Sunday, October 21, 2012
នាយករដ្ឋមន្រ្តីសឹង្ហបូរី និងលោកជំទាវ អញ្ជើញជួបសំដែងការគួរសមសម្តេចតេជោនាយករដ្ឋមន្រ្តី
ក្នុងជំនួបសំដែងការគួរសម សម្តេចអគ្គមហាសេនាបតីតេជោ ហ៊ុន សែនដែលធ្វើឡើងនៅវិមានសន្តិភាព ព្រឹកថ្ងៃទី២១តុលា ឯកឧត្តម លី ស៊ានឡុង នាយករដ្ឋមន្រ្តីសឹង្ហបូរីដែលអបដំណើរដោយផ្ទាល់ពីលោកជំទាវ ហូ ជីង ជាភរិយា មានប្រសាសន៍ថាថ្នាក់ដឹកនាំក៏ដូចជាប្រជាពលរដ្ឋសឹង្ហបូរីទាំងអស់ សូមចូលរួមរំលែកទុក្ខយ៉ាង ក្រៀមក្រំបំផុតជាមួយសម្តេចតេជោនាយករដ្ឋមន្រ្តី ក៏ដូចជារាជរដ្ឋាភិបាល ព្រះរាជវង្សានុវង្ស និងប្រជាពលរដ្ឋកម្ពុជាទាំងអស់ ដែលបានបាត់បង់នូវរូបព្រះកាយ នៃព្រះករុណាព្រះបាទសម្តេចព្រះ នរោត្តម សីហនុព្រះមហា វីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ជាទីសក្ការៈដ៏ខ្ពង់ខ្ពស់ដែលព្រះអង្គយាង សោយព្រះទីវង្គត លាចាកលោកយើងនេះ ទៅកាន់លោកខាងមុខ។
ឯកឧត្តមនាយករដ្ឋមន្រ្តីសឹង្ហបូរី មានប្រសា សន៍បន្តថាការយាងចូលព្រះទីវង្គតនៃព្រះករុណាព្រះមហាវិរក្សត្រកម្ពុជា គឺជាការបាត់បង់នូវព្រះមហាវិរក្សត្រដែលជាទីគោរពស្រឡាញ់បំផុត របស់ថ្នាក់ដឹកនាំ និងប្រជាពលរដ្ឋកម្ពុជាដែលជាព្រះមហាវិរក្សត្រមួយព្រះអង្គ មានស្នាមព្រះហត្ថជាច្រើនសំរាប់កម្ពុជា ក៏ដូចជាតំបន់ពិសេសអ្វីដែលប្រជាពលរដ្ឋសឹង្ហបូរីចងចាំមិនអាចបំភ្លេច បាននោះ គឺកម្ពុជាជាប្រទេសទី១ដែលទទួលស្គាល់នូវឯករាជ្យភាពរបស់សឹង្ហបូរី ក្នុងឆ្នាំ១៩៦៥។
សម្តេចតេជោនាយករដ្ឋមន្រ្តី ក្នុងនាមរាជរដ្ឋាភិបាល ព្រះរាជវង្សានុវង្ស និងប្រជាពលរដ្ឋមកម្ពុជាសូមថ្លែង នូវអំណរគុណយ៉ាងជ្រាលជ្រៅបំផុត ជូនចំពោះថ្នាក់ដឹកនាំ ក៏ដូចជារដ្ឋាភិបាលនិងប្រជាពលរដ្ឋសឹង្ហបូរី ដែលបាន ផ្ញើនូវសាលិខិតចូលរួមរំលែកទុក្ខ និងថ្ងៃនេះទៀតសោតឯកឧត្តមនាយករដ្ឋមន្រ្តីនិងភរិយា បានអញ្ជើញមកគោរព ព្រះវិញ្ញាណក្ខន្ធ ព្រះបរមសពព្រះករុណាព្រះបាទសម្តេចព្រះមហាវិរក្សត្រ ជាទីសក្ការៈដ៏ខ្ពង់ខ្ពស់បំផុត នៅព្រះរា ជាណាចក្រកម្ពុជា។
សូមបញ្ជាក់ដែរថា ឯកឧត្តមនាយករដ្ឋមន្រ្តីសឹង្ហបូរី គឺជាឥស្សរជនជាន់ខ្ពស់រដ្ឋាភិបាលនៃប្រទេសក្នុងតំបន់ អាស៊ានទី៤ហើយ ដែលបានអញ្ជើញមកគោរពព្រះវិញ្ញាណក្ខន្ធព្រះបរមសព ព្រះករុណាព្រះមហាវិរក្សត្រ ជាទី សក្ការៈដ៏ខ្ពង់ខ្ពស់បំផុត នៅព្រះរាជាណាចក្រកម្ពុជាបន្ទាប់ពីនាយករដ្ឋមន្រ្តី នៃប្រទេសឡាវ ថៃ និងប្រទេសវៀត ណាម។
គណៈប្រធានរដ្ឋសភាប្រជាជនជាន់ខ្ពស់ កូរ៉េខាងជើង ចូលគោរពព្រះវិញ្ញាណ ក្ខន្ធ ព្រះករុណាព្រះបាទសម្តេចព្រះនរោត្តមសីហនុ
ឯកឧត្តម យ៉ាង ហៀងស៊ើប អនុប្រធាន គណៈប្រធានរដ្ឋសភាប្រជាជនជាន់ខ្ពស់ នៃសាធារណរដ្ឋប្រជាមានិត ប្រជាធិបតេយ្យកូរ៉េ(កូរ៉េខាងជើង) បានដឹកនាំគណៈប្រតិភូមួយក្រុម ចូលគោរពព្រះវិញ្ញាណក្ខន្ធសម្តេចព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ នៅព្រះបរមរាជវាំង នៅរសៀលថ្ងៃទី២១ខែតុលា ឆ្នាំ២០១២នេះ។យោងតាមសាររំលែកទុក្ខរបស់ ឯកឧត្តមគីម ជុងណាម រដ្ឋមន្រ្តីការរទេស នៃសាធារណរដ្ឋប្រជាមានិត ប្រជាធិបតេយ្យកូរ៉េ បានអោយដឹងថា តាងនាមអោយរដ្ឋាភិបាល និងប្រជាជន នៃសាធារណរដ្ឋប្រជាមានិត ប្រជាធិបតេយ្យកូរ៉េ សូមចូលរួមរំលែកមរណទុក្ខយ៉ាងជ្រៀលជ្រៅចំពោះការបាត់បង់ អ្នកដឹកនាំដ៏ឆ្នើម។
សាររំលែកទុក្ខ បានអោយដឹងថា ការយាងចូលព្រះទីវង្គត់របស់សម្តេចព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរនេះ ជាការបាត់បង់ដ៏ធំធេងសម្រាប់ប្រជាជនកម្ពុជា។
ទោះជាយ៉ាងណា កូរ៉េជឿជាក់ថា ប្រជាជនកម្ពុជានឹងឆ្លងផុតពីទុក្ខសោកដ៏មហាធំធេងនេះ និងបន្តការអភិវឌ្ឍន៍ ដោយផ្នែកលើស្នាព្រះហស្ថ ដែលព្រះអង្គសម្រេចបាន។
ជាទីបញ្ចប់សាររំលែកទុក្ខរបស់សាធារណរដ្ឋប្រជាមានិត ប្រជាធិបតេយ្យកូរ៉េ សូមអោយព្រះវិញ្ញាណក្ខន្ធ សម្តេចព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ យ៉ាងទៅកាន់សុគតិភព៕
សម្តេចតេជោ ហ៊ុន សែន ទទួលជួបឯកឧត្តម លី សៀនឡុង នាយករដ្ឋមន្ត្រីសឹង្ហបូរី
ក្រោយពីបានអញ្ជើញទៅគោរពព្រះវិញ្ញាណក្ខ័ន្ធព្រះបរមសព ព្រះករុណាព្រះបាទ សម្តេចព្រះនរោត្តមសីហនុ នៅព្រះបរមរាជវាំងរួចមក ឯកឧត្តម លី សៀនលុង នាយករដ្ឋមន្ត្រី សឹង្ហបូរីក៏បានមកជួបសន្ទាជាមួយសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជានៅវិមានសន្តិភាពផងដែរ។នៅក្នុងជំនួបនាព្រឹកថ្ងៃអាទិត្យទី២១តុលានេះ ឯកឧត្តម លី សៀនលុង បានជំរាបជូនសម្តេចតេជោនាយករដ្ឋមន្ត្រីថា ក្នុងនាមថ្នាក់ដឹកនាំ និងប្រជាជនសឹង្ហបូរីទាំងអស់ សូមគោរព និងសំដែងនូវព្រះមរណទុក្ខយ៉ាងក្រៀមក្រំជាទីបំផុតចំពោះការយាងចូលព្រះទិវង្គត របស់ព្រះករុណាសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ និងសូមគោរព និងចូលរួមរំលែកនូវមរណទុក្ខជាមួយរាជរដ្ឋាភិបាលកម្ពុជា ព្រមទាំងរាជវង្សានុវង្ស និងប្រជាជនកម្ពុជាទូទាំងប្រទេសក្នុងឱកាសដ៏សែនក្រៀមក្រំនេះ។
ឯកឧត្តមបន្តថា ព្រះករុណាសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ មានស្នាព្រះហស្តជាច្រើន និងចងចាំមិនភ្លេចទេនូវអ្វី ដែលអតីតព្រះមហាក្សត្របានធ្វើ និងចងចាំមិនភ្លេច ដែលកម្ពុជាជាប្រទេសទី១ ទទួលស្គាល់ឯករាជ្យភាពរបស់សឹង្ហបូរី។
ជាការឆ្លើយតប សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងអំណរគុណយ៉ាងជ្រាលជ្រៅជូនចំពោះឯកឧត្តម លី សៀនលុងនិងប្រតិភូដែលជាថ្នាក់ដឹកនាំសឹង្ហបូរីដែលបានសំដែងនូវព្រះមរណៈទុក្ខជូនចំពោះព្រះបរមសពរបស់សម្តេចព្រះនរោត្តម សីហនុ ព្រះវររាជបិតាជាតិខ្មែរ និងដឹកនាំប្រតិភូ មកគោរពវិញ្ញានក្ខ័ន្ធព្រះករុណា ព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ។
ព្រះសង្ឃជាង៥ពាន់អង្គមកពីបណ្តាវត្តនានាក្នុងរាជធានីភ្នំពេញបាននិមន្តសូត្រមន្តបង្សុកូលឧទ្ទិសកុសលគោរពថ្វាយព្រះវិញ្ញាណ ក្ខន្ធព្រះមហាវីរៈក្សត្រ
ប្រជាពលរដ្ឋកាន់តែមានការកើនឡើងជាលំដាប់ដែលមកពីគ្រប់ទិសទី ជាពិសេសសិស្សានុសិស្ស តាជីយាយជី នៅតែបន្តមកអុជធូបអុជទៀនមានទាំងផ្កាឈូកគ្រប់ដៃដើម្បីបួងសួង គោរពព្រះវិញ្ញាណក្ខន្ធព្រះមហាវីរៈក្សត្រ សម្តេចឪ សម្ដេចតា សម្តេចតាទួត នៃយើង នៅខាងមុខព្រះបរមរាជវាំងជាហូរហែរាប់ពាន់នាក់ ហើយនៅល្ងាចថ្ងៃទី២០ ខែតុលា ឆ្នាំ២០១២នេះ ព្រះសង្ឃប្រមាណជិត៥ពាន់អង្គមកពីបណ្តាវត្តនានាក្នុងរាជធានី ភ្នំពេញបាននិមន្តសូត្រមន្តបង្សុកូលឧទ្ទិសកុសលជូនដួងវិញ្ញាណក្ខន្ធ សម្តេចព្រះមហាវីរៈក្សត្រ។
ក្នុង រយៈពេល៤ថ្ងៃ នៃការតម្កល់ព្រះរាជសពព្រះករុណាព្រះបាទសម្តេចព្រះនរោត្តម សីហនុព្រះមហាវីរៈក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរនៅមុខព្រះបរមរាជវាំង គេសង្កេតឃើញមានបងប្រជាពលរដ្ឋជាចៅ ចៅទួតចៅលួតដែលមកពីគ្រប់ទិសទីតាមបណ្តាខេត្តនិងក្រុងក្នុង ព្រះរាជាណាចក្រកម្ពុជា បានបន្តមកអុជធូបអុជទៀនបួងសួងចាប់ពីព្រលឹមដល់យប់ ឃើញថាមានការកើនឡើងជាហូរហែរាប់ពាន់រាប់ម៉ឺននាក់ ដែលម្នាក់ៗសំពះដៃកាន់ធូបគោរពព្រះឆាយាល័ក្ខណ៍ ដើម្បីបួសសួងសូមអោយព្រះវិញ្ញាណក្ខន្ធរបស់ព្រះករុណាព្រះវររាជ បិតាជាតិខ្មែរបានយាងទៅសោយសុខក្នុងព្រះសុគតិភពកុំបីខានឡើយ ហើយនិងសូមបួងសួងអោយព្រះវិញ្ញាណក្ខន្ធរបស់ព្រះអង្គតាមជួយ ប្រោះព្រំថែរក្សាគ្រប់គ្រងប្រជាជនខ្មែរអោយសម្បូរសប្បាយរុងរឿង រហូតទៅ។
ព្រះតេជគុណ អឿន សំអាត ជាសហការីផ្ទាល់សម្តេចព្រះអគ្គមហាសង្ឃរាជ និងជាប្រធានការិយាល័យពិធីការ និងទំនាក់ទំនងអន្តរជាតិនៃលេខាធិការរដ្ឋានសម្តេចព្រះសង្ឃនាយកបាន មានពុទ្ធដីកាកាលពីព្រឹកថ្ងៃទី២០ ខែតុលា ឆ្នាំ២០១២ នៅខាងមុខព្រះបរមរាជវាំងថា នៅល្ងាចថ្ងៃទី២០ ខែតុលា នេះព្រះសង្ឃនៅតាមទីអារាមនានាក្នុងរាជធានីភ្នំពេញជាង៥ពាន់អង្គនឹងនិមន្តមកខាងមុខព្រះបរមរាជវាំងដើម្បីសូត្រមន្ត បង្សុកូលឧទ្ទិសកុសលផលបុណ្យជូនដល់ព្រះវិញ្ញាណក្ខន្ធព្រះករុណា ព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជបូរណភាពទឹកដី និងឯកភាពជាតិខ្មែរសូមអោយព្រះវិញ្ញាណក្ខន្ធរបស់ព្រះអង្គយាងទៅ ចាប់បដិសន្ធិក្នុងព្រះបរមសុខ សុគតិភពគ្រប់ៗជាតិកុំបីឃ្លៀងឃ្លាតឡើយ៕
Subscribe to:
Posts (Atom)