ទស្សនៈ
ដល់ពេលវេលានៃការផ្លាស់ប្តូរមេបក្សប្រឆាំងថ្មី
កម្ពុជា គឺជារដ្ឋឯករាជ្យ អធិបតេយ្យ ដែលបាន
និងកំពុងពង្រឹងនូវនីតិរដ្ឋ ដោយការខិតខំតាក់តែង កសាងច្បាប់ និងគោរពច្បាប់ដើម្បីការចូលរួមទាំងអស់គ្នាការពារសន្តិសុខ
សណ្តាប់ឆ្នាប់សង្គម។
ប្រជាពលរដ្ឋកម្ពុជា
ជាប្រជាពលរដ្ឋដែលស្រឡាញ់នូវភាពយុត្តិធម៌ ស្មោះត្រង់ ស្លូតបូត និងតែងតែចង់ចៀសឲ្យផុតពីការជាប់ពាក់ព័ន្ធនឹងទោសទណ្ឌនានា ដែលប្រឈមមុខនឹងផ្លូវច្បាប់
ដោយជាទូទៅគេចាត់ទុកថា បើថ្លោះធ្លោយធ្លាក់ខ្លួនប្រព្រឹត្តបទល្មើសណាមួយអាចនឹងត្រូវតុលាការផ្តន្ទាទោស ដែលនាំឱ្យអាប់ឱនកេរ្តិ៍ឈ្មោះ និងកិត្តិយសគ្រួសារ។
ប៉ុន្តែ វាជារឿងចម្លែកខ្លាំងណាស់សម្រាប់អ្នកនយោបាយខ្លះដែលមិនប្រកបដោយស្វាមីភ័ក្រចំពោះជាតិ
មាតុភូមិ និងមិនមាននូវភាពស្មោះត្រង់ជាមួយពលរដ្ឋម្ចាស់ឆ្នោត
បានចាប់យកការកសាងទោសកំហុសព្រហ្មទណ្ឌដោយគ្មានខ្លាចរអារ
ដើម្បីអ្វីមួយដែលពួកគាត់គិតថា នោះជាភាពល្បីឈ្មោះ និងជាឥស្សរភាពនៃនយោបាយប្រឆាំងរបស់គាត់ទៅវិញ។
នៅក្នុងស្រុកខ្មែរ គេបានដឹងថា
លោក សម រង្ស៊ី បានជ្រើសរើសយកជីវិតបែបនោះ ដើម្បីបំរើនយោបាយរបស់គាត់
ហើយថ្មីៗនេះ តុលាការក៏បានចេញសាលក្រមជាស្ថាពរកាត់ទោសរូបគាត់ ( សម រង្ស៊ី ) ដាក់ពន្ធនាគារផងដែរ អំពីការបំផ្លិចបំផ្លាញដកតំរុយបង្គោលព្រំដែន
រើសអើងជាតិសាសន៍ ញុះញង់ដល់ប្រជាពលរដ្ឋឲ្យកើតជាជម្លោះ
ចលាចល វឹកវរនៅក្នុងសង្គម ការក្លែងឯកសារផែនទី ផ្សព្វផ្សាយព័ត៌មានមិនពិត
និងបទល្មើសចុងក្រោយ គឺបទបរិហារកេរ្ត៍ប្រមុខរាជរដ្ឋាភិបាល រំលោភលើច្បាប់បោះឆ្នោត។
បច្ចុប្បន្ន លោកសម រង្ស៊ី បានជាប់ឈ្មោះជា «ទណ្ឌិត» ដែលមានទោសជាប់ខ្លួនជាង១០
ឆ្នាំ និងពិន័យជាប្រាក់រាប់លានរៀល បើទោះជាលោក
មិនបានចូលខ្លួនមកទទួលទោសទណ្ឌដែលខ្លួនបានប្រព្រឹត្តខុសច្បាប់នោះក៏ដោយ ប៉ុន្តែ
ជីវិតនយោបាយ និងក្តីប្រាថ្នាដ៏ជ្រាលជ្រៅរបស់សម រង្ស៊ី នូវអ្វីមួយដែលគាត់ទទូចចង់បានសម្រាប់អនាគតជានាយករដ្ឋមន្ត្រី
គឺត្រូវបញ្ចប់។
ឈ្មោះថាទណ្ឌិត សូម្បីតែឱកាសនៃការចូលរួមប្រកួតប្រជែងជាមួយគណបក្សនយោបាយផ្សេងៗក៏ត្រូវបានកាត់ផ្តាច់ទាំងស្រុង ពីព្រោះថា តើនៅក្នុងពិភពលោកនេះមានប្រទេសណាមួយដែលអនុញ្ញាតឲ្យអ្នកទោស
បំរើការងារ ក្នុងក្រសួង ឬស្ថាប័នណាមួយនោះ? ហើយម៉្យាងទៀតប្រជាពលរដ្ឋខ្មែរគ្រាន់តែឮសូរថា ជាទណ្ឌិតនោះ
គឺពួកគាត់មិនរាប់រកជាដាច់ខាត
ពីព្រោះការសេពគប់ជាមួយជនល្មើសច្បាប់ នឹងអាចនាំស៊យដល់ជីវិតរបស់ពួកគាត់
នេះចំពោះពលរដ្ឋដែលមាននូវសតិសម្បជញ្ញៈ។ ប៉ុន្តែ ពលរដ្ឋមួយចំនួនទៀតដែលធ្លាប់តែចាញ់បោកការភូតកុហករបស់
លោក សម រង្ស៊ី ក៏ត្រូវពិចារណាឡើងវិញ ពីព្រោះថា
តើអស់លោកអ្នកនៅបន្តគាំទ្រលោក សម រង្ស៊ី ដល់ថ្ងៃណាទៀត
បើគ្រាន់តែចូលស្រុកខ្លួនឯងមិនហ៊ានចូលមកផងនោះ តើ ទណ្ឌិត សម រង្ស៊ី
អាចមានលទ្ធភាពជួយអ្វីដល់បងប្អូនកើតនោះ។ បងប្អូនខ្មែរ
គឺជាម្ចាស់ឆ្នោត ម្ចាស់អំណាច មិនគួរធ្វើខ្លួនក្លាយជាមនុស្សអន់ ចាញ់បោកគេ
សូម្បីតែអ្នកទោស ក៏បោកប្រាស់យើងបានដែរ
ឯណាទៅតម្លៃ
និងឱកាសរបស់បងប្អូនសម្រាប់ការចូលរួមលើកកំពស់ជីវភាពគ្រួសារ
និងការចូលរួមអភិវឌ្ឍសង្គមជាតិ?
មកដល់ពេលនេះ សម រង្ស៊ី អស់សិទ្ធជាអ្នកតំណាងរាស្រ្ត អស់សិទ្ធិជាពលរដ្ឋស្របច្បាប់
អស់ សិទ្ធិឈរឈ្មោះបោះឆ្នោត និងឈរឈ្មោះប្រកួតប្រជែងជានាយករដ្ឋមន្ត្រីទៀតហើយ ដូចនេះសមាជិកសមាជិការ ក្នុងបក្សប្រឆាំងមួយនេះ គួរពិចារណាក្នុងការជ្រើសរើសរកមេបក្សថ្មី ដែលមិនគួរមានការជាប់ពាក់ព័ន្ធ និងជនមានពិរុទ្ធនោះ។ តើ សមណាស់ឬដែលគ្រប់គ្នាជាមនុស្សរស់នៅអនុវត្តត្រឹមត្រូវតាមច្បាប់
ប៉ុន្តែ បែរជានាំគ្នាលើកទូល គាំទ្រអ្នកទោស
ដែលជាជនគិតតែការស្រេកឃ្លានចង់បានអំណាច
ហើយធ្លាប់ឱ្យប្រជាពលរដ្ឋជាប់គុកជំនួសខ្លួនកាលពីពេលកន្លងទៅ
ដូចជាករណីដកបង្គោលព្រំដែននៅស្រុកចន្ទ្រា ខេត្តស្វាយរៀង
ពលរដ្ឋខ្មែរពីររូបត្រូវបានជាប់ពន្ធនាគារ ប៉ុន្តែ លោក សម រង្ស៊ី
រត់នីរទេសខ្លួននៅរស់នៅឯក្រៅប្រទេសបាត់។
ទណ្ឌិតសម
រង្ស៊ី ជាបុគ្គលមួយរូបដែលមិនទទួលខុសត្រូវចំពោះមុខច្បាប់ និងមិនចេះអៀនខ្មាស់។ សម រង្ស៊ី ជាមនុស្សដែលមិនបានគិតគូដល់ប្រជារាស្រ្តខ្លួនឡើយ
បែរជាយកទង្វើបំផ្លាញជាតិ បំផុសចលនាឲ្យប្រជាពលរដ្ឋ
ទៅដកតំរុយបង្គោលព្រំដែន ហើយបែរជាមកចោទដាក់ប្រជាពលរដ្ឋជាអ្នកបបួលទៅវិញ។
អ្វីដែលគួរហួសចិត្តនោះ
គឺកំហុសខ្លួនឯងប៉ុនមហាមេឃ បែរជាទម្លាក់កំហុសទៅសហរដ្ឋអាមេរិកថាបានគូសផែនទីខុសទៅវិញ។ តាមពិត ផែនទីអាមេរិក មានខ្សែរព្រំដែនត្រឹមត្រូវ ប៉ុន្តែ លោក សម
រង្ស៊ី មកគូសបន្ថែមដោយដៅបង្គោលព្រំដែនថ្មីចូលជ្រៅមកក្នុងទឹកដីខ្មែរ
ដែលនាំឱ្យមានការភន្ត័ច្រលំថា រដ្ឋាភិបាលសព្វថ្ងៃក្បត់ជាតិ
និងបានកាត់ដីឱ្យទៅប្រទេសដ៏ទៃទៅវិញ។
ដូច្នេះ ប្រជាពលរដ្ឋមួយចំនួនដែលធ្លាប់គាំទ្រគណបក្សប្រឆាំងនោះ ល្មមដល់ពេលពិចារណា
ដើម្បីផ្លាស់ប្តូរប្រធានបក្សថ្មីហើយ តើចាំដល់ណាទៀត? យោបល់ខ្ញុំ
ជាអ្នកនិពន្ធសូមទាញការចាប់អារម្មណ៍បងប្អូនថា
តើបក្សប្រឆាំងសព្វថ្ងៃបានជួយអ្វីខ្លះដល់បងប្អូន តើផ្លូវ សាលារៀន អណ្តូងទឹក អគ្គីសនី ប្រព័ន្ធធារាស្ត្រ
មន្ទីរពេទ្យ ផ្សារ និងហេដ្ឋារចនាសម្ព័ន្ធទាំងអស់នេះ បក្សប្រឆាំងជាអ្នកធ្វើ
ឬក៏ពិតជាសមិទ្ធផលរបស់គណបក្សប្រជាជនកម្ពុជា?
នៅពេលដែលបក្សសម
រង្ស៊ី កំពុងជួបភាពវឹកវរ ក៏មានបក្សមួយទៀតដែល ជាកំពូលសិទ្ធិមនុស្សនោះ ក៏ចង់ត្របាក់លេបយកបក្សសម
រង្ស៊ី ទាំងមូល ដោយធ្វើជារួមគ្នា បន្លំភ្នែក ប្រជាពលរដ្ឋឲ្យវង្វេងថា សិទ្ធិមនុស្ស ក៏ដូចជាបក្សសម
រង្ស៊ី មិនដឹងបក្សណាជាបក្សត្រឹមត្រូវ ព្រោះមួយជាទណ្ឌិត និងមួយទៀតទើបបោកប្រាស់មេឃុំដែលទើបជាប់ឆ្នោតតាមរយៈការសន្យាខ្យល់នានា។
អត្តចរិកអ្នកនយោបាយសព្វថ្ងៃ មិនហួសនិស្ស័យនឹងមើលនោះទេ
គឺងាយបំផុត ត្រង់ថា លោកសម រង្ស៊ី ជាអ្នកទោស មួយវិញទៀតលោកសម
រង្ស៊ីជាបុគ្គលម្នាក់ដែលគណៈកម្មាធិការជាតិរៀបចំការបោះឆ្នោតក៏បានលប់ឈ្មោះចេញពីបញ្ជីឈ្មោះបោះឆ្នោតទៀតផង ហើយលោកសម រង្ស៊ី ក៏នៅឯក្រៅប្រទេសទៀត តើធ្វើយ៉ាងដូចម្តេចទើបអ្នកទោសរូបនេះអាចនឹងឈ្នះឆ្នោតបានទៅ? ដូចនេះ មិនខុសអីពីទុកសន្លឹកឆ្នោតឲ្យគណបក្សសិទ្ធិមនុស្សដណ្តើមយកនោះទេ។
ជាងនេះទៀតលោកសម
រង្ស៊ី និងលោកកឹម សុខា គឺរាល់ថ្ងៃគិតតែរិះរកមធ្យោបាយឃោសនាបោកប្រាស់ប្រជាពលរដ្ឋ
ញុះញង់បង្កើតតែបញ្ហាមិនចេះចប់ គឺមេបក្សទាំងពីរនេះមានជំនាញផ្សេងគ្នា
«មួយពូកែបោកដល់កំពូល
មួយទៀតជាអ្នកទោសជួយមិនបាន»
តើយើងទៅសង្ឃឹមថា ស្រុកទេសអាចរីកចំរើនបានទេ ? សូមបងប្អូនម្ចាស់ឆ្នោតសម្រេចចិត្តធ្វើអ្វីមួយដែលនាំសេចក្តីសុខដល់ក្រុមគ្រួសារ
សង្គមជាតិ ? ហើយពេលនេះ បើពលរដ្ឋមួយចំនួននៅមិនទាន់ដកចិត្តរួចពីបក្សប្រឆាំង
ក៏គួរដល់ពេលគិតពិចារណាអំពីមេបក្សថ្មីហើយ ពីព្រោះថា
ក្នុងចំណោមថ្នាក់ដឹកនាំបក្សសម រង្ស៊ី មានមនុស្សសំខាន់ពីររូបទៀតដែលអាចស្នងតំណែងនេះ
បាន គឺ លោក គង់ គាំ ប្រធានស្តីទីបច្ចុប្បន្ន និងលោកស្រី មូរ សុខហួរ គឺជាបុគ្គលដែលសក្តិសមបំផុតនឹងត្រូវបានជ្រើសរើសសម្រាប់បេក្ខជនជាមេបក្សថ្មី
និងឈ្មោះថ្មីរបស់បក្ស «ប្រឆាំង»នោះ។
អត្ថបទដោយៈ ប្រយុទ្ធ