវិទ្យាល័យ WASEDA
នៃប្រទេសជប៉ុនផងដែរ។ និស្សិតទាំងអស់ដែលកំពុងសិក្សានៅតាមសាកលវិទ្យាល័យនៅទូទាំងព្រះរាជាណាចក្រកម្ពុជា
និងនិស្សិតបានបញ្ចប់ការសិក្សាហើយ ចំនួន ៦៥ ក្រុម ដែលមានសមាជិក ៣
នាក់ ក្នុងមួយក្រុមបានផ្ញើគម្រោងអាជីវកម្មសង្ខេប
ដែលប្រភេទអាជីវកម្មនោះអាចជាអាជីវកម្មដើម្បីផលចំណេញ
ឬអាជីវកម្មដើម្បីសង្គម មកចូលរួមប្រកួតប្រជែង។
ការប្រកួតគម្រោងអាជីវកម្មខ្នាតតូច និងមធ្យមថ្នាក់ជាតិឆ្នាំ ២០១១
បានចាប់ផ្តើមនៅខែកក្កដា ឆ្នាំ ២០១១។ នៅក្នុងចំណោមនិស្សិត ៦៥
ក្រុមមកពីសាកលវិទ្យាល័យ និងវិទ្យាស្ថាននានាចំនួន ១៥ គឺមាន១០
ក្រុមដែលមានគម្រោងអាជីវកម្មល្អជាងគេត្រូវបានគណៈកម្មការមេប្រយោគអន្តរជាតិជ្រើសរើស
នៅថ្ងៃទី៥ ខែវិច្ឆិកា ឆ្នាំ ២០១១ និងបានទទួលការបណ្តុះបណ្តាលផ្នែករៀបចំផែនការអាជីវកម្ម
និងការគ្រប់គ្រងសហគ្រាសរហូតដល់ថ្ងៃទី ២៨ ខែមករា ឆ្នាំ ២០១២
ពិធីប្រកួតផ្តាច់ព្រ័ត្រត្រូវបានប្រារព្ធឡើង។
ឯកឧត្តម ពេជ្រ សោភ័ណ តំណាងដ៏ខ្ពង់ខ្ពស់របស់ឯកឧត្តមបណ្ឌិត
សុខ អាន ឧបនាយករដ្ឋមន្រ្តី
រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីបានមានប្រសាសន៍ចាត់ទុកការរៀបចំប្រកួតប្រជែង
ការប្រកួតគម្រោងអាជីវកម្មខ្នាតនិងមធ្យមថា្នក់ជាតិឆ្នាំ ២០១១
ដោយសាកលវិទ្យាល័យពុទ្ធិសាស្រ្តសហការជាមួយ មូលនិធិគាំទ្រការអប់រំអន្តរជាតិកម្ពុជា
(CIESF)
បានជួយផ្តល់ការអប់រំដ៏មានសារៈសំខាន់
ដល់យុវជនកម្ពុជានូវការគិតគូអំពីការរកកំរៃ
ដែលមិនត្រឹមតែសម្រាប់សហគ្រិនអាជីវកម្ម
ក៏ប៉ុន្តែសម្រាប់ភាពជាអ្នកដឹកនាំអាជីវកម្មសង្គម
ដែលផ្តោតសំខាន់ទៅលើការផលិត និងផ្តល់សេវា។ ឯកឧត្តម ពេជ្រ សោភ័ណ មានប្រសាសន៍ថា
ខ្ញុំសប្បាយរីករាយដោយបានឃើញថា ការប្រកួតប្រជែងគម្រោងអាជីវកម្មខ្នាតតូច
និងមធ្យម បានលើកកម្ពស់ទស្សនាទានទាំងពីរ
ហើយមូលនិធិគាំទ្រការអប់រំអន្តរជាតិកម្ពុជា(CIESF) មកពីប្រទេសជប៉ុននឹងជួយយ៉ាងសកម្ម
ដើម្បីសម្របសម្រួលដល់ហិរញ្ញវត្ថុដល់និស្សិតឆ្នើម ដែលរៀនពីធុរៈកិច្ច
នូវគំនិតទទួលខុសត្រូវចំពោះសង្គម
ដើម្បីធ្វើធ្វើឲ្យសុបិនក្លាយជាការពិត។
ឯកឧត្តមរដ្ឋលេខាធិការក្រសួងការងារ
និងបណ្តុះបណ្តាលវិជ្ជាជីវៈបានចាត់ទុកវិស័យសហគ្រាសខ្នាតតូច
និងមធ្យមមានសារៈសំខាន់យ៉ាងខ្លាំងក្នុងការអភិវឌ្ឍន៍សេដ្ឋកិច្ចកម្ពុជាទាំងការជម្រុញកំណើនសេដ្ឋ
ក៏ដូចជាបង្កើតការងារជូនប្រជាពលរដ្ឋ។ ឯកឧត្តម ពេជ្រ សោភ័ណ មានប្រសាសន៍ថា
វាមានសារៈសំខាន់ខ្លាំងណាស់ទាំងរដ្ឋ
និងវិស័យឯកជននៅក្នុងព្រះរាជាណាចក្រកម្ពុជា
ក្នុងផ្តោតទៅលើការអភិវឌ្ឍន៍គំនិតអំពីសហគ្រិននៅក្នុងចំណោមយុវជន
ដែលបញ្ចប់ការសិក្សាដើម្បីអាចឲ្យពួកគេក្លាយជាអ្នកចូលរួមដ៏សកម្មក្នុងការអភិវឌ្ឍន៍សេដ្ឋកិច្ចកម្ពុជាតាមរយៈបង្កើតសហគ្រាសធនតូច
និងមធ្យមនៅគ្រប់វិស័យ ជាគន្លឹះនៃសេដ្ឋកិច្ច។
សូមបញ្ជាក់ថា ក្រុមដែលទទួលបានពិន្ទុលើសគេ ៣ ក្រុម ក្នុងនោះលេខ១
បានទៅក្រុមនិស្សិតមកពីសាកលវិទ្យាល័យពុទ្ធិសាស្រ្តទទួលបានរង្វាន់ចំនួន
៣០០០ ដុល្លារ។ ២០០០ ដុល្លារសម្រាប់ជ័យលាភីលេខ២បានទៅ ក្រុមនិស្សិតមកពីសាកលវិទ្យាល័យមេគង្គកម្ពុជា
និង១០០០ ដុល្លារសម្រាប់ជ័យលាភីលេខ៣ បានទៅ និស្សិតមកពីវិទ្យាស្ថានភាសាបរទេស(IFL) ព្រមទាំងការឧបត្ថម្ភរបស់មូលនិធិ CIESF ដើម្បីដំណើរការអាជីវកម្មរបស់ខ្លួន។
ក្រុមដែលបានទទួលជ័យលាភីលេខ១ និងជ័យលាភីលេខ២ មានសិទ្ធិចូលរួមការប្រកួតថ្នាក់តំបន់
ដែលមានឈ្មោះថា McKinsey
Mekong Business Plan Challenge ដែលនឹងរៀបចំឡើងនៅចុងខែមីនា ឆ្នាំ ២០១២។