Friday, August 3, 2012
ក្រុមយុវជនអាស៊ាន ចូលរួមប្រលងប្រជែងសមត្ថភាព ថ្ងៃសុក្រ ទី៣សីហា ឆ្នាំ២០១២ នៅសាលសន្និសីទចតុមុខ ក្នុងរាជធានីភ្នំពេញ
ក្រុមយុវជនអាស៊ាន ចូលរួមប្រលងប្រជែងសមត្ថភាព ថ្ងៃសុក្រ ទី៣សីហា ឆ្នាំ២០១២ នៅសាលសន្និសីទចតុមុខ ក្នុងរាជធានីភ្នំពេញ
ការប្រកួតប្រជែង តំបន់អាស៊ាន លើកទី៥ " 5th ASEAN Quiz Regional Competition" ដែលជាការប្រឡងសមត្ថភាពយុវជនអាស៊ាន មកពី ១០ ប្រទេស ពាក់ព័ន្ធនឹងបញ្ហាទាំងឡាយរបស់អាស៊ាន បានធ្វើឡើង នៅសាលសន្និសីទចតុមុខ រាជធានីភ្នំពេញ នាព្រឹកថ្ងៃទី៣ ខែសីហា ឆ្នាំ២០១២។ ពិធីនោះ មានការចូលរួមពីសណាក់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន។ កម្ពុជាមានយុវជន ៣ រូប ចូលរួមប្រឡងប្រជែងជាមួយនឹងយុវជនមកពីប្រទេសសមាជិកអាស៊ានផ្សេងទៀត។
ចំណែកប្រទេសសមាជិកអាស៊ាន ៩ ផ្សេងទៀត ក៏បានបញ្ជូនយុវជន ៣ រូប ក្នុងមួយប្រទេស ដើម្បីចូលរួមការប្រឡងប្រជែងនាពេលនេះផងដែរ។
សូមបញ្ជាក់ថា ប្រទេសកម្ពុជា បានចូលជាសមជិកភាពរបស់អាស៊ាន នៅថ្ងៃទី៣០ ខែមេសា ឆ្នាំ១៩៩៩។ កម្ពុជា គឺជាសមាជិកទី១០ ដែលជាកូនពៅរបស់អាស៊ាន។ នៅឆ្នាំ២០១២នេះ កម្ពុជា ជាប្រធានអាស៊ាន៕
សមាជិកព្រឹទ្ធសភាចុះសួរសុខទុក្ខ និងនាំយកអំណោយឧបត្ថម្ភក្រុមយុវជនស្ម័គ្រចិត្តសម្តេចតេជោ នៅក្រុងសំរោង
សមាជិកព្រឹទ្ធសភាចុះសួរសុខទុក្ខ និងនាំយកអំណោយឧបត្ថម្ភក្រុមយុវជនស្ម័គ្រចិត្តសម្តេចតេជោ នៅក្រុងសំរោង
ឯកឧត្តម លី យ៉ុងផាត់ សមាជិកព្រឹទ្ធសភា អមដំណើរប្រតិភូដោយ លោកឧកញ្ញ៉ា ញឹក ផន លោក ឧត្ដមសេនីត្រីយ៍ ម៉ែន លី ស្នងការនគរបាលខេត្ត បានដឹកនាំប្រតិភូចុះសួរសុខទុក្ខ និងនាំយកគ្រឿងឧបភោគបរិភោគ មួយចំនួនជួយឧបត្ថម្ភដល់ក្រុមយុវជនស្ម័គ្រចិត្ត សម្តេចអគ្គមហាសេនាបតីតេជោ ហ៊ុន សែន ក្រុមទី១០៦ និង ១០៧ ចុះវាស់វែងដីធ្លីជូនប្រជាពលរដ្ឋ ក្នុងសង្កាត់កូនក្រៀល ក្រុងសំរោង ខេត្តឧត្តរមានេជ័យ។ នៅក្នុងឱកាស នោះ ឯកឧត្តម ឧកញ្ញ៉ា លី យ៉ុងផាត់ បានថ្លែងអំណរគុណ ចំពោះយុវជនស្ម័គ្រចិត្ត ដែលបានលះបង់ ក្រុមគ្រួសារ និងការសិក្សាមួយរយៈ ដើម្បីរួមចំណែក ជាមួយរាជរដ្ឋាភិបាល ជួយវាស់វែងដីធ្លី ជូនប្រជាពលរដ្ឋ បង្កលក្ខណៈគ្រប់គ្រាន់ ឲ្យប្រជាពលរដ្ឋមានសិទ្ធិកាន់កាប់ដីធ្លីស្របច្បាប់ ងាយស្រួលក្នុងការបង្ក បង្កើនផលលើកកំពស់ជីវភាព សំដៅកាត់បន្ថយភាពក្រីក្រ។
ឯកឧត្តម ឧកញ្ញ៉ា បានសំណូមពរ មិនឲ្យក្រុមយុវជនស្ម័គ្រចិត្តទាំងនោះ និងក្រុមបច្ចេក ទេស ចូលទៅវាស់ វែងដីធ្លីនៅតំបន់ណាសង្ស័យមានគ្រាប់មីន និងគ្រាប់យុទ្ធភណ្ឌមិនទាន់ផ្ទុះឬការឆ្លង កាត់ជ្រោះជ្រនិងស្ទឹងដែលមានទឹកច្រើន ចំពោះតំបន់ទាំងនោះ ចាំវាស់វែងជាក្រោយ។ ក្នុងការចុះសួរ សុខទុកនេះដែរ ឯកឧត្តម ឧកញ្ញ៉ា បាននាំយកអំណោយ រួមមាន អង្ករ ចំនួន ០១តោន មី ចំនួន ១០កេះធំ ត្រីខ ចំនួន១០កេះធំ ទឹកត្រី ១០ កេះ ទឹកសុទ្ធ ១០០ ឡូ សាច់ជ្រូក ២០ គីឡូក្រាម សាច់គោ ២០ គីឡូក្រាម ចែកជូនថវិការដល់យុវជនស្ម័គ្រចិត្ត ៧៨ នាក់ ម្នាក់ៗទទួល បានថវិការចំនួន ៥០ ម៉ឺនរៀល សរុបស្មើនឹង ៣៩ លានរៀល និងអំណោយ លោកឧកញ្ញ៉ា ញឹក ផន ប្រតិភូអមដំណើរ ទឹកប្រាក់ចំនួន ៥០០០ ដុល្លាអាមេរិក (សម្រាប់ផ្ដល់ជូន យុវជនទាំងពីរក្រុមផងដែរ) ។ ឯកឧត្តម ឧកញ្ញ៉ា បានផ្តាំផ្ញើដល់ប្អូនៗ យុវជនស្ម័គ្រចិត្តទាំងនោះ ត្រូវចេះថែរក្សា សុខភាពគឺហូបស្អាត រស់នៅស្អាត និងដេកក្នុងមុងជានិច្ច ដើម្បីការពារជម្ងឺគ្រុនចាញ់ និងជម្ងឺឆ្លងផ្សេងៗ ព្រោះក្រុងសំរោងសម្បូរទៅដោយព្រៃភ្នំ ៕
ឯកឧត្ដម ចម ប្រសិទ្ធ ជួបប្រតិភូក្រុមប្រឹក្សាពាណិជ្ជកម្មថ្មី នៃតំបន់កាន់តូជប៉ុន
ឯកឧត្ដម ចម ប្រសិទ្ធ ជួបប្រតិភូក្រុមប្រឹក្សាពាណិជ្ជកម្មថ្មី នៃតំបន់កាន់តូជប៉ុន
លោក Hideo OKUBO ប្រធានក្រុមហ៊ុនសាជីវកម្ម Foval Corporation និងជាប្រធានក្រុមប្រឹក្សា ពាណិជ្ជកម្ម ថ្មីNew Business Council នៃតំបន់កាន់តូប្រទេសជប៉ុន និងលោក កាត់ស៊ូហ៊ីរ៉ូ ស៊ីណូហារ៉ា អនុប្រធាន និងជាប្រធានប្រចាំការនៅកម្ពុជា នៃមូលនិធិគាំទ្រការអប់រំ អន្ដរជាតិកម្ពុជា CIESF និងជាអតីត ឯកអគ្គរាជទូតជប៉ុន ប្រចាំកម្ពុជានៅព្រឹកថ្ងៃទី០២ ខែ សីហា ឆ្នាំ២០១២ បាននាំប្រតិភូក្រុមប្រឹក្សា ពាណិជ្ជកម្មថ្មី New Business Council នៃតំបន់កាន់តូ ប្រទេសជប៉ុន មួយក្រុម ដែលមាន លោក Hiromu Ikeda ប្រធានក្រុមហ៊ុន NSG Group ជាប្រធានប្រតិភូ ដើម្បីចូលរួម កិច្ចប្រជុំ និងស្ដាប់បទ ឧទ្ទេសនាមពី ឯកឧត្ដម ប៉ាន សូរស័ក្ដិ រដ្ឋលេខាធិការ ក្រសួងពាណិជ្ជកម្ម តំណាងឯកឧត្ដម ទេសរដ្ឋមន្ដ្រី ចម ប្រសិទ្ធ ស្ដីពីសក្ដានុពល និងឱកាស វិនយោគ នៅកម្ពុជា នៅទីស្ដីការក្រសួងពាណិជ្ជកម្ម។
លោក Hiromu Ikeda ប្រធានក្រុមហ៊ុន NSG Group ជាប្រធានប្រតិភូ និងលោក Hideo OKUBO ប្រធានក្រុមប្រឹក្សាពាណិជ្ជកម្មថ្មី (NBC) នៃតំបន់កាន់តូ នៃប្រទេសជប៉ុន បានជម្រាបជូនថា ប្រតិភូរបស់លោក មានចំនួន៣២នាក់ តំណាងមកពី ក្រុមហ៊ុនចំនួន ៣១ មានដូចជា ក្រុមហ៊ុនពាណិជ្ជកម្ម ឧស្សាហកម្ម សេវាកម្ម ទូរគមនាគមន៍សំណង់ បច្ចេកវិទ្យាព័ត៌មាន អប់រំ និងក្រុមហ៊ុន ជួលឃ្លាំងជាដើម ដែលជាក្រុមហ៊ុន ដ៏មានសក្ដានុពល បានរួមចំណែក ជួយជម្រុញសេដ្ឋកិច្ចជប៉ុន កាលពី២៧ ឆ្នាំមុន កំពុងមានការចាប់អារម្មណ៍ និងចង់សិក្សា ស្វែងយល់ពីឱកាសវិនិយោគនៅកម្ពុជា ។ ឯកឧត្ដម ប៉ាន សូរស័ក្ដិ រដ្ឋលេខាធិការ ក្រសួងពាណិជ្ជកម្មបានសំដែងការស្វាគមន៍ និងបានឆ្លើយ សំណួរជាច្រើន ទាក់ទងនិងការ ចង់ដឹងពីស្ថានភាពទូទៅនិងសក្ដានុពលសេដ្ឋកិច្ច របស់កម្ពុជា ។ ឯកឧត្ដម ប៉ាន សូរស័ក្ដិ បានជម្រាបថា កម្ពុជា បានឆ្លងកាត់សង្គ្រាមរុំារ៉ៃរាប់ទស្សវត្ស ហើយកម្ពុជាទើប ទទួលបានឯកភាពជាតិ និងសុខសន្ដិភាព ពេញលេញ នាឆ្នាំ ១៩៩៩ ក្រោមនយោបាយ ឈ្នះ-ឈ្នះ របស់ សម្ដេច អគ្គមហានោបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណា ចក្រកម្ពុជា។ដូច្នេះការបង្កើតគោល នយោបាយសេដ្ឋកិច្ច និងរបបពាណិជ្ជកម្ម គឺមានលក្ខណៈលើកទឹកចិត្ដនិងមានភាពសេរីច្រើន។ ឯកឧត្ដម បានបន្ថែមថា កម្ពុជា ជាប្រទេសកសិកម្ម សម្បូរណ៍ដោយ ធនធានធម្មជាតិនិងសម្បត្ដិ វប្បធម៌រុងរឿង ។ ក្នុងនោះ កត្ដាសំខាន់ ០៤យ៉ាង ដែលជាមូលដ្ឋានគ្រឹះនៃការអភិវឌ្ឍន៍គឺសន្ដិភាព-ស្ថេរភាពម៉ាក្រូសេដ្ឋកិច្ច-ក្របខ័ណ្ឌច្បាប់ រឹងមាំនិងអាច ប៉ាន់ប្រមាណ បាន និងភាពអនុគ្រោះពាណិជ្ជកម្មដែលកម្ពុជា ទទួលបានពីប្រទេស ដៃគូ និងប្រទេសអភិវឌ្ឍន៍ ក្នុងនាមកម្ពុជា ជាប្រទេស អភិវឌ្ឍន៍ តិចតួច (LDC)និងការធ្វើ សមាហរណកម្ម សេដ្ឋកិច្ចរបស់កម្ពុជា ក្នុងសហគមន៍ សេដ្ឋកិច្ចពិភពលោក។ ក្នុងនោះ ប្រទេសជប៉ុនក៏បានផ្ដល់ភាព អនុគ្រោះពាណិជ្ជកម្ម ដល់កម្ពុជាលើបញ្ជីមុខទំនិញចំនួន៩៨% ផងដែរ។ ឯកឧត្ដមទេរដ្ឋមន្ដ្រីបានលើកឡើង ពីវិស័យជាអាទិភាព ចំនួន១០ ដែលបានដាក់ចេញ ក្នុងរាជរដ្ឋាភិបាល អណត្ដិទី៤ ព្រមទាំងលើកឡើង ពីយុទ្ធសាស្ដ្រចតុកោណ របស់រាជរដ្ឋាភិបាល ដែលយកអភិបាលកិច្ចល្អជាស្នូល។ ទន្ទឹមគ្នានោះ ឯកឧត្ដមរដ្ឋលេខាធិការ ប៉ាន សូរស័ក្ដិ បានលើក ឡើងពីការ យកចិត្ដទុកដាក់របស់ រាជរដ្ឋាភិបាល កម្ពុជា ក្នុងការធ្វើឱ្យប្រសើរ នូវបរិយាកាស វិនិយោគទាំងក្នុងស្រុក និងក្នុងតំបន់ ដូចជាៈការបង្កើតតំបន់ សេដ្ឋកិច្ចពិសេស SEZតំបន់ពាណិជ្ជកម្មសេរី FTA អភិវឌ្ឍន៍ ក្រោមក្របខ័ណ្ឌ មហាអនុតំបន់ទន្លេមេគង្គ GMS ទីផ្សារព្រំដែនដោយរួមបញ្ចូលនូវ យន្ដការកែទំរង់ និងកិច្ចសំរួល ពាណិជ្ជកម្ម ស៊ីជំរៅ ជាពិសេសទៅទៀត ច្បាប់វិនិយោគ កម្ពុជាបានអនុញ្ញាតឱ្យក្រុមហ៊ុន បរទេសអាចដាក់ ដើមទុនរបស់ខ្លួន ១០០% និងអាចធ្វើពាណិជ្ជកម្មនាំចេញ នាំចូលដោយខ្លួន ឯងបាន និងមិនកំហិតការផ្ទេរប្រាក់ ចំណេញ ចេញទៅក្រៅប្រទេស ឡើយ ព្រមទាំងអំពាវនាវឱ្យក្រុមហ៊ុនជប៉ុន មកបណ្ដាក់ទុន នៅកម្ពុជាឱ្យបាន កាន់តែច្រើនឡើង ។
គណៈកម្មាធិការជាតិអូឡាំពិកកម្ពុជាគោរពវិញ្ញាណក្ខន្ធលោកឧកញ៉ាវិសេសវិជ្ជាវេជ្ជបណ្ឌិត មីសាមឺឌី
នៅព្រឹកថ្ងៃទី៣ខែសីហានេះ មន្ត្រីជាន់ខ្ពស់នៃគណៈកម្មាធិការជាតិអូឡាំពិកកម្ពុជា ដឹកនាំដោយលោក នុត សាអាន អនុប្រធានទី ១ និង លោកប៊ុន សុខ អនុប្រធានទី២ បានដឹកនាំមន្ត្រីអូឡាំពិកនិងតំណាងសហព័ន្ធជាតិទៅគោរពវិញ្ញាណក្ខន្ធលោកឧកញ៉ាវិសេសវិជ្ជាវេជ្ជបណ្ឌិត មី សាមឺឌី ប្រធានកិត្តិយសអូឡាំពិកមួយជីវិត ដែលទទួលមរណភាពកាលពីថ្ងៃទី ១ ខែសីហាកន្លងមក។
លោកនុត សាអាន បានថ្លែងនៅក្នុងវិយោគកថាបញ្ជាក់ថា មួយជីវិតរបស់លោកមី សាមឺឌី គឺបាន លះបង់ទៅលើការបណ្ដុះបណ្ដាលធនធានមនុស្សលើវិស័យវេជ្ជសាស្ត្រ និងកីឡាបានយ៉ាងច្រើន។ បន្ទាប់ពីឆ្លងកាត់របបប៉ុល ពតនោះ លោកមី សាមឺឌីបានតស៊ូលើឆាកអន្តរជាតិពិសេសអូឡាំពិកអន្តរជាតិ រហូតដល់ថ្ងៃទី១៥ ខែមិថុនា ឆ្នាំឆ្នាំ១៩៩៦ អូឡាំពិកអន្តរជាតិបានផ្ដល់អាសនៈមកដល់កម្ពុជាវិញ។
ជាមួយនឹងការទាមទារបានមកវិញនូវអាសនៈអូឡាំពិកកម្ពុជាលើឆាកអន្តរជាតិនោះ លោកមី សាមឺឌី បានកាន់កាប់តំណែងជាប្រធានគណៈកម្មាធិការជាតិអូឡាំពិកកម្ពុជាដល់ទៅ២អាណត្តិ ហើយចុងក្រោយលោកបានដកខ្លួនថយដោយសារវ័យកាន់តែចាស់។ ទោះបីដកខ្លួនថយក៏លោកនៅតែបន្តជួយដល់អូឡាំពិកកម្ពុជាទៅតាមអ្វីដែលអាចធ្វើបាន។
ដោយសារគុណសម្បត្តិបែបនេះ ទើបនៅថ្ងៃទី១២កុម្ភៈ២០១១ លោកថោង ខុនប្រធានគណៈកម្មាធិការជាតិអូឡាំពិកកម្ពុជា សម្រេចផ្ដល់ឋានៈកិត្តិយសដល់លោកវេជ្ជបណ្ឌិត មី សាមឺឌី ជាប្រធានកិត្តិយសអូឡាំពិកកម្ពុជាមួយជីវិត។
លោក នុត សាអាន បានបញ្ជាក់ទៀតថា ក្នុងនាមលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មាធិការជាតិអូឡាំពិកកម្ពុជា ជាមួយមន្ត្រីនៃគណៈកម្មាធិការជាតិអូឡាំពិកកម្ពុជាទាំងអស់ សូមចូលរួមសំដែងនូវមរណទុក្ខដ៏ក្រៀមក្រំចំពោះការបាត់បង់សកម្មជន នៃចលនាអូឡាំពិក ក្នុងព្រះរាជាណាចក្រកម្ពុជា ដែល លោកអ្នកឧកញ៉ាវិសេសវិជ្ជាវេជ្ជបណ្ឌិត មី សាមឺឌី ប្រធានកិត្តិយសមួយជីវិត របស់គណៈកម្មាធិការជាតិអូឡាំពិកកម្ពុជា ដែលបានទទួលមរណភាពដ៏គួរឲ្យសោកស្តាយនេះ៕
វិសិទ្ធ
ប្រជាពលរដ្ឋទូរទាំងខេត្តសៀមរាបនិងតាមបណ្តាខេត្តរាប់រយនាក់នាំគ្នាមកសុំសេចក្តីសុខពីព្រះអង្គចេកព្រះអង្គចម
សៀមរាប ៖ ប្រជាពលរដ្ឋទូទាំងខេត្តសៀមរាបនិងប្រជាពលរដ្ឋនៅតាមបណ្តារាជធានីខេត្តក្រុងរាប់រយនាក់បាននាំគ្នាមកកាន់កន្លែងសក្ដិសិទ្ធិព្រះអង្គចេកព្រះអង្គចមយ៉ាងច្រើនកុះករកាលពីល្ងាចនៅក្នុងថ្ងៃទី០២ខែសីហាឆ្នាំ២០១២ ត្រូវនិងថ្ងៃ១៥កើត ខែពិសាខហើយក៏ជាថ្ងៃសីលស្របពេលនិងថ្ងៃចូលព្រះវស្សាដែលបងប្អូនពុទ្ធបរិស័ទជាច្រើនដែលមកពីបណ្តារាជធានីខេត្តក្រុងបាននាំគ្នាទៅបូជាទៀនធូក ភួង ផ្កា ថ្វាយជូនដល់ព្រះសម្មាសម្ពុទ្ធដើម្បីសុំសេចក្តីសុខសេចក្តីចំរើន។
ជាក់ស្តែងបើតាមការង្កេតឃើញមានបងប្អូនប្រជាពលរដ្ឋចាស់ក្មេងហើយនិងពុទ្ធបរិស័ទជាច្រើនបាននាំគ្នាទៅបូជាទៀនធូកផ្កាខ្ញីនូវក្នុងបរិវេណព្រះអង្គចេកព្រះអង្គចមដែលស្ថិតនូវចំកណ្តាលបេះដូងក្រុងប្រវត្តិសាសន៍ខេត្តសៀមរាប ដោយខេត្តសៀមរាបជាខេត្តស័ក្តិសិទ្ធសំរាប់បងប្អូនប្រជាពលរដ្ឋ ហើយនិងពុទ្ធបរិស័ទដែលពួកគាត់មានជំនឿជឿជាក់ទៅលើព្រះអង្គចេកព្រះអង្គចម ដើម្បីពួកគេសុំនៅសេចក្តីសុខ សេចក្តីចំរើន។ ហើយម្យ៉ាងទៀតយើងសង្កេតឃើញក្រុមយុវ័យស្រីប្រុសជាសិក្សានុសិស្សយ៉ាងច្រើនក៏បាននាំគ្នាមកធ្វើការបន់ស្រន់សូមឱ្យបារមីព្រះអង្គចេកព្រះអង្គចមសុំនូវសេចក្តីសុខសេចក្តីចំរើនហើយជាពិសេសទៅទៀតសុំឱ្យតាមជួយថែរក្សានិងនូវពេលប្រឡងទុតិយភូមិ ដែលប្រព្រឹត្តនាថ្ងៃទី០៦ខែសីហាឆ្នាំ២០១២ខាងមុខនេះផងដែរ៕
គឿនវ៉េត
លោកស្រីគ្លីងតុននាំសារបង្រួបបង្រួមឲ្យស៊ូដង់ខាងត្បូង
រដ្ឋមន្ត្រីការបរទេសសហរដ្ឋអាមេរិកលោកស្រីហ៊ីឡារីគ្លីងតុន នឹងគាបសង្កត់ប្រទេសស៊ូដង់ខាងត្បូងឲ្យដោះស្រាយវិវាទជាមួយពួកអតីតមេដឹកនាំនៅខាងជើងនៅក្នុងទស្សនកិច្ចលើកដំបូងបង្អស់របស់លោកស្រីមកកាន់ប្រទេសដ៏ថ្មីបំផុតរបស់ពិភពលោកនៅថ្ងៃសុក្រ។
នៅក្នុងដំណើរទស្សនកិច្ច១១ប្រទេសនៅអាហ្វ្រិកដែលលោកស្រីគ្លីងតុននឹងជាមន្ត្រីជាន់ខ្ពស់បំផុតរបស់សហរដ្ឋអាមេរិកចាប់តាំងពីឯករាជ្យកាលពីឆ្នាំមុននោះ បានព្រមានថាការបែកបាក់គ្នាដ៏ល្វីងជូរចត់ទៅលើទឹកដី និង ប្រេង បានគំរាមធ្វើឲ្យខូចខាតសេដ្ឋកិច្ចរបស់ប្រទេសទាំង២។
មន្ត្រីជាន់ខ្ពស់សហរដ្ឋអាមេរិកបាននិយាយត្រួសៗ ប្រាប់អ្នកយកព័ត៌មានដែលកំពុងធ្វើដំណើរជាមួយលោកស្រីគ្លីងតុន ដែលបានមកដល់ប្រទេសអ៊ូហ្កង់ដា កាលពីថ្ងៃព្រហស្បតិ៍ថា«យើងកំពុងជំរុញទឹកចិត្តភាគីទាំង២ ប្រទេសស៊ូដង់ខាងត្បូង និង ប្រទេសស៊ូដង់ ឲ្យជួប ចរចាពីការខ្វែងទំនាស់គ្នា រវាងពួកគេតាមដែលអាចធ្វើទៅបាន»។
លោកស្រីគ្លីនតុននឹងបង្ហាញពីការគាំទ្រសហរដ្ឋអាមេរិកចំពោះរដ្ឋាភិបាលស៊ូដង់ខាងត្បូង ដែលក្រុងវ៉ាស៊ីងតោនបានជួយណែនាំតាមរយៈការចរចាជាច្រើនឆ្នាំជាមួយក្រុងខាតូមដែលចុងបញ្ចប់បាននាំទៅរកឯករាជ្យក្រោយពីសង្គ្រាមស៊ីវិលមួយទសវត្សរ៍មក។
ប៉ុន្តែក្រុងវ៉ាស៊ីងតោនត្រូវស្រងាកចិត្តដោយសារតែវិវាទទៅលើខ័ណ្ឌសីមាព្រំដែន និង ប្រេងដែលជួនកាលហាក់ដូចចង់ធ្វើឲ្យប្រទេសទាំង២វិលទៅរកសង្គ្រាមវិញ៕
រឹទ្ធ
ឃុំថ្មដាជាប់ព្រំដែនខ្មែរ-ថៃត្រូវខ្យល់បក់ប៉ើងដំបូលផ្ទះខូចខាតជាច្រើនខ្នង
ពោធិ៍សាត់ ៖ ភ្លៀងលាយខ្យល់បានបោកបក់យ៉ាងខ្លាំងមកលើភូមិចំនួន៣ ក្នុងឃុំថ្មដា ស្រុកវាលវែង ខេត្តពោធិ៍សាត់ ដែលជាប់ព្រំដែនខ្មែរ-ថៃ បណ្ដាលឲ្យស្នាក់ការទាហានមួយខ្នងតូចខូចខាតទាំងស្រុង ហើយវិទ្យុទាក់ទងសង់ត្រាល់ក៏ខូចខាតមួយគ្រឿង និង ផ្ទះជាច្រើនខ្នងទៀតប៉ើងដំបូល។ មិនតែប៉ុណ្ណោះចំការកៅស៊ូរបស់ប្រជាពលរដ្ឋចំនួន៣ភូមិ ក៏បានរលំបាក់រាប់រយដើមផងដែរ។
ហេតុការណ៍នេះកើតឡើងចាប់តាំងពីម៉ោង ៦ព្រឹក រហូតដល់ម៉ៅង ៨យប់ ក្នុងថ្ងៃទី ២ ខែ សីហា ឆ្នាំ២០១២ ទើបខ្យល់ និងភ្លៀងនេះស្ងប់ទៅវិញ។
លោក ពេជ សោភ័ណ្ឌ នាយប៉ុស្ដិ៍រដ្ឋបាលនគរបាលទីនោះប្រាប់កម្ពុជាថ្មីថា ឥទ្ធិពលខ្យល់បោកបក់ខ្លាំងបណ្ដាលឲ្យផ្ទះប៉ើងដំបូល,រលំ និង បាក់ដើមកៅស៊ូ៣ភូមិនោះគឺ ទី១. ភូមិកណ្ដាល ប៉ើងដំបូលផ្ទះ ចំនួន៥ខ្នង រួមទាំងរលំ និងបាក់ដើមកៅស៊ូមួយចំនួន ទី២ . ភូមិ ឯកភាពប៉ើងដំបូល៣ខ្នង ចំណុះឲ្យ គ៣ នៃចំណុច ចមួយ ខូចខាតផ្ទះទាំងស្រុងរបស់ស្នាក់ការមួយខ្នង ខូចវិទ្យុទាក់ទងសង់ស្រាល់ និង បាក់អង់តែនមួយគ្រឿង រួមទាំងរលំ និង បាក់ដើមកៅស៊ូមួយចំនួន ទី៣. ភូមិសង្គមថ្មីប៉ើងដំបូល២ខ្នង ព្រមទាំងចំការកៅស៊ូត្រូវខ្យល់បោកបក់ដួលរលំ និង បាក់មួយចំនួនផងដែរ។ លោក បន្តថាករណីនេះមិនបណ្ដាលឲ្យមនុស្សរងរបួសឬគ្រោះថ្នាក់អ្វីឡើយ ហើយអាជ្ញាធរប៉ុស្ដិ៍រដ្ឋបាល រួមជាមួយនគរបាលការពារព្រំដែនកំពុងចុះតាមមូលដ្ឋានដើម្បីស្រង់ស្ថិតិបន្ថែមទៀត៕
លានគ្រន
មូរ សុខហួរ មានពេលមួយខែទៀតទើបទទួលបានអភ័យឯកសិទ្ធិប្រសិនបើគ្មានបណ្តឹង
ភ្នំពេញ ៖ លោកស្រី មូរ សុខហួរ អ្នកតំណាងរាស្ត្រមណ្ឌលកំពតមកពីគណបក្សប្រឆាំង សម រង្ស៊ី មានពេលមួយខែទៀតទើបទទួលបានអភ័យឯកសិទ្ធិប្រសិនបើគ្មានបណ្តឹង ដែលការសំរេចបែបនេះ ធ្វើឡើងនៅក្នុងសវនារយៈពេលខ្លីមួយនាព្រឹកថ្ងៃទី០៣ខែសីហាឆ្នាំ២០១២ នៅតុលាការសាលាឧទ្ធរណ៍។
លោកស្រី មូរ សុខហួរ បានថ្លែងប្រាប់អ្នកការសែតក្រោយពីបញ្ចប់សវនាការថា ការសំរេចរបស់សភាស៊ីបសួរនៃសាលាឧទ្ធរណ៍នេះ គឺជាការសំរេចដ៏ត្រឹមត្រូវ ដែលអាចទទួលយកបាន ហើយនៅក្នុងរយៈពេលមួយខែនេះ លោកស្រីនៅតែបំពេញតួនាទីជាអ្នកតំណាងរាស្ត្រ ព្រោះរាស្ត្របោះឆ្នោតឲ្យ មិនមែនឲ្យមកនៅស្ងៀមបិទមាត់ទេ លោកស្រីមិនស្តាប់អ្នកណាក្រៅពីរាស្ត្រទេ ។
លោកស្រីបញ្ជាក់ថា បានរង់ចាំយុត្តិធម៌អស់រយៈពេលជិតបីឆ្នាំមកហើយ ហើយបានកាត់ប្រាក់បៀវត្សរបស់លោកស្រីអស់១៦,៥ លាន ។
សូមបញ្ចាក់ថា លោកស្រី មូរ សុខហួរ កាលពីឆ្នាំ២០១១ ត្រូវបានប្រធានមជ្ឈមណ្ឌលអប់រំព្រៃស្ពឺ ប្តឹងថាបានរំដោះពលរដ្ឋបុរីកីឡាពីមជ្ឈមណ្ឌល ហើយតុលាការមិនទាន់ចាត់ការយ៉ាងណានៅឡើយ ហើយនៅក្នុងសវនាការនាព្រឹកនេះ ក៏បានលើកឡើងពីបញ្ហាបណ្តឹងនៅព្រៃស្ពឺនេះដែរ តើលោកស្រីមានឱកាសទទួលបានអភ័យឯកសិទ្ធិប៉ុណ្ណា៕កោះកែវ
សមាគមនិស្សិតមូស្លីមកម្ពុជាចែកអំណោយជូនពលរដ្ឋខ្មែរអ៊ិស្លាមក្រីក្រខែរ៉ាម៉ាដាន
ខេត្តកំពង់ចាម ៖ សមាគមនិស្សិតមូស្លីមកម្ពុជា កាលពីថ្ងៃទី៣០ កក្កដា ឆ្នាំ២០១២ បាននាំយកអំណោយរបស់អង្គការមូស្លីមហេលហ្វិននៃប្រទេសអាល្លឺម៉ង់ ទៅចែកជូនប្រជាពលរដ្ឋខ្មែរអ៊ិស្លាមក្រីក្រ និងចាស់ជរាចំនួន៥៨០គ្រួសារ រស់នៅស្រុកកងមាស និងស្រុកពញាក្រែក ដោយមានការអញ្ជើញចុះចែកផ្ទាល់ពីសំណាក់លោកវេជ្ជបណ្ឌិតសុះ មុះសិន រដ្ឋលេខាធិការ ក្រសួងធម្មការនិងសាសនា និងជាប្រធានសមាគមនិស្សិតមូស្លីមកម្ពុជា ។
ចូលរួមក្នុងពិធីនោះមានលោកសាន់ សាប់អុីអនុរដ្ឋលេខាធិការក្រសួងសុខាភិបាល និងជាអនុប្រធានសមាគម លោកម៉ាន សុគ្រី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទនិងលោកពាស់ មូស្លីម អនុប្រធានសមាគមនិស្សិតមូស្លីមកម្ពុជា ។ ការនាំអំណោយយកទៅចែកជូនដល់ប្រជាពលរដ្ឋខ្មែរអ៊ិស្លាមនេះ នៅព្រឹកថ្ងៃទី៣០ កក្កដា ចែកជូនដល់ប្រជាពលរដ្ឋចំនួន២៨០គ្រួសារនៅឃុំអង្គរបាន និងឃុំរកាគយ ស្រុកកងមាស និងពេលល្ងាចចែកជូនដល់ប្រជាពលរដ្ឋចំនួន៣០០គ្រួសារ នៅឃុំដា ស្រុកមេមត់ និងឃុំជីមាន់ ស្រុកពញាក្រែក ។
លោកវេជ្ជបណ្ឌិតសុះ មុះសិន បានឱ្យដឹងថា អំណោយដែលនាំយកមកចែកជូនដល់ប្រជាពលរដ្ឋខ្មែរអ៊ិស្លាមក្រីក្រនៅពេលនេះជាអំណោយរបស់អង្គការមូស្លីម ហេលហ្វិននៃប្រទេសអាល្លឺម៉ង់ ផ្តល់តាមរយៈសមាគមនិស្សិតមូស្លីមកម្ពុជា ដែលក្នុង១គ្រួសារៗទទួលបាន អង្ករ១៨គីឡូក្រាម មីចំនួន១៥កញ្ចប់ ស្ករស៤គីឡូក្រាម ត្រីខ៥កំប៉ុង ទឹកស៊ីរ៉ូ២ដប អូវ៉ាល់ទីន២ដប ទឹកដោះគោ២កំប៉ុង តែ៤កញ្ចប់ និងអំបិល២គីឡូក្រាម។
លោកវេជ្ជបណ្ឌិតសុះ មុះសិន ថ្លែងទៀតថា ការបួសរបស់សាសនិកអ៊ិស្លាមនេះជាកាតព្វកិច្ចមួយក្នុងចំណោមកាតព្វតិច្ចទាំង៥របស់សាសនាអ៊ិស្លាម ដែលបួសក្នុង១ខែរ៉ាម៉ាដាន និងជាខែទី៩របស់សាសនាអ៊ិស្លាម ។ អ្នកបួសចាប់ពីពេញវ័យទៅ គឺតមពេលថ្ងៃចាប់ពីម៉ោង៤និង២០នាទីទៀបភ្លឺរហូតដល់ម៉ោង៦និង៣០នាទីល្ងាច ដោយអត់អាហារ និងទឹកសូម្បីតែទឹកមាត់ក៏មិនឱ្យលេបដែរ។ ក្រៅពីនេះតមពាក្យសម្តី អត់ធ្មត់ និងជួយគ្នាទៅវិញទៅមក ជាពិសេសទៀតសាសនិកអ៊ិស្លាមបរិច្ចាគទានធ្វើបុណ្យទើបបានបុណ្យច្រើន ។
លោកវេជ្ជបណ្ឌិតបានបន្តទៀតថា ហេតុដូចនេះហើយបានជានៅក្នុងខែរ៉ាម៉ាដាននេះសាសនិកអ៊ិស្លាមកម្ពុជាបានទទួលអំណោយជាបន្តបន្ទាប់ពីសប្បុរសជនក្នុងប្រទេសនិងនៅក្រៅប្រទេសយកមកចែកជូនដល់ប្រជាពលរដ្ឋក្រីក្រ ចាស់ជរា ជនពិការដែលមានជីវភាពខ្វះខាត ដើម្បីឱ្យពួកគាត់មានលទ្ធភាពទិញអាហារថែបំប៉ននៅពេលយប់ ។ ដោយឡែកនៅឆ្នាំនេះសមាគមនិស្សិតមូស្លីមកម្ពុជាបានទទួលអំណោយជាថវិកាពីអង្គការមូស្លីមហេលហ្វិននៃប្រទេសអាល្លឺម៉ង់ ដើម្បីទិញគ្រឿងឧបភោគបរិភោគមកចែកជូនដល់សាសនិកអ៊ិស្លាមសម្រាប់៣ខេត្តក្នុងនោះរាជធានីភ្នំពេញចំនួន៣០០គ្រួសារ ខេត្តកំពង់ធំចំនួន២៥០គ្រួសារ និងខេត្តកំពង់ចាមដែលនាំមកចែកជូននៅពេលនេះ ។
លោកវេជ្ជបណ្ឌិតបានបញ្ជាក់ថា រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី បានយកចិត្តទុកដាក់យ៉ាងខ្លាំងដល់ប្រជាពលរដ្ឋ ដោយផ្តល់សិទ្ធិគ្រប់បែបយ៉ាងក្នុងការជឿលើសាសនា ហេតុនេះបានធ្វើឱ្យគ្រប់ជាតិសាសន៍ និងសាសនាទាំងអស់រស់នៅជាមួយគ្នាយ៉ាងសុខដុមរមនា ។ លោកវេជ្ជបណ្ឌិតសុះ មុះសិន ក៏បានថ្លែងអំណរគុណយ៉ាងជ្រាលជ្រៅដល់សប្បុរសជនក៏ដូចជាអង្គការនានា ដែលតែងតែផ្តល់អំណោយដល់សហគមន៍អ៊ិស្លាម ជាការចួលរួមអភិវឌ្ឍន៍ប្រទេសកម្ពុជាឱ្យកាន់តែរីកចម្រើនថែមទៀត ៕
តំណាងពិសេសរបស់រដ្ឋមន្ត្រីការបរទេសសហរដ្ឋអាមេរិកចាប់អារម្មណ៍លើការអប់រំដល់សហគមន៍អ៊ិស្លាមនៅកម្ពុជា
រាជធានីភ្នំពេញ ៖ នៅក្នុងកិច្ចសម្ភាសន៍ពិសេសមួយជាមួយកោះសន្តិភាពកាលពីថ្ងៃទី២ សីហា ២០១២ នៅសណ្ឋាគារឡឺរ៉ូយ៉ាល់ លោកស្រីហ្វារាដ ផាន់ឌីត (Farah Pendith) តំណាងពិសេសក្រសួងការបរទេសសហរដ្ឋអាមេរិកទទួលបន្ទុកកិច្ចការអ៊ិស្លាមបាននិងកំពុងយកចិត្តទុកដាក់លើសហគមន៍សាសនានានាក្នុងពិភពលោកក្នុងនោះមានសហគមន៍អ៊ិស្លាមផងដែរ ដើម្បីផ្តល់ការអប់រំដល់ពួកគេនៅក្នុងសហគមន៍។
ក្នុងរយៈពេលបំពេញបេសកកម្មពីរថ្ងៃនៅកម្ពុជាលោកស្រី ហ្វារាដ ផាន់ឌីត បានជួបជាមួយសហគមន៍អ៊ិស្លាមជាច្រើននៅកម្ពុជា ខណៈពេលដែលពលរដ្ឋកាន់សាសនាអ៊ិស្លាមទាំងអស់ក្នុងពិភពលោកកំពុងតែប្រារព្ធពិធីបុណ្យរ៉ាម៉ាដន ទូទាំងពិភពលោក ។ លោកស្រីបន្តថា លោកប្រធានាធិបតីសហរដ្ឋអាមេរិកបារ៉ាក់ អូប៉ាម៉ា និងលោកស្រីរដ្ឋមន្ត្រីក្រសួងការបរទេស ហ៊ីលឡារី គ្លីនតុន ក៏បានយកចិត្តទុកដាក់ចំពោះសហគមន៍អ៊ិស្លាមក៏ដូចជាសហគមន៍ដែលកាន់សាសនាដទៃទៀតដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
លោកនាយឧត្តមសេនីយ៍ មាស សុភា នាំអំណោយចែកជូន និងចុះសួរសុខទុក្ខ ក្រុមនិស្សិត វាស់វែងដីធ្លី
ខេត្តព្រះវិហារ ៖ ថ្ងៃទី២ សីហា ២០១២ លោកនាយឧត្តមសេនីយ៍ មាស សុភា ប្រធានក្រុមការងារគណបក្សប្រជាជនកម្ពុជាថ្នាក់កណ្តាលចុះជួយខេត្តព្រះវិហារ បានដឹកនាំប្រតិភូក្រុមការងារចុះសួរសុខទុក្ខ និងនាំយកអំណោយចែកដល់ក្រុមយុវជនស្ម័គ្រចិត្តរបស់សម្តេចតេជោកំពុងបំពេញបេសកកម្មវាស់វែងដីធ្លីជូនប្រជាពលរដ្ឋក្នុងខេត្តព្រះវិហារ ដោយមានការចូលរួមពីលោកអ៊ុំ ម៉ារ៉ា អភិបាលខេត្ត ។
ក្នុងឱកាសនោះលោកយី ម៉ៅ តំណាងក្រុមនិស្សិតប្រចាំខេត្តព្រះវិហារ ឈរជើងក្នុងវត្តភូមិស្រយ៉ង់ ឃុំស្រយ៉ង់ ស្រុកគូលែន ជំនួសមុខឱ្យក្រុមនិស្សិតទាំងអស់បានមានមតិស្វាគមន៍ដល់ប្រតិភូដែលបានយកចិត្តទុកដាក់ក្នុងការជួយផ្គត់ផ្គង់ដល់ក្រុមនិស្សិត ។ ជាពិសេសសូមថ្លែងអំណរគុណដ៏ជ្រាលជ្រៅចំពោះសម្តេចតេជោ និងលោកជំទាវកិត្តិព្រឹទ្ធបណ្ឌិតដែលជានិច្ចកាលសម្តេច និងលោកជំទាវតែងតែយកចិត្តទុកដាក់ដល់ក្រុមនិស្សិតដែលកំពុងបំពេញបេសកកម្មក្នុងការងារវាស់វែងដីធ្លីជូនប្រជាពលរដ្ឋ ។
លោកនាយឧត្តមសេនីយ៍ មាស សុភា ក៏បានថ្លែងកោតសរសើរដល់ប្អូនៗក្មួយៗ និងបានផ្តល់អនុសាសន៍ដល់ក្មួយៗនិស្សិតធ្វើយ៉ាងណាត្រូវបន្តសកម្មភាពវាស់វែងដីធ្លីជូនប្រជាពលរដ្ឋឱ្យទទួលបានជោគជ័យ។ អំណោយដែលលោកនាយកឧត្តមសេនីយ៍ នាំយកទៅចែកដល់ក្រុមនិស្សិតចំនួន៨ក្រុម ស្មើ៩៦នាក់ និងក្រុមបច្ចេកទេសក្នុងក្រុមនីមួយៗផងនោះ សរុបប្រមាណ២០០នាក់ ក្នុងម្នាក់ទទួលបានថវិកា១០ម៉ឺនរៀល និងគ្រឿងឧបភោគបរិភោគជាច្រើនទៀត ។ ចំណែកលោកអ៊ុំ ម៉ារ៉ា បានជួយឧបត្ថម្ភបន្ថែមដល់ក្រុមនិស្សិត និងក្រុមការងារក្នុងម្នាក់ថវិកា១០ម៉ឺនរៀលផងដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
លោករដ្ឋមន្ត្រី មិន ឃិន ផ្តល់ផ្លូវលំ៤ខ្សែនៅឃុំត្រើយស្លា និងប្រគេនទៀនវស្សា ទេយ្យវត្ថុ
ខេត្តកណ្តាល ៖ ដោយមើលឃើញពីការលំបាកក្នុងការធ្វើដំណើររបស់ប្រជាពលរដ្ឋលោករដ្ឋមន្ត្រីក្រសួងធម្មការ និងសាសនា មិន ឃិន ប្រធានក្រុមការងារចុះជួយឃុំត្រើយស្លា និងលោកស្រី ងួន ធួន អមដំណើរដោយក្រុមការងារជាច្រើននាក់ទៀតបានអញ្ជើញទៅធ្វើពិធីបើកការដ្ឋានផ្លូវលំចំនួន៤ខ្សែដោយ២ខ្សែនៅភូមិព្រែកប៉ាន មានប្រវែង២.២០០ម៉ែត្រ និង២ខ្សែទៀតនៅភូមិព្រែកមានប្រវែង២.១០០ម៉ែត្រ ដោយប្រើថ្មម៉ិក និងចំណាយថវិកាចំនួន១ម៉ឺន៥ពាន់ដុល្លារសហរដ្ឋអាមេរិក ។
ការប្រារព្ធពិធីបើកការដ្ឋាននេះធ្វើឡើងនៅក្នុងភូមិព្រែកប៉ាន ឃុំត្រើយស្លា ស្រុកស្អាង ខេត្តកណ្តាល និងមានប្រជាពលរដ្ឋចូលរួមទាំងពីរភូមិចំនួន៤០០នាក់កាលពីព្រឹកថ្ងៃទី២ សីហា ២០១២ ។ លោករដ្ឋមន្ត្រី មិន ឃិន ប្រធានគណៈពង្រឹងចុះជួយមូលដ្ឋានឃុំត្រើយស្លា មានប្រសាសន៍ថា ការផ្តល់ជូនផ្លូវចំនួន៤ខ្សែនេះ គឺជាការចូលរួមចំណែកមួយយ៉ាងធំធេងជាមួយប្រជាពលរដ្ឋទាំងពីរភូមិ ដើម្បីបង្កលក្ខណៈងាយស្រួលក្នុងការដឹកជញ្ជូនកសិផលពីស្រែចម្ការមកកាន់ទីផ្សារសំដៅលើកស្ទួយជីវភាពរស់នៅរបស់ប្រជាពលរដ្ឋឱ្យមានជីវភាពធូរធារ ។
លោកប្រធានគណៈពង្រឹងចុះជួយមូលដ្ឋានឃុំត្រើយស្លា មានប្រសាសន៍អំពាវនាវឱ្យប្រជាពលរដ្ឋទាំងអស់អញ្ជើញទៅចុះឈ្មោះ និងពិនិត្យឈ្មោះបោះឆ្នោតនៅថ្ងៃទី១ តុលា ២០១២ ខាងមុខនេះ ដើម្បីឈានទៅរកការបោះឆ្នោតជ្រើសរើសនាយករដ្ឋមន្ត្រីសម្រាប់អាណត្តិទី៥ ដើម្បីបន្តការដឹកនាំប្រទេសឱ្យមានភាពរីកចម្រើនដូចសព្វថ្ងៃនេះ។
តមកក្រុមការងារគណៈពង្រឹងចុះជួយមូលដ្ឋានឃុំត្រើយស្លា បាននាំយកទៀនវស្សា និងទេយ្យវត្ថុមួយចំនួនទៅវេរប្រគេនដល់ព្រះសង្ឃដែលគង់ចាំព្រះវស្សាក្នុងព័ទ្ធសីមាវត្ត៣ គឺវត្តកេតុឧត្តម, វត្តពោធិ៍អណ្តែត និងវត្តស្លាកែត ដោយវត្តនីមួយៗទទួលបានទៀនវស្សា១គូ, សាដក១, ទឹកក្រូច១កេស, មី២កេស, ទឹកបរិសុទ្ធ១កេស, ទឹកត្រី ១យួរ, ទឹកស៊ីអីុវ១យួរ, អង្ករ៥០គីឡូក្រាម និងបច្ច័យ១៣ម៉ឺនរៀល ជូនតាជី យាយជីចំនួន១០០នាក់ ក្នុងម្នាក់ៗទទួលបានថវិកា៥ពាន់រៀល ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
សាកលវិទ្យាល័យឡាហ្វយ បើកសិក្ខាសាលាស្តីពីការផ្លាស់ប្តូរបទពិសោធន៍អប់រំវេជ្ជសាស្ត្រ
ខេត្តព្រះសីហនុ ៖ នៅសាលប្រជុំនៃសាកលវិទ្យាល័យឡាហ្វយ នាព្រឹកថ្ងៃទី២ សីហា ២០១២ បានរៀបចំសិក្ខាសាលាមួយស្តីពីការផ្លាស់ប្តូរបទពិសោធន៍អប់រំ វេជ្ជសាស្ត្រដែលរៀបចំឡើងដោយនាវាមន្ទីរពេទ្យ USNS MERCY ដែលចូលចតនៅកំពង់ផែអន្តរជាតិខេត្តព្រះសីហនុ កាលពីថ្ងៃទី២៨ កក្កដា កន្លងទៅ សហការជាមួយសាកលវិទ្យាល័យឡាហ្វយ ដោយចាប់ផ្តើមពីថ្ងៃទី២ រហូតដល់ថ្ងៃទី៤ សីហា ២០១២ ។
សិក្ខាសាលាប្រព្រឹត្តទៅក្រោមអធិបតីភាពលោកកែវ វិបុល អនុប្រធានមន្ទីរសុខាភិបាលខេត្ត និងជាប្រធានមន្ទីរពេទ្យបង្អែកខេត្ត លោក David Koo សាកលវិទ្យាធិការនៃសាកលវិទ្យាល័យឡាហ្វយ លោកអនុសេនីយ៍ទោ Hue Sy មេបញ្ជាការរងនាវាមន្ទីរពេទ្យ USNS MERCY លោកស្រី ជីង សុង (Chins.Sung) ព្រឹទ្ធបុរសនៃមហាវិទ្យាល័យគិលានុបដ្ឋាក និងឆ្មបនៃសាកលវិទ្យាល័យឡាហ្វយ ព្រមទាំងមានការអញ្ជើញចូលរួមពីសំណាក់លោកវេជ្ជបណ្ឌិតមកពីខេត្តតាកែវ ខេត្តព្រះសីហនុ វេជ្ជបណ្ឌិតនៅលើនាវាមន្ទីរពេទ្យ USNS MERCY សហរដ្ឋអាមេរិក និស្សិត និងឆ្មបនៃសាកលវិទ្យាល័យឡាហ្វយយ៉ាងច្រើនកុះករ ។
លោក David Koo បានមានប្រសាសន៍ឱ្យដឹងថា លោកមានមោនទភាពណាស់ដែលសមាជិកនៃក្រុមនាវាមន្ទីរពេទ្យ USNS MERCY សហរដ្ឋអាមេរិកប្រចាំតំបន់ប៉ាស៊ីហ្វិកអញ្ជើញចូលរួមបើកសិក្ខាសាលានៅសាកលវិទ្យាល័យឡាហ្វយនាពេលនេះ គឺដើម្បីស្វែងរកគន្លឹះផ្លាស់ប្តូរបទពិសោធន៍ល្អៗពីគ្នាទៅវិញទៅមក ហើយក៏ជាការផ្តល់ផ្ទេរចំណេះដឹងដល់ក្មួយៗនិស្សិតនៃមហាវិទ្យាល័យគិលានុបដ្ឋាក និងឆ្មបសម្រាប់ជាទុនឱ្យក្មួយៗយកទៅអនុវត្តក្នុងការងារផ្នែកសុខាភិបាលនៅប្រទេសកម្ពុជា។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
Subscribe to:
Posts (Atom)