បន្ទាប់ពីបានអញ្ជើញចូលរួមជាអធិបតីដ៏ខ្ពង់ខ្ពស់ជាមួយឯកឧត្តម
ង្វៀន តាន់យ៉ុង នាយករដ្ឋមន្ត្រីវៀតណាមក្នុងពិធីសម្ពោធបង្គោលព្រំដែនលេខ
៣១៤ រវាងខេត្តកំពត នៃព្រះរាជាណាចក្រកម្ពុជា និងខេត្តគៀនយ៉ាង
នៃសាធារណរដ្ឋសង្គមនិយមវៀតណាមនាព្រឹកថ្ងៃទី២៤មិថុនារួចមក ព្រឹកថ្ងៃដដែលនេះដែរ
សម្តេចអគ្គមហាសេនាបតីតេជោ ហ៊ុន
សែន និងឯកឧត្តម ង្វៀន តាន់យ៉ុង បានបន្តដំណើរអញ្ជើញទៅចូល រួមជាអធិបតីក្នុងសន្និសីទ
កម្ពុជា‑វៀតណាម លើកទី៣
នៅទីក្រុងហាទៀង
នៃសាធារណរដ្ឋសង្គមនិយមវៀតណាម ស្តីពីកិច្ចសហ ប្រតិបត្តិការ វិនិយោគ ។
ឯកឧត្តម សុខ ចិន្តាសោភា
រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា
មានប្រសាសន៍ថា សន្និសីទលើកទី៣ ក្នុងថ្ងៃនេះ ប្រព្រឹត្តទៅក្នុងបរិការណ៍នៃទំនាក់ទំនងកិច្ចសហប្រតិបត្តិការមិត្តភាព
រវាងកម្ពុជា វៀតណាម ឲ្យកាន់ស្អិតរមួត និងស៊ីជំរៅថែមទៀត។ ឯកឧត្តម បានកត់សំគាល់ថា
ពាណិជ្ជកម្ម រវាង កម្ពុជា វៀតណាម បានទទួលបច្ច័យនៃភាពងាយស្រួលក្នុងការឆ្លងកាត់ព្រំដែន
និងមានកំណើនឡើងជាបន្តបន្ទាប់។ តាមតួលេខនៃការនាំចេញ នាំចូលក្នុងឆ្នាំ២០១១
បង្ហាញថា ការនាំចេញរបស់កម្ពុជា ទៅវៀតណាម មានតម្លៃស្មើនឹង៤២៩លានដុល្លារអាមេរិក
ខណៈដែលការនាំចូលទំនិញពីវៀតណាម
មកកម្ពុជាមានតម្លៃស្មើនឹង ២.៤០៦លាន ដុល្លារ អាមេរិក។ តួលេខខាងលើបានបង្ហាញឲ្យឃើញថា
ទិសដៅ ដែលសម្តេចតេជោនាយករដ្ឋមន្ត្រីកម្ពុជា
និងនាយករដ្ឋមន្ត្រីវៀតណាមបានកំណត់ ស្តីពីទំហំពាណិជ្ជកម្មរវាង
ប្រទេសកម្ពុជា និងវៀតណាម កើនលើស ២.០០០លានដុល្លារអាមេរិក នៅឆ្នាំ២០១២
ពោលគឺយើងសំរេចបានតាំងពីឆ្នាំ២០១១កន្លងមកម៉្លេះ។
ជាមួយនឹងសេចក្តីថ្លែងអំណរគុណចំពោះការបដិសណ្ឋារកិច្ចពីភាគីវៀតណាម
សម្តេចតេជោនាយករដ្ឋមន្ត្រី បានថ្លែងអំណរគុណដល់ក្រសួងផែនការ និងអ្នកវិនិយោគវៀតណាម
គណៈកម្មាធិការប្រជាជនទីក្រុងហាទៀង
ខេត្ដគៀនយ៉ាងដែលបានសហការជាមួយក្រុមប្រឹក្សាអភិវឌ្ឍន៍កម្ពុជា
រៀបចំសន្និសីទកម្ពុជា-វៀតណាមលើកទី៣ ស្ដីពីកិច្ចសហប្រតិបត្ដិការ- វិនិយោគដ៏មានសារៈសំខាន់នេះឡើង
។ សន្និសីទនេះគឺជាព្រឹត្ដិការណ៍ ថ្មីមួយទៀត ដែលយើងបានប្រារព្វឡើងបន្ទាប់ពីជំនួបគ្នាក្នុងសន្និសីទលើក
ទី ២ កាលពីថ្ងៃទី ២៤ ខែ មេសា ឆ្នាំ ២០១១ កន្លងទៅ នៅរាជធានីភ្នំពេញ ហើយសម្តេចមានជំនឿយ៉ាងមុតមាំថា
សន្និសីទនេះពិតជានឹងរួមចំណែកថែម ទៀត ក្នុងការរកឃើញនូវកាលានុវត្ដភាពថ្មីៗសម្រាប់ពង្រឹង
និងពង្រីក សហប្រតិបត្ដិការសេដ្ឋកិច្ច-ពាណិជ្ជកម្មរវាងប្រទេសយើងទាំងពីរ និងជួយលើកកម្ពស់ជីវភាពរស់នៅរបស់ប្រជាជនយើងឱ្យកាន់តែប្រសើរ ថែមមួយកម្រិតទៀត
។
ម្យ៉ាងវិញទៀត ថ្ងៃនេះគឺជាថ្ងៃមួយដ៏វិសេសវិសាលផងដែរ
ពីព្រោះកាលពី ៤៥ ឆ្នាំ កន្លងទៅ គឺនៅថ្ងៃទី ២៤ ខែ មិថុនា ឆ្នាំ ១៩៦៧ កម្ពុជានិង
វៀតណាមបានភ្ជាប់ទំនាក់ទំនងការទូតជាមួយគ្នា ។ សម្តេចបានសម្ដែងនូវការដឹងគុណ
ដ៏ជ្រាលជ្រៅសាជាថ្មីម្ដងទៀត ចំពោះប្រជាជននិងរដ្ឋាភិបាលវៀតណាម ដែលបានបន្ដគំាទ្រដល់កម្ពុជា
តាមរយៈការផ្ដល់ហិរញ្ញប្បទានឥតសំណង កម្ចីសម្បទាន ជំនួយសង្គមកិច្ច ការបណ្ដុះ
បណ្ដាលធនធានមនុស្ស ការកសាងហេដ្ឋារចនាសម្ព័ន្ធរូបវ័ន្ដ រួមមាន ផ្លូវ
ស្ពាននៅតាមបណ្ដាខេត្ដ ដែលជាប់ព្រំប្រទល់កម្ពុជា-វៀតណាម ព្រមទាំងការជំរុញដល់ធុរជន
អ្នកវិនិយោគ និងប្រជាជនវៀតណាមឱ្យមកបណ្ដាក់ទុន និងទស្សនាកម្ពុជា។
សម្តេចតេជោ បានបញ្ជាក់ថា
ព្រឹត្ដិការណ៍នៃការសម្ពោធបង្គោលព្រំដែនលេខ ៣១៤ គឺជាសក្ខីភាពបន្ថែមទៀតបង្ហាញឱ្យឃើញ
នូវកិច្ចសហប្រតិបត្ដិការល្អរវាងប្រទេសកម្ពុជា និងវៀតណាម។ កម្ពុជាបានឆ្លងកាត់ដំណាក់កាលផ្លាស់ប្ដូរយ៉ាងឆាប់រហ័សលើគ្រប់ទិដ្ឋភាព
ទោះបីជាមានបញ្ហាប្រឈមធំៗ មួយចំនួននៅក្នុងស្ថានការណ៍សេដ្ឋកិច្ចតំបន់
និងពិភពលោក ព្រមទាំងមានគ្រោះធម្មជាតិមិនអំណោយផលមួយចំនួននៅក្នុងផ្ទៃប្រទេសក៏ដោយ
ក៏យើងអាចបន្ដគ្រប់គ្រងនិងរក្សាបាននូវសុខសន្ដិភាពវឌ្ឍនភាពសង្គម
និងធានាបាននូវស្ថិរភាពម៉ាក្រូសេដ្ឋកិច្ចគួរឱ្យមោទនៈ។ សេដ្ឋកិច្ចកម្ពុជាបានងើបចេញពីវិបត្ដិប្រកបដោយចិរភាព
និងមានសន្ទុះកំណើនឡើងវិញ ប្រកបដោយ ចិរភាពក្នុងកម្រិតប្រហែល ៧% ប្រចាំឆ្នាំ
។ ជាក់ស្ដែងក្នុងឆ្នាំ ២០១១ កន្លងទៅ
កម្ពុជាសម្រេចបាននូវកំណើនផលិតផលក្នុងស្រុកសរុប ៧,១ % ។ ជាទស្សនៈ អនាគតសេដ្ឋកិច្ចកម្ពុជាមានលក្ខណៈជាវិជ្ជមាន
គឺត្រូវបានគេរំពឹងទុកថា កើនឡើងពី ៦% ទៅ ៧% ជាប្រចាំឆ្នាំក្នុងរយៈពេលមធ្យមខាងមុខ។
កម្ពុជាក៏ត្រូវបានរពឹងទុកដែរថានឹងទទួលផលប្រយោជន៍ពីការវិនិយោគ និងលំហូរឥណទានសកលលោក
ក្នុងពេលអនាគត ដែលកើតឡើងពីលក្ខណៈអំណោយផលនៃតំបន់អាស៊ី ខណៈពេលដែលមានការចុះខ្សោយតម្រូវការក្នុងតំបន់ដទៃទៀតនៃពិភពលោកនោះ។
សម្តេចតេជោ បានបន្តថា ភាពជាដៃគូមួយដ៏រឹងមាំ រវាងរាជរដ្ឋាភិបាល និងវិស័យឯកជន
គឺជាកត្ដាចាំបាច់បំផុតនៅ ក្នុងដំណាក់កាលនេះ។ ក្នុងន័យនេះ កម្ពុជាស្វាគមន៍ជានិច្ច
ចំពោះការផ្លាស់ប្ដូរយោបល់ជាមួយវិស័យឯកជន និងបន្ដផ្ដល់ការយកចិត្ដទុកដាក់ចំពោះ
បរិស្ថានធុរកិច្ច ក៏ដូចជាការគាំទ្រនិងលើកស្ទួយសមត្ថភាពរបស់វិស័យឯកជន
ឱ្យរីកលូតលាស់ និងអាចប្រកួតប្រជែងទាំងនៅក្នុងក្របខ័ណ្ឌតំបន់ និងពិភពលោក។
កម្ពុជាបានបើកចំហសេដ្ឋកិច្ចរបស់ខ្លួនសម្រាប់អ្នកវិនិយោគទាំងអស់ ដោយគ្មានការបែងចែករវាងអ្នកវិនិយោគជាតិ
និងអ្នកវិនិយោគបរទេសឡើយ។
រាជរដ្ឋាភិបាលកម្ពុជា បាន និងកំពុងអនុវត្ដកំណែទម្រង់យ៉ាងហ្មឺងម៉ាត់ក្នុងគ្រប់វិស័យ
ដែលរួមមានកំណែទម្រង់ហិរញ្ញវត្ថុសាធារណៈកំណែទម្រង់អភិបាលកិច្ចដែលផ្ដោតលើការគ្រប់គ្រងដីធ្លី
កំណែទម្រង់រដ្ឋបាលច្បាប់ និងប្រព័ន្ធយុត្ដិធម៌និងការពង្រឹង ហេដ្ឋារចនាសម្ព័ន្ធផ្នែកទន់និងផ្នែករឹងដែលត្រូវការចំបាច់សម្រាប់ធ្វើឱ្យកិច្ចការ
វិនិយោគនិងធុរកិច្ចកាន់តែមានប្រសិទ្ធភាព ។
សម្តេចតេជោនាយករដ្ឋមន្ត្រីក៏អំពាវនាវដល់ធុរជន និងវិនិយោគិនវៀតណាមទាំងអស់ឲ្យមកទស្សនាប្រទេសកម្ពុជាដើម្បីសិក្សានិងពិនិត្យលទ្ធភាពជាក់ស្ដែងសម្រាប់ធ្វើការវិនិយោគ ព្រោះថាសកម្មភាពវិនិយោគមួយចំនួនដែលកើតមានឡើង
នៅប្រទេសវៀតណាម និងបទពិសោធន៍ដែលបានទទួលពីសកម្មភាពទាំង នោះអាចយកមកអនុវត្ដនៅកម្ពុជា
ប្រកបដោយប្រសិទ្ធភាពខ្ពស់និងជោគជ័យ។ ជាមួយនេះ សម្តេចក៏បានស្នើសហគមន៍ធុរកិច្ចវៀតណាមធ្វើការពិភាក្សាជាមួយគណៈប្រតិភូវិនិយោគកម្ពុជាសរុបចំនួន
១២០ នាក់ ដែលអញ្ជើញចូលរួមសន្និសីទនេះ ក្នុងគោលបំណងចាប់ដៃគ្នា
រួមកម្លាំងគ្នា
ដើម្បីធានាជោគជ័យនៃគំរោងវិនិយោគ ។ ក្នុងនាមរាជរដ្ឋាភិបាលកម្ពុជា
សម្តេចតេជោបានយកឱកាសនេះបញ្ជាក់ម្ដងទៀតថា កម្ពុជានៅតែមានជំហរបន្ដស្វាគមន៍
និងបន្ដជំរុញលើកទឹកចិត្ដចំពោះបណ្ដាគម្រោងវិនិយោគមកកម្ពុជា ហើយរាជរដ្ឋាភិបាលនឹងបន្ដការខិតខំប្រឹងប្រែងបន្ថែមទៀត
ក្នុងគោលដៅបន្ដ ពង្រឹងនូវកិច្ចសហប្រតិបត្ដិការសេដ្ឋកិច្ចការបើកទូលាយ ព្រមទាំងការបង្កើតបាន
នូវបរិយាកាសវិនិយោគឱ្យកាន់តែល្អប្រសើរ មានលក្ខណៈទុកចិត្ដបានសម្រាប់វិនិយោគិននិង
ធុរជន ។
ឯកឧត្តម ង្វៀន តាន់យ៉ុង នាយករដ្ឋមន្ត្រី
វៀតណាម បានមានប្រសាសន៍ថា សន្និសីទអំពីកិច្ចសហប្រតិបត្តិការវិនិយោគវៀតណាម
កម្ពុជា លើកទី៣នេះ គឺជាសកម្មភាព សំខាន់ នៃបណ្តាសមកម្មភាពរបស់ឆ្នាំមិត្តភាព
វៀតណាម កម្ពុជា ខួបអនុស្សាវរីយ៍ លើកទី៤៥ ថ្ងៃបង្កើតទំនាក់ទំនងការទូត
ប្រទេសទាំង២។ នេះគឺជាឱកាសភាគីទាំង២វាយតម្លៃទំនាក់ទំនងកិច្ច សហប្រតិបត្តិការសេដ្ឋកិច្ចវិនិយោគ
ពាណិជ្ជកម្ម ប្រទេសទាំង២ ជាពិសេស គឺលទ្ធផល បានសំរេចចាប់តាំងពីសន្និសីទជំរុញវិនិយោគ
វៀតណាមកម្ពុជា ពីមុន និងពិភាក្សាបណ្តាវិធីសាស្ត្រ ដើម្បីជំរុញបន្ថែមទៀតនូវទំនាក់ទំនងវិស័យនេះ
នាពេលខាងមុខ។ឯកឧត្តមបន្តថា ទំហំពាណិជ្ជកម្ម ភាគីទាំង២រយៈពែល៥ឆ្នាំកន្លងមក
២០០៧-២០១១កើនឡើងយ៉ាងឆាប់រហ័យគឺពី១,២ពាន់លានដុល្លារអាមេរិក ដល់២,៨ពាន់លានដុល្លារអាមេរិក គឺកើមឡើង២,៣ដង ល្បឿននៃកំណើនជាមធ្យមជិត ២៥%ក្នុង១ឆ្នាំ។ ឆ្នាំ២០១១កើនឡើង៥៥%ប្រៀបធៀបឆ្នាំ២០១០។
៥ខែដំបូងឆ្នាំ២០១២ទោះបីជាជួបការលំបាកច្រើនក៏ដោយ ក៏នៅតែកើនឡើង១,៥ពាន់លានដុល្លាអាមេរិក គឺកើនឡើង៣០% ប្រៀបធៀបនឹងរយៈពេលដូចគ្នានៅឆ្នាំ២០១១។បច្ចុប្បន្ន
បន្តាក្រុមហ៊ុន អាជីវកម្មវៀតណាម បានដាក់ទុនវិនិយោគលើ១១២គំរោងនៅកម្ពុជា
ដើមទុនវិនិយោគ បានចុះបញ្ជីសរុបជិត២,៤ពាន់លានដុល្លារអាមេរិក ។
វិស័យទេសចរណ៍ប្រទេសទាំង២ រយៈពេល៥ឆ្នាំកន្លងមក
២០០៧-២០១១ ចំនួនភ្ញៀវទេសចរណ៍កម្ពុជា មកវៀតណាម កើនឡើង៣ដង ជាមធ្យមកំណើន២៩%ក្នុង១ឆ្នាំ
ដោយឡែកភ្ញៀវទេសចរណ៍វៀតណាមមកកម្ពុជា កើនឡើង៤,៥ដង កំណើនជាមធ្យម ៤៦%ក្នុង១ឆ្នាំ។ ឯកឧត្តមនាយករដ្ឋមន្ត្រីវៀតណាម
បានដាក់សំណើរសំណូមពរមួយ ចំនួនដើម្បីជំរុញកិច្ចសហប្រតិបត្តិការសេដ្ឋកិច្ច
ពាណិជ្ជកម្ម វិនិយោគ ទេសចរណ៍ ដើម្បីជំរុញឲ្យសំរេចបានដោយប្រសិទ្ធភាពថែមទៀត
ដូចជាដាក់ចេញការគាំទ្រ ការលើកលេងពន្យាពេលលើកលែងពន្ធលើទំនិញមួយចំនួន និងឲ្យភាគីទាំង២បង្កលក្ខណៈងាយស្រួលទៅលើគំរោងវិនិយោគមួយចំនួនដូចជាវារីអគ្គិសនី
កៅស៊ូ កសិឧស្សាហកម្ម
ភាគីទាំង២ត្រូវដោះស្រាយឲ្យទាន់ពេលវេលានូវយន្តការដោះស្រាយ គោលនយោបាយ
ច្បាប់នានា ការបន្តផ្លាស់ប្តូរព័ត៌មានស្វែងរកគម្រោងវិនិយោគថ្មីៗដែលប្រទេសទាង២មាន។
ជាងនេះទៀត រដ្ឋាភិបាល ក្រសួង ស្ថាប័នពាក់ព័ន្ធនៃប្រទេសទាំង២បង្កលក្ខណៈងាយស្រួល
ឲ្យភាគីទាំង២ មានការគាំទ្រដាក់គំរោងវិនិយោគទៅវិញទៅមក។
ក្នុងនាមរដ្ឋាភិបាលវៀតណាម ឯកឧត្តម
ង្វៀន តាន់យ៉ុង បានវាយតម្លៃខ្ពស់ចំពោះ គោលនយោបាយកម្ពុជា គោរពការអភិវឌ្ឍទំនាក់ទំនង
និងកិច្ចាសហប្រតិបត្តិការជាមួយ វៀតណាម បានបង្កលក្ខណៈងាយស្រួលសំរាប់បណ្តាក្រុមហ៊ុនវៀតណាម
មកវិនិយោគនៅកម្ពុជា ហើយជាមួយនេះឯកឧត្តមបានវាយតម្លៃខ្ពស់ និងថ្លែងអំណរគុណយ៉ាងស្មោះ
ស្ម័គ្រចំពោះសម្តេចតេជោនាយករដ្ឋមន្ត្រី ហ៊ុន សែន ដែលបានរួមវិភាគទានយ៉ាងសំខាន់ចំពោះទំនាក់ទំនងដ៏ល្អប្រសើររវាងប្រទេសទាំង២។
ឯកឧត្តមសង្ឃឹមថា កិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម
វិនិយោគ ទេសចរណ៍ រវាងប្រទេសទាំង២ នឹងឡើងដល់៥.០០០លានដុល្លារអាមេរិក
នៅឆ្នាំ២០១៥ ហើយពេលនោះអ្នកវិនិយោគវៀតណាម នឹងក្លាយទៅជាអ្នកវិនិយោគជាប់លំដាប់ថ្នាក់លេខ១នៅកម្ពុជា។
បន្ទាប់មក សម្តេចតេជោ ហ៊ុន សែន នាយករដ្ឋមន្ត្រី
នៃព្រះរាជាណាចក្រកម្ពុជា និងឯកឧត្តម ង្វៀន តាន់យុង នាយករដ្ឋមន្ត្រី នៃសាធារណរដ្ឋសង្គមនិយមវៀតណាម
បានអញ្ជើញជាអធិបតីដ៏ខ្ពង់ខ្ពស់ក្នុងពិធីចុះហត្ថលេខាលើពិធីសារ ស្ដីពី វិសោធនកម្មលើកិច្ចព្រមព្រៀងរវាងរដ្ឋាភិបាល
នៃព្រះរាជាណាចក្រកម្ពុជា និងរដ្ឋាភិបាល នៃសាធារណរដ្ឋសង្គមនិយមវៀតណាម
ស្ដីពីការជំរុញនិងការការពារ វិនិយោគដែលបានចុះហត្ថលេខានៅឆ្នាំ ២០០១។ គោលបំណងនៃពិធីសារ
នេះគឺការបង្កើតឱ្យមានយន្ដការសម្របសម្រួល រួមមានចំណុចទំនាក់ទំនង
និងគណៈកម្មាធិការចម្រុះស្ដីពីវិនិយោគ ដែលយន្ដការទាំងនោះនឹងជួយ យ៉ាងជាក់ស្ដែងដល់អ្នកវិនិយោគ
៕
អត្ថបទៈ
អង្គភាពព័ត៌មាន និងប្រតិកម្មរហ័ស
