បទសម្ភាសន៍
លោកបណ្ឌិត ឈឹម ផលវរុណ ប្រធានវិទ្យាស្ថានពលរដ្ឋវិជ្ជាជាមួយទូរទស្សន៍បាយ័ន ស្តីពី
ចរិតនយោបាយរបស់គណបក្សប្រឆាំង
ក្រោយការបោះឆ្នោតក្រុមប្រឹក្សាឃុំសង្កាត់
ថ្ងៃទី ០២ ខែ កក្កដា ឆ្នាំ២០១២
លោក សត្យា រក្ស
សំណួរ៖ ដូចដែលលោកបណ្ឌិតជ្រាបហើយថា គណបក្សប្រឆាំងគឺ
គណបក្ស សម រង្ស៊ី ក៏ដូចជាគណបក្ស កឹម សុខា ឃើញថានយោបាយរបស់គេនៅក្នុងការឃោសនា
ទាក់ទាញសន្លឹកឆ្នោត ពីប្រជាពលរដ្ឋគឺ គេប្រើប្រាស់វិធីសាស្រ្តសន្យា។
ដូចជាពីមុនមកយើងធ្លាប់ឮទាំងអស់គ្នាហើយគឺគេ សន្យាតាំងពីដាក់ធ្មេញមាស
ចែកចំការកៅស៊ូ ៥ ហិកតា មួយគ្រួសារ ចែកគោ១០០ ក្បាលក្នុងមួយគ្រួសារ
រួមជាមួយការផ្តល់ប្រាក់ ៤ ម៉ឺនរៀលដល់ចាស់ទុំ ជាដើម។ ហើយថ្មីៗនេះគណបក្ស
កឹម សុខា បានសន្យា ដូចជាសង់ សាលាមត្តេយ្យគ្រប់ភូមិ សង់មជ្ឈមណ្ឌលកសិកម្ម
នៅតាមឃុំ ផ្តល់ទុនដល់ប្រជាកសិករជាដើម។ អញ្ចឹងជុំវិញការសន្យារបស់
កឹម សុខា ដូចដែលខ្ញុំបានជម្រាបជូនលោកបណ្ឌិតខាងដើម លោកបណ្ឌិតមើលឃើញថា
ជាសកម្មភាពមួយដែលមានលក្ខណៈសុច្ចរិត ចំពោះប្រជាពលរដ្ឋដែរឬទេបាទ ?
លោកបណ្ឌិត ឈឹម
ផលវរុណ
ចម្លើយ៖ ខ្ញុំចង់ជម្រាបជូនប្រជាពលរដ្ឋម្ចាស់ឆ្នោតឲ្យយល់
ហើយដើម្បីឲ្យងាយយល់យើងមានឧទាហរណ៍ជាក់ស្តែង ពាក់ព័ន្ធទៅនឹងគណបក្ស
សម រង្ស៊ី។ ការបោះឆ្នោតក្រុមប្រឹក្សាឃុំសង្កាត់ ២០០២, ២០០៧ ហើយមកដល់
២០១២ យើងឃើញមានការផ្លាស់ប្តូរយ៉ាងម៉េច។ ឆ្នាំ២០០២
ឈ្នះបានធ្វើជាមេឃុំ ចៅសង្កាត់ ដោយការសន្យាហើយ ធ្វើអ្វីអត់កើត
បានជាការបោះឆ្នោតក្រុមប្រឹក្សាឃុំសង្កាត់ ២០០៧ នៅកន្លែងដែល សម រង្ស៊ី
ឈ្នះជាមេឃុំ ចៅសង្កាត់ ត្រូវបានបាត់បង់ ដោយសារប្រជាពលរដ្ឋគេបានដឹងខ្លួនថាការសន្យានោះវាហួសហេតុ
ធ្វើអត់បាន ដល់ធ្វើអត់បានគេលែងបោះឆ្នោតឲ្យធ្វើមេឃុំទៀត។
អញ្ចឹងបានឃើញមានចាញ់ឆ្នោតនៅកន្លែងដែលធ្លាប់ធ្វើមេឃុំ។ បន្តមកទៀតឆ្នាំ
២០០៧ ដល់ ២០១២ កន្លែងដែល សម រង្ស៊ី ឈ្នះបានធ្វើជាមេឃុំ ចៅសង្កាត់ គឺបានចាញ់ទៀត
ហើយទៅបានកន្លែងផ្សេង។
ប៉ុន្តែកន្លែងដែលបានជាប់ម្តងមិនដែលបានជាប់ពីរដងទេ ដោយសារការសន្យាសម្រាប់សមត្ថកិច្ចឃុំសង្កាត់ហ្នឹងជានយោបាយសន្យាសម្រាប់អូសទាញសន្លឹកឆ្នោតទេ។
ដល់បានជាប់ អនុវត្តអត់បាន អញ្ចឹងប្រជាពលរដ្ឋខកចិត្ត អញ្ចឹងហើយបានជាឆ្នាំ២០១២
នេះ ដូចនៅសង្កាត់គីឡូម៉ែត្រលេខ ៦ ដែលគណបក្ស សម រង្ស៊ី ឈ្នះ គឺចាញ់អស់
គឺចប់តែម្តង គឺនៅភ្នំពេញនេះគណបក្សប្រជាជនកម្ពុជា ឈ្នះគ្រប់គ្រងចៅសង្កាត់ទាំងអស់
។សរុបមកវិញ បទពិសោធន៍ទាំងអស់នេះយើងអាចបញ្ជាក់ថា ប្រជាពលរដ្ឋគេយល់ដឹង
គឺមិនអាចភូតប្រជាពលរដ្ឋបានទេបើយើងយកនយោបាយថ្នាក់ជាតិ
យកមកសន្យានៅក្នុងការបោះឆ្នោតឃុំសង្កាត់បែបនេះ។ តើមេឃុំ ចៅសង្កាត់
ទៅធ្វើនយោបាយថ្នាក់ជាតិកើតដែរឬទេ? គឺដឹងតែអត់កើតហើយ។
ឥឡូវចូលរឿង កឹម សុខា ម្តង។
តើ កឹម សុខា សន្យា ដូចគ្នាឬអត់? កឹម សុខា មិនត្រឹមតែសន្យាដូច សម រង្ស៊ី
ទេ គឺជ្រុលជាង សម រង្ស៊ី ទៅទៀត ដោយសារពួកគេគ្មានការបែងចែកដាច់ពីគ្នារវាងនយោបាយថ្នាក់ជាតិ
និងនយោបាយឃុំសង្កាត់។ កឹម សុខា
បើគាត់និយាយមុនយុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់
នោះយើងមិនថាទេ។ ប៉ុន្តែនៅក្នុងអំឡុងពេលយុទ្ធនាការឃោសនាបោះឆ្នោត១៥ថ្ងៃ
រាប់ពី ថ្ងៃទី ១៨ ឧសភា ដល់ថ្ងៃ ១ មិថុនា ឆ្នាំ ២០១២ គាត់និយាយ ហើយកឹម សុខា
កុំក្រឡាច់ពាក្យ។ កឹម សុខា បានបោះពុម្ភនូវខិតប័ណ្ណ សន្យាថា
ឃុំណាខ្លួនឈ្នះឆ្នោត នឹងសង់មត្តេយ្យសាលាគ្រប់ភូមិ មិនមែនគ្រប់ឃុំទេ
គ្រប់ភូមិ ឥឡូវឈ្នះបាន ១៨ ឃុំ។ យើងថា ១ឃុំមាន ៥ ភូមិ គុណទៅ ៥ គុណ ១៨ វា ៩០។
អញ្ចឹង កឹម សុខា ត្រូវធ្វើ មត្តេយ្យសាលា ៩០ ជូនប្រជាពលរដ្ឋ
នៅក្នុងឃុំដែលខ្លួនឈ្នះឆ្នោត។ មួយទៀតសន្យាសុទ្ធតែដាក់ កុំព្យូទ័រ
ម៉ាស៊ីនភ្លើង មណ្ឌលសុខភាព។ ថ្មីៗនេះកឹម សុខា និងបននយោបាយកឹម សុខា
ចាប់ផ្តើមក្រឡាច់ហើយ គេថា គេដាក់កុំព្យូទ័រ ប៉ុន្តែមួយជំហានម្តងៗ
ក្នុងកំឡុងពេល ៥ ឆ្នាំ។ ឥឡូវយើងពិចារណា លើកនេះចេះនិយាយកំណត់ពេលវេលា
ចុះបើ កឹម សុខា និងបននយោបាយទុច្ចរិតរបស់គាត់
ដែលចោទប្រកាន់រដ្ឋាភិបាលសុទ្ធតែអត់អភិវឌ្ឍ ហើយគេអភិវឌ្ឍមួយជំហ៊ានម្តងៗ
ហើយគេត្រូវការពេលវេលាអភិវឌ្ឍទៅមុខ ខ្លួនចោទគេសុទ្ធតែអត់អភិវឌ្ឍ
ហើយសុទ្ធតែយឺតយ៉ាវ ដល់ខ្លួនឯងត្រឹមតែមេឃុំ
គ្រាន់តែនយោបាយដាក់កុំព្យូទ័រទាមទារ ៥ ឆ្នាំ ទៅហើយ ហើយមានចំនួនតែ ១៨
ឃុំទៀត មិនមែន ១៦៣៣ ឃុំទេ។ បើសិនគណបក្សដទៃទៀតគេហ៊ានសន្យា ១៨ ឃុំ វិទ្យាស្ថានពលរដ្ឋវិជ្ជាក៏មានកុំព្យូទ័រ
២០ សម្រាប់ឲ្យ ១៨ ឃុំ ហ្នឹងដែរ ធ្វើតែមួយភ្លេតទេ។ ឥឡូវកុំអាលថា ១ ឃុំ ៣
កុំព្យូទ័រ តែ១ ឃុំ កុំព្យូទ័រមួយ សម្រាប់មេឃុំ រឿងអីចាំបាច់ ៥ ឆ្នាំ
ធ្វើឲ្យបានទៅមើល។ អាហ្នឹងបញ្ជាក់ថា ខ្លួនឯងគ្រាន់តែកូនភារកិច្ចតូចមួយនៃការសន្យា
ខ្លួនទាររយះពេល ៥ ឆ្នាំ ចុះទម្រាំគេទទួលខុសត្រូវប្រទេសទាំងមូល
ហើយលើគ្រប់វិស័យ មិនមែនវិស័យកំប៉ិកកំប៉ុកប៉ុណ្ណឹងផង គេត្រូវការ ៥ ឆ្នាំ ហើយ ៥ ឆ្នាំ ទៀត
បន្តបន្ទាប់។ សំខាន់គេមានសមិទ្ធផលធ្វើទៅមុខ ឯខ្លួនឯងគ្រាន់តែកុំព្យូទ័រប៉ុណ្ណឹងទារ
៥ ឆ្នាំដែរ។ ហើយមានការសន្យាមួយទៀតដែល កឹម សុខា ចាប់ផ្តើមងាករេចិត្ត ដោយសារខ្លួនមិននឹកស្មានថា
បានធ្វើមេឃុំ ដូចជាសុទ្ធតែសន្យាថា
បើឃុំណាគណបក្សគេឈ្នះធ្វើមេឃុំ នឹងឲ្យមេឃុំទៅអាមេរិក ទៅហាត់ការ ៦
ខែ ឥឡូវ កឹម សុខា និយាយប៉ុន្មានថ្ងៃមុនគឺនៅសល់តែ ១ ខែទេ។ ឥឡូវ មួយខែក៏មួយខែទៅចុះឲ្យតែបានទៅ។កឹម
សុខា លែងនិយាយពីប្រទេសអាមេរិក រដ្ឋាភិបាលអាមេរិក និងអង្គការអន្តរជាតិហើយ
កឹម សុខា និយាយអំពីសមាជិករបស់គណបក្សខ្លួនឯង នៅឯអាមេរិក
នឹងរៀបចំប្រមូលថវិការឲ្យ មេឃុំ ១៨ នោះទៅវិញ ហើយមិនមែនទៅម្តង ១៨ ទេ
ទៅម្នាក់ម្តងៗ។ គ្រាន់តែមេឃុំ ១៨ នាក់ ស៊ីពេលទៅដល់ ៥ ឆ្នាំ ដែរ
កំប៉ិកកំប៉ុកសោះ ហើយកឹម សុខា អត់ទាន់បញ្ជាក់ច្បាស់ទៀត។ គេប្រើរបៀបទៅធ្វើបុណ្យផ្កាប្រមូលលុយ
ទិញសំបុត្រយន្តហោះឲ្យមេឃុំ ១៨ នាក់ហ្នឹង ត្រង់នេះខ្ញុំហៅថា
ជាការសន្យាវន្តក ហើយមួយទៀត សន្យាហួសហេតុ សុទ្ធតែនៅក្នុងយុទ្ធនាការឃោសនាបោះឆ្នោត
កឹម សុខា និយាយខ្លួនឯង
និយាយនៅបាត់ដំបង នៅកំពង់ឆ្នាំង ផ្សារលើ នៅផ្សារសួង កំពង់ចាម
ផ្សារអូរាំងឪ សុទ្ធតែថា ចាស់ៗ ៤ ម៉ឺន ឲ្យតែគណបក្សគេឈ្នះឆ្នោត
ឃុំសង្កាត់ ។ ឥឡូវ កឹម សុខា ក្រឡាច់ថាមិនមែនទេ
ទាល់តែគេឈ្នះថ្នាក់ជាតិ បើអ្នកឯងនិយាយឈ្នះថ្នាក់ជាតិម៉េចក៏អ្នកឯងមិនចាំនិយាយពេលឃោសនាថ្នាក់ជាតិ?
ម៉េចក៏អ្នកឯងនិយាយនៅពេលយុទ្ធនាការបោះឆ្នោតឃុំ សង្កាត់ អញ្ចឹងមានន័យថា
អ្នកឯងមានចេតនាបោកប្រាស់ប្រជាពលរដ្ឋ ដើម្បីបោះឆ្នោតឲ្យខ្លួនបាត់ទៅហើយ
។
មតិលោក សត្យា
រក្ស
ជុំវិញរឿងការសន្យា ៤
ម៉ឺន នេះ គឺគណបក្ស កឹម សុខា បានធ្វើការពន្យល់កាលពីម្សិលមិញ ម្សិលម្ងៃ នេះ
គឺទាក់ទងទៅនឹងខិតប័ណ្ណ ដែលគេផ្សព្វផ្សាយ នៅក្នុងយុទ្ធនាការឃោសនារកសំលេងឆ្នោត
គេបានទាត់ចោលការសន្យា ៤ ម៉ឺន ដោយសំអាងថា
នៅក្នុងខិតប័ណ្ណគេអត់មានសរសេរថា ជូនចាស់ៗ ៤ ម៉ឺន ទេ។
អញ្ចឹងត្រង់ចំណុចនេះខ្ញុំគ្រាន់តែចង់ចូលរួមមតិយោបល់បន្តិចផងដែរថា
ឥឡូវរឿង ៤ ម៉ឺន ហ្នឹង អត់ក៏អត់ទៅចុះ ប៉ុន្តែនៅក្នុងខិតប័ណ្ណនេះ តើ
កឹម សុខា គោរពបានដែរឬអត់?
ពីព្រោះនៅក្នុងខិតប័ណ្ណខ្ញុំឃើញមានចំណុចមួយដែល កឹម សុខា
កាន់តែវន្តក គឺឃុំដែលគាត់ឈ្នះឆ្នោត គាត់បង្កើតមជ្ឈមណ្ឌលកសិកម្ម
ហើយផ្តល់ប្រភពទុន មានន័យថា ជាលុយ ហើយប្រជាពលរដ្ឋនៅក្នុងឃុំ
បើខ្វះលុយកាក់ សម្រាប់ធ្វើស្រែ ធ្វើចំការគឺថាមកខ្ចីលុយបាន។
បានន័យថា ធនាគារក្នុងឃុំ អញ្ចឹងយើងឃើញថា ជារឿងមួយកាន់តែវន្តកហើយ។
អញ្ចឹងជុំវិញ កឹម សុខា អះអាង ថា ៤ ម៉ឺន នៅក្នុងខិតប័ណ្ណ ហ្នឹង លោកបណ្ឌិត
យល់ឃើញយ៉ាងម៉េច ?
លោកបណ្ឌិត ឈឹម
ផលវរុណ
ចម្លើយ៖
ជាការពិតនៅក្នុងខិតប័ណ្ណ អត់មានរឿង ៤ ម៉ឺន ឲ្យមនុស្សចាស់ទេ ប៉ុន្តែ
កឹម សុខា កុំល្ងង់ ឬក៏ចង់បោកប្រជាពលរដ្ឋ ដោយមើលងាយថា ប្រជាពលរដ្ឋល្ងង់
យ៉ាងហោចណាស់ក៏មានយើងនំាំគ្នាលាតត្រដាងពន្យល់ប្រជាពលរដ្ឋដែរ។ កឹម
សុខា មិនបានសរសេរនៅក្នុងខិតប័ណ្ណពាក់ព័ន្ធនឹង ៤ ម៉ឺន ឲ្យមនុស្សចាស់
១ ខែមែន ប៉ុន្តែកឹម សុខា បាននិយាយ ក្នុងកំឡុងពេល ១៥ ថ្ងៃ
នៃយុទ្ធនាការឃោសនាបោះឆ្នោត។
ពាក្យថាឃោសនាក្នុងយុទ្ធនាការឃោសនាបោះឆ្នោត វាមានទម្រង់ ៣ ,៤ ។
ទី១ទម្រង់ចេញជាលិខិត ក្រដាស ខិតប័ណ្ណ ។ ទី២ ភាសា កឹម សុខា ខ្លួនឯងជាមេបក្ស
ដែលដឹកនាំក្បួន ឃោសនា ក្នុងកំឡុងពេល ១៥ ថ្ងៃ រាប់ពីថ្ងៃទី ១៨ ឧសភា ដល់
ថ្ងៃទី១ មិថុនា ឆ្នាំ ២០១២ តើកឹម សុខា មាននិយាយទេ រឿង ៤ ម៉ឺន ម្នាក់សម្រាប់មនុស្សចាស់ក្នុងមួយខែនេះ
បើដោះសារថា អាហ្នឹងសម្រាប់ឈ្នះឆ្នោតថ្នាក់ជាតិ ចុះបើសម្រាប់ឈ្នះឆ្នោតថ្នាក់ជាតិ
ម៉េចក៏អ្នកឯងមកឃោសនានៅក្នុងការបោះឆ្នោតឃុំសង្កាត់ទៅវិញ។
ប្រជាពលរដ្ឋគេគិតរឿងបោះឆ្នោតឃុំសង្កាត់ មេឃុំ ចៅសង្កាត់
គេមិនទាន់គិតរឿងបោះឆ្នោតតំណាងរាស្រ្ត ធ្វើនាយករដ្ឋមន្រ្តី ឯណានោះទេ។
ថ្ងៃ ១៨ ឧសភា ដល់ ១ មិថុនា ម៉េចក៏ កឹម សុខា បោកគេ ។ ទី៣ ក្បួនឃោសនាដែលគ្មាន
កឹម សុខា ដឹកនាំ ក៏ឃោសនាយកសំលេង កឹម សុខា មកចាក់នៅក្នុង ១៥ ថ្ងៃនៃយុទ្ធនាការឃោសនាបោះឆ្នោតនោះដែរ
។ ទី៤ នៅក្នុង ១៥ថ្ងៃ ដដែលហ្នឹង ក៏មានសំលេងកឹម សុខា និយាយនៅក្នុងកម្មវិធីវិទ្យុ
របស់គណបក្សខ្លួនដែរ បើខុសនៅក្នុងកំឡុង ១៥ ថ្ងៃ យើងមិនចោទប្រកាន់ទេ
តើនេះជាចេតនាឬអត់? គេកំពុងតែផ្តោត អារម្មណ៍អំពីកម្មវិធីនយោបាយ
និងការសន្យាបោះឆ្នោតឃុំសង្កាត់ អ្នកយករឿងហើយទម្លាក់ថា អាហ្នឹងបោះឆ្នោតជាតិយ៉ាងម៉េច?
អញ្ចឹងមានន័យថា អ្នកឯងចង់បន្លំប្រជាពលរដ្ឋម្ចាស់ឆ្នោតហើយ ។ មួយទៀត
ចូលរឿងសន្យាវន្តក ដែលលោក សត្យា រក្ស
ដាក់ជាសំណួរ រឿងខិតប័ណ្ណ មត្តេយ្យសាលា។
ខ្ញុំគិតថា មួយ ឃុំ មាន ៥ ភូមិ គុណ ១៨ ទៅ ឃើញ ៩០ មត្តេយ្យសាលា ចែក នឹង៥
ឆ្នាំ តើក្នុងមួយឆ្នាំ បានប៉ុន្មាន មត្តេយ្យសាលា ប្រជាពលរដ្ឋចាំតាមដានមើលទៅចុះ
។ មួយទៀត ដាក់កុំព្យូទ័រ ដាក់តែមួយក៏បានដែរ ទិញអាមួយ ១០០ $ ដាក់ឲ្យបានគ្រប់
១៨ ឃុំ ទៅ តែបើ ៥ ឆ្នាំ ដាក់បាន ១៨ ឃុំ ចាត់ទុកថាបានបំពេញទៅចុះ ប៉ុន្តែវាថោកពេក
ធ្វើនយោបាយត្រឹមតែកុំព្យូទ័រ ១៨ គ្រឿង ស៊ីពេល ៥ ឆ្នាំ គឺអន់បំផុត ចុះនៅទិញម៉ាស៊ីនភ្លើង
ដាក់តាមឃុំទៀត ១៨ ម៉ាស៊ីនភ្លើង ស៊ី ពេល៥ ឆ្នាំ នៅមានមជ្ឈមណ្ឌលកសិកម្ម
ដើម្បីជួយប្រជាពលរដ្ឋកសិករ ហើយកុំថា ដោយសារថវិកាជាតិតិច។ បននយោបាយ
កឹម សុខា ពីបារាំងក្តី ពីអាមេរិកក្តី អ្នកឯងល្ងង់ភ្លើ ស៊ីឈ្នួលបំរើគេនៅបរទេស
យើងអត់មាក់ងាយទេ ប៉ុន្តែអ្នកស៊ីឈ្នួលនៅបរទេស អ្នកមកជាមួយកឹម សុខា
នៅភ្នំពេញ អ្នកដៀលប្រជាជាតិខ្មែរ អ្នកដៀលរដ្ឋាភិបាល
សុទ្ធតែធ្វើអត់កើត ឥឡូវអ្នកឯងធ្វើអារឿងកំប៉ិកកំប៉ុកហ្នឹងឲ្យកើតទៅ
តិចទៅទម្លាក់កំហុសថា ថវិកាជាតិតិច។ នៅអាមេរិក ឃុំសង្កាត់
ថវិកាជាតិបានប៉ុន្មាន ក្នុងមួយឆ្នាំ នៅបារាំង នៅអឺរ៉ុប បានថវិកាប៉ុន្មាន
ប្រយ័ត្នល្ងង់ អត់ដឹងអី ស៊ីឈ្នួលគេនៅក្រៅប្រទេស តែមកដៀលស្រុកខ្មែរ
ចាត់ទុកប្រទេសគេដូចឋានសូគ៌ មិនមានទេណា ឃុំ សង្កាត់ នៅបារាំងក្តី
អាល្លឺម៉ង់ក្តី អាមេរិកក្តី អូស្រ្តាលី ក្តី កាណាដា ក្តី គឺទទួលមួយជំរៀកតូច
ពីថវិកាជាតិប៉ុណ្ណោះ ប៉ុន្តែគឺទទួលតាមគោលការណ៍ច្បាប់ គឺចំណូលអាជីវកម្ម
សិប្បកម្ម សេវាកម្ម និងមុខរបរផ្សេងៗទៀត ទីផ្សារ នៅក្នុងឃុំ
សង្កាត់របស់ខ្លួន ចំណូលហ្នឹងគេហៅប្រភពចំណូលដ៏ធំរបស់ ឃុំ សង្កាត់
ចុះបើ កឹម សុខា ធ្វើនយោបាយប្រឆាំងវិនិយោគទុន ទៅហើយ តើ កឹម សុខា
អាចទ្រទ្រង់ សេដ្ឋកិច្ច សិប្បកម្ម អាជីវកម្ម សេវាកម្ម ទីផ្សារ នៅក្នុងឃុំ
ដែល កឹម សុខា គ្រប់គ្រង ១៨ ឃុំ បានឬអត់? អញ្ចឹង តើអ្នកណាមក
ដាក់វិនិយោគទុន នៅក្នុងឃុំ របស់កឹម សុខា គ្រប់គ្រង បើ កឹម សុខា
ធ្វើសត្រូវជាមួយអ្នកវិនិយោគហើយហ្នឹង? ដូច្នេះបើឃុំដែលកឹម សុខា កាន់ ១៨
ហ្នឹង គ្មានអ្នកវិនិយោគ គ្មានអ្នកណាធ្វើសិប្បកម្ម ដូច្នេះឃុំ របស់ កឹម
សុខា គ្រប់គ្រង គឺគ្មានលុយទេ តែដល់ពេលអត់មានលុយវិនិយោគ ទៅបន្ទោសថា
ថ្នាក់ជាតិអត់ឲ្យអាហ្នឹងទុច្ចរិតទៀត ។ ខ្ញុំលើកមួយទៀត គេសន្យាថា
ឲ្យមេឃុំទៅអាមេរិក គេធ្លាក់មកត្រឹម ១ ខែ ឥឡូវ ខែ សីហា គេទៅអាមេរិក
ទៅធ្វើបុណ្យផ្កាប្រមូលលុយ ឬក៏បោកលុយពីខ្មែរ ដែលជឿ កឹម សុខា ហ្នឹង
ខ្ញុំជឿថា បងប្អូនប្រជាពលរដ្ឋខ្មែរ នៅក្រៅប្រទេសអាចដឹងដែរថា កឹម សុខា
ធ្វើបុណ្យផ្កាមិនមែនម្តងទេ ដើម្បីប្រមូលលុយបាន។ ទី១ បុណ្យផ្កាប្រមូលលុយសម្រាប់ទិញសំបុត្រយន្តហោះ
ឲ្យអស់លោកមេឃុំ ១៨ នាក់។ ទី២ គឺកឹម សុខា នឹងធ្វើបុណ្យផ្កាបោកប្រាស់មួយទៀត
គឺលក់បញ្ជីឈរឈ្មោះសម្រាប់ការបោះឆ្នោតតំណាងរាស្រ្ត ២០១៣
យកទៅលក់ឲ្យខ្មែរនៅក្រៅប្រទេស។ អញ្ចឹងបងប្អួនខ្មែរម្នាក់ៗ
ដែលលង់ជាមួយ កឹម សុខា ត្រូវត្រៀមលុយពីរ លុយមួយសម្រាប់បុណ្យផ្កាប្រមូលលុយទិញសំបុត្រយន្តហោះឲ្យមេឃុំ
ហើយសម្រាប់ចិញ្ចឹមមេឃុំ មួយខែ នៅអាមេរិក។ ទី២
ត្រូវត្រៀមលុយបុណ្យផ្កា កឹម សុខា លក់បញ្ជីឈ្មោះ ឈរឈ្មោះ ។ រឿងមួយទៀតដែលជារឿងដ៏ល្អ
សម្រាប់ប្រជាពលរដ្ឋដែលត្រូវបានបេក្ខជនរបស់គណបក្ស កឹម សុខា ទិញសន្លឹកឆ្នោតជំពាក់
ដូចជានៅមេបុណ្យ នៅព្រៃវែង កឹម សុខា ក៏ដឹង ពីព្រោះតាមយើងដឹង កឹម សុខា
បានបញ្ជាឲ្យបេក្ខជនឈរឈ្មោះ នៅតាមឃុំសង្កាត់នីមួយៗ
ត្រូវធ្វើចិត្តសាស្រ្ត បោកប្រាស់ស្ងាត់ៗ អត់ឃោសនាទេ ថាបោះឆ្នោតឲ្យគេទៅ
កាលណាគេជាប់ជាសមាជិកក្រុមប្រឹក្សា ជាប់ជាមេឃុំ ចៅសង្កាត់ ក៏ដោយ គេនឹងឲ្យម្នាក់
៤ ម៉ឺន នេះបើយើងយកទិដ្ឋភាព ដែលប្រជាពលរដ្ឋកាលលើកមុន ជាង ១០០ នាក់
នៅមេបុណ្យ ទាមទារពីលោកតា សាង ដែលជាបេក្ខជនលំដាប់ទី១ របស់គណបក្ស កឹម
សុខា ហើយឮថា មានភូមិ ៤, ៥ ទៀត ប៉ុន្តែក្រោយមក គេរង់ចាំលទ្ធផលបោះឆ្នោតផ្លូវការសិន
ហើយគេរង់ចាំ តា សាង ក៏ដូចជាមេឃុំ ក្រុមប្រឹក្សាឃុំ ដទៃទៀត នៅក្នុងឃុំដទៃទៀត
ទូទាំងប្រទេស ដែល កឹម សុខា បានជាប់។ គេត្រៀមឲ្យតែចូលកាន់តំណែងផ្លូវការប្រជាពលរដ្ឋដែលត្រូវបានអស់លោកបេក្ខជនទាំងអស់ហ្នឹង
រួមទាំង កឹម សុខា ទៅឃោសនា ស្ងាត់ៗ ឲ្យទៅបោះឆ្នោតគេឲ្យ ៤ ម៉ឺន
ប្រជាពលរដ្ឋនឹង ទាមទារលុយហ្នឹងហើយ នេះបើតាមយើងស្តាប់ស្នូរស្ងាត់ៗ ។ មួយទៀត ដែលខ្ញុំចង់បញ្ជាក់
ដើម្បីឲ្យការសន្យាបោកប្រាស់របស់ កឹម សុខា ចូលដល់ច្រកអនុវត្ត
ធម្មតាកាលណាអ្នកឯងសន្យាហើយ អ្នកឯងជំពាក់ហើយ
ព្រោះអ្នកបានសន្លឹកឆ្នោត ហើយកាលនោះអ្នកសន្យាដើម្បីយកសន្លឹកឆ្នោតឥឡូវសន្លឹកឆ្នោតអ្នកបានហើយ
អញ្ចឹងអ្នកត្រូវជំពាក់គេវិញគឺការសងកិច្ចសន្យា។
អញ្ចឹងបងប្អួនប្រជាពលរដ្ឋ រួមទាំងសមាជិកក្រុមប្រឹក្សាឃុំសង្កាត់ដទៃទៀតដែលមិនមែនជាសមាជិកក្រុមប្រឹក្សាឃុំសង្កាត់
របស់ កឹម សុខា ត្រូវជម្រុញនៅក្នុងដែនសមត្ថកិច្ច ក្រុមប្រឹក្សាឃុំ ឬ
សង្កាត់ របស់ខ្លួនឲ្យ កឹម សុខា អនុវត្តការសន្យាហ្នឹង។ បើធ្វើដូច្នេះបាន
រួមសហការជាមួយប្រជាពលរដ្ឋម្ចាស់ឆ្នោតនៅតាមឃុំ នីមួយៗ ខ្ញុំជឿថា កឹម
សុខា វន្តកហើយ ហើយនឹងគ្មានអ្វីដោះសារទេ
ហើយកម្មវិធីយើងនឹងរាប់ថយក្រោយចាប់ពីថ្ងៃចូលកាន់តំណែងរហូតដល់បោះឆ្នោត
យើងនឹងចាំមើល។
លោក
សត្យា រក្ស
សំណួរ៖
មានការវិវត្តន៍មួយដែលគួរឲ្យចាប់អារម្មណ៍ គឺចំពោះសម្ព័ន្ធភាពនៃគណបក្ស សម រង្ស៊ី
និងគណបក្ស កឹម សុខា គឺមានការវិវត្តន៍មួយទៅរកការព្រួយបារម្ភ ដែលហាក់បីដូចជាកំពុងលេងពាក្យសម្តីដាក់គ្នាខ្លះៗហើយ
ដូចជា កឹម សុខា បានលើកថាខ្លួនពេលនេះគឺប្រហាក់ប្រហែលនឹង សម រង្ស៊ី ហើយ មានឃុំខ្លះគឺគណបក្ស
សម រង្ស៊ី អត់មានការគាំទ្រ ជាដើម។ ជុំវិញសម្ព័ន្ធភាពនេះដែរ កឹម សុខា បានគម្រាម
សម រង្ស៊ី ទុកជាមុនថា បើចងសម្ព័ន្ធភាពជាមួយ សម រង្ស៊ី មិនបានសម្រេចគឺមានគណបក្សប្រជាជនកម្ពុជា
ជាអ្នកបំបែកបំបាក់គេ។ អញ្ចឹងទាក់ទងនឹងរឿងសម្ព័ន្ធភាពនេះ តើលោកបណ្ឌិតយល់ឃើញយ៉ាងម៉េច?
លោកបណ្ឌិត
ឈឹម ផលវរុណ
ចម្លើយ៖ និយាយឲ្យខ្លី រឿងសម្ព័ន្ធភាពដែល
កឹម សុខា ចង់ចងជាមួយគណបក្ស សម រង្ស៊ី វាជារឿងឆាកកំប្លែងនយោបាយប៉ុណ្ណោះ។
ខ្ញុំសូមបញ្ជាក់ថា កឹម សុខា មិនមែនមិនដឹង ឬមិនមែនមនុស្សងោះនោះទេ ហើយ សម
រង្ស៊ី ក៏មិនមែនមនុស្សអត់យល់អីសោះនោះដែរ។ សម្ព័ន្ធភាពនេះ
វាគ្រាន់តែជាស្លាកនយោបាយដើម្បីប្រទាញយក ឬហែកយកសម្លេងគាំទ្រគ្នាទៅវិញទៅមកតែប៉ុណ្ណោះ។
កឹម សុខា ដឹងច្បាស់ណាស់ថា ការទាញយកសម្លេងឆ្នោតពីអ្នកគាំទ្ររបស់គណបក្សប្រជាជនកម្ពុជា
គឺមិនអាចទៅរួចនោះទេ។ ប៉ុន្តែ កឹម សុខា មានសុទិដ្ឋិនិយមថា មានតែការទាញយកសម្លេងឆ្នោតគាំទ្រពីគណបក្ស
សម រង្ស៊ី តែប៉ុណ្ណោះ។ ចំណែកឯ សម រង្ស៊ី ក៏ដឹងខ្លួនដែរ គឺ សម រង្ស៊ី មិនល្ងង់ទេ
ពីព្រោះថាបើទុកស្ងៀមមិនលេងជាមួយនឹងពាក្យសម្ព័ន្ធភាពទេ កឹម សុខា
នឹងទាញបានសម្លេងគាំទ្រពីគណបក្ស សម រង្ស៊ី មួយចំនួនទៀតជាមិនខាន។ អញ្ចឹងពីរនាក់នោះដឹងរៀងខ្លួនថា
មួយប៉ងយកសម្លេងពី សម រង្ស៊ី និងមួយទៀតទប់កុំឲ្យ កឹម សុខា ដណ្តើមយក។
ដូច្នេះពាក្យសម្ព័ន្ធភាពនេះ គឺគេលេងជាល្បែងនយោបាយទុច្ចរិត ដោយមិនស្មោះត្រង់នឹងគ្នាទេ។
យើងពិនិត្យមើលពីសវតាដែល កឹម សុខា គាត់និយាយ គឺគាត់បញ្ជាក់ថាបើខាងលើមិនធ្វើសម្ព័ន្ធភាព
គឺយើងធ្វើសម្ព័ន្ធភាពខាងក្រោម ហើយការពិតគាត់ទាញបានអ្នកនៅខាងក្រោមមែន
គឺគាត់ទាញបានជាង ១០ ម៉ឺន សម្លេងមែនពីគណបក្ស សម រង្ស៊ី។ មានន័យថា ល្បែងអុកដែល
កឹម សុខា លេងកាលពីថ្ងៃទី ០៣ ខែមិថុនា ឆ្នាំ២០១២នេះ គឺឈ្នះបានជាង ១០ ម៉ឺន ឯ
រង្ស៊ី ចាញ់ជាង ១០ ម៉ឺន។ ប៉ុន្តែនៅក្តារទី២ខាងមុខនេះ គឺសម្ព័ន្ធភាពនៅឆាកទី២
នេះ គឺ សម រង្ស៊ី មានបទពិសោធន៍ចាញ់នៅឆាកទី១ ហើយ កឹម សុខា គាត់រំភើបក្នុងការឈ្នះនៅក្នុងសម្ព័ន្ធភាពឆាកទី១
អញ្ចឹងហើយបានជា កឹម សុខា គ្រាន់តែប្រកាសនូវលទ្ធផលបោះឆ្នោតភ្លាម គឺគាត់បានបោះដៃទៅរក
សម រង្ស៊ី ដើម្បីធ្វើសម្ព័ន្ធភាពភ្លាម។ បានន័យថា កឹម សុខា
ទទួលស្គាល់អំពីការឈ្នះដោយសារការធ្វើនយោបាយចងសម្ព័ន្ធភាពនេះ។ ចំណែក សម
រង្ស៊ី ដោយដឹងថាខ្លួនបានចាញ់ដោយសារការធ្វើនយោបាយចងសម្ព័ន្ធភាពនេះដែរ ដូច្នេះខ្លួនត្រូវឆ្លើយភ្លាមថាជួបគ្នានៅថ្ងៃ
១៧ ខែមិថុនា នាទីក្រុងម៉ានីល ប៉ុន្តែ កឹម សុខា បែរជារកហេតុផលយកឡេះថាចាំពាក់កណ្តាលខែកក្កដាទៅវិញ។
ឥឡូវ រង្ស៊ី ព្រមទៀត ពីព្រោះបើ រង្ស៊ី មិនរុញបណ្តោយរឿងនេះទេ នោះ កឹម សុខា
នឹងបោកយកទៀត ពីព្រោះការបោះឆ្នោតឆ្នាំ២០១៣ ជិតមកដល់ហើយ។ ចំណែក កឹម សុខា
នៅពេលដែល រង្ស៊ី យល់ព្រមលឿនពេកបែបនេះ គេក៏ធ្វើជានៅទ្រឹងទៅវិញ ពីព្រោះ កឹម
សុខា មិនបានលើករឿងនេះនៅតាមវេទិការបស់ខ្លួនទេ។ កឹម សុខា បែរជាលើកអួតខ្លួនថា
ខ្លួនស្មើនឹង សម រង្ស៊ី និងហ៊ានបោះពាក្យថាលែងឆ្កែនោមដាក់ដូចមុនទៀតហើយ
នេះជាការដឺដងដាក់គ្នាទៅវិញទៅមកហើយ។ ដូច្នេះល្បែងនយោបាយក្រោមស្លាកសម្ព័ន្ធភាពនាពេលនេះគឺកំពុងប្រទាញប្រទង់គ្នាហើយ។
ម្យ៉ាងទៀតល្បែងនយោបាយរបស់ កឹម សុខា
នេះគឺដើម្បីបោកប្រាស់ប្រជាពលរដ្ឋតែប៉ុណ្ណោះ
។បន្តិចទៀតនាឆ្នាំ២០១៣ខាងមុខនេះបានន័យថានៅពេលដែលក្រុមប្រឹក្សាឃុំ
សង្កាត់ចូលកាន់តំណែងហើយនោះ កឹម សុខា នឹងបង្ហាញអំពីភាពត្រដរខ្យល់
និងភាពទាល់ច្រករបស់ខ្លួនហើយ ពីព្រោះឆ្នាំ២០១៣ គឺជាការសម្រេចអំពីជោគវាសនានយោបាយរបស់
កឹម សុខា ហើយ។
លោក
សត្យា រក្ស
សំណួរ៖
ទាក់ទងទៅនឹងសម្ព័ន្ធភាពនេះផងដែរ ឥឡូវនេះ គណបក្ស សម រង្ស៊ី បានអះអាងថាគណបក្ស
កឹម សុខា នេះជាគណបក្ស អាយ៉ង ពីព្រោះគណបក្ស កឹម សុខា បង្កើតឡើងដោយមានឆ្មបគឺ
សម្តេចអគ្គមហាសេនាបតីតេជោ ហ៊ុន សែន
ដោយមានទាំងខ្សែរអាត់សម្លេង ការសន្ទនាដោយសម្ងាត់រវាង សម្តេចអគ្គមហាសេនាបតី និង កឹម សុខា ផងដែរ។ ជុំវិញបញ្ហានេះ
បានធ្វើឲ្យគណបក្ស សម រង្ស៊ី មន្ទិលសង្ស័យ ហើយបាននិយាយច្បាស់ៗថាជាអាយ៉ងទៅទៀត។
បើយើងបានស្តាប់ការសន្ទនា ក៏យើងដឹងថា កឹម សុខា គឺជាក្មេងម្នាក់ដែល សម្តេចប្រើឲ្យធ្វើការដែរ។
ដូច្នេះទាក់ទងក្នុងបញ្ហានេះ គណបក្ស សម រង្ស៊ី គឺពិតជាមិនទាន់ភ្លេចទេអំពីចរិតរបស់
កឹម សុខា និងទំនាក់ទំនងរបស់ កឹម សុខា ជាមួយ សម្តេចអគ្គមហាសេនាបតី
។ ជុំវិញបញ្ហានេះតើលោកបណ្ឌិតមើលឃើញថា សម្ព័ន្ធភាពនេះ
អាចនឹងទៅរួចដែរឬទេ?
លោកបណ្ឌិតឈឹម
ផលវរុណ
ចម្លើយ៖ ចំណុចដែល សម រង្ស៊ី
ទទួលបានមេរៀនមួយលើកនេះ ទើប សម រង្ស៊ី មានទឡ្ហីករណច្រើន ប៉ុន្តែដោយសារ
សម រង្ស៊ី ទុកមុខទុកមាត់ឲ្យ កឹម សុខា ច្រើនពេក។ ដល់អញ្ចឹងទៅប្រជាពលរដ្ឋដែលគាំទ្រគណបក្ស
សម រង្ស៊ី ពួកគាត់មិនច្បាស់លាស់។ តាមពិតទៅ លោក សម រង្ស៊ី គណបក្ស សម រង្ស៊ី
និងថ្នាក់ដឹកនាំគណបក្ស សម រង្ស៊ី លាក់រឿងទាមទារហួសហេតុរបស់ កឹម សុខា
ដែលក្រុមការងារគេបានជួបគ្នា ហើយតើ កឹម សុខា ទារអ្វីខ្លះនោះ។ អញ្ចឹងចំណុចចាប់អារម្មណ៍ពិតដែលគណបក្ស
សម រង្ស៊ី រួមទាំងលោក សម រង្ស៊ី ដឹងច្បាស់ គឺទី១ ការទាមទារហួសហេតុរបស់ កឹម
សុខា ។ រឿងនេះខ្ញុំដឹង ប៉ុន្តែខ្ញុំមិននិយាយទេ ទុកឲ្យសាម៉ីគណបក្ស សម រង្ស៊ី
ខ្លួនឯងលាតត្រដាងទៅ។ បើអ្នកឯងមិនហ៊ានលាតត្រដាងពីមហិច្ឆិតារបស់ កឹម សុខា
ក្នុងការទាមទារតំណែងទេ គឺអ្នកទុកឲ្យ កឹម សុខា កំពុងលេងល្បែងនយោបាយហើយ។
ចំណុចមួយទៀត ក៏មានការធ្លាយរឿងសន្ទនាសម្ងាត់រវាង កឹម សុខា និង សម្តេចនាយករដ្ឋមន្ត្រី ដែលជាការសរបញ្ជាក់ថា
កឹម សុខា លេងមុខពីរ។ មុខមាត់ខាងក្រៅគឺដើរតួជាអ្នកប្រឆាំងប្តូរផ្តាច់។
ប៉ុន្តែនៅឆាកសម្ងាត់ កឹម សុខា រស់ និងបង្កើតដោយជំនួយដ៏ធំធេងពី សម្តេចប្រមុខរាជរដ្ឋាភិបាល។ ដូចនេះហើយ
ទើប សម រង្ស៊ី បានភ្ញាក់ខ្លួន។ អញ្ចឹងបញ្ហាដែល សម រង្ស៊ី មន្ទិលចំពោះ កឹម សុខា
គឺមានពីរចំណុច គឺការទាមទារអំណាចហួសហេតុប្រហាក់ប្រហែលនឹង សម រង្ស៊ី
និងការដើរមុខពីរនេះ។ ដូច្នេះ កឹម សុខា ដែលជាជនទុច្ចរិតនោះ
គឺមិនបានបកស្រាយពីបញ្ហានេះទេ ផ្ទុយទៅវិញកឹម សុខា បានវាយប្រហារគណបក្ស សម
រង្ស៊ី កាន់តែខ្លាំងក្នុងពេលតំណាលគ្នាដែលគណបក្ស សម រង្ស៊ី អត់ហ៊ានលាតត្រដាងពីគំនិតទុច្ចរិត
របស់ កឹម សុខា។ អញ្ចឹងហើយបានជា សម រង្ស៊ី ចាញ់ កឹម សុខា ក្នុងការបោះឆ្នោតថ្ងៃទី០៣
ខែមិថុនា ឆ្នាំ២០១២នេះយ៉ាធ្ងន់ធ្ងរ។ សរុបមកបើ សម រង្ស៊ី នៅតែលេងដោយភាពញញើតញញើមជាមួយ
កឹម សុខា ក្នុងពេលប្រជុំក្រុមការងារដោយមិនលាតត្រដាងក្នុងតម្លាភាពទេនោះ
កឹម សុខា នឹងចំណេញទៀត។ ខ្ញុំធ្លាប់បានជម្រាបហើយ ថា កឹម សុខា
គឺជាមនុស្សកំពូលល្បិចជាងគេបង្អស់នៅកម្ពុជា។ នៅពេលដែលគាត់កាន់មជ្ឈមណ្ឌលសិទ្ធិមនុស្សកម្ពុជា
គឺគាត់អាចបោកអង្គការ IRI របស់អាមេរិកបាន។
កឹម សុខា ធ្វើដោយគ្មានការខ្មាស់អៀនទេ ចំណែក សម រង្ស៊ី គឺនៅមានការខ្មាស់អៀន
គ្រាន់តែគាត់នៅឆេវឆាវជាង។ ត្រង់នេះ កឹម សុខា នឹងកេងចំណេញមួយសារទៀត
បើសិនជាគណបក្ស សម រង្ស៊ី មិនប្រើនយោបាយតម្លាភាពទេ។ ខ្មោចបីសាចខ្លាចពន្លឺ
អញ្ចឹងជនទុច្ចរិតក៏ខ្លាចតម្លាភាពដែរ។ បើ រង្ស៊ី
ពិតជាសុច្ចរិតខាងនយោបាយក្នុងសម្ព័ន្ធភាព កុំខ្លាចនឹងលាតត្រដាងឲ្យប្រជាពលរដ្ឋដឹង
ជាពិសេសប្រជាពលរដ្ឋដែលគាំទ្រសម្ព័ន្ធភាពរបស់គណបក្សប្រឆាំង ឬក៏ប្រជាពលរដ្ឋដែលគាំទ្រគណបក្ស
សម រង្ស៊ី។ ការលាតត្រដាងនេះគឺដើម្បីវែកមុខទុច្ចរិតរបស់ កឹម សុខា តែបើ សម
រង្ស៊ី នៅតែញញើត នៅលើកទី២ សម រង្ស៊ី នឹងចាញ់មួយលើកទៀត។ ខ្ញុំចង់បញ្ជាក់ថា ការបោះឆ្នោតឆ្នាំ២០១៣
មិនមែនជាការបោះឆ្នោតរវាងគណបក្សប្រឆាំងនិងគណបក្សប្រជាជនកម្ពុជាទេ។
គណបក្សប្រជាជនកម្ពុជាគ្មានគូរប្រកួតទេ ដោយសារគូរប្រកួតអាឡិកអាឡក់ទាំងអស់នោះ
កំពុងតែលេងល្បែងបោកប្រាស់គ្នាទៅវិញទៅមកនោះហើយ។ ដូច្នេះត្រូវចាំថា
នៅឆ្នាំ២០១៣ ខាងមុខនេះ គណបក្សប្រជាជនកម្ពុជានឹងធ្វើនយោបាយបន្តអភិវឌ្ឍប្រទេសជាតិ
ដោយគណបក្សប្រឆាំងរវល់តែដណ្តើមគ្នាទៅវិញទៅមកមិនបានចូលរួមអភិវឌ្ឍប្រទេស។
ដូច្នេះការបោះឆ្នោតនោះនឹងមានពីររូបភាព គឺគណបក្សប្រជាជនកម្ពុជាទទួលនីត្យានុកូលភាពពីប្រជាពលរដ្ឋដ៏ច្រើនលើសលប់ក្នុងការបន្តអភិវឌ្ឍប្រទេស
និងគាំទ្រនូវប្រជាប្រិយភាពដ៏ខ្ពស់បំផុតរបស់ប្រមុខរាជរដ្ឋាភិបាលបច្ចុប្បន្ន
គឺរហូតដល់ជិត៩០% នេះបើតាមការស្ទង់មតិរបស់ IRI ។ ចំណែកក្រៅពីនោះគឺជាការប្រទាញប្រទង់ដណ្តើមគ្នារវាងគណបក្ស សម រង្ស៊ី និងគណបក្ស
កឹម សុខា ក្រោមល្បិចនយោបាយសម្ព័ន្ធភាពស្អីគេនោះ។៤០
លោកសត្យា រក្ស
សំណួរ៖ យើងឃើញថា
មកទល់ថ្ងៃនេះ មានរយៈពេលជិតមួយខែ ហើយ ក្រោយពេលដែលគណបក្សទាំងពីរមើលឃើញថា
ទទួលបានការគាំទ្រពី ប្រជាពលរដ្ឋតិចតួចនៅក្នុងការបោះឆ្នោតក្រុមប្រឹក្សាឃុំសង្កាត់។ មានន័យថា
គណបក្សទាំងពីរបានរំលឹក ឬបានគាស់ខ្មោចសម្ព័ន្ធភាពហ្នឹងយកមកធ្វើបុណ្យទៀត។ មកទល់ថ្ងៃនេះ ប្រជាពលរដ្ឋ ភាគច្រើនកំពុងតែមើលឃើញថា សញ្ញានៃការឈ្លោះប្រកែកគ្នា រវាងគណបក្សទាំងពីរនេះ ហាក់បីដូចជា កំពុងតែចាប់ផ្តើមជាបន្តបន្ទាប់។ អញ្ជឹងជុំវិញសម្ព័ន្ធភាពនេះលោកបណ្ឌិតអាចប្រមើលឃើញយ៉ាងម៉េចដែរទៅសម្រាប់អនាគត នៃការចងសម្ព័ន្ធគ្នាហ្នឹង?
លោកបណ្ឌិតឈឹម
ផលវរុណ
ចម្លើយ៖ ឥឡូវយើងយកតែទិដ្ឋភាពពីរមកពិនិត្យ គឺរាប់ពីថ្ងៃដែលគេរំលឹកឡើងវិញ ក្រោយការបោះឆ្នោតហ្នឹងមួយ គឺទិដ្ឋភាពនយោបាយរវាងជំហរនយោបាយរបស់គណបក្សទាំងពីរ។មួយទៀតគឺទិដ្ឋភាពនៃដំណើរការបចេ្ចកទេសនៃការរួបរួម
ដើម្បីឲ្យទាន់ពេលវេលាដែលជាទិដ្ឋភាពពេលវេលា និងបច្ចេកទេសសម្រាប់ការបោះឆ្នោតឆ្នាំ២០១៣។ពីរហ្នឹងគឺណែងណងគ្នា ឥឡូវយើងមើលទិដ្ឋភាពនៃជំហរនយោបាយ។ ជំហរនយោបាយរបស់គណបក្ស សម រង្ស៊ី និងគណបក្ស កឹម សុខា ដូចគ្នាតែមួយមុខទេ គឺពួកគេចង់ពូនគ្នាយកឈ្នះគណបក្សប្រជាជនកម្ពុជា តែមួយមុខហ្នឹងទេ។ ប៉ុន្តែមិនមែនគេល្ងង់ទេ នៅពេលឃើញតួរលេខទើបបានគេបូកគ្នា
គឺពិបាកឬនៅតែមិនទាន់គ្រប់ចំនួនទៅប្រកៀកជាមួយគណបក្សប្រជាជនកម្ពូជានៅឡើយ។ អាហ្នឹងជាទិដ្ឋភាពនយោបាយ។
ដោយសារតែទិដ្ឋភាពនយោបាយដែលគេសង្ឃឹមតិចក្នុងការអាចផ្តួលរំលំគណបក្សប្រជាជនកម្ពុជានោះ ឬក៏យកឈ្នះ
គណបក្សប្រជាជនកម្ពុជានោះ វាជះឥទ្ធិពលទៅដល់ជំហរនយោបាយផ្ទៃក្នុងរបស់គណបក្សទាំង២។ តើជះរឿងអី? គឺជះរឿងដណ្តើមតួលេខឈរឈ្មោះធ្វើរដ្ឋសភា។
ពីព្រោះ សម រង្ស៊ី គេគិតថា បើមិនឈ្នះគណបក្សប្រជាជនកម្ពុជា ក៏យ៉ាងហោចណាស់គេត្រូវរក្សា ២៦ អាសនៈ ឬក៏ឡើងដល់ប៉ុន្មានទៀតទៅ ឬបើចុះកុំឲ្យចុះច្រើន។ ហើយគេគិតថាតួលេខ ២៦
បច្ចុប្បន្ន វានៅតែច្រើនជាងអ្វីដែល កឹម សុខា ទៅដណ្តើមសម រង្ស៊ី នៅឆ្នាំ ២០១៣ ដែរ គឺ កឹម សុខា មិនអាច កើនទេ បើកើនគឺតិចបំផុត
និងការយល់របស់សម រង្ស៊ី បើខ្ញុំថាការកើនរបស់ កឹម សុខា វាអាស្រ័យទៅនឹងការសន្យាឃុំសង្កាត់នេះផង
ហើយសម រង្ស៊ី ក៏គិតឃើញដូចគ្នាអញ្ចឹងដែរ។ ការយល់ឃើញថា
ខ្លួននៅមានសង្ឃឹមរក្សា ២៦ ឬក៏បាត់ក៏បាត់តិចតួច
ឬក៏អាចកើនតិចតួច វានៅគ្រាន់បើជាងទៅចែករំលែកឲ្យ
កឹម សុខា ដែលកំពុងតែត្រដរខ្យល់នោះ។ ទោះជាមានកំណើនឆក់យកពី សម រង្ស៊ី បានជាង ១០ ម៉ឺន
ក៏កំណើននេះ សម រង្ស៊ី សង្ឃឹមថានឹងអាចយកមកវិញបាន។ អញ្ចឹងឥទ្ធិពលនេះនឹងជះទៅដល់ដំណើរនៃសម្ព័ន្ធភាពហើយ គឺដំណើរនយោបាយហ្នឹង។ ឯ កឹម សុខា គេសង្ឃឹម ថាគេអាចយកឥទ្ធិពលនៃកំណើនរបស់គេនៅឃុំសង្កាត់នេះ ដែលគេថាឥឡូវលែងឆ្កែនោមដាក់នោះ គេថាគេកៀកជាមួយសម រង្ស៊ី តែឥទ្ធិពលនេះគេនឹងយកទៅសង្កត់ សម រង្ស៊ី តែជាការពិបាក ដោយ សម រង្ស៊ី មិនទាន់ទទួលស្គាល់ថាជាការលូតដ៏ខ្លាំងទេ គ្រាន់តែជាការឆក់យកសម្លេង សម រង្ស៊ី
ដែល កឹម សុខា ធ្លាប់ឆក់ម្តង កាលនៅធ្វើជាប្រធានមជ្ឈមណ្ឌលសិទ្ធិមនុស្សហ្នឹង។ ដល់ពេលមកកើតគណបក្សឆក់យកពួកហ្នឹងមក ហើយគេអាចទប់ទល់បាន។ អញ្ចឹងអាឥទ្ធិពលដែលជះទៅលើការដណ្តើមទីតាំងនយោបាយ អាប្រៀបឈ្នះ អាប្រៀបចាញ់គ្នាហ្នឹង វាជាកត្តាធ្វើឲ្យលំបាកក្នុងការសម្រេចចិត្តនយោបាយនៃការរួបរួម។ មួយទៀត បើយើងថាទៅបានឲ្យវាទៅ ទៅចុះ។ ឥឡូវបងប្អូនគិតទៅមើល តើអាចទាន់ឬទេ? ថ្ងៃ ២៨ ខែ ៧ ឆ្នាំ ២០១៣ ទាន់ឬអត់? ព្រោះគេជួបគ្នាពិតប្រាកដ នៅថ្ងៃ ១៧ ខែ ៧ ឆ្នាំ ២០១២
ពាក់កណ្តាលខែក្រោយ។ អញ្ចឹងវានៅសល់ ២ អាទិត្យ អញ្ចឹងនៅពេលជួបហ្នឹង យើងថាវាឯកភាពគ្នាទៀតទៅចុះ ឲ្យវាអស់និស្ស័យឲ្យឆាប់ កុំឲ្យថាយើងចេះតែរាំងស្ទះ គឺយើងជូនពរឲ្យជោគជ័យទៀត។ បើជួបគ្នាភា្លមជោគជ័យ
តើរឿងដែលត្រូវជជែកគ្នាគឺជារឿងអី? កម្ពុជាមានមណ្ឌលបោះឆ្នោតខេត្តក្រុងចំនួន ២៤ ឥឡូវយើងដកខេត្តក្រុងណាដែលមានតែមួយអាសនៈចេញចុះ។ គឺស្ទឹងត្រែង
រតនៈគីរី មណ្ឌលគីរី ព្រះវិហារ ឧត្តរមានជ័យ កោះកុង កែប
ក្រុងព្រះសីហនុ ឬខេត្ត ព្រះសីហនុ អញ្ចឹង ៨ទៅ៩ខេត្ត យើងដកចេញទៅ វានៅសល់
១៤ ទៅ ១៥ខេត្តទៀត។ ខេត្តក្រុងរាប់ពីក្រចេះ
រហូតដល់ភ្នំពេញ ឆ្លងកំពង់ចាម ទៅដល់ភ្នំពេញ វា ១៤ ទៅ ១៥ ខេត្តក្រុង ខុសតួលេខ
តិចតួចអាធ្យាស្រ័យ។ អញ្ចឹងចំនួន ១៥ ខេត្តក្រុងនេះ
ដែលគេត្រូវជជែកគ្នា អា ៩ ខេត្តក្រុងដែលមានតែមួយអសនៈគេអត់ចាំបាច់ជជែកគ្នាទេ ព្រោះដឹងថាអត់ឈ្នះគណបក្សប្រជាជនកម្ពុជាទេ ហើយក៏គេអត់ដណ្តើមយកដែរ។ អញ្ចឹង ១៥ ខេត្តក្រុងនោះគឺ កំពង់ចាមមាន ១៨ អសនៈ ភ្នំពេញ មាន ១២ កណ្តាល មាន ១១
ព្រៃវែង ១១ បាត់ដំបង ៨ សៀមរាប ៦ ។ល។ និង។ល។ ពេលនោះ គឺដណ្តើមគ្នាហើយ ដណ្តើមគ្នាយ៉ាងម៉េច? តើអ្នកណាឈរលេខមួយ អ្នកណាឈរលេខពីរ ខាងអញឬខាងឯង កូនអញឬកូនឯង។ នេះចាប់ផ្តើមគិតហើយ។ ឧទាហរណ៍បើថាឲ្យ សម រង្ស៊ី យកលេខមួយ
កូនចៅរង្ស៊ី ឈរលេខមួយ កឹម សុខា ចាំឈរលេខពីរ សួរថាបើព្រមឬអត់ ? បើពីរនាក់ហ្នឹងមិនទាន់ ស្មើគ្នាផងហ្នឹង អញ្ចឹងវាត្រូវជជែកគ្នា អ្នកណាឈរលេខមួយ
អ្នកណាឈរលេខពីរ ឬកូតាហ្នឹងឲ្យឈរលេខមួយ
លេខពីរ ឲ្យសម រង្ស៊ី។ ហើយឈរលេខបីឲ្យ កឹម សុខា។ តើសម រង្ស៊ី ព្រមឬអត់ រូបមន្តហ្នឹង? តើកឹម សុខា ព្រមអត់រូបមន្តហ្នឹង? គឺរឿងតំណែងតំណាងរាស្ត្រហ្នឹងទេបងប្អូន ព្រោះគេដឹងថាគេអត់អាចទៅកាន់រដ្ឋាភិបាលបានទេ។ អញ្ចឹង កឹម សុខា កំពង់ចាម
បានតែមួយទេ សម រង្ស៊ី បាន ៥ ក្រុមព្រះបាន ១ ហើយគណបក្សប្រជាជនកម្ពុជាបាន ១២ ។ អញ្ចឹង សម រង្ស៊ី បាន ៥ បច្ចុប្បន្ន កឹម
សុខា បានតែ ១ តើកឹម សុខា ឈរលេខ ២
បានដែរឬ? គណបក្សសមរង្ស៊ី ម៉េចនឹងព្រម ហ៊ានតែ កឹម សុខា ឈរលេខ ២
ចុះអ្នកដទៃមិនធ្លាក់ចុះក្រោម អញ្ចឹងរឿងទៀត។ ចុះខេត្តកណ្តាលទៀត ភ្នំពេញទៀត ។ល។ និង។ល។ ដូច្នេះរឿងហ្នឹងវាត្រូវជជែកគ្នាក្នុងរយៈពេលដ៏វែងឆ្ងាយទៀតរាប់ថ្ងៃខែទៅ គឺខែ ០៧ បាន គេជួបគ្នា។ អញ្ចឹងបើយើងរាប់ខែពីខែ ០៨ ឆ្នាំ ២០១២ ទៅដល់ខែ ០៧ ឆ្នាំ ២០១៣ គឺមានពេលតែ ១២ ខែទេ ហើយដកពេលឃោសនាបោះឆ្នោតអស់មួយខែទៀតនៅសល់ ១១ ខែ ហើយ ការទទួលចុះឈ្មោះ ឈរឈ្មោះបោះឆ្នោតទៅ គ.ជ.ប មិនមែនខែ ០៦ ទេ វានៅខែ ០៤ ឬខែ ០៥ តាមប្រតិទិនរបស់ គ.ជ.ប។ អញ្ចឹងនិយាយឲ្យខ្លីនៅសល់តែ ៩ ខែ ទៅ ១០ ខែប៉ុណ្ណោះ ខ្ញុំថាឲ្យអស់ទៅ ១០
ខែ សួរថា ១០ ខែហ្នឹងជជែកគ្នាចេញឬអត់? ហើយបើជជែកអត់ចេញ ថាតើទៅធ្វើបញ្ជីឈ្មោះរួមគ្នាឬអត់? រឿងនឹងគឺចោទជាសញ្ញាសួរទៅចុះហើយយើងទាំងអស់គ្នាតាមដាននៅថ្ងៃគេជួបគ្នានៅ
ទីក្រុងម៉ានីលប្រទេសហ្វីលីពីនទៀត។
មតិលោក សត្យា រក្ស
អញ្ចឹងយើងឃើញថា អ្វីដែលជាការបំភ្លឺជូនទៅដល់ជនរួមជាតិទាក់ទងទៅ នឹងសម្ព័ន្ធភាពរវាង កឹម សុខា និង សម រង្ស៊ី ហើយក៏ដូចជាទាក់ទងទៅនឹងការសន្យា របស់ កឹម សុខា ចំពោះប្រជាពលរដ្ឋ
កាលពីបោះឆ្នោតក្រុមប្រឹក្សាឃុំសង្កាត់អីជាដើមនេះ គឺ ទុកជាការពិចារណាទៅដល់ជនរួមជាតិ។
ប៉ុន្តែអ្វីដែលលោកបណ្ឌិតសង្កត់ធ្ងន់ គឺទាក់ទងទៅនឹង អនាគតរបស់គណបក្សកឹម សុខា នេះតែម្តង ហើយអនាគតរបស់គណបក្ស កឹម សុខា នេះ អាចថាបន្តជីវិតនយោបាយទៅមុខទៀតបាន
ឬក៏មិនបានហ្នឹង គឺស្ថិតនៅលើការដែល កឹម សុខា
ហ្នឹងបំពេញនូវកិច្ចសន្យាក្នុងការបោះឆ្នោតក្រុមប្រឹក្សាឃុំសង្កាត់នេះឯង ដូចជាការ ផ្តល់ឡាន ការឲ្យមេឃុំទៅអាមេរិក ជាងនេះទៅទៀត កឹម សុខា គេមិនមែនសន្យាតែប៉ុណ្ណឹងទេ គេថា រដ្ឋមួយនៅអាមេរិក ជួយឃុំមួយនៅខ្មែរឲ្យតែឃុំដែលគេឈ្នះឆ្នោត។ អាហ្នឹងគឺ កឹម សុខា បាននិយាយអញ្ចឹង ហើយឥឡូវយើងចាំមើលៗថាតើ កឹម សុខា ហ្នឹងធ្វើបានដែរឬអត់? បើបាន យើងជឿជាក់ថា ការបោះឆ្នោតថ្នាក់ជាតិ ឆ្នាំ២០១៣ កឹម សុខា
អាចនឹងកើនអសនៈតិចតួច ប៉ុន្តែផ្ទុយទៅវិញ បើ កឹម សុខា ធ្វើមិនបានទេអាបីកៅអីហ្នឹងប្រាកដជារលាយ ដូចវាសនាគណបក្ស សឺន សាន អញ្ចឹង៕
សម្រង់ព័ត៌មាន៖ លោក នូ សាវុធឌី