ផែនការយុទ្ធសាស្រ្តអភិវឌ្ឍន៍ទេសចរណ៍ ២០១២-២០២០ ត្រូវបានប្រគល់ និងប្រកាសផ្សព្វផ្សាយជាផ្លូវការនាព្រឹកថ្ងៃទី២០ ខែកញ្ញា ឆ្នាំ២០១២ នៅវិមានសន្តិភាពក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន។ ថ្លែងនៅក្នុងឱកាសនោះ សម្តេចតេជោនាយករដ្ឋមន្រ្តី បានសម្ដែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ដ្រីគ្រប់លំដាប់ថ្នាក់នៃក្រសួងទេសចរណ៍ ក្រសួង-ស្ថាប័នពាក់ព័ន្ធទាំងអស់ ក្នុងកិច្ចសហការគ្នារៀបចំផែនការយុទ្ធសាស្ដ្រអភិវឌ្ឍន៍ទេសចរណ៍នេះឡើង។
សម្តេចតេជោមានប្រសាសន៍បញ្ជាក់ថា ទេសចរណ៍វប្បធម៌ត្រូវបានផ្ដល់អាទិភាពខ្ពស់ក្នុងការអភិវឌ្ឍទេសចរណ៍នៅកម្ពុជា ព្រមជាមួយនឹងការធ្វើឱ្យប្រសើរឡើងនូវអេកូទេសចរណ៍ ដែលជាចក្ខុវិស័យ និងគោលដៅទេសចរណ៍ថ្មីសម្រាប់រួមចំណែកដល់ការទប់ទល់ជាមួយនឹងការផ្លាស់ប្ដូរអាកាសធាតុសកល ការកាត់បន្ថយភាពក្រីក្ររបស់ប្រជាជន និងការរួមចំណែកដល់ការអភិវឌ្ឍសេដ្ឋកិច្ចបៃតងនៅកម្ពុជា។ ជារួមវិស័យទេសចរណ៍ត្រូវបានចាត់ទុកថា ជាវិស័យអាទិភាព ឬអាចនិយាយមួយបែបទៀតថា ជា (មាសបៃ តង) ដោយវិស័យនេះបានរួមចំណែកយ៉ាងខ្លាំងក្លាដល់ការបង្កើត និងបង្កើនឱកាសការងារ បង្កើនប្រាក់ចំណូលជូនប្រជាជនដោយផ្ទាល់ និងដោយប្រយោល ការជំរុញការនាំចេញនៅនឹងកន្លែង ការជំរុញកំណើនសេដ្ឋកិច្ច និងបង្កើនចំណូលជាតិ ដែលនឹងរួមចំណែកដល់ការកាត់បន្ថយភាពក្រីក្ររបស់ប្រជាជន។
សម្តេចអគ្គមហាសេនាបតីតេជោ ហ៊ុន សែន បានដាក់ចេញនូវអនុសាសន៍ចំនួន១២ចំណុច សម្រាប់ថ្នាក់ដឹកនាំ និងមន្ដ្រីគ្រប់លំដាប់ថ្នាក់នៃក្រសួងទេសចរណ៍ ក្រសួង-ស្ថាប័ន និងភាគីពាក់ព័ន្ធទាំងអស់ ដើម្បីជាគន្លឹះ ក្នុងការចូលរួមចំណែក ជំរុញការអនុវត្ដផែនការយុទ្ធសាស្រ្តអភិវឌ្ឍន៍ទេសចរណ៍ ២០១២-២០២០ និងការបន្ដអភិវឌ្ឍវិស័យទេសចរណ៍ទាំងមូលនោះរួមមាន៖
ទី១-ត្រូវបន្ដខិតខំយកចិត្ដទុកដាក់អភិវឌ្ឍផលិតផលទេសចរណ៍ តាមរយៈការអនុវត្ដយុទ្ធសាស្ដ្រ ពិពិធកម្មផលិត ផលទេសចរណ៍ និងគោលដៅទេសចរណ៍ ព្រមទាំងការពង្រឹងគុណភាព ផលិតផល និងសេវាទេសចរណ៍នៅគ្រប់រាជធានី-ខេត្ដ ជាពិសេសនៅតំបន់អាទិភាពទេសចរណ៍។
ក្នុងនោះ ក្រសួងទេសចរណ៍ ត្រូវបន្ដយកចិត្ដទុកដាក់សហការលើការគ្រប់គ្រងឧស្សាហកម្មទេសចរណ៍ ដោយខិតខំបន្ដជំរុញអនុវត្ដច្បាប់ស្ដីពីទេសចរណ៍ និងជំរុញការរៀបចំលិខិតបទដ្ឋានគតិយុត្តិនានាឱ្យបានច្រើនថែមទៀត ដើម្បីធានាបាននូវសង្គតិភាពនៃការអភិវឌ្ឍ និងការអភិរក្ស។
ទន្ទឹមនឹងនេះ ត្រូវបន្ដចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ» ដែលជាយុទ្ធនាការពង្រឹងគុណភាពផលិតផលទេសចរណ៍ប្រកបដោយប្រសិទ្ធភាព ភាពស្អាតបៃតង និងត្រូវចូលរួមបំផុសចលនា «ទេសចរម្នាក់ ដើមឈើមួយដើម» ឬ «ការដាំដើមឈើផ្ដើមចេញពីអ្នក»។
ទី២-ត្រូវយកចិត្ដទុកដាក់ក្នុងការជំរុញបង្កើតសហគមន៍អ្នកលក់វត្ថុអនុស្សាវរីយ៍ និងសមាគម អ្នកលក់វត្ថុអនុស្សាវរីយ៍ ការអភិវឌ្ឍសហគមន៍ទេសចរណ៍ សហគមន៍អេកូទេសចរណ៍ ជាពិសេស នៅតំបន់ទេសចរណ៍អាទិភាព សំដៅរួមចំណែកការពារអភិរក្សធនធានធម្មជាតិ សម្បត្ដិវប្បធម៌ប្រពៃណីទំនៀមទម្លាប់នៅតាមតំបន់ និងធ្វើឱ្យបងប្អូនប្រជាពលរដ្ឋនៅមូលដ្ឋានមានមុខរបរ មានការងារធ្វើបន្ថែម និងទទួលផលប្រយោជន៍ប្រកបដោយសមធម៌ពីសកម្មភាពទេសចរណ៍ និងសកម្មភាពសេដ្ឋកិច្ចផ្សេងៗទៀត។
ទី៣-ត្រូវបន្ដយកចិត្ដទុកដាក់បង្កើនកិច្ចសហប្រតិបត្ដិការជាមួយវិស័យឯកជន ក្នុងការទាក់ទាញភ្ញៀវទេសចរមកពីទីផ្សារទេសចរណ៍អាស៊ាន អាស៊ានបូកបី ឥណ្ឌា និងទីផ្សារទើបងើបថ្មីដូចជា ទីផ្សាររុស្ស៊ី និងអារ៉ាប់ជាដើម។ ប៉ុន្ដែក៏ត្រូវយកចិត្ដទុកដាក់រក្សានូវទីផ្សារដែលមានស្រាប់ ដូចជាអឺរ៉ុប ចិន និងអាមេរិកផងដែរ។
ព្រមជាមួយនេះត្រូវបង្កើនយុទ្ធនាការផ្សព្វផ្សាយទេសចរណ៍កម្ពុជាៈ ព្រះរាជាណាចក្រអច្ឆរិយៈ តាមរយៈការផ្សព្វផ្សាយម្ហូបអាហារខ្មែរ និងបង្អែមខ្មែរឱ្យកាន់តែទូលំទូលាយថែមទៀតដល់ភ្ញៀវទេសចរ។
ជាមួយនេះត្រូវបន្ដពង្រឹង និងពង្រីកសកម្មភាពផ្សព្វផ្សាយទេសចរណ៍តំបន់អភិវឌ្ឍត្រីកោណនៃខេត្ដភាគឦសានរបស់កម្ពុជាតំបន់អភិវឌ្ឍន៍ត្រីកោណកម្ពុជា-ឡាវ-វៀតណាម និងតំបន់ឆ្នេរសមុទ្រឱ្យបានខ្លាំងក្លា។
ទី៤-គណៈកម្មការអន្ដរក្រសួងត្រូវយកចិត្ដទុកដាក់ថែមទៀត ក្នុងការសម្រួលការធ្វើដំណើរឱ្យកាន់តែរលូននៅតាមច្រកទ្វារព្រំដែនអន្ដរជាតិ និងត្រូវខិតខំរៀបចំហេដ្ឋារចនាសម្ព័ន្ធសម្រាប់បដិសណ្ឋារកិច្ចឱ្យកាន់តែប្រសើរឡើងថែមទៀតដូចជា ចំណតរថយន្ដ កន្លែងរង់ចាំ អគារឆ្លងកាត់របស់អ្នកដំណើរ សេវាប្ដូរប្រាក់ សេវាព័ត៌មាន។ល។ ពិសេសការសម្រួលបែបបទធ្វើដំណើរឱ្យបានរហ័ស។ ទន្ទឹមនឹងនេះ ក្រសួងទេសចរណ៍ រដ្ឋលេខាធិការដ្ឋានអាកាសចរស៊ីវិល ភាគីពាក់ព័ន្ធត្រូវបន្ដយកចិត្ដទុកដាក់ក្នុងការសម្របសម្រួល និងទាក់ទាញឱ្យមានការតភ្ជាប់ការហោះហើរឱ្យបានច្រើនថែមទៀតពីអាស៊ាន អាស៊ានបូកបី ឥណ្ឌា រុស្ស៊ី អារ៉ាប់ និងទីផ្សារអឺរ៉ុបមកកម្ពុជា និងជំរុញឱ្យក្រុមហ៊ុនអាកាសចរណ៍ជាតិកម្ពុជាអង្គរអ៊ែរពង្រីកជើងហោះហើរឱ្យកាន់តែច្រើននៅក្នុងតំបន់ ជាពិសេស តំបន់អាស៊ាន និងអាស៊ានបូកបី។
ព្រមជាមួយនេះ ត្រូវជំរុញយកចិត្ដទុកដាក់ទាក់ទាញផងដែរ នូវក្រុមហ៊ុនអាកាសចរណ៍ ដែលមានតម្លៃទាបហោះហើរមកកម្ពុជាកាន់តែច្រើនថែមទៀត។
ទី៥-ក្រសួងទេសចរណ៍ត្រូវសហការជាមួយក្រសួង ស្ថាប័នពាក់ព័ន្ធ ពិសេសក្រោមយន្ដការ គណៈកម្មាធិការជាតិអភិវឌ្ឍន៍ទេសចរណ៍ និងយន្ដការសមស្របនានា ដើម្បីជំរុញការពង្រីកហេដ្ឋារចនាសម្ព័ន្ធគាំទ្រទេសចរណ៍ ដូចជា ការស្ដារ និងកសាងផ្លូវទៅកាន់គោលដៅទេសចរណ៍ វាលឬ ព្រលានយន្ដហោះ ការតភ្ជាប់តាមផ្លូវដែក ការកសាងកំពង់ផែទេសចរណ៍ ការផ្គត់ផ្គង់អគ្គីសនី ទឹក ស្អាត និងការគ្រប់គ្រងកាកសំណល់រឹង និងរាវ ដែលជាការរួមចំណែកក្នុងចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ»។
ដោយឡែកនៅក្នុងការអភិវឌ្ឍសម្រាប់រយៈពេលវែងត្រូវពិនិត្យលទ្ធភាព និងសិក្សាការកសាងព្រលានយន្ដហោះកម្រិតអន្ដរជាតិថ្មីមួយនៅភ្នំពេញ ដែលមានសមត្ថភាពផ្ទុករហូតដល់ជា១០ លាននាក់ក្នុងមួយឆ្នាំ។
ទី៦-ក្រសួងមហាផ្ទៃ អគ្គស្នងការនគរបាលជាតិ ជាពិសេសអង្គភាពនគរបាលទេសចរណ៍ត្រូវចូលរួមយ៉ាងសកម្ម ក្នុងការថែរក្សាសន្ដិភាព សុវត្ថិភាព និងសណ្ដាប់ធ្នាប់ជូនភ្ញៀវទេសចរនៅគ្រប់តំបន់ទេសចរណ៍។
ទាក់ទងបញ្ហានេះ សម្តេចតេជោបានមានប្រសាសន៍បញ្ជាក់ថា ខ្ញុំសូមគាំទ្រដល់ប្រតិបត្ដិករ អាជីវករទេសចរណ៍ ក្នុងការចូលរួមបង្កើតឱ្យមានសន្ដិសុខស្ម័គ្រចិត្ដឯកជនដើម្បីរក្សាសន្ដិសុខ សុវត្ថិភាពនៅតាមគោលដៅទេសចរណ៍ទាំងឡាយ ជាជំនួយដល់កម្លាំងសន្ដិសុខសាធារណៈ ។ ទន្ទឹមនឹងនេះ ក្រសួងទេសចរណ៍ត្រូវសហការជាមួយក្រសួងមហាផ្ទៃ អគ្គស្នងការនគរបាលជាតិ ក្រសួងសុខាភិបាល វិស័យឯកជន និងស្ថាប័នពាក់ព័ន្ធដទៃទៀត ដើម្បីពង្រឹងប្រព័ន្ធធានាសុវត្ថិភាព សង្គ្រោះភ្ញៀវទេសចរឱ្យបានកាន់តែប្រសើរថែមទៀត ដោយត្រូវរៀបចំឱ្យមានផែនការជាតិ ធានាសុវត្ថិភាពភ្ញៀវទេសចរ និងត្រូវដាក់ចេញនូវយន្ដការ និងវិធានការច្បាស់លាស់លើសេវាសន្ដិសុខ សង្គ្រោះបន្ទាន់ ពេលជួបបញ្ហាជាយថាហេតុណាមួយ។
ទី៧-ត្រូវយកចិត្ដទុកដាក់ខ្ពស់ក្នុងការអភិវឌ្ឍធនធានមនុស្ស ជាពិសេស ផ្នែកជំនាញវិជ្ជាជីវៈ ទេសចរណ៍ ដោយហេតុថា កិច្ចការនេះជាកត្ដាកំណត់ និងជាមូលដ្ឋានក្នុងការពង្រឹងគុណភាពសេវាកម្មទេសចរណ៍។
ក្នុងនោះ ត្រូវបន្ដជំរុញការកសាងសាលាបណ្ដុះបណ្ដាលវិជ្ជាជីវៈ និងគ្រឹះស្ថានសិក្សាទេសចរណ៍ជាតិសម្រាប់អភិវឌ្ឍធនធានមនុស្សក្នុងវិស័យទេសចរណ៍ ដើម្បីធានាដល់ការអនុវត្ដកិច្ចព្រមព្រៀងនានានៅក្នុងតំបន់ និងអន្ដរជាតិស្ដីពីការអភិវឌ្ឍធនធានមនុស្ស និងការធ្វើបម្លាស់ទីនៃអ្នកជំនាញទេសចរណ៍ ពិសេស ការអនុវត្ដក្នុងក្របខណ្ឌ័អាស៊ានចាប់ពីឆ្នាំ២០១៥ តទៅ។
ទី៨-ស្របពេលដែលយើងខិតខំទាក់ទាញភ្ញៀវទេសចរអន្ដរជាតិឱ្យមកទស្សនាកម្ពុជា យើងក៏មិនត្រូវភ្លេចពីសារៈសំខាន់ និងចាំបាច់ក្នុងការជំរុញចលនាទេសចរណ៍ក្នុងស្រុក ដើម្បីរួមចំណែកជំរុញសកម្មភាពសេដ្ឋកិច្ចផ្ទៃក្នុង ការលើកកម្ពស់ស្មារតីស្រឡាញ់ជាតិមាតុភូមិ និងចូលរួមក្នុងការថែរក្សាធនធានធម្មជាតិបីតិកភណ្ឌ វប្បធម៌ និងជួយដល់ការអភិវឌ្ឍសង្គមសេដ្ឋកិច្ច ជាពិសេស នៅសហគមន៍មូលដ្ឋាន។
ទី៩-ត្រូវសិក្សាឱ្យច្បាស់អំពីបញ្ហាប្រឈមនានាក្នុងការអភិវឌ្ឍទេសចរណ៍ ហើយត្រូវសហការគ្នាដោះស្រាយឱ្យបានសមស្រប និងទាន់ពេលវេលាដើម្បីដោះរបាំង ឬឧបសគ្គនានាដើម្បីជំរុញឱ្យវិស័យទេសចរណ៍អភិវឌ្ឍន៍កាន់តែប្រសើរឡើង។
ទី១០-ត្រូវខិតខំចាប់យកទស្សនាទាន «ស្អាត និងបៃតង» ដែលជាជម្រើសដ៏ឆ្លាតវៃនាពេល បច្ចុប្បន្ន និងសម្រាប់ពេលអនាគត។ ភាពស្អាត គឺការមានអនាម័យ ការមានរបៀបរៀបរយនៅទីសាធារណៈ ការរក្សានូវភាពបៃតងនៃធម្មជាតិទាំងឡាយរួមទាំងជីវចំរុះ ការដាំដើមឈើឡើងវិញ ការប្រើប្រាស់ដោយសន្សំសំចៃនៃថាមពលអគ្គីសនី ទឹក ការប្រើប្រាស់ថាមពលកកើតឡើងវិញក្នុងឧស្សាហកម្មទេសចរណ៍ និងនៅគ្រប់ផ្នែកពាក់ព័ន្ធទាំងអស់ និងបង្កើតបាននូវភាពទាក់ទាញយ៉ាងសំខាន់ផង និងជាចលករក្នុងការចូលរួមអភិវឌ្ឍន៍បៃតងផង។
ទី១១-ត្រូវសិក្សា និងវាយតម្លៃជាប្រចាំអំពីប្រសិទ្ធភាពនៃការអនុវត្ដផែនការយុទ្ធសាស្ដ្រនេះ ហើយត្រូវខិតខំស្វែងរកប្រពភហិរញវត្ថុដើម្បីជំរុញដល់ការអនុវត្ដ។ ទន្ទឹមនេះ យើងត្រូវតែបន្ដកៀរគរធនធានវិនិយោគបន្ថែមទៀតពីគ្រប់វិស័យ ដើម្បីទាញយកផលប្រយោជន៍ឱ្យអស់លទ្ធភាព និងមាននិរន្ដរភាព ក្នុងនោះយើងក៏ត្រូវតែបន្ដឈ្មុសឈ្មុលប្រើប្រាស់ឱ្យអស់លទ្ធភាពផងដែរ នូវជំនួយបច្ចេកទេសនានាដែលដៃគូអភិវឌ្ឍន៍ផ្ដល់ឱ្យ និងខិតខំស្វះស្វែងរកជំនួយបច្ចេកទេសបន្ថែមទៀត រួមទាំងការជំរុញការវិនិយោគពីវិស័យឯកជនផង ដើម្បីបង្កើនកាលានុវត្ដភាពនៃការអភិវឌ្ឍវិស័យនេះ ឱ្យបានជាអតិបរមា និងប្រកបដោយចីរភាព។
ក្នុងនោះ យន្ដការសមស្របមួយចំនួន ចាំបាច់ត្រូវបង្កើតឡើង ហើយរចនាសម្ព័ន្ធគ្រប់គ្រងខ្លះទាំងនៅថ្នាក់ជាតិ និងថ្នាក់ក្រោមជាតិ ត្រូវពិនិត្យកែសម្រួល ដើម្បីបង្កើនល្បឿននៃការអភិវឌ្ឍទេសចរណ៍កម្ពុជា ឱ្យបានស័ក្ដិសមជាព្រះរាជាណាចក្រអច្ឆរិយៈ។
ទី១២-យើងមានប្រាសាទអង្គរ ប្រាសាទព្រះវិហារ ដែលជាបិតិកភ័ណ្ឌពិភពលោកដ៏ល្បីល្បាញ មានឆ្នេរសមុទ្រដ៏ល្អស្អាត មានតំបន់អេកូទេសចរណ៍ និងទេសចរណ៍ធម្មជាតិដ៏សម្បូរបែប ដែលសម្បត្ដិទាំងនោះ ជាមរតកមិនអាចកាត់ថ្លៃបាន ដូច្នេះយើងត្រូវនាំគ្នាថែរក្សា អភិរក្ស និងអភិវឌ្ឍឱ្យបានល្អគង់វង្សតទៅ។
ទន្ទឹមនឹងនេះ ចូរនាំគ្នាបន្ដរក្សានូវប្រពៃណីញញឹមរួសរាយរាក់ទាក់ដ៏ល្អរបស់យើង ចូរនាំគ្នាចូលរួមចលនាធ្វើឱ្យទីក្រុង ទីប្រជុំជន ភូមិឋានរបស់យើងស្អាត មានអនាម័យល្អគ្មានសំរាម និងថង់ផ្លាស្ទិកហើរតាមខ្យល់ ដើម្បីប្រែក្លាយកម្ពុជាជាគោលដៅទេសចរណ៍បៃតងដ៏ទាក់ទាញ មួយក្នុងតំបន់ និងពិភពលោក។
សម្តេចតេជោនាយករដ្ឋមន្រ្តីមានប្រសាសន៍ឲ្យដឹងថា ផែនការយុទ្ធសាស្ដ្រអភិវឌ្ឍន៍ទេសចរណ៍២០១២-២០២០ ជាឯកសារជាតិដ៏សំខាន់ ដែលមានចំនួន៥៧ទំព័រ បានបង្ហាញពីចក្ខុវិស័យច្បាស់លាស់ និងយូរអង្វែងសម្រាប់ការអភិវឌ្ឍទេសចរណ៍កម្ពុជាឱ្យប្រកបដោយចីរភាព ដោយផ្ដោតជាសំខាន់ទៅលើសក្ដានុពលវប្បធម៌ និងធម្មជាតិ។
សូមបញ្ជាក់ថា ផែនការយុទ្ធសាស្ដ្រអភិវឌ្ឍន៍ទេសចរណ៍២០១២-២០២០ បានចង្អុលបង្ហាញថា នៅឆ្នាំ២០២០ កម្ពុជានឹងទទួលបានភ្ញៀវទេសចរអន្ដរជាតិប្រមាណ៧លាននាក់ ព្រមជាមួយនឹងទេសចរក្នុងស្រុកប្រមាណពី៨ទៅ១០លាននាក់ ត្រូវធ្វើដំណីរទស្សនានៅទូទាំងប្រទេស ដែលតាមរយៈនេះ ចំណូលទេសចរណ៍ទៅក្នុងវិស័យសេដ្ឋកិច្ចនឹងកើនឡើងដល់ប្រមាណ ៥០០០លានដុល្លារក្នុងមួយឆ្នាំ ដែលចំណូលនេះនឹងរួមចំណែកយ៉ាងសំខាន់ដល់កំណើននៃផលិតផលក្នុងស្រុកសរុប ការលើកកម្ពស់កម្រិតជីវភាពរស់នៅរបស់ប្រជាជន និងផ្ដល់ឱកាសការងារប្រមាណ៨០ម៉ឺននាក់ ជូនប្រជាពលរដ្ឋរបស់យើងនៅផ្ទៃក្នុងប្រទេស។ វិស័យទេសចរណ៍នេះមានលក្ខណៈជាប្រព័ន្ធ ដែលនឹងរួមចំណែកលើកស្ទួយ និងជំរុញវិស័យដទៃទៀតឱ្យមានការអភិវឌ្ឍផងដែរ។
ទាក់ទងនឹងការដាក់ចេញនូវផែនការយុទ្ធសាស្រ្តអភិវឌ្ឍន៍ទេសចរណ៍ របស់រាជរដ្ឋាភិបាល សម្តេចតេជោនាយករដ្ឋមន្រ្តីមានប្រសាសន៍បញ្ជាក់ថា យើងសង្ឃឹមថា គណបក្សប្រឆាំងមិនចោទប្រកាន់ថា រាជរដ្ឋាភិបាលសម័យនេះបំពានការងារហួសអាណត្តិនោះទេ។ សម្តេចតេជោបានមានប្រសាសន៍ថា យើងអាចប្រកួតប្រជែងគ្នានៅថ្ងៃទី២៨ ខែកក្កដា ឆ្នាំ២០១៣ ប្រសិនបើ លោកឈ្នះ សូមអញ្ជើញមកកាន់អំណាចចុះ ហើយផែនការនេះបោះបង់ចោលក៏បោះទៅ ប៉ុន្តែនៅក្នុងដំណាក់កាលនេះ រាជរដ្ឋាភិបាលត្រូវតែរៀបចំចក្ខុវិស័យរបស់ខ្លួន ព្រោះអ្វីដែលជាប្រយោជន៍បានមកពីវិស័យទេសចរណ៍ គឺជាផលរបស់សង្គមជាតិយើងទាំងក្នុងពេលបច្ចុប្បន្ន និងកូនចៅយើងទៅអនាគតផងដែរ៕
PHNOM PENH, September, 21, 2012 (PQRU) – Deputy Prime Minister H.E Dr. Sok An, Minister in Charge of the Office of the Council of Ministers, and Flynn Fuller, USAID Mission Director, signed on Friday a bilateral agreement of $18.5 million for 2012-2013 program funding from U.S to support joint U.S and Cambodian priorities in economic growth, agriculture, food security, and global climate change adaptation, and mitigation.
Deputy Prime Minister His Excellency Dr. Sok An said the signing thus far of original agreement, Amendment Number One, Number Two and Number Three, and now Number four “not only demonstrates unwavering commitment of the Government of the United States of America to contribute to the achievement of economic growth in Cambodia, but also reflects a more satisfactory outcome of cooperation between the Kingdom of Cambodia and the United States of America.”
