សុន្ទរកថា
ឯកឧត្តម សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា
ថ្លែងក្នុងពិធីសម្ពោធអគារសិក្សាថ្មីចនួនបីខ្នង៖ វិទ្យាល័យ ហ៊ុន សែន ផ្តៅជុំវិទ្យាល័យខ្ពបអាទាវ និងវិទ្យាល័យសំពៅពូន
នាព្រឹកថ្ងៃទី០១ ខែមីនា ឆ្នាំ២០១២
- សូមថ្វាយបង្គំព្រះតេជគុណ ព្រះថេរានុថេរៈគ្រប់ព្រះអង្គ ជាទីសក្ការៈ
- លោកបណ្ឌិត Wolfgang KOPETZKY អគ្គលេខាធិការកាកបាទក្រហមអូទ្រីស
- ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិ និង អន្តរជាតិ
- បងប្អូនជនរួមជាតិ លោកគ្រូ អ្នកគ្រូ ក្មួយៗសិស្សានុសិស្ស ទាំងអស់ជា ទីស្រឡាញ់ រាប់ អាន!
ថ្ងៃនេះ ខ្ញុំព្រះករុណាខ្ញុំ
និងភរិយាមានសេចក្តីសោមនស្សរីករាយ
ចូលរួមជាមួយព្រះថេរានុថេរៈគ្រប់ព្រះអង្គ ឯកឧត្តម លោកឧកញ៉ា លោកជំទាវ
អស់លោក លោកស្រី ភ្ញៀវកិត្តិយសជាតិ អន្តរជាតិ បងប្អូនរួមជាតិ
ព្រមទាំងកាកបាទក្រហមអូទ្រីស ក្នុងពិធី សម្ពោធអគារសិក្សាថ្មីចំនួនបីខ្នងគឺ វិទ្យាល័យ ហ៊ុន សែន ផ្តៅជុំ ឃុំផ្តៅជុំ ស្រុកជើងព្រៃ ខេត្តកំពង់ចាម វិទ្យាល័យខ្ពបអាទាវ ឃុំខ្ពបអាទាវ ស្រុកលើកដែក ខេត្តកណ្តាល និងវិទ្យាល័យសំពៅពូន ឃុំសំពៅពូន ស្រុកកោះធំ ខេត្តកណ្តាល។
ក្នុងឱកាសនេះ
យើងនាំគ្នាប្រារព្ធពិធីសម្ពោធអគារសិក្សាថ្មីទាំងបីខ្នង សង់ ២ជាន់ មាន
៣០បន្ទប់ ជាការរំលឹក
និងសម្តែងនូវការដឹងគុណយ៉ាងជ្រាលជ្រៅជូនចំពោះសពលោក ហ្គែហាត ម៉ូតាលីក
(GERHARD MOTALIK) ជាអ្នកនិពន្ធជនជាតិអូទ្រីស
ដែលបានទទួលមរណភាពនៅថ្ងៃទី១៧ ខែមិថុនា ឆ្នាំ២០០៩
និងដែលបានធ្វើអំណោយជាកេរមរតកដ៏ថ្លៃថ្លាជូនកាកបាទក្រហមកម្ពុជា
តាមរយៈតុលាការក្រុងវីយ៉ែន។ សូមរំលឹកថា ដើម្បីទទួលបានមរតកចំនួនសរុប ៩៩៩.២៩៣,២៣ ដុល្លារសហរដ្ឋអាមេរិក
កាកបាទក្រហមកម្ពុជាបានខិតខំបំពេញការងារយ៉ាងខ្លាំងដោយខ្លួនឯង
ដោយមានកិច្ចសហប្រតិបត្តិការអន្តរជាតិ
និងបានសហការជាមួយកាកបាទក្រហមអូទ្រីស
តាមនីតិវិធីនានាទៅតាមច្បាប់របស់ប្រទេសអូទ្រីស អស់រយៈពេលរហូតដល់ ១៣ខែ ទើបសម្រេចបានលទ្ធផលគួរជាទីមោទនៈដូចដែលយើងបានឃើញនាពេលនេះ។
ឆ្លៀតក្នុងឱកាសនេះ ក្នុងនាមសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ខ្ញុំព្រះករុណាខ្ញុំ និងភរិយា សូមសម្តែងនូវការកោតសរសើរ និងវាយតម្លៃខ្ពស់ផងដែរ ៖
- ចំពោះកាកបាទក្រហមអូទ្រីស
និងលោកបណ្ឌិត Wolfgang KOPETZKY អគ្គលេខាធិការកាកបាទក្រហមអូទ្រីស
ដែលបានជួយជ្រោមជ្រែង និងសហការក្នុងដំណើរការដោះស្រាយ មរតកនេះ
- ចំពោះលោក មីសែល ហ្រ្វែនហ្សែល មន្រ្តីកាកបាទក្រហមអូទ្រីស ដែលបានធ្វើជាតំណាងកាកបាទក្រហមកម្ពុជា សម្រាប់ទទួលខុសត្រូវការងារមរតកនេះ
- ចំពោះឯកឧត្តម ហោ ណាំហុង
ឧបនាយករដ្ឋមន្រ្តី
រដ្ឋមន្រ្តីក្រសួងការបរទេសនិងសហប្រតិបត្តិការអន្តរជាតិ
ដែលបានជួយជ្រោមជ្រែង
និងផ្តល់កិច្ចសហការល្អក្នុងកិច្ចដំណើរដោះស្រាយដើម្បីទទួលយកមរតក
- ចំពោះឯកឧត្តម ហោ ណាំបូរ៉ា ឯកអគ្គរាជទូតកម្ពុជាប្រចាំចក្រភពអង់គ្លេស និងលោក មាស ដាវីត មេធាវីរាជរដ្ឋាភិបាល ដែលជាតំណាងកាកបាទក្រហមកម្ពុជាធ្វើការផ្ទាល់ជាមួយលោក មីសែល ហ្វ្រែនហ្សែល។
លើសពីនេះទៀត
ខ្ញុំព្រះករុណាខ្ញុំ សូមថ្លែងអំណរគុណយ៉ាងជ្រាលជ្រៅ
និងវាយតម្លៃខ្ពស់ចំពោះបេសកកម្មមនុស្សធម៌ដ៏ថ្លៃថ្លារបស់កាកបាទ
ក្រហមកម្ពុជា
ក្រោមការដឹកនាំប្រកបដោយគតិបណ្ឌិតរបស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែល
បានខិតខំប្រឹងប្រែង
ដើម្បីទទួលបានមរតកដ៏ថ្លៃថ្លានេះសម្រាប់ជាប្រយោជន៍ជូនជាតិមាតុភូមិ
ជាពិសេសប្រជាជនកម្ពុជា និងកុមារទីទ័លក្រ។
កាយវិការដ៏សប្បុរសធម៌ និងសមានចិត្តដ៏ថ្លៃថ្លារបស់សពលោក ហ្គែហាត ម៉ូតាលីក ព្រម
ទាំងទឹកចិត្ត និងសកម្មភាពគាំទ្រពីកាកបាទក្រហមអូទ្រីស
រដ្ឋាភិបាលអូទ្រីស ក្រសួងការបរទេសនិងសហប្រតិបត្តិការអន្តរជាតិ
និងពីកាកបាទក្រហមកម្ពុជា គឺពិតជាកាយវិការដ៏គួរឱ្យគោរព
និងស្ញប់ស្ញែងជាទីបំផុត ដែលខ្ញុំព្រះករុណាខ្ញុំ និងភរិយា
សូមគាំទ្រយ៉ាងពេញទំហឹង និងចូលរួមយ៉ាងសកម្មក្នុងបេសកកម្មមនុស្សធម៌នេះ។
ខ្ញុំព្រះករុណាខ្ញុំយល់ថា យើងគួរលើកកម្ពស់
និងបង្កើនការយល់ដឹងអំពីកាយវិការដ៏សប្បុរសធម៌
និងបេសកកម្មមនុស្សធម៌របស់យើងឱ្យបានជ្រួតជ្រាបជាសារធារណៈ
ទាំងក្នុងនិងក្រៅប្រទេស ពិសេសលើកទឹកចិត្ត
និងគាំទ្រចំពោះសមានចិត្តជួយខ្មែរ ក្នុងចំណោមជនជាតិបរទេស
និងជនជាតិខ្មែរ។
- ព្រះតេជគុណ ព្រះថេរានុថេរៈគ្រប់ព្រះអង្គ
- ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិ និងអន្តរ ជាតិ
- បងប្អូនជនរួមជាតិ លោកគ្រូ អ្នកគ្រូ ក្មួយៗសិស្សានុសិស្ស
តាមគំនិតផ្តួចផ្តើមរបស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា មរតកដែលទទួលបានពីលោក ហ្គែហាត ម៉ូតាលីក ត្រូវបានប្រើប្រាស់សម្រាប់ជាប្រយោជន៍ សាធារណៈ និងប្រជាជនខ្មែរយើងនោះ គឺការកសាងអគារសិក្សាចំនួន ៣ខ្នង ដែលមានប្លង់រួមមួយ ហើយមួយខ្នងៗមានកម្ពស់ ២ជាន់ និងមានបន្ទប់រៀនចំនួន ១០ ដែលសរុបថវិកាសាងសង់អស់ ៤៥៩.០៤៨ ដុល្លារសហរដ្ឋអាមេរិក ដោយឡែក
ចំពោះថវិកាដែលនៅសល់នឹងត្រូវប្រើប្រាស់សម្រាប់ជួយដល់កុមារកំព្រា។
ខ្ញុំសូមគាំទ្រគំនិតផ្តួចផ្តើមនេះ
និងលើកទឹកចិត្តឱ្យកាកបាទក្រហមកម្ពុជាបន្តបំពេញបេសកកម្មនេះ
ប្រកបដោយជោគជ័យ ពិសេសគឺជួយដល់កុមារី ក្រោមអាយុ ១៤ ឆ្នាំ ដែលគ្មានទីជម្រក។
យោងតាមខ្លឹមសារព័ត៌មានរបស់កាកបាទក្រហមកម្ពុជាអំពីលោក ហ្គែហាត ម៉ូតាលីក និងមរតករបស់លោក ខ្ញុំសូមកត់សម្គាល់នូវចំណុចសំខាន់មួយចំនួនដូចខាងក្រោម៖
ទី១- ប្រ
ទេសកម្ពុជាដែលជាព្រះរាជាណាចក្រអច្ឆរិយៈ
មិនត្រឹមតែធ្វើឱ្យភ្ញៀវទេសចរជាប់ចិត្ត
និងកម្សាន្តសប្បាយជាមួយនឹងធម្មជាតិ និងវប្បធម៌របស់យើងប៉ុណ្ណោះទេ
ប៉ុន្តែថែមទាំងជាប់ចិត្តនឹងទឹកដី និងប្រជាជនខ្មែរទៀតផង។
ប្រការនេះបានធ្វើឱ្យវិស័យទេសចរណ៍
និងវប្បធម៌យើងក្លាយជាគោលដៅគួរឱ្យចាប់ចិត្ត ចង់មកទស្សនា ចង់មករស់នៅ
ចង់មកជួយ និងចង់បន្សល់ទុកនូវអនុស្សវរីយ៍នានារបស់ភ្ញៀវទេសចរ
ជាក់ស្តែងដូចដែលលោក ហ្គែហាត ម៉ូតាលីក បានបន្សល់ទុកសម្រាប់កម្ពុជា ដែលនេះជាកាយវិការបង្ហាញពីសមានចិត្តដិតជាប់ជាងគេបំផុតរបស់លោកចំពោះកម្ពុជា ។
ទី២- តុលារការទីក្រុងវីយ៉ែនបានជួយដោះស្រាយតាមនីតិវិធីច្បាប់នូវមរតករបស់លោក ហ្គែហាត ម៉ូតាលីក ដែលបាន
បន្សល់ទុកនូវមរតកសម្រាប់ប្រជាជនកម្ពុជា
ពិសេសសម្រាប់កុមារីគ្មានទីជម្រក ដែលមានអាយុក្រោម ១៤ឆ្នាំ។ តាមរយៈនេះ
បង្ហាញឱ្យឃើញថា បេសកកម្មរបស់តុលាការទីក្រុងវីយ៉ែន ពិតជាមានសារៈ
សំខាន់ណាស់ ដើម្បីធ្វើឱ្យបណ្តាំផ្ញើរបស់លោក ហ្គែហាត ម៉ូតាលីក សម្រេចបាន
ពេញលេញ
ហើយនេះជាកិច្ចចាប់ផ្តើមសម្រាប់ឱ្យកាកបាទក្រហមកម្ពុជាទទួលបានមរតក
និងចាត់ចែងតាមមរតកសាសន៍។ ក្នុងនាមរាជរដ្ឋាភិបាល
ខ្ញុំសូមថ្លែងអំណរគុណ
និងសម្តែងនូវការគាំទ្រចំពោះបេសកកម្មដ៏ថ្លៃថ្លារបស់តុលាការ
ទីក្រុងវីយ៉ែន ដែលបានដោះស្រាយកិច្ចការមរតកនេះ។
ទី៣- តាមរយៈកាកបាទក្រហមអូទ្រីស កាកបាទក្រហមកម្ពុជាបានទទួលព័ត៌មានពីតុលាការទីក្រុងវីយ៉ែនស្តីពីមរតកលោក ហ្គែហាត ម៉ូតាលីក នៅក្នុងខែកញ្ញា ឆ្នាំ២០១០។ លើសពីនេះទៀត កាកបាទក្រហមអូទ្រីសថែមទាំងបានធ្វើជាតំណាង និងបានចាត់តាំងលោក មីសែល ហ្វ្រែនហ្សែល ឱ្យ
ទទួលខុសត្រូវដោះស្រាយការងារមរតកនេះទៀតផង។ ខ្ញុំសូមចាត់ទុកថា
ទាំងនេះគឺជាបេសកកម្មមនុស្សធម៌ដ៏ត្រចះត្រចង់របស់កាកបាទក្រហមអូទ្រីស
ចំពោះប្រជាជនកម្ពុជា តាមរយៈកាកបាទក្រហមកម្ពុជា។
ខ្ញុំមានជំនឿយ៉ាងមុតមាំថាកាកបាទក្រហមអូទ្រីសនឹងនៅតែបន្តធ្វើកិច្ច
សហការជាមួយកាកបាទក្រហមកម្ពុជា និងបំពេញការងារមនុស្សធម៌ដទៃទៀត
សម្រាប់ជួយដល់កម្ពុជា។
ទី៤- ដើម្បីទទួលបាននូវមរតកដ៏ថ្លៃថ្លានេះ ឯកឧត្តម ហោ ណាំហុង
ឧបនាយករដ្ឋមន្រ្តី
និងជារដ្ឋមន្រ្តីការបរទេសនិងសហប្រតិបត្តិការអន្តរជាតិ
បានជួយជ្រោមជ្រែងជាប្រចាំដល់កាកបាទក្រហមកម្ពុជា
ថែមទាំងបានចាត់តាំងមន្ត្រីជាន់ខ្ពស់ពីររូប
ឱ្យធ្វើជាតំណាងរបស់កាកបាទក្រហមកម្ពុជា
ដើម្បីធ្វើការផ្ទាល់ជាមួយតំណាងកាកបាទក្រហមអូទ្រីស
និងពិគ្រោះយោបល់គ្នាអំពីដំណោះស្រាយមរតកនេះ។ នេះគឺជាបេសកកម្មដ៏វិសេស
ដែលមានចរិតការទូតផង
និងមនុស្សធម៌ផងរបស់ក្រសួងការបរទេសនិងសហប្រតិបត្តការអន្តរជាតិ
ហើយដែលអនុវត្តបានយ៉ាងល្អ ក្នុងការសម្របសម្រួល
និងដោះស្រាយបញ្ហាមរតកក្នុងកម្រិតអន្តរជាតិ។
ទី៥-
ដោយសារបេសកកម្ម និងសកម្មភាពមនុស្សធម៌ពិតៗរបស់កាកបាទក្រហមកម្ពុជានៅ
ទូទាំងព្រះរាជាណាចក្រកម្ពុជា
ដែលធ្វើឱ្យសាធារណជនទូទៅមានការជឿជាក់និងចូលរួម
ព្រមទាំងមានការទទួលស្គាល់នៅលើឆាកអន្តរជាតិ ទើបធ្វើឱ្យលោក ហ្គែហាត ម៉ូតាលីក មានការចាប់អារម្មណ៍យ៉ាងខ្លាំង ហើយបានប្រគល់មរតកជូនចំពោះសកម្មភាពរបស់កាកបាទក្រហមកម្ពុជា ដែលមានសេចក្តីជាអាទិ៍ថា “ទ្រព្យសម្បត្តិរបស់ខ្ញុំទាំងអស់ ទាំងចលនៈ និងអចលនទ្រព្យ សូមប្រគល់ជូនកាកបាទក្រហមកម្ពុជា...” ។
ទន្ទឹមនេះ
ខ្ញុំសូមវាយតម្លៃខ្ពស់ចំពោះកិច្ចខិតខំប្រឹងប្រែងរបស់កាកបាទក្រហម
កម្ពុជា ក្នុងការរក្សាតម្លៃមរតកនេះឱ្យបានយូរអង្វែង
តាមរយៈការកសាងអគារសិក្សា ៣ខ្នង នៅវិទ្យាល័យខ្ពបអាទាវ ស្រុកលើកដែក
ខេត្តកណ្តាល វិទ្យាល័យសំពៅពូន ស្រុកកោះធំ ខេត្តកណ្តាល និងវិទ្យាល័យ ហ៊ុន
សែន ផ្តៅជុំ ស្រុកជើងព្រៃ ខេត្តកំពង់ចាម។
កិច្ចខិតខំប្រឹងប្រែងទាំងនេះ
គឺពិតជាបេសកកម្មដ៏ឧត្តុង្គឧត្តមដែលបានឆ្លើយតបទៅនឹងគោលបំណង
របស់ម្ចាស់មរតក
ហើយបានធ្វើឱ្យឈ្មោះរបស់គាត់ស្ថិតនៅដិតជាប់ជាមួយប្រជាជន
និងទឹកដីកម្ពុជាថែមទៀតផង។ ជាមួយគ្នានេះដែរ
ខ្ញុំសូមគាំទ្រដល់កាកបាទក្រហមកម្ពុជាក្នុងការប្រើប្រាស់ថវិកាដែល
នៅសល់ក្នុងកញ្ចប់ថវិកាមរតកនេះ សម្រាប់ជួយដល់កុមារីគ្មានទីជម្រក
ដែលមានអាយុក្រោម ១៤ ឆ្នាំ។
ទី៦-
ជាការពិតណាស់ យើងត្រូវមានការគាំទ្រ និងកិច្ចសហការពីស្ថាប័នពាក់ព័ន្ធ
និងរដ្ឋបាលថ្នាក់ក្រោមជាតិ ដើម្បីប្រើប្រាស់មរតកនេះឱ្យចំទិសដៅ
មានតម្លាភាព និងអាចជឿទុកចិត្តបាន។ ខ្ញុំជឿ
ជាក់ថា បេសកកម្មមនុស្សធម៌របស់ស្ថាប័នពាក់ព័ន្ធ
និងរដ្ឋបាលថ្នាក់ក្រោមជាតិ គឺជាវប្បធម៌គំរូដ៏ល្អ
សម្រាប់យើងទាំងអស់គ្នា ពោលគឺយើងទាំងអស់គ្នារួមគ្នាដើម្បីកម្លាំងមនុស្សធម៌។
តាមរយៈចំណុចទាំង ៦ ខាងលើ
បេសកកម្មមនុស្សធម៌អាចសម្រេចបាន អាស្រ័យដោយយើងរួបរួមគ្នា
និងមានការឧបត្ថម្ភគាំទ្រពីគ្រប់មជ្ឈដ្ឋាន។ ជាក់ស្តែង
អំណោយឬមរតកមនុស្សធម៌ នឹងពុំមានសម្រាប់យើងទេ
ប្រសិនបើយើងពុំមានបេសកកម្មមនុស្សធម៌។ ក្នុងន័យនេះ
ខ្ញុំសូមអំពាវនាវឱ្យមានបេសកកម្មមនុស្សធម៌
និងការកៀរគរការចូលរួមពីគ្រប់មជ្ឈដ្ឋាន សំដៅជួយជាតិមាតុភូមិ
ពិសេសជួយដល់ជនក្រីក្រនិងជនងាយរងគ្រោះ។
- ព្រះតេជគុណ ព្រះថេរានុថេរៈគ្រប់ព្រះអង្គ
- ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិនិងអន្តរជាតិ
- បងប្អូនជនរួមជាតិ លោកគ្រូ អ្នកគ្រូ ក្មួយៗសិស្សានុសិស្ស
កាយវិការដ៏សប្បុរសជាមរតករបស់លោក ហ្គែហាត ម៉ូតាលីក ពិតជាបាន
ស្ថិតដក់ជាប់ក្នុងអារម្មណ៍ និងក្រាំងប្រវត្តិសាស្ត្ររបស់កម្ពុជា
និងជាគំរូដ៏ល្អសម្រាប់ប្រជាពលរដ្ឋគ្រប់រូប ទាំងក្នុងបច្ចុប្បន្ន
និងអនាគត ក្នុងការចូលរួមចំណែកក្នុងវិស័យអប់រំ បណ្តុះបណ្តាល
និងអភិវឌ្ឍសេដ្ឋកិច្ច-សង្គម ប្រកបដោយចិរភាព
និងផ្តល់ឱកាសប្រកបដោយសមធម៌ជូនក្មួយៗសិស្សានុសិស្សទាំងអស់បានសិក្សា
រៀនសូត្រ សម្រាប់សេចក្តីសង្ឃឹមក្នុងជីវិត
និងរួមចំណែកដល់ការអភិវឌ្ឍន៍ប្រទេសជាតិមាតុភូមិជាទីស្នេហារបស់ខ្លួន។
ដោយសារមរតកនេះ
និងកិច្ចខិតខំប្រឹងប្រែងរបស់ក្រសួង-ស្ថាប័នទាំងនៅអូទ្រីស
និងនៅកម្ពុជា ទើបយើងទទួលបាននូវអគារសិក្សាថ្មីទៀត
ដែលជាសមិទ្ធផលសម្រាប់វិស័យអប់រំនៅកម្ពុជា
ជាពិសេសសម្រាប់សិស្សានុសិស្សនៅស្រុកជើងព្រៃ ខេត្តកំពង់ចាម
ស្រុកលើកដែក និងស្រុកកោះធំ ខេត្តកណ្តាល។
មុននឹងសម្ពោធដាក់ឱ្យប្រើប្រាស់ជាផ្លូវការនូវអគារសិក្សាទាំងនេះ
យើងទាំងអស់គ្នាសូមឧទ្ទិសគោរពចំពោះវិញ្ញាណក្ខ័ន្ធសព
ព្រមទាំងនឹកដល់គុណូបការៈ និងទឹកចិត្តដ៏សប្បុរសធម៌របស់លោក ហែហ្គាត ម៉ូតាលីក អតីតអ្នកនិពន្ធជនជាតិអូទ្រីស ដែលបានធ្វើមរតកជូនកាកបាទក្រហមកម្ពុជា។
ជាថ្មីម្តងទៀត ក្នុងនាមសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន
កាកបាទក្រហមកម្ពុជាខ្ញុំព្រះករុណាខ្ញុំ និងភរិយា សូមកោតសរសើរ
និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់តុលាការ
ទីក្រុងវីយ៉ែន កាកបាទក្រហមអូទ្រីស
ក្រសួងការបរទេសនិងសហប្រតិបត្តិការអន្តរជាតិ កាកបាទក្រហមកម្ពុជា
ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ
ដែលបានជួយសម្របសម្រួលដើម្បីទទួលបានមរតកដ៏សប្បុរសនេះ។
ជាមួយនឹងការប្រកាសសម្ពោធដាក់ឱ្យប្រើប្រាស់ជាផ្លូវការ អគារសិក្សាវិទ្យាល័យ ហ៊ុន សែន ផ្តៅជុំ ឃុំផ្តៅជុំ ស្រុកជើងព្រៃ ខេត្តកំពង់ចាម វិទ្យាល័យខ្ពបអាទាវ ឃុំខ្ពបអាទាវ ស្រុកលើកដែក ខេត្តកណ្តាល និងវិទ្យាល័យសំពៅពូន ឃុំសំពៅពូន ស្រុកកោះធំ ខេត្តកណ្តាល ខ្ញុំព្រះករុណាខ្ញុំ និងភរិយា សូមប្រគេនពរព្រះតេជគុណព្រះសង្ឃគ្រប់ព្រះអង្គ សូមជូនពរ លោកបណ្ឌិត វ៉ុលហ្គាង កូផេតស្គី
ឯកឧត្តម លោកជំទាវ លោកឧកញ៉ា អស់លោក លោកស្រី ព្រមទាំងលោកគ្រូ អ្នកគ្រូ
និងក្មួយៗសិស្សានុសិស្សទាំងអស់ មានសុខភាពល្អ ជោគជ័យគ្រប់ភារកិច្ច
និងមានសុភមង្គលនៅក្នុងក្រុមគ្រួសារ។
សូមអរព្រះគុណ និងសូមអរគុណ