Friday, June 15, 2012
ទស្សនៈ បក្សប្រឆាំងលេចចេញសញ្ញានៃភាពប្រះស្រាំ
ទស្សនៈ
បក្សប្រឆាំងលេចចេញសញ្ញានៃភាពប្រះស្រាំ
គណបក្សប្រឆាំង បានបង្ហាញនូវភាពប្រេះស្រាំនៅក្នុងបក្សរបស់ខ្លួនលេចចេញជារូបរាងឡើងហើយ
តាមរយៈការមិនឯកភាពគ្នាក្នុងគោលនយោបាយរួមរបស់បក្ស គឺបន្ទាប់ពីលទ្ធផលបណ្តោះអាសន្ននៃការបោះឆ្នោតជ្រើសរើសក្រុមប្រឹក្សាឃុំ‑សង្កាត់
ត្រូវបានផ្សព្វផ្សាយឱ្យដឹងថា បក្សសម រង្ស៊ី
ធ្លាក់ចុះសម្លេងគាំទ្រពីប្រជាពលរដ្ឋយ៉ាងច្រើន ហើយសម្លេងបានកើនឡើងខ្ពស់បំផុតទៅគណបក្សកាន់អំណាច
គឺគណបក្សប្រជាជនកម្ពុជា។
ភាពមិនច្បាស់លាស់ដែលជាសញ្ញាបែកបាក់ផ្ទៃក្នុងនោះ
គឺមេបក្ស និងអ្នកនាំពាក្យរបស់គណបក្សសម រង្ស៊ី
បដិសេធដាច់អហង្ការមិនទទួលយកនូវលទ្ធផលបោះឆ្នោត ប៉ុន្តែ លោក គង់ គាំ ប្រធានស្តីទីបែរជាប្រកាសគៀងគសមាជិកក្រុមប្រឹក្សាឃុំ
សង្កាត់របស់ខ្លួនដែលជាប់ឆ្នោតនៅតាមមូលដ្ឋានឱ្យចូលរួមសហការគ្នាជាមួយបក្សដទៃ
ដើម្បីអ្វីមួយដែលលោក គង់ គាំ ថ្លែងថា ជាយុទ្ធសាស្ត្រនៃកំណែទម្រង់នៅតាមមូលដ្ឋានសម្រាប់យកប្រៀបឈ្នះការបោះឆ្នោតនៅពេលខាងមុខ។
ការបោះឆ្នោតកាលពីថ្ងៃទី៣ ខែ មិថុនា
ឆ្នាំ ២០១២ មិនទាន់ទាំងចេញលទ្ធផលផ្លូវការផង ស្រាប់តែមេបក្សប្រឆាំង លោក សម
រង្ស៊ី ភ័យស្លន់ស្លោរ
បាត់ម្ចាស់ការលើខ្លួនឯង ក៏ចាប់ផ្តើម ស្រែកពីក្រៅប្រទេសមកតាមប្រព័ន្ធឃោសនានានា
ដោយចោទប្រកាន់ថា ការបោះឆ្នោតនេះមានភាពមិនប្រក្រតី
និងថា មានការគំរាមកំហែងដល់សិទ្ធិអ្នកបោះឆ្នោត
រួចក៏ប្រកាសមិនទទួលស្គាល់លទ្ធផលនៃការបោះឆ្នោតនេះទេ។
តើអ្នកសង្កេតការណ៍ទាំងអស់ នាំគ្នាទៅណាអស់ទៅ ម៉េច មិនប្រមូលភស្តុតាងប្តឹងទៅគ.ជ.ប?
មិនត្រូវចោទប្រកាន់ដោយលាបពណ៌មកលើបក្សដទៃថា បំបិទ សិទ្ធិអ្នកបោះឆ្នោត និងការលួចបន្លំនោះទេ? តើគេអាចលួចតាមវិធីណា
បើកាលពីពេលបោះឆ្នោត គឺមានតំណាងគណបក្សនយោបាយនៅទីនោះទាំងអស់គ្នា?
ទន្ទឹមគ្នានោះក៏ស្រាប់តែមានអ្នកនាំពាក្យរបស់បក្សប្រឆាំងម្នាក់ទៀត
គឺ លោក យឹម សុវណ្ណ ប្រហែលជាធ្លាប់បានទទួលលាភសក្ការៈច្រើនពីក្នុងបក្ស ក៏ផ្សំគំនិតគ្នា
ស្រែកបន្ទរតាមមេរបស់ខ្លួនដែលជាទណ្ឌិតដ៏កំសត់ថា យើងមិនទទួលយកទេនូវលទ្ធផលនៃការបោះឆ្នោតនេះ។
ក្រុមអ្នកតាមដានស្ថានការណ៍នយោបាយឆ្ងល់ថា
ចុះហេតុអ្វីបានជាពួកគេមិនព្រមស្រែកតាំងពីដំបូងមក
ឬក៏មុនពេលដឹងលទ្ធផលថាចាញ់ នោះទើបសមជាអ្នកនយោបាយសុច្ចរិត ម៉េចបានជាដឹងថា ចាញ់ហើយទើបស្រែកដូច្នេះទៅវិញ?
ទាំងនេះបង្ហាញឲ្យឃើញថា ពួកគេកំពុងអនុវត្តទ្រឹស្តីមួយរបស់ជនកំសាកដែលឥតអៀនខ្មាស់
គឺ «ដេកចាំស៊ីឡាក» បើឈ្នះ សម្ងំស្ងៀម ប៉ុន្តែបើចាញ់ គឺស្រែកឡាំប៉ា។
ចម្ងល់របស់មហាជននោះត្រង់ថា
បក្សសម រង្ស៊ី មុននឹងចេញសេចក្តីថ្លែងការណ៍
សេចក្តីប្រកាសណាមួយតើមានបានសួរយោបល់
ឬមានការឯកភាពគ្នាពីថ្នាក់ដឹកនាំរបស់ខ្លួនដែរឬទេ? ឬក៏ធ្វើដោយឯកចិត្តរៀងៗខ្លួន?
ក្នុងន័យថា មេបក្សនិយាយផ្សេង កូនចៅនិយាយផ្សឹងឬអ្វី? ហើយបើលោក គង់ គាំ
ចេញសេចក្តីអំពាវនាវឱ្យមានការរួបរួមគ្នាជាមួយគណបក្សសិទ្ធិមនុស្សនៅតាមមូលដ្ឋាន
គឺហាក់ដូចជាមិនស្របគ្នាទៅនឹងគោលនយោបាយរបស់មេបក្ស ។ ម៉្យាងទៀត
បើមេបក្សបដិសេធលទ្ធផលឆ្នោត គឺបានន័យថា
គ្មានទេការផ្តល់សិទ្ធិស្របច្បាប់ ឬត្រាសម្រាប់មេឃុំ ‑
ចៅសង្កាត់របស់គណបក្សសម រង្ស៊ី ដើម្បីយកទៅប្រើប្រាស់ គឺវាត្រូវតែទុកមោឃៈ
ហើយនេះក៏ជាសារមួយជូនទៅមេឃុំ និងចៅសង្កាត់ និងក្រុមប្រឹក្សាទាំងអស់របស់បក្ស
សមរង្ស៊ី ត្រូវដឹងថា តួនាទីរបស់អស់លោកអាចនឹងត្រូវប្រឈមនឹងគ្រោះថ្នាក់
ប្រសិនជាលទ្ធផលឆ្នោតត្រូវបានបដិសេធមែននោះ។ គណបក្សប្រឆាំងសម រង្ស៊ី បើគេមើលពីខាងក្រៅហាក់បីដូចជាអ្នកប្រជាធិបតេយ្យ
និងគោរពច្បាប់ខ្លាំងណាស់ ប៉ុន្តែ ការពិតជាក់ស្តែង គឺសុទ្ធតែជាជនបំភ័ន្តដ៏គួរឱ្យស្អប់ខ្ពើម
ឬជាជនកេងប្រវ័ញ្ចបោកប្រាស់ទឹកចិត្តប្រជាពលរដ្ឋដោយគ្មានអាណិតអាសូរ។ បើពិនិត្យឱ្យជ្រៅជាងនេះទៀត
គេនឹងឃើញថា បក្សសម រង្ស៊ី គឺពិតជាមាននូវការបែកបាក់ផ្ទៃក្នុងយ៉ាងជ្រាលជ្រៅ
ឬអាចស្ថិតនៅក្នុងកំរិតប្រកាសអាសន្នផងក៏មិនដឹង។ អ្នកខ្លះ គេបានសង្ស័យថា
បក្សប្រឆាំងនេះទំនងជាកើតមាននូវ «បក្សប្រហារ »ដោយសារសកម្មភាពរបស់ប្រធានបក្សស្តីទីចេញសេចក្តីអំពាវនាវបញ្ច្រាស់គ្នាពីគោលបំណងរបស់មេបក្ស
ឬមួយក៏បក្សនេះ ឡប់ឡែតាំងពីមេដំបូល រហូតដល់ថ្នាក់ក្រោម?
ធ្វើយ៉ាងណាបោកប្រាស់ផង បន្លំផង ធ្វើជាស្រែកតវ៉ាផងដើម្បីឱ្យផ្អើលគេឯង
ប៉ុន្តែទីបំផុតទទួលយកលទ្ធផលឆ្នោតដដែលជាដដែល
តើមានន័យអ្វីសម្រាប់ពលរដ្ឋម្ចាស់ឆ្នោតត្រូវជឿការបោកប្រាស់ក្រុមបក្សប្រឆាំងទៀតនោះ?
អ្នកវិភាគមួយចំនួនទៀត
គេនាំគ្នាគិតថា ប្រហែលជាលោកគង់ គាំ ចង់ផ្តាច់ខ្លួន ងាកទៅរកដៃគួថ្មីហើយមើលទៅ
ទើបស្ទុះទៅស្រវ៉ាចាប់ដៃគូរជាមួយបក្សសិទ្ធិមនុស្សដូច្នេះ?
គួរឲ្យសោកស្តាយណាស់
និងអាណិតដល់ក្រុមប្រឹក្សាឃុំ-សង្កាត់
ដែលទើបបានជាប់ឆ្នោត មិនទាន់ទាំងបានប្រកាសលទ្ធផល និងទទួលយកដំណែងរបស់ខ្លួនផង
ស្រាប់តែត្រូវបានមេបក្សរបស់ខ្លួនប៉ុនប៉ងដកហូតសិទ្ធិនោះ ដោយខ្លួនបដិសេធនូវលទ្ធផលនៃបណ្តោះអាសន្ននោះបាត់ទៅហើយ
អីចឹងធ្វើម្តេចនឹងបានធ្វើជាមេឃុំទៅ?
នេះមិនមែនបង្ហាញឲ្យឃើញពីចេតនា
ចង់ធ្វើបក្សប្រហារទេឬ? ទង្វើដែលបានកើតឡើងនេះសរបញ្ជាក់ឲ្យឃើញពីការឈ្លោះគ្នា
មិនស្តាប់គ្នា មិនមានការឯកភាពផ្ទៃក្នុង ដណ្តើមអំណាចគ្នា
ជាសញ្ញាបង្ហាញឲ្យឃើញថា ម្នាក់ៗមានអំណាចរៀងៗខ្លួន ហើយឈាន ទៅរកភាពមហន្តរាយក្នុងបក្សទាំងមូលនៅពេលអនាគតដ៏ខ្លី។
អត្ថបទដោយ៖ ប្រយុទ្ធ
Subscribe to:
Posts (Atom)