នៅក្នុងជំនួបសម្តែងការគួរសម ជាមួយសម្តេចអគ្គមហាសេនាបតីតេជោ ហ៊ុន សែន នារសៀលថ្ងៃទី ១១ ខែកក្កដា ឆ្នាំ ២០១២ នៅវិមានសន្តិភាព ក្នុងរាជធានីភ្នំពេញ រដ្ឋមន្រ្តីការបរទេសកាណាដា បានមានប្រសាសន៍ឲ្យដឹងថាប្រទេសកាណាដាមានសមានចិត្ត និងគោលបំណង ចង់ធ្វើឲ្យមាន ទំនាក់ទំនងដ៏ជិតស្និទ្ធទាំងនយោបាយ ពាណិជ្ជកម្ម និងសេដ្ឋកិច្ចជាមួយ បណ្តា ប្រទេសអាស៊ាន។ ឯកឧត្តម John Baird មានប្រសាសន៍ឲ្យដឹងថានៅខែសីហា ខាងមុខនេះ រដ្ឋមន្រ្តីពាណិជ្ជកម្មកាណាដា នឹងធ្វើដំណើរមកកាន់ប្រទេសកម្ពុជា ដើម្បីជំរុញទំនាក់ទំនងពាណិជ្ជកម្ម នៃប្រទេសទាំងពីរឲ្យកាន់តែរឹងមាំ ថែមទៀត។
ឯកឧត្តម អ៊ាង សុផល្លែតជំនួយការសម្តេចតេជោនាយករដ្ឋមមន្រ្តីឲ្យដឹងថា ឯកឧត្តមរដ្ឋមន្រ្តី John Baird បានជម្រាបជូនសម្តេចតេជោថា ប្រទេសកាណាដាចាត់ទុកការដោះមីន គឺជាកត្តាដ៏ចាំបាច់បំផុត ដែលកាណាដានឹងបន្តជួយដល់កម្ពុជា លើការបោសសំអាតគ្រាប់មីន។ សម្រាប់ការងារអាស៊ាន កាណាដានឹងបន្តជួយឧបត្ថម្ភដល់ការធ្វើសមាហរណកម្មអាស៊ាន ដែលមានទឹកប្រាក់ ១០ លាន ដុល្លារ សហរដ្ឋអាមេរិក។
ឯកឧត្តមរដ្ឋមន្រ្តី John Baird សម្តែងនូវការវាយតម្លៃខ្ពស់ចំពោះការរៀបចំ កិច្ចប្រជុំរដ្ឋមន្រ្តីការបរទេសនៃប្រទេសអាស៊ាន និងរដ្ឋមន្រ្តីការបរទេសនៃប្រទេសពាក់ព័ន្ធនានាដែលបានប្រព្រឹត្តទៅប្រកបដោយលទ្ធផលដ៏ល្អបំផុតនោះ។
សម្តេចតេជោនាយករដ្ឋមន្ត្រី បានមានប្រសាសន៍វាយតំលៃខ្ពស់ ចំពោះវត្តមាន ឯក ឧត្តមរដ្ឋមន្រ្តីការបរទេសប្រទេសកាណាដាដែលបានអញ្ជើញចូលរួមកិច្ចប្រជុំរដ្ឋមន្រ្តីការបរទេស អាស៊ាននៅរាជធានីភ្នំពេញ ដោយសម្តេចផ្តល់ការសង្ឃឹមថា កាណាដានឹងចូលរួមចំណែកកាន់តែសកម្ម ខ្លាំងឡើងថែមទៀតនៅក្នុងតំបន់អាស៊ាននេះ។ សម្តេចតេជោនាយករដ្ឋមន្រ្តីក៏បានថ្លែងនូវអំណរគុណ ជូនចំពោះប្រទេសកាណាដា ដែលបានជួយដល់ប្រទេសកម្ពុជាក្នុងការអនុវត្តន៍នូវសេចក្តីសម្រេចចិត្តទីក្រុងហ្សឺណែវ កាលពីឆ្នាំ ១៩៨៩ ពិសេសការជួយដល់ប្រទេសកម្ពុជា ក្នុងការបោសសំអាតគ្រាប់មីន និងយុទ្ធភណ្ឌមិនទាន់ផ្ទុះក្នុងនោះមជ្ឈមណ្ឌលបោសសំអាតមីនកម្ពុជា (CMAC) ដែល CMAC ហាក់បីដូចជាកូនមួយដែលត្រូវបានបង្កើតដោយ ប្រទេសកាណាដា ។
សម្តេចតេជោបានស្នើដល់ប្រទេសកាណាដា ឲ្យបន្តជួយដល់មជ្ឈមណ្ឌលបោសសំអាតមីនកម្ពុជាជាបន្តទៀតព្រោះថា កម្ពុជា មានផ្ទៃដីប្រមាណ ១.៦០០ គីឡូម៉ែត្រការ៉េទៀត នៅមិនទាន់ធ្វើការបោសសំអាតគ្រាប់មីននៅឡើយ។ សម្តេចតេជោក៏បានសម្តែងនូវ ការអបអរសាទរផងដែរ ចំពោះប្រទេសកាណាដា ដែលមានបំណងចង់ធ្វើទំនាក់ទំនងឲ្យកាន់តែជិត ស្និទ្ធ ថែមទៀត ទាំងវិស័យនយោបាយ សេដ្ឋកិច្ច ពាណិជ្ជកម្មជាមួយនឹងបណ្តាប្រទេសក្នុងតំបន់ អាស៊ាន។ពាក់ពន្ធ័ទៅនឹងជំនួយ សម្រាប់ការធ្វើសមាហរណកម្មអាស៊ាន សម្តេចតេជោមាន ប្រសាសន៍បញ្ជាក់ថា សមាហរណកម្មអាស៊ាន គឺមានកត្តាសំខាន់ខ្លាំងណាស់បើធ្វើមិនបានទេនោះ ការបង្កើតសហគមន៍អាស៊ាននៅឆ្នាំ ២០១៥ អាចនឹងមានបញ្ហាកើតឡើងជាមិនខាន៕
អត្ថបទអង្គភាពព័ត៌មាន និងប្រតិកម្មរហ័ស