ភ្នំពេញ: ប្រទេសអ៊ុយក្រែន កំពុងរៀបចំបើកស្ថានទូត នៅក្នុងប្រទេសកម្ពុជា ខណៈដែលប្រទេសអ៊ុយក្រែន សព្វថ្ងៃ ដែលទទួលបន្ទុកសម្រាប់ប្រទេសកម្ពុជា មានស្ថានទូត ប្រចាំនៅក្នុងប្រទេសវៀតណាម។
សេចក្តីប្រកាសដូច្នេះ ត្រូវបានធ្វើឡើងក្នុងកិច្ចប្រជុំរវាងលោកស្រី ស៊ុន សាភឿន រដ្ឋលេខាធិការក្រសួងការបរទេស និងលោក OLEKSIY Shov Koplias ឯកអគ្គរដ្ឋទូតនៃប្រទេសអ៊ុយក្រែន ប្រចាំនៅប្រទេសវៀតណាម កាលពីព្រឹកថ្ងៃទី១៨ ខែកញ្ញា ឆ្នាំ២០១២ នៅទីស្តីការក្រសួងការបរទេស។
បន្ទាប់ពីបញ្ចប់ជំនួប លោកស្រីរដ្ឋលេខាធិការ ស៊ុន សាភឿន បានមានប្រសាសន៍ប្រាប់ក្រុមអ្នករាយការណ៍ព័ត៌មានថា គោលបំណងដែលឯកអគ្គរដ្ឋទូតប្រទេសអ៊ុយក្រែន ជួបពិភាក្សាជាមួយក្រសួងការបរទេសកម្ពុជា នៅពេលនេះ គឺចង់បើកស្ថានទូតនៅកម្ពុជា ប៉ុន្តែជាជំហ៊ានទី១ គឺគាត់សុំបើកអគ្គកុងស៊ុលកិតិ្តយស នៅកម្ពុជាសិន។
លោកស្រី បានមានប្រសាសន៍បន្តថា កម្ពុជា និងអ៊ុយក្រែន បានយល់ព្រមហើយថា នឹងជួបពិគ្រោះយោបល់គ្នា រវាងក្រសួងការបរទេស នៃប្រទេសទាំងពីរដោយមានការចុះកិច្ចព្រមព្រៀងសហប្រតិបត្តិការ រវាងប្រទេសទាំងពីរ ហើយនៅថ្ងៃអនាគត លោកឯកអគ្គរដ្ឋទូត ចង់ឲ្យមានការលើកលែងទិដ្ឋាការទៅវិញទៅមក រវាងអ្នកកាន់លិខិតឆ្លងដែនការទូត និងលិខិតឆ្លងដែនផ្លូវការ។
នៅក្នុងជំនួបនោះដែរ លោកឯកអគ្គរដ្ឋទូតអ៊ុយក្រែន បានមានប្រសាសន៍ថា អ៊ុយក្រែន មានសក្តានុពលច្រើនខាងផ្នែកថាមពល ពាណិជ្ជកម្ម និងការពារជាតិ។ ជាមួយគ្នានោះ លោកចង់ឲ្យមានកិច្ចសហប្រតិបត្តិការវាងក្រសួងជំនាញទាំងពីរ ហើយកិច្ចសហប្រតិបត្តិការនេះ មិនត្រឹមតែបច្ចេកទេសប៉ុណ្ណោះទេ ថែមទាំងឲ្យមានការគាំទ្រគ្នាទៅវិញទៅមក ទាំងផ្នែកនយោបាយផងដែរ។
លោកស្រីរដ្ឋលេខាធិការ ក៏បានស្នើសុំឲ្យអ៊ុយក្រែន គាំទ្របេក្ខភាពកម្ពុជា ជាសមាជិកមិនអចិន្ត្រៃយ៍នៅក្រុមប្រឹក្សាសន្តិសុខ អង្គការសហប្រជាជាតិ ដែលការបោះឆ្នោត និងប្រព្រឹត្តទៅក្នុងពេលខាងមុខនេះ ហើយលោកអគ្គរដ្ឋទូត បានមានប្រសាសន៍ជំរាបថា អ៊ុយក្រែនបានសន្យាគាំទ្រកូរ៉េរួចហើយ ក្នុងជំហ៊ានទី១។ ដូច្នេះនៅក្នុងការបោះឆ្នោតជំហ៊ានទី២ អ៊ុយក្រែន នឹងគាំទ្រកម្ពុជា។
លោកស្រីមានប្រសាសន៍បន្តថា ប្រទេសអ៊ុយក្រែន ធ្លាប់បានជួយបណ្តុះបណ្តាលនិស្សិតកម្ពុជា ហើយលោកស្រីក៏បានស្នើសុំឲ្យអ៊ុយក្រែន បន្តជួយបណ្តុះបណ្តាលដល់និស្សិតកម្ពុជាជាបន្តតទៀត។
លោកស្រីរដ្ឋលេខាធិការ បានស្នើឲ្យនាំអ្នកវិនិយោគទុន និងអ្នកទេសចរណ៍អ៊ុយក្រែន មកកម្ពុជាបន្ថែមទៀត ពីព្រោះពេលនេះ នៅកម្ពុជា មិនសូវមានទេសចរអ៊ុយក្រែនទេ ហើយលោកឯកអគ្គរដ្ឋទូត បានសន្យាជំរុញអ្នកវិនិយោគ និងទេសចរអ៊ុយក្រែន ឲ្យមកកម្ពុជាបន្ថែមទៀត និងសន្យាថា ធ្វើដំណើរមកកម្ពុជា ឲ្យបានញឹកញាប់ ដើម្បីជំរុញកិច្ចសហប្រតិបត្តិការរវាងប្រទេសទាំងពីរ ឲ្យបានប្រសើរឡើង និងរឹងមាំថែមទៀត។
ទាក់ទងទៅនឹងវិស័យពាណិជ្ជកម្មរវាងអ៊ុយក្រែន និងកម្ពុជា លោកស្រីរដ្ឋលេខាធិការ បានអះអាងថាកម្ពុជា បាននាំចូលទៅប្រទេសអ៊ុយក្រែន មានទំហំច្រើនជាងអ៊ុយក្រែន នាំពាណិជ្ជកម្មចូលមកកម្ពុជាប៉ុន្តែទំហំពាណិជ្ជកម្មនេះ មិនទាន់ធំណាស់ណាទេ ហើយលោកអគ្គរដ្ឋទូត សន្យាថា នឹងយកចិត្តទុកដាក់ពង្រឹងផ្នែកពាណិជ្ជកម្ម ជាមួយកម្ពុជា ពីព្រោះលោកបានជួបជាមួយក្រសួងពាណិជ្ជកម្មរួចហើយដែរ លើបញ្ហានេះ។
ជាមួយគ្នានោះដែរ លោកឯកអគ្គរដ្ឋទូតអ៊ុយក្រែន មានបំណងជួបជាមួយក្រសួងការពារជាតិ ក្រសួងឧស្សហកម្ម និងក្រសួងកសិកម្ម បន្តទៀត ដើម្បីពង្រឹងពង្រីកលើកិច្ចសហប្រតិប្តិតការ ក្នុងវិស័យទាំងនេះ។
សូមបញ្ជាក់ថា សព្វថ្ងៃនេះ អ៊ុយក្រែន មានអ្នកវិនិយោគ ចូលមកបណ្តាក់ទុន នៅខេត្តព្រះសីហនុ នៅកោះពស់ កោះទន្សាយ និងកោះដែកគោល ដែលមានទឹកប្រាក់រាប់លានដុល្លារផងដែរ៕
Tuesday, September 18, 2012
ពិធីប្រគល់ និងទទួលសម្ភារៈ សំភារៈកំព្យូទ័រ សំរាប់បណ្តុះបណ្តាលមន្រ្តីអនុវត្ត ច្បាប់តាមប្រពន្ធ័ ក្រោមគំរោងភាពជាដៃគួ នៃប្រទេសមហាអនុតំបន់ទន្លេមេគង្គ
នៅក្រសួងមហាផ្ទៃ អាជ្ញាធរជាតិប្រយុទ្ធប្រឆាំងនឹងគ្រឿញៀន នាព្រឹកមិញ នេះមានរៀបចំពិធីប្រគល់ និងទទួលសម្ភារៈ សំភារៈកំព្យូទ័រ ១០គ្រឿង ពីអង្គការ UNODC សំរាប់បណ្តុះបណ្តាលមន្រ្តីអនុវត្ត ច្បាប់តាមប្រពន្ធ័ ក្រោមគំរោងភាពជាដៃគួ នៃប្រទេសមហាអនុតំបន់ទន្លេមេគង្គ ។
លោក Olivier Lermet នាយការិយាល័យ UNODC ប្រចាំនៅកម្ពុជា បានអោយដឹងថា ក្រោមកិច្ចសហការ របស់គ្រឿញៀន និងឧក្រិដ្ឋកម្មរបស់អង្គការសហប្រជាជាតិ UNODCប្រចាំនៅកម្ពុជា បានអនុវត្តនៅគំរោងនានា ដោយបានចូលរួមអនុវត្តទៅតាមច្បាប់ នៅក្នុងប្រទេស និងមហានុតំបន់ទន្លេមេគង្គ ដើម្បីចួលរួមកាត់បន្ថយ ហានិភ័្យផ្សេងៗ នៅក្នុងតំបន់ ជាពិសេសបានចូលរួមសហការនៅក្នុងប្រទេស កម្ពុជា ដោយគំរោងបាន ពិនិត្យ និងត្រួតតា្រនៅតាមតំបន់ព្រំដែន និងដោយបានចុះនុស្សារណៈ នៃការយោគយល់គ្នា នៅក្នុងតំបន់។
លោក បានអោយដឹងបន្តថា ដោយគំនិតទាំងអស់នេះគឺជាការទាមទារ ការសហាការបស់រាជរដ្ឋាភិបាល និងការផ្តួចផ្តើម របស់គណៈកម្មាធិការមហាអនុតំបន់ទន្លេមេគង្គ សំរាប់គំរោងការងារបណ្តុះបណ្តាលទៅលើផ្នែកកុំព្យូទ័រ ដើម្បីឈានទៅរកការអភិវឌ្ឍន៍ការងារ ទៅតាមប្រពន្ធ័អេឡិចត្រួនិច ដើម្បីឆ្លុះបញ្ចាំង អំពីការងារនៃការនៃការអនុវត្តគំរោង អោមានប្រសិទ្ធភាពនៅក្នុងប្រទេសកម្ពុជា និងនៅក្នុងតំបន់ របស់ប្រទេសមហាអនុតំបន់ទន្លេមេគង្គ។
ឯកឧត្តម ឧត្តមសេនីយ៍ឯក យូ ស៊ុនឡុង អគ្គលេខាធិការអាជ្ញាធ័រជាតិប្រយុទ្ធប្រឆាំងនិងគ្រឿងញៀន បានមាប្រសាន៍អោយដឹងថា ការផ្តល់ជំនួយ ជាសម្ភារៈនេះ គឺជាសក្ខីភាពនៃការចូលរួមចំណែក ឆ្លើយតបយ៉ាងសមស្រប និងទាន់ពេលវេលា ទៅនឹងយុទ្ធសាស្រ្តរបស់រាជរដ្ឋាភិបាល និងតំរូវការរបស់ប្រទេសកម្ពុជា ក្នុងការកាត់បន្ថយ និងលុបបំបាត់ បញ្ហាគ្រឿងញៀន ខុសច្បាប់ ។
ឯកឧត្តម បានមានប្រសាសន៍បន្តថា គ្រឿងញៀនកំពុងក្លាយជាបញ្ហាដ៏គ្រោះថ្នាក់ ដែលបាននឹងកំពុងគំរៀមកំហែង ដល់អាយុជីវិត្តមនុស្សជាតិ សង្គម សេដ្ឋកិច្ច និងការអភិវឌ្ឍន៍របស់ប្រទេសជាតិនីមួយៗ ក៏ដូចជានៅក្នុងតំបន់ និងទូទាំងពិភពលោក ទាំងមូល។
សំភាសន៍ ឯកឧត្តម ឧត្តមសេនីយ៍ទោ ភន បូរ៉ាមី ប្រធាននាយកដ្ឋានអនុវត្តច្បាប់
សំភាសន៍ ឯកឧត្តម ឧត្តមសេនីយ៍ទោ ភន បូរ៉ាមី ប្រធាននាយកដ្ឋានអនុវត្តច្បាប់
គួរបញ្ជាក់ផងដែរថា សំរាប់កុំព្យូទ័រ ១០ គ្រឿងនដែលបានប្រគល់នា ដល់អាជ្ញាធរជាតិប្រយុទ្ធប្រឆាំង និងគ្រឿងញៀន នាថ្ងៃនេះ បើគិតជាទឹកមានតម្លៃ ប្រមាណជាង ១.២ ដុល្លារអាមេរិ សំរាប់ការងារបណ្ដុះបណ្តាលទៅលើគ្រឿងអេឡិចត្រួនិច។
ឯកឧត្ដមទេសរដ្ឋមន្ដ្រី ចម ប្រសិទ្ធ ជួបឯកឧត្ដមកអគ្គរដ្ឋទូត នៃសាធារណរដ្ឋ អ៊ុយក្រែន
ឯកឧត្ដម ចម ប្រសិទ្ធ ទេសរដ្ឋមន្ដ្រី រដ្ឋមន្ដ្រីក្រសួងពាណិជ្ជកម្ម បានទទួល ជួបឯកឧត្ដម Olegsiy Shovkoplias ឯកអគ្គរដ្ឋទូត នៃសាធារណរដ្ឋអ៊ុយក្រែន ប្រចាំកម្ពុជា ដែលមាននិវេសនដ្ឋាន នៅទីក្រុងហាណូយ ប្រទេសវៀតណាម ដើម្បី ពិភាក្សាការងារ នៅទីស្ដីការក្រសួង។ ឯកឧត្ដម ទេសរដ្ឋមន្ដ្រី ចម ប្រសិទ្ធ បានសំដែងការស្វាគមន៍ និងសាទរចំពោះ ឯកឧត្ដម Olegsiy Shovkopliasដែលរដ្ឋាភិបាល នៃប្រទេសអ៊ុយក្រែន តែងតាំងជាឯកអគ្គរដ្ឋទូត ប្រចាំកម្ពុជា។ ឯកឧត្ដម បានលើក ឡើងពីទំនាក់ទំនងដ៏ល្អ រវាងកម្ពុជា និងប្រទេសអ៊ុយក្រែន និងថ្លែងអំណរគុណ ចំពោះប្រទេស អ៊ុយក្រែន ដែលបានឧបត្ថម្ភ គាំទ្រដល់ប្រទេសកម្ពុជា តាំងពីទស្សវត្សន៍ឆ្នាំ៨០ ក្នុងដំណាក់កាល ដែលកម្ពុជា ទើបរួចផុត ពីរបបប្រល័យពូជសាសន៍ប៉ុល ពត និងជួបការលំបាកបំផុត។ ទាក់ទងនិងវិស័យពាណិជ្ជកម្ម និងការវិនិយោគ ឯកឧត្ដមទេសរដ្ឋមន្ដ្រី ចម ប្រសិទ្ធ បានមើល ឃើញពីសក្ដានុពល នៃប្រទេសទាំងពីរ ដែលមានសេដ្ឋកិច្ច អាចបំពេញបន្ថែមគ្នាបាន ដូចជាៈប្រទេសអ៊ុយ ក្រែន ជាប្រទេសមាន ភាពរីកចំរើន ផ្នែកឧស្សាហកម្ម ទំនើប សេវាកម្ម និងការកែច្នៃ ។
រីឯកម្ពុជា ជាប្រទេសកសិកម្ម ទេសចរណ៍ និងការទទួលបានភាព អនុគ្រោះពាណិជ្ជកម្មសម្រាប់ ការនាំចេញ ។
ឯកឧត្ដម Olegsiy Shovkoplias ឯកអគ្គរដ្ឋទូត នៃសាធារណរដ្ឋអ៊ុយក្រែន ប្រចាំកម្ពុជា បានវាយតម្លៃខ្ពស់ ចំពោះភាពរីកចំរើន ដ៏ឆាប់រហ័សរបស់កម្ពុជា ជាពិសេសលើវិស័យហេដ្ឋា រចនាសម្ព័ន្ធផ្លូវ ថ្នល់ សំណង់អគារ កំពង់ផែ និងព្រលាន យន្ដហោះ ហើយកំរិតជីវភាព របស់ប្រជាពលរដ្ឋ មានការកើនឡើង គួរកត់សំគាល់។ ឯកឧត្ដម ឯកអគ្គរដ្ឋទូត អ៊ុយក្រែន បាន បញ្ជាក់ថាៈផ្នែកសំខាន់ៗ នៃផលិតផលក្នុងស្រុកសរុប តាមវិស័យ គឺប្រទេសអ៊ុយក្រែន មានវិស័យកសិកម្មចំនួន ៩,៤% ឧស្សាហកម្ម ៣៤,៤% សេវាកម្ម ចំនួន ៥២,២% គិតក្នុងឆ្នាំ២០១១។ ឧស្សាហកម្មសំខាន់ៗ គឺធ្យូងថ្ម -អគ្គិសនី-ដែក-គ្រឿងចក្រ-រថយន្ដដឹកជញ្ជូន-ជាតិគីមី និងការកែច្នៃម្ហូបអាហារ។ ឯកឧត្ដម បានមើលឃើញ ពីសក្ដានុពលសេដ្ឋកិច្ចច្រើន នៅកម្ពុជា និងខិតខំ ជួយអំពាវនាវ វិនិយោគិនអ៊ុយក្រែន មកពនិត្យលទ្ធភាពវិនិយោគ នៅកម្ពុជាឱ្យបានច្រើន ។
ដើម្បីពង្រឹកកិច្ចសហប្រតិបត្ដិការ និងពង្រីកវិស័យពាណិជ្ជកម្ម នៃប្រទេសទាំងពីរ ឯកឧត្ដម ទេសរដ្ឋមន្ដ្រី ចម ប្រសិទ្ធ និងឯកឧត្ដម ឯកអគ្គរដ្ឋទូត នៃសាធារណរដ្ឋអ៊ុយក្រែន ប្រចាំកម្ពុជា បានពិភាក្សាដោយផ្ដោត ជាសំខាន់ទៅលើការ បង្កើតឱ្យមានកិច្ច ព្រមព្រៀងទ្វេភាគី ស្ដីពីការជម្រុញ និងកិច្ចការពារអ្នកវិនិយោគ-ការផ្លាស់ប្ដូរប្រតិភូអ្នកធុរៈកិច្ច-ការសម្រួល ទិដ្ឋាការធ្វើដំណើរ និងការចូលរួម និងការរៀបចំតាំងពិព័រណ៍ពាណិជ្ជកម្ម នៃប្រទេសរៀងៗខ្លួន ។ល ។
តាមរយៈឯកឧត្ដម ឯកអគ្គរដ្ឋទូត នៃប្រទេសអ៊ុយក្រែន ឯកឧត្ដម ទេសរដ្ឋមន្ដ្រី ចម ប្រសិទ្ធបានអំពាវនាវឱ្យ វិនិយោគិនអ៊ុក្រែន មកបំពេញទស្សនៈកិច្ច ដើម្បីសិក្សាស្វែងយល់ជាក់ស្ដែង ពីសក្ដានុពលសេដ្ឋកិច្ច-ពាណិជ្ជកម្ម និងពិនិត្យ លទ្ធភាព វិនិយោគនៅកម្ពុជា ជាពិសេសការផ្ទេរបច្ចេកវិទ្យា របស់ប្រទេសអ៊ុយក្រែនមកកម្ពុជា ដើម្បីផលិតនិងកែច្នៃសម្រាប់ ធ្វើការនាំចេញ ដោយប្រើប្រាស់ប្រព័ន្ធ អនុគ្រោះពាណិជ្ជកម្មកម្ពុជា ដែលទទួលបាន ពីប្រទេសអភិវឌ្ឍន៍ និងប្រទេសដៃគូ ដែលអនុញ្ញាត ឱ្យទំនិញរាប់ពាន់មុខពីកម្ពុជា អាចនាំចេញ ដោយមិនជាប់ពន្ធ និងមិន ជាប់កូតា ។
ពិធីបើកកិច្ចប្រជុំមហាសន្និបាតអន្តរសភាអាស៊ាន AIPA លើកទី៣៣
មហាសន្និបាតអន្តរសភាអាស៊ានAIPA លើកទី៣៣ បានប្រារព្វពិធីបើកជាផ្លូវការ នៅវេលាម៉ោង១៩ល្ងាចថ្ងៃទី១៧កញ្ញា នៅសាលាខេត្តលំបុក ខេត្តនូសាតេងហ្ការ៉ាភាគខាងលិច ដែលជាតំបន់ទេសចរណ៍ឆ្នេរសមុទ្យលំដាប់ទី២ បន្ទាប់ពីកោះបាលី របស់សាធារណរដ្ឋឥណ្ឌូណេស៊ី។ នៅមុនពិធីបើកកិច្ចប្រជមហាសន្និបាត អន្តរសភាអាស៊ាន AIPAលើកទី៣៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងក្នុងនាមជាប្រធានអាស៊ាន បានជួបសន្ទនាដោយផ្ទាល់ជាមួយ ឯកឧត្តមបណ្ឌិត ម៉ាស៊ូគី អាលី ប្រធានសភាតំណាងរាស្រ្ត នៃសាធារណរដ្ឋឥណ្ឌូណេស៊ី និងជាប្រធានអន្តរសភាអាស៊ានលើកទី៣៣ ក្នុងបរិយាកាសស្និតស្នាលរ៉ាក់ទាក់បំផុត។ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានអាស៊ានក៏ដូចជាឯកឧត្តម លោកជំទាវ នៃបណ្តាមេដឹកនាំសភាមកពីប្រទេសប្រុយណៃដារ៉ុយសាឡឹម ឡាវ ម៉ាឡេស៊ីមីយ៉ាន់ម៉ា ហ្វីលីពីន សឹង្ហបុរីថៃ វៀតណាម រួមទាំងប្រទេសអ្នកសង្កេតការណ៍ចំនួន១១ទៀតរបស់អន្តរសភាអាស៊ានរួមមានប្រទេសអូស្រ្តាលី ប៉េឡារ៉ុស្ស កាណាដា សាធារណរដ្ឋប្រជាមានិតចិន សភាអឺរ៉ុប ប្រទេសជប៉ុន ឥណ្ឌាសហពន្ធ័រុស្ស៊ីញ៉ូហ្សេឡែន ប៉ាពូញូហ្គីនី និងសាធារណរដ្ឋកូរ៉េ និងភ្ញៀវរបស់អន្តរសភាអាស៊ានជាច្រើនទៀតត្រូវបានការធ្វើគារវកិច្ចយ៉ាងស្និតស្នាលបំផុតពី ឯកឧត្តមបណ្ឌិត ម៉ាស៊ូគី អាលី ប្រធានសភាតំណាងរាស្រ្តនៃសាធារណរដ្ឋឥណ្ឌូណេស៊ី និងជាប្រធានអន្តរសភាអាស៊ានលើកទី៣៣ ឯកឧត្តមសាស្រ្តាចារ្យបណ្ឌិត បូឌីដ្យូណូអនុប្រធានាធិបតី នៃសាធារណរដ្ឋឥណ្ឌូណេស៊ី។
ថ្លែងសុន្ទរកថាក្នុង ពិធីបើក កិច្ចប្រជុំមហាសន្និបាត អន្តរសភាអាស៊ានលើកទី៣៣ ឯកឧត្តមបណ្ឌិត ម៉ាស៊ូគីអាលី ប្រធានសភាតំណាងរាស្រ្ត នៃសាធារណរដ្ឋឥណ្ឌូណេស៊ី និងជាប្រធានអន្តរសភា អាស៊ានលើកទី៣៣ មានប្រសាសន៍ថា មហាសន្និបាតអន្តរសភាអាស៊ានលើកទី៣៣នេះ យើងនិងពិភាក្សាទៅលើរបៀបវារៈជាច្រើន ដែលទាក់ទិនទៅនិងបញ្ហានយោបាយ ក្នុងនោះទី១ជំរុញរដ្ឋជាសមាជិកអាស៊ាន ក្នុងការបង្កើតគំនិតផ្តួចផ្តើមស្តីពី បង្កើនការយល់ដឹងជាសាធារណៈ និងផ្សព្វផ្សាយអំពីការចូលរួមរបស់សង្គមស៊ីវិល ក្នុងការកសាងសហគំន៍អាស៊ាន ទី២ដំណោះស្រាយលើបញ្ហាសមុទ្រចិនខាងត្បូង។ បញ្ហាសេដ្ឋកិច្ច ទី១ជំរុញឲ្យមានការប្រឹងប្រែង និងកិច្ចសហប្រតិបត្តិការក្នុងតំបន់ ដើម្បីប្រឆាំងនឹងការជួញដូរប្រាក់ខុសច្បាប់ ទី២ការបង្កើតសេដ្ឋកិច្ចបៃតង ក្នុងបរិបទការអភិវឌ្ឍប្រកបដោយចិរភាព ទី៣ការអនុម័តផែនការយុទ្ធសាស្រ្តសំរាប់ការលុបបំបាត់ភាពក្រីក្រ និងរចនាសម្ពន្ធ័សំរាប់ ការអភិវឌ្ឍប្រកបដោយនិរន្តរភាព ទី៤ធានាថាភាពកាន់តែប្រសើរឡើង នៃការចូលមកដល់នៃបច្ចេកវិទ្យា ទីផ្សារ និងហិរញ្ញទាន រួមមានកម្មវិធីមូលនិធិអន្តរជាតិ តាមរយៈកម្មវិធីថ្នាក់ជាតិសំរាប់ជួយដល់ សហគ្រាសខ្នាតតូច និងមធ្យម។ បញ្ហាសង្គម ទី១បង្កើនភាពយល់ដឹង និងលើកកំពស់ការចូលរួមជាសាធារណៈ ក្នុងកម្មវិធីដែលទាក់ទិនទៅនិងការកាត់បន្ថយគ្រោះមហន្តរាយ និងឆ្លើយតបយ៉ាងឆាប់រហ័ស ក្នុងការជំរុញសហគមន៍ឲ្យមានភាពរឹងមាំ ទៅនិងគ្រោះមហន្តរាយ ទី២បង្កើនការអភិវឌ្ឍ និងកាត់បន្ថយសារធាតុកាបូនឲ្យមានកំរិតទាប និងស្រាវជ្រាវរកបច្ចេកវិទ្យាផ្សេងៗ ដែលមិនប៉ះពាល់ដល់បរិស្ថាន។ លើសមាជិកសភាស្រ្តីរបស់អន្តរសភាអាស៊ានWAIPA បណ្តាមេដឹកនាំទាំងអស់ បានឯកភាពទី១ គាំទ្ររដ្ឋជាសមាជិកអាស៊ាន ក្នុងការពង្រឹងកិច្ចសហប្រតិបត្តិការ នៃការអនុវត្តផែនទីបង្ហាញផ្លូវ គោលដៅអភិវឌ្ឍន៍សហវត្សរ៍ ដើម្បីបង្រួមគម្លាតក្នុងចំណោមរដ្ឋជាសមាជិកអាស៊ាន ទី២តួនាទីតំណាងរាស្រ្តជាស្រ្តី ក្នុងការជំរុញនូវគោលនយោបាយស្តីពីស្រ្តីនិយម ក្នុងវិស័យសេដ្ឋកិច្ច សុខភាព និងវិស័យអប់រំ និងទី ៣ជំរុញនិងលើកកម្ពស់សមត្ថភាព ព្រមទាំងបណ្តុះបណ្តាលជំនាញជាក់លាក់ ដល់ស្រ្តីនៅតាមតំបន់ជនបទ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានអាស៊ានអញ្ជើញថ្លែងសុន្ទរកថាគន្លឹៈក្នុងពិធីបើកកិច្ចប្រជុំមហាសន្និបាត អន្តរសភាអាស៊ានលើកទី៣៣ក្នុងខ្លឹមសារដូចតទៅ
(សម្លេងដើមរបស់សម្តេចតេជោ)
នៅក្នុងក្នុងពិធីបើកកិច្ចប្រជុំមហាសន្និបាត អន្តរសភាអាស៊ានលើកទី៣៣នេះដែរ ឯកឧត្តមសាស្រ្តាចារ្យបណ្ឌិត បូឌីដ្យូណូ អនុប្រធានាធិបតី នៃសាធារណរដ្ឋឥណ្ឌូណេស៊ី អញ្ជើញថ្លែងសុន្ទរកថា ដោយបានសំដែង នូវការស្វាគមន៍យ៉ាងកក់ក្តៅបំផុត ក្នុងនាមឯកឧត្តមប្រធានាធិបតី ក៏ដូចជាថ្នាក់ដឹកនាំនិងប្រជាជនឥណ្ឌូណេស៊ី ទាំងអស់ជូនចំពោះសម្តេច ឯកឧត្តម លោកជំទាវ ជាប្រធានប្រតិភូសភាមកពីប្រទេសអាស៊ានទាំង១០ និងប្រតិភូសភាមកពីប្រទេស ជាអ្នកសង្កេតការណ៍ចំនួន១១ផ្សេងទៀត របស់អន្តរសភាអាស៊ាន ដែលបានអញ្ជើញមកចូល រួមក្នុងពិធីបើកកិច្ចប្រជុំមហាសន្និបាតអន្តរសភាអាស៊ានលើកទី៣៣ នៅលើទឹកដែនដីកោះលំបុក ដែលជាតំបន់ទេសចរណ៍ឆ្នេរសមុទ្រដ៏ប្រណិតលំដាប់ទី២ របស់សាធារណរដ្ឋឥណ្ឌូណេស៊ី។ ឯកឧត្តមសាស្រ្តាបណ្ឌិត អនុប្រធានាធិបតី ក៏បានប្រសិទ្ធពរជ័យបវរមហាប្រសើរ ជូនដល់ការស្នាក់អាស្រ័យ នៃការអញ្ជើញចូលរួមកិច្ចប្រជុំមហាសន្និបាតអន្តរសភាអាស៊ានលើកទី៣៣ ប្រកបដោយលទ្ធផលដ៏ត្រចះត្រចង់ ក្នុងន័យពង្រឹងតួនាទីរបស់សភាឆ្ពោះទៅកាន់សហគមន៍អាស៊ាននៅឆ្នាំ២០១៥។
(មានថតរូបអនុស្សាវរីយ៍)
បន្ទាប់មកនៅរាត្រីថ្ងៃដដែលនោះដែរ សម្តេចអគ្គមហាពញាចក្រី ហេង សំរិន ប្រធាន រដ្ឋសភា នៃព្រះរាជាណាចក្រកម្ពុជា សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានអាស៊ាន ក៏ដូចជាឯកឧត្តម លោកជំទាវ នៃបណ្តាមេដឹកនាំសភាមកពីប្រទេស ប្រុយណៃដារ៉ុយសាឡឹម សាធារណរដ្ឋប្រជាធិបតេយ្យប្រជាមានិតឡាវ សហពន្ធ័ម៉ាឡេស៊ី សាធារណរដ្ឋសហភាពមីយ៉ាន់ម៉ា សាធារណរដ្ឋហ្វីលីពីន សឹង្ហបុរី រាជាណាចក្រថៃ សាធារណរដ្ឋសង្គមនិយមវៀតណាម រួមទាំងប្រទេស អ្នកសង្កេតការណ៍ ចំនួន១១ទៀតរបស់អន្តរសភាអាស៊ាន រួមមានប្រទេសអូស្រ្តាលី ប៉េឡារ៉ុស្ស កាណាដា សាធារណរដ្ឋប្រជាមានិតចិនសភាអឺរ៉ុប ប្រទេសជប៉ុន ឥណ្ឌា សហពន្ធ័រុស្ស៊ីញ៉ូហ្សេឡែន ប៉ាពូញូហ្គីនី និងសាធារណរដ្ឋកូរ៉េ និងភ្ញៀវរបស់អន្តរសភាអាស៊ានជាច្រើនទៀត បានអញ្ជើញចូលរួមក្នុងពិធីលៀងសាយភោជន៍ ដែលរៀបចំឡើងយ៉ាងមហាកិត្តិយស បំផុតពីសំណាក់ឯកឧត្តមសាស្រ្តាចារ្យបណ្ឌិត បូឌីដ្យូណូ អនុប្រធានាធិបតី នៃសាធារណរដ្ឋឥណ្ឌូណេស៊ីនិងលោកជំទាវ។ សូមបញ្ជាក់ដែរថា លំបុកគឺជាដែនកោះមួយ ស្ថិតនៅក្នុងខេត្តនូសាតេងហ្ការ៉ាខាងលិច និងស្ថិតនៅខាងកើតកោះបាលី នៃសាធារណរដ្ឋឥណ្ឌូណេស៊ី មានផ្ទៃដីទំហំ៤៧២៥គីឡូម៉ែត្រក្រឡា។ កោះលំបុកត្រូវបានរដ្ឋាភិបាលឥណ្ឌូណេស៊ី កំណត់ទិសដៅជាតំបន់ទេសចរណ៍ឆ្នេរសមុទ្រទី២ បន្ទាប់ពីកោះបាលី ដែលមានប្រជាពលរដ្ឋរស់នៅចំនួនជាង ៣លាន១៦៦ពាន់នាក់។ តាមរយៈទិសដៅនេះ កោះលំបុកត្រូវបាន អភិវឌ្ឍហេដ្ឋារចនាសម្ពន្ធ័ថ្មីជាច្រើន រួមទាំងស្ថាបនាអាកាសយានដ្ឋានអន្តរជាតិថ្មីមួយទៀត ដើម្បីសំរេចទិសដៅទាក់ទាញអ្នកទេសចរណ៍ឲ្យបាន ១លាននាក់ នៅឆ្នាំ២០១២។
Subscribe to:
Posts (Atom)