បទបង្ហាញស្តីពីបញ្ហាព្រំដែនកម្ពុជា‑ វៀតណាម ដោយសម្តេចតេជោ ហ៊ុន សែន រយៈពេលជាង៥ម៉ោងនៅរដ្ឋសភា កាលពីថ្ងៃទី៩ ខែ សីហា ឆ្នាំ ២០១២ ប្រៀបបានទៅនឹងបំណាក់ផ្ទាំងថ្មភ្នំដ៏ធំសង្កត់លើក្រុមប្រឆាំងឱ្យដួលផ្ងាក ងើបខ្លួនលែងរួច ហើយអំនួតរបស់ពួកគេនាពេលកន្លងមកដែលយកបញ្ហាព្រំដែន ក្នុងការកេងចំណេញនយោបាយក៏ត្រូវបានបញ្ចប់។
អស់ពេលជាច្រើនអាណត្តិមកហើយ
បក្សប្រឆាំង និងអង្គការសង្គមស៊ីវិលមួយចំនួន ក្នុងនិងក្រៅប្រទេស
បានខិតខំនិយាយបំប៉ោងអំពីបញ្ហាព្រំដែន ដោយចោទប្រកាន់ថា រាជរដ្ឋាភិបាលកម្ពុជា បានកាត់ទឹកដីឲ្យទៅប្រទេសជិតខាង
ហើយបានបណ្តែតបណ្តោយឲ្យវៀតណាម រំកិលបង្គោលទ្បាក់
ចូលក្នុងដីកម្ពុជាជាច្រើនរយគីទ្បូម៉ែត្រក្រឡាទៀតផង។
ការពិតបញ្ហាព្រំដែន មិនមែនជារឿងថ្មីដែលទើបនឹងកើតមានម្សឹលមិញ
ឬក៏មួយថ្ងៃពីរកន្លងមកនេះទេ គឺក្រុមប្រឆាំងបានខិតខំបំភ្លេចកត្តាប្រវត្តិសាស្រ្តចោលទាំងស្រុង
និងបានមើលរំលងពីសមិទ្ធផលដ៏ធំធេងដែលរាជរដ្ឋាភិបាលសព្វថ្ងៃសម្រេចបាន ។ ផ្ទុយទៅវិញ ក្រុមប្រឆាំងបានជ្រើសរើសយកល្បែងនេះ
មកដណ្តើមប្រជាប្រីយភាព និងការកេងនយោបាយជាបន្តបន្ទាប់។
ដូចសម្តេចតេជោ បានមានប្រសាសន៍ហើយថា
ការងារបោះបង្គោលខណ្ឌសីមាព្រំដែន គឺសម្តេច បានយកផែនទីខ្នាត១ លើ១០០ពាន់
ដែលអតីតព្រះមហាក្សត្រ សម្តេចនរោត្តម សីហនុ បានយកទៅតម្កល់ទុកនៅអង្គការសហប្រជាជាតិកាលពីឆ្នាំ
១៩៦៤ មកអនុវត្ត។
វាពិតជាមានភាពសាំញ៉ាំ និងពិបាកជាទីបំផុត
នៅពេលដែលប្រជាពលរដ្ឋដែលមានដីជាប់នឹងព្រំដែន គឺពួកគាត់បានប្រកាន់មាំ
ថា ជាទឹកដី ឬក៏ចាត់ទុកថាជាកម្មសិទ្ធិស្របច្បាប់របស់ពួកគាត់
ដែលមិនអាចត្រូវបានដកហូតវិញនោះទេ ។ ប៉ុន្តែ
ការកាន់កាប់ដីពីដូនតាមកនោះ គឺមិនអាចត្រូវគ្នាជាមួយនឹងផែនទី
និងការវាស់វែងជាក់ស្តែងនោះឡើយ នោះហើយ គឺជាដើមចមនៃបញ្ហា និងនាំឱ្យមានការបកស្រាយផ្សេងៗគ្នា
ហើយក៏ត្រូវបានក្រុមប្រឆាំងឆក់យកឱកាសនោះ ដើម្បីប្រយោជន៍នយោបាយ
ដោយពួកគេមិនបានផ្អែកលើទិដ្ឋភាពច្បាប់
ឬក៏មានផែនទីអ្វីយកមកជាសំអាងជាក់លាក់ទេ គឺមានតែការចោទ
ការទម្លាក់កំហុសអំពីការបាត់បងទឹកដី ការបោកបន្លំប្រជាពលរដ្ឋ
យកមកធ្វើជាមធ្យោបាយដើម្បីដណ្តើមប្រៀបឈ្នះ។
នយោបាយទុច្ចរិត អសីលធម៌ ញុះញង់ ប្រឌិតហេតុការណ៍ក្នុងចេតនាបង្កនូវអស្ថិរភាពនយោបាយ
តាមរយៈការបញ្ឆេះកំហឹងប្រជាពលរដ្ឋឲ្យមានការភន្ត័ច្រទ្បំ គឺមិនអាចថ្ពក់ទឹកចិត្តពីប្រជាពលរដ្ឋឱ្យដើរចេញពីការគាំទ្រចំពោះរាជរដ្ឋាភិបាលបានទេ
ពីព្រោះ ការចំណាយពេលអស់ជាង៥ម៉ោងនៅរដ្ឋសភាកាលពីថ្ងៃទី៩ ខែ សីហា ឆ្នាំ
២០១២ សម្តេចតេជោ បានបកស្រាយបំភ្លឺអំពីបញ្ហាព្រំដែនយ៉ាងច្បាស់លាស់
ដោយបានគាស់រំលើងទាំងកត្តាប្រវត្តិសាស្ត្រ លើកបង្ហាញទាំងផែនទី
ទាំងសកម្មភាពការងារជាក់ស្តែងរបស់ក្រុមការងារគណៈកម្មាការវាស់វែង
និងកំណត់ខណ្ឌសីម៉ា
និងបានឆ្លើយតបទៅនឹងសំនួររបស់បក្សប្រឆាំងទាំងទិដ្ឋភាពច្បាប់ និងនយោបាយ។
ការបកស្រាយអំពីបញ្ហាព្រំដែន
គឺបានទទួលការស្វាគមន៍យ៉ាងកក់ក្តៅពីប្រជាពលរដ្ឋក្នុង
និងក្រៅប្រទេសតាមរយៈការចេញញត្តិគាំទ្រនូវប្រសាសន៍ដ៏មានអត្ថន័យ និងជាប្រវត្តិសាស្ត្ររបស់សម្តេចតេជោ
ហើយបទបង្ហាញនេះក៏ត្រូវបានបោះពុម្ពជាសៀវភៅ និងបង្ហោះ
ក៏ដូចជាចុះផ្សាយនៅតាមគេហទំព័រ និងសារព័ត៌មានជាច្រើន ជាបន្តបន្ទាប់មកដល់សព្វថ្ងៃ។
សកម្មភាពទាំងនេះ
គឺបានបង្ហាញនូវការទទួលខុសត្រូវខ្ពស់បំផុតរបស់ប្រមុខរាជរដ្ឋាភិបាលចំពោះមុខប្រវត្តិសាស្ត្រ
ឆ្លើយតបទៅក្រុមប្រឆាំងដែលមិនស្គាល់អំពីកត្តាប្រវត្តិសាស្រ្ត ហើយបានបើកការវាយប្រហារខាងនយោបាយយ៉ាងធ្ងន់ធ្ងរប្រកបដោយគ្រោះថ្នាក់នោះ
គឺត្រូវបានដកពីសអស់ពីខ្លួន។
សម្តេចតេជោនាយករដ្ឋមន្ត្រី
បានមានប្រសាសន៍ថា លោកមិនអាចទទួលយកបានទេ នូវការចោទប្រកាន់របស់បក្សប្រឆាំង
ដែលបានចោទថា សម្តេចជាជនក្បត់ជាតិ កាត់ទឹកដីឲ្យវៀតណាម ពីព្រោះរហូតមកដល់ពេលនេះ
ពុំមានទឹកដីខ្មែរ ឬភូមិខ្មែរណាមួយ ត្រូវបានបាត់បង់នោះទេ
ហើយបើនិយាយពីបញ្ហាព្រំដែនទឹកវិញ គឺក្រុមការងារប្រទេសទាំងពីរ
មិនទាន់បានដោះស្រាយគ្នាចប់
ដើម្បីឈានដល់ការកំណត់បែងចែកគ្នានៅទ្បើយទេ។ ដូច្នេះ ការចោទប្រកាន់ថា
ការបាត់បង់ព្រំដែនទឹកជាង ១ ម៉ឺនគីទ្បូម៉ែត្រការ៉េ ឲ្យទៅប្រទេសវៀតណាម
គឺជារឿងមិនពិត ពោល គឺអ្នកចោទសួរធ្វើជាមិនយល់អំពីបញ្ហានេះ ហើយបើទោះបីជាខំបកស្រាយពន្យល់នូវការពិតយ៉ាងណាក៏ដោយ
ក៏សម្តេចដឹងច្បាស់ថា ពួកគេនៅតែមិនទទួលស្គាល់ការពិតដែរ ពីព្រោះវាក្លាយទៅជាចរិតនយោបាយដាច់ណាត់របស់បក្សប្រឆាំងទៅហើយ។
ការបកស្រាយរបស់សម្តេចតេជោ គឺជាការជម្រះនូវភាពមិនច្បាស់លាស់ទាំងទ្បាយ
ជុំវិញបញ្ហាព្រំដែន ឲ្យប្រជាពលរដ្ឋបានយល់កាន់តែច្បាស់
នឹងដើម្បីបញ្ឈប់នូវនយោបាយបោករាស្រ្តរបស់បក្សប្រឆាំង ដែលជារឿយៗ
គេតែងតែលើកយកបញ្ហានេះ ដែលជាចំណុចរសើបបំផុតក្នុងការបង្កវិទ្ធង្សនានយោបាយ
បង្ខូចកិត្យានុភាពរបស់រាជរដ្ឋាភិបាលកម្ពុជា។
តាមរយៈនៃការធ្វើបទបង្ហាញនេះ ប្រជាពលរដ្ឋគ្រប់ៗរូប
បានដឹងកាន់តែច្បាស់ថា ផ្ទៃក្រទ្បាប្រទេសកម្ពុជា មិនមែនមានត្រឹមតែ ១៨១,០៣៥ គីទ្បូម៉ែត្រក្រទ្បានោះទេ
គឺនឹងអាចកើនទ្បើងរហូតដល់ ១៨១,៦០៦ គីទ្បូម៉ែត្រក្រទ្បាឯណោះ
នេះបើតាមការគណនារបស់អាជ្ញាធរជាតិទទូលបន្ទុកកិច្ចការព្រំដែន។
សរុបសេចក្តីមក ក្រោយពីបានស្តាប់ការបកស្រាយរបស់សម្តេចអគ្គមហាសេនាបតីតេជោ
នាយករដ្ឋមន្រ្តីនៃព្រះរាជាណាចក្រកម្ពុជារួចមក
នយោបាយបញ្ឆេះកំហឹងរបស់បក្សប្រឆាំង បានចាកឆ្ងាយពីផ្នត់គំនិតរបស់ពលរដ្ឋខ្មែរអស់ទៅហើយ
ជាពិសេសបានធ្វើឲ្យមហាជនគ្រប់ៗរូប បានយល់កាន់តែច្បាស់
នូវក្រយៅអាក្រក់របស់មេបក្សប្រឆាំងនៅកម្ពុជា
ដែលតែងតែយកបញ្ហានេះធ្វើជាទុននៃអាជីវកម្មនយោបាយជាប់តរហូតមក តែពេលនេះ ត្រូវរលត់សាបរលាបអស់ឥទ្ធិពលគ្មានសេសសល់អ្វីនោះទេ៕
អត្ថបទដោយៈ
ឧត្តម សក្តិ