ភ្នំពេញ: សហព្រះរាជអាជ្ញា បានប្តឹងសាទុក្ខជំទាស់នឹងសេចក្តីសម្រេចរបស់អង្គជំនុំជម្រះសាលាដំបូង របស់តុលាការខ្មែរក្រហម ដែលបានសម្រេច ដោះលែងជនជាប់ចោទ លោកស្រី អៀង ធីរិទ្ធ កាលពីថ្ងៃទី១៣ ខែកញ្ញា ឆ្នាំ២០១២។
សេចក្តីសម្រេចជាលើកទី២ ក្នុងការដោះលែងលោកស្រី អៀង ធីរិទ្ធ ត្រូវបានអង្គជំនុំជម្រះសាលាដំបូង សំអាងថា លោកស្រី អៀង ធីរិទ្ធ អាយុ ៨០ ឆ្នាំ ជាអតីតរដ្ឋមន្ត្រីក្រសួងសង្គមកិច្ចខ្មែរក្រហម ពិតជាមានជំងឺវង្វេងវង្វាន់ធ្ងន់ធ្ងរ និងមិនអាចព្យាបាលបានឡើយ ទោះបីជាក្រុមគ្រូពេទ្យ បានព្យាយាមអស់រយៈពេលជាងកន្លះឆ្នាំក៏ដោយ។ ពោលគឺលោកស្រី អៀង ធីរិទ្ធ មិនមានសម្បទាខាងបញ្ញាស្មារតីគ្រប់គ្រាន់ ដើម្បីចូលរួមក្នុងសវនាការ ចំពោះឧក្រិដ្ឋកម្មប្រឆាំងនឹងមនុស្សជាតិ ដូចបានចោទប្រកាន់ ដែលបានប្រព្រឹត្តក្នុងអំឡុងនៃកម្ពុជាប្រជាធិបតេយ្យទេ។
សេចក្តីប្រកាសព័ត៌មាន របស់អង្គជំនុំជម្រះវិសាមញ្ញក្នុងតុលាការកម្ពុជា ចុះថ្ងៃទី១៤ ខែកញ្ញា ឆ្នាំ២០១២ បង្ហាញថា សហព្រះរាជអាជ្ញាយល់ស្របទាំងស្រុង ជាមួយអង្គជំនុំជម្រះសាលាដំបូង ថា លោកស្រី អៀង ធីរិទ្ធ គួរត្រូវបានដោះលែងពីមន្ទីរឃុំឃាំង ដោយផ្អែកតាមការរកឃើញរបស់អ្នកជំនាញជាតិ និងអន្តរជាតិ ដែលថា គាត់នៅពេលបច្ចុប្បន្ននេះ មិនមានសម្បទាគ្រប់គ្រាន់ ដើម្បីចូលរួមសវនាការ។
ប៉ុន្តែសេចក្តីប្រកាស បានគូសបញ្ជាក់ថា "សហព្រះរាជអាជ្ញាយល់ឃើញថា ការដោះលែងលោកស្រី អៀង ធីរិទ្ធ មិនគួរណា ធ្វើឡើងដោយគ្មានលក្ខខណ្ឌឡើយ"។
សេចក្តីប្រកាសព័ត៌មាន បានលើកឡើងថា នៅខណៈមានការទទួលយកតាមការរកឃើញរបស់អង្គជំនុំជម្រះសាលាដំបូង ទាក់ទងនឹងការចុះខ្សោយ នៃការចងចាំរបស់ជនជាប់ចោទ សហព្រះរាជអាជ្ញាក៏បានកត់សំគាល់ផងដែរ លើការសម្រេចរបស់អង្គជំនុំជម្រះ ដែលថា គេមានលទ្ធភាព ( ទោះបីជាតិចតួចយ៉ាងណាក្តី ) អំពីការផ្លាស់ប្តូរកាលៈទេសៈផ្សេងៗ និងការបន្តសវនាការ នៅពេលក្រោយណាមួយនោះ។
សេចក្តីប្រកាសលើកឡើងថា ដោយមានការយកចិត្តដាក់នៅលើចំណុចនេះ សហព្រះរាជអាជ្ញារពិចារណាថា អង្គជំនុំជម្រះសាលាដំបូង មានសិទ្ធិអំណាចផ្លូវច្បាប់ដើម្បីពិចារណា និងអនុវត្តការដាក់លក្ខខណ្ឌកំណត់ ដែលចាំបាច់សមហេតុផល និងសមស្របទៅលើសេរីភាពរបស់លោកស្រី អៀង ធីរិទ្ធ។
សេចក្តីប្រកាសដដែលបានបន្តថា គោលបំណងនៃការដាក់កំហិត ឬលក្ខខណ្ឌទាំងនេះ គឺដើម្បី (១)ធានាថា ជនជាប់ចោទ មិនរត់គេចខ្លួនពីយុត្តាធិការរបស់តុលាការនេះ (២) ធានាថា គាត់នឹងមិនជ្រៀតជ្រែកចំពោះសាក្សី ឬជាប់ចោទផ្សេងទៀត ដែលកំពុងផ្តល់សក្ខីកម្មនៅក្នុងសវនាការ (៣) ធានាចំពោះសុវត្ថិភាពរបស់គាត់ និងរបៀបរៀបរយសាធារណៈ ហើយនិង (៤) ធានាថា សុខភាពរបស់គាត់ ត្រូវបានពិនិត្យតាមដានយ៉ាងដិតដល់ដើម្បីបង្កលទ្ធភាពឲ្យអង្គជំនុំជម្រះសាលាដំបូងនៅតែបានដឹងអំពីស្ថានភាពវេជ្ជសាស្ត្ររបស់គាត់។
បណ្តឹងសាទុក្ខរបស់សហព្រះរាជអាជ្ញា គឺដោយផ្អែកលើមូលដ្ឋាននៃទឡ្ហីករណ៍ចំនួន ៤ គឺថា អង្គជំនុំជម្រះសាលាដំបូង មានកំហុស៖
(១)ខាងអង្គច្បាប់ដោយបានធ្វើការព្យួរទាំងស្រុងនូវយុត្តាធិការទៅលើជនជាប់ចោទ ឬថា ខ្លួនគ្មានយុត្តាធិការទៅលើជនជាប់ចោទនោះ។
(២)ខាងអង្គច្បាប់ ដោយមិនយកមកអនុវត្ត បដិសេធ ឬខកខានមិនបានពិនិត្យពិចារណា លើមូលដ្ឋានច្បាប់ ដែលមានស្រាប់ ដើម្បីបន្តធ្វើការត្រួតពិនិត្យតាមផ្លូវច្បាប់តុលាការ ចំពោះជនជាប់ចោទ ដោយមានលក្ខខណ្ឌ។
(៣)ខាងអង្គច្បាប់ ដោយបង្គាប់ឲ្យធ្វើការដោះលែងជនជាប់ចោទ ដោយគ្មានលក្ខខណ្ឌ ជាជំនួសឲ្យលក្ខខណ្ឌ នៃការត្រួតពិនិត្យតាមផ្លូវតុលាការ ដែលអាចឲ្យធ្វើយុត្តិកម្មបាន។
(៤)តាមពិត ឬក្នុងការអនុវត្តនូវឆន្ទានុសិទ្ធិរបស់ខ្លួន នៅក្នុងការរកឃើញថា ការត្រួតពិនិត្យតាមផ្លូវតុលាការ គឺមិនអាចយកមកអនុវត្តបានទេ ឬមិនអាចអនុវត្តជាក់ស្តែង។
សេចក្តីប្រកាសរបស់ អ.វ.ត.ក បានឲ្យដឹងថា នៅក្នុងបណ្តឹងសាទុករបស់ព្រះរាជអាជ្ញា បានស្នើដល់អង្គជំនុំជម្រះ តុលាការកំពូល សុំមោឃភាពនូវសេចក្តីសម្រេចរបស់អង្គជំនុំជម្រះសាលាដំបូង ដោយហេតុថា អង្គជំនុំជម្រះសាលាដំបូង រកឃើញថា ខ្លួនគ្មានយុត្តាធិការ ក្នុងការចេញដីកាបង្គាប់ឲ្យបន្តធ្វើការត្រួតពិនិត្យតាមផ្លូវតុលាការទេ ដែលត្រូវបានធ្វើទៅតាមលក្ខខណ្ឌច្បាប់ ដែលអាចឲ្យធ្វើយុត្តិកម្មបាន និងធ្វើការកែប្រែសេចក្តីសម្រេច ដើម្បីតម្រូវឲ្យជនជាប់ចោទ ( បើសិនជាចាំបាច់ តាមរយៈអ្នកអាណាព្យាបាលទូទៅ ឬហិតូបត្ថម្ភកៈ ដែលនឹងត្រូវតែងតាំង ដោយអាជ្ញាធរជាតិ ) ដើម្បីឲ្យគោរពអនុវត្តតាមលក្ខខណ្ឌជាក់លាក់ផ្សេងៗ ដែលបានស្នើឡើងដោយសហព្រះរាជអាជ្ញា ដើម្បីរក្សាការពារឲ្យបានត្រឹមត្រូវនូវសិទ្ធិ និងផលប្រយោជន៍តាមច្បាប់ ដែលទាក់ទងនឹងការដោះលែងរូបគាត់ពីការឃុំខ្លួន។
លក្ខខណ្ឌជាក់លាក់ ដែលសហព្រះរាជអាជ្ញា បានដាក់ស្នើ គឺមានដូចតទៅ៖
(១)ត្រូវស្នាក់នៅក្នុងលំដ្ឋានជាក់លាក់មួយ ដែលសហមេធាវីការពារក្តីរបស់គាត់ ត្រូវប្រាប់ពីអាសយដ្ឋាន
(២)ត្រូវបង្ហាញខ្លួនមួយសប្តាហ៍ម្តង ដើម្បីឲ្យអាជ្ញាធរមានសមត្ថកិច្ច ឬមន្ត្រីផ្លូវការ ដែលចាត់តាំងដោយអង្គជំនុំជម្រះសាលាដំបូង ធ្វើការត្រួតពិនិត្យពីសុវត្ថិភាព
(៣)ត្រូវឲ្យគាត់ប្រគល់លិខិតឆ្លងដែននិងអត្តសញ្ញាណប័ណ្ណរបស់គាត់
(៤)មិនត្រូវទាក់ទង ដោយផ្ទាល់ក្តីឬដោយប្រយោលក្តី ជាមួយសហជនជាប់ចោទដទៃទៀត (លើកលែងតែស្វាមីរបស់គាត់ គឺអៀង សារី)
(៥)មិនត្រូវទំនាក់ទំនង ដោយផ្ទាល់ក្តីឬដោយប្រយោលក្តី ជាមួយសាក្សី អ្នកជំនាញ ឬជនរងគ្រោះណាមួយក៏ដោយ ដែលអង្គជំនុំជម្រះសាលាដំបូង បានស្នើសុំស្តាប់ចម្លើយ ហើយមិនត្រូវជ្រៀងជ្រែកចូលក្នុងកិច្ចការរដ្ឋបាលរបស់តុលាការ
(៦) ត្រូវស្ថិតនៅក្រោមការត្រួតពិនិត្យផ្នែកវេជ្ជសាស្ត្រ ដោយអ្នកអនុវត្តផ្នែកវេជ្ជសាស្ត្រ ដែលអង្គជំនុំជម្រះសាលាដំបូង បានចាត់តាំងរៀងរាល់ប្រាំមួខែម្តង។
សេចក្តីប្រកាសលើកឡើងថា ខណៈដែលសហព្រះរាជអាជ្ញា បន្តការគាំទ្រដល់ការដោះលែងលោកស្រី អៀង ធីរិទ្ធ ពីមន្ទីរឃុំឃាំង ដោយសារសហព្រះរាជអាជ្ញារ បានជឿជាក់ថា លក្ខខណ្ឌដែលបានស្នើនៅពេលមានការដោះលែងរូបគាត់ ដែលវានឹងពុំមានប្រសិទ្ធភាពទេ បើគេគ្រាន់តែដាក់វាជាទម្រង់នៃការស្នើសុំនោះ។ លក្ខខណ្ឌដែលបានស្នើសុំ គឺមានលក្ខណៈសមស្របចាំបាច់ និងមានសមាមាត្រ ទៅនឹងកាលៈទេសៈ។
សេចក្តីប្រកាស ក៏បានលើកឡើងទៀតថា នៅក្នុងការពិចារណាអំពីលក្ខខណ្ឌនានា សម្រាប់ការដោះលែងលោកស្រី អៀង ធីរិទ្ធ មិនត្រូវធ្វើការពិចារណា តែអំពីសិទ្ធិ និងផលប្រយោជន៍របស់លោកស្រី អៀង ធីរិទ្ធ ប៉ុណ្ណោះទេ ក៏ប៉ុន្តែក៏ត្រូវធ្វើការពិចារណាផងដែរ លើសិទ្ធិរបស់ជនរងគ្រោះដើមបណ្តឹងរដ្ឋប្បវេណី សហព្រះរាជអាជ្ញា ហើយនិងសហគមន៍អន្តរជាតិ បូករួមនឹងកត្តានានា ដូចជា ការផ្សះផ្សាជាតិ និងស្ថិរភាពយុត្តិធម៌ ហើយក្នុងករណីនេះ សុវត្ថិភាព និងសណ្តាប់ធ្នាប់សាធារណៈ ក៏ត្រូវមានផងដែរ។
សេចក្តីប្រកាសបានគូសបញ្ជាក់ថា នៅក្នុងការផ្តល់សំអាងពីលក្ខខណ្ឌនានា ដែលបានស្នើឡើងនេះ សហព្រះរាជអាជ្ញា បានព្យាយាមស្វែងរកនូវការធានាថា សិទ្ធិ និងផលប្រយោជន៍ ត្រូវបានគិតគូរពិចារណា និងបានធ្វើការថ្លឹងថ្លែងយ៉ាងត្រឹមត្រូវ ដើម្បីជាប្រយោជន៍ឲ្យបទដ្ឋាន ស្តីពី ច្បាប់សិទ្ធិមនុស្ស ត្រូវបានគោរព និងត្រូវបានអនុវត្តនៅ អ.វ.ត.ក នេះ។
នៅក្នុងញត្តិមួយដាច់ដោយឡែក សហព្រះរាជអាជ្ញា បានស្នើសុំឲ្យលោកប្រធាននៃអង្គជំនុំជម្រះតុលាការកំពូល ធ្វើការផ្អាកការដោះលែងលោកស្រី អៀង ធីរិទ្ធ ដូចដែលបានបង្គាប់ នៅក្នុងសេចក្តីសម្រេចរបស់អង្គជំនុំជម្រះសាលាដំបូង រហូតទាល់តែអង្គជំនុំជម្រះតុលាការកំពូល ធ្វើការសម្រេចពីបណ្តឹងសាទុក្ខនេះ ដោយអនុលោម តាមវិធាន ៨២.៦ នៃវិធានផ្ទៃក្នុង។
សូមរម្លឹកថា អង្គជំនុំជម្រះសាលាដំបូង របស់តុលាការខ្មែរក្រហម ដែលមានចៅក្រម ៥ រូប គឺចៅក្រមជាតិ ៣ រូប និងអន្តរជាតិ ២ រូប បានបើកសវនាការរយៈពេល ៣ ថ្ងៃ ចាប់ពីថ្ងៃទី៣០ ខែសីហា ឆ្នាំ២០១២ ដើម្បីធ្វើការវាយតម្លៃឡើងវិញ អំពីសម្បទាខាងបញ្ញាស្មារតីរបស់លោកស្រី អៀង ធីរិទ្ធ។
កាលពីខែវិច្ឆិកា ឆ្នាំ២០១១ អង្គជំនុំជម្រះសាលាដំបូង របស់តុលាការខ្មែរក្រហម បានសម្រេចដោះលែងលោកស្រីអៀងធីរិទ្ធ ម្តងរួចមកហើយ ដោយសំអាងថា លោកស្រី មានជំងឺវង្វេងវង្វាន់ស្មារតី។ ក៏ប៉ុន្តែកាលណោះ ត្រូវបានភាគីសហព្រះរាជអាជ្ញា បានប្តឹងជំទាស់។
លោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចខ្មែរក្រហម ត្រូវបាននាំខ្លួនមកឃុំឃាំងនៅតុលាការខ្មែរក្រហម ជាមួយនឹងលោកអៀងសារី អតីតរដ្ឋមន្ត្រីការបរទេសខ្មែរក្រហម ដែលជាស្វាមីរបស់លោកស្រី កាលពីថ្ងៃទី១២ ខែវិច្ឆិកា ឆ្នាំ២០០៧។ លោកស្រី អៀងធីរិទ្ធ ត្រូវបានចោទប្រកាន់ ក្នុងសំណុំរឿង០០២ ជាមួយនឹងលោកអៀងសារី លោកខៀវ សំផន និងលោកនួនជា។
ក៏ប៉ុន្តែដោយសារតែលោកស្រី អៀងធីរិទ្ធ មានជំងឺវង្វេងវង្វាន់ ទើបលោកស្រី មិនត្រូវបានគេនាំមកកាត់ទោស ក្នុងសំណុំរឿង០០២ ដែលបានផ្តើមសវនាការ កាត់ទោស កាលពីថ្ងៃទី២៩ ខែវិច្ឆិកា ឆ្នាំ២០១១ ឡើយ៕
Thursday, September 13, 2012
រដ្ឋមន្ត្រីថាមពលអាស៊ានចង់ឲ្យមានពាណិជ្ជកម្មធ្យូងថ្មនៅក្នុងតំបន់
រាជធានីភ្នំពេញ៖ នៅក្នុងកិច្ចប្រជុំរដ្ឋមន្ត្រីថាមពលអាស៊ានលើកទី៣០នៅក្នុងរាជធានីភ្នំពេញបណ្តារដ្ឋមន្ត្រីអាស៊ាន ជំរុញឲ្យមានកិច្ចព្រមព្រៀងពាណិជ្ជកម្ម ធ្យូងថ្មមួយនៅក្នុងតំបន់។ នេះបើតាមប្រសាសន៍របស់ឯកឧត្តម ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពលនៅក្នុងសន្និសីទកាសែតកាលពីល្ងាចថ្ងៃទី១២ខែកញ្ញា កន្លងទៅ។
ឯកឧត្តម ស៊ុយ សែម បានមានប្រសាសន៍បញ្ជាក់ថា “រដ្ឋមន្ត្រីអាស៊ានទាំងអស់ បានជំរុញឲ្យឧត្តមមន្ត្រីថាមពលអាស៊ានពន្លឿនការងាររៀបចំកិច្ចព្រម ព្រៀងស្តីពីការប្រើប្រាស់និងការធ្វើពាណិជ្ជកម្មធ្យូងថ្មអាស៊ាន”។
ឯកឧត្តមបានបន្តទៀតថា ការពន្លឿននេះគឺដើម្បីធានាការផ្គត់ផ្គង់និងការធ្វើពាណិជ្ជកម្មធ្យូងថ្មនៅក្នុងតំបន់ព្រមទាំងការប្រើប្រាស់នូវបច្ចេកទេសធ្យូងថ្មស្អាតរួមទាំងការសិក្សា ស្រាវជ្រាវបច្ចេកវិទ្យាការចាប់យកនិងស្តុកទុកសារធាតុកាបូន។
ឯកឧត្តមបានបន្តទៀតថា ធ្យូងថ្ម កំពុងតែដើរតួនាទីជាឥន្ធនៈយ៉ាងសំខាន់សំរាប់កំណើនពិពិធកម្មថាមពលនៅក្នុងតំបន់។
បណ្តារដ្ឋមន្ត្រីថាមពលអាស៊ានក៏បានជំរុញនិងលើកទឹកចិត្ត ឲ្យតំបន់បង្កើតនូវយន្តការផ្សេងៗដើម្បីបង្កើននូវសមាមាត្រថាមពលកកើតឡើងវិញឲ្យបាន១៥ភាគរយនៃអនុភាពសរុបនៅក្នុងតំបន់នាឆ្នាំ២០១៥ខាងមុខនេះ។
កិច្ចប្រជុំរដ្ឋមន្ត្រីថាមពលអាស៊ានលើកទី៣០នោះគឺមានការចូលរួមពីមាន បណ្តារដ្ឋមន្ត្រី និងឧត្តមមន្ត្រី ប្រទេសចំនួន១៨ ដែលរួមមាន ប្រទេសកម្ពុជា ឡាវ ភូមា ថៃ វៀតណាម ម៉ាឡេស៊ី ប្រុយណេ ហ្វីលីពិន សាំងហ្គាពួរ ឥណ្ឌូនេស៊ី ចិន កូរ៉េខាង ត្បូង ជប៉ុន អូស្ត្រាលី ឥណ្ឌា ញូវសេឡង់ រុស្សី និងអាមេរិក៕
រយៈពេល៨ខែខេត្តព្រះសីហនុទទួលបានភ្ញៀវទេសចរណ៍ប្រមាណ៦០៩៥៨៩នាក់
ព្រះសីហនុ ៖ ក្នុងរយៈពេល៨ខែឆ្នាំ២០១២នេះតំបន់ទេសចរណ៍ឆ្នេរសមុទ្រខេត្តព្រះសីហនុទទួលភ្ញៀវទេសចរសរុបប្រមាណ៦០៩៥៨៩នាក់កើន២៨,០៧ភាគរយបើប្រៀបធៀបក្នុងរយៈពេលដូចគ្នាកាលពីឆ្នាំទៅកន្លងមកនេះ។ ដោយឡែកសំរាប់ភ្ញៀវទេសចរណ៍ដែលធ្វើដំណើរតាមយន្តហោះវិញក្នុងរយៈពេល៨ខែគិតចាប់ពីថ្ងៃបើកពិធីសម្ពោធជាផ្លូវការជាលើកទី២កាលពីរចុងឆ្នាំ២០១១អាកាសយានដ្ឋានអន្តរជាតិកងកេងខេត្តព្រះសីហនុទទួលបានក្រុមភ្ញៀវទេសចរណ៍ជាតិនិងអន្តរជាតិចំរុះជាតិសាសន៍សរុបចំនួន៤៤២៩នាក់។នេះបើតាមការអះអាងរបស់លោកសេងខាប្រធានមន្ទីរទេសចរណ៍ខេត្តព្រះសីហនុបានប្រាប់កម្ពុជាថ្មីតាមទូរស័ព្ទនៅព្រឹកថ្ងៃទី១៣ខែកញ្ញា។
សូមរំលឹកថាអាកាសយានដ្ឋានអន្តរជាតិកងកេងមានទីតាំងស្ថិតក្នុងសង្កាត់រាមស្រុកព្រៃនប់ខេត្តព្រះសីហនុធ្លាប់បានសម្ពោធដាក់ឲ្យប្រើប្រាស់ជាលើកទីមួយនៅអំឡុងឆ្នាំ២០០៧ប៉ុន្តែពេលនោះព្រលានយន្តហោះមួយនេះបានអាក់ខានមិនដំណើរការនិងស្ងប់ស្ងាត់ហើយសាបរលាបទៅវិញដោយហេតុផលមិនច្បាស់លាស់។ បន្ទាប់មកអាកាសយានដ្ឋានអន្តជាតិកងកេងខាងលើនេះបានបើកសម្ពោធជាលើកទី២កាលពីថ្ងៃទី១៩ខែធ្នូឆ្នាំ២០១១ក្រោមអធិបតីភាពលោកឧបនាយករដ្ឋមន្ត្រីសុខអានរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។ ចាប់ពីពេលនោះមកព្រលានយន្តហោះអន្តរជាតិកងកេងនេះបានដំណើរការយ៉ាងរលូននិងទទួលភ្ញៀវទេសចរណ៍ចេញចូលច្រើនគូរឲ្យកត់សម្គាល់ផងដែរ។
លោកសេងខាបាននិយាយឲ្យដឹងទៀតថាក្នុងចំណោមភ្ញៀវទេសចរណ៍ដែលចូលមកតាមច្រកព្រលានយន្តហោះអន្តរជាតិទាំង៤៤២៩នាក់ខាងលើនេះក្នុងនោះមានភ្ញៀវទេសចរណ៍ក្នុងស្រុកចំនួន១៥៤នាក់។ ទាំងអស់នេះក៏ដោយសារតែគោលនយោបាយបើកចំហជើងមេឃរបស់ប្រមុខរាជរដ្ឋាភិបាលដែលមានសម្តេចអគ្គមហាសេនាបតីតេជោហ៊ុនសែនជានាយករដ្ឋមន្ត្រីនៃព្រះរាជាណាចក្រកម្ពុជាបានធ្វើឲ្យទឹកដីដ៏ស្រស់ត្រកាលនែតំបន់ទេសចរណ៍ឆ្នេរសមុទ្រខេត្តព្រះសីហនុទាក់ទាញក្រុមភ្ញៀវទេសចរណ៍ជាតិនិងអន្តរជាតិចំរុះជាតិសាសន៍មកលេងកំសាន្តមានចំនួនកាន់តែច្រើនឡើង។ការតភ្ជាប់ខេត្តតំបន់ទេសចរណ៍វប្បធម៌អង្គរក្នុងខេត្តសៀមរាបទៅតំបន់ទេសចរណ៍ធម្មជាតិមាត់សមុទ្រខេត្តព្រះសីហនុតាមជើងយន្តហោះរបស់ក្រុមហ៊ុនអង្គរអ៊ែរដែលធ្វើការហោះហើរក្នុងមួយសប្តាហ៍៣ជើងមានថ្ងៃច័ន្ទ,ថ្ងៃពុធនិងថ្ងៃសុក្រនិងមានជើងពិសេសផ្សេងទៀតនោះវាគឺជាការរួមចំណែកមួយយ៉ាងសំខាន់ក្នុងការទាក់ទាញនិងផ្តល់ភាពងាយស្រួលនិងពេលវេលាដល់ក្រុមភ្ញៀវទេសចរណ៍ដែលធ្វើដំណើទៅមក។ លោកសេងខាបានឲ្យដឹងទៀតថាក្រៅពីទទូលភ្ញៀវទេសចរណ៍តាមជើងយន្តហោះខេត្តទេសចរណ៍ធម្មជាតិមួយនេះនៅបានទទួលក្រុមភ្ញៀវទេសចរណ៍ក្នុងស្រុករាប់សែននាក់និងភ្ញៀវទេសចរណ៍បរទេសជាច្រើនម៉ឺននាក់ផ្សេងទៀតដែលធ្វើដំណើរតាមនាវាចូលចតនៅច្រកកំពង់ផែសមុទ្រខេត្តព្រះសីហនុក្នុងមួយឆ្នាំៗ៕
ពិធីផ្សព្វផ្សាយការបោះបង្គោលព្រំដែនកម្ពុជានិងសាធារណរដ្ឋវៀតណាម
កំពង់ធំ ៖ កាលពីថ្ងៃទី ១៣ ខែ កញ្ញា ឆ្នាំ ២០១២ នៅស្នងការដ្ឋាននគរបាលខេត្តកំពង់ធំ មានប្រជុំផ្សព្វផ្សាយស្តីអំពី ការងចង្អុលបង្ហាញពីបញ្ហា បោះបង្គោលព្រំដែន កម្ពុជា និងសាធារណរដ្ឋសង្គមនិយមវៀតណាម ក្រោមអធិបតីភាព លោក ផាន់ សុផេង ស្នងការនៃស្នងការដ្ឋាននគរបាលខេត្តកំពង់ធំ និងជាទីប្រឹក្សាលោក ងួន ញ៉ិល អនុប្រធានទី ១ នៃរដ្ឋភាព និងស្នងការរង ព្រមទាំងនាយផ្នែកនាយជំនាញគ្រប់អធិការស្រុក្រុងចូលរួម។
លោក ផាន់ សុផេង បានមានប្រសាសន៍ ផ្ដោតទៅលើការខិតខំប្រឹងប្រែង របស់សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំជាតិទាំងអស់បាន គិតគូរនិងយកចិត្តទុកដាក់ ការពារព្រំប្រទល់តាមបន្ទាត់ព្រំដែន កម្ពុជា និងវៀតណាម ដោយបានបូជាកំលាំងញើសឈាម មិនខ្លាចនឿយហត់ ដើម្បីបូរណភាពទឹកដីនិងដើម្បីសេចក្ដីសុខប្រជាពលរដ្ឋ។
លោក បានបញ្ជាក់ថា បញ្ហាព្រំដែនគឺជាទំនាស់បញ្ហារវាងប្រទេស ដូច្នេះរាជរដ្ឋាភិបាលបានខិតខំប្រឹងប្រែងរកដំណោះស្រាយជាមួយប្រទេសជិតខាង ដោយសន្តិវិធី រហូតទទួលបានលទ្ធផលជោគជ័យ ព្រមទាំងបានបកស្រាយបំភ្លឺនៅក្នុងរដ្ឋសភា សម្តេចតេជោ ហ៊ុន សែន បានផ្តល់នូវព័ត៌មានជាច្រើនអំពីទិដ្ឋភាពនយោបាយ ច្បាប់ប្រវត្តិសាស្ត្រ និងបច្ចេកទេសទាក់ទង ទៅនឹងព្រំដែន កម្ពុជានិងវៀតណាម ដែលមានអត្ថន័យនិងខ្លឹមសារ ដ៏មានប្រយោជន៍ សំរាប់បងប្អូនប្រជាពលរដ្ឋខ្មែរ ដែលមានសិទ្ធិក្នុងការទទួល ដឹងឭ ពីបញ្ហាព្រំដែន កម្ពុជា និងវៀតណាម ទើបបានជាប្រមុខរាជរដ្ឋាភិបាល បានធ្វើការបកស្រាយ ដែល មានការផ្សព្វផ្សាយតាមប្រព័ន្ធផ្សព្វផ្សាយ ក្នុងស្រុក និងក្រៅស្រុក មិនតែប៉ុណ្ណោះបានចងក្រងជាសៀវភៅ ដែលត្រូវបានផ្សព្វផ្សាយដល់សំណាក់ប្រជាពលរដ្ឋខ្មែរ គ្រប់ទិសទី ដែលមានចំណងជើងថា អត្ថបទគោល របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្រាប់ អធិប្បាយ ផ្តល់ការបំភ្លឺ ស្តីពី ការងារបោះបង្គោលខណ្ឌសីមាព្រំដែន គោក និងការកំណត់ព្រំដែនសមុទ្រ រវាង ព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម សម័យប្រជុំពេញអង្គរដ្ឋសភា ថ្ងៃទី ០៩ ខែ សីហា ឆ្នាំ ២០១២ ។
លោក ផាន់ សុផេង បានបន្តថា យោងតាមបទបញ្ជារបស់លោក នេត សាវឿន អគ្គស្នងនគរបាលជាតិ បានធ្វើការណែនាំ និងចង្អុលបង្ហាញឲ្យស្នងការខេត្តកំពង់ធំ នាំយកសៀវភៅបកស្រាយរបស់ សម្តេចហ៊ុន សែន ធ្វើការផ្សព្វផ្សាយដល់តាមបណ្តាអធិការ និងប៉ុស្តិ៍រដ្ឋបាល ដើម្បីសិក្សាពីខ្លឹមសារក្នុង សៀវភៅ និងត្រូវបានចែកសៀវភៅដល់តាមបណ្ដាលប៉ុស្តិ៍នីមួយៗ ទទួលបានចំនួន ១០ក្បាល ក្នុងនោះដែរ លោកបានផ្តាំផ្ញើឲ្យយកចិត្តទុកដាក់ការពារសុវត្ថិភាព ជូនប្រជាពលរដ្ឋក្នុងពេលបុណ្យភ្ជុំបិណ្ឌ៕
លោករដ្ឋមន្ដ្រីលឹមគានហោជំរុញឱ្យក្រុមការងារក្រសួងនិងមន្ទីរបូមទឹកសង្គ្រោះស្រូវសន្ទូងសំណាបប្រជាពលរដ្ឋ
ខេត្ដកំពត ៖ ស្របពេលដែលខេត្ដកំពតមានទឹកភ្លើងធ្លាក់តិចតួចបំផុតហើយក្ដី ព្រួយបារម្ភរបស់ប្រជាកសិករខ្លាចប៉ះពាល់ ទៅលើការបង្កបង្កើនផល ក៏ដូចជាដីស្រែ សម្រាប់ស្រូវ សន្ទូង និងសំណាបជាដើមនោះ ជាគោលការណ៍របស់លោករដ្ឋមន្ដ្រី ក្រសួងធនធានទឹកនិងឧតុនិយម បាន តម្រូវឱ្យ ក៏ដូចជាការចេញបទបញ្ជាដល់ ក្រុមការងាររបស់ក្រសួង និងមន្ទីរធន ធានទឹកខេត្ដកំពត ធ្វើយ៉ាងណាស្វះស្វែង រកប្រភពទឹកដើម្បីស្រោចស្រពទៅលើ ដីស្រែរបស់ប្រជាកសិករ ។
លោក ចាន់ យុត្ថា នាយខុទ្ទកាល័យ ក្រសួងធនធានទឹកនិងឧតុនិយម បានមាន ប្រសាសន៍ថា មកទល់នឹងពេលនេះ ការ បង្កបង្កើនផលទៅលើដីស្រែរបស់ប្រជា ពលរដ្ឋគឺទទួលបានផលប្រមាណជាង៦០ ភាគរយ ដែលប្រជាពលរដ្ឋខ្លះកំពុង ប្រមូលផល និងដីស្រែមួយចំនួនទៀត កំពុងបែកគុម្ព ដូច្នេះលោករដ្ឋមន្ដ្រីកំពុង តែជាប់ដៃអន្ដរាគមន៍បូមទឹកសង្គ្រោះ ស្រូវដល់អ្នកខេត្ដកំពត ពីព្រោះឆ្នាំនេះ មានភ្លៀងធ្លាក់តិចតួច ខុសពីឆ្នាំមុនៗ ដែលក្នុង១ឆ្នាំភ្លៀងជន់លិច២-៣ដងនោះ។ លោកបន្ដថា ជាគោលការណ៍របស់លោក រដ្ឋមន្ដ្រីមិនត្រឹមតែជំរុញឱ្យក្រុមការងារ របស់ក្រសួង និងមន្ទីរជាប់ដៃដ៏សកម្ម ក្នុងការចុះអន្ដរាគមន៍បូមទឹកសង្គ្រោះ ស្រូវ សន្ទូង សំណាបរបស់ប្រជាកសិករ ប៉ុណ្ណោះទេ បើទទួលបានប្រភពទឹក ធ្វើ យ៉ាងណាឱ្យប្រជាពលរដ្ឋពង្រីកទៅលើផ្ទៃ ដីបង្កបង្កើនផលបន្ថែមទៀតដើម្បីជាការ លើកស្ទួយចំពោះស្ថានភាព ជីវភាពរស់ នៅរបស់ពួកគាត់ ។ ដូច្នេះ ចាប់ពីដើម ខែកក្កដាមកទល់នឹងពេលនេះ អ្វីដែល ក្រុមការងាររបស់ក្រសួងនិងមន្ទីរបាន យកចិត្ដទុកដាក់ចុះអន្ដរាគមន៍បូមទឹក សង្គ្រោះស្រូវ សន្ទូង សំណាប ជូនប្រជា កសិករ និងមានវត្ដមានផងដែរពីលោករដ្ឋមន្ដ្រីផ្ទាល់ ឃើញថាដីស្រែជាង៦០ភាគរយដែលបង្កបង្កើនផលនោះ ប្រជា ពលរដ្ឋខ្លះគាត់ប្រមូលផល ហើយស្រូវខ្លះទៀតកំពុងបែកគុម្ព ឃើញថាមានភាពល្អឡើងវិញ ។
លោក ចាន់ វណ្ណា ប្រធានមន្ទីរធន ធានទឹកនិងឧតុនិយម ខេត្ដកំពត បានឱ្យ ដឹងថា ស្រូវមិនមានផលប៉ះពាល់អ្វីធ្ងន់ធ្ងរនោះទេ ។ ម្យ៉ាងវិញទៀត ក្រុមការងារ របស់លោកកំពុងមមាញឹកចុះអន្ដរាគមន៍បូមទឹកសង្គ្រោះស្រូវ សន្ទូង សំណាប របស់ប្រជាកសិករចំនួន២ឃុំ គឺនៅឃុំ ទូកមាសខាងលិច និងឃុំស្ដេចគង់ខាងលិច ស្រុកទូកមាស ដែលពេលនេះបាន ប្រមាណជាង១.៦០០ហិកតា តាមរយៈ បូមទឹកពីស្ថានីយបូមទឹករបស់សម្ដេច តេជោទី៤៥ និងម៉ាស៊ីនបូមទឹករបស់មន្ទីរមួយផ្សេងទៀត ដូច្នេះ ជាលទ្ធផល ប្រជា ពលរដ្ឋទទួលបាននូវទឹកធ្វើស្រែគ្រប់គ្រាន់ បើទោះជាភ្លៀងធ្លាក់តិចតួចនៅក្នុងខេត្ដកំពតនេះក៏ដោយ ៕
.jpg)
ប្រជាពលរដ្ឋសង្កាត់ទួលទំពូង១ព្រួយបារម្ភនៅពេលស្ថានីយប្រេងមួយបានសង់ក្បែរលំនៅឋានពួកគាត់
ភ្នំពេញ ៖ ប្រជាពលរដ្ឋរស់នៅចំណុចផ្លូវ១៦៣ កែងផ្លូវ៤០៨ ក្នុងសង្កាត់ទួល ទំពូង១ ខណ្ឌចំការមន បានសម្ដែងក្ដី ព្រួយបារម្ភអំពីសុវត្ថិភាពរស់នៅ ខណៈស្ថានីយប្រេងឥន្ធនៈមួយ ដែលមានស្លាកសញ្ញាសូគីម៉ិចសាងសង់ក្បែរលំនៅឋានរបស់ពួកគាត់ ។
ប្រជាពលរដ្ឋរស់នៅចំណុចផ្លូវ១៦៣ កែងផ្លូវ៤៧៨ បានរៀបរាប់ឱ្យកាសែត នគរវត្ដដឹងថា សព្វថ្ងៃនេះមានស្ថានីយ ប្រេងឥន្ធនៈមួយកំពុងសាងសង់ដើម្បី បើកអាជីវកម្មលក់ដូរប្រេង ដែលធ្វើឱ្យ ពួកគាត់មានក្ដីព្រួយបារម្ភយ៉ាងខ្លាំងអំពី អគ្គីភ័យដែលកើតមានជាយថាហេតុ ។ ពួកគាត់បន្ដថា បើសិនជាបើសិនជាស្ថានីយ ប្រេងមួយនេះសាងសង់រួចរាល់ ហើយ បើកអាជីវកម្មលក់ដូរ គឺអាចនិងបង្កការ ឆាបឆេះជាយថាហេតុណាមួយ ដូចជា ករណីស្ថានីយប្រេងឥន្ធនៈ នៅម្ដុំបុរីកីឡា ក្នុងខណ្ឌ៧មករាកាលពីឆ្នាំកន្លងទៅដែល បានឆាបឆេះរាលដាលទៅដល់លំនៅ ឋានប្រជាពលរដ្ឋអស់ជាច្រើនគ្រួសារ និងបំផ្លាញទ្រព្យសម្បត្ដិអស់រាប់ម៉ឺនដុល្លារទៀតផង ។
ប្រភពពីប្រជាពលរដ្ឋខាងលើក៏បាន បញ្ជាក់ឱ្យដឹងដែរថា មិនដឹងថាអាជ្ញាធរ ដែនដីបានសិក្សាច្បាស់លាស់ឬយ៉ាង ណានោះទេ ទើបអនុញ្ញាតឱ្យសង់ស្ថានីយ ប្រេងដែលមានស្លាកយីហោ សូគីម៉ិច ខាងលើនេះ ពីព្រោះបើមើលទៅលើ ស្ថានភាព គឺមានភាពផុយស្រួយ ដែល បង្កការឆាបឆេះខ្លាំងណាស់ ពីព្រោះតែស្ថានីយប្រេងមួយនេះសាងសង់ឡើងនៅ ជាប់នឹងផ្លូវ ពុំមានទីធ្លាទូលាយសម្រាប់ រថយន្ដ ឬម៉ូតូចេញ-ចូលដូចបណ្ដាស្ថានីយ ផ្សេងៗទៀតឡើយ ។
ប្រជាពលរដ្ឋដែលរស់នៅតាមម្ដុំផ្លូវ ១៦៣កែងផ្លូវ៤៧៨ ក្នុងសង្កាត់ទួលទំពូង១ ខណ្ឌចំការមន បានអំពាវនាវដល់អាជ្ញាធរ មូលដ្ឋាន គួរតែអន្ដរាគមន៍បញ្ឈប់ការ សាងសង់ស្ថានីយប្រេងឥន្ធនៈមួយនេះ ពីព្រោះបើសិនជាទុកឱ្យស្ថានីយនេះ ប្រកបអាជីវកម្ម ពួកគាត់រស់នៅជិតខាង ពិតជាមានក្ដីបារម្ភគ្មានថ្ងៃស្រាកស្រាន្ដនោះទេ ។
ពួកគាត់បានបន្ដទៀតថា មិនមានចេតនាបំបិទអាជីវកម្មប្រេងរបស់ក្រុមហ៊ុនសូគីម៉ិចនោះទេ ប៉ុន្ដែបើធ្វើអាជីវកម្ម គួរណាស់តែគិតពីផលប៉ះពាល់ដល់អាយុជីវិត ទ្រព្យសម្បត្ដិរបស់ពលរដ្ឋខ្លះផង ៕
សិស្សយកកាំភ្លើងភ្ជង់ក្បាលមិត្ដភក្ដិ កំពុងរៀន គឺនៅសាលាអន្ដរជាតិ សិង្ហបុរី
ភ្នំពេញ ៖ ខណៈដែលមានការបង្ហោះ រូបភាពនៅលើបណ្ដាញទំនាក់ទំនងសង្គម (facebook) ពីសកម្មភាពរបស់សិស្ស សាលា ដែលបានយកកាំភ្លើងមកភ្ជង់ ក្បាលមិត្ដភក្ដិរបស់ខ្លួនកំពុងសិក្សាក្នុង សាលា គឺមានមតិរិះគន់ និងការផ្ដល់ យោបល់ឆ្លងឆ្លើយផងដែរ តាមរយៈ face book ប៉ុន្ដែមានចំនួនច្រើនមិនគាំទ្រក្នុង សកម្មភាពរបស់សិស្ស ដែលបានដក កាំភ្លើងភ្ជង់ទៅលើមិត្ដភក្ដិកំពុងសិក្សា ក្នុងសាលា បើទោះជាកាំភ្លើងនោះជា កាំភ្លើងពិតប្រាកដ ឬជាកាំភ្លើងជ័រយ៉ាង ណាក៏ដោយ ។
ពាក់ព័ន្ធទៅនឹងការភ្ញាក់ផ្អើលពីរូប ភាពមិនគប្បី ដែលកើតចេញពីថ្នាល បណ្ដុះបណ្ដាល អប់រំ ក្លាយទៅជាកន្លែង បញ្ចេញសាច់ដុំបង្ហាញពីភាពសាហាវ ឃោរឃៅ អំពើគ្រោះថ្នាក់ ដែលសង្គម ស្អប់ខ្ពើម និងច្បាប់ហាមឃាត់នេះ អ្នក គ្រប់គ្រងសាលាអន្ដរជាតិសិង្ហបុរីបាន សារភាព និងទទួលស្គាល់ថា រូបភាព សិស្ស ដែលបានដកកាំភ្លើងភ្ជង់ក្បាល មិត្ដភក្ដិរបស់ខ្លួនក្នុងឯកសណ្ឋានសិស្ស នេះ គឺជាសិស្សដែលរៀននៅក្នុងសាលា អន្ដរជាតិសិង្ហបុរី ។
លោកហ្វីលីព នាយកទីផ្សារនៃសាលា អន្ដរជាតិសិង្ហបុរី បានប្រាប់នគរវត្ដតាម ទូរស័ព្ទ កាលពីថ្ងៃទី១៣ ខែកញ្ញា ឆ្នាំ ២០១២ថា “ខ្ញុំទើបនឹងដឹងរឿងនេះដែរ ប៉ុន្ដែខ្ញុំមិនទាន់បើកមើលនៅក្នុង facebook ដូច្នេះពាក់ព័ន្ធទៅនឹងសិស្សគួរតែ សួរទៅនាយករងគ្រប់គ្រងផ្នែកសិក្សា ឬសិស្សទើបគាត់ដឹង” ។
នាយករងសាលាអន្ដរជាតិសិង្ហបុរី ដែលក្នុងលក្ខខណ្ឌសុំមិនបញ្ចេញឈ្មោះ បានប្រាប់នគរវត្ដតាមទូរស័ព្ទថា ពិតជាមានរូបភាពពិតប្រាកដរបស់សិស្ស ដកកាំភ្លើងភ្ជង់ក្បាលមិត្ដភក្ដិរបស់ខ្លួន កំពុងរៀនសូត្រនៅក្នុងសាលាអន្ដរជាតិ សិង្ហបុរីនេះមែន ប៉ុន្ដែសិស្សរូបនោះគាត់ គឺជាអ្នកចូលចិត្ដលេងសើចច្រើន ហើយ មិនមែនទើបតែកើតមានទេ ធ្លាប់ធ្វើ បែបនេះច្រើនឆ្នាំមកហើយ និងការភ្ជង់ នេះកាំភ្លើងជ័រតែប៉ុណ្ណោះ ។ លោកបាន បន្ដថា មិនត្រឹមតែគាត់ចូលចិត្ដលេង សើចច្រើនក្នុងរូបភាពយកកាំភ្លើងភ្ជង់ ក្បាលមិត្ដភក្ដិប៉ុណ្ណោះទេ ជាទម្លាប់គាត់ លេងទាំងឡាន និងយន្ដហោះតេឡេកុម្ម៉ង់ ថែមទៀត ។
លោកនាយករងរូបនេះទទួលស្គាល់ ថា ការយកកាំភ្លើង បើទោះជាជ័រក៏ដោយ អាចនឹងប៉ះពាល់ទៅនឹងកិត្ដិយសរបស់ សាលា ម្យ៉ាងវិញទៀតសាលាក៏គ្មានចេត នាណាមួយឱ្យសិស្សធ្វើបែបនេះ ដូច្នេះ សាលាបានឱ្យសិស្សរូបនោះឈប់រៀន មួយរយៈ ប៉ុន្ដែអាណាព្យាបាលរបស់គាត់ បានធ្វើលិខិតសុំទោសរួចមកហើយ ។ មិន តែប៉ុណ្ណោះរឿងនេះ លោកក៏បានរាយការណ៍ និងសុំយោបល់ពីនាយិការគ្រប់គ្រងសាលា អន្ដរជាតិសិង្ហបុរីនេះដែរ ប៉ុន្ដែគាត់ថា រឿងនេះ គឺជារឿងបុគ្គល ទើបពេលដឹង ដំណឹងពីមានបង្ហោះតាម facebook ពី រូបភាពនេះប្រមាណ៣-៤ថ្ងៃមុន សាលា ក៏ព្យាយាមហៅសិស្សនោះមកអប់រំ និង ឱ្យគាត់ឈប់ការសិក្សាមួយរយៈសិន ។
ក្នុងរូបភាពដែលសិស្សសាលាអន្ដរ ជាតិសិង្ហបុរី ដែលមានឯកសណ្ឋានហើយ យកកាំភ្លើងភ្ជង់មិត្ដភក្ដិ កុំថាឡើយសិស្ស សាលា មន្ដ្រីរាជការ ជាពិសេសអាណា ព្យាបាលសិស្សមួយចំនួនបង្ហាញឱ្យឃើញ ពីការខកចិត្ដថា មិនគួរណាកើតមានរូប ភាពបែបនេះនៅក្នុងសាលា ដែលជា ថ្នាលបណ្ដុះបណ្ដាលលើវិស័យអប់រំ។ ដូច្នេះ ការគ្រង់គ្រងរបស់សាលាបែបនេះ អាណា ព្យាបាលសិស្សអាចនឹងឃ្លាតឆ្ងាយមនោ សញ្ចេតនា និងគ្មានទំនុកចិត្ដ ដើម្បីបញ្ជូន កូនទៅសិក្សា ព្រោះឥទ្ធិពលដ៏អាក្រក់នេះ ក្មេងងាយនឹងឆាប់ទទួលយក ដែលធ្វើឱ្យ ខូចឥរិយាបថ ឬក៏ខូចអនាគត ខណៈដែល ពួកគេជាកូនអ្នកមានធនធាន ឈានទៅ ដល់ការប្រើប្រាស់កាំភ្លើងពិតប្រាកដនោះ ជាដើម ។
ពាក់ព័ន្ធនឹងរូបភាពសិស្សដកកាំភ្លើង ភ្ជង់ក្បាលមិត្ដភក្ដិ ដែលអ្នកគ្រប់គ្រង សាលាអន្ដរជាតិសិង្ហបុរីចាត់ទុកថាជា រឿងឯកជន និងតូចតាច លោកជា ជាតិ ប្រធានមន្ទីរអប់រំ យុវជន និងកីឡារាជ ធានីភ្នំពេញបានឱ្យដឹងថា “បើមានរូបភាព នេះបង្ហោះនៅលើ facebook មិនត្រូវទេ ខុសធ្ងន់ធ្ងរ ប៉ុន្ដែខ្ញុំមិនអាចនិយាយបាន សូមសួរទៅខាងក្រសួងព្រោះមានអ្នកធំៗ ច្រើនណាស់” ។
លោកឆាវ រ៉ាវី បុគ្គលិកនៅក្នុងអង្គការក្រៅរដ្ឋាភិបាល មានស្រុកកំណើត ស្រុកឈូក ខេត្ដកំពត ហើយបច្ចុប្បន្នមាន កូន៣នាក់ក្នុងបន្ទុក បាននិយាយថា ដើម្បី អនាគតរបស់កូន បើទោះប្រាក់បៀវត្ស របស់គាត់មិនលើសលប់ ហើយភរិយា ជាអ្នកលក់ដូរបន្ដិចបន្ដួច តែជាបំណង ប្រាថ្នា គាត់ចង់ឱ្យកូនគាត់រៀននៅសាលា ឯកជន ក្នុងនោះសាលាចំនួន៣ ដែលគាត់ ត្រូវគិត ដែលមានសាលាអន្ដរជាតិសិង្ហ បុរីនេះផងដែរ។ ប៉ុន្ដែគាត់ខកចិត្ដពេល ដែលអ្នកគ្រប់គ្រងសាលាមានភាពធូរ រលុង រហូតដល់សិស្សបានយកទីតាំង សាលារៀនធ្វើជាការបង្ហាញពីរូបភាព មិនប្រក្រតី ដូចជាការដកកាំភ្លើងភ្ជង់ ក្បាលគ្នា បង្ខំឱ្យលើកដៃពេលកំពុងសិក្សា ក្នុងរូបភាពជាក់ស្ដែងបែបនេះ គឺជាកំហុស ធ្ងន់ធ្ងរណាស់របស់អ្នកគ្រប់គ្រងសាលា ដែលស្ថិតក្នុងកម្រិតទាប ។
អ្នកស្រីឯក ចាន់ថន ជាគ្រូបង្រៀន សាលារដ្ឋបានលើកឡើងថា បើតាមគាត់ ដឹង កុំថាឡើយតែកាំភ្លើងជ័រ សូម្បីតែ ដំបង ឬក៏របស់របរអ្វីផ្សេងៗ ដែលយក ទៅសម្រាប់ជាមធ្យោបាយសម្លុតគំរាម មិត្ដភក្ដិក្នុងសាលា មិនអាចធ្វើទៅបាន ទេ ព្រោះសិស្សត្រូវមានវិន័យ ស្ដាប់ការ ពន្យល់អប់រំពីគ្រូបង្រៀនក្នុងម៉ោងសិក្សា តែបើគាត់ថែមទាំងហ៊ានយកកាំភ្លើង ភ្ជង់គ្នាបែបនេះ អាចជាភាពកម្សោយ ក្នុងកម្រិតណាមួយពីអ្នកគ្រប់គ្រងសាលា អន្ដរជាតិសិង្ហបុរី ។
គួររំលឹកផងដែរថា កន្លងទៅយុវជន ១រូបដែលមានវ័យមិនទាន់ដល់១៨ឆ្នាំ សិស្សនៅសាលាអន្ដរជាតិសិង្ហបុរី ដែល គិតខ្លីដោយសាររឿងវិបត្ដិស្នេហា ធ្លាប់ លោតពីលើអគារសាលាសម្លាប់ខ្លួនម្ដង រួចមកហើយ ខណៈដែលសន្ដិសុខ និងអ្នក គ្រប់គ្រងសាលាមិនសូវបានយកចិត្ដទុក ដាក់ការពារនោះ ៕
សមត្ថកិច្ចថៃបាញ់ប្រជាពលរដ្ឋខ្មែរម្នាក់របួសធ្ងន់នៅក្បែរច្រកអានសេះក្នុងខេត្តព្រះវិហារ
ខេត្តព្រះវិហារ ៖ ប្រជាពលរដ្ឋម្នាក់បានរងរបួសធ្ងន់ ដោយសារគ្រាប់កាំភ្លើងសមត្ថកិច្ចថៃ បន្ទាប់ពីលួចឆ្លងដែនទៅរកកាប់ឈើគ្រញូងខុសច្បាប់នៅចំណុចខាងជើង ឈាងខាងកើតច្រកព្រំដែនអានសេះ ខេត្តព្រះវិហារ។
តាមការឲ្យដឹងពីមន្ត្រីនគរបាលខេត្តនៅព្រឹកថ្ងៃទី១៣ កញ្ញា ឆ្នាំ២០១២ ក្រោយពេលដែល លោកស្នងការនគរបាលខេត្តព្រះវិហារ ដឹកនាំគណៈប្រតិភូនាំយកថវិការ និងសំភារៈមួយចំនួន ទៅសួរសុខទុក្ខជនរងគ្រោះដល់មន្ទីពេទ្យបង្អែក១៦មករា បានបញ្ជាក់ថា ជនរងគ្រោះមានឈ្មោះ ស្រេង សំណាង ភេទប្រុស អាយុ៣១ឆ្នាំ មានស្រុកកំណើតនៅភូមិទន្លេជ្រៃ ឃុំកញ្ចម ស្រុកពារាំង ខេត្តព្រៃវែង។
ប្រភពខាងលើដកស្រង់សំដីពីប្រជាពលរដ្ឋដែលរត់គេចខ្លួនពីហេតុការ បាញ់ប្រហារខាងលើ បានឲ្យដឹងថា នៅវេលាម៉ោង៨និង០០នាទី ថ្ងៃទី១២កញ្ញា ២០១២ សមត្ថកិច្ចបានធ្វើការបាញ់ប្រហារមកលើ ប្រជាពលរដ្ឋកម្ពុជា ដែលឡើងភ្នំកាប់ឈើគ្រញូង នៅចំណុចខាងជើងឈាងខាងកើត ច្រកព្រំដែនអានសេះ បណ្តាលឲ្យប្រជាពលរដ្ឋខាងលើរបួសធ្ងន់ត្រង់ពោះ។
គួររំលឹកថា ពលរដ្ឋខ្មែរ៣៨នាក់បានស្លាប់និង១០នាក់ រងរបួសដោយសារសមត្ថកិច្ចថៃបាញ់ ក្នុងរយៈពេល៦ខែ ដើមឆ្នាំ ២០១២ ។ នេះបើតាមរបាយការណ៍បូកសរុបលទ្ធផលការងារឆមាសទី១ និងទិសដៅឆមាសទី២ ឆ្នាំ២០១២ របស់ ការិយាល័យទំនាក់ទំនងព្រំដែនកម្ពុជា-ថៃ កាលពីព្រឹកថៃ្ងទី១៣ ខែសីហា ឆ្នាំ២០១២ នៅក្រុងប៉ោយប៉ែតក្រោមអធិបតី ភាពរបស់់លោកសៀក សុជាតិ នាយរងសេនាធិការចំរុះនិងជានាយកទីចាត់ការការងារតាមព្រំដែន។
សូមបញ្ជាក់ផងដែរថា កន្លងមកអជ្ញាធរកម្ពុជាបានអំពាវនាវជាបន្តបន្ទាប់ ក៍ដូចជាធ្វើសកម្មភាពទប់ស្កាត់ ហាមមិនឲ្យជនជាតិកម្ពុជាឆ្លងដែនឆ្លងដែនខុសច្បាប់ទៅរកកាប់ឈើក្នុងទឹកដីថៃ និងបានប្រជុំជាមួយអជ្ញាធរភាគីថៃ មិនឲ្យមានការបាញ់មកលើពលរដ្ឋកម្ពុជាបន្តទៀត ប៉ុន្តែសកម្មភាពខាងលើនៅតែកើតមានជាបន្តបន្ទាប់។
បច្ចុប្បន្ន ជនរងគ្រោះកំពុងសំរាកព្យាបាលនៅមន្ទីពេទ្យខាងលើ ហើយអជ្ញាធរខេត្តព្រះវិហារនៅតែបន្តអនុវត្តសកម្មភាពទប់ស្កាត់មិន ឲ្យប្រជាពលរដ្ឋឆ្លងដែនខុសច្បាប់ជាបន្តបន្ទាប់៕
.jpg)
ក្រសួងអប់រំយុវជននិងកីឡាត្រៀមផែនការយុទ្ធសាស្ដ្រអនុវត្ដការងារអប់រំសម្រាប់បវេសនកាលឆ្នាំសិក្សា២០១២-២០១៣
ភ្នំពេញ ៖ លោក អ៊ឹម សិទ្ធី រដ្ឋមន្រី្ដក្រសួងអប់រំ យុវជន និងកីឡាបានបញ្ជាក់ថា សម្រាប់បវេសនកាលឆ្នាំសិក្សា២០១២-២០១៣នេះ គ្រប់ភូមិសិក្សានៅទូទាំងប្រទេស បានត្រៀមលក្ខណៈរួចជាស្រេច នូវផែនការយុទ្ធសាស្ដ្រសំខាន់ៗរួមរាល់ហើយដែរ ដើម្បីបង្កើននិងអភិវឌ្ឍវិសយ័អប់រំនៅកម្ពុជាឱ្យមានប្រសិទ្ធភាព គុណភាព និងសមធម៌ តែផែនការរបស់យើងក៏តម្រូវឱ្យការរៀនសូត្ររបស់កុមារកម្ពុជាមានភាពស៊ីសង្វាក់គ្នាល្អជាមួយយុទ្ធសាស្ដ្រចតុកោណ ដំណាក់កាលទី២ របស់រាជរដ្ឋាភិបាលតាមរយៈការអនុវត្ដផែនការអភិវឌ្ឍន៍ជាតិបច្ចុប្បន្នកាលឆ្នាំ២០០៩-២០១៣ ផងដែរ។
លោក អ៊ឹម សិទ្ធី មានប្រសាសន៍បែបនេះនៅក្នុងឱកាសបើកកិច្ចប្រជុំបូកសរុបវាយតម្លៃការងារអប់រំ ដំណាច់ឆ្នាំសិក្សា២០១១-២០១២ និងត្រៀមលក្ខណៈរៀបចំបវេសនកាលឆ្នាំសិក្សា២០១២-២០១៣ នាព្រឹកថ្ងៃទី ១៣ ខែកញ្ញា នេះ នៅវិទ្យាស្ថានជាតិអប់រំ ដោយមានការចូលរួមពីលោកគ្រូ អ្នកគ្រូមកពីគ្រប់ភូមិសិក្សាប្រមាណ៧៥០នាក់ ។
គួររំលឹកថា សម្រាប់ការងារឆ្នាំសិក្សា២០១១-២០១២កន្លងមកការងារអប់រំក្រៅប្រព័ន្ធកម្មវិធី អក្ខរកម្មបានបណ្ដុះបណ្ដាលដល់យុវ័យដែលបោះបង់សាលា និងប្រជាពលរដ្ឋស្មគ្រ័ចិត្ដបានចំនួន ៣៤៩៦៤នាក់ ស្រី៦២៥៤នាក់ ស្មើនឹង៦២ភាគរយ ។ ដោយឡែកការងារបណ្ដុះបណ្ដាល និងវិក្រិតការ សិស្សប្រឡងបញ្ចប់ការបណ្ដុះបណ្ដាលជាគ្រូបង្រៀន នៅគ្រប់ភូមិសិក្សាចំនួន៤៨២៤នាក់ ស្រី៥៣៦៤នាក់ ស្មីនឹង៥៣ភាគរយ ។
ក្នុងឱកាសនេះដែរលោក អ៊ឹម សិទ្ធី បានកត់សម្គាល់ថា គុណភាព និងប្រសិទ្ធភាពនៅគ្រប់ភូមិសិក្សាក៏ត្រូវតែពង្រឹងថែមទៀត ។ ដោយសម្គាល់នៅឆ្នាំសិក្សា២០១១ -២០១២នេះឃើញថា អត្រាសិស្សបោះបង់សាលា នៅមធ្យមសិក្សាបឋមភូមិ មានខ្ពស់ណាស់គឺ២១,៧ភាគ រយដែលបញ្ហានេះគួរឱ្យព្រួយបារម្ភ ។ ដូច្នេះហើយទើបក្រសួងអប់រំ យុវជន និងកីឡាបានផ្ដល់នូវគោលជំហរមួយច្បាស់លាស់គ្រប់ភូមិសិក្សានៅទូទាំងប្រទេសត្រូវតែកសាងជាផែនការ យុទ្ធសាស្ដ្រ ដូចជាការបណ្ដុះបណ្ដាលដល់សិស្ស និស្សិតត្រូវតែមានជំនាញច្បាស់លាស់ និងត្រូវឆ្លើយតបទៅនឹងបច្ចុប្បន្នភាពតម្រូវការទីផ្សារពលកម្មផងដែរ ៕
.jpg)
.jpg)
.jpg)
Subscribe to:
Posts (Atom)