នៅក្នុងពិធីបើកការដ្ឋានសាងសង់ផ្សារដ៏ធំទំនើបក្នុងរាជធានីភ្នំពេញ
នាព្រឹកថ្ងៃទី១០ ខែធ្នូ ឆ្នាំ២០១២ សម្ដេចអគ្គមហាសេនាបតីតេជោ ហ៊ុន សែន បានថ្លែងដោយវាយតម្លៃថា
ការសម្រេចបណ្តាក់ទុនរបស់ក្រុមហ៊ុនអ៊ីអនម៉លបានបង្ហាញនូវ ទំនុកចិត្តពីស្ថិរភាពខាងនយោបាយ
និងម៉ាក្រូសេដ្ឋកិច្ចរបស់កម្ពុជា ព្រោះជាប្រទេសដែលមានភាពចាស់ទុំខាងនយោបាយ
និងលទ្ធិប្រជាធិបតេយ្យ ព្រមទាំងកម្លាំងទិញពិតប្រាកដរបស់ប្រជាជនកម្ពុជាផងដែរ។
សម្តេចតេជោនាយករដ្ឋមន្ត្រីមានប្រសាសន៍ថា
វត្តមានរបស់ក្រុមហ៊ុនជប៉ុនជាបណ្តើរៗ នៅព្រះរាជាណាចក្រកម្ពុជា មិនមែនជាការចៃដន្យទេ
ប៉ុន្តែគឺជាការមើលឃើញយ៉ាងច្បាស់អំពីការរីកចម្រើនរបស់កម្ពុជា ហើយក៏ជាការមើលឃើញអំពីទិដ្ឋភាពទាំងឡាយទាក់ទងនឹងការវិនិយោគផងដែរ។
“ខ្ញុំសូមអរគុណចំពោះលោកប្រធានក្រុមហ៊ុនអ៊ីអនម៉ល ដែលបានសម្រេចចិត្តបើកការដ្ឋានសាងសង់នៅពេលនេះ
ដោយមិនរង់ចាំការបោះឆ្នោតនៅកម្ពុជាហើយស្រេច ដែលនៅសល់រយៈពេលតែ
៨ខែទៀតនោះ”។ សម្តេចតេជោបញ្ជាក់ថា ថ្ងៃនេះការបើកការដ្ឋាននេះពិតជាបង្ហាញឲ្យឃើញអំពីការមើលឃើញ
និងអំពីភាពចាំបាច់របស់ជប៉ុននៅក្នុងការចូលរួមអភិវឌ្ឍប្រទេសកម្ពុជាផងដែរ។
ទាក់ទងនឹងការវិនិយោគនៅក្នុងព្រះរាជាណាចក្រកម្ពុជា សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា
សម្រាប់កម្ពុជាភាពមិនសាំញាំនោះនៅត្រង់ថា ច្បាប់កម្ពុជាអនុញ្ញាតឲ្យក្រុមហ៊ុនបរទេសបណ្តាក់ទុន១០០%
ដោយ មិនចាំបាច់មានភាគហ៊ុនក្នុងស្រុក ដែលនេះជាចំណុចពិសេស ប្រៀបធៀបនឹងប្រទេសដទៃមួយចំនួន
ដែលតម្រូវឲ្យមានភាគហ៊ុនក្នុងស្រុក ចូលរួមនោះ។
ផ្សារទំនើបអ៊ីអនម៉លដែលត្រូវសាងសង់ក្នុងតម្លៃជាង
២០០លានដុល្លារអាមេរិក ស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញនេះ
គ្រោងនឹងបញ្ចប់ការសាងសង់នៅដើមឆ្នាំ២០១៤ ខាងមុខនេះ។ ក្រុមហ៊ុនអ៊ីអនម៉ល
ជាក្រុមហ៊ុនមកពីប្រទេសជប៉ុនធំទី៣ ដែលបានបណ្តាក់ទុននៅកម្ពុជា
បន្ទាប់ពីក្រុមហ៊ុនផលិតម៉ូទ័រ នៅតំបន់សេដ្ឋកិច្ចពិសេសរាជធានីភ្នំពេញដែលបានសម្ពោធកាលពីឆ្នាំទៅមិញ
និងក្រុមហ៊ុនផ្គុំរថយន្តនៅក្នុងតំបន់សេដ្ឋកិច្ចពិសេសខេត្តកោះកុង ដែលនឹងត្រូវសម្ពោធនៅថ្ងៃទី១៧
ខែធ្នូ ឆ្នាំ២០១២ ពេលខាងមុខនេះ។
នៅក្នុងពិធីបើកការដ្ឋានសាងសង់ផ្សារដ៏ធំទំនើបរបស់ក្រុមហ៊ុនអ៊ីអនម៉ល
ដែលត្រូវនឹងថ្ងៃប្រារព្ធទិវាសិទ្ធិមនុស្សអន្តរជាតិ សម្ដេចតេជោសែន បានថ្លែងពន្យល់ថា
សិទ្ធិមនុស្សសំខាន់ជាងគេ គឺសិទ្ធិរស់រានមានជីវិត ដែលនៅកម្ពុជាកើតចេញមកពីថ្ងៃ៧មករា។
នោះគឺគណបក្សប្រជាជនកម្ពុជា ក្រោមការជួយឧបត្ថម្ភពីកងទ័ពស្ម័គ្រចិត្តវៀតណាម
បានវាយរំដោះប្រជាពលរដ្ឋកម្ពុជា ចេញពីរបបវាលពិឃាតខ្មែរក្រហម នៅថ្ងៃទី៧
ខែមករា ឆ្នាំ១៩៧៩។
សម្តេចតេជោនាយករដ្ឋមន្ត្រីបានមានប្រសាសន៍ថា "ថ្ងៃនេះ ក៏ជាថ្ងៃ១០ ខែធ្នូ
គឺជាថ្ងៃសិទ្ធិមនុស្ស ទិវាសិទ្ធិមនុស្សលើកទី៦៤។ ឥឡូវ
សិទ្ធិចាប់ផ្តើមពីអី? សិទ្ធិចាប់ផ្តើមពីការរស់រានមានជីវិតឡើងវិញ។
បើងាប់ទៅហើយ តើទារសិទ្ធិនឹងមកពីណា?។
អានឹងនិយាយវាឲ្យច្បាស់ កន្លែងនឹង។ បើគ្មានថ្ងៃ ៧មករាទេ គ្មាននរណាគេដង្ហែសិទ្ធិបានទេ
ហើយខ្ញុំក៏មិនដឹងថា ពួកសិទ្ធិមនុស្សនៅឯណាដែរ កាលពីពេលហ្នឹង។ ហេតុអីបានជាមិនមកជួយផង?
ពេលនឹងគឺថាមួយថ្ងៃៗ មិនដឹងថា សម្លាប់អស់ប៉ុន្មាន? ឥឡូវបានជាមានតុលាការកាត់ទោសមេដឹកនាំខ្មែរក្រហម មកពីអី? មកពីសម្លាប់មនុស្សជាន់នោះ បានជាគេកាត់ទោស?។ អីចឹងទេ បើសិនជា ពួកប៉ុលពត អត់មានសម្លាប់មនុស្សទេ
ចាំបាច់មានតុលាការខ្មែរក្រហមធើអី? រឿងវានៅកន្លែងនឹង។
អីចឹងខ្មែរក្រហមសម្លាប់មនុស្ស។ បើខ្មែរក្រហមសម្លាប់មនុស្ស
តើត្រូវធើម៉េច? វាទាល់តែយើងរំដោះមនុស្ស
កុំឲ្យខ្មែរក្រហមសម្លាប់តទៅទៀត។ អានឹងបានចាប់ផ្តើមមានសិទ្ធិ"។
សម្តេចតេជោបានមានប្រសាសន៍បន្ថែមថា "មិនមែនសិទ្ធិ កើតឡើងលេងៗទេ។ ប៉ុន្តែសិទ្ធិមនុស្សមិនមែនត្រឹមតែថា ឲ្យរស់ហើយ ឲ្យគេសង្កត់សង្កិនទេ។ សិទ្ធិចាប់ផ្តើមពីការរស់រានមានជីវិត ហើយវាគ្របដណ្តប់លើសិទ្ធិដទៃទៀត។ សិទ្ធិមានចំណីអាហារ ទទួលបានចំណីអាហារ សិទ្ធិទទួលបានការអប់រំ សិទ្ធិទទួលបានការព្យាបាល សិទ្ធិទទួលបានអ្វីៗគ្រប់បែបយ៉ាង រាប់ទាំងសិទ្ធិបញ្ចេញមតិ សិទ្ធិបង្កើតបក្សនយោបាយ សិទ្ធិបង្កើតអង្គការក្រៅរដ្ឋាភិបាល សិទ្ធិបង្កើតសារព័ត៌មាន។ ប៉ុន្តែដំបូងបំផុតឲ្យរស់សិន។ បើមិនរស់ទេ ទៅឋានប្រេតនឹង គឺចាំតែគេបោះឲ្យនឹង។ មួយឆ្នាំ គេបោះឲ្យតែ ១៥ថ្ងៃ ពេលដាក់បិណ្ឌ ពីបិណ្ឌ១ ហើយទៅទារសិទ្ធិមកពីណាទៀត? ហើយកុំទៅជឿថា ទៅកេណ្ឌទ័ពខ្មោច ដូចអ្នកតាឃ្លាំងមឿង វាទៅមិនរួចទេ។ វាគ្រាន់តែជារឿងព្រេង"។
សម្តេចតេជោ ហ៊ុន សែន បានបន្ថែមថា "អីចឹង
រាល់ថ្ងៃចាប់ផ្តើមពីសិទ្ធិរស់រានមានជីវិត ថ្ងៃ៧មករាហើយ បានជាយើងមានសិទ្ធិដល់រាល់ថ្ងៃនេះ
ហើយមានការអភិវឌ្ឍន៍ស្អីៗ ហើយក្រុងភ្នំពេញ (កាលពីសម័យមុន) គួរឲ្យខ្លាច ខ្លាចជាងនៅក្នុងព្រៃ...។
យើង ក្រៅពីរំដោះរួចហើយ (ផ្តួលរំលំរបបខ្មែរក្រហម)
គេដាក់ទណ្ឌកម្មថែមមួយបន្តិចទៀត។ ប៉ុន្តែឥឡូវនឹងគឺថា បានហើយសេរីភាព
វាអស់ទាស់ណាស់ទៅហើយ។ ប៉ុន្តែយើងមិនមែនបានសេចក្តីថា
យើងមិនទទួលស្គាល់នូវការខ្វះខាតនានា ដែលចាំបាច់ត្រូវតែធ្វើទេ
ត្រូវបំពេញបន្ថែម ដែលយើងត្រូវធ្វើនោះទេ"។
ទាក់ទងនឹងទិវាសិទ្ធិមនុស្សអន្តរជាតិ១០ធ្នូ នេះដែរ ក្នុងនាមប្រធានអាស៊ាន សម្តេចតេជោក៏បានបង្ហាញពីបំណងចង់ឲ្យសាធារណរដ្ឋប្រជាធិបតេយ្យកូរ៉េ បញ្ឈប់ការសាកល្បងបាញ់គ្រាប់មីស៊ីល ដែលបង្កឲ្យមានការភ័យព្រួយពីប្រទេសជិតខាង ប្រទេសក្នុងតំបន់ និងបានអំពាវនាវឲ្យវិលទៅរកការចរចា៦ភាគីឡើងវិញ។
ក្នុងគោលបំណងឲ្យដំណើរការរៀបចំពិធីឆ្លងឆ្នាំសកល ប្រព្រឹត្តទៅដោយសប្បាយរីករាយ
សម្ដេចតេជោសែន ក៏បានថ្លែងស្នើឲ្យរបបរបស់លោកអាសាតដែល កាន់អំណាចនៅប្រទេសស៊ីរីសូមកុំប្រើប្រាស់អាវុធគីមីក្នុងបង្ក្រាបទៅលើក្រុមបះបោរ៕
