Thursday, August 30, 2012
សម្តេចតេជោ អញ្ជើញទៅចូលរួមសន្និសីទកំពូល នៃប្រទេសចលនាមិនចូលបក្សសម័្ពន្ធនៅប្រទេសអ៊ីរ៉ង់ និងបន្តធ្វើទស្សនកិច្ចនៅប្រទេសចិន
គណៈប្រតិភូជាន់ខ្ពស់នៃរាជរដ្ឋាភិបាលកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចាកចេញពីប្រទេសកម្ពុជាធ្វើដំណើរទៅកាន់សាធារណរដ្ឋអ៊ីស្លាមអ៊ីរ៉ង់ កាលពីព្រឹកថ្ងៃទី២៩ ខែសីហា ឆ្នាំ២០១២ ដើម្បីចូលរួមក្នុងសន្និសីទកំពូលលើកទី១៦ នៃប្រទេសចលនាមិនចូលបក្សសម្ព័ន្ធតបតាមការអញ្ជើញរបស់ឯកឧត្តមបណ្ឌិត ម៉ាមូដ អាម៉ាឌីណេចាដ (Mahmoud Ahmadinejad) ប្រធានាធិបតីប្រទេសអ៊ីរ៉ង់។
ក្រៅពីកិច្ចប្រជុំកំពូលដែលនឹងប្រព្រឹត្តទៅចាប់ពីថ្ងៃទី៣០ ដល់ថ្ងៃទី៣១ ខែសីហា ឆ្នាំ២០១២ នៅទីក្រុងតេអេរ៉ង់ នៅក្រោមប្រធានបទនៃសន្និសីទគឺ «សន្តិភាពយូរអង្វែងតាម រយៈអភិបាលកិច្ចរួមគ្នាជាសកល»សម្តេចតេជោនាយករដ្ឋមន្ត្រី ហ៊ុន សែន នឹងជួបពិភាក្សាទ្វេភាគីជាមួយនឹងឯកឧត្តមបណ្ឌិត ម៉ាមូដ អាម៉ាឌីណេចាដ និងជួបជាមួយឯកឧត្តម គីម យ៉ុងណាម ប្រធានគណៈប្រធានសភាប្រជាជនជាន់ខ្ពស់ នៃសាធារណរដ្ឋប្រជាមានិតប្រជាធិបតេយ្យកូរ៉េផងដែរ។
ឯកឧត្តម ស្រ៊ី ថាមរុង្គ រដ្ឋមន្រ្តីប្រតិភូអមនាយករដ្ឋមន្រ្តីបានឲ្យដឹងថា នៅក្នុងសន្និសីទដែលបើកជាផ្លូវការនៅថ្ងៃទី៣០ ខែសីហា ថ្នាក់ដឹកនាំនៃបណ្តាប្រទេសចលនាមិនចូលបក្សសម័្ពន្ធនឹងពិភាក្សា និងដោះស្រាយលើបញ្ហាជាច្រើន ដើម្បីសន្តិភាពយូរអង្វែងរបស់សកលលោកទាំងមូល។
ឯកឧត្តមរដ្ឋមន្រ្តីប្រតិភូអមនាយករដ្ឋមន្រ្តីមានប្រសាសន៍ថា ការកើនឡើងនៃសង្រ្គាមការគំរាមកំហែងផ្សេងៗ បញ្ហាសិទ្ធិមនុស្ស បញ្ហាលទ្ធិប្រជាធិបតេយ្យ ការប្រែប្រួលអាកាសធាតុ ការកែទម្រង់រចនាសម័្ពន្ធ របស់អង្គការសហប្រជាជាតិ…គឺសុទ្ធសឹងតែជាបញ្ហា ដែលសន្និសីទកំពូល នៃប្រទេសចលនាមិនចូលបក្សសម័្ពន្ធធ្វើការផ្លាស់ប្តូរមតិគ្នាធ្វើយ៉ាងណា ដើម្បីឲ្យចលនាមិនចូលបក្សសម័្ពន្ធមានតួនាទីកាន់តែខ្លាំងឡើងកាន់តែរឹងមាំឡើង នៅក្នុងការបញ្ចប់សង្រ្គាម ក៏ដូចជា រារាំងមិនឲ្យមានសង្រ្គាម និងរួមចំណែកនៅក្នុងការអភិវឌ្ឍធ្វើឲ្យប្រទេសទាំងអស់មានសន្តិភាព មានទំនាក់ទំនងល្អ មិនបានទទួលការកៀបសង្កត់ ហើយដោះស្រាយបញ្ហាទាំងអស់ ដើម្បីសន្តិភាពយូរអង្វែងរបស់ពិភពលោកទាំងមូល។
សូមបញ្ជាក់ថា ចលនាមិនចូលបក្សសម័្ពន្ធមានប្រទេសជាសមាជិកទាំងអស់ចំនួន១២០ ដែលក្នុងនោះប្រទេសកម្ពុជាក៏ជាសមាជិកស្ថាបនិកមួយដែរ។ ប្រទេសចលនាមិនចូលបក្សសម័្ពន្ធមាន ២ភាគ៣ នៃប្រទេសជាសមាជិកអង្គការសហប្រជាជាតិ និងមានប្រជាជនចំនួន ៥៥% នៃប្រជាជននៅលើពិភពលោក។ ប្រទេសចំនួន២១ ជាប្រទេសសង្កេតការណ៍របស់ប្រទេសចលនាមិនចូល បក្សសម័្ពន្ធ ប៉ុន្តែមិនមែនជាសមាជិកនោះទេ។
ប្រទេសចលនាមិនចូលបក្សសម័្ពន្ធមានប្រហែលជា៥០ប្រទេស បានដឹកនាំជាន់ខ្ពស់ ថ្នាក់ប្រធានាធិបតីចំនួន២៧រូប មានថ្នាក់ព្រះមហាក្សត្រចំនួន២ព្រះអង្គ ជានាយករដ្ឋមន្រ្តី៧រូប អនុប្រធានាធិបតីចំនួន៩រូប មានប្រធានសភា២រូប ចំនួន៥រូបជាបេសកជនពិសេស និង ក្រៅពីនោះដឹកនាំដោយរដ្ឋមន្រ្តីការបរទេស ឬជារដ្ឋមន្រ្តីនៃក្រសួងផ្សេងៗ និងអង្គការសហប្រជាជាតិផងដែរ។
យោងតាមឯកឧត្តមរដ្ឋមន្រ្តីប្រតិភូអមនាយករដ្ឋមន្រ្តីឲ្យដឹងថា តាមការអញ្ជើញរបស់រដ្ឋាភិបាលនៃសាធារណរដ្ឋប្រជាមានិតចិន សម្តេចអគ្គមហាសេនាបតី តេជោ ហ៊ុន សែន នឹងដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា អញ្ជើញទៅចូលរួមពិព័រណ៍ចិន-អាស៊ីអឺរ៉ុបលើកទី២ ដែលនឹងធ្វើឡើងនៅថ្ងៃទី១ ដល់ថ្ងៃទី៥ ខែកញ្ញា ឆ្នាំ២០១២ នៅទីក្រុងអ៊ូរុំឈី តំបន់ស្វយ័ត ស៊ីនជាំងអ៊ុយហ្គ័រ សាធារណរដ្ឋប្រជាមានិតចិន។ អំឡុងពេលស្នាក់នៅទីក្រុងអ៊ូរុំឈី សម្តេចអគ្គមហាសេនាបតីតេជោ ហ៊ុន សែន នឹងជួបពិភាក្សាទ្វេភាគីជាមួយឯកឧត្តម វេន ជាបាវ (Wen Jiabao) នាយករដ្ឋមន្ត្រីនៃក្រុមប្រឹក្សារដ្ឋប្រជាមានិតចិន ។
ប្រតិភូអមនាយករដ្ឋមន្រ្តី ស្រ៊ី ថាមរុង្គ មានប្រសាសន៍ថា សម្តេចតេជោនឹងអញ្ជើញទៅកាន់ ទីក្រុងអ៊ូរុំឈី តំបន់ស្វយ័តស៊ីនជាំងអ៊ុយហ្គ័រ សាធារណរដ្ឋប្រជាមានិតចិននៅថ្ងៃទី៣១ ខែសីហា ដោយមុននឹងធ្វើមាតុភូមិនិវត្តន៍នៅថ្ងៃទី៣ ខែកញ្ញា ឆ្នាំ២០១២៕
អត្ថបទ អង្គភាពព័ត៌មាន និងប្រតិកម្មរហ័ស
អាស៊ានជាដៃគូពាណិជ្ជកម្មដ៏ធំទី ៣ របស់ចិន
សៀមរាប ៖ លោក Chen Demingរដ្ឋមន្ត្រីពាណិជ្ជកម្មសាធារណរដ្ឋប្រជាមានិតចិន បានថ្លែងនៅ ក្នុងពិធីបើកកិច្ចប្រជុំរដ្ឋមន្ត្រីសេដ្ឋកិច្ចអាស៊ាន ជាមួយរដ្ឋមន្ត្រីពាណិជ្ជកម្មចិន លើកទី ១១ ដែលប្រព្រឹត្តទៅនៅខេត្តសៀមរាប កាលពីថ្ងៃទី ២៩ សីហា ថា កិច្ចប្រជុំនេះមានសារៈសំខាន់ណាស់ ព្រោះបាននាំឲ្យចិន និងអាស៊ានមានទំនាក់ទំនងសេដ្ឋកិច្ច-ពាណិជ្ជកម្មកាន់តែល្អប្រសើរ ។
នៅក្នុងកិច្ចប្រជុំនោះលោក Chen Deming បានលើកយកឯកសារសំខាន់ៗនៃកិច្ចប្រជុំ សេដ្ឋកិច្ចអាស៊ាន-ចិនលើកទី ១០ ដែលបានអនុម័តកាលពីខែវិច្ឆិកា ឆ្នាំ២០១១ នៅប្រទេស ឥណ្ឌូនេស៊ី ដែលបានក្លាយទៅជាទិសដៅមួយយ៉ាងសំខាន់ក្នុងការធ្វើឲ្យអាស៊ាន កាន់តែត្រូវបាន លើកកម្ពស់ទៅក្នុងវិស័យសេដ្ឋកិច្ច-ពាណិជ្ជកម្មនោះ ។ លោក Chen Deming ថ្លែងថា ចិនបានក្លាយជាដៃគូពាណិជ្ជកម្មដ៏សំខាន់មួយសម្រាប់ឲ្យបណ្តាទំនិញរបស់អាស៊ានបានធ្វើចរាចរ ដោយបានអះអាងថា «អាស៊ានជាដៃគូពាណិជ្ជកម្មដ៏ធំទី ៣ របស់ចិន» កាលពីឆ្នាំ ២០១១ កន្លងទៅ ដោយ ក្នុងនោះយើងក៏បានព្រមព្រៀងគ្នាទៅលើកិច្ចព្រមព្រៀងពាណិជ្ជកម្មសេរីអាស៊ាន-ចិន និងកិច្ចសហ ប្រតិបត្តិការសេដ្ឋកិច្ចផងដែរ ។
ឯកឧត្តម ទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងពាណិជ្ជកម្មនៃព្រះរាជាណាចក្រកម្ពុជា បានថ្លែងនៅក្នុងពិធីបើកកិច្ចប្រជុំនោះថា អាស៊ាននឹងខិតខំពង្រឹងបន្ថែមទៀតលើការវិនិយោគរវាង អាស៊ាន-ចិន ដើម្បីឲ្យវិស័យវិនិយោគនេះកាន់តែប្រសើរឡើងព្រោះថា ចិនជាដៃគូពាណិជ្ជកម្មដ៏ សំខាន់មួយរបស់អាស៊ាន ក្នុងការជម្រុញបន្ថែមទៀតទៅលើការវិនិយោគសេដ្ឋកិច្ចអាស៊ាន ។
ដោយឡែកនៅក្នុងជំនួបចរចាទ្វេភាគីជាមួយលោករដ្ឋមន្ត្រីចិន Chen Deming កាលពីយប់ ថ្ងៃទី ២៨ សីហា លោកទេសរដ្ឋមន្ត្រី ចម ប្រសិទ្ធ បានឲ្យដឹងថា ទំហំពាណិជ្ជកម្មរវាងកម្ពុជា និងចិន មានចំនួន ២៥០០ លានដុល្លារអាមេរិកក្នុង១ឆ្នាំៗ ។ លោកទេសរដ្ឋមន្ត្រីបានបញ្ជាក់ថា យើងបាន សម្រេចថានឹងបង្កើនពាណិជ្ជកម្មជាមួយចិនទ្វេដងក្នុងរយៈ ពេល ៥ ឆ្នាំខាងមុខនេះ ។
នៅក្នុងជំនួបទ្វេភាគីនោះ ភាគីទាំងពីរក៏បានប្តេជ្ញាចិត្តជួយគ្នាទៅវិញទៅមក ដើម្បីលើកកម្ពស់ពាណិជ្ជកម្ម និងវិនិយោគរវាងប្រទេសទាំងពីរកម្ពុជា-ចិនឲ្យកាន់តែប្រសើរឡើងថែមទៀត ។ ក្នុងកិច្ចពិភាក្សានោះដែរ ភាគីទាំងពីរក៏បានលើកឡើងអំពីការនាំចេញដំឡូងមី ពោត និងអង្ករថា តើត្រូវនាំទៅប្រទេសចិនដោយរបៀបណា?-ភាគីចិនបានគាំទ្រយ៉ាងខ្លាំងចំពោះការនាំដំឡូងមី និង ពោតទៅប្រទេសចិនឲ្យបានកាន់តែច្រើន ។ ជាមួយគ្នានេះដែរ ក៏បានជម្រុញឲ្យក្រុមហ៊ុនចិនមក វិនិយោគនៅកម្ពុជាឲ្យបានកាន់តែច្រើនថែមទៀត ជាពិសេសលើវិស័យផលិតកម្មស្រូវ និងសំលៀកបំពាក់កាត់ដេរ៕
ស្នាយពល
មេទ័ពតេជោមាស និងតេជោយ៉តជិះសេះបង្ហាញខ្លួននៅលើសួនច្បារមុខវត្តឧណ្ណាលោម
ភ្នំពេញ ៖ មេទ័ព២រូបដ៏ល្បីល្បាញខាងសឹកសង្គ្រាមនាសតវត្សទី១៧ បានបង្ហាញខ្លួនយ៉ាងអង់អាចក្លាហាននៅមុខវត្តឧណ្ណាលោមនោះគឺរូបតំណាងមេទ័ពតេជោមាស និងតេជោយ៉ត ដោយរូបសំណាកនេះត្រូវបានស្ថាបនាឡើងដោយជិះសេះមានស្ពាយដាវនៅជាប់នឹងខ្លួន។ ការស្ថាបនានូវរូបសំណាកមេទ័ពទាំង២នាក់នេះ គឺក្នុងគោលបំណងរំលឹកដល់វីរភាព និង ទឹកចិត្តក្លាហាននៃមេទ័ពទាំង២ ក្នុងការការពារទឹកដីពីខ្មាំងសត្រូវនាសម័យកាលនោះ។
ក្រុមវិចិត្រករខ្មែរដែលកំពុងស្ថាបនានូវរូបសំណាកដ៏ល្អប្រណិតនេះបានឲ្យដឹងថា រូបសំណាកមេទ័ពតេជោមាស និងតេជោយ៉ត ត្រូវបានស្ថាបនាឡើងដោយក្រុមវិចិត្រករ នៃសាកលវិទ្យាល័យភូមិន្ទវិចិត្រសិល្បៈផ្នែកសូន្យរូប ដោយធ្វើឡើងអំពីស្ពាន់ មានទម្ងន់ប្រមាណ២តោនប្រើប្រាស់ពេលវេលានៃការស្ថាបនារូបសំណាកទាំង២នេះអស់រយៈពេល៦ខែ រួចមកហើយៗ ត្រូវបានយកមកតំឡើងនាពេលនេះ។ ចំណែកថ្មទ្ររូបសំណាកទាំង២ដោយមានការជិះសេះនេះ គឺត្រូវបាននាំយកមកពីភ្នំសន្ទុក ខេត្តកំពង់ធំ ដែលមានទំហំ១ដុំធំនិងមានទម្ងន់រហូតដល់ជាង៣០តោន។
លោកកែបជុតិមាអភិបាលរាជធានីភ្នំពេញក្រោយពីបញ្ចប់ការងារពីសាលារាជធានី កាលពីវេលាម៉ោងថ្ងៃត្រង់ទី២៩ ខែសីហា ឆ្នាំ២០១២ បានអញ្ជើញទៅធ្វើការពិនិត្យមើលរូបសំណាកមេទ័ពទាំង២នេះ ដើម្បីជំរុញការស្ថាបនាឲ្យបានលឿន រួមនិងការតាំងអំពូលភ្លើងនៅនឹងរូបសំណាកនេះ។
រូបសំណាកតេជោមាស និង តេជោ យ៉ត ជាសមិទ្ធផលថ្មីមួយទៀតរបស់រាជធានីភ្នំពេញដែលបានស្ថាបនាឡើងបន្ទាប់ពីរូបសំណាកសម្ដេចសង្ឃជូនណាត លោកតាភារម្យង៉ុយ រូបសំណាកយាយដូនពេញ ហើយនឹងធ្វើការស្ថាបនានូវរូបសំណាកបុព្វបុរសជំនាន់ដើមដែលមានស្នាដៃល្បីល្បាញជាច្រើនទៀតដូចជារូបសំណាកតេជោដំឌិន ជាដើម អ្វីដែលជាបញ្ហាប្រឈមនោះគឺរកទីតាំងដាក់រូបសំណាកទាំងនោះមិនទាន់បាន។
រូបសំណាកមេទ័ពដ៏ល្បីល្បាញទាំង២នេះគ្រោងនឹងបើកសម្ពោធនិងធ្វើពិធីសាសនានៅព្រឹកថ្ងៃទី១ ខែកញ្ញា ឆ្នាំ២០១២ ក្រោមអធិបតីភាពលោកជំទាវម៉ែន សំអន ឧបនាយករដ្ឋមន្ត្រីប្រចាំការនិង រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច៕
ស្រីរ័ត្ន
ប្រទេសអូស្ត្រាលីផ្ដល់ជំនួយថវិកាបន្ថែមចំនួន១,៤លានដុល្លារអូស្ត្រាលីដល់អ.វ.ត.ក
ភ្នំពេញ ៖ ប្រទេសអូស្ត្រាលីបានផ្ដល់ជំនួយថវិកាបន្ថែមចំនួន១,៤លានដុល្លារអូស្ត្រាលី(ប្រមាណ ១,៤៦លានដុល្លារអាមេរិក)ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការ(អ.វ.ត.ក)។ ជំនួយថវិកាថ្មីនេះដែលត្រូវបានប្រកាសដោយឯកឧត្តម បប់ ខារ រដ្ឋមន្ត្រីការបរទេស និង ជាសមាជិកសភាអូស្ត្រាលី ក្នុងអំឡុងដំណើរទស្សនកិច្ចជាផ្លូវការរបស់ឯកឧត្ដមនៅរាជធានីភ្នំពេញកាលពីខែកក្កដា ឆ្នាំ២០១២ ត្រូវបានផ្ទេរទៅអង្គការសហប្រជាជាតិរួចហើយ។
ជំនួយថវិកាលើកនេះគឺបន្ថែមទៅលើថវិកាចំនួន១,៦១លានដុល្លារអូស្ត្រាលី ដែលប្រទេសអូស្ត្រាលីបានផ្ដល់ដល់ភាគីទាងពីរនៃ អ.វ.ត.កកាលពីដើមឆ្នាំ២០១២នេះ។ បូករួមទាំងជំនួយលើកនេះផង ប្រទេសអូស្ត្រាលីបានផ្ដល់ជំនួយថវិកាដល់ អ.វ.ត.ក សរុបចំនួន ១៩,៧១លានដុល្លារអូស្ត្រាលីហើយ។
ឆ្លើយតបនឹងជំនួយដ៏មានតម្លៃនេះ ឯកឧត្តម ក្រាញ់ តូនី ប្រធានការិយាល័យរដ្ឋបាលស្ដីទី និងលោក ឃ្នុត រ៉ូសិនហក អនុប្រធានការិយាល័យរដ្ឋបាលនៃអ.វ.ត.ក បានថ្លែងថា៖ «ក្នុងនាម អ.វ.ត.ក យើងសូមថ្លែងអំណរគុណចំពោះទឹកចិត្តសប្បុរសរបស់រដ្ឋាភិបាលអូស្ត្រាលី ដែលបន្តផ្ដល់ការគាំទ្រដំណើរការរបស់អ.វ.ត.ក។ ក្នុងកាលៈទេសៈដែល អ.វ.ត.ក កំពុងតែជួបប្រទះការលំបាកផ្នែកថវិកា ជំនួយនេះមានតម្លៃថ្លៃថ្លាជាទីបំផុតដើម្បីធានាថា អ.វ.ត.ក អាចបន្តបេសកកម្មរបស់ខ្លួនដោយពុំមានភាពរអាក់រអួល»៕
ក្មេងៗជាង៥ពាន់នាក់ច្នៃប្រឌិតហេដ្ឋារចនាសម្ពន្ធអនាគតប្រទេសជប៉ុន
ដើម្បីអបអរសាទរគំរប់ខួប LEGO លើកទី៥០ឆ្នាំ ក្រុមហ៊ុន Damish បានរៀបចំព្រឹត្តិការណ៍មួយដើម្បីណែនាំអនាគតប្រទេសជប៉ុន។ កម្មវិធីសិក្ខាសាលានេះត្រូវដាក់ឈ្មោះថា “កសាងប្រទេសជប៉ុន”ដែលប្រមូលផ្ដុំដោយកុមារាកុមារីជាង៥ពាន់នាក់ដើម្បីឲ្យពួកគេច្នៃប្រឌិតគំនិតផ្ទាល់ខ្លួនដើម្បីកសាងប្រទេសជប៉ុនទៅថ្ងៃអនាគត។ ផ្នែកដែលគួរឲ្យកត់សំគាល់ខ្លាំងគឺទីក្រុងតូក្យូ និងផែនទីយក្សពណ៌ស។
លោក Johnnt មកពី Spoon & Tamago បានកត់សំគាល់ថា “អ៊ីនធឺណេតពោរពេញដោយការងារ LEGO ដ៏មហាសាល។ យើងខ្លួនឯងផ្ទាល់ក៏បង្ហាញលក្ខណៈពិសេសផែនទី LEGO ដ៏គួរឲ្យចាប់អារម្មណ៍នៃមជ្ឈឹមបូព៌ា ពហុកីឡដ្ឋានបាល់ទាត់ LEGO និងLEGO Ford Explorer ដ៏ពេញលេញ។
ប៉ុន្តែកម្មវិធីកសាងប្រទេសជប៉ុនមានលក្ខណៈពិសេសជាច្រើន និងគ្របដណ្តប់ប្រទេសជប៉ុនទាំងមូល។ ខណៈពេលកិច្ចការសិល្បៈដ៏ធំមហាសាលគឺត្រូវបានគេបង្កើតឡើងដោយប្រធាន LEGO ដ៏មានបទពិសោធន៍ខ្ពស់ដែលបានចំណាយពេលជាច្រើនឆ្នាំដើម្បីធ្វើកិច្ចការដ៏លំអិតទាំងអស់នោះ។
ផែនទីយក្សត្រូវបានបង្កើតយ៉ាងពេញលក្ខណៈដោយក្មេងៗជាង៥ពាន់នាក់ដែលមានមកពីតំបន់កោះផ្សេងៗគ្នាចំនួន៦។ ផ្ទុយពីការលេងល្បែងកម្សាន្តក្មេងៗទាំងអស់នោះបានបង្កើតអាគារដែលនិម្មិតរូបដ៏ស្កឹមស្កៃ។ អ្នករៀបចំបានជំរុញទឹកចិត្តពួកគេឲ្យមានសេរីភាពចំពោះគំនិតស្រមើស្រមៃ និងឌីហ្សាញហេដ្ឋារចនាសម្ពន្ធស្រមើស្រមៃនៃអនាគតប្រទេសជប៉ុន ហើយពួកគេបានបង្កើតយ៉ាងជាក់ច្បាស់ថា ជាបូរណភាពដីមួយដ៏អស្ចារ្យ។
អនាគតប្រទេសជប៉ុនគឺកំពុងតែស្ថិតនៅក្នុងកណ្តាប់ដៃរបស់ក្មេងៗ ហើយពួកគេបានធ្វើយ៉ាងច្បាស់ថា វាគឺជាប្រទេសមួយដ៏រុងរឿង។ នៅពេលហេដ្ឋារចនាសម្ពន្ធ LEGO ត្រូវបានធ្វើរួចរាល់ ពួកគេត្រូវបានបញ្ជូនទៅទីក្រុងតូក្យូដើម្បីក្លាយជាផ្នែកមួយនៃផែនទី LEGOដែលមានទឹកប្រាក់១.៨លានដុល្លារដែលបង្ហាញអ្នកទស្សនាពោលអួលសរសើរមិនដាច់ពីមាត់៕
វេហាស៍
ស្ដ្រីវ័យក្មេង២៧០០នាក់ជាប់ឈ្មោះប្រឡងធ្វើជាភរិយាមហាសេដ្ឋី
ដោយ ៖ ម៉ែវ
ក្លិបមហាសេដ្ឋីដែលនៅលីវនៅទីក្រុងប៉េកាំង បានរៀបចំប្រឡងជ្រើសរើសភរិយា ដែលមាន៤ដំណាក់កាលខុសៗគ្នា ទាក់ទាញក្រុមស្ដ្រីវ័យក្មេងជាង២៧០០នាក់ចុះឈ្មោះចូលរួម ។ ក្រុមស្ដ្រីដែលចុះឈ្មោះ ត្រូវឆ្លងកាត់ការប្រឡង៤ដំណាក់កាលរួមមានប្រឡង សរសេរ ត្រួតពិនិត្យចំណេះវិជ្ជា, ប្រឡង រូបសម្បត្ដិ, ស្មារតី និងរបៀបរបបអត្ដចរិកក្នុងការរស់នៅ ។
ក្រោយឆ្លងកាត់ការប្រឡងវគ្គជម្រុះ ក្រុមស្ដ្រីវ័យក្មេងទាំងនោះ ត្រូវឆ្លងកាត់ សម្ភាសន៍វាយតម្លៃពីអត្ដចរិត សមត្ថ ភាព ទស្សនៈ ពីជីវិតអាពាហ៍ពិពាហ៍និង ការរស់នៅ ។ ក្រុមស្ដ្រីដែលចូលរួម ប្រឡងជ្រើសរើសធ្វើជាភរិយារបស់សេដ្ឋី នៅលីវ៣២នាក់ ដែលមានវ័យចាប់ពី ៣១ឆ្នាំឡើងដល់៥៥ឆ្នាំ ។
ក្រុមហ៊ុនរៀបចំព្រឹត្ដិការណ៍ខាងលើ ត្រូវបានក្រុមសេដ្ឋីជួលឱ្យធ្វើជាគណៈកម្ម ការឱ្យពិន្ទុនិងវាយតម្លៃ ។ ក្រោយឆ្លង កាត់វគ្គជម្រុះគណៈកម្មការនឹងទៅកាន់ ផ្ទះរបស់បេក្ខនារីនីមួយៗដើម្បីជួបសួរ នាំព័ត៌មានពីអ្នកជិតខាង ស្ដីអំពីទំនៀម ទម្លាប់សណ្ដាប់ធ្នាប់រស់នៅរបស់ពួកនាង។ ស្ថានភាពគ្រួសារ មិនត្រូវការមាន ទ្រព្យសម្បត្ដិស្ដុកស្ដម្ភ ហើយក៏មិនក្រពេកនោះដែរ ។
នៅទីក្រុងប៉េកាំងក៏មានកម្មវិធីប្រឡង ជ្រើសរើសភរិយាសម្រាប់ក្រុមមហា សេដ្ឋីនៅលីវ ដែលផ្សព្វផ្សាយជាសា ធារណៈ បានទាក់ទាញបេក្ខនារីជាច្រើន ចូលរួម ។ សរុបនៅទូទាំងប្រទេសមាន ស្ដ្រីវ័យក្មេងរហូតដល់១២ពាន់នាក់ ចុះឈ្មោះចូលរួមប្រឡងជ្រើសរើសភរិយា របស់មហាសេដ្ឋី ។
ដោយមមាញឹកក្នុងអាជីវកម្មខិតខំរក ប្រាក់ទាន់ខ្លួននៅក្មេងធ្វើឱ្យសេដ្ឋីជាច្រើន នៅក្នុងប្រទេសចិនភ្លេចខ្លួនក្នុងការរកគូ ស្រករ។ ដល់ពេលមានទ្រព្យសម្បត្ដិគ្រប់ គ្រាន់ទៅហើយនោះ ក្រុមមហាសេដ្ឋី ទាំងនោះ ក៏នឹកឃើញចង់បានការរស់នៅ កក់ក្ដៅក្នុងគ្រួសារប្ដីប្រពន្ធ ។ មូលហេតុ ដែលធ្វើឱ្យពួកគាត់សម្រេចប្រកាសជ្រើស រើសភរិយាដោយមានការប្រឡងបែបនេះ ដោយសារតែមមាញឹកក្នុងការងារ គ្មានពេលវេលាតាមចែចង់ស្ដ្រីដែលខ្លួន ពេញចិត្ដ ៕
លោក ឱម យ៉ិនទៀង ឲ្យស៊ូយ៉ាប៊ែរឌី ធ្វើជាទីប្រឹក្សាពិសេសគណបក្សសង្គ្រោះជាតិ
លោក ឱម យ៉ិនទៀង ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សរបស់រាជរដ្ឋាភិបាល បន្ទាប់ពីជូនដំណើរសម្តេចតេជោ ហ៊ុន សែន នាយករដ្ឋមន្ត្រី ដែលដឹកនាំគណៈប្រតិភូទៅចូលរួមប្រជុំចលនាមិនចូលបក្ខសម្ព័ន្ធ លើកទី១៦ នៅប្រទេសអឺរ៉ង់ នៅព្រឹកថ្ងៃទី២៩ ខែសីហា ឆ្នាំ២០១២ រួចនោះ លោកបានមានប្រសាសន៍ថា នៅពេលដំបូងលោក សូរិយា ស៊ូប៊ែរឌី អ្នករាយការណ៍ពិសេស ទទួលបន្ទុកសិទ្ធិមនុស្ស នៃអង្គការសហប្រជាជាតិ ប្រចាំនៅកម្ពុជា ដូចជា មិនទាន់យល់អំពីសភាពការណ៍ នៅកម្ពុជា ប៉ុន្តែដល់យូរទៅគាត់ កាន់តែយល់ខុសអំពីសភាពការណ៍កម្ពុជា។
លោកទេសរដ្ឋមន្ត្រី ឱម យ៉ិនទៀង បានមានប្រសាសន៍យ៉ាងនេះថា "អីចឹងយើងខ្ញុំ បានធ្វើការវិភាគចំនុចមួយៗ ហើយយើងខ្ញុំ បានធ្វើការឆ្លើយតបទៅវិញ ហើយកំពុងបកប្រែភាសាអង់គ្លេសមកភាសាខ្មែរ"។
លោក ឱម យ៉ិនទៀង បានមានប្រសាសន៍បន្តថា "សួរថា ស្អីនៅស្រុកខ្មែរអាក្រក់ទាំងអស់ដូចគាត់និយាយទេ។ នៅឆ្នាំ២០១២នេះ វិស័យគោរពសិទ្ធិមនុស្ស នៅប្រទេសកម្ពុជាមិនត្រឹមតែ រក្សាបានប៉ុន្តែបានអភិវឌ្ឍន៍ពង្រីកបន្ថែមទៀត។ នៅក្នុងឆ្នាំ២០១១ កម្ពុជាជាប់កាតព្វកិច្ចការពារជាតិដ៏ចាំបាច់ មិនអាចខ្វះបាននៅព្រះវិហារ ហើយយើងជួបគ្រោះទឹកជំនន់យ៉ាងធ្ងនធ្ងរ យើងត្រូវការចំណាយ សម្រាប់អភិវឌ្ឍន៍ឡើយវិញ យើងត្រូវចំណាយ សម្រាប់ការបោះឆ្នោតក្រុមប្រឹក្សាឃុំសង្កាត់ឆ្នាំ២០១២ ប៉ុន្តែសេដ្ឋកិច្ចយើងនៅតែមានកំនើន ៧,១ ភាគរយ ជីវភាពប្រជាជនយើង មើលឃើញនឹងភ្នែក ក៏ឃើញដែរ តាមជនបទមានជីវភាពកើនឡើងអត្រាភាពក្រីក្រត្រូវ
បានកាត់បន្ថយ សាលារៀនមិនត្រឹមតែមាននៅភ្នំពេញទេ នៅពេលដែលប្រជាជនទៅដល់ព្រំដែន មាននៅព្រំដែនទៀត។ អំពីនារីវិញ យើងឃើញហើយថា ថ្នាក់ដឹកនាំនគរបាលជាតិគ្រប់ថា្នក់ ត្រូវតែមានសមាសភាពនារី ចូលរួមដឹកនាំ គឺអគ្គស្នងការរងម្នាក់ជានារី ស្នងការរងម្នាក់ជានារី សម្រាប់ជួយគិតគូអំពើហឹង្សាលើស្ត្រីកុមារការជួញដូរស្ត្រី និងកុមារហើយជាលទ្ធតុលាការកាត់ទោសបានច្រើនដែរ ចំពោះជនល្មើស។ នេះតើមិនមានជសិទ្ធមនុស្សទេឬ?"។
លោកទេសរដ្ឋមន្ត្រី ឱម យ៉ិនទៀង បានមានប្រសាសន៍បន្តថា "ឲ្យតែសមរង្ស៊ី ហើយនិងបក្សប្រឆាំង និយាយអី បន្ទាប់អង្គការសង្គមស៊ិវិលនិយាយអីចឹងតែ បន្ទាប់មកលោកសូរិយា ស៊ូប៊ែរឌី និយាយដូចគ្នា។ ឥឡូវនេះខ្ញុំដឹងច្បាស់ថា ផែនការលោកសមរង្ស៊ី កឹមសុខា គាត់ឈានទៅជំហានមួយ ដោយរកគ្រប់វិធីគណៈកម្មាធិការជាតិរៀបចំការបោះឆ្នោតចេញ ដោយគាត់ មិនចង់ឲ្យសមាជិកគាត់ពីរនាក់នៅបន្តទៀត បន្ទាប់មកទៀតគាត់នឹងរុញ ឥឡូវស៊ូប៊ែរឌី ចាប់ផ្តើម និយាយអត់មានអីខុសពីបក្សប្រឆាំងទេ"។
លោកទេសរដ្ឋមន្ត្រី បានមានប្រសាសន៍ទៀតថា "បក្សប្រឆាំងមិននិយាយអាក្រក់ទេ ប៉ុន្តែបក្សប្រឆាំងខ្លះ គាត់អត់បើកភ្នែកបក្សប្រឆាំង ដែលគេបើកភ្នែកគេរិះគន់គេជួយទៅលើមាគ៌ាណាខុសគេឲ្យដំណោះស្រាយ។ សួរថាតើបក្សប្រឆាំងអស់ទាំងនេះ ដែលើរិះគន់ស្ថាបនាទេ ហើយខំនិយាយមកវិញថា រដ្ឋាភិបាលប្រឆាំងការរិះគន់យើង មិនដែលប្រឆាំងការិះគន់ទេអ្នកអស់តាំងនេះគឺជេរប្រមាថយើងមិនមែនជាការរិះគន់ទេ យើងអត់ធ្មត់គ្រប់បែបគ្រប់យ៉ាងណាស់លើបញ្ហានេះ"។
លោក ឱម យ៉ិនទៀង បានមានប្រសាសន៍បន្តថា "បើដាក់លោកសូរិយា ស៊ូប៊ែរឌី ជាទីប្រឹក្សាពិសេសរបស់គណបក្សសង្គ្រោះជាតិ ការជាការល្អដែរមិនខុសអីប៉ុន្មានទេ"។
សូមរម្លឹកថា របាយការណ៍របស់លោកសូរិយា ស៊ូប៊ែរឌី ដែលត្រូវបានចែកចាយ កាលពីព្រលប់ថ្ងៃទី២៧ ខែសីហា ឆ្នាំ២០១២ បានលើកឡើងអំពីការរំលោភបំពានរបស់រដ្ឋាភិបាលកម្ពុជា លើបញ្ហាសិទ្ធិសេរីភាពនៃការបញ្ចេញមតិ និងសិទ្ធិលំនៅដ្ឋាន ករណីជម្លោះដីនៅបឹងកក់ និងបុរីកីឡា ការផ្តល់ដីសម្បទានសេដ្ឋកិច្ច របស់រដ្ឋាភិបាលកម្ពុជា នាំឲ្យកើតមានជម្លោះដីធ្លីស្ទើរទូទាំងប្រទេស និងអំពីបញ្ហាប្រព័ន្ធបោះឆ្នោត នៅកម្ពុជា ដែលនាំឲ្យមានការតវ៉ាពីអង្គការសង្គមស៊ីវិលមួយចំនួន និងការតវ៉ាពីគណបក្សប្រឆាំង ជាដើម។
លោក សូរិយា ស៊ូប៊ែរឌី ក៏បានគូសបញ្ជាក់ ក្នុងរបាយការណ៍ថា កម្ពុជាទទួលបានអនុសាសន៍ជាច្រើន ទាំងទ្វេភាគី និងពហុភាគី ដោយអង្គការផ្សេងៗ ប៉ុន្តែវាគួរឲ្យសោកស្តាយ ដែលអនុសាសន៍ភាគច្រើនបំផុត ដែលកម្ពុជាទទួលបាន ដើម្បីកែលម្អស្ថានភាពសិទ្ធិមនុស្ស និងសិទ្ធិនយោបាយ នៅតែមិនមានការអនុវត្ត។
អ្នករាយការណ៍ពិសេស លោក សូរិយា ស៊ូប៊ែរឌី បានសរសេរទៀតថា “ការគ្មានការពិគ្រោះយោបល់ និងគ្មានការចរចាសមស្របជាមួយប្រជាជន ដែលរងការប៉ះពាល់នៅពេលផ្តល់សម្បទានដីសេដ្ឋកិច្ច គឺជាក្តីបារម្ភមួយ នៅកម្ពុជា។
លោក សូរិយា ស៊ូប៊ែរឌី ក៏បានកត់សម្គាល់ថា ការបំភិតបំភ័យ និងការយាយី គឺនៅតែកើតមានជុំវិញការបោះឆ្នោត នៅកម្ពុជា។
ក៏ប៉ុន្តែភ្លាមៗនោះ លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័ស របស់ស្តីទីការគណៈរដ្ឋមន្ត្រី នៃរាជរដ្ឋាភិបាលកម្ពុជា បានចាត់ទុកថា ព័ត៌មានរបស់លោកសូរិយា ស៊ូប៊ែរឌី ដែលទទួលបាន គឺជាការសម្លឹងឃើញតែផ្នែកអាក្រក់ដ៏តិចតួច ដែលជាកង្វះខាតរបស់រដ្ឋាភិបាល។ រីឯស្ថានការណ៍សិទ្ធិមនុស្ស នៅកម្ពុជា ក៏មិនមែនអាក្រក់ ដូចអ្វីដែលលោកសូរិយា ស៊ូប៊ែរឌី តែងតែលើកឡើងអំពីការមិនពិត នៅកម្ពុជានោះទេ៕
អង្គជំនុំជម្រះសាលាដំបូងបើកសវនាការជាថ្មី លើកាយសម្បទា និងបញ្ញាស្មារតី លោកស្រី អៀង ធីរិទ្ធ
មន្ត្រីនាំពាក្យរបស់សាលាក្តីខ្មែរក្រហម លោក នេត្រ ភក្ត្រា បានថ្លែងឲ្យដឹងថា នៅថ្ងៃទី២៩ ខែសីហា ឆ្នាំ២០១២ ថា សវនាការលើកាយសម្បទា និងបញ្ញាស្មារតីនេះ ធ្វើឡើងបន្ទាប់ពីក្រុមអ្នកជំនាញវេជ្ជសាស្ត្រ បានធ្វើការព្យាបាលដល់លោកស្រី អៀង ធីរិទ្ធ អស់រយៈពេល ៦ខែ រួចមក តាមការបញ្ជារបស់អង្គជំនុំជម្រះតុលាការកំពូល ហើយនៅពេលនេះ គឺដល់ពេលវេលាកំណត់ ក្នុងការពិនិត្យឡើងវិញលើកាយសម្បទារបស់លោកស្រី អៀង ធីរិទ្ធ។
បើតាមការឲ្យដឹងរបស់លោក នេត្រ ភក្ត្រា សវនាការរយៈពេលពីរថ្ងៃ ពីថ្ងៃទី៣០ដល់ថ្ងៃទី៣១ ខែសីហា ឆ្នាំ២០១២ ត្រូវបានរៀបចំឡើង ដើម្បីឲ្យអ្នកជំនាញវេជ្ជសាស្ត្រ បង្ហាញអំពីលទ្ធផលនៃការពិនិត្យរបស់គាត់ និងដើម្បីបើកឲ្យមានការពិភាក្សា នៅក្នុងតុលាការរវាងអ្នកជំនាញវេជ្ជសាស្ត្រ ជាមួយមេធាវីការពារក្តីរបស់លោកស្រី អៀង ធីរិទ្ធ សហព្រះរាជអាជ្ញា និងសហមេធាវីនាំមុខតំណាងដើមបណ្តឹងរដ្ឋប្បវេណី។
ដោយសារតែសវនាការនេះគឺទាក់ទងតែលោកស្រី អៀង ធីរិទ្ធ ជនជាប់ចោទ នួន ជា និង ខៀវ សំផន នឹងមិនមានភាពចាំបាច់ចូលរួមក្នុងសវនាការនេះទេ ប៉ុន្តែសម្រាប់លោក អៀង សារី ដោយសារតែគាត់មានទំនាក់ទំនងពិសេសនៅក្នុងនាមជាស្វាមីភរិយាជាមួយលោកស្រី អៀង ធីរិទ្ធ និងមេធាវីរបស់គាត់ត្រូវបានអង្គជំនុំជម្រះសាលាដំបូង អនុញ្ញាតឲ្យចូលរួមក្នុងសវនាការ ក្នុងនាមជាអ្នកសង្កេតការណ៍ ដោយមិនអនុញ្ញាតឲ្យមានការចោទសួរអ្វីឡើយ។
គួរបញ្ជាក់ថា បន្ទាប់ពីមានការពិនិត្យ និងវាយតម្លៃដោយអ្នកជំនាញវេជ្ជសាស្ត្រចំនួន ៥រូប អង្គជំនុំជម្រះសាលាដំបូងបានធ្វើសេចក្តីសម្រេចមួយកាលពីនៅថ្ងៃទី១៧ ខែវិច្ឆិកា ឆ្នាំ២០១១ ថា ជនជាប់ចោទ អៀង ធីរិទ្ធ ពុំមានសមត្ថភាពកាយសម្បទា និងបញ្ញាស្មារតីគ្រប់គ្រាន់ដើម្បីចូលរួមការជំនុំជម្រះទេ ដោយសារគាត់មានជំងឺវង្វេងវង្វាន់ (ឬអាចជាជំងឺបាត់ការចងចាំ)។
អង្គជំនុំជម្រះសាលាដំបូងយល់ឃើញថា អៀង ធីរិទ្ធ អាចនឹងពុំមានសមត្ថភាពធួនល្មមដើម្បីយល់អំពីដំណើរការជំនុំជម្រះក្តី ដោយសារតែការភ្លេចភ្លាំងរបស់គាត់។
ប្រសិនបើពុំអាចយល់ដឹងគ្រប់គ្រាន់អំពីដំណើរការជំនុំជម្រះក្តីទេ អៀង ធីរិទ្ធ ប្រហែលជាពុំអាចណែនាំមេធាវីរបស់គាត់ ហើយក៏ពុំអាចការពារខ្លួនឯងបានដែរ។ ហេតុដូច្នេះ អង្គជំនុំជម្រះសាលាដំបូងបានសម្រេចចិត្តផ្អាកដំណើរការនីតិវិធី ប្រឆាំងនឹងជនជាប់ចោទ អៀង ធីរិទ្ធ។
ដោយមើលឃើញថា ពុំមានលទ្ធភាពសមស្របណាមួយក្នុងការបន្តដំណើរការនីតិវិធីតទៅទៀត អង្គជំនុំជម្រះសាលាដំបូងយល់ឃើញថាពុំមានមូលដ្ឋានច្បាប់ក្នុងការបន្តឃុំខ្លួន អៀង ធីរិទ្ធ នៅ អ.វ.ត.ក តទៅទៀតដូច្នេះក៏ចេញសេចក្តីសម្រេចឲ្យដោះលែងលោកស្រី អៀង ធីរិទ្ធ ជាបន្ទាន់។
សហព្រះរាជអាជ្ញាបានប្តឹងសាទុក្ខប្រឆាំងនឹងសេចក្តីសម្រេចរបស់អង្គជំនុំជម្រះសាលា ដំបូងក្នុងការដោះលែង អៀង ធីរិទ្ធ ឲ្យនៅក្រៅឃុំ។
លោក នេត្រ ភក្ត្រា បានឡូសបញ្ជាក់ពីមូលហេតុនៃការពិនិត្យ និងវាយតម្លៃឡើងវិញលើសមត្ថភាពកាយសម្បទា និងបញ្ញាស្មារតីរបស់ជនជាប់ចោទ អៀង ធីរិទ្ធថា នៅថ្ងៃទី១៣ ខែធ្នូ ឆ្នាំ២០១១ អង្គជំនុំជម្រះតុលាការកំពូលបានចេញសេចក្តីសម្រេចថា អង្គជំនុំជម្រះសាលាដំបូងត្រូវតែប្រើប្រាស់ឲ្យអស់ពីលទ្ធភាព ដើម្បីជួយជនជាប់ចោទ អៀង ធីរិទ្ធ ឲ្យមានសមត្ថភាពប្រសើរឡើងវិញទាំងកាយសម្បទា និងបញ្ញាស្មារតីដើម្បីឲ្យគាត់អាចចូលរួមការជំនុំជម្រះបាន។
អង្គជំនុំជម្រះតុលាការកំពូល បានបញ្ជាឲ្យអង្គជំនុំជម្រះសាលាដំបូង ស្វែងរកការព្យាបាលបន្ថែមដល់ អៀង ធីរិទ្ធ ហើយត្រូវតែពិនិត្យ និងវាយតម្លៃស្ថានភាពកាយសម្បទា និងបញ្ញាស្មារតីរបស់គាត់ជាថ្មីម្តងទៀត ក្នុងរយៈពេល ៦ ខែបន្ទាប់ពីការព្យាបាល។
ដោយអនុវត្តតាមការសេចក្តីសម្រេចរបស់អង្គជំនុំជម្រះតុលាការកំពូល អង្គជំនុំជម្រះសាលាដំបូង បានតែងតាំងអ្នកជំនាញ ចំនួនបីរូបជាថ្មីម្តងទៀត ឲ្យពិនិត្យនិងវាយតម្លៃលើកាយសម្បទានិង បញ្ញាស្មារតីរបស់ អៀង ធីរិទ្ធ នៅថ្ងៃទី ២៧-២៨ ខែសីហា ឆ្នាំ២០១២។
អ្នកជំនាញទាំងបីរូបនឹងវាយតម្លៃថា តើការព្យាបាលវេជ្ជសាស្ត្រដែលបានផ្តល់ជូន អៀង ធីរិទ្ធ រយៈពេល ៦ ខែកន្លងមក បានជួយឲ្យគាត់បានប្រសើរឡើងវិញឬទេ ពោលគឺ អ្នកជំនាញនឹងវាយតម្លៃថា តើការព្យាបាលវេជ្ជសាស្ត្រអាចជួយរំឭក ការចងចាំរបស់គាត់ ក្នុងកម្រិតដែលអាចឲ្យគាត់អាចចូលរួមការជំនុំជម្រះក្តីដែរឬទេ។
មន្ត្រីនាំពាក្យសាលាក្តីខ្មែរក្រហមបានពន្យល់ថា "បន្ទាប់ពីពិនិត្យ និងពិចារណាទៅលើរបាយការណ៍របស់អ្នកជំនាញវេជ្ជសាស្ត្រ និងអង្គច្បាប់មួយចំនួន នៅក្នុងសវនាការនៅថ្ងៃទី៣០ និង ៣១ ខែសីហា អង្គជំនុំជម្រះសាលាដំបូងនឹងចេញសេចក្តីសម្រេចអំពីសមត្ថភាពខាងកាយសម្បទា និងបញ្ញាស្មារតីរបស់ អៀង ធីរិទ្ធ នៅពេលក្រោយ។ សេចក្តីសម្រេចចិត្ត អំពីសមត្ថភាពកាយសម្បទា និងបញ្ញាស្មារតីរបស់ អៀង ធីរិទ្ធ គឺជាសេចក្តីសម្រេចផ្លូវច្បាប់។ ដូច្នេះជាសេចក្តីសម្រេចចិត្តរបស់ចៅក្រម។ ចៅក្រមនឹងសម្រេចថាតើសមត្ថភាពកាយសម្បទា និងបញ្ញាស្មារតីរបស់ អៀង ធីរិទ្ធ មានសភាពប្រសើរឡើងវិញដែរឬយ៉ាងណា"។
សវនាការនៅថ្ងៃទី៣០ និង៣១ ខែសីហា លើបញ្ហាកាយសម្បទា និងបញ្ញាស្មារតីលោកស្រី អៀង ធីរិទ្ធ ធ្វើឡើងជាសាធារណៈ ហើយសាធារណជនជាតិ និងអន្តរជាតិ ព្រមទាំងអ្នកសារព័ត៌មានជាច្រើនរយនាក់ ត្រូវបានគេរំពឹងថា នឹងចូលរួមទស្សនាដោយផ្ទាល់នូវដំណើរការសវនាការនេះ។
មន្ត្រីនាំពាក្យសាលាក្តីខ្មែរក្រហម បានឲ្យដឹងថា បណ្តាញទូរទស្សន៍ក្នុងស្រុក CNC នឹងធ្វើការផ្សាយបន្តផ្ទាល់ទាំងស្រុង ពីដំណើរការសវនាការលើកាយសម្បទាលោកស្រី អៀង ធីរិទ្ធ នៅថ្ងៃទី៣០ និងថ្ងៃទី៣១ ខែសីហា ឆ្នាំ២០១២៕
បក្សហ្វ៊ុនស៊ិនប៉ិច តែងតាំងអគ្គលេខាធិការរង បន្ថែមបីរូប
តាមសេចក្ដីសម្រេច ចុះថ្ងៃទី២៧ ខែសីហា ឆ្នាំ២០១២ បានបង្ហាញថា គណបក្សហ្វ៊ុនស៊ិនប៉ិច សម្រេចតែងតាំងបន្ថែមសមាសភាព អគ្គលេខាធិការរង គណបក្ស ដូចមានរាយនាមខាងក្រោម៖
១. សហជីវិន ផែង ហេង អគ្គលេខាធិការរងទី១
២. សហជីវិន ឃឹម សិលា អគ្គលេខាធិការរង
៣. សហជីវិន ឡុង លីម អគ្គលេខាធិការរង
សេចក្ដីសម្រេចខាងលើ គឺគណបក្សហ្វ៊ុនស៊ិនប៉ិច បានយោងតាមស្មារតីអង្គប្រជុំគណៈកម្មាធិការនាយក ថ្ងៃទី២៥ ខែសីហា ឆ្នាំ២០១២៕