នៅព្រឹកថ្ងៃទី
២១ ខែឧសភា ឆ្នាំ ២០១២ នៅរាជធានីភ្នំពេញ
មានបើកវគ្គបំប៉នពិសេសមួយដល់ក្រុមការងារប្រតិកម្មរហ័សរាជធានី
ភ្នំពេញ ដើម្បីពង្រឹងសមត្ថភាពបន្ថែមលើការងារតាមដាន ប្រមូល សរសេរ
និងបញ្ចេញព័ត៌មាន ក្រោមអធិបតីភាពដ៏ខ្ពង់ខ្ពស់ឯកឧត្តម ស្វាយ ស៊ីថា និងឯកឧត្តម កែវ រ៉េមី រដ្ឋលេខាធិការទីស្តីការគណៈរដ្ឋមន្រ្តី និងជាថ្នាក់ដឹកនាំអង្គភាពព័ត៌មាននិងប្រតិកម្មរហ័ស ដោយមានការចូលរួមពីឯកឧត្តម ប៉ា សុជាតិវង្ស
និងក្រុមការងារប្រតិកម្មរហ័សរាជធានីភ្នំពេញ ប្រមាណជិត ៥០០នាក់
ដែលបានមកពី ខ័ណ្ឌ សង្កាត់ ផ្សារ វិទ្យាល័យ អនុវិទ្យាល័យ
នានាក្នុងរាជធានីភ្នំពេញ។
ឯកឧត្តម ប៉ា សុជាតិវង្ស អភិបាល
រងរាជធានីភ្នំពេញ បានថ្លែងថា
ដើម្បីដណ្តើមយកប្រជាប្រិយភាពពីប្រជាពលរដ្ឋ
ក្រុមការងារប្រតិកម្មរហ័សរាជធានីភ្នំពេញចាំបាច់ត្រូវយល់ដឹងបន្ថែម
ឲ្យបានច្រើន លើវិស័យព័ត៌មានក្នុងនាមជាឃោសនឹកប្រតិកម្មរហ័ស
ដើម្បីបំរើ និងការពារសមិទ្ធិផល
និងសនិ្តភាពដែលរដ្ឋាភិបាលសំរេចបាន។
ឯកឧត្តម សាយ សំអាល់ អគ្គលេខាធិការ
រងរាជរដ្ឋាភិបាល និងជាអនុប្រធានអង្គភាពព័ត៌មាន និងប្រតិកម្មរហ័ស
បានមានប្រសាសន៍ ដោយក្រើនរំលឹក និងចែករំលែកបទពិសោធ
ដល់ក្រុមការងារប្រតិកម្មរហ័សទាំងអស់
ឲ្យខិតខំបំផុសនូវស្មារតីភ្ញាក់រលឹកក្នុងការបង្កើត Facebook, យូធូប
ដើម្បីទទួលបាននូវព័ត៌មានថ្មីៗ លឿនរហ័ស នៅជុំវិញពិភពលោក។ ឯកឧត្តម
បានចាត់ទុកថា បណ្តាញផ្សព្វផ្សាយសង្គម (Social Media)
នៅក្នុងប្រទេសកម្ពុជា គឺជាបច្ចេកវិទ្យាថ្មី
ដែលបានផ្តល់នូវអត្ថបទប្រយោជន៍យ៉ាងច្រើនសម្រាប់អ្នកប្រើប្រាស់
ក្នុងការទទូលនូវព័ត៌មាន មកពីគ្រប់ទិសទី។ ឯកឧត្តម សាយ សំអាល់
ថ្លែងថា «ព័ត៌មានគឺជាអំណាច» ដើម្បីតម្រូវការចាំបាច់ក្នុងសង្គម ។
មិនត្រឹមតែប៉ុណ្ណោះ ព័ត៌មាន គឺជាឧបករណ៍ សម្រាប់ការងារជំនួញ នយោបាយ
អប់រំ បង្កើនចំណេះដឹងទូទៅ និងសម្រាប់ជាដៃគូសន្ទនា។
ឯកឧត្តម កែវ រ៉េមី
រដ្ឋលេខាធិការ បានថ្លែងថា ក្រុមប្រឆាំងមួយចំនួនបាន
និងកំពុងបង្កើតបរិយាកាសអាប់អួរ បង្កភាពចលាចលក្នុងសង្គម
និងបំផ្លាញការអភិវឌ្ឍន៍របស់រដ្ឋាភិបាល។ ដូច្នេះ
ក្រុមការងារប្រតិកម្មរហ័សទាំងអស់គ្នា
ត្រូវខិតខំប្រឹងប្រែងអស់សមត្ថភាព
និងលទ្ធភាពលើជំនាញរបស់ខ្លួនក្នុងការផ្សព្វផ្សាយ
និងបញ្ចេញព័ត៌មានដ៏មានសារៈសំខាន់នានា
ដើម្បីបង្ហាញការពិតអំពីសមិទ្ធិផលរបស់រដ្ឋាភិបាល។
ឯកឧត្តម ស្វាយ ស៊ីថា ប្រធានគណៈប្រតិភូដឹកនាំវគ្គបំពាក់បំប៉នក្នុងឱកាសនេះ បានចែក
រំលែកនូវការយល់ដឹង និងបទពិសោធជាច្រើន
ដើម្បីជាទុនដ៍សំខាន់សំរាប់ក្រុមប្រតិកម្មរហ័សរាជធានីភ្នំពេញ
ជាពិសេសក្រុមយុវជន
ក្នុងការយកទៅប្រើប្រាស់ឆ្លើយតបទៅនឹងតម្រូវការចំពោះមុខ។
ឯកឧត្តម ស្វាយ ស៊ីថា បានពន្យល់
ថា ស្របពេលយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ
សង្កាត់ កំពុងប្រព្រឹត្តទៅ
គឺយុវជនទាំងអស់ត្រូវក្តាប់ឲ្យបាននូវព័ត៌មានឲ្យគ្រប់ជ្រុងជ្រោយ
និងត្រូវខិតខំបញ្ចេញព័ត៌មានឲ្យបានលឿន ប្រកបដោយប្រសិទ្ធភាពខ្ពស់
និងត្រូវពន្យល់បកស្រាយដល់សាធារណៈមតិ
តាមរយៈការប្រើប្រាស់ប្រព័ន្ធឃោសនាថ្មីនេះឱ្យបានខ្លាំងក្លា។
ឯកឧត្តម
បានមានប្រសាសន៍បន្ថែមទៀតថា «នៅក្នុងប្រព័ន្ធប្រជាធិបតេយ្យ
សេរីពហុបក្ស គឺការទាក់ទាញប្រជាពលរដ្ឋឲ្យមានការគាំទ្រ
និងបានដឹងនូវការពិតជារឿងអទិភាព។ ឯកឧត្តម ស្វាយ ស៊ីថា បាន
បន្តថា ដំណាក់កាលនេះ
ការតស៊ូនៅលើសមរភូមិសតិអារម្មណ៏ដើម្បីបញ្ជ្រាបនូវព័ត៌មានពិត
ទៅកាន់មជ្ឈដ្ឋានខាងក្រៅឲ្យបានដឹងនូវសមិទ្ធផលដ៏ច្រើនសន្ធឹកសន្ធា
ប់របស់រាជរដ្ឋាភិបាលនៅតាមឃុំសង្កាត់ និងទូទាំងប្រទេស
ជារួមបង្ហាញអំពីការចំរើនស្ទើរគ្រប់វិស័យ គឺជាបញ្ហាធំចំពោះមុខ។
ឯកឧត្តម ស្វាយ ស៊ីថា
ក៏បានជម្រុញឲ្យក្រុមប្រតិកម្មរហ័ស រាជធានីភ្នំពេញ
បន្តធ្វើសកម្មភាពថែមទៀត
ឲ្យបានស៊ីជម្រៅក្នុងការបង្កើនល្បឿនប្រើប្រាស់បណ្តាញផ្សព្វផ្សាយ
សង្គម (Social Media) ដើម្បីការបកស្រាយ បំភ្លឺ ទៅសាធារណជន
ជាពិសេសត្រូវប្រុងប្រុងប្រយ័ត្ននូវរាល់ល្បិចកល
និងសង្រ្គាមចិត្តសាស្ត្ររបស់ក្រុមប្រឆាំងក្នុងការបំប៉ោងព័ត៌មាន
តាមរយៈការប្រើប្រាស់ Facebook, Twitter, YouTube, និង SMS
ដើម្បីបំពុលបរិយាកាសសង្គម។
អត្ថបទៈ អង្គភាពព័ត៌មាន និងប្រតិកម្មរហ័ស
