ភ្នំពេញ ៖ នៅក្នុងលិខិតដ៏តូចស្ដើងកម្រាស់៤ទំព័រ បុគ្គលិក និងក្រុមគ្រូបង្រៀននៅក្នុងវិទ្យាល័យ ព្រះស៊ីសុវត្ថិ បានសរសេររៀបរាប់យ៉ាងក្បោះក្បាយអំពីការដឹកនាំរបស់នាយកវិទ្យាល័យព្រះស៊ីសុវត្ថិ គឺលោក មូល ស៊ុយហេង ដែលបញ្ជាក់ថា បន្ទាប់ពីគាត់មានបង្អែកថ្នាក់ដឹកនាំមន្ទីរ ក្រសួងអប់រំ និងជាសែស្រឡាយរបស់សមាជិកព្រឹទ្ធសភាផងនោះ ការគ្រប់គ្រងវិទ្យាល័យព្រះស៊ីសុវត្ថិ មានភាពមិនប្រក្រតីជាច្រើនពាក់ព័ន្ធទៅនឹងអំពើពុកររលួយ និងធ្វើការគាប សង្កត់ទៅលើសិស្សបង្ខំឱ្យបង់ប្រាក់ជាដើម ។
នៅក្នុងលិខិតនេះ បុគ្គលិកបាននិយាយថា អំពីភាពមិនប្រក្រតីត្រង់លោកនាយកសាលារូបនេះបានយកបរិវេណទីធ្លា វិទ្យាល័យព្រះស៊ីសុវត្ថិ ដែលជាទ្រព្យសម្បត្ដិសាធារណៈរបស់រដ្ឋទៅជួលឱ្យធនាគារឯកជនសម្រាប់ធ្វើជាចំណតរថយន្ដ អចិន្ដ្រៃយ៍ ។ ដែលការជួលទីតាំងរបស់រដ្ឋបែបនេះគឺជាអំពើខុសច្បាប់ភូមិបាលឆ្នាំ២០០១ ប៉ុន្ដែអាចនឹងមានករណី ពាក់ព័ន្ធជាមួយនឹងថ្នាក់ដឹកនាំមន្ទីរអប់រំ យុវជន និងកីឡា រាជធានីភ្នំពេញ ។
ចំណុចដែលកំពុងបង្កើតឱ្យមានអំពើពុករលួយនៅក្នុងការគ្រប់គ្រងវិទ្យាល័យព្រះស៊ីសុវត្ថិ បុគ្គលិក និងក្រុមគ្រូបង្រៀន បានលើកឡើងពីបញ្ហាដែលលោក មូល ស៊ុយហេង យកលុយពីសិស្សដូរថ្នាក់ យ៉ាងហោចណាស់ក៏ក្នុងម្នាក់១០ទៅ២០ ដុល្លារ មុនពេលបើកបវេសនកាល ។ ម្យ៉ាងទៀតចំណូលនេះអាចរកបានរាប់សិបម៉ឺនដុល្លារឯណោះ សម្រាប់ការដូរថ្នាក់ ដល់សិស្សកន្លងទៅ ក៏ដូចជាសកម្មភាពកំពុងប្រព្រឹត្ដនេះ ។ ក្រុមបុគ្កលិក និងគ្រូបង្រៀនបានលើកឡើងថា អ្វីដែលទាញយកផលប្រយោជន៍ពីការដូរថ្នាក់សម្រាប់សិស្សថ្នាក់ទី១០ ទី១១ និងទី១២ លោក មូល ស៊ុយហេង ប្រើល្បិច ច្របល់សិស្សគ្រប់ថ្នាក់ ក្រោមលេសជ្រើសរើសមុខវិជ្ជាវិទ្យាសាស្ដ្រ និងសង្គម ។
នៅពេលប្រជុំផ្សព្វផ្សាយរឿងជ្រើសរើសមុខវិជ្ជានេះ លោក មូល ស៊ុយហេង បានធ្វើការងារនេះផ្ទាល់ជាមួយសិស្ស តែម្ដង អត់បែងចែកឱ្យនាយករងទទួលបន្ទុកថ្នាក់ទេ សម្រាប់ធ្វើការជាមួយគាត់ ។ នៅពេលនេះប្រធានថ្នាក់ចាប់ផ្ដើម មានទំនាក់ទំនងជាមួយលោក មូល ស៊ុយហេង តាមរយៈការផ្ដល់លេខទូរស័ព្ទទៅវិញទៅមករវាងនាយកនិងប្រធាន ថ្នាក់រួចហើយជាបណ្ដើរ ដែលការធ្វើបែបនេះលោកនាយកវិទ្យាល័យព្រះស៊ីសុវត្ថិ បានឱ្យប្រធានថ្នាក់នីមួយៗក្លាយជា ភ្នាក់ងារប្រមូលលុយពីសមាជិកសិស្សក្នុងថ្នាក់ណាដែលចង់រៀនជាមួយគ្នានៅឆ្នាំក្រោយ ដើម្បីយកប្រាក់ទាំងនោះមក ប្រកល់ឱ្យលោក មូល ស៊ុយហេង សម្រាប់ការដោះដូរថ្នាក់យ៉ាងតិចក្នុងម្នាក់ពី១០ទៅ២០ដុល្លារ ។ ករណីដូរថ្នាក់នេះ ផងដែរ មានសិស្សខ្លះដោះដូររហូតដល់៥ដងក៏មាន ព្រោះទិដ្ឋភាពវិទ្យាល័យព្រះស៊ីសុវត្ថិពេលនេះមានការឃោសនា អំពីបញ្ហាគ្រូ ដូចជាលើកឡើងថា គ្រូនេះអញ្ចេះ គ្រូនេះអញ្ចុះ ច្របូលច្របល់ពេញសាលា ទើបសិស្សនាំគ្នាដូរថ្នាក់ ឬក៏ ចង់ទៅរៀនជួបជុំមិត្ដភក្ដិជាដើម ។
បុគ្គលិកបានលើកឡើងទៀតថា នៅឆ្នាំនេះគេបានឃើញលោក មូល ស៊ុយហេង ធ្វើសកម្មភាពតាំងពីចុងខែកក្កដានេះ តែម្ដង ព្រោះខែសីហាជាប់ការងារប្រឡងមធ្យមសិក្សាទុតិយភូមិ ។ ចំពោះការប្រឡងឆមាសថ្នាក់ទី១២សម្រាប់ សិស្សសាលាឯកជនដែលសុទ្ធតែជាកូនអ្នកធំ និងកូនអ្នកមានលុយធ្វើនៅវិទ្យាល័យព្រះស៊ីសុវត្ថិ ។ រឿងនេះលោក មូល ស៊ុយហេង ប្រើល្បិចរឹតត្បិតសិស្សសាលាឯកជនខ្លាំងក្លាជាងពេលប្រឡងមធ្យមសិក្សាទុតិយភូមិថ្នាក់ជាតិទៅទៀត ។ ការរឹតត្បិតនេះមិនមែនដើម្បីដំណើរការប្រឡងឆមាសបានល្អនោះទេ គឺរឹតបន្ដឹងឱ្យសិស្សសាលាឯកជនធ្វើខុសច្រើន ដើម្បីឱ្យមានការសូកប៉ាន់រឿងពិន្ទុតែប៉ុណ្ណោះ ព្រោះលោក មូល ស៊ុយហេង យល់ថា សិស្សសាលាឯកជនដែលជាកូន អ្នកធំ និងកូនអ្នកមានមានលទ្ធភាពគ្រប់គ្រាន់សម្រាប់ជាលទ្ធផលនិទ្ទេសការប្រឡងនោះ ។
បុគ្គលិកបានបញ្ជាក់ថា ចំពោះពិន្ទុនិទ្ទេសល្អបង្គួរត្រូវចំណាយ៥០ដុល្លារ និងនិទ្ទេសល្អចំណាយ១០០ដុល្លារ ។ នេះបើ តាមការឱ្យដឹងពីអ្នកស៊ីឈ្នួលរត់ការពិន្ទុដែលលោក មូយ ស៊ុយហេង កំពុងទាញបានផលប្រយោជន៍លើបញ្ហានេះ ។
ពាក់ព័ន្ធទៅនឹងការចោទប្រកាន់នេះ កាលពីព្រឹកថ្ងៃទី២០ខែសីហាឆ្នាំ២០១២ តាមទូរស័ព្ទ លោក មូល ស៊ុយហេង នាយកវិទ្យាល័យព្រះស៊ីសុវត្ថិមិនបានបកស្រាយជុំវិញបញ្ហាខាងលើនេះទេ ដោយលោកប្រាប់ នគរវត្ដថា កំពុងជាប់ រវល់នៅក្រសួង ប៉ុន្ដែលោកចង់ដឹងពីលិខិតទាំងនោះ រួចក៏បិទទូរស័ព្ទ ។
ដោយឡែក លោក ជា ជាតិ ប្រធានមន្ទីរអប់រំ យុវជន និងកីឡា រាជធានីភ្នំពេញ បានប្រាប់នគរវត្ដតាមទូរស័ព្ទថា រឿងនេះលោកកំពុងតែឱ្យមន្ដ្រីចុះអធិការកិច្ច ដូច្នេះ គួរតែកុំទាន់ធ្វើការចុះផ្សាយ ដែលលោកប្រធានមន្ទីរចាត់ទុកថា រឿងខ្លះកំពុងតែតាមដាន ។
នៅក្នុងលិខិតចំនួន៤ទំព័រ ដែលលើកឡើងអំពីការគ្រប់គ្រងរបស់នាយកវិទ្យាល័យព្រះស៊ីសុវត្ថិ គឺលោក មូល ស៊ុយហេង បានលាតត្រដាងនូវភាពមិនប្រក្រតីជាច្រើន ប៉ុន្ដែខណៈនេះ នគរវត្ដ សុំលើកយកប្រមាណ២០ភាគរយ ប៉ុណ្ណោះពីក្នុងលិខិត ដើម្បីទុកលទ្ធភាពឱ្យក្រុមអធិការកិច្ចចុះស្រាវជ្រាវដូចអ្វីដែលលើកឡើងជាសំណូមពររបស់លោកប្រធាន មន្ទីរ អប់រំ យុវជន និងកីឡា កាលពីព្រឹកថ្ងៃទី២០ ខែសីហា ឆ្នាំ២០១២នោះ ។
បុគ្គលិកបានលើគឡើងអំពីមហិច្ឆតាលោភលន់អំណាចតាំងពីឆ្នាំ២០០៥មកម្ល៉េះ ដែលលោក មូល ស៊ុយហេង ព្យាយាម រត់ការយកតំណែងជាប្រធានមន្ទីរការងារ និងប្រធានមន្ទីរអប់រំ(កូតាហ្វ៊ុនស៊ិនប៉ិច) ប៉ុន្ដែមិនទទួលបានលទ្ធផល សុខ ចិត្ដយកតំណែងនាយកវិទ្យាល័យព្រះស៊ីសុវត្ថិ ដែលមានឱកាសច្រើនផងដែរ រហូតដល់ថ្នាក់លើទទួលស្គាល់ ពេញចិត្ដ មានចំណុចខ្លះលាក់លៀមផងដែរ រាល់ភាពមិនប្រក្រតីចំពោះលោក មូល ស៊ុយហេង និងមិនចាត់ការចំពោះការទាមទារណាមួយពីបុគ្គលិក និងគ្រូបង្រៀនក្នុងវិទ្យាល័យ ៕
