Preah Vihear Memorial: 04/02/12

Monday, April 2, 2012

ឯកឧត្តមបណ្ឌិត សុខ អាន ស្នើឲ្យធុរជនបារាំងសម្លឹងមើលសក្ដានុពលវិនិយោគនៅកម្ពុជា

ឯកឧត្ដមបណ្ឌិត សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី បានស្នើ នាព្រឹកថ្ងៃទី២ ខែមេសា ឆ្នាំ២០១២ ឲ្យក្រុមធុរជនបារាំង សម្លឹងមើល សក្ដានុពលវិនិយោគនៅកម្ពុជា ដោយសារកម្ពុជា មានវិស័យជាច្រើន ដែលអាចមកបណ្ដាក់ទុនវិនិយោគបាន ។ ឯកឧត្តមបណ្ឌិត សុខ អាន បានមានប្រសាសន៍ថា កម្ពុជាបានបើកចំហ លើវិស័យវិនិយោគ ដោយមិនរើសអើងប្រកាន់ និន្នាការ នយោបាយ ឬការទូតឡើយ។

ប្រសាសន៍ឯកឧត្តមបណ្ឌិត សុខ អាន ត្រូវបានធ្វើឡើងនៅ ទីស្តីការគណៈរដ្ឋមន្រ្តី ក្នុងឱកាសទទួលជួបពិភាក្សា ជាមួយគណៈប្រតិភូក្រុមប្រឹក្សាធុរជនបារាំងចំនួន២៦ នាក់ ដឹកនាំដោយលោក ហ្វ្រេដេរីក សង់ស្សេ (Frederic Sanchez) ។

លោក ហ្វ្រេដេរីក សង់ស្សេ (Frederic Sanchez) ប្រធានក្រុមប្រឹក្សាធុរជនបារាំង-កម្ពុជា នៃចលនាអន្តរជាតិសហគ្រាសបារាំង(MEDEF) បានបញ្ជាក់ថា ដោយសារទីផ្សារ នៅក្នុងតំបន់អាស៊ានមានការរីកចម្រើន ក្នុងនេះជាពិសេសនៅកម្ពុជា មានកំណើនសេដ្ឋកិច្ច និងសម្បូរ ទៅដោយ សក្ដានុពលសម្រាប់វិស័យនិយោគ លោកក៏បានដឹកនាំ គណៈប្រតិភូក្រុមប្រឹក្សាធុរជនបារាំង ដើម្បីមកសិក្សា ស្វែងយល់ ជាក់ស្ដែង លើសក្ដានុពល ដែលអាចធ្វើវិនិយោគនៅព្រះរាជាណាចក្រកម្ពុជា ដើម្បីជួយជម្រុញកំណើនសេដ្ឋកិច្ច។

ឯកឧត្ដមបណ្ឌិត សុខ អាន ឧបនាយករដ្ឋមន្ត្រី បានស្វាគមន៍ចំពោះបំណងរបស់គណៈប្រតិភូ ដែលបានស្វែងយល់ ការងារវិនិយោគនៅកម្ពុជា ហើយឯកឧត្តមបណ្ឌិត សុខ អាន បាន មានប្រសាសន៍ ថា ប្រទេសបារាំងបានស្គាល់កម្ពុជាយូរឆ្នាំមកហើយ ពិសេសប្រាសាទអង្គររបស់កម្ពុជា។ រដ្ឋាភិបាលប្រទេសបារាំង បាននាំមុខយ៉ាងខ្លាំង ក្នុងការធ្វើជាដៃគូជាមួយកម្ពុជាលើវិស័យ វប្បធម៌ ពិសេសជាសហប្រធាននៃគណៈកម្មាធិការអន្តរជាតិសម្រមសម្រួលអង្គរ (ICC-Angkor) ក្នុងការជួយជួសជុលប្រាសាទបូរាណ ដែលការងារក្លាយជាគំរូនៅលើពិភពលោក ប៉ុន្តែនៅលើការងាវិនិយោគវិញ បារាំងនៅមានតិចនៅឡើយ ។ ដោយសារកម្ពុជា កំពុងតែមានសក្ដានុពលខ្លាំងលើវិស័យទេសចរណ៍វប្បធម៌ ដែលមានកំណើន ១៥% ក្នុងមួយឆ្នាំ និងធនធានធម្មជាតិនោះ ឯកឧត្តមបណ្ឌិត សុខ អាន បានស្នើគណៈប្រតិភូធុរជនបារាំង ជួយពន្លឿនដល់វិស័យឯកជន និងសហគ្រាស របស់បារាំងឲ្យចូលមកកម្ពុជាឲ្យបានឆាប់ និងឲ្យបានច្រើន ។ ជាមួយនឹងការបញ្ជាក់ថា កម្ពុជា នឹងក្លាយជាច្រកទ្វារមួយពេលបង្កើតសហគមន៍សេដ្ឋកិច្ចអាស៊ាន ដែលជាឱកាសល្អសម្រាប់ការវិនិយោគពីបរទេស ឯកឧត្តមបណ្ឌិត សុខ អាន បាន ឲ្យប្រតិភូធុរជនបានបារាំងដឹងថា រាជរដ្ឋាភិបាលកម្ពុជា បានធ្វើការកែទម្រង់រដ្ឋបាលសាធារណៈ ក៏ដូចជាបង្កើតអង្គភាពប្រឆាំងអំពើពុករលួយ ដើម្បីទប់ស្កាត់ភាពអសកម្មនានា ជាពិសេសការបើកច្រកចេញចូលតែមួយ ដើម្បីផ្ដល់នូវភាពងាយស្រួល ចំពោះការងារវិនិយោគ។

ទស្សនៈទានរបស់សម្តេចតេជោ ដើម្បីបន្តពង្រឹងកិច្ចសហប្រតិបត្តិការអាស៊ាន-សហភាពអឺរ៉ុប លើវិស័យពាណិជ្ជកម្មធុរកិច្ចវិនិយោគក្នុងកិច្ចប្រជុំកំពូលអាស៊ាន -សហភាពអឺរ៉ុបលើកទី២

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាបានបង្ហាញពីទស្សនៈទានផ្ទាល់ចំនួន ៤ ចំណុច ដែលជាសកម្មភាពការ ងារបន្ទាន់មួយចំនួន ដើម្បីបន្តពង្រឹងកិច្ចសហប្រតិបត្តិការអាស៊ាន-សហភាពអឺរ៉ុប លើវិស័យពាណិជ្ជកម្មធុរកិច្ចវិនិយោគ នៅឯកិច្ចប្រជុំកំពូលអាស៊ាន-សហភាពអឺរ៉ុបលើកទី ២ដែលប្រព្រឹត្តទៅនៅសណ្ឋាគារ សូហ្វីតែលភ្នំពេញ ក្នុងរាជធានីភ្នំពេញកាលពីថ្ងៃទី ១ មេសា ឆ្នាំ ២០១២ ។

នៅ ចំពោះមុខវត្តមានរដ្ឋមន្រ្តីអាស៊ាន អគ្គលេខាអាស៊ាន ស្នងការពាណិជ្ជកម្មសហភាពអឺរ៉ុប ឯកអគ្គរដ្ឋទូត នាយកប្រតិបត្តិ និងតំណាងធុរកិច្ច ព្រមទាំងភ្ញៀវជាតិ អន្តរជាតិរាប់រយនាក់ ដែលបានចូលរួមក្នុងពិធីបើកកិច្ចប្រជុំ កិច្ចប្រជុំកំពូលអាស៊ាន-សហភាពអឺរ៉ុបលើកទី ២ ខណៈដែលកម្ពុជាបាន និងកំពុងធ្វើជាប្រធាន និង ជាម្ចាស់ផ្ទះនៃកិច្ចប្រជុំកំពូលអាស៊ានលើកទី ២០ សម្តេចតេជោនាយករដ្ឋមន្រ្តី មានប្រសាសន៍ឲ្យដឹងអំពីគោលបំណងរបស់សម្តេចដើម្បីពង្រឹងកិច្ចសហប្រតិបត្តិការអាស៊ាន-សហភាពអឺរ៉ុប លើវិស័យពាណិជ្ជកម្មធុរកិច្ច

វិនិយោគដែលមានខ្លឹមសារជាអាទិ៍ថា៖

១- វិស័យឯកជន និងសាធារណៈនៃតំបន់ទាំងពីរ ត្រូវបន្តកិច្ចសហប្រតិបត្តិការគ្នាឲ្យកាន់តែជិតស្និទ្ធថែមទៀត ដើម្បីបង្កើតយន្តការដ៏រឹងមាំ ដើម្បីដោះស្រាយឲ្យទាន់ពេលវេលា ចំពោះបញ្ហាដែលកើតមានឡើងទាក់ទងទៅនឹងវិស័យពាណិជ្ជកម្ម និងវិនិយោគ ដែលខ្ញុំយល់ថា មានសារសំខាន់ មិនត្រឹមតែរួមចំណែកដល់ការរៀបចំក្របខ័ណ្ឌច្បាប់ និង ស្ថាប័នប៉ុណ្ណោះទេ ប៉ុន្តែថែមទាំងរួមចំណែកដល់ការសម្របសម្រួលកិច្ចគាំពារពាណិជ្ជកម្ម សេរី ទ្វេភាគី ដែលមានភាពទន់ភ្លន់ និងមានប្រសិទ្ធភាពខ្ពស់ទៀតផង។

ទី២- អាស៊ាន និងសហភាពអឺរ៉ុប ត្រូវត្រួសត្រាយផ្លូវ និងស្វែងរកមធ្យោបាយនានារួមគ្នា ដើម្បីធ្វើឲ្យសហប្រតិបត្តិការ កាន់តែមានភាពស៊ីជម្រៅ ដែលក្នុងនោះរួមមានយុទ្ធសាស្រ្តកាត់បន្ថយភាពក្រីក្រ ការចែករំលែកទិន្នន័យសេដ្ឋកិច្ច បទបញ្ញត្តិ ដែលទាក់ទងទៅនឹងច្បាប់ពាណិជ្ជកម្មវិនិយោគ ការការពារបរិស្ថាន ការគ្រប់គ្រង បម្រែបម្រួលអាកាសធាតុ និងវិធានការរំសាយសព្វាវុធបរមាណូ ការប្រឆាំងភេរវកម្ម និងកសាង ទំនុកទុកចិត្តជាដើម។

ទី៣- អាស៊ាន និងសហភាពអឺរ៉ុបត្រូវបន្តពង្រីកកិច្ចសហប្រតិបត្តិការ លើគ្រប់វិស័យ និងចៀសវាងការអនុវត្តគោលការណ៍គាំពារនិយម ដែលបណ្តាលមកពីការធ្លាក់ចុះនៃតម្រូវការក្នុងពិភពលោក។

ទី៤- យើងត្រូវបន្តកិច្ចខិតខំប្រឹងប្រែងកសាង សមត្ថភាព និងទាក់ទាញជំនួយបច្ចេកទេស និងហិរញ្ញប្បទានសំរាប់ ការអភិវឌ្ឍហេដ្ឋារចនាសម័្ពន្ធរូបវន្តនៅអាស៊ាន និងជួយកាត់បន្ថយចំណាយនានាដែលមិនចាំបាច់ និងស្របតាមស្តង់ដារពាណិជ្ជកម្មអន្តរជាតិ។

សម្តេចតេជោនាយករដ្ឋមន្រ្តីមានប្រសាសន៍ ថា ពិតជាគ្មានការសង្ស័យទេថា អាស៊ាងបានចាត់ទុក សហភាពអឺរ៉ុបជាគឺដៃគូយុទ្ធសាស្រ្តរបស់ខ្លួន សម្រាប់ការអភិវឌ្ឍលើគ្រប់វិស័យ ជាពិសេសវិស័យ ពាណិជ្ជកម្ម ធុរកិច្ច ទេសចរណ៍ និងការវិនិយោគ។ នៅក្នុងបុព្វហេតុពង្រឹង និងពង្រីកនូវកិច្ចសហប្រតិបត្តិការឲ្យកាន់តែស៊ីជម្រៅថែមទៀត លើវិស័យសេដ្ឋកិច្ច និងដោយហេតុថា តំបន់យើងទាំងពីរ មានទំហំទីផ្សារធំ មានសក្តានុពលសេដ្ឋកិច្ច និងទំហំពាណិជ្ជកម្មធំនោះ អាស៊ាន និងសហភាព អឺរ៉ុបចាំចាប់ត្រូវ ខិតខំប្រឹងប្រែងរួមគ្នាឲ្យបានជិតស្និទ្ធ និងសកម្មថែមទៀតក្នុងការលើកកម្ពស់វិស័យពាណិជ្ជកម្ម និងវិនិយោគរបស់តំបន់ទាំងពីរ។

សម្តេចតេជោថ្លែងថា យើងត្រូវពន្លឿនកិច្ចចរចាលើកិច្ចព្រមព្រៀងពាណិជ្ជកម្មសេរី និងដោះស្រាយបញ្ហា ប្រឈមនានា ចំពោះមុខឲ្យបានឆាប់រហ័ស និងមានប្រសិទ្ធភាពខ្ពស់។ ជាការពិតកិច្ចការនេះទាមទាឲ្យយើងរួមគ្នាដោះស្រាយ និងសម្រប សម្រួលរវាងភាគីទាំងពីរ ដោយផ្អែកលើកិច្ចព្រម ព្រៀងពាណិជ្ជកម្មសេរី ដែលនឹងត្រូវរៀបចំដាក់ឲ្យអនុវត្តសម្រាប់ បង្កើនអត្ថប្រយោជន៍ក្នុងវិស័យពាណិជ្ជកម្ម និងឧស្សាហកម្មនៃតំបន់យើងទាំងមូល។ សម្តេចតេជោមានប្រសាសន៍ បន្តថា ខ្ញុំយល់ថា អាស៊ាន និងសហភាពអឺរ៉ុបត្រូវពន្លឿនការរៀបចំក្របខ័ណ្ឌច្បាប់ និងយន្តការស្ថាប័នឲ្យបាន សមស្របសម្រាប់ ការអនុវត្តកិច្ច ព្រមព្រៀង ពាណិជ្ជកម្មសេរីនៅលើ គោលការណ៍ ថ្នាក់តំបន់ ដែលនឹងផ្តល់អត្ថប្រយោជន៍ ខាងផ្នែកនយោបាយ និងសង្គមសេដ្ឋកិច្ចនៃតំបន់យើងទាំងពីរ។

ទាក់ទងនឹងសក្តានុពលនៃព្រះរាជាណាចក្រកម្ពុជាលើវិស័យសេដ្ឋកិច្ច និងការអភិវឌ្ឍន៍សម្តេចតេជោនាយករដ្ឋមន្រ្តី បាន មានប្រសាសន៍ឲ្យដឹងថា កម្ពុជាមានឧត្តមភាពប្រៀបធៀបជាច្រើន ជាពិសេស កម្ពុជាមានទីតាំងយុទ្ធសាស្ដ្រស្ថិតនៅក្នុងក្របខ័ណ្ឌមហាអនុតំបន់ មេគង្គ ដែលបានផ្ដល់ភាពអនុគ្រោះដល់ការធ្វើសមាហរណកម្មកាន់តែស៊ីជម្រៅ និងការតភ្ជាប់ជាមួយបណ្ដាប្រទេសអាស៊ានដទៃទៀត និងស្ថិតនៅជិតប្រទេសចិន ដែលជាមហាអំណាចសេដ្ឋកិច្ចទី២ ក្នុងពិភពលោក ដែលកត្តាទាំងអស់នេះ នឹងជួយអភិវឌ្ឍន៍ដល់វិស័យឯកជន សេដ្ឋកិច្ច និងការកាត់បន្ថយភាពក្រីក្រ។

សម្ដេចតេជោនាយករដ្ឋមន្ត្រី ហ៊ុន សែន បានមានប្រសាសន៍បន្ថែមថា គិតមកដល់ពេលនេះ មានរយៈពេលជាង ១០ឆ្នាំ មកហើយ ដែលកម្ពុជាបានក្លាយជាសមាជិកពេញសិទ្ធិរបស់អាស៊ាន។ ក្នុងរយៈពេលដូចគ្នានេះដែរ កម្ពុជាបានសម្រេចនូវការអភិវឌ្ឍគួរជាទីមោទនៈ។ សមាជិកភាពក្នុងអាស៊ាន បានផ្ដល់ឱកាសដល់កម្ពុជា ពង្រឹងការផ្សារភ្ជាប់ទៅនឹងតំបន់ និងជាមួយសហគមន៍អន្តរជាតិ។ ទន្ទឹមនឹងនេះ កម្ពុជាបានចូលរួមបំពេញកាតព្វកិច្ចអាស៊ានរបស់ខ្លួនយ៉ាងខ្ជាប់ខ្ជួន ដើម្បីកសាងសហគមន៍តំបន់មួយប្រកបដោយសុខសន្តិភាព វិបុលភាព និងភាពសុខដុមរមនា។

សម្ដេចតេជោ ហ៊ុន សែន បានគូសបញ្ជាក់ថា កម្ពុជាសម្រេចបាននូវវឌ្ឍនភាព ក្នុងការបើកចំហសេដ្ឋកិច្ច និងអនុវត្តតាមលក្ខខណ្ឌនានា នៃអង្គការពាណិជ្ជកម្មពិភពលោក និងសហគមន៍សេដ្ឋកិច្ចអាស៊ាន។ តាមរយៈការបង្កើតសហគមន៍សេដ្ឋកិច្ចអាស៊ាន នៅឆ្នាំ២០១៥ ខាងមុខនេះ កម្ពុជាសង្ឃឹមថា នឹងពង្រីកទំហំទីផ្សាររបស់ខ្លួន ឲ្យទៅជាមជ្ឈមណ្ឌលធុរកិច្ច សម្រាប់ការទាក់ទាញវិនិយោគនៅក្នុងតំបន់ និងអន្តរជាតិ។

សម្ដេចនាយករដ្ឋមន្ត្រី បានបញ្ជាក់ថា នៅឆ្នាំ២០១២នេះ គឺជាខួបទី២០ នៃការកែប្រែមុខមាត់នៃសេដ្ឋកិច្ចកម្ពុជា ចាប់តាំងពីការបង្កើតរាជរដ្ឋាភិបាលអាណត្តិទី១ នៅក្នុងឆ្នាំ១៩៩៣ ផលិតផលសរុបក្នុងស្រុករបស់កម្ពុជា បានកើតឡើងជាង ៦ដង គឺពី ២.៥០០ លានដុល្លារ នៅក្នុងឆ្នាំ១៩៩៣ រហូតដល់ជាង ១៤.៥០០ លានដុល្លារ នៅក្នុងឆ្នាំ២០១២។ ប្រាក់ចំណូលសម្រាប់ប្រជាជនម្នាក់ៗ បានកើតឡើងជាង ៤ដង គឺពី ២២៩ ដុល្លារ នៅក្នុងឆ្នាំ១៩៩៣ ដល់ជិត ១.០០០ ដុល្លារ នៅក្នុងឆ្នាំ២០១២។ រីឯវិស័យឧស្សាហកម្មក្នុងផលិតផលសរុប បានកើនឡើងពី ១៣ ដល់ ២៤ ភាគរយ។

ចំនួនប្រជាជនដែលរស់នៅក្រោមបន្ទាត់នៃភាពក្រីក្រ បានធ្លាក់ចុះពី ៥០ ភាគរយ មកនៅត្រឹម ២៥ ភាគរយ។ នៅពេលបច្ចុប្បន្ននេះ ចំណូលថវិកាជាតិបានកើនឡើងពី ១២៣ លានដុល្លារ ឬស្មើនឹង ៧ ភាគរយ នៃផផលិតផលក្នុងស្រុក នៅឆ្នាំ១៩៩៣ ដល់ ២.៥០០ លានដុល្លារ ឬស្មើនឹង ១៣,៥ ភាគរយ នៃផលិតផលក្នុងស្រុក នៅក្នុងឆ្នាំ២០១១។ បំណុលសាធារណៈសរុប និងឥណទានដែលធានាដោយរដ្ឋ ស្ថិតនៅក្នុងកម្រិតត្រឹម ២៨ ភាគរយ នៅឆ្នាំ២០១០ ក៏ប៉ុន្តែបំណុលនេះ បើគិតជាតម្លៃបច្ចុប្បន្ន ស្ថិតនៅត្រឹម ២០ ភាគរយប៉ុណ្ណោះ។

សម្ដេចតេជោនាយករដ្ឋមន្ត្រី បានមានប្រសាសន៍កត់សម្គាល់ថា បន្ទាប់ពីកលិយុគហិរញ្ញវត្ថុពិភពលោកមក សេដ្ឋកិច្ចកម្ពុជាមានភាពល្អប្រសើរ ដោយរក្សាបាននូវកំណើនផលិតផលក្នុងស្រុក ប្រមាណ ៧ ភាគរយ នៅឆ្នាំ២០១១។ ជាមួយគ្នានេះ តាមការព្យាករដោយប្រុងប្រយ័ត្ន កំណើនសេដ្ឋកិច្ចកម្ពុជានឹងមានការកើនឡើងលើសពី ៧ ភាគរយ ប្រចាំឆ្នាំនីមួយៗ ក្នុងរយៈពេលមធ្យមខាងមុខ។

សម្ដេច ហ៊ុន សែន បានមានប្រសាសន៍បន្តថា រាជរដ្ឋាភិបាលកម្ពុជាបានផ្ដល់អាទិភាពខ្ពស់ក្នុងការអភិវឌ្ឍសេដ្ឋកិច្ច ក្រោមការអនុវត្តគោលនយោបាយជំរុញផលិតកម្មស្រូវ និងការនាំចេញអង្ករ។ ក្នុងន័យនេះ កម្ពុជាសូមស្វាគមន៍វិនិយោគិនទាំងអស់ មកពីបណ្ដាប្រទេសអាស៊ាន និងសហភាពអឺរ៉ុប ដើម្បីវិនិយោគលើផលិតកម្មស្រូវ និងការនាំចេញអង្ករនេះ។ ដោយឡែក វិស័យសេវាកម្ម កម្ពុជាសម្រេចបានកំណើន ៥ ភាគរយ នៅឆ្នាំ២០១១ ដោយសារកំណើនភ្ញៀវទេសចរមកទស្សនកិច្ចនៅកម្ពុជា បានកើនឡើងគួរឲ្យកត់សម្គាល់។ ចំពោះវិស័យឧស្សាហកម្មរបស់កម្ពុជា បានកើនឡើង ១៤,៣ ភាគរយ នៅឆ្នាំ២០១១ ធៀបទៅនឹងឆ្នាំ២០១០។ មួយវិញទៀត វិស័យផលិតសម្លៀកបំពាក់ ដែលជាវិស័យដ៏ចម្បងមួយរបស់កម្ពុជា បានជំរុញការនាំចេញសម្លៀកបំពាក់ នៅក្នុងអត្រាកំណើន ២២,២ ភាគរយ ក្នុងឆ្នាំ២០១១។ វិស័យឧស្សាហកម្មនេះ គេរំពឹងថា នឹងកើនឡើងយ៉ាងឆាប់រហ័សទៀត នៅឆ្នាំ២០១២ ដោយសារតែឥទ្ធិពលវិជ្ជមាន នៃគំនិតផ្ដួចផ្ដើមពាណិជ្ជកម្មកម្ពុជា-អឺរ៉ុប ដោយអនុវត្តតាមវិធាន “អ្វីៗទាំងអស់ លើកលែងតែអាវុធរបស់សហភាពអឺរ៉ុប”។ កិច្ចការនេះ ជាការរួមចំណែកយ៉ាងសំខាន់ដល់ការអភិវឌ្ឍសង្គមសេដ្ឋកិច្ចកម្ពុជា ជាពិសេស ការកាត់បន្ថយភាពក្រីក្ររបស់ប្រជាជនកម្ពុជា។

ជំនួបរវាងសម្តេចតេជោនាយករដ្ឋមន្រ្តីនៃព្រះ រាជាណាចក្រកម្ពុជា ជាមួយប្រធានាធិបតី នៃ សាធារណរដ្ឋប្រជាមានិតចិនទទួលលទ្ធផលយ៉ាងត្រចះត្រចង់

ជំនួបរវាងសម្តេចអគ្គមហាសេនាបតីតេជោ ហ៊ុន សែន ជាមួយឯកឧត្តម ហ៊ូ ជីនតាវ ប្រធានាធិបតីនៃ សាធារណរដ្ឋប្រជាមានិតចិន នៅវិមានសន្តិភាពកាលពីថ្ងៃទី ៣១ មីនា ឆ្នាំ ២០១២ ទទួលបានលទ្ធផលត្រចះ ត្រចង់មានន័យជាប្រវត្តិសាស្ត្រសម្រាប់ប្រជាជន និងរដ្ឋាភិបាលប្រទេសទាំងពីរ ដែលក្នុងនោះមានឯកសារ ចំនួន១០ត្រូវបានចុះហត្ថលេខាក្រោមអធិបតីភាពប្រមុខនៃប្រទេសទាំង ពីរ។

ឯកឧត្តម ស្រ៊ី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីមានប្រសាសន៍ឲ្យដឹងអំពីជំនួបនោះថា ឯកឧត្តមប្រធានាធិបតីចិនបានថ្លែងអំណរគុណចំពោះ សម្តេចតេជោនាយករដ្ឋមន្ត្រី ចំពោះការប្រកាន់ខ្ជាប់នូវនយោបាយចិនមួយ ដោយមានការស្មោះត្រង់ ទៅវិញទៅមកដូចដែលថ្នាក់ដឹកនាំជំនាន់មុនប្រកាន់ខ្ជាប់នោះ។ ឯកឧត្តម ហ៊ូ ជីនតាវ បានសំដែងនូវ ការសប្បាយរីករាយ ដោយសារបានទទួលនូវការស្វាគមន៍យ៉ាងកក់ក្តៅពីសំណាក់សម្តេចតេជោនាយករដ្ឋមន្ត្រី និងបានរំលឹកថា ប្រទេសចិន និងកម្ពុជាមានមិត្តភាពជា ប្រពៃណីដ៏យូរលង់ជាងកន្លះសតវត្សរ៍ មកហើយ ដែលបានកើតឡើងដោយថ្នាក់ដឹកនាំប្រទេសទាំងពីរតាំងពីជំនាន់មុន និងបានបន្តពូនជ្រុំ រហូតដល់បច្ចុប្បន្ន ដោយឆ្លងកាត់ឧបសគ្គ និងបទពិសោធន៍ជាច្រើន ហើយបានធ្វើឲ្យទំនាក់ទំនងនេះ កាន់តែរឹងមាំ និងខ្លាំងក្លាថែមឡើង ដោយប្រទេសទាំងពីរមានជំនឿទុកចិត្តគ្នាទៅវិញទៅមកទាំងខាង នយោបាយ និងកិច្ចសហប្រតិបត្តិការជាដៃគូយុទ្ធសាស្ត្រគ្រប់ជ្រុងជ្រោយ។

លោក ស្រ៊ី ថាមរុង្គ មានប្រសាសន៍ថា ជាកាដូរសម្រាប់ដំណើរទស្សនកិច្ចជាប្រវត្តិសាស្ត្រនេះ ឯកឧត្តមប្រធានាធិបតីចិនបានប្រកាសថាផ្តល់ជំនួយឥតសំណងចំនួន ២៥០ លានយ័ន ដើម្បីឲ្យ កម្ពុជាអភិវឌ្ឍ និងកែលម្អសេដ្ឋកិច្ចរបស់ខ្លួន និងផ្តល់ ២០០ លានយ័នជាកម្ចីសម្បទានផងដែរ។

នៅក្នុង ក្របខណ្ឌអន្តរជាតិឯកឧត្តមប្រធានាធិបតីនៃ សាធារណរដ្ឋប្រជាមានិតចិន បានចាប់អារម្មណ៍ថា សភាពការណ៍នៅក្នុងពិភពលោកមានការប្រែប្រួល ហើយកម្ពុជាក៏ស្ថិតនៅក្រោមឥទ្ធពលប្រែប្រួល ទាំងនោះដែរ ប៉ុន្តែដោយសារកម្ពុជា-ចិនមានកិច្ចសហប្រតិបត្តិការយុទ្ធសាស្ត្រគ្រប់ ជ្រុងជ្រោយ ដែល ផ្តល់នូវផលប្រយោជន៍សមស្របចំពោះប្រជាជន និងប្រទេសទាំងពីរនោះវាបានផ្តល់នូវភាពអនុគ្រោះ សម្រាប់សន្តិភាព ស្ថិរភាព និងការរីកចម្រើននៅក្នុងតំបន់របស់យើងនេះ។ ឯកឧត្តម ហ៊ូ ជីនតាវ បាន សន្យាថា ឯកឧត្តមរីករាយនឹងរួមសហប្រតិបត្តិការជាមួយកម្ពុជា ដើម្បីផលប្រយោជន៍រួមគ្នា ជាអ្នកជិតខាងល្អ ជាមិត្តល្អ ជាដែគូល្អតរៀងរហូតទៅ។

ឯកឧត្តម រដ្ឋមន្ត្រីប្រតិភូអមនាយករដ្ឋមន្ត្រីបានថ្លែងថា ឯកឧត្តមប្រធានាធិបតីចិនបានលើកឡើងនូវចំណុចសំខាន់ៗជាច្រើន ដើម្បីសំដៅលើកកម្ពស់កិច្ចសហប្រតិបត្តិការរវាងប្រទេសទាំងពីរថែមទៀត។

ទី១-ភាគី ទាំងពីរនឹងបង្កើនការផ្លាស់ប្តូរមតិ បទពិសោធន៍ជាយុទ្ធសាស្ត្រ ដូចជាការផ្លាស់ប្តូរទស្សនកិច្ចពីថ្នាក់ដឹកនាំកំពូលរហូតដល់ ថ្នាក់ក្រោម ផ្លាស់ប្តូរបទពិសោធន៍រវាងគណបក្សកាន់អំណាចទាំងពីរ សិក្សាធ្វើយ៉ាងណាដើម្បីអនុវត្តឲ្យបានល្អប្រសើរជាពិសេសនៅក្នុងបញ្ហា កំណែទម្រង់ ។ នៅក្នុងឆ្នាំ ២០១៣ ដែលជាឆ្នាំបង្កើតទំនាក់ទំនងការទូតកម្ពុជា-ចិនខួបទី ៥៥ ឆ្នាំ ឯកឧត្តមប្រធានាធិបតីចិនបានស្នើឲ្យមាន ការរៀបចំកម្មវិធីផ្សេងៗដើម្បីធ្វើឲ្យមិត្តភាពរវាងប្រទេសទាំងពីរ កាន់តែរីកចម្រើនថែមទៀត ។ សម្តេចតេជោបានឯកភាព នឹងបានផ្តល់ការណែនាំដល់ក្រសួងការបរទេសទាំងពីរ សហការគ្នាដើម្បីរៀបចំ កម្មវិធីនានាសម្រាប់អបអរ។ ឯកឧត្តមប្រធានាធិបតីចិនបានស្នើឲ្យពង្រីកកិច្ចសហប្រតិបត្តិការ ជាក់ស្តែងដើម្បីភាពឈ្នះ ឈ្នះទាំងអស់គ្នា ដែលជាពិសេស កិច្ចសហប្រតិបត្តិការរវាង យុទ្ធសាស្ត្រចតុកោណរបស់រាជរដ្ឋាភិបាល និងផែនការ ៥ ឆ្នាំរបស់ចិន ដើម្បីឲ្យគ្រប់ទម្រង់ការទាំង អស់បានដើរស្របគ្នា។

ឯកឧត្តម ប្រធានាធិបតីមានប្រសាសន៍ថា ប្រទេសចិនរីករាយនឹងធ្វើកិច្ចសហ ប្រតិបត្តិការជាមួយកម្ពុជាក្នុងវិស័យកសិកម្ម ក្នុងការកែលម្អការផលិតស្រូវ កែឆ្នៃប្រព័ន្ធធារាសាស្ត្រ ការចិញ្ចឹមសត្វ ចិញ្ចឹមត្រី វិស័យផលិតចំណីសត្វ ដែលការនេះនឹងឆ្លើយតបទៅនឹងផែនការរបស់រាជ រដ្ឋាភិបាលក្នុងការនាំអង្ករចេញឲ្យបាន ១ លានតោននៅក្នុងឆ្នាំ ២០១៥ នោះ។ឯកឧត្កមក៏បានសន្យា ជួយកម្ពុជាក្នុងការពង្រីកការនាំចេញស្រូវ និងដំឡូងមី ដើម្បីឲ្យកម្ពុជាមានលទ្ធភាពនាំចេញនូវស្រូវ អង្ករ ពោត ដំឡូង និងជួយក្នុងការពិនិត្យគុណភាពផលិតផលសម្រាប់នាំចេញផងដែរ។ឯកឧត្តម ហ៊ូ ជីនតាវ ក៏បានសន្យាថានឹងបន្តគាំទ្រលើវិស័យហេដ្ឋារចនាសម្ព័ន្ធនៅកម្ពុជា ពិសេសគឺការកសាងផ្លូវ ស្ពាន និងប្រព័ន្ធធារាសាស្ត្រផងដែរ។ឯកឧត្តមប្រធានាធិបតីក៏បានសន្យាជំរុញ អ្នកទេសចរចិនឲ្យមក ទស្សនកិច្ចនៅកម្ពុជា និងបង្កើនជើងហោះហើរត្រង់ពីបណ្តាទីក្រុងធំៗពីប្រទេសចិនផងដែរ។

សូម បញ្ជាក់ថា នៅក្នុងទំនាក់ទំនងខាងវិស័យពាណិជ្ជកម្មប្រទេសចិន និងកម្ពុជាបានសម្រេចគោលដៅក្នុងការ បង្កើនទំហំពាណិជ្ជកម្មដល់ ២៥០០ លានដុល្លារសហរដ្ឋអាមេរិកនៅក្នុងឆ្នាំ ២០១១ ដែលបរិមាណនេះ គ្រោងនៅឆ្នាំ ២០១៥ ។ ឯកឧត្តមប្រធានាធិបតី នៃសាធារណរដ្ឋប្រជាមានិតចិន បានបញ្ជាក់អះអាងថា នៅពេលខាងមុខទំនាក់ទំនងកិច្ច សហប្រតិបត្តិការពាណិជ្ជកម្មនេះនឹងកាន់តែមានការកើនឡើងជាមិនខាន។

តាមរយៈឯកឧត្តម ស្រ៊ី ថាមរុង្គ ឲ្យដឹងថា ប្រទេសទាំងពីរនឹងខិតខំបង្កើននូវកិច្ចសហប្រតិបត្តិការ លើវិស័យសន្តិសុខ និងការអនុវត្តន៍ច្បាប់ ដែលបានអនុវត្តរួចមកហើយ ដូចជាការបង្ក្រាបនូវឧក្រិដ្ឋកម្ម នានា តាមរយៈការជួយបណ្តុះបណ្តាលធនធានមនុស្ស ការផ្លាស់ប្តូរព័ត៌មាន ដើម្បីទប់ទល់ប្រឆាំងនឹង បញ្ហាភេរវកម្ម ឧក្រិដ្ឋកម្មឆ្លងដែន ការរត់ពន្ធគ្រឿងញៀនជាដើម ហើយប្រទេសចិនក៏នឹងជួយកម្ពុជាក្នុង ការបណ្តុះបណ្តាលអ្នកបោសសម្អាតមីន និងផ្តល់បរិក្ខារផងដែរ។

នៅលើ កិច្ចសហប្រតិបត្តិការទ្វេភាគីឯកឧត្តមប្រធានាធិបតីចិនបានកោតសរសើរ ចំពោះកិច្ច សហប្រតិបត្តិការគាំទ្រគ្នាទៅវិញទៅមករបស់ប្រទេសទាំងពីរ ដោយចិនបានសន្យាគាំទ្របេក្ខភាព កម្ពុជាសម្រាប់តមណែងនៅក្នុងសមាជិកមិនអចិន្ត្រៃយ៍នៃ ក្រុមប្រឹក្សាសន្តិសុខអង្គការសហប្រជាជាតិ សម្រាប់អាណត្តិ ២០១៣-២០១៤ និងបានគាំទ្រតួនាទីកម្ពុជា ជាប្រធានអាស៊ាន។ ចំពោះបញ្ហាតំបន់ឯក ឧត្តមប្រធានាធិបតីចិនបានលើកឡើងថា ប្រជាជននៅអាស៊ីទាំងអស់ចង់បានសន្តិភាព ចង់ឲ្យមានការ អភិវឌ្ឍន៍សេដ្ឋកិច្ច ស្ថិរភាព និងការលើកកម្ពស់ជីវភាពរស់នៅរបស់ប្រជាជន ដែលអាស៊ីត្រូវតែប្រកាន់ ខ្ជាប់ ដោយត្រូវរួមគ្នាគាំពារសន្តិភាព ស្ថិរភាពតំបន់ រស់នៅសុខដុមរមនា និងសុខមាលភាពរបស់ ប្រជាជន។ប្រទេសចិនរីករាយក្នុងការគាំទ្រកម្ពុជា ដើម្បីធ្វើឲ្យតំបន់អាស៊ីបូព៌ាមានស្ថិរភាព។

ឯកឧត្តម ស្រ៊ី ថាមរុង្គ មានប្រសាសន៍ថា នៅក្នុងជំនួបនោះសម្តេចតេជោនាយករដ្ឋមន្រ្តី បានស្វា គមន៍នូវអ្វីដែលឯកឧត្តម ហ៊ូ ជីនតាវ បានលើកឡើងទាក់ទងនឹងការរីកចម្រើននែទំនាក់ទំនងទ្វេភាគី កម្ពុជា-ចិន ដោយសារតែមានការជឿទុកចិត្តគ្នាទៅវិញទៅមក និងមានភាពស្មោះត្រង់ជាមួយគ្នា។ សម្តេចតេជោ មានប្រសាសន៍ថា អ្វីៗដែលមានការរីកចម្រើននាពេលកន្លងមកទាំងអស់នូវទំនាក់ទំនងទ្វេភាគី រួមទាំងទំហំពាណិជ្ជកម្មផងនោះ គឺបានបង្ហាញនូវកម្រិតនៃកិច្ចសហប្រតិបត្តិការគ្រប់ជ្រុងជ្រោយរបស់ ប្រទេសទាំងពីរ។សម្តេចតេជោបានគាំទ្រនូវរាល់ចំណុច ដែលឯកឧត្តមប្រធានាធិនតីចិនបានលើក ឡើង។ សម្តេចតេជោ ក៏ បានស្នើឲ្យភាគីចិនផ្តោតការយកចិត្តទុកដាក់ផងដែរទៅលើ ការផ្លាស់ប្តូរទស្សនកិច្ចគ្នារវាងយុវជន និងយុវជន ព្រោះថាយុវជនជាសរសរទ្រូង និងជាអ្នកបន្តវេន ដើម្បីបន្តវេនទំនាក់ទំនងល្អជាប្រពៃណីនេះ។ លើទំនាក់ទំនងផែនការអភិវឌ្ឍន៍សេដ្ឋកិច្ច សម្តេចតេជោនាយករដ្ឋមន្ត្រី បានឯកភាពទៅលើកិច្ចសហប្រតិបត្តិការរវាងយុទ្ធ សាស្ត្រចតុកោណរបស់រាជរដ្ឋាភិបាលកម្ពុជា និងផែនការ ៥ ឆ្នាំរបស់ចិន ដើម្បីឲ្យមានការពិគ្រោះ កម្រិតគោលនយោបាយប្រចាំឆ្នាំ ហើយប្រគល់ឲ្យមន្ត្រីក្រសួងពាក់ព័ន្ធនានាធ្វើការឲ្យស៊ីសង្វាក់គ្នា ដើម្បីបំពេញឲ្យគ្នាទៅវិញទៅមក។

សម្តេចតេជោបាន អរគុណ និងរីករាយដែលភាគីចិនបានគាំទ្រដល់វិស័យកសិកម្ម វិស័យហេដ្ឋា រចនាសម្ព័ន្ធ ដោយបានសុំអំពាវនាវឲ្យឯកឧត្តមប្រធានាធិបតីជំរុញវិនិយោគិនធំៗមក វិនិយោគលើ វិស័យកែឆ្នៃផលិតផលកសិកម្មរបស់ខ្មែរ អាចកែឆ្នៃពាក់កណ្តាលសម្រេចឬសម្រេច ដើម្បីបង្កើនការនាំចេញ។ សម្តេចតេជោនាយករដ្ឋមន្ត្រី ក៏បានថ្លែងអំណរគុណ ចំពោះការឆ្លើយតបជាវិជ្ជមានពីភាគីចិនចំពោះសំណើសុំ គម្រោងដែលបានចុះហត្ថលេខា មានជាអាទិ៍ផ្លូវជាតិលេខ ៦ ផ្លូវពីស្ពានជ្រោយចង្វារដល់ព្រែកក្តាម ផ្លូវ លេខ ៤៤ គម្រោងធារាសាស្ត្រកង្ហតនៅខេត្តបាត់ដំបង និងគម្រោងកសាងស្ពានកោះធំឆ្លងកាត់ទន្លេ បាសាក់ និងគម្រោងហេដ្ឋារចនាសម្ព័ន្ធមួយចំនួនទៀត។ សម្តេចតេជោក៏បានថ្លែងអំណរគុណចំពោះ ជំនួយឥតសំណងចំនួន ២៥០ លានយ័ន និងកម្ចីចំនួន២០០ លានយ័នផងដែរ។

សម្តេចតេជោនាយករដ្ឋមន្រ្តី បាន ថ្លែងអំណរគុណចំពោះរដ្ឋាភិបាលចិន ដែលបានផ្តល់ជំនួយសង្គ្រោះ ទឹកជំនន់នាពេលកន្លងមកនេះ និងបានជំរាបជូនឯកឧត្តមប្រធានាធិបតីចិនថា ឆ្នាំនេះជាឆ្នាំរោងទាំង ខ្មែរ ទាំងចិនយល់ថាជាឆ្នាំដែលមានទឹកធំ ដូច្នេះកម្ពុជាបានត្រៀមរួចហើយនូវស្រូវអង្ករ និងមធ្យោ បាយផ្សេង។ ទាក់ទងនឹងវិស័យសហប្រតិបត្តិការលើវិស័យសន្តិសុខ សម្តេចតេជោបាន ឯកភាពតាម ឯកឧត្តមប្រធានាធិបតីចិន ដែលថាយើងមានកិច្ចសហប្រតិបត្តិការជាមួយគ្នា ហើយចំពោះវេទិកាអន្តរ ជាតិ សម្តេចនាយករដ្ឋមន្ត្រីបានអរគុណជាថ្មី ដែលចិនបានគាំទ្របេក្ខភាពកម្ពុជាសម្រាប់តំណែងជា សមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ និងបានស្នើឲ្យភាគីចិនជួយបញ្ចុះ បញ្ចូលបណ្តាប្រទេសជាមិត្តភក្តិរបស់ខ្លួនឲ្យជួយគាំទ្រកម្ពុជាមាន តួនាទីនៅក្នុងអង្គការនេះ ដើម្បីបាន ដើរតួនាទីរួមវិភាគទានដើម្បីសុខសន្តិភាព និងវិបុលភាពរបស់សកលលោកទាំងមូលនោះ។

ទាក់ទងជាមួយបញ្ហាសមុទ្រចិនខាងត្បូង សម្តេចតេជោនាយករដ្ឋមន្ត្រី ដែលជាប្រធានអាស៊ានក្នុងឆ្នាំ ២០១២ មានប្រសាសន៍ថា យើង នឹងខិតខំធ្វើយ៉ាងណាធ្វើឲ្យបញ្ហានេះស្ថិតនៅក្នុងក្របខណ្ឌអាស៊ាន និងចិន ដោយមិនឲ្យក្លាយទៅជា បញ្ហាអន្តរជាតិទេ ដោយគួរតែដោះស្រាយនៅក្នុងក្របខណ្ឌនេះ ដើម្បីកុំឲ្យសភាពការណ៍កាន់តែស្មុគ្រ ស្មាញថែមទៀត។ តែសម្តេចតេជោមានប្រសាសន៍ថា យើងមានការលំបាកដែរ ព្រោះ នៅក្នុងកិច្ចប្រជុំ ថ្នាក់ដឹកនាំប្រទេសផ្សេងៗអាចនឹងនិយាយនូវអ្វី ដែលយើងមិនអាចហាមឃាត់គេមិនឲ្យនិយាយបានទេ ប៉ុន្តែយើង(កម្ពុជា) ក៏ដូចជាបណ្តាប្រទេសអាស៊ានភាគច្រើនចង់បានឲ្យបញ្ហានេះស្ថិតនៅក្នុង ក្របខណ្ឌរបស់យើងគឺ អាស៊ាន និងចិន។

សម្តេចតេជោនាយករដ្ឋមន្ត្រីបាន ចាត់ទុក សេចក្ដីថ្លែងការណ៍រួមនៅក្នុងទស្សនកិច្ច ឯកឧត្តម ហ៊ូ ជីនតាវ ប្រធានាធិបតីនៃ សាធារណរដ្ឋប្រជាមានិតចិននៅកម្ពុជានឹងក្លាយជាផែនទីបង្ហាញផ្លូវ សម្រាប់រដ្ឋាភិបាលទាំងពីរ ធ្វើការ ហើយក្រសួងការបរទេសទាំងពីរត្រូវខិតខំជំរុញអនុវត្តតាមសេចក្តី ថ្លែងការណ៍នេះ ដើម្បី ឲ្យកិច្ចសហប្រតិបត្តិការគ្រប់ជ្រុងជ្រោយជាយុទ្ធសាស្ត្ររបស់យើងបាន ទទួលលទ្ធផលល្អប្រពៃ។

ឯកឧត្តម ហ៊ូ ជីនតាវ ប្រធានាធិបតីនៃ សាធារណរដ្ឋប្រជាមានិតចិនបានអញ្ជើញមកដល់ព្រះរាជាណាចក្រកម្ពុជារយៈពេល ៤ ថ្ងៃ កាលពីថ្ងៃទី ៣០ មីនា ដែលត្រូវបានចាត់ទុកថា ជាទស្សនកិច្ចរបស់ថ្នាក់ដឹកនាំកំពូលរបស់ប្រទេសចិន ជាប្រវត្តិសាស្ត្រមកកាន់កម្ពុជា ក្នុងរយៈ ពេល ១២ ឆ្នាំចុងក្រោយនេះ។

សេចក្តីថ្លែងការណ៍រួមរវាង សាធារណរដ្ឋប្រជាមានិតចិន និង ព្រះរាជាណាចក្រកម្ពុជា

សេចក្តីថ្លែងការណ៍ របស់គណៈប្រតិភូសង្កេតការណ៍របស់ប្រធានអាស៊ាន ស្តីពីការបោះឆ្នោតបំពេញ បន្ថែមនៅមីយ៉ាន់ម៉ាកាលពីថ្ងៃទី១ ខែមេសា ឆ្នាំ២០១២ ទីក្រុងយ៉ាងហ្គូន ថ្ងៃទី២ ខែមេសា ឆ្នាំ២០១២

សេចក្តីថ្លែងការណ៍

របស់គណៈប្រតិភូសង្កេតការណ៍របស់ប្រធានអាស៊ាន

ស្តីពីការបោះឆ្នោតបំពេញ បន្ថែមនៅមីយ៉ាន់ម៉ាកាលពីថ្ងៃទី១ ខែមេសា ឆ្នាំ២០១២

ទីក្រុងយ៉ាងហ្គូន ថ្ងៃទី២ ខែមេសា ឆ្នាំ២០១២

១. ឆ្លើយតបទៅនឹងការអញ្ជើញពិសេសរបស់ឯកឧត្តម ថេន សេន ប្រធានាធិបតីនៃសាធារណរដ្ឋ សហភាពមីយ៉ាន់ម៉ា ជូនចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលនាពេលច្ចុប្បន្នជាប្រធានអាស៊ានបានបញ្ជូនគណៈប្រតិភូសង្កេតការណ៍ របស់ប្រធានអាស៊ាន ទៅពិនិត្យមើលការបោះឆ្នោតបំពេញបន្ថែម ដែលបានប្រព្រឹត្តទៅ ថ្ងៃទី ០១ ខែមេសា ឆ្នាំ២០១២ នៅសាធារណរដ្ឋសហភាពមីយ៉ាន់ម៉ា។

២. គណៈប្រតិភូត្រូវបានដឹកនាំដោយឯកឧត្តម ឈាង វុន ប្រធានគណៈកម្មការព័ត៌មាន សហប្រតិបត្តិការអន្តរជាតិ និងកិច្ចការ បរទេស នៃរដ្ឋសភា។

៣. នៅពេលដែលមកដល់ទីក្រុង យ៉ាងហ្គូន (Yangon) នៅថ្ងៃទី២៧ ខែមីនា ឆ្នាំ២០១២ គណៈប្រតិភូសង្កេតការណ៍បានចាប់ផ្តើមសកម្មភាពសង្កេតការណ៍ដ៏សំខាន់ ដើម្បីស្វែងយល់ ពីស្ថានភាពទូទៅជុំវិញការបោះឆ្នោតបំពេញបន្ថែមនេះ។ បរិយាកាសជាទូទៅគឺមានភាពស្ងប់ស្ងាត់ សន្តិភាព និងគ្មានអំពើហឹង្សា។ ទោះបីជាមានការប្តឹងអំពីភាពមិនប្រក្រតី និង ការគំរាមកំហែងក៏ដោយ ប៉ុន្តែគណៈប្រតិភូបានសង្កេតឃើញថា ពុំមានហេតុការណ៍ណាមួយ ដែលអាចជះឥទ្ធិពលដល់ដំណើរការ ឬលទ្ធផលនៃការបោះឆ្នោតបំពេញបន្ថែមនេះឡើយ។

៤. ការបោះឆ្នោតបំពេញបន្ថែមនៅថ្ងៃទី0១ ខែមេសា ឆ្នាំ២០១២ នៅសាធារណរដ្ឋសហភាពមីយ៉ាន់ម៉ា ដើម្បីបោះឆ្នោតជ្រើសរើសតំណាងសភាសម្រាប់កៅអីទំនេរចំនួន៤៥បានប្រព្រឹត្ត ទៅក្នុងបរិយាកាសសេរី យុត្តិធម៌ និងមានតម្លាភាព ដោយមានការចូលរួមពីគណបក្សនយោបាយចំនួន១៧ រួមមានគណបក្សសម្ព័ន្ធជាតិដើម្បីលទ្ធិប្រជាធិបតេយ្យ(NLD)។ គណបក្សសម្ព័ន្ធជាតិដើម្បីលទ្ធិប្រជាធិបតេយ្យ បានធ្វើសកម្មភាពដោយសេរីក្នុងយុទ្ធនាការ បោះឆ្នោត ហើយប្រធានគណបក្សសម្ព័ន្ធជាតិដើម្បីលទ្ធិប្រជាធិបតេយ្យ លោកស្រី អ៊ុងសាន ស៊ូជី អាចធ្វើដំណើរទៅគ្រប់ទីកន្លែងក្នុងប្រទេសដើម្បីគៀងគរការគាំទ្រសម្រាប់ គណបក្ស របស់ លោកស្រី និងបានធ្វើសន្និសីទកាសែតនៅឯភូមិគ្រឹះរបស់លោកស្រីនៅទីក្រុងយ៉ាងហ្គូន នៅថ្ងៃទី៣០ ខែមីនា ឆ្នាំ២០១២ ដែលមានការចូលរួមពីអ្នកសង្កេតការណ៍បរទេស និងអ្នកកាសែត ជាច្រើននាក់។

៥. អ្នកការទូត អ្នកសង្កេតការណ៍ និងអ្នកកាសែតបរទេសរាប់រយនាក់មកពីទូទាំងពិភពលោកត្រូវបានអញ្ជើញដោយ រដ្ឋាភិបាលនៃសាធារណរដ្ឋសហភាពមីយ៉ាន់ម៉ា ដើម្បីធ្វើជាសាក្សីក្នុង ព្រឹត្តិការណ៍ជាប្រវត្តិសាស្រ្តនេះ។ ការអញ្ជើញនេះ គឺជាកាយវិការដ៏វិជ្ជមានបំផុតរបស់រដ្ឋាភិបាល មីយ៉ាន់ម៉ា ហើយត្រូវបានស្វាគមន៍យ៉ាងខ្លាំងពីសហគមន៍អន្តរជាតិ។ អ្នកកាសែត និង អ្នកសង្កេតការណ៍បរទេសត្រូវបានអនុញ្ញាតឲ្យធ្វើដំណើរដោយសេរី ទៅកាន់មណ្ឌលបោះឆ្នោត ទាំងអស់ ដើម្បីបំពេញការងារសង្កេតការណ៍របស់ខ្លួន។

៦. គេសង្កេតឃើញថា នៅថ្ងៃបោះឆ្នោតបំពេញបន្ថែម ប្រជាជនមីយ៉ាន់ម៉ាបានចូលរួមបោះឆ្នោត ប្រកបដោយភាពត្រេកអរយ៉ាងខ្លាំងនៅតាមមណ្ឌលបោះឆ្នោតរៀងៗខ្លួនរបស់ពួកគេ។ អ្នកបោះឆ្នោតបាននិយាយថា ពួកគេបានស្វាគមន៍យ៉ាងខ្លាំងចំពោះការបោះឆ្នោតបំពេញបន្ថែមនេះ ហើយជឿជាក់ថាការបោះឆ្នោតនេះនឹងត្រួសត្រាយផ្លូវឲ្យមានការបង្រួបបង្រួមជាតិ និង លទ្ធិប្រជាធិបតេយ្យនៅមីយ៉ាន់ម៉ា។

៧. ជោគជ័យនៃការបោះឆ្នោតបំពេញបន្ថែមនេះ គឺជាជំហានដ៏មានសារៈសំខាន់មួយទៀតសម្រាប់ មីយ៉ាន់ម៉ានៅក្នុងដំណើរការនៃការកែទម្រង់លទ្ធិប្រជាធិបតេយ្យរបស់ខ្លួន ព្រមទាំងបានបង្ហាញអំពីការសម្រេចបាននូវផែនទីបង្ហាញផ្លូវ៧ជំហានរបស់ប្រទេស ឆ្ពោះទៅរកលទ្ធិប្រជាធិបតេយ្យ។

៨. ក្នុងនាមជាគណៈប្រតិភូសង្កេតការណ៍របស់ប្រធានអាស៊ាន យើងសូមអំពាវនាវដល់គ្រប់រដ្ឋជាសមាជិកអាស៊ាន និងសហគមន៍អន្តរជាតិសហការយ៉ាងជិតស្និទ្ធជាមួយរដ្ឋាភិបាលនៃសាធារណ រដ្ឋសហភាពមីយ៉ាន់ម៉ាបន្តផ្តល់ជំនួយ និងគាំទ្រ ក្នុងដំណើរការកែទម្រង់លទ្ធិប្រជាធិបតេយ្យរបស់ខ្លួន។

៩. យើងសូមស្នើដោយទទូចដល់សហគមន៍អន្តរជាតិ ពិនិត្យពិចារណាលុបទណ្ឌកម្មសេដ្ឋកិច្ចលើប្រទេសមីយ៉ាន់ម៉ា ដើម្បីឲ្យប្រជាជនមីយ៉ាន់ម៉ាអាចទទួលបានកាលានុវត្តភាពកាន់តែប្រសើរ សម្រេចបាននូវបំណងប្រាថ្នារបស់ខ្លួនក្នុងការទទួលបានសន្តិភាព ការផ្សះផ្សាជាតិ លទ្ធិប្រជាធិបតេយ្យ និងការអភិវឌ្ឍជាតិ។

១០. ជាទីបញ្ចប់ គណៈប្រតិភូសង្កេតការណ៍របស់ប្រធានអាស៊ានដែលមានកិត្តិយសមកធ្វើការសង្កេត ការណ៍ក្នុងនាមប្រជាជនអាស៊ាន សូមអបអរសាទរដល់ប្រជាជនមីយ៉ាន់ម៉ាចំពោះការសម្រេចបាននូវសមិទ្ធផល ប្រកបដោយជោគជ័យ និងសន្តិភាពជាប្រវត្តិសាស្រ្តនេះ ។

Statement by the asean chair's observer delegation On myanmar by-elections on 1 april 2012 Yangon, 2 April 2012

STATEMENT BY THE ASEAN CHAIR'S OBSERVER DELEGATION

ON MYANMAR BY-ELECTIONS ON 1 APRIL 2012

Yangon, 2 April 2012

At the special invitation of His Excellency Thein Sein, President of the Republic of the Union of Myanmar to Samdech Akka Moha Sena Padei Techo Hun Sen, Prime Minister of the Kingdom of Cambodia, the Kingdom of Cambodia, the current ASEAN Chair, had sent an ASEAN Chair’s observer delegation to witness the by-elections held on 1 April 2012 in the Republic of the Union of Myanmar.

The delegation is led by His Excellency Chheang Vun, MP and Chairman of the Commission on Foreign Affairs, International Cooperation and Information of Cambodia's National Assembly.

Upon arrival in Yangon on 27 March 2012, the observer delegation carried out important observation activities in order to understand the general situation surrounding the by-elections. The overall environment was calm, peaceful and non-violent. Despite complaints of irregularities and intimidation, this delegation did not observe any incidents that might have affected the process or the results of the by-elections.

The by-elections to elect 45 vacant parliamentary seats on 1 April 2012 in the Republic of the Union of Myanmar was conducted in a free, fair and transparent manner with participation of 17 political parties including the National League for Democracy (NLD). The NLD was able to freely undertake its campaign activities and NLD President Aung San Suu Kyi was able to travel all over the country to rally support for her party and to hold a press conference at her residence in Yangon on 30 March 2012 attended by hundreds of foreign observers and journalists.

Hundreds of foreign diplomats, observers and journalists from all over the world were invited by the government of the Republic of the Union of Myanmar to witness this historic event. The invitation represents a very positive gesture of the Myanmar government and was overwhelmingly welcomed by the international community. Foreign observers and journalists were allowed to travel freely to all constituencies to perform their observation activities.

It was observed on the day of the by-elections that the people of Myanmar eagerly turned out to cast their votes at their respective polling stations. Many voters said they strongly welcomed the by-elections and believed this would pave the way for national reconciliation and democracy in Myanmar.

The success of the by-elections is another significant step for Myanmar in its process of its democratic reform and signifies the realization of the country’s 7-step roadmap to democracy.

We, the ASEAN Chair’s observer delegation, wish to call for all ASEAN member states and the international community to cooperate closely with the Government of the Republic of Myanmar and to continue to provide the assistance and support it needs in its democratic reform process.

We urge the international community to consider lifting economic sanctions on Myanmar so that the people of Myanmar can enjoy better opportunities in realizing their aspirations for peace, national reconciliation, democracy and national development.

In conclusion, the ASEAN Chair’s observer delegation congratulates the people of Myanmar for successfully and peacefully realizing this historic achievement, which we were honoured to observe on behalf of the peoples of ASEAN.

ASEAN Foreign Ministers\' Meeting (AMM) with ASEAN Intergovernmental Commission on Human Rights (AICHR) Phnom Penh, Cambodia, 2 April 2012

hnom Penh, Sunday, 1 April 2012

The ASEAN Foreign Ministers’ Meeting (AMM) with ASEAN Intergovernmental Commission on Human Rights (AICHR) will be convened at the Peace Palace in Phnom Penh, Cambodia, on 2 April 2012. The Meeting will be chaired by H.E. HOR Namhong, Deputy Prime Minister and Minister of Foreign Affairs and International Cooperation of the Kingdom of Cambodia.

The Meeting will discuss the Progress Report on the Drafting of the ASEAN Human Rights Declaration.
(Source: ASEAN General Department, Ministry of Foreign Affairs and International Cooperation of the Kingdom of Cambodia)

Outcomes of the Preparatory Meeting of the ASEAN Senior Officials (Prep-SOM) Phnom Penh, 31 March - 1 April 2012

Outcomes of 4th Meeting of the Working Group of the ASEAN SOM on the Regional Code of Conduct (COC) in the South China Sea Phnom Penh, 30 March 2012

Outcomes of the Third Meeting of the ASEAN SOM Working Group on the Establishment of an ASEAN Institute for Peace and Reconciliation ( SOM WG on AIPR) Peace Palace, Phnom Penh, 30 March 2012

Pages

Monday, April 2, 2012

ឯកឧត្តមបណ្ឌិត សុខ អាន ស្នើឲ្យធុរជនបារាំងសម្លឹងមើលសក្ដានុពលវិនិយោគនៅកម្ពុជា

សេចក្តីថ្លែងការណ៍រួមរវាង សាធារណរដ្ឋប្រជាមានិតចិន និង ព្រះរាជាណាចក្រកម្ពុជា

Statement by the asean chair's observer delegation On myanmar by-elections on 1 april 2012 Yangon, 2 April 2012

ASEAN Foreign Ministers\' Meeting (AMM) with ASEAN Intergovernmental Commission on Human Rights (AICHR) Phnom Penh, Cambodia, 2 April 2012

Outcomes of the Preparatory Meeting of the ASEAN Senior Officials (Prep-SOM) Phnom Penh, 31 March - 1 April 2012

Outcomes of 4th Meeting of the Working Group of the ASEAN SOM on the Regional Code of Conduct (COC) in the South China Sea Phnom Penh, 30 March 2012

Outcomes of the Third Meeting of the ASEAN SOM Working Group on the Establishment of an ASEAN Institute for Peace and Reconciliation ( SOM WG on AIPR) Peace Palace, Phnom Penh, 30 March 2012

Press Release, Outcomes of the 6th Meeting of the CPR

ស្វែងរក

Web browser

គេហទំព័រផ្សេងៗ

ការបកស្រាយបញ្ហាព្រំដែនកម្ពុជា-វៀតណាម របស់សម្តេចតេជោ ហ៊ុន សែន

Event; Thai army resumes intense shelling into Cambodia’s

60 Year of Diplomatic Relation (1950-2010)

មាតិកា