សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នាថ្ងៃទី ១៧ មិថុនា ឆ្នាំ ២០១២ បានថ្លែង អំណរគុណជូនចំពោះឯកឧត្តម ហ្វេលីព កាល់ឌឺរ៉ុន (Felipe de Jesus CALDERON Hinojosa) ប្រធានាធិបតីនៃសាធារណរដ្ឋសហព័ន្ធម៉ិកស៊ីកូ ក៏ដូចជារដ្ឋាភិបាលនិងប្រទេសម៉ិកស៊ីកូទាំងមូល ដែលបានសន្យាគាំទ្របេក្ខភាពរបស់ប្រទេសកម្ពុជា ជាសមាជិកមិនអចិន្រៃ្តយ៍នៃក្រុម ប្រឹក្សាសន្តិសុខអង្គការសហប្រជាជាតិសំរាប់អាណត្តិឆ្នាំ ២០១៣-២០១៤ ដែលការបោះឆ្នោត នឹងប្រព្រឹត្តទៅនៅខែតុលាខាងមុខ។
នៅក្នុងជំនួបទ្វេភាគីនៅទីក្រុងឡូកាបូស មុនពិធីបើកកិច្ចប្រជុំកំពូល G20 ជាផ្លូវការសម្តេចតេជោនាយករដ្ឋមន្ត្រី មានប្រសាសន៍ឲ្យដឹងថា កាលពីឆ្នាំ ១៩៩២ កម្ពុជា និងម៉ិកស៊ីកូ បានភ្ជាប់ទំនាក់ទំនងការទូតជាមួយគ្នា ប៉ុន្តែរហូតមកដល់ពេលបច្ចុប្បន្ននេះប្រទេសទាំងពីរ ពុំទាន់មានការផ្លាស់ប្តូរផ្នែកសេដ្ឋកិច្ចអ្វីជាធំដុំនៅឡើយទេ ។ បើទោះជាយ៉ាងនេះក្តី កម្ពុជានិងម៉ិកស៊ីកូ មានទំនាក់ទំនងនយោបាយល្អ ដោយបានគាំទ្រគ្នាទៅវិញទៅមកនៅលើវេទិកាអន្តរជាតិ។
សម្តេចតេជោនាយករដ្ឋមន្ត្រីបានជំរាបជូន ឯកឧត្តមប្រធានាធិបតីនូវបំណងប្រាថ្នាជម្រុញបន្ថែមទៀតនូវកិច្ចសហប្រតិបត្តិការខាងនយោបាយ និង សេដ្ឋកិច្ចកន្លងមកឲ្យកាន់តែរីកធំធាត់ឡើង ហើយកម្ពុជានឹងតែងតាំងឯកអគ្គរាជទូតកម្ពុជា ដែលមាននិវេសនដ្ឋាននៅទីក្រុងវ៉ាស៊ីនតោនសហរដ្ឋអាមេរិកឲ្យទទួលបន្ទុកបន្ថែមនៅសហរដ្ឋម៉ិកស៊ីកូ និងបានស្នើឲ្យភាគីម៉ិកស៊ីកូបើកទូលាយទីផ្សារថែមទៀតសម្រាប់ទំនិញ និងផលិត ផលរបស់កម្ពុជា ។ សម្តេចតេជោមានប្រសាសន៍បន្តថា សម្តេចមានជំនឿយ៉ាងមុតមាំថា ទៅអនាគតយើងអាចជំរុញឲ្យមានការផ្លាស់ប្តូរសេដ្ឋកិច្ច ពាណិជ្ជកម្មច្រើនឡើងសំរាប់ប្រទេសទាំងពីរ។
ក្រៅពីបញ្ហាទ្វេភាគី មេដឹកនាំទាំងពីរ សម្តេចតេជោនាយករដ្ឋមន្រ្តី ក្នុងនាមជាប្រធានអាស៊ាន និង ឯកឧត្តមប្រធានាធិបតីនៃសាធារណរដ្ឋសហព័ន្ធម៉ិកស៊ីកូ ក្នុងនាមប្រធានកិច្ចប្រជុំកំពូល G20 បានផ្លាស់ប្តូរទស្សនៈគ្នាលើប្រធានបទនានាដែលមានការយក ចិត្តទុកដាក់ដូចគ្នានៃកិច្ចប្រជុំកំពូល G20 ក្នុងការដោះស្រាយបញ្ហាប្រឈមនានាចំពោះមុខ ពិសេសបញ្ហាសេដ្ឋកិច្ច និងហិរញ្ញវត្ថុ ដើម្បីជំរុញដំណើរប្រកបដោយតុល្យភាព និងចីរភាព។ សម្តេចតេជោនាយករដ្ឋមន្ត្រីបានថ្លែងអំណរគុណភាគីម៊ិកស៊ីកូ ដែលបានអញ្ជើញកម្ពុជាក្នុង ឋានៈជាប្រធានអាស៊ានឲ្យចូលរួមក្នុងកិច្ចប្រជុំកំពូល G20 ដែលជាការផ្តល់ឱកាសឲ្យកម្ពុជា បានបំពេញតួនាទីប្រកបដោយកិត្តិយសរបស់ខ្លួន ដោយបានដាក់ជូនកិច្ចប្រជុំកំពូល G20 នូវ ឯកសារគោលជំហរបស់អាស៊ានចំពោះបញ្ហាប្រឈមនានា ក្នុងគោលដៅរួមគ្នាដោះ ស្រាយវិបត្តិចំពោះមុខ និងកសាងពិភពលោកមួយ ដែលមានការអភិវឌ្ឍន៍ កំណើនសេដ្ឋកិច្ច កាត់បន្ថយភាពក្រីក្រ បង្កើតការងារ ជាមួយការរក្សា បាននូវបរិស្ថានបៃតងប្រកបដោយ ចីរភាព។
នៅក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្ត្រី ក៏បានទាញអារម្មណ៍ របស់ឯកឧត្តមប្រធានាធិបតីដែលជាប្រធាន G20 ឲ្យយកចិត្តទុកដាក់លើការដោះស្រាយជា កញ្ចប់នូវបញ្ហាសន្តិសុខស្បៀង និងសន្តិសុខថាមពល រវាងតម្លៃប្រេងដែលចេះតែកើនឡើងថ្លៃឥតឈប់ឈរ និងកាន់តែខ្សត់ខ្សោយជាមួយតម្លៃសៀ្ងអាហារ និងការប៉ះពាល់ដល់វិស័យ កសិកម្ម និងការផលិតស្បៀងដែលបណ្តាលមកពីការឡើងថ្លៃប្រេង ។
ប្រភពពីទូរទស្សន៍ជាតិកម្ពុជាឲ្យដឹងថា មុននឹងបញ្ចប់កិច្ចពិភាក្សា ដែលបានប្រព្រឹត្តទៅក្នុង បរិយាកាសរីករាយស្និទ្ធស្នាលរាក់ទាក់នោះ សម្តេចតេជោនាយករដ្ឋមន្ត្រីបានពាំនាំនូវព្រះរាជ បណ្តាំផ្ញើការសាកសួរសុខទុក្ខ និងសព្វសាធុការពរបវរប្រសើរ ពីសំណាក់ព្រះករុណា ព្រះមហាក្សត្រកម្ពុជាជូនចំពោះឯកឧត្តមប្រធានាធិបតី និងបានសូមអញ្ជើញឯកឧត្តមប្រធានាធិបតីម៉ិកស៊ីកូ មកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជាតាមពេលវេលាសមស្រប។
ជាការឆ្លើយតប ឯកឧត្តមប្រធានាធិបតី ហ្វេលីព កាល់ឌីរ៉ុន បានសម្តែងនូវការរីករាយ ដែលបានទទួលគណៈប្រតិភូជាន់ខ្ពស់កម្ពុជាមកចូលរួមកិច្ចប្រជុំកំពូល G20 ព្រមទាំងបាន សម្តែងនូវការរីករាយក្នុងការពង្រឹងទំនាក់ទំនង និងកិច្ចសហប្រតិបត្តិការទ្វែភាគីថែមទៀតជា មួយកម្ពុជា។ឯកឧត្តមប្រធានាធិបតីម៉ិកស៊ីកូបានស្នើឲ្យសម្តេចតេជោនាយករដ្ឋមន្ត្រី ពាំនាំថ្វាយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នូវអំណរព្រះគុណយ៉ាងជ្រាលជ្រៅចំពោះបណ្តាំផ្ញើសាកសួរសុខទុក្ខ និងពរសព្វសាធុការពរដ៏បវរ ព្រមទាំងការអញ្ជើញឯកឧត្តមមកបំពេញទស្សនកិច្ចនៅព្រះរាជាណាចក្រកម្ពុជា។ ឯកឧត្តមប្រធានាធិបតីបានបានទូលថ្វាយព្រះពរជ័យដល់ព្រះករុណា ព្រះមហាក្សត្រ សូមព្រះករុណាជាអម្ចាស់ជីវិតលើត្បូងសូមព្រះអង្គមានព្រះរាជសុខភាពល្អបរិបូរណ៌ ដើម្បីគង់ ប្រថាប់ជាម្លប់របស់ប្រជារាស្ត្រកម្ពុជានោះ។ ឯកឧត្តមប្រធានា ធិបតី Felipe Calderon Hinojosa បានសន្យាថានឹងនាំចំណាប់អារម្មណ៍នេះជូនចំពោះថ្នាក់ដឹកនាំ G20 បានជ្រាប និងពិចារណា។