Friday, September 7, 2012

សាលាឧទ្ធរណ៍​ប្រកាស​ដីកា​ផ្ដន្ទាទោស​អ្នកគ្រូ​បង្រៀន​ធ្វើ​ទារុណកម្ម​កុមារ​ដាក់គុក​១៨​ឆ្នាំ​ ប្ដី​ដាក់គុក​៥​ឆ្នាំ​

ដោយ​ ៖ បញ្ញា 
​ភ្នំពេញ​ ៖​ កាល​ព្រឹក​ថ្ងៃ​ទី​៧​ ​ខែកញ្ញា​ ឆ្នាំ​២០១២​ សាលាឧទ្ធរណ៍​បាន​ប្រកាស​សាលដីកា​ផ្ដន្ទាទោស​ទៅ​លើ​ពិរុទ្ធជន​ មាស​ ណា​រី​ អតីត​ជា​គ្រូបង្រៀន​ ប្រើ​អំពើ​ហិង្សា​ និង​ធ្វើ​ទារុណកម្ម​លើ​កុមារ​ដែល​ជា​កូនចិញ្ចឹម​របស់​ខ្លួន​នោះ​ ដាក់​ពន្ធនាគារ​១៨​ឆ្នាំ​ ពី​បទ​អំពើ​ហិង្សា​លើ​អនីតិជន​ និង​លក់ដូរ​មនុស្ស​ ។​ ចំណែក​ប្ដី​របស់​គាត់​ឈ្មោះ​ វ៉ា​ សា​រឿ​ន​ ផ្ដន្ទាទោស​ដាក់​ ពន្ធនាគារ​៥​ឆ្នាំ​ពី​បទ​លក់ដូរ​មនុស្ស​ ដែល​ការ​ប្រកាស​សាលដីកា​នេះ​ធ្វើ​ឡើង​ដោយ​ប្រធាន​ក្រុមប្រឹក្សា​ជំនុំជម្រះ​លោក​ ប៉ុ​ល​ សំ​អឿ​ន​ និង​តំណាង​មហាអយ្យការ​លោក​ អ៊ឹម​ ស៊ី​ផា​ ។​
​គួរ​រំលឹក​ថា​ គ្រូបង្រៀន​និង​ប្ដី​ត្រូវ​បាន​សមត្ថកិច្ច​ចាប់ខ្លួន​កាលពី​អំឡុង​ចុងខែ​កញ្ញា​ឆ្នាំ​២០០៩​ ខណៈ​ដែល​គាត់​បាន​ប្រើ​ អំពើ​ហិង្សា​ធ្វើ​ទារុណកម្ម​ទៅ​លើ​កុមារី​ម្នាក់​ជា​កូនចិញ្ចឹម​របស់​ខ្លួន​ បណ្ដាល​ឱ្យ​មាន​ស្នាម​របួស​ដំបៅ​គ្រប់កន្លែង​នៅ​លើ​ ដងខ្លួន​ ជើង​ ដៃ​ ជាដើម​ ។​ អ្នក​ភូមិ​បានឃើញ​ពី​សកម្មភាព​ការ​ធ្វើ​ទារុណកម្ម​របស់​ក្រុម​គ្រួសារ​អតីត​គ្រូបង្រៀន​នេះ​មក​ លើ​កុមារី​រង​គ្រោះ​ ទើប​សមត្ថកិច្ច​ឃាត់ខ្លួន​កសាង​សំណុំរឿង​បញ្ជ្ញូន​មក​សាលាដំបូង​រាជធានី​ភ្នំពេញ​ ហើយ​ក៏​បាន​ប្រកាស​សាលក្រម​ផង​ដែរ​ ផ្ដន្ទាទោស​អតីត​គ្រូបង្រៀន​រូប​នេះ​ចំនួន​២០​ឆ្នាំ​ ហើយ​ប្ដី​របស់​គាត់​ផ្ដន្ទាទោស​ ចំនួន​១០​ឆ្នាំ​ពី​បទ​អំពើ​ហិង្សា​លើ​អនីតិជន​ និង​បទ​លក់ដូរ​មនុស្ស​ ។​ ប៉ុន្ដែ​ការ​ប្រកាស​សាលដីកា​នៅ​សាលាឧទ្ធរណ៍​អតីត​ គ្រូបង្រៀន​ត្រូវ​ផ្ដន្ទាទោស​មក​ត្រឹម​១៨​ឆ្នាំ​ ហើយ​ប្ដី​របស់​គាត់​ត្រឹម​៥​ឆ្នាំទៅ​វិញ​ ៕

ព្រឹត្តិបត្រ​ព័ត៌មាន​និង​ព្យាករណ៍​កម្ពស់​ទឹកជំនន់​សម្រាប់ថ្ងៃ​ទី​៧ខែកញ្ញា​និង​ថ្ងៃ​ទី​៨ដល់​ថ្ងៃ​ទី​១០ខែកញ្ញាឆ្នាំ​២០១២​​


លោក​ គី​ម​ ប៊ុ​ន​ថា​ន​ ចុះ​សំណេះសំណាល​ជាមួយ​ក្រុម​ពង្រឹង​​មូលដ្ឋាន​ឃុំ​អំពិល​ស្រុក​បន្ទាយ​អំពិល​ខេត្តឧត្តរមានជ័យ​

​ខេត្តឧត្តរមានជ័យ​ ៖​ លោក​ គី​ម​ ប៊ុ​ន​ថា​ន​ អនុប្រធាន​ក្រុមការងារ​ថ្នាក់​កណ្តាល​ចុះ​ជួយ​ខេត្តឧត្តរមានជ័យ​ និង​ជា​ប្រធាន​គណៈ​ពង្រឹង​ស្រុក​បន្ទាយ​អំពិល​ រួម​ដំណើរ​ដោយ​លោក​ ច័ន្ទ​ លំ​ផាត់​ សមាជិក​ក្រុមការងារ​ថ្នាក់​កណ្តាល​ចុះ​ជួយ​ខេត្តឧត្តរមានជ័យ​ និង​ជា​អនុប្រធាន​គណៈ​ពង្រឹង​ស្រុក​បន្ទាយ​អំពិល​ ព្រមទាំង​អស់លោក​ក្នុង​ជួរ​គណៈ​ពង្រឹង​ស្រុក​ជា​ច្រើន​រូប​ នា​ព្រឹក​ថ្ងៃ​ទី​៦​ ខែកញ្ញា​ ឆ្នាំ​២០១២​ បាន​ចុះ​ជួប​សំណេះសំណាល​ជាមួយ​ក្រុម​ពង្រឹង​មូលដ្ឋាន​ នៅ​ស្នាក់​ការ​គណបក្ស​ប្រជាជន​កម្ពុជា​ឃុំ​អំពិល​ ស្រុក​បន្ទាយ​អំពិល​ ខេត្តឧត្តរមានជ័យ​ ។​
​ស្ថិត​ក្នុង​ឱកាស​នោះ​លោក​ ខ្លូត​ អ៊ី​វ​ មេឃុំ​អំពិល​បាន​ឲ្យ​ដឹង​ថា​ ឃុំ​អំពិល​មាន​ភូមិ​ចំនួន​២៧​ភូមិ​និង​ ប្រជាជន​សរុប​ ៣.៣៩៦​គ្រួសារ​ ស្មើនឹង​ ១៣.៤០៤​នាក់​(​ស្រី​ ៦.៧១៤​នាក់​)​  ក្នុង​នោះ​អ្នក​ដែល​មាន​អាយុ​ចាប់ពី​ ១៨​ឆ្នាំ​ឡើង​មាន​ចំនួន​ ៨.២៨៥​នាក់​ (​ស្រី​ ៤.២១៥​ )​ ។​
​លោក​មេឃុំ​អំពិល​ក៏​បាន​បញ្ជាក់​បន្ថែម​ពី​ភាព​ងាយស្រួល​ និង​ការ​លំបាក​ ព្រមទាំង​សំណូមពរ​របស់​ប្រជាពលរដ្ឋ​មួយ​ចំនួន​រយៈ​ ពេល​កន្លង​មក​  ហើយ​បច្ចុប្បន្ន​នេះ​កំពុង​ជំរុញ​ឲ្យ​ប្រជាពលរដ្ឋ​អញ្ជើញ​ទៅ​ចុះ​ឈ្មោះ​បោះ​ឆ្នោត​ តាម​សេចក្តីជូនដំណឹង​របស់​គណៈ​ កម្ម​ការ​ជាតិ​រៀបចំ​បោះ​ឆ្នោត​ ដើម្បី​ត្រៀមលក្ខណៈ​បោះ​ឆ្នោត​ជ្រើសតាំង​តំណាងរាស្ត្រ​នីតិកាល​ទី​៥​ ឆ្នាំ​២០១៣​ ខាង​មុខ​ ។​
​មាន​ប្រសាសន៍​ក្នុង​ឱកាស​នោះ​លោក​ គី​ម​ ប៊ុ​ន​ថា​ន​ បាន​ កោតសរសើរ​ចំពោះ​ក្រុមការងារ​គណបក្ស​មូលដ្ឋាន​ឃុំ​អំពិល​ ជា​ពិសេស​ក្រុមការងារ​យុវជន​ភូមិ​ដែល​ជា​និច្ចកាល​បាន​យកចិត្តទុកដាក់​ធ្វើ​សកម្មភាព​ផ្តល់​ព័ត៌មាន​មក​ថ្នាក់លើ​ ដើម្បី​ដោះស្រាយ​បាន​ទាន់​ពេលវេលា​នូវ​សំណូមពរ​ចាំបាច់​របស់​ប្រជាពលរដ្ឋ​ ជាក់ស្តែង​ធ្វើ​ឲ្យ​លទ្ធផល​បោះ​ឆ្នោត​ក្រុមប្រឹក្សា​ឃុំ​-​សង្កាត់​ នៅ​ពេល​ថ្មី​នេះ​ ទទួល​បាន​ជោគជ័យ​គួរ​ឲ្យ​មោទនភាព​ ។​
​បន្ទាប់​មក​លោក​ គី​ម​ ប៊ុ​ន​ថា​ន​ ក៏​បាន​អញ្ជើញ​មេ​ភូមិ​នីមួយៗ​ឡើង​រាយការណ៍​ពី​ចំណុចខ្លាំង​ និង​ចំណុចខ្សោយ​  ហើយ​ ស្រាវជ្រាវ​រក​ឲ្យ​ឃើញ​នូវ​ចំណុច​អវិជ្ជមាន​ដែល​ក្រុមការងារ​គណបក្ស​មូលដ្ឋាន​បាន​អនុវត្តន៍​កន្លង​មក​ ដើម្បី​ធ្វើការ​ដក​ពិសោធន៍​សម្រាប់​ ត្រៀមលក្ខណៈ​បោះ​ឆ្នោត​ជ្រើសតាំង​តំណាងរាស្ត្រ​នីតិ​ត​កាល​ទី​៥​ឆ្នាំ​២០១៣​ ឲ្យ​ទទួល​បាន​លទ្ធផល​ល្អ​ប្រសើរ​បន្ថែម​ទៀត​។​
​លោក​ គី​ម​ ប៊ុ​ន​ថា​ន​ បាន​ផ្តាំផ្ញើ​ដល់​ក្រុមការងារ​ឃុំ​បន្ត​គ្រប់គ្រង​សមាជិក​គណបក្ស​របស់​ខ្លួន​ដោយ​ធានា​ទាំង​បរិមាណ​ និង​ គុណភាព​ ធ្វើ​យ៉ាងណា​ឲ្យ​សំឡេង​គាំទ្រ​មានការ​កើនឡើង​នៅ​ក្នុង​ឃុំ​ ជា​ពិសេស​ត្រូវ​មានឈ្មោះ​ក្នុង​បញ្ជី​បោះ​ឆ្នោត​ និង​មាន​ឯកសារ​ សម្រាប់​ទៅ​បោះ​ឆ្នោត​ ហើយ​បន្ត​ពង្រឹង​តួនាទី​យុវជន​នៅ​តាម​ភូមិ​នីមួយៗ​ផង​ដែរ​ ៕

អាជ្ញាធរ​រាជធានី​ភ្នំពេញ​រៀបចំ​ផែនការមេ​លើ​ដំណើរការ​ដឹក​ជញ្ជូន​ក្នុង​ទីក្រុង​សម្រាប់​ដោះ​ចរាចរ​ឆ្នាំ​២០៣៥

ដោយ​ ៖ សំរិត 
​ភ្នំពេញ​ ៖​ បញ្ហា​ការ​កកស្ទះ​ចរាចរ​វា​និង​បង្ក​ឱ្យ​បាត់បង់​នូវ​ផលប្រយោជន៍​សេដ្ឋកិច្ច​ដ៏​ធ្ងន់ធ្ងរ​ ដល់​សង្គម​ជាតិ​ និង​សេដ្ឋកិច្ច​គ្រួសារ ​ប្រសិនបើ​មិន​មានការ​គិតគូរ​ និង​មាន​ជា​ផែនការមេ​សម្រាប់​រំដោះ​បញ្ហា​នេះ​ទៅ​ថ្ងៃ​អនាគត​ទេ​នោះ​ ។​ ដូច្នេះ​ហើយ​ គម្រោង​ផែនការមេ​លើ​ការងារ​ដឹក​ជញ្ជូន​ក្នុង​ទីក្រុង​សម្រាប់​ឆ្នាំ​២០៣៥​ខាង​មុខ ​ត្រូវ​បាន​អាជ្ញាធរ​រាជធានី​ភ្នំពេញ​លើកយក​មក​ពិភាក្សា​ មុន​និង​សម្រេចដាក់​ជូន​ទៅ​ថ្នាក់​ជាតិ​ ដែល​គម្រោង​នេះ​ក្រោម​ជំនួយ​សិក្សា​របស់​អង្គការ​ JICA ​ជប៉ុន​អស់​រយៈពេល​ជាង​២​ឆ្នាំ​ចុង​ក្រោយ​នេះ​ ។​ កិច្ច​ពិភាក្សា​ត្រូវ​បាន​ធ្វើ​នៅ​សណ្ឋាគារ​សាន់​វ៉េ ​ដោយ​មាន​មន្ដ្រី​ស្ថាន​ប​ន័​ពាក់ព័ន្ធ​ជំនាញ​មក​ពី​ក្រសួង​សាធារណការ​ និង​មន្ទីរ​សាធារណការ​ អាជ្ញាធរ​រាជធានី​ភ្នំពេញ​ ប្រមាណ​ជាង​៥០​នាក់​ នា​ព្រឹក​ថ្ងៃ​ទី​៦​ ខែកញ្ញា​ ឆ្នាំ​២០១២​ ។​
​តាម​ការ​បញ្ជាក់​ឱ្យ​ដឹង​ពី​លោក​ ឃួ​ង​ ស្រេង​ អភិបាលរង​រាជធានី​ភ្នំពេញ​ថា​ ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ​ ដោយសារ​កម្ពុជា​មាន​កំណើន​ផ្នែក​សេដ្ឋកិច្ច​ បាន​ធ្វើ​ឱ្យ​បរិមាណ​នៃ​មធ្យោបាយ​ដឹក​ជញ្ជូន​ក្នុង​ទីក្រុង ​ក៏​មានការ​កើនឡើង​គួរ​ឱ្យ​កត់សម្គាល់​ ហើយ​បាន​បង្ក​ឱ្យ​មានការ​កកស្ទះ​ និង​គ្រោះថ្នាក់​ចរាចរណ៍​ជា​ញឹកញាប់​ ។​ ដើម្បី​ដោះស្រាយ​បញ្ហា​ចរាចរ​ក្នុង​រាជធានី​ភ្នំពេញ​ ឱ្យ​កាន់តែ​ប្រសើរ​ឡើង​នោះ​ ប្រទេស​ជប៉ុន​បាន​ផ្ដល់​ជំនួយ​បច្ចេកទេស​ដល់​សា​លា​រាជធានី​ភ្នំពេញ​នូវ​គម្រោង​២​រួច​មក​ហើយ​ ដូច​ជា​គម្រោង​ផែនការមេ​លើ​ការងារ​ដឹក​ជញ្ជូន​ក្នុង​ទីក្រុង​ ដែល​បាន​រៀបចំ​ឡើង​នៅ​ក្នុង​ឆ្នាំ​២០០១​ និង​គម្រោង​កែ​លម្អ​ចរាចរ​ក្នុង​រាជធានី​ភ្នំពេញ​ ដោយ​បាន​អនុវត្ដ​ចន្លោះ​ពី​ឆ្នាំ​២០០៧​ដល់​ឆ្នាំ​២០១០​ ។​  លោក​បន្ដ​ថា​ តាម​រយៈ​គម្រោង​ទាំង​ពីរ​នេះ​ សមិទ្ធផល​ និង​លទ្ធផល​មួយ​ចំនួន​ត្រូវ​បាន​លេច​ចេញ​ឡើង​ ដូច​ជា​ការ​កែ​លម្អ​ផ្លូវ​ប្រសព្វ​ ភ្លើង​សញ្ញា​ចរាចរ​ និង​សុវត្ថិភាព​ចរាចរ​ជាដើម​ ។​
ប៉ុន្ដែ​ទោះជា​យ៉ាងនេះ​ក្ដី​ ក៏​ពុំ​ទាន់​បាន​ឆ្លើយ​តប​ទៅ​នឹង​តម្រូវការ​នៃ​ការ​ប្រើប្រាស់​របស់​ប្រជាពលរដ្ឋ​ក្នុង​ទីក្រុង​បាន​ឡើយ​ ទើប​តម្រូវ​ឱ្យ​មានការ​សិក្សា​ឡើង​វិញ​នូវ​គម្រោង​ ផែនការមេ​លើ​ការ​ដឹក​ជញ្ជូន​ក្នុង​រាជធានី​ភ្នំពេញ​សម្រាប់​ឆ្នាំ​២០៣៥​ខាង​មុខ​  ។​ ដើម្បី​ឱ្យ​គម្រោង​នេះ​មានការ​សិក្សា​ឡើង​បាន​ល្អ​ប្រសើរ​ឡើង​ ក្នុង​ការ​ធ្វើ​ជា​គន្លឹះ​សម្រាប់​ដោះស្រាយ​បញ្ហា​ចរាចរ​ក្នុង​រាជធានី​ភ្នំពេញ​ឱ្យ​បាន​យូរអង្វែង​  លោក​បាន​ស្នើ​ឱ្យ​អង្គភាព​ពាក់ព័ន្ធ​ទាំងអស់​ត្រូវ​ចូលរួម​សហការ​ឱ្យ​បាន​ល្អ​បន្ថែម​ទៀត​ ជាមួយ​អង្គការ​ចៃ​ការ​ជប៉ុន​ (JICA)​ ដើម្បី​សម្រេច​បាន​នូវ​ផែនការមេ​លើ​ការងារ​ ដឹក​ជញ្ជូន​មួយ​ ដែល​ជា​តម្លាភាព​ និង​តុល្យភាព​ មួយ​ល្អ​បំផុត​ ដើម្បី​ប្រយោជន៍​សម្រាប់​ប្រជាជន​និង​ទីក្រុង​របស់​យើង​ ។​
តាម​របាយការណ៍​របស់​អង្គការ​ចៃ​ការ​ជប៉ុន​បាន​បង្ហាញ​ថា​  គម្រោង​ផែនការ​មេនេះ​នឹង​គ្របដណ្ដប់​លើ​តំបន់​រដ្ឋបាល​ទាំងមូល​នៃ​រាជធានី​ភ្នំពេញ​ចំនួន​ផ្ទៃដី​៦៧៨​គីឡូម៉ែត្រ​ក្រឡា​ ។​  គោលបំណង​នៃ​គម្រោង​គឺ​បង្កើត​ឱ្យ​មាន​ផែនការ​ដឹក​ជញ្ជូន​រថយន្ដក្រុង​ ដ៏​ទូលំទូលាយ​នា​ឆ្នាំ​ ២០៣៥​និង​គោលដៅ​ធ្វើការ​សិក្សា​ សម្រាប់​កំណើន​ប្រជាពលរដ្ឋ​ដែល​ចេះ​តែ​កើនឡើង​ពី​មួយ​ឆ្នាំទៅ​មួយ​ឆ្នាំ​ គ្រាន់តែ​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ​កំណើន​ប្រជាពលរដ្ឋ​ក្នុង​រាជធានី​ភ្នំពេញ​១,៥​លាន​នាក់​ ហើយ​គម្រោង​ខាងលើ​នេះ​និង​បាន​ផ្ដល់​ផលប្រយោជន៍​ដោយ​ប្រយោល​ដល់​ប្រជាជន​ទាំងមូល​ក្នុង​ព្រះរាជា​ណា​ច​ត្រ​កម្ពុជា​ ។
​លោក​ ឃួ​ង​ ស្រេង​ បាន​បញ្ជាក់​ថា​ បច្ចុប្បន្ន​កំណើន​ប្រជាពលរដ្ឋ​ និង​កំណើន​យានយន្ដ​ កាន់តែ​ច្រើន​ឡើង​យ៉ាង​គំហុក​ ដែល​ធ្វើ​ឱ្យ​រាជធានី​ភ្នំពេញ​ត្រូវ​ប្រឈម​ទៅ​នឹង​ការ​កកស្ទះ​ចរាចរ​ និង​បរិស្ថាន​ ។​ សាលា​រាជធានី​នៅ​តែ​បន្ដ​ខិតខំ​ប្រឹងប្រែង​ដោះស្រាយ​បញ្ហា​ចរាចរ​នេះ​យ៉ាង​សកម្ម​បំផុត​ អាជ្ញាធរ​រាជធានី​ភ្នំពេញ​នូវ​ តែ​បន្ដ​ជាមួយ​បណ្ដា​ដៃគូរ​អភិវឌ្ឍន៍​ជាតិ​ និង​អន្ដរជាតិ​នានា​ ដើម្បី​ដោះស្រាយ​បញ្ហា​ការ​កកស្ទះ​ចរាចរ​នេះ​ឱ្យ​ខាន​តែ​បាន​  សំដៅ​ធ្វើ​យ៉ាងណា​ឱ្យ​រាជធានី​ភ្នំពេញ​ ក្លាយជា​រាជធានី​ដ៏​ស្រស់​ប្រឹ​ម​ប្រី​យ៍​ និ​ងស័ក្តិសម​ជាទី​ក្រុង​គុ​ជ​នៅ​អាស៊ី​ ៕​

វប្បធម៌​កម្ពុជា​និង​ឥណ្ឌា​នៅ​តែ​បន្ដ​រឹតចំណង​សាមគ្គីភាព​កាន់តែ​ល្អ​និង​គ្នា​

ដោយ​ ៖ សំរិត
​ភ្នំពេញ​​ ៖​ លោក​ Dinesh​ K.​ Patnaik​ ឯកអគ្គរដ្ឋទូត​ឥណ្ឌា​ថ្មី​ប្រចាំ​នៅ​ព្រះរាជាណាចក្រ​កម្ពុជា ​បាន​លើក​ឡើង​ពី​ចំណង​កិច្ច​សហ​ប្រ​តិ​បត្ត​ការ​ រវាង​ប្រទេស​ទាំង​ពីរ​កម្ពុជា​-​ឥណ្ឌា​ប្រកបដោយ​ផ្លែផ្កា​កន្លង​មក​នៅ​ក្នុង​ឱកាស​ នៃ​ជំនួប​សម្តែង​ការ​គួរសម​ជាមួយ​លោក​ កែប​ ជុតិមា​ អភិបាល​ រាជធានី​ភ្នំពេញ​នា​ព្រឹក​ថ្ងៃ​ទី​៦​ ខែកញ្ញា​ ឆ្នាំ​២០១២​។​
​ក្នុង​ឱកាស​នោះ​ដែរ​ ឯកអគ្គរដ្ឋទូត​ក៍បាន​លើក​ឡើង​ពី​គោលបំណង​ ក្នុង​ការ​រៀបចំ​មជ្ឈមណ្ឌល​វប្បធម៌​នៅ​រាជធានី​ភ្នំពេញ ​ក្នុង​គោលដៅ​រឹតចំណង​ផ្សព្វផ្សាយ​ផ្លាស់​ប្តូរ​វប្បធម៌​រវាង​គ្នា​នឹង​គ្នា​ ។ ​លោក​បាន​លើក​ឡើង​ពី​ដើម​ពោធិព្រឹក្ស​មួយ ​ដើម​ដែល​សម្តេច​អគ្គមហាសេនាបតី​តេ​ជោ​បាន​នាំ​យក​មក​ពី​ប្រទេស​ឥណ្ឌា​កាលពី​ទស​វត្ស​៨០​មក​ដាំ​នៅ​មុខ​ព្រះ​សក្យ​មុ​នី្ន​ចេ​តី​យ ​ក្នុង​រាជធានី​ភ្នំពេញ ​ដោយ​បច្ចុប្បន្ន​គួ​រតែ​មានការ​ថែទាំ​ឲ្យ​បាន​ល្អ​​​ ព្រោះ​ជា​តំណាង​ដែល​ព្រះពុទ្ធ​ទ្រង់​ត្រាស់​ដឹង​នៅ​ក្រោម​ដើម​ពោធិព្រឹក្ស​នេះ ​។​ ជាមួយ​គ្នា​នេះ​ដែរ ​លោក​ក៍បាន​សម្តែង​នូវ​អំណរ​គុណ​ដល់​សាលា​រាជធានី​ភ្នំពេញ​ ដែល​បាន​កសាង​រូបសំណាក​លោក​មហា​ត្មៈ​គ​ន្ធី​ ដែល​ជា​អតីត​នាយក​រដ្ឋមន្ត្រី​នៃ​ប្រទេស​ឥណ្ឌា ​និង​វិ​ថី​មួយ​ដែល​មាន​ឈ្មោះ​ថា ​នេ​រុ ជា​សំណូមពរ​លោក​ក៍បាន​ស្នើ​សុំ​ឱ្យ​មានការ​ដាក់​តាំង​រូប​លោក​ នេ​រុ​ ផង​ដែរ​ ។ ​ក្នុង​គោលដៅ​រឹង​ចំណង​សាមគ្គីភាព​ រវាង​ប្រទេស​ទាំង​ពីរ​ កាន់តែ​ប្រសើរ​ឡើង​ថែម​ទៀត​ពិសេស​ការងារ​បង្កើត​សមត្ថភាព​ធនធានមនុស្ស ភាគី​ឥណ្ឌា​ត្រៀម​រង់ចាំ​ជួយ​បញ្ជូន​មន្ត្រី​ទៅ​សិក្សា​ ដើម្បី​ផ្លាស់​ប្តូរ​បទ​ពិសោធន៍​ជា​និច្ច​។​
​ជា​កិច្ច​ឆ្លើយ​តប​នា​ឱកាស​នោះ ​លោក​អភិបាល​បាន​សម្តែង​នូវ​មនោសញ្ចេតនា​ស្វាគមន៍​យ៉ាង​កក់ក្តៅ​ ជូន​ចំពោះ​លោក​ឯកអគ្គរដ្ឋទូត​ដែល​ទើប​ចូល​កាន់​តំណែង​ថ្មី​នេះ ​ហើយ​លោកបាន​គាំទ្រ​យ៉ាង​ពេញទំហឹង​​នូវ​ការ​លើក​ឡើង​របស់​ឯកអគ្គរដ្ឋទូត​ឥណ្ឌា​ដែល​ស្នើ​ដាក់​រូបសំណាក​ លោក​ ហា​ឡា​ល​នេ​រុ​ នៅ​កន្លែង​ណាមួយ​ ទៀត​ក្នុង​រាជធានី​ភ្នំពេញ​តែ​គួរ​ភាគី​ទាំង​ពីរ​រើស​យក​ពេលវេលា​ណាមួយ​ ដែល​សមរម្យ​និង​មាន​អត្ថន័យ​សម្រាប់​ទំនាក់ទំនង​កិច្ច​សហប្រតិបត្តិការ​នៃ​ប្រទេស​ទាំង​ពីរ​ ពិសេស​សាលា​រាជធានី​ភ្នំពេញ​ត្រៀមលក្ខណៈ​សហការ​ជាមួយ​ស្ថានទូត​ជា​និច្ច​ ក្នុង​ករណី​ដែល​ស្ថានទូត​ត្រូវការ​៕

នាយ​ឧត្ដមសេនីយ៍​ សៅ​ សុខា​ ជំរុញ​ឱ្យ​មន្ដ្រី​​នគរបាល​យុត្ដិធម៌​បន្ដ​គោរព​ក្រមសីលធម៌​វិជ្ជាជីវៈ​

ដោយ​ ៖ វឌ្ឍនា
​ភ្នំពេញ​ ៖ អគ្គមេបញ្ជាការ​រង​នៃ​កង​យោធពលខេមរភូមិន្ទ​ និង​ជា​មេ​បញ្ជា​ការ​កងរាជអាវុធហត្ថ​លើ​ផ្ទៃ​ប្រទេស​ នាយ​ឧត្ដមសេនីយ៍​ សៅ​ សុខា​ បាន​ជំរុញ​ ឱ្យ​មន្ដ្រី​នគរបាល​យុត្ដិធម៌​បន្ដ​អនុវត្ដ​ តួនាទី​ឱ្យ​បាន​ត្រឹមត្រូវ​តាម​ច្បាប់​បំពេញ​ តួនាទី​ប្រកបដោយ​កិត្ដិយស​ គោរព​ក្រម​ សីលធម៌​វិជ្ជាជីវៈ​និង​ប្រកបដោយ​ប្រសិទ្ធ​ភាព​ខ្ពស់​។​
​ការ​ថ្លែង​បែប​នេះ​ត្រូវ​បាន​លោក​លើក​ ឡើង​ក្នុង​កម្មវិធី​បើក​វគ្គ​បណ្ដុះបណ្ដាល​ មន្ដ្រី​នគរបាល​យុត្ដិធម៌​ជំនាន់​ទី​១៨​ កាល​ ពី​ព្រឹក​ថ្ងៃ​ទី​៦​ ខែកញ្ញា​ ឆ្នាំ​២០១២​ នៅ​ លា​លា​កងរាជអាវុធហត្ថ​កំ​បូល​ដោយ​ មានការ​ចូលរួម​ផង​ដែរ​ពី​មន្ដ្រី​កង​រាជ​ អាវុធហត្ថ​លើ​ផ្ទៃ​ប្រទេស​រួម​ទាំង​សិក្ខា​ កាម​ជា​ច្រើន​រូប​ទៀត​។
​នាយ​ឧត្ដមសេនីយ៍​ សៅ​ សុខា​ បាន​បញ្ជាក់​ដែរ​ថា​ កន្លង​មក​មន្ដ្រី​នគរបាល​ យុត្ដិធម៌​តែងតែ​ទទួល​បានការ​កោត​សរ​ សើរ​ វាយតម្លៃ​ ជឿ​ទុកចិត្ដ​ និង​ផ្ដល់​តម្លៃ​ ខ្ពស់​ពី​គ្រប់​មជ្ឈដ្ឋាន​ ទាំង​ប្រមុខ​ថ្នាក់​ដឹក​ នាំ​ ស្ថាប័ន​តុលាការ​ និង​ប្រជាពលរដ្ឋ​ទូទៅ​។​ លោក​លើក​ឡើង​ថា​ “​យើង​ពិត​ ជា​មាន​មោទនភាព​ក្រោយ​ពី​មន្ដ្រី​ដែល​បញ្ចប់​ការ​សិក្សា​បាន​ទៅ​បំពេញ​តួនាទី​ ប្រកបដោយ​កិត្ដិយស​និង​ប្រសិទ្ធភាព​”​។​
​លោក​បន្ដ​ទៀត​ថា​កន្លង​មក​មាន​ក៏​មាន​មន្ដ្រី​យោធា​មួយ​ចំនួន​តូច​បាន​យកឈ្មោះ​ អង្គភាព​តួនាទី​របស់​ខ្លួន​ទៅ​ប្រើប្រាស់​ ខុស​ទៅ​នឹង​ភារកិច្ច​ដើម្បី​បំពេញ​មហិច្ឆតា​របស់​ខ្លួន​ខុស​ក្រមសីលធម៌​វិជ្ជាជីវៈ​ នាំ​ឱ្យ​ខូច​ដល់​កិត្ដិយស​មន្ដ្រី​ស្អាតស្អំ​ដែល​ បាន​បំពេញ​តួនាទី​សម្រាប់​ជាតិ​មាតុភូមិ​។​ លោក​ក៏​បាន​ស្នើ​ឱ្យ​សិក្ខាកាម​ទាំងអស់​ យកចិត្ដទុកដាក់​ គោរព​វិន័យ​ បទបញ្ជា​ របស់​សាលា​ ស្រឡាញ់​ សាមគ្គី​ ប្រឹង​ ប្រែង​សិក្សា​រៀនសូត្រ​ដើម្បី​យកចំណេះ​ ដឹង​ថ្មីៗ​យក​មក​ប្រើប្រាស់​ប្រកបដោយ​ ប្រសិទ្ធភាព​ខ្ពស់​។​
​ថ្លែង​នា​ឱកាស​នេះ​ដែរ​ លោក​វរ​ សេនីយ៍​ទោ​ ហ្វ្រ​ង់​ស្វ័​រ​ដឺ​ពែរ​រី​យេ​ ទីប្រឹក្សា​ បារាំង​ អម​បញ្ជាការដ្ឋាន​កង​រាជ​អាវុធ​ ហត្ថ​លើ​ផ្ទៃ​ប្រទេស​ ក៏​បាន​លើក​ឡើង​ដែរ​ ថា​ មន្ដ្រី​នគរបាល​យុត្ដិធម៌​មាន​សិទ្ធិ​ អំណាច​ និង​តួនាទី​យ៉ាង​សំខាន់​ក្នុង​ការ​ បំពេញ​តួនាទី​ដូច​ជា​ការ​ឃាត់ខ្លួន​មនុស្ស​,​ ការ​ចាត់វិធានការ​ឃាត់ខ្លួន​បណ្ដោះ​ អាសន្ន​,​ ការ​ឆែកឆេរ​ និង​ការ​ចាត់​នីតិ​ វិធី​ក្នុង​ការ​ប្រមូល​យក​ភស្ដុ​តាង​នានា​  ដែល​ការងារ​នេះ​នាំ​ទៅ​រក​ការ​កាត់​បន្ថយ​បទល្មើស​និង​ជា​មាគ៌ា​នាំ​ទៅ​រក​នីតិរដ្ឋ​។​ លោក​បាន​ចាត់​ទុក​ការ​បើក​វគ្គ​បណ្ដុះ​ បណ្ដាល​ជា​បន្ដបន្ទាប់​នា​ពេល​នេះ​គឺ​មាន​ សារសំខាន់​ខ្លាំង​ណាស់​ក្នុង​វិធានការ​កិច្ច​សហប្រតិបត្ដិការ​អស់​រយៈពេល​ជា​ច្រើន​ ឆ្នាំ​រវាង​កងរាជអាវុធហត្ថ​ខ្មែរ​ និង​កង​ រាជ​អាវុធហត្ថ​ជាតិ​បារាំង​ហើយ​បារាំង​ ក៏​ បាន​បញ្ជូន​អ្នកឯកទេស​ពិសេស​មក​ជួយ​បណ្ដុះ​ បណ្ដាល​ដល់​មន្ដ្រី​នគរបាល​យុត្ដិធម៌​កម្ពុជា​។​
​លោក​ឧត្ដមសេនីយ៍ទោ​ ដួង​ សា​រិ​ន​ នាយក​សាលា​កងរាជអាវុធហត្ថ​មាន​ ប្រសាសន៍​ដែរ​ថា​ ចាប់តាំងពី​វគ្គ​ទី​១​ ដល់​វគ្គ​ទី​១៧​សាលា​បាន​បណ្ដុះបណ្ដាល​ មន្ដ្រី​នគរបាល​យុត្ដិធម៌​សរុប​១០៥០​ នាក់​ (​នារី​១០០​នាក់​)​ ហើយ​បាន​បំពេញ​ សិទ្ធិ​ជាម​ន្ដ្រី​នគរបាល​យុត្ដិធម៌​៩២៦​ នាក់​ និង​មាន​មន្ដ្រី​នគរបាល​យុត្ដិធម៌​ ក្នុង​មុខ​តំណែង​ទទួល​បន្ទុក​កិច្ចការ​ព្រហ្ម​ ទណ្ឌ​ចំនួន​៣៩៧​នាក់​។​ លោក​បន្ដ​ទៀត​ថា​ សិក្ខាកាម​នៅ​ក្នុង​វគ្គ​ទី​១៨​នេះ​មាន​ចំនួន​៩០​នាក់​។​ លោក​បញ្ជាក់​ដែរ​ថា​ កម្មវិធី​ សិក្សា​នេះ​មាន​រយៈពេល​សរុប​ចំនួន​៥​ខែ​ចាប់ពី​ថ្ងៃ​ទី​៦​ ខែកញ្ញា​ ឆ្នាំ​២០១២​ដល់​ ថ្ងៃ​ទី​៦​ ខែកុម្ភៈ​ ឆ្នាំ​២០១៣​ ដែល​សិក្ខា​ កាម​ត្រូវ​រៀន​ពី​ទ្រឹស្ដី​ជំនាញ​យោធា​ ចំណេះ​ ដឹង​ទូទៅ​ផ្នែក​ច្បាប់​ ការ​ធ្វើ​បទឧទ្ទេសនាម​ និង​ការ​ចេញ​ទៅ​ធ្វើ​ទស្សនកិច្ច​សិក្សា​ ៕

លោក​ សួន​ ឈាង​លី​ អញ្ជើញ​ជា​អធិបតី​ក្នុង​ពិធី​ប្រជុំ​ត្រួតពិនិត្យ​និង​ជំរុញ​ការងារ​​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​គំរូ​ទី​៣​នៅ​ស្នងការដ្ឋាន​នរ​គ​បាល​ខេត្តកំពង់ចាម​

ដោយ​ ៖ វណ្ណៈ 
​ខេត្តកំពង់ចាម ៖​ កាលពី​ព្រឹក​ថ្ងៃ​ទី​៦​ ខែកញ្ញា​ ឆ្នាំ​២០១២​ នៅ​សាល​ប្រជុំ​នៃ​ស្នងការដ្ឋាន​នគរបាល​ខេត្ត​កំពង់ចាម​ មាន​រៀបចំ​ការ​ប្រជុំ​ត្រួតពិនិត្យ​ និង​ជំរុញ​ការងារ​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​គំរូ​ទី​៣​ ក្រោម​អធិបតីភាព​លោក​ សួន​ ឈាង​លី​ អនុរដ្ឋលេខាធិការ​ក្រសួងមហាផ្ទៃ​,​ លោកឧត្តមសេនីយ៍ទោ​ ហុ​ក​ ធី​ន​ អនុប្រធាន​នាយកដ្ឋាន​កណ្តាល​សណ្តាប់ធ្នាប់​សាធារណៈ​ និង​ជា​អនុប្រធាន​ក្រុមការងារ​ទី​២​ ទទួលខុសត្រូវ​ដឹកនាំ​ត្រួតពិនិត្យ​ការ​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​, លោក​ឧត្តមសេនីយ៍ត្រី​ ឆាយ​ គឹ​មសុ​ន​ ស្នងការ​នគរបាល​ខេត្តកំពង់ចាម​ និង​ស្នងការ​រង​ជា​ច្រើន​រូប​ទៀត​ ។​​ ចូលរួម​ក្នុង​កម្មវិធី​នេះ​ មាន​លោក​អធិការ​ អធិការរង​ទាំង​១៧​ស្រុក​ ក្រុង​ ដែល​ជា​អ្នកដឹកនាំ​ត្រួតពិនិត្យ​ក្នុង​ការ​ធ្វើ​អត្ត​សញ្ញាណ​ប័ណ្ណ​ជូន​ប្រជាពលរដ្ឋ​ក្នុង​ដែន​សមត្ថកិច្ច​រៀងខ្លួន​ ។​
យោង​តាម​ផែនការ​របស់​អគ្គស្នងការ​នគរបាល​ជាតិ​ បាន​ដាក់​ឱ្យ​ខេត្តកំពង់ចាម​ត្រូវ​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​ដល់​ប្រជាពលរដ្ឋ​ ចំនួន​ ២៤៧.២៤៨​នាក់​សម្រាប់ឆ្នាំ​២០១២​ ហើយ​ផែនការ​ជាក់ស្តែង​​ ស្នងការ​នគរបាល​ខេត្តកំពង់ចាម​ត្រូវ​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​ជូន​ប្រជាពលរដ្ឋ​ក្នុង​ឆ្នាំ​២០១២​នេះ​បាន​ចំនួន​ ១៥៨.៣៧៥​នាក់​ ។​
មាន​ប្រសាសន៍​ស្វាគមន៍​គណៈ​អ​ធិ​តី​ក្នុង​ឱកាស​នោះ​ លោក​ឧត្តមសេនីយ៍ត្រី​ ឆាយ​ គឹ​មសុ​ន​ ក៏​បាន​មាន​ផ្តាំផ្ញើ​​​ ​ក្រើនរំលឹក​ដល់​មន្ត្រី​នគរបាល​ដែល​ចុះ​ទៅ​ធ្វើ​អត្តសញ្ញាណប័ណ្ណ​ជូន​ប្រជាពលរដ្ឋ​ទាំង​អស់​ ត្រូវ​ប្រកាន់​ភ្ជាប់​នូវ​ក្រម​សីល​ធ​ម៌​ វិន័យ​ថ្លៃ​ថ្នូរ​​ ​ឱ្យ​ស័ក្តិ​សមជា​មន្ត្រី​នគរបាល​យុ​ត្តិ​ធ​ម៌​ ជាទី​ពឹង​ពុំនាក់​របស់​ប្រជាពលរដ្ឋ​ ។​ លោក​ស្នងការ​បាន​មាន​ប្រសាសន៍​ស​ង្គ​ត់​ធ្ងន់​ថា​​ រាល់​មន្ត្រី​នគរបាល​ធ្វើ​អត្តសញ្ញាណប័ណ្ណ​ដែល​ចុះ​ទៅ​១៧​ស្រុក​ ក្រុង​ សូម​រាល់​ការ​និយាយ​ស្តី​ត្រូវ​មាន​ក្រម​សីល​ធ​ម៌ខ្ជាប់ខ្ជួន ​ត្រូវ​យកចិត្តទុកដាក់​សកម្ម​និង​ការងារ​បម្រើ​ប្រជាពលរដ្ឋ​ដោយ​អស់ពី​ទឹកចិត្ត​ ។​
​ក្នុង​ឱកាស​នោះ​ដែរ​ លោក​ សួន​ ឈាង​លី​ ក៏​បាន​មាន​ប្រសាសន៍​ស​ង្កត់​ធ្ងន់​ទៅ​លើ​ផែនការ​លេខ​ ១​ គឺ​ការងារ​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​ដល់​ប្រជាពលរដ្ឋ​ណា​ដែល​រស់នៅ​តាម​ដង​ទន្លេ​ និង​ក្បែរ​តំបន់​ដែល​មាន​ទឹកជំនន់​ឡើង​ ត្រូវធ្វើ​ឱ្យ​ពួក​គាត់​បាន​មុនគេ​ ​ប្រការ​ខ្លាចក្រែង​ពួក​គាត់​ជួប​ ហានិភ័យ​ដោយ​គ្រោះ​ធម្មជាតិ​នេះ​ ។​ លោក​ សួន​ ឈាង​លី​ ក៏​បាន​មាន​ប្រសាសន៍​ថ្លែងអំណរគុណ​ដល់​លោក​ ជា​ សុ​ផា​រ៉ា​ រដ្ឋមន្ត្រីក្រសួង​អភិវឌ្ឍន៍ជនបទ​ និង​ជា​សមាជិក​គណៈកម្មាធិការ​កណ្តាល​គណបក្ស​ប្រជាជន​កម្ពុជា​ និង​ជា​អនុប្រធាន​ទី​១​ក្រុមការងារ​ចុះ​ជួយ​ខេត្តកំពង់ចាម​​ ដែល​បាន​ផ្តល់​ថវិកាដល់​មន្ត្រី​នគរបាល​ចុះ​ធ្វើ​អត្តសញ្ញាណប័ណ្ណ​ជូន​ប្រជាពលរដ្ឋ​តាម​ស្រុក​ ក្រុង ​ក្នុង​ខេត្តកំពង់ចាម​ទាំងមូល​ ក្នុង​ម្នាក់​២០.០០០​រៀល​ក្នុង​១​ថ្ងៃ​ ។​ លោក​ក៏​បាន​សំណូមពរ​ដល់​មន្ត្រី​នគរបាល​ទាំងអស់​ត្រូវ​អត់​ធ្មត់​​ ទ្រាំ​ការ​លំបាក​ក្នុង​ភារកិច្ច​របស់​ខ្លួន​ ។​ លោក​បន្ត​ថា ​ការ​លំបាក​ថ្ងៃនេះ​មិន​អាច​ប្រៀប​ទៅ​នឹង​ឆ្នាំ​១៩៧៩​នោះ​ទេ ​ហើយ​យើង​មាន​ថ្ងៃនេះ​ក៏​ដោយសារ​គុណ​បំណាច់​ដ៏​ថ្លៃថ្លា​នៃ​ការ​ដឹកនាំ​ដ៏​ឈ្លាសវៃ​របស់​សម្តេច​ទាំង​៣ ​ដែល​មិន​អាច​កាត់ថ្លៃ​បាន​ និង​សូម​សំណូមពរ​ឱ្យ​បងប្អូន​មន្ត្រី​នគរបាលធ្វើ​អត្តសញ្ញាណប័ណ្ណ​ទាំ​ងអស់​​ ប្រឹងប្រែង​ធ្វើ​យ៉ាងណា​ត្រូវធ្វើ​អត្តសញ្ញាណប័ណ្ណ​សញ្ជាតិ​ខ្មែរ​គំរូ​ទី​៣​នេះ​ជូន​ប្រជាពលរដ្ឋ​ឱ្យ​បាន​សម្រេច​ជោគជ័យ​ តាម​ផែនការ​របស់​រាជរដ្ឋាភិបាល​ដាក់​ជូន​ ៕

អង្គជំនុំជម្រះ​តុលាការ​កំពូល របស់​ខ្មែរក្រហម សម្រេច​ចាត់​ចំណាត់​ប្រភេទ​ឡើងវិញ នូវ​ឯកសារ​សម្ងាត់ ចំនួន ១.៧០០ ច្បាប់​

ភ្នំពេញ: អង្គជំនុំជម្រះ​តុលាការ​កំពូល របស់​តុលាការ​ខ្មែរក្រហម បានបញ្ចប់​ការពិនិត្យ​ឡើងវិញ ទៅលើ​ចំណាត់​ប្រភេទ នៃ​ឯកសារ​ជាង ១២.០០០ ដែលជា​ប្រភេទ​ឯកសារ​សម្ងាត់ និង​សម្ងាត់​បំផុត​មួយចំនួនទៀត ក្នុង​សំណុំរឿង ០០១​។ ក្នុងនោះ អង្គជំនុំជម្រះ​បានធ្វើ​ចំណាត់​ប្រភេទ​ឯកសារ​សរុប​ចំនួន ១.៧៤៩ ថា​ជា​ឯកសារ​សាធារណៈ​។ 

​សេចក្តីប្រកាស​របស់​តុលាការ​ខ្មែរក្រហម នៅ​រសៀល​ថ្ងៃទី​៦ ខែកញ្ញា ឆ្នាំ​២០១២ បង្ហាញថា ឯកសារ​ទាំងនេះ មាន​ជាអាទិ៍ ឯកសារ​ក្នុងអំឡុង​របប​កម្ពុជា​ប្រជាធិបតេយ្យ ដែល​រួមមាន “​ចម្លើយសារភាព​” និង​ជីវប្រវត្តិ​របស់​ជនរ​ង​គ្រោះ​, ចម្លើយ​សាក្សី​, ប្រតិ​ចារឹក នៃ​សវនាការ​អសាធារណៈ (in camra) និង​ដីកា​ចាត់​ឲ្យ​ស៊ើបសួរ​ជំនួស​។​

​សេចក្តី​ប្រការ​ព័ត៌មាន បាន​លើកឡើងថា ដំណើរការ​នៃ​ការធ្វើ​ចំណាត់​ប្រភេទ​ឯកសារ​ឡើងវិញ​នេះ ត្រូវបាន​អនុវត្ត​ដោយមាន​ការពិគ្រោះ​យោបល់​យ៉ាង​ទូលំទូលាយ ជាមួយនឹង​ការិយាល័យ​និង​អង្គភាព​នានា​របស់ អ​.​វ​.​ត​.​ក​. និង​ជាពិសេស​ដោយមាន​ការរួម​ចំណែក​ពី​អង្គ​បុ​រ​ជំនុំជម្រះ និង​អង្គ​ជំនុំ​ជ្រះ​សាលាដំបូង ការិយាល័យ​សហ​ព្រះរាជអាជ្ញា អង្គភាព​គាំពារ​ជនរងគ្រោះ អង្គភាព​គាំពារ​សាក្សី​និង​អ្នកជំនាញ និង​ផ្នែក​គ្រប់គ្រង​តុលាការ​។​
 
​សេចក្តីប្រកាស បាន​លើកឡើងថា អង្គជំនុំជម្រះ​តុលាការ​កំពូល បាន​ព្យាយាម​រក្សា​តុល្យភាព​រវាង​លក្ខខណ្ឌ​តម្លាភាព​ចេញពី​គោលការណ៍​ជា​សារវន្ត​ដែល​គ្រប់គ្រង​កិច្ចដំណើរការ​នីតិវិធី​នៅ​ចំពោះមុខ អ​.​វ​.​ត​.​ក​. និង​តម្រូវការ​ក្នុងការ​រក្សា​ការសម្ងាត់ ដើម្បី​ការពារ​ភាព​ឯកជន​របស់​ជនរងគ្រោះ និង​សាក្សី និង​តម្រូវការ​ក្នុងការ​រក្សា​សុចរិត​ភាព​នៃ​កិច្ចដំណើរការ​នីតិវិធី ដែល​កំពុង​អនុវត្ត​។​

​សេចក្តីប្រកាស​ដដែល បាន​បន្តទៀតថា អាស្រ័យហេតុនេះ អង្គជំនុំជម្រះ​យល់ឃើញថា ការផ្សព្វផ្សាយ​ឲ្យ​បាន​ទូលំទូលាយ​នូវ​ឯកសារ​ទាក់ទង​នឹង​កិច្ចដំណើរការ​នីតិវិធី នៅ​ចំពោះមុខ​តុលាការ​នេះ ស្របតាម​អាណត្តិ​របស់ អ​.​វ​.​ត​.​ក​. ដែល​រួមចំណែក​ដល់​ការផ្សះផ្សា​ជាតិ និង​ដើម្បី​គាំទ្រ​ដល់​ដំណើរការ​នាពេល​បច្ចុប្បន្ន ក្នុងការ​ស្វែងរក​ការពិត​ក្នុង​ប្រវត្តិសាស្ត្រ​។ 

​អង្គជំនុំជម្រះ​សង្ឃឹមថា ការណ៍​ដែល​សាធារណជន​ទូទៅ អ្នកស្រាវជ្រាវ និង​អ្នកសារព័ត៌មាន មានលទ្ធភាព​ច្រើន ក្នុង​ការចូលទៅ​ប្រើប្រាស់​ឯកសារ​ក្នុង​សំណុំរឿង នឹង​ជួយ​លើកកម្ពស់​ការពិភាក្សា​ជា​សាធារណៈ និង​ដោយ​ស្មោះត្រង់​អំពី​សោក​នា​កម្ម​នៅ​ប្រទេស​កម្ពុជា​ក្នុង​អតីតកាល ដោយ​ផ្អែកទៅលើ​ភ័ស្តុ​តា​ច្បាស់លាស់ ដើម្បី​ជួយ​កាត់បន្ថយ​ជា​អតិបរមា ចំពោះ​ការមិនទទួលស្គាល់​ការ​បំភ្លៃ​អង្គហេតុ និង​ការបង្ហាញ​ការពិត​តែមួយ​ផ្នែក​ណា​នោះ​។​

​សេចក្តីប្រកាស បានបង្ហាញ​ទៀតថា ឯកសារ​ចំនួន ៣ ភាគ​៤ ទៀត នៃ​ឯកសារ ១២.០០០ នេះ ត្រូវបាន​ចាត់ថ្នាក់​ក្នុង​សំណុំរឿង​០០២ សំណុំរឿង​០០៣ និង​សំណុំរឿង​០០៤​។ ដូច្នេះ​ឯកសារ​ទាំងនោះ នឹងត្រូវ​ពិនិត្យ​ចាត់​តំ​ណាត់​ប្រភេទ​ឡើងវិញ នៅពេលដែល​កិច្ចដំណើរការ​នីតិវិធី​ពាក់ព័ន្ធ​នឹង​ឯកសារ​ទាំងនោះ បាន​ចប់សព្វគ្រប់​។ អង្គជំនុំជម្រះ​តុលារ​កំពូល បានស្នើ​អង្គភាព​បណ្ណសារ​ឲ្យ​អនុវត្ត​សេចក្តីសម្រេច​នេះ និង​ដាក់​បញ្ជី​ឯកសារ ដែល​ត្រូវបាន​កំណត់ថា ជា​ឯកសារ​សាធារណៈ​ទៅក្នុង​សំណុំរឿង​៕​

សមាជិកសភាបក្សប្រជាជនកម្ពុជា ប្រតិកម្មតបលោក ស៊ូយ៉ា ស៊ូប៊ែឌី

ភ្នំពេញ​: ​មន្ត្រីជាន់ខ្ពស់​រាជរដ្ឋាភិបាល​កម្ពុជា ក៏ដូចជា​សមាជិកសភា បានចាត់ទុក​លោក ស៊ូ​យ៉ា ស៊ូ​ប៊ែ​ឌី អ្នករាយការណ៍​ពិសេស​ផ្នែក​សិទ្ធិមនុស្ស នៃ​អង្គការសហប្រជាជាតិ​ប្រចាំ​នៅ​កម្ពុជា​នោះ​ថា ជា​អ្នក​ចាំតែ​និយាយ​ត្រាប់​តាម​ពីក្រោយ​មន្ត្រី​គណបក្សប្រឆាំង និង​អង្គការ​សង្គម​ស៊ីវិល​មួយចំនួន​តែប៉ុណ្ណោះ​។​

​លោក ជាម យៀប សមាជិកសភា​មណ្ឌល​ព្រៃវែង នៃ​គណបក្ស​ប្រជាជន​កម្ពុជា ដែលមាន​អាសនៈ​ក្នុង​រដ្ឋសភា​យ៉ាងច្រើន​លើសលប់ (៥​កញ្ញា ឆ្នាំ​២០១២) បាន​មានប្រសាសន៍​ប្រតិកម្ម​តប​ទៅនឹង​លោក ស៊ូ​យ៉ា ស៊ូ​ប៊ែ​ឌី អ្នករាយការណ៍​ពិសេស​ផ្នែក​សិទ្ធិមនុស្ស នៃ​អង្គការសហប្រជាជាតិ​ប្រចាំ​នៅ​កម្ពុជា ថា លោក ស៊ូ​យ៉ា ស៊ូ​ប៊ែ​ឌី និង​ជា​សាស្ត្រាចារ្យ​មួយរូប ក៏បាន​ដឹង​ដែរ​ថា សហរដ្ឋអាមេរិក​នៅពេល​បច្ចុប្បន្ននេះ មិនមែនជា​ប្រទេស​ដែល​អនុវត្ត​ការគោរព​សិទ្ធិមនុស្ស​បាន​មួយរយ​ភាគរយ​ដែរ គឺ​តែងតែមាន​ការខ្វះចន្លោះ នៅ​កន្លែង​ខ្លះ​មិន​ខាន​ទេ​។​

​លោក ជាម យៀប បាន​មានប្រតិកម្ម​តប​ទៅ​ថា នៅ​ប្រទេស​កម្ពុជា សូម​លោក ស៊ូ​យ៉ា ស៊ូ​ប៊ែ​ឌី កុំ​រាប់រាប់​ដើមឈើ​មួយ​ដើមៗ ថា​ជា​ព្រៃឈើ គឺ​មិនមែន​ទេ ត្រូវតែ​រាប់​ព្រៃ​ទាំងមូល​ផង ហើយ​ត្រូវ​ចេះ​ពិនិត្យ​ឲ្យ​បានច្បាស់លាស់​ថា តើ​បញ្ហា​អនុវត្ត​សិទ្ធិមនុស្ស​នៅ​កម្ពុជា ត្រូវបាន​រាជរដ្ឋាភិបាល​អនុវត្ត​បាន​ប៉ុណ្ណា​ហើយ​។​

​លោក​បាន​បន្តថា ការគោរព​សិទ្ធិមនុស្ស​នៅ​កម្ពុជា រាជរដ្ឋាភិបាល​មិនបាន​ព្រងើយកន្តើយ​ទេ ហើយ​អរគុណ​ហើយ​ដែល​លោក ស៊ូ​យ៉ា ស៊ូ​ប៊ែ​ឌី បាន​ជួយ​ឈឺឆ្អាល​នោះ តែ​យើងខ្ញុំ​ក៏បាន​ខិតខំ​ដែរ ធ្វើយ៉ាងណា​ឲ្យ​ការគោរព​សិទ្ធិមនុស្ស​នេះ ត្រូវបាន​ពង្រឹង​ជា​បណ្តើរៗ ទៅជា​ជំហានៗ តាម​លទ្ធភាព​ដែល​រាជរដ្ឋាភិបាល​កម្ពុជា​ធ្វើទៅបាន​។​

​លោក ជាម យៀប បាន​មានប្រសាសន៍​ទៀតថា ចំពោះ​ការលើកឡើង​របស់លោក ស៊ូ​យ៉ា ស៊ូ​ប៊ែ​ឌី ដូចជា បឹងកក់ និង​បុរី​កីឡា​នោះ មិនមែន​មានតែ​រឿង​ប៉ុណ្ណឹង​ទេ គឺ​នៅ​មានរឿង​ជាច្រើន​ទៀត ដូចជា អ្នក​ចំណាកស្រុក និង​អ្នករស់នៅ​ក្រៅ​ស្រុក គ្មាន​លទ្ធភាព​ទិញ​សំបុត្រ​យន្តហោះ មក​ចូលរួម​បោះឆ្នោត​នៅ​ប្រទេស​កម្ពុជា​បានទេ ដូច្នេះ​លោក ស៊ូ​យ៉ា ស៊ូ​ប៊ែ​ឌី ត្រូវតែ​និយាយ​ឲ្យ​មាន​តម្លាភាព ឲ្យ​បានច្បាស់លាស់ និង​ថ្លឹងថ្លែង សំយោគ វាយតម្លៃ​ឲ្យ​បាន​ច្បាស់ ចាំ​ដាក់​ចូលក្នុង​របាយការណ៍​របស់ខ្លួន​។​

​លោក ជាម យៀប បញ្ជាក់ថា “​លោក ស៊ូ​យ៉ា ស៊ូ​ប៊ែ​ឌី នេះ គាត់​ច្រើន​ស្តាប់​តែ​ម្ខាងៗ គឺ​ស្តាប់​តែ​គណបក្សប្រឆាំង ដែល​មិនសូវ​ត្រូវ​ជាមួយ​រាជរដ្ឋាភិបាល គេ​ប្រឆាំង​ជាមួយ​គណបក្ស​ប្រជាជន​កម្ពុជា​។ បន្ទាប់បី​ស្តាប់​គណបក្សប្រឆាំង​រួច គាត់​តែងតែ​លើក​បញ្ហា​នោះមក​និយាយ​ដដែលៗ ដូចជា គ​.​ជ​.​ប​. អី​នោះ គាត់​ឈឺឆ្អាល​ជាង​ប្រជាពលរដ្ឋ​ខ្មែរ​ទៅទៀត​”​។​

​លោក​បាន​បន្ថែមថា “​ចំពោះ​បញ្ហា​គោរព​សិទ្ធិមនុស្ស​នៅ​កម្ពុជា ប្រទេស​ក្នុង​អាស៊ាន​ធ្វើបាន​អី យើង​ធ្វើបាន​ដូច​គេ​ដែរ មិន​ចាញ់​គេ​ទេ​”៕

សមាជិកសភា​ថា គ្មាន​អ្នកណារារាំង​លោកសមរង្ស៊ី មិនឲ្យ​ចូល​ស្រុក

ភ្នំពេញ: នៅពេលនេះ លោក សម រង្ស៊ី មេ​ដឹកនាំគណបក្សប្រឆាំង ដែល​និរទេស​នៅ​ក្រៅ​ប្រទេស មិន​អាច​វិល​​មក​កាន់​ប្រទេស​កម្ពុជា ដើម្បី​ប្រឡូក​ក្នុង​នយោបាយ​ ដោយផ្ទាល់​ឡើងវិញ បាន​ឡើយ​។ ក៏​ប៉ុន្តែ​លោក ជាម យៀប សមាជិកសភា មកពី​គណបក្ស​ប្រជាជន​​កម្ពុជា ដែលកំពុង​ដឹកនាំ​រាជរដ្ឋាភិបាល បាន​លើកឡើង​ថា នៅ​កម្ពុជា គ្មាន​អ្នក​ណា រារាំង​លោកសមរង្ស៊ី មិនឲ្យ​ចូល​ស្រុកទេ​។​

លោក ជាម យៀប ដែល​ជា​មន្ត្រី​ជាន់ខ្ពស់​គ​ណ​បក្ស​ប្រជាជន​កម្ពុជា បាន​មានប្រសាសន៍ថា ក្នុងនាម​លោក​ជា​សមាជិក​គណៈកម្មាធិកា​រ​អចិន្ត្រៃយ៍ នៃ​រដ្ឋសភា លោក​បាន​តាមដាន​រឿង​លោក​សម​រង្ស៊ី ហើយ​ឃើញ​ថា អត់​មាន​អ្នកណា​លើកឡើង ឬ​ដេញ​ចោល ឬ​រារាំង​ទៅ​នឹង​ការ​ចូល​ស្រុក​របស់​លោក​សម​រង្ស៊ី​ទេ​។​

​លោក ជាម យៀប បានបញ្ជាក់​ថា "​គ្មាន​អ្នកណា ឃាត់ឃាំង​អី​គាត់​ទេ​។ គាត់​ចូល​មក​។ ប៉ុន្តែ​គាត់​ចូលមក គាត់​ត្រូវ​គោរព​អនុវត្ត អ្វី​ដែល​ជា​សាលដីកា និង​សាលក្រម​របស់​តុលាការ ដែល​ជា​ច្បាប់​"​។​

​ចំពោះ​ករណី​តុលាការ​ផ្តន្ទាទោស​ដាក់​ពន្ធនាគា​រ កំបាំង​មុខ​ លោក​សម​រង្ស៊ី ត្រូវបាន​លោក ជាម យៀប បញ្ជាក់​ជា​ថ្មី​ម្តងទៀត​ថា ករណី​លោក​សម​រង្ស៊ី មិនមែន ជា​រឿង​នយោបាយ​ទេ​។ ការងារ​នេះ ជា​ការងារ​បច្ចេកទេស​របស់​តុលាការ​។​

​លោក​ ជាម​ យៀប បានបញ្ជាក់​ថា "​អ៊‌ីចឹង​ទេ សុំ​ឲ្យ​គាត់​ចូល​មក​។ គ្មាន​អ្នកណា​ទៅ​ឃាត់ឃាំង​អី​ទេ គឺ​នរណា​ក៏​គ្មាន​សិទ្ធិ​ទៅ​ឃាត់ឃាំង​លោក​ សម​ រង្ស៊ី មិន​ឲ្យ​គាត់ចូលមក​ប្រទេស​កម្ពុជា​នោះទេ​។ តែ​បន្ទាប់​ពី​គាត់​មក​ដល់ គាត់ ​(​សម រង្ស៊ី​) ត្រូវតែ​គោរព​តាម​អំណាច​សាលដីកា ​ឲ្យបាន​ចប់​ជា​មុន​សិន តែ​ប៉ុណ្ណឹង​ទេ​"​។​

​ការលើក​បញ្ជាក់​ជា​ថ្មី​របស់​លោក​ ជាម​ យៀប ខាងលើនេះ បាន​ធ្វើឡើង ចំ​ពេល​ដែល​ខុទ្ទកាល័យ​គណបក្ស​សមរង្ស៊ី បាន​ផ្សព្វផ្សាយ​ថា លោក​សម​រង្ស៊ី គ្រោង​នឹង​ចូលរួម​វេទិកា​របស់​ក្រុមប្រឹក្សា​អ្នក​ប្រជាធិបតេយ្យ​សេរី​អាស៊ី ហៅ​កាត់​ថា CALD នៅ​ប្រទេស​ហ្វីលីពីន នៅ​សប្ដាហ៍​ក្រោយ​។ លោក សម រង្ស៊ី នឹង​ថ្លែង​អំពី​បរិយាកាស​នយោបាយ នៅ​កម្ពុជា ហើយ​នៅពេល​នោះ លោក​នឹង​ជួប​សន្ទនារ​ជាមួយ​មន្ត្រីជាន់ខ្ពស់​របស់​ប្រទេស​ហ្វីលីពីន​។​

​យ៉ាងណាក៏ដោយ លោកស្រី មូរ សុខ​ហួរ ប្រធាន​លេខាធិការដ្ឋាន​ចលនា​ប្រជាធិបតេយ្យ​សង្គ្រោះ​ជាតិ បាន​លើក​ឡើង​កាលពី​ថ្ងៃ​ទី​៥ ខែ​កញ្ញា ឆ្នាំ​២០១២ ថា ការស្វែងរក​កិច្ច​ជួយ​អន្តរា​គម​ន៏​របស់លោក សម រង្ស៊ី ពី​សំណាក់​មេដឹកនាំ​ធំៗ នៅ​ក្រៅ​ប្រទេស​នោះ បាន​ទទួល​លទ្ធផល​ជា​បណ្តើរៗ​ហើយ ដែល​អាច​ផ្តល់​លទ្ធភាព​ឲ្យ​លោក​សម​រង្ស៊ី ចូល​មក​កាន់​ប្រទេស ដើម្បី​ចូលរួម​ការបោះឆ្នោតជាតិ នៅ​ឆ្នាំ​២០១៣ ខាងមុខនេះ​៕​

គម្រោង​អភិវឌ្ឍ​តាមបែប​ប្រជាធិបតេយ្យ នៅ​ថ្នាក់ក្រោម​ជាតិ ត្រូវបាន​ពិភាក្សា​


ភ្នំពេញ: គណៈកម្មាធិការ​ជាតិ សម្រាប់​ការអភិវឌ្ឍ​តាមបែប​ប្រជាធិបតេយ្យ នៅ​ថ្នាក់ក្រោម​ជាតិ បាន​បើក​កិច្ចប្រជុំ​លើក​ទី​៧ កាលពី​ព្រឹក​ថ្ងៃទី​៦ ខែកញ្ញា ឆ្នាំ​២០១២​។ កិច្ចប្រជុំ ដែល​ដឹកនាំ​ដោយ​លោក ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ និង​លោក គាត ឈន់ ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បានធ្វើ​ឡើង បន្ទាប់ពី​កិច្ចប្រជុំ លើក​ទី​៦ របស់​គណៈកម្មាធិការ​នេះ កាលពី​ថ្ងៃទី​២៦ ខែមករា ឆ្នាំ​២០១២​។​

​លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួងមហាផ្ទៃ និង​ជា​ប្រធាន គ​.​ជ​.​អ​.​ប​. បាន​លើកឡើងថា ក្នុង​រយៈពេល ៨​ខែ ដើមឆ្នាំ​២០១២ មាន​សមិទ្ធផល​ជាច្រើន ដែល​សម្រេចបាន ក្នុងនោះ រួមមាន​៖ សមិទ្ធផល​ពាក់ព័ន្ធ​នឹង​ការពង្រឹង​បណ្តើរៗ នូវ​ភាពជា​ម្ចាស់ការ របស់​រដ្ឋបាល​ថ្នាក់ក្រោម​ជាតិ លើ​កិច្ច​អភិវឌ្ឍ​មូលដ្ឋាន​របស់ខ្លួន​។ ការផ្តល់​អន្តរាគមន៍ សម្រាប់​ការអភិវឌ្ឍ​សមត្ថភាព​ដល់​ក្រុមប្រឹក្សា និង​អង្គភាព​រដ្ឋបាល​របស់​ថ្នាក់ក្រោម​ជាតិ ការរៀបចំ​សេចក្តីព្រាង​គោលនយោបាយ គ្រប់គ្រង​បុគ្គលិក​របស់​រដ្ឋបាល​ថ្នាក់ក្រោម​ជាតិ ការរៀបចំ​លិខិតបទដ្ឋាន ពាក់ព័ន្ធ​នឹង​ការផ្ទេរ​មុខងារ និង​ធនធាន​ទៅ​ឲ្យ​ដល់​រដ្ឋបាល​ថ្នាក់ក្រោម​ជាតិ​។ ការបង្កើត​មូលនិធិ​ក្រុង ស្រុក និង​ការសិក្សា​អំពី​ជម្រើស​នានា​សម្រាប់ ការកំណត់ និង​ផ្តល់នូវ​ប្រភព ចំណូល​ផ្ទាល់​ដល់​រដ្ឋបាល​ថ្នាក់ក្រោម​ជាតិ​។ 

​លោក​ឧបនាយករដ្ឋមន្ត្រី ស ខេង បាន​លើកឡើងថា គណៈកម្មាធិការ​នេះ ក៏បាន​សម្រេចបាន ដោយ​ធ្វើការ​សិក្សា ដើម្បី​កែលំអ​ប្រព័ន្ធ​កសាង​ផែនការ​របស់​រដ្ឋបាល​ថ្នាក់ក្រោម​ជាតិ​។ ការពិភាក្សា​អំពី​ជម្រើស​នានា ក្នុងការ​បង្កើត​សហគម ក្រុមប្រឹក្សា​រដ្ឋបាល​ថ្នាក់ក្រោម​ជាតិ​។ ការពង្រឹង​យន្តការ​នៃ​ការបញ្ជ្រាប យែ​ន​ឌ័​រ នៅក្នុង​កិច្ចដំណើរការ​កំណែទម្រង់​។ ការកែលំអ​រចនាសម្ព័ន្ធ និង​ការប្រព្រឹត្តទៅ នៃ​លេខាធិកា​ដ្ឋា​ន គ​.​ជ​.​អ​.​ប​. ការ​កៀរគរ​ធនធាន និង​ការគាំទ្រ​ពី​ដៃគូ​អភិវឌ្ឍន៍ អង្គការ​សង្គម​ស៊ីវិល និង​អ្នកពាក់ព័ន្ធ​នានា ព្រមទាំង​ការខិតខំ​សម្របសម្រួល សំដៅ​ធានា​ឲ្យ​មាន​ស្ថិរភាព រវាង​កិច្ចដំណើរការ​កំណែទម្រង់​ការគ្រប់គ្រង​ហិរញ្ញវត្ថុ​សាធារណៈ កំណែទម្រង់រដ្ឋបាល​សាធារណៈ និង​កំណែទម្រង់​តាម​វិស័យ​នានា ជាមួយនឹង​កិច្ចដំណើរការ នៃ​កំណែទម្រង់​ការអភិវឌ្ឍ​តាមបែប​ប្រជាធិបតេយ្យ​នៅ​ថ្នាក់ក្រោម​ជាតិ​។​

​លោក​ឧបនាយករដ្ឋមន្ត្រី ស ខេង បានលើកឡើង​បន្តថា សកម្មភាព​និង​សមិទ្ធផល ដែល​សម្រេចបាន​នៅក្នុង​៨​ខែ ដើមឆ្នាំ​២០១២​នេះ គឺ​ជាវ​ឌ្ឍ​ភាព ដ៏​សំខាន់​មួយ​បន្ថែមទៀត ក្នុងការ​ជំរុញ​ឲ្យ​ដំណើរការ​កំណែទម្រង់ ការអភិវឌ្ឍ​តាមបែប​ប្រជាធិបតេយ្យ នៅ​ថ្នាក់ក្រោម​ជាតិ អាច​បោះជំហាន​ទៅមុខ ស្របតាម​ទស្សនវិស័យ នៃ​គោលនយោបាយ យុទ្ធសាស្ត្រ​ស្តីពី​កំណែទម្រង់ វិមជ្ឈការ និង​វិសហមជ្ឈការ ច្បាប់រៀបចំអង្គការ និង​កម្មវិធី​ជាតិ រយៈពេល​១០​ឆ្នាំ​។ 

​លោក ស ខេង បាន​លើកឡើងថា ក្នុង​របៀបវារៈ ក្នុង​កិច្ចប្រជុំ​នេះ លេខាធិការដ្ឋាន គ​.​ជ​.​អ​.​ប​. នឹង​រាយ​កាណ៍​អំពី​វឌ្ឍនភាព និង​បញ្ហា​ប្រឈម នៃ​កិច្ចដំណើរការ កំណែទម្រង់ នៅក្នុង​ឆមាស​ទី​១ នៃ​ឆ្នាំ​២០១២​នេះ​។​

​លោក​រដ្ឋមន្ត្រី ស ខេង បាន​មានប្រសាសន៍​បន្តថា ទន្ទឹមនឹង​ការសម្រេចបាន​នូវ​វឌ្ឍនភាព គួរ​ជាទី​ម​ទ​នៈ​នេះ ក៏​នៅមាន​បញ្ហា ប្រឈម​ជាច្រើន ដែល​ត្រូវផ្តោត​ការយកចិត្តទុកដាក់ ដោះស្រាយ ដើម្បី​ជំរុញ​ឲ្យ​កិច្ចដំណើរការ​កំណែទម្រង់ សម្រេចបាន​នូវ​គោលដៅ​រយៈពេល​វែង ដែល​បានកំណត់​នៅក្នុង​ច្បាប់រៀបចំអង្គការ និង​កម្មវិធី​ជាតិ​។ 

​លោក ស ខេង បាន​លើកឡើងថា ក្នុងនោះ​ក៏មាន​បញ្ហា​ប្រឈម​មួយចំនួន ដែល​ត្រូវ​ដោះស្រាយ​រួមមាន ទី​១-​អំពី​កា​រៀបចំ​ប្រព័ន្ធ​ហិរញ្ញវត្ថុ​ដល់​រដ្ឋបាល​ថ្នាក់ក្រុង ស្រុក​។ ទី​២-​ការផ្ទេរ​មុខងារ និង​ធនធាន​ឲ្យ​ទៅ​រដ្ឋបាល​ថ្នាក់ក្រោម​ជាតិ ពាក់ព័ន្ធ​នឹង​បញ្ហា​នេះ លោក​ឧបនាយករដ្ឋមន្ត្រី បានទទួល​សេច​ក្តិ​រាយ​កាណ៍​ថា មកទល់ពេលនេះ មាន​ក្រសួង​ចំនួន ៥ ដែល​ស្ថិតក្នុង​វិស័យ​អាទិភាព ពោលគឺ​ក្រសួង​អប់រំ យុវជន និង​កីឡា ក្រសួងសុខាភិបាល ក្រសួងកសិកម្ម រុក្ខាប្រមាញ់ និង​នេសាទ ក្រសួង​អភិវឌ្ឍន៍ជនបទ និង​ក្រសួង​សង្គមកិច្ច អតីតយុទ្ធជន និង​យ​វ​នីតិសម្បទា​។ 

​ទន្ទឹមនឹងនោះ លោក​ឧបនាយករដ្ឋមន្ត្រី ស ខេង ក៏បានផ្តល់​ការលើកទឹកចិត្ត​ដល់​ក្រសួង ស្ថាប័ន​ពាក់ព័ន្ធ​នានា ផ្សេងទៀត ក្នុងការ​ផ្តោត ការយកចិត្តទុកដាក់ លើ​ការចាប់ផ្តើម និង​ជំរុញ​ដល់​ការរៀបចំ​កិច្ចដំណើរការ​ផ្ទេរ​មុខងារ និង​ធនធាន​នៅក្នុង​ក្រសួង ស្ថាប័ន របស់ខ្លួន បន្ទាប់ពី​មាន​គោលការណ៍​ណែនាំ ស្តីពី​ការរៀបចំ​បញ្ជីវិភាគ​មុខងារ​នេះ ត្រូវបាន​អនុម័ត​ដោយ​កិច្ចប្រជុំ​នាពេលនេះ​។ ទី​៣- អំពី​ការពង្រឹង​ស្ថាប័ន​នៃ​រដ្ឋបាល​ថ្នាក់ក្រោម​ជាតិ​។ ទី​៤- អំពី​ការរៀបចំ​ប្រព័ន្ធគ្រប់គ្រង​បុគ្គលិក រដ្ឋបាល​ថ្នាក់ក្រោម​ជាតិ និង​ទី​៥- អំពី​ការកែសម្រួល​ប្រព័ន្ធ​កសាង​ផែនការ​រដ្ឋបាល​ថ្នាក់ក្រោម​ជាតិ​។​

​លោក​ឧបនាយករដ្ឋមន្ត្រី ស ខេង បានបញ្ជាក់​បន្ថែមថា បញ្ហា​ប្រឈម ដែលជា​គន្លឹះ​មួយចំនួន​ខាងលើនេះ នឹង​អាច​ដោះស្រាយបាន​មួយផ្នែកធំ តាមរយៈ​កិច្ចប្រជុំ​លើក​ទី​៧ រយៈពេល​មួយថ្ងៃ​នេះ ដោយសារ​កិច្ចប្រជុំ​នេះ នឹង​ផ្តោតទៅលើ​របៀបវារៈ​សំខាន់ៗ​ជាអាទិ៍​៖

១- កាពិ​និត្យ និង​អនុម័ត​លើ​កំណត់ហេតុ​នៃ​កិច្ចប្រជុំ​លើក​ទី​៦ របស់ គ​.​ជ​.​អ​.​ប​.​។​
២- ការពិភាក្សា​លើ​សេចក្តីព្រាង​អនុក្រឹត្យ​ស្តីពី​ប្រព័ន្ធគ្រប់គ្រង ហិរញ្ញវត្ថុ​ក្រុង ស្រុក របាយការណ៍ វឌ្ឍនភាព នៃ​ការរៀបចំ​លិខិតបទដ្ឋាន​ផ្សេងៗ ពាក់ព័ន្ធ​នឹង​ការអនុវត្ត​មូលនិធិ​ក្រុង ស្រុក និង​របាយការណ៍ ស្តីពី​ការវិភាជន៍​មូលនិធិ​ក្រុង ស្រុក សម្រាប់​ឆ្នាំ​២០១៣​។​
៣- ការពិភាក្សា និង​អនុម័ត លើ​សេចក្តីណែនាំ​ស្តីពី​ការរៀបចំ​បញ្ជីវិភាគ មុខងារ របស់​ក្រសួង ស្ថាប័ន មន្ទីរ អង្គភាព​នានា និង​អាជ្ញាធរ​គ្រប់ លំដាប់ថ្នាក់​។​
៤- របាយការណ៍​ប្រចាំឆមាស​ទី​១ ស្តីពី​ការអនុវត្ត​ផែនការ​សកម្មភាព និង​ថវិកា របស់ គ​.​ជ​.​អ​.​ប​. ឆ្នាំ​២០១២​។​
៥- បញ្ហា​ផ្សេងៗ ដែល​ក្នុងនោះ រួមមាន​ការងារ​បញ្ជ្រាប​យែ​ន​ឌ័​រ និង​ការលើកកម្ពស់​ភាព​អង់អាច​របស់​ស្ត្រី​៕