ឯកឧត្ដមបណ្ឌិត សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានអញ្ជើញ ជា អធិបតី ក្នុងសិក្ខាសាលា ស្ដីពីការផ្សព្វផ្សាយ និងអនុវត្ត
កិច្ចព្រមព្រៀងទទួលស្គាល់គ្នាទៅវិញទៅមក ក្នុង
មុខជំនាញវិជ្ជាជីវៈទេសចរណ៍អាសាន និងពិធីប្រគល់សញ្ញាបត្រ
ឯកឧត្តមបណ្ឌិត ថោង ខុន
រដ្ឋមន្ត្រីក្រសួងទេសចរណ៍ ដោយសាកលវិទ្យាល័យសេដ្ឋកិច្ចជាតិហាណូយ
ដែលប្រារព្ធធ្វើនៅនៅវិមានមិត្តភាពនៃទីស្តីការគណៈរដ្ឋមន្រ្តីនា
ព្រឹកថ្ងៃទី២៩ ខែ មីនា ឆ្នាំ ២០១២ ។
ថ្លែងនៅក្នុងពិធីជាមួយនឹងការអបអរសាទរ និងសរសើរចំពោះ ចំពោះឯកឧត្តមបណ្ឌិត ថោង ខុន
រដ្ឋមន្ត្រី ក្រសួងទេសចរណ៍ ដែលបានទទួលសញ្ញាបត្រ
បណ្ឌិតគ្រប់គ្រងទេសចរណ៍ជំនាញអេកូទេសចរណ៍ពីសាកលវិទ្យាល័យសេដ្ឋកិច្ច
ជាតិហាណូយ ឯកឧត្តមបណ្ឌិត សុខ អាន ក៏បានកោតសរសើរ
និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ
និងមន្ត្រីរាជការទាំងអស់របស់ក្រសួងទេសចរណ៍
និងគណៈកម្មាធិការជាតិអ្នកជំនាញទេសចរណ៍ ព្រមទាំងភាគីពាក់ព័ន្ធទាំងអស់
ក្នុងការជំរុញការអនុវត្ត របស់កម្ពុជា
ក្នុងកិច្ចព្រមព្រៀងទទួលស្គាល់គ្នាទៅវិញទៅមក
ក្នុងជំនាញវិជ្ជាជីវៈទេសចរណ៍អាស៊ាន ដ៏មានសារៈសំខាន់នោះ ។
ឯកឧត្តមបណ្ឌិត សុខ អាន បានមានប្រសាសន៍ថា រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្រេច
បាននូវសមិទ្ធផលធំៗជាច្រើនជូនជាតិមាតុភូមិ និងប្រជាជន ជាពិសេស
ការនាំមកនិងធានាបាននូវសន្តិភាព ស្ថិរភាពនយោបាយ សុវត្ថិភាពសង្គម
និងសណ្តាប់ធ្នាប់សាធារណៈ ព្រមទាំងការដាក់ចេញនូវគោលនយោបាយ ផែនការ
និងយុទ្ធសាស្ត្រសំខាន់ៗជាច្រើនក្នុងការអភិវឌ្ឍសេដ្ឋកិច្ច-សង្គម
សំដៅលើកកំពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ។
ជាក់ស្តែង នៅឆ្នាំ ២០១១
កម្ពុជាសម្រេចបាននូវកំណើនសេដ្ឋកិច្ចក្នុងអត្រាប្រមាណ ៧% ហើយអត្រាភាពក្រីក្រថយចុះមកត្រឹម ២៥,៨% ក្នុង
ឆ្នាំ ២០១០។ សមិទ្ធផលទាំងនេះ
គឺទទួលបានដោយសារការដឹកនាំដ៏ត្រឹមត្រូវប្រកបដោយឆន្ទៈនយោបាយមោះមុត
និងភាពឈ្លាសវៃរបស់សម្តេចតេជោប្រមុខរាជរដ្ឋាភិបាល
តាមរយៈការដាក់ចេញគោលនយោបាយ យុទ្ធសាស្ត្រ និងផែនការអភិវឌ្ឍត្រឹមត្រូវ
ច្បាស់លាស់ និងមានលក្ខណៈប្រាកដប្រជា
គួបផ្សំនឹងយន្តការស្ថាប័នគ្រប់គ្រងប្រកបដោយប្រសិទ្ធភាពលើគ្រប់វិស័យ។
ឯកឧត្តមបណ្ឌិតឧបនាយករដ្ឋមន្រ្តី បានបញ្ជាក់ថា
វិស័យទេសចរណ៍ក៏ត្រូវបានចាត់ទុកជាវិស័យអាទិភាពមួយ ជាមាសបៃតង និងជាការនាំចេញនៅនឹងកន្លែង ក្នុងការរួម
ចំណែកដល់ការអភិវឌ្ឍសេដ្ឋកិច្ច-សង្គម និង ការថែរក្សាបរិស្ថាន ជាពិសេស
ចូលរួមដល់ការសម្រេចបាននូវគោលដៅអភិវឌ្ឍន៍សហស្សវត្សរបស់អង្គការ
សហប្រជាជាតិ
ក៏ដូចជាយុទ្ធសាស្ត្រចតុកោណដំណាក់កាលទីពីររបស់រាជរដ្ឋាភិបាល ដើម្បី “កំណើន ការងារ ប្រសិទ្ធភាព និង សមធម៌”។
តាមរយៈឯកឧត្តមបណ្ឌិត សុខ អាន បាន
ឲ្យដឹងថា
កម្ពុជាសម្រេចបានសមិទ្ធផលគួរជាទីមោទនៈក្នុងការអភិវឌ្ឍវិស័យ
ទេសចរណ៍ដែលកំពុងមានសន្ទុះកំណើនដ៏គំហុកក្នុងរយៈកាលចុងក្រោយនេះ។
ជាក់ស្តែងក្នុងឆ្នាំ ២០១១ នេះ កម្ពុជាទទួលបានភ្ញៀវទេសចរអន្តរជាតិប្រមាណជាង ២,៨លាននាក់ ដែលបាននាំមកនូវចំណូលប្រមាណ ១៩១២លានដុល្លារ ស្មើនឹងប្រមាណ ១២% នៃផលិតផលក្នុងស្រុកសរុប (GDP) ព្រមទាំងបង្កើតការងារដោយផ្ទាល់ប្រមាណ ៣សែន៥ម៉ឺននាក់ និង
ដោយប្រយោលរាប់សែននាក់បន្ថែមទៀត។
តាមការប៉ាន់ស្មានដោយក្រសួងទេសចរណ៍
កម្ពុជាសង្ឃឹមថានឹងទទួលបានភ្ញៀវទេសចរ អន្តរជាតិប្រមាណ ៤,៥លាននាក់ នៅឆ្នាំ២០១៥ និងប្រមាណ ៧លាននាក់ នៅឆ្នាំ២០២០ ដែលនឹងបង្កើត ការងារប្រមាណ ៨សែននាក់ នៅឆ្នាំ២០២០។
កិច្ចព្រមព្រៀងទទួលស្គាល់គ្នាទៅវិញទៅមកក្នុងជំនាញវិជ្ជាជីវៈទេសចរណ៍
ត្រូវបានចុះហត្ថលេខាកាលពីថ្ងៃទី ៨ ខែមករា ឆ្នាំ ២០១១
ដោយរដ្ឋមន្រ្តីក្រសួងទេសចរណ៍នៃប្រទេសអាស៊ានទាំង ១០
នៅសាធារណរដ្ឋសង្គមនិយមវៀតណាម។
កិច្ចព្រមព្រៀងទទួលស្គាល់គ្នាទៅវិញទៅមកក្នុងជំនាញវិជ្ជាជីវៈទេសចរណ៍
គឺផ្តោត ទៅលើចល័តភាព របស់ជំនាញវិជ្ជាជីវៈទេសចរណ៍ចំនួន៣២ មុខជំនាញ
ដោយផ្តោតលើសេវាកម្មសំខាន់ ២ គឺទី១ សេវាកម្មសណ្ឋាគារ ដែលរួមមាន
៤ផ្នែកគឺ ផ្នែកការិយាល័យជួរមុខ ផ្នែកគេហកិច្ច
ផ្នែកផលិតកម្មម្ហូបអាហារ ផ្នែកសេវាកម្មអាហារ និងភេសជ្ជៈ ។ ទី២
សេវាកម្ម ធ្វើដំណើរ ដែលរួមមាន ២ផ្នែក គឺ ផ្នែកទីភ្នាក់ងារទេសចរណ៍
និងផ្នែកប្រតិបត្តិការខ្សែទស្សនកិច្ច។
ទាក់ទងនឹងកិច្ចព្រមព្រៀងនេះ ឯកឧត្តមបណ្ឌិត ថោង ខុន
រដ្ឋមន្រ្តីក្រសួងទេសចរណ៍បានឲ្យដឹងថា
ដើម្បីឆ្លើយតបនឹងការរីកចម្រើនឥតឈប់ឈរនៃវិស័យទេសចរណ៍
និងដើម្បីឆ្ពោះទៅរកការកសាងសហគមន៍អាស៊ាននៅឆ្នាំ ២០១៥
អាស៊ានបានដាក់ចេញនូវផែនការយុទ្ធសាស្រ្តទេសចរណ៍អាស៊ាន(ATSP
2011-2015) ដែលបានអនុម័ត ដោយរដ្ឋមន្រ្តីទេសចរណ៍អាស៊ាន
ក្នុងឱកាសវេទិកាទេសចរណ៍អាស៊ាន(ATF-2011) នៅរាជធានីភ្នំពេញ
ដោយសំដៅធ្វើយ៉ាងណាឲ្យអាស៊ានជាដៅទេសចរណ៍លំដាប់ពិភពលោក(ASEAN-A
World Class Tourist Destination )
និងផ្តល់ភាពកក់ក្តៅដល់ទេសចរណ៍(ASEAN-Feel The Warmth)
ហើយក្នុងនោះ ការបង្កើនគុណភាពធនធានមនុស្សក្នុងវិស័យទេសចរណ៍
គឺជាចំណុចគោលដៅយុទ្ធសាស្រ្តអាទិភាពមួយ
ក្នុងចំណោមគោលដៅយុទ្ធសាស្រ្តអាទិភាពទាំង៣ របស់ផែនការនេះ
ពោលគឺធើ្វយ៉ាងណាសម្រួលការបម្លាស់ទីអ្នកជំនាញទេសចរណ៍
រវាងប្រទេសជាសមាជិកឲ្យបានពេញលេញចាប់ពីឆ្នាំ ២០១៥ ទៅ ។
ឯកឧត្តមបណ្ឌិត សុខ អាន ឧបនាយក
រដ្ឋមន្ត្រីបានបញ្ជាក់ថា ចាប់ពីឆ្នាំ២០១៥
ទៅអ្នកជំនាញវិជ្ជាជីវៈទេសចរណ៍អាស៊ាន ក្នុងជំនាញណាមួយ
នៃជំនាញទាំង៣២មុខ ដែលទទួលបាន
ការទទួលស្គាល់នូវវិជ្ជាជីវៈផ្នែកទេសចរណ៍ អាចមាន
លទ្ធភាពទៅបំពេញការងារក្នុងបណ្តាប្រទេសជាសមាជិកអាស៊ានណាមួយក៏បាន។
ដើម្បីទទួលបាននូវការទទួលស្គាល់ បុគ្គលម្នាក់ត្រូវមាន
គុណវុឌ្ឍិជាក់ច្បាស់ ដូចដែលបានកំណត់
ទើបអាចទៅបំពេញការងារក្នុងជំនាញណាមួយបាន
គឺទាមទារអោយមានការបណ្តុះបណ្តាលត្រឹមត្រូវ ទៅតាមស្តង់ដាសមត្ថភាព
និងកម្មវិធីបណ្តុះបណ្តាលដែលបានដាក់ចេញក្នុងក្របខ័ណ្ឌអាស៊ាន។
ជាង
នេះទៀត ការរៀបចំកិច្ចព្រមព្រៀងទទួលស្គាល់គ្នាទៅវិញទៅមក
គឺដើម្បីចូលរួមអនុវត្ត
ការធ្វើសមាហរណកម្មអាស៊ានប្រកបដោយប្រសិទ្ធភាពខ្ពស់ និងតម្លាភាព
ដែលប្រទេសជាសមាជិកទទួលបានប្រយោជន៍ជាច្រើន
ដូចជាតាមរយៈការកាត់បន្ថយតម្លៃ បង្កើនភាពប្រកួតប្រជែង
ធានាលំនឹងទីផ្សារការងារក្នុងអាស៊ាន ជំរុញលំហូរពាណិជ្ជកម្ម
និងសេវាកម្ម ក្នុងតំបន់ជាដើម។ ជាពិសេសគឺធានាបាននូវការជឿទុកចិត្ត
ភាពជាដៃគូ និងកិច្ចសហការជិតស្និទ្ធ រវាងបណ្តាប្រទេសជាសមាជិក
ព្រមទាំងចូលរួមដល់ការ ពង្រឹងការអភិវឌ្ឍធនធានមនុស្ស
និងគុណភាពសេវាកម្មទេសចរណ៍ផងដែរ ។
ដើម្បី
ធានាថាព្រះរាជាណាចក្រកម្ពុជា
ត្រៀមខ្លួនបានត្រឹមត្រូវក្នុងការចូលរួមជំរុញការអនុវត្តកិច្ច
ព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍ នៅឆ្នាំ២០១៥
ឯកឧត្តមបណ្ឌិត សុខ អាន បានដាក់ចេញនូវអនុសាសន៍ចំនួន ៤ ចំណុចដូចខាងក្រោម ៖
- សូមឱ្យគ្រប់ស្ថាប័ន-គ្រឹះ ស្ថានអប់រំ សាលាបណ្តុះបណ្តាលជំនាញវិជ្ជាជីវៈក្នុងវិស័យទេសចរណ៍ ត្រូវរួសរាន់ធ្វើបច្ចុប្បន្នភាពកម្មវិធីបណ្តុះបណ្តាល និងកម្មវិធីសិក្សារបស់ខ្លួនឱ្យស្របតាមស្តង់ដាសមត្ថភាព និងកម្មវិធីបណ្តុះបណ្តាលដែលបានដាក់ចេញដោយគណៈកម្មាធិការជាតិអ្នកជំនាញ ទេសចរណ៍។ ក្នុងន័យនេះ គណៈកម្មាធិការជាតិអ្នកជំនាញទេសចរណ៍ ដោយសហការជាមួយក្រសួង ស្ថាប័នពាក់ព័ន្ធ “ត្រូវខិតខំរៀបចំឱ្យមានស្តង់ដាសមត្ថភាពអ្នកជំនាញទេសចរណ៍ កម្មវិធីបណ្តុះបណ្តាល ព្រមទាំងប្រព័ន្ធគុណវុឌ្ឍិសម្រាប់អ្នកជំនាញទេសចរណ៍កម្ពុជា ឱ្យបានឆាប់ ដើម្បីជាមូលដ្ឋានឱ្យគ្រប់គ្រឹះស្ថាន និងសាលាបណ្តុះបណ្តាលជំនាញវិជ្ជាជីវៈទេសចរណ៍ យកទៅប្រើប្រាស់ក្នុងការបណ្តុះបណ្តាល របស់ខ្លួន។
- ក្រសួង ទេសចរណ៍ និងគណៈកម្មាធិការជាតិអ្នកជំនាញទេសចរណ៍ ត្រូវរៀបចំលិខិតបទដ្ឋានគតិយុត្តិ ចាំបាច់នានាសម្រាប់ការគ្រប់គ្រងការបណ្តុះបណ្តាលវិជ្ជាជីវៈទេសចរណ៍ កម្ពុជា និង ដើម្បីឱ្យមានសុខដុមនីយកម្មនៃស្តង់ដាសមត្ថភាព និងកម្មវិធីបណ្តុះបណ្តាលថ្នាក់ជាតិតែមួយ នៅតាមសាលាបណ្តុះបណ្តាលជំនាញវិជ្ជាជីវៈទេសចរណ៍ទាំងអស់។
-
ទន្ទឹមនឹងការ ត្រៀមខ្លួនចូលរួមក្នុងចល័តភាពនៃអ្នកជំនាញអាស៊ាន នៅឆ្នាំ២០១៥ ខាងមុខនេះ ខ្ញុំសូមស្នើឱ្យមានការជ្រើសរើសសាលាបណ្តុះបណ្តាលជំនាញវិជ្ជាជីវៈ ទេសចរណ៍គំរូ ដែលបានបណ្តុះបណ្តាល ដោយអនុវត្តតាមស្តង់ដាសមត្ថភាព និងកម្មវិធីបណ្តុះបណ្តាលអាស៊ាន ដើម្បីជាមូលដ្ឋានសម្រាប់ជំរុញឱ្យសាលាបណ្តុះបណ្តាលវិជ្ជាជីវៈ ផ្សេងៗទៀតអនុវត្តតាម។
- គណៈកម្មាធិការ ជាតិអ្នកជំនាញទេសចរណ៍ ត្រូវបន្តជំរុញធ្វើការផ្សព្វផ្សាយស្មារតីនៃកិច្ចព្រមព្រៀងនេះ ឱ្យកាន់តែទូលំទូលាយ និងស៊ីជម្រៅដល់គ្រប់ភាគីពាក់ព័ន្ធ ជាអាទិ៍សាលាបណ្តុះបណ្តាលវិជ្ជាជីវៈ អ្នកទេសចរណ៍ ប្រតិបត្តិករទេសចរណ៍ សណ្ឋាគារ សេវាកម្មស្នាក់នៅ ភោជនីយដ្ឋាន សិស្ស និងនិស្សិត នៅតំបន់គោលដៅទេសចរណ៍ធំៗនៅកម្ពុជា។
ជាមួយនឹងការប្រកាសគាំទ្រផែនការ និងកម្មវិធីការងារអនុវត្តបន្តរបស់គណៈកម្មាធិការជាតិដែលបានលើកទ្បើងដោយឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍ ឯកឧត្តមបណ្ឌិត សុខ អាន ក៏
បានអំពាវនាវ ដល់សិស្សានុសិស្ស និស្សិតដែលកំពុងសិក្សាក្តី ឬ
អ្នកជំនាញវិជ្ជាជីវៈទេសចរណ៍កំពុងបម្រើការក្តី
ឲ្យយកចិត្តទុកដាក់អភិវឌ្ឍជំនាញរបស់ខ្លួនឱ្យបានល្អ
រួមផ្សំនឹងការអភិវឌ្ឍជំនាញភាសាបរទេសបន្ថែមផងដែរ
និងសូមឱ្យនិយោជកជាប្រតិបត្តិករទេសចរណ៍ ភោជនីយដ្ឋាន សេវាកម្មស្នាក់នៅ
មេត្តាផ្តល់នូវវគ្គបណ្តុះបណ្តាលដល់និយោជិតរបស់ខ្លួន
ដើម្បីឱ្យពួកគាត់កាន់តែមានសមត្ថភាពប្រកួតប្រជែង
ដើម្បីជាប្រយោជន៍ដល់ការផ្តល់នូវសេវាប្រកបដោយគុណភាពដល់ភ្ញៀវទេសចរ
ក៏ដូចជាបង្កើននូវផលិតភាពការងារជូនក្រុមហ៊ុនវិញផងដែរ។
នៅចុងបញ្ចប់នៃកម្មវិធីបើសិក្ខាសាលា ឯកឧត្តមបណ្ឌិត ថោង ខុន
រដ្ឋមន្ត្រីក្រសួងទេសចរណ៍ដែលបន្ទាប់ពី បានធ្វើនិក្ខេបបទ
ដោយជោគជ័យនៅសាកលវិទ្យាល័យសេដ្ឋកិច្ចជាតិ ហាណូយទាក់ទិននឹង
អេកូទេសចរណ៍កម្ពុជា ត្រូវបានលោកសាស្ត្រាចារ្យ ង្វៀន វ៉ានណាម
(Nguyen Van Nam) សាកលវិទ្យាធិការ
នៃសាកលវិទ្យាល័យសេដ្ឋកិច្ចជាតិហាណូយ និង សាស្ត្រាចារ្យ២រូបទៀត
នៃសាកលវិទ្យាល័យប្រគល់សញ្ញាបត្របណ្ឌិតគ្រប់គ្រងទេសចរណ៍
អេកូទេសចរណ៍ជូននៅក្រោមអធិបតីភាពឯកឧត្តមបណ្ឌិត សុខ អាន ឧបនាយក
រដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
និងការអបអរសាទរពីក្រុមគ្រួសារ និងមន្រ្តីនៃក្រសួងទេសចរណ៍
ព្រមទាំងវិស័យឯកជនដែលចូលរួមក្នុងសិក្ខាសាលា៕
