កំពង់ចាម ៖ សម្តេចអគ្គមហាសេនាបតីតេជោ ហ៊ុន សែន បានប្រកាសកាលពីព្រឹកថ្ងៃទី ១៣ តុលា ថា លោកបានដាក់លិខិតទៅកាន់ព្រះមហាក្សត្រ កាលពីថ្ងៃទី ១២ តុលា ដើម្បីដកតំណែងមន្ត្រីជាន់ខ្ពស់ ក្រសួងមហាផ្ទៃ ដែលបានប្រព្រឹត្តល្មើសច្បាប់ទៅលើបញ្ហាដីធ្លី ដែលបាន និងកំពុងតែត្រូវបានធ្វើកំណែទម្រង់ក្រោមនយោបាយចាស់សកម្មភាពថ្មីនោះ។
សម្តេចតេជោនាយករដ្ឋមន្ត្រីមានប្រសាសន៍ក្នុងពិធីចែកប័ណ្ណកម្មសិទ្ធិដីធ្លីជូនប្រជាពលរដ្ឋនៅ ស្រុកស្ទឹងត្រង់ ខេត្តកំពង់ចាមថា ខ្ញុំត្រូវតែប្រកាសចេញពីខេត្តកំពង់ចាម បើមិនប្រកាសទេវានឹងមានគ្រោះថ្នាក់ បើវាកើតមានឡើងនូវរឿងរ៉ាវដូចគ្នានេះនៅពេលក្រោយ ហើយក៏សូមអំពាវនាវឲ្យប្រជាពលរដ្ឋ ឬមន្ត្រីរាជការកុំធ្វើអំពើខុសច្បាស់។ សម្តេចតេជោថ្លែងថា ខ្ញុំសូមជំរាបថា កាលពីម្សិលមិញ (១២.១០.២០១២) ខ្ញុំបានស្នើទៅព្រះមហាក្សត្រ ដើម្បីដកតំណែងទាំងអស់របស់ឧត្តមសេនីយ៍ឯក ឌឿន សុវណ្ណ ទីប្រឹក្សាក្រសួងមហាផ្ទៃ ព្រមទាំងបណ្តេញចេញពីនគរបាលជាតិផងដែរ។ សម្តេចតេជោ បានបញ្ជាក់ថា បើទោះបីជាព្រះមហាក្សត្រមិនទាន់ឡាយព្រះហស្ថលេខាលើព្រះរាជក្រឹត្យដកតំណែង ក៏យើងមានសិទ្ធិចាប់ខ្លួនដែរ ព្រោះរឿងនេះមិនតូចតាចនោះទេ។
សម្តេចតេជោមានប្រសាសន៍ថា ខ្ញុំសុំផ្តាំទៅទូទាំងប្រទេសមិនថាអ្នកណាទេ ការវាស់វែងដីធ្លី លើកនេះត្រូវមាននីតិវិធីច្បាស់លាស់អត់មានអ្នកណាមកតម្រូវបានទេ។ សម្តេចតេជោមានប្រសាសន៍ថា ដើមបណ្តឹងគឺចេញពីរដ្ឋ ដែលបានប្តឹងលោកផ្កាយ ៣ ដែលថ្លើមពាសមេឃ។ខ្ញុំធ្លាប់បានប្រកាសហើយថា កុំថាឡើយលោកឯងពាក់ផ្កាយ ទោះជាពាក់លោកខែក៏ត្រូវតែចាប់ដែរ ហើយនគរបាលត្រូវដាក់ការតាមដានបើវាហ៊ានរត់ចាប់ភ្លាម។ សម្តេចតេជោនាយករដ្ឋមន្ត្រីមានប្រសាសន៍ថា ជំហានដំបូង រាជរដ្ឋាភិបាលប្រកាន់យកវិធានការរដ្ឋបាលដកសក្តិចោលទាំងអស់ បន្ទាប់ទៅប្រគល់ឲ្យ ឯកឧត្តម អ៊ឹម ឈុនលឹម ដំណើរការផ្នែកច្បាប់ទៅតុលាការទៀត។ តាមការស៊ើបអង្កេតឲ្យដឹងថា ឌឿន សុវណ្ណ ជំនាញរកស៊ីខាងគួកជេរដី ហើយមិនដឹងថាតើគេធ្លាប់ធ្វើលិខិតធុននេះប៉ុន្មានហើយទៅតំបន់មួយចំនួននោះ។
ដោយបានអានលិខិតរបស់ ឈ្មោះ ឌឿន សុវណ្ណ ទាំងស្រុងនៅក្នុងពិធីចែកប័ណ្ណកម្មសិទ្ធិដីធ្លី នោះ សម្តេចតេជោនាយករដ្ឋមន្ត្រីមានប្រសាសន៍ថា លិខិតនោះបានគំរាមកំហែង ២ តង់គឺទី ១ «បើសិនមិនធ្វើឲ្យទេប្តឹងតែម្តង ហើយទី(២)ដើម្បីចៀសវាងការប្តឹងផ្តល់ទៅតុលាការរវាងគ្រួសារខ្ញុំជា មួយប្រជាពលរដ្ឋទាំង ៩ គ្រួសារនោះ ខ្ញុំបាទសុំលោកប្រធានមេត្តាជួយសំរួលដោះស្រាយករណីខាងលើនេះ»។
ដោយប្រៀបធៀបទៅនឹងរឿងតុលាការមុខដែក ដែលជាខ្សែភាពយន្តភាគចិនដ៏ពេញនិយម នោះ សម្តេចតេជោនាយករដ្ឋមន្ត្រីមានប្រសាសន៍ថា នៅក្នុងសម័យកាលនោះករណីរបស់ ឌឿន សុវណ្ណ ត្រូវចាត់ទុកថាបានក្លែងបន្លំព្រះរាជសារ ដែលរាស្ត្រនឹងត្រូវកាត់ទោសដោយកាំបិតក្បាលឆ្កែ មន្ត្រី ត្រូវកាត់ទោសដោយកាំបិតក្បាលខ្លា ហើយរាជវង្សត្រូវកាត់ទោសដោយកាំបិតក្បាលនាគ។ យោងតាមសម្តេចតេជោបានបញ្ជាក់ថា ករណី ឌឿន សុវណ្ណ ត្រូវដកតំណែងរួចហើយត្រូវកាត់ទោសដោយកាំបិតក្បាលខ្លា។
សម្តេចនាយករដ្ឋមន្ត្រីថ្លែងថា លោកបានចារចំណារក្រហមទៅលើលិខិតរបស់ ឌឿន សុវណ្ណ ដែលមានចរិតជាការចាប់បង្ខំទៅអាជ្ញាធរមានសមត្ថកិច្ចប្រើប្រាស់វីរៈយុវនិស្សិតស្ម័គ្រចិត្ត ទៅវាស់វែងដីរបស់ខ្លួន ដែលនៅលើផែនទីបង្ហាញថា ស្ថិតនៅក្នុងតំបន់សក្នុងស្រុកវាលវែង ខេត្តពោធិ៍សាត់ ដែលជាប់ជាមួយព្រំដែនកម្ពុជា ថៃ ហើយសង្ស័យជាតំបន់ដែលមានគ្រាប់មីនទៀតផង។ សម្តេចតេជោថ្លែងថា ខ្ញុំបានផ្តាំផ្ញើដាច់ខាតថា មិនឲ្យចូលទៅក្នុងតំបន់ដែលសង្ស័យថាមានគ្រាប់មីននោះទេ។
ចំពោះនីតិវិធីសម្រាប់ការវាស់វែងត្រូវបានប្រកាសតំបន់វិនិច្ឆ័យ ចាប់ផ្តើមបំពេញសាលាកប័ត្រដំណើរការនីតិវិធីរហូតដល់ការប្រកាសផ្សាយ។ សម្តេចនាយករដ្ឋមន្ត្រីមានប្រសាសន៍ថា ហេតុអ្វីបានជា ឧត្តមសេនីយ៍ឯកម្នាក់នេះបែរជាមានសិទ្ធិមកបញ្ជាឲ្យនិស្សិតទៅវាស់វែងដីរបស់ខ្លួនទៅវិញ។ សម្តេចតេជោ ហ៊ុន សែន មានប្រសាសន៍ថា សូម្បីតែលោកក៏អត់មានសិទ្ធិបញ្ជាទៅលើនិស្សិតក្នុងករណីដែលលោក រានដីនៅកន្លែងណាមួយក្នុងតំបន់ប្រកាសជាតំបន់វិនិច្ឆ័យដែរ។ ខ្ញុំអត់មានសិទ្ធិនឹងបញ្ជានិស្សិតទៅវាស់វែងដីឲ្យខ្ញុំទេ ត្រូវធ្វើតាមសម្រួលដូចគេ ដូចឯង ហើយកាន់តែគ្មានសិទ្ធិទៅទៀត បើតំបន់នោះមិនមែន ជាតំបន់ដែលប្រកាសជាតំបន់វិនិច្ឆ័យនោះ ។
ពាក់ព័ន្ធជាមួយការចោទប្រកាន់របស់ក្រុមប្រឆាំងដែលថា នាយករដ្ឋមន្ត្រីជាអ្នកជំទាស់ការ តម្លើងប្រាក់ខែនោះ សម្តេចតេជោនាយករដ្ឋមន្ត្រីមានប្រសាសន៍ថា ខ្ញុំមិនបានជំទាស់នឹងការតម្លើង ប្រាក់ខែទេ ប៉ុន្តែខ្ញុំជំទាស់ការតម្លើងប្រាក់ខែដូចពួកលោក ដែលឡើងប្រៀបបាននឹងឧទ្ធម្ភាគចក្រ។ សម្តេចតេជោ ហ៊ុន សែន មានប្រសាសន៍ថា រាជរដ្ឋាភិបាលមានរបៀបឡើងរបស់ខ្លួន ហើយចាប់តាំងពី ២០០៨ បានតម្លើង ២០% ជារៀងរាល់ឆ្នាំ ជាពិសេស គណបក្សប្រជាជនកម្ពុជាបាន និងកំពុងតែ រៀបចំគោលនយោបាយសំរាប់បៀវត្ស ២០១៣-២០១៨ ទៀតផង។
សម្តេចតេជោក៏បានមានប្រសាសន៍ដែរថា ទឹកដីស្ទឹងត្រង់ដែលជាស្រុកកំណើតរបស់លោក នោះមាននាយករដ្ឋមន្ត្រីចំនួន ៣ រូបមកហើយ ដែលទី ១ គឺលោក ហង្ស ធុនហាក់ ទី២ លោក អ៊ិន តាំ និងទី៣ គឺសម្តេចតេជោ ហ៊ុន សែននេះឯង។ សម្តេចនាយករដ្ឋមន្ត្រីមានប្រសាសន៍ថា អតីត នាយករដ្ឋមន្ត្រីទាំង ២ នាក់នោះម្នាក់ត្រូវបានពួក ប៉ុល ពត សម្លាប់ និងម្នាក់ទៀតបានស្លាប់នៅសហ រដ្ឋអាមេរិក ប៉ុន្តែគឺ ២ នាក់នោះហើយជាអ្នកបញ្ឆេះសង្គ្រាមនៅកម្ពុជា ហើយគាំទ្ររដ្ឋប្រហារទំលាក់ សម្តេចព្រះនរោត្តម សីហនុ ឯចំណែករូបលោកជាអ្នកដង្ហែតាមការអំពាវនាវរបស់សម្តេចព្រះ នរោត្តម សីហនុ ដើម្បីតស៊ូប្រឆាំងការឈ្លានពានរបស់ប្រទេស ដែលជាការផ្ទុយគ្នាស្រឡះ។
នៅក្នុងពិធីប្រគល់ប័ណ្ណកម្មសិទ្ធដីធ្លីជូនដល់ប្រជាពលរដ្ឋចំនួន ១០៥៧ គ្រួសារស្មើនឹង ១២៩៧ ប័ណ្ណក្បាលដីមានផ្ទៃដីទំហំជាង ១៩៧ ហិកតា រស់នៅឃុំព្រែកកក់ ស្រុកស្ទឹងត្រង់ ខេត្តកំពង់ចាម សម្តេចតេជោបានសុំទោសពីប្រជាពលរដ្ឋទាំងអស់នៅទីនោះអំពីភាពខ្វះចន្លោះ ដែលបានបង្កើតឡើង នូវការភ័យព្រួយរបស់ប្រជាពលរដ្ឋអស់រយៈពេលប៉ុន្មានឆ្នាំកន្លងទៅនេះ។ សម្តេចនាយករដ្ឋមន្ត្រីថ្លែងថា លោកមិននឹកស្មានថា រឿងនេះបានកើតឡើងរហូតអាចថា ផ្នូរខ្មោចរបស់ដូនតាឬក៏សាច់ញាតិ របស់លោកមួយចំនួនត្រូវបានដាក់ដេញថ្លៃនោះ ហើយខ្ញុំមិននឹកថាដល់ថ្នាក់ប៉ុណ្ណឹងទេ។
សម្តេចតេជោ ហ៊ុន សែន មានប្រសាសន៍ថា បញ្ហានៅត្រង់ថា ខ្ញុំជឿទុកចិត្តសេនាធិការរបស់ខ្ញុំខ្លាំងជ្រុល ដែលនោះនៅត្រង់ថា នេះគឺជាលើកទី ៧ ហើយដែលសម្តេចតេជោនាយករដ្ឋមន្ត្រីអញ្ជើញចុះសំណាលសាកសួរ សុខទុក្ខ និងចែកប័ណ្ណកម្មសិទ្ធដីធ្លីចែកជូនប្រជាពលរដ្ឋនៅតាមទីប្រជុំជនរាជធានីខេត្តមួយចំនួនក្នុង ប្រទេសកម្ពុជា ដែលក្នុងនោះលើកទី ១ សម្តេចតេជោនាយករដ្ឋមន្ត្រីនិងលោកជំទាវកិត្តិព្រឹទ្ធបណ្ឌិត អញ្ជើញចែកជូនប័ណ្ណកម្មសិទ្ធដីធ្លីជូនប្រជាពលរដ្ឋចំនួន ៥៦០ គ្រួសារស្មើនឹង ៨៩០ ប័ណ្ណរស់នៅឃុំ ស្រែចារ និងឃុំ ២ ធ្នូស្រុកស្នូលខេត្តក្រចេះកាលពីថ្ងៃទី ២១ កញ្ញា លើកទី ២ ចែកជូនប្រជាពលរដ្ឋចំនួន ៥៩៤ គ្រួសារស្មើនឹងប័ណ្ណកម្មសិទ្ធិ ៩៧២ ប័ណ្ណរស់នៅឃុំឆ្នាល់មាន់ ស្រុកគាស់ក្រឡ ខេត្តបាត់ដំបងថ្ងៃទី ៣០ កញ្ញាឆ្នាំ ២០១២ លើកទី ៣ ចែកប័ណ្ណកម្មសិទ្ធិជូនប្រជាពលរដ្ឋចំនួន ៦៨៥ គ្រូសារស្មើនឹងប័ណ្ណកម្មសិទ្ធិចំនួន ១០៨៦ ប័ណ្ណរស់នៅឃុំព្រងិល និងឃុំលាចស្រុកភ្នំក្រវាញខេត្ត ពោធិ៍សាត់ ថ្ងៃទី ១ តុលា លើកទី ៤ ចែកជូនប្រជាពលរដ្ឋចំនួន ៥១០ ក្បាលដីមានផ្ទៃដីទំហំជាង ៤៣៦ ហិកតា និងមានប្រជាពលរដ្ឋរស់នៅ ២៩៨ គ្រូសាររស់នៅឃុំត្រស់ និងឃុំគគីរ ស្រុករមាសហែក ខេត្តស្វាយរៀង ថ្ងៃទី ៥ តុលា លើកទី ៥ ចែកប័ណ្ណកម្មសិទ្ធិជូនប្រជាពលរដ្ឋចំនួន ៧៤៤ គ្រូសារប័ណ្ណក្បាលដី ១១០៨ ក្បាលដីស្មើនឹង ២៨៨៦ ហិកតារស់នៅឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ និងស្រុកបន្ទាយអំពិល ខេត្តឧត្តរមានជ័យថ្ងៃទី ៧ តុលាឆ្នាំ ២០១២ និងលើកទី ៦ ចែកជូនប្រជាពលរដ្ឋចំនួន ៥៣២ គ្រួសារ ដែលមានប័ណ្ណក្បាលដីចំនួន ១ ០៥៣ ក្បាលដីមានផ្ទៃដី ទំហំ ១ ៣៨០ ហិកតា កាលពីថ្ងៃទី ៧ ខែតុលា ឆ្នាំ ២០១២។
លោក ហ៊ុន ណេង អភិបាលខេត្តកំពង់ចាមឲ្យដឹងថា ក្នុងការអនុវត្តគោលនយោបាយចាស់ សកម្មភាពថ្មីលើកំណែទំរង់ដីធ្លី ជាពិសេសបទបញ្ជាលេខ ០១ របស់រាជរដ្ឋាភិបាល និងអនុសាសន៍ ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន រដ្ឋបាលខេត្តបានរៀបចំបង្កើតគណៈ កម្មការចុះវាស់វែងដី ដើម្បីផ្តល់កម្មសិទ្ធិជូនប្រជាពលរដ្ឋទៅតាមគោលដៅដែលបានកំណត់។ ជាក់ ស្តែងតំបន់ដែលត្រូវប្រតិបត្តិការមាន៨ស្រុកស្មើនឹងផ្ទៃដីទំហំ ១៣៨៨១៣ ហិកតាពាក់ព័ន្ធនឹងប្រជា ពលរដ្ឋចំនួន ២៥៦៧៤ គ្រួសារ។ លោកអភិបាលខេត្តមានប្រសាសន៍បន្តថា បច្ចុប្បន្នយើងកំពុងដំណើរ ការលើគោលដៅ ៥ ស្រុកគឺស្រុកអូរាំងឪស្ទឹងត្រង់តំបែរត្បូងឃ្មុំនិងស្រុកមេមត់ ដែលមានក្រុមការងារ វាស់វែងសរុប ១៨ ក្រុមស្មើនឹង ២២៨ នាក់ក្នុងនោះក្រុមយុវជនស្ម័គ្រចិត្តសម្តេចតេជោមាន ៩ ក្រុមស្មើនឹង ១០៨ នាក់មន្ត្រីបច្ចេកទេស៩ក្រុមស្មើនឹង ៩០ នាក់គ្រូពេទ្យ ១៦ នាក់ និងអ្នកបើកបរ រថយន្ត ១៤ នាក់។ ឯកឧត្តមគណៈអភិបាលខេត្តបន្តថាលទ្ធផលអនុវត្តគិតត្រឹមថ្ងៃទី ៩ តុលាការវាស់ វែងនឹងបំពេញទំរង់បែបបទប្រមូលទិន្នន័យសំរេចបានចំនួន ១៥០៤០ ក្បាលដីស្មើនឹង ១២៧០៥ គ្រួសារដែលមានផ្ទៃដីទំហំជាង ២៤៨០១ ហិកតាប្រៀបធៀបនិងផែនការរួមទាំង ៨ ស្រុកគឺសំរេចបាន ១៧,៨៦%។ ដោយឡែកនៅស្រុកស្ទឹងត្រង់ផ្ទៃដីផែនការរួមដែលមានការពាក់ព័ន្ធទំហំ៣៧៨៥២ហិកតាស្មើនឹង ៦ ពាន់គ្រួសារកំពុងអនុវត្តនៅឃុំអូរម្លូរ ឃុំអារក្សត្នោត ឃុំទួលសំបួរ និងឃុំព្រែកកក់ ក្នុងនោះ លទ្ធផលវាស់វែងនិងបំពេញបែបបទប្រមូលទិន្នន័យសំរេចបានចំនួន ៤ ៤២៨ ក្បាលដីមាន ៣៥៧៧ គ្រួសារលើផ្ទៃដីទំហំជាង ៨៥១២ ហិកតាស្មើនឹង ២២,៤៩% ប្រៀបធៀបទៅនិងផែនការរួមទូទាំងស្រុក៕
ស្នាយពល