Tuesday, January 29, 2013

សម្តេច​តេជោ​ប្រកាស​ការពារ​បរិស្ថាន​និង​រិះគន់​គណបក្ស​ប្រឆាំងក្នុង​ពិធី​ចែក​ប័ណ្ឌកម្ម​សិទ្ធិ​ដីធ្លីជូន​ប្រជា​ពលរដ្ឋ​នៅ​ខេត្តកោះកុង



 នៅ​ក្នុង​ពិធី​ចែក​ប័ណ្ណ​កម្ម​សិទ្ធី​ដីធ្លី​ជូន​ប្រជា​ពលរដ្ឋ​ចំនួន ៥១៣​គ្រួសារ ​ស្មើ​នឹង ២៨៧៩​ក្បាល​ដី​នៅ​ឃុំ​ឬ​ស្សី​ជ្រុំ ស្រុក​ថ្មបាំង ខេត្ត​កោះកុង នាព្រឹក​ថ្ងៃ​ទី២៨ ខែ​មករា ឆ្នាំ​២០១៣ សម្តេច​អគ្គ​មហា​សេនាបតី​តេ​ជោ ហ៊ុន សែន នាយក​រដ្ឋ​មន្ត្រី​នៃព្រះ​រាជាណា​ចក្រ​កម្ពុជា បាន​ចាត់​ទុក​ការ​ដើរ​ឃោសនា​រិះ​គន់​របស់​គណ​បក្ស​ប្រឆាំង​ថា ការ​វាស់វែង​ដីធ្លី​ផ្តល់​កម្មសិទ្ធិ​ជូន​ប្រជាជន ដោយ​រាជ​រដ្ឋាភិបាល គឺ​ដើម្បី​យកពន្ធ​នោះ ជា​អំពើ​ថោកទាប ព្រោះក្រុម​អ្នក​ឃោសនា​ឲ្យ​គណបក្ស​ប្រឆាំង ក៏បាន​មក​ទទួល​ប័ណ្ណ​កម្ម​សិទ្ធិដីធ្លី នៅ​ក្នុង​នយោបាយ​ចាស់ សកម្ម​ភាព​ថ្មី​របស់​សម្តេច​ផង​ដែរ។

សម្តេច​តេ​ជោ​នាយក​រដ្ឋមន្ត្រី ដែល​រួម​ដំណើរ​ដោយ​លោកជំទាវ​កិត្តិ​ព្រឹទ្ធ​បណ្ឌិត ប៊ុន រ៉ានី បាន​ មាន​ប្រសាសន៍​ថា គេ​ជា​មនុស្ស​ថោក ព្រោះ​បន្ទាប់ពី​បាន​ដើរ​ឃោសនា​ថា រាជ​រដ្ឋាភិ​បាល​វាស់​វែង​​ផ្តល់​កម្មសិទ្ធិ​ដើម្បី​យកពន្ធ ពួកគេ​បាន​មក​ទទួលយក​ប័ណ្ណ​កម្ម​សិទ្ធិ​ដី​នេះ​ដែរ។  “ពួកគេ​ភូត​ថ្លុក ភូត​ត្រពាំង​មែន”។ សម្តេច​តេជោនាយក​រដ្ឋមន្ត្រី​ថ្លែង​ថា គណបក្ស​ប្រ​ជាជន​កម្ពុជា​នៅ​ជា​មួយ​ប្រជាជន​កម្ពុជា ៣៤ឆ្នាំ​ មក​ហើយ យើង​មិនដែល​យកពន្ធ​ដី​ពី​កសិករ​នោះ​ទេ។ “ដូច​ដែល​ខ្ញុំ​ធ្លាប់​បាន​បញ្ជាក់​ហើយ​ថា ដរាប​ណា​នៅ​មាន​គណបក្ស​ប្រជា​ជន​កម្ពុជា មាន​ហ៊ុន សែន នោះ​ការ​មិន​យកពន្ធ​ដី​នៅតែ​បន្ត”។

សម្តេច​តេជោ​សែន បាន​មាន​ប្រសាសន៍​បញ្ជាក់​ថា ហ៊ុន សែន អាច​ស្លាប់ ប៉ុន្តែ​គណបក្ស​ប្រជា​ជន​មិន​ស្លាប់​ទេ ដរាបណា​មាន​គណបក្ស​ប្រជាជន​​ ​ពន្ធ​ដី​មិន​ត្រឹមតែ​មិន​យក​ទេ ប៉ុន្តែ​ហេដ្ឋា​រចនា​សម្ព័ន្ធ​បំរើ​ឲ្យ​វិស័យ​កសិកម្ម ការស្វែងរក​ទីផ្សារ​ជូន​ប្រជាជន ការ​ខិតខំ​ស្វែងរក​ក្របខ័ណ្ឌ​មីក្រូ​ហិរញ្ញ​វត្ថុ​ជូន​កសិករ​របស់​យើង​នឹង​​នៅតែ​បន្ត ថ្វីត្បិតតែ​មាន​ឆ្នាំ​ខ្លះ​ផលិតផល​របស់​កសិករ​មាន​តម្លៃ​ធ្លាក់ចុះ ដោយសារតែ​ប្រទេស​នានា ​ដែល​ធ្វើ​កសិកម្ម​ទទួល​បាន​បរិមាណ​ផល​ច្រើន​ក្តី។

សម្តេច​តេ​ជោ​នាយក​រដ្ឋមន្ត្រី​បាន​មាន​ប្រសាសន៍​ឲ្យ​ដឹង​​ថា រាជរដ្ឋាភិបាល​មានការ​គិត គូរ​​យ៉ាង​ច្បាស់​អំពី​បញ្ហា​ចំណូល និង​ចំណាយ ហើយ​ការ​មិន​យកពន្ធ​ដី​ពី​កសិករ ​មិនបាន​ធ្វើ​ឲ្យ​រាជ​រដ្ឋា​ភិ​បាល​ស្លាប់​នោះ​ឡើយ។ រាជរដ្ឋាភិបាល​នៅ​តែ​មាន​លទ្ធភាព​ក្នុង​ការសាង​សង់​ហេដ្ឋា​រចនា​សម្ព័ន្ធ​ផ្សេងៗគាំទ្រ​ដល់​កសិករ​ទៀត​ផង។ សម្តេច​តេ​ជោ​នាយក​រដ្ឋមន្ត្រី​មាន​ប្រសាសន៍​បញ្ជាក់​ថា គឺ​មាន​តែ​ពួក​អ្នកសន្យា​តម្លើង​ប្រាក់ខែ​ទេ ដែល​អាច​យកពន្ធ​ដី​ពី​កសិករ ​នៅ​ពេល​ដែល​ពួក​គេ​ជាប់ឆ្នោត​ហើយ​ខ្វះ​លុយ ត្រូវតែ​តម្លើង​ពន្ធ​។

ពាក់​ព័ន្ធ​ទៅនឹង​បញ្ហា​ចំណូល​ចំណាយ​របស់​ជាតិ សម្តេចតេជោ​នាយក​រដ្ឋមន្ត្រី​មាន​ប្រសាសន៍​ថា វា​ជា​មហន្តរាយ​ធំ​ណាស់​នៅ​ពេល​ដែល​មិន​បាន​​គិតគូរអំពី​ចំណូល និង​ចំណាយ ហើយ​ការ​បោះ​ពុម្ពប្រាក់​អត់​មាន​អ្វី​ជា​ការ​លំបាក​ទេ ​ព្រោះ​ធនា​គារ​ជាតិ​​មាន​ពុម្ព​ស្រាប់ ប៉ុន្តែ​នៅ​ពេល​ធ្វើ​ចរាចរ​នៅ​លើ​ទីផ្សារ​វា​នឹង​បណ្តាល​ឲ្យ​មាន​អតិផរណា​ ព្រោះតែ​លុយ​បាន​ធ្លាក់​ថ្លៃ។ សម្តេច​តេ​ជោ​នាយករដ្ឋមន្ត្រី​​បញ្ជាក់​ថា ឥឡូវនេះ​ប្រាក់​រៀល​របស់​យើង​បាន​ឡើងថ្លៃ ដោយ​សារ​តែ​រាជ​រដ្ឋា​ភិបាល​បាន​បញ្ចេញ​ប្រាក់​រាប់​រយ​លាន​ដុល្លារ​សហរដ្ឋអាមេរិក ​ប្តូរ​យក​ជា​ប្រាក់​រៀល​ដើម្បី​ទប់។

នៅ​ក្នុង​ពិធី​ចែក​ប័ណ្ណ​កម្ម​សិទ្ធី​ដីធ្លី​ជូន​ប្រជាពល រដ្ឋ​ចំនួននៅ​ឃុំ​ឬ​ស្សី​ជ្រុំ ស្រុក​ថ្មបាំង ខេត្ត​កោះ​កុង នា​ថ្ងៃទី២៨ ខែមករា​​ ឆ្នាំ២០១៣ សម្តេច​តេ​ជោនាយករដ្ឋ​មន្ត្រីក៏បាន​មាន​ប្រសាសន៍​ចាប់​អារម្មណ៍​ទាក់ទៅនឹង​បញ្ហា​ការពារបរិស្ថាន​ផង​ដែរ​ ដោយបាន​អំពាវនាវ​ដល់ប្រជាពលរដ្ឋ ដែល​ទៅ​កាប់​អុស កាប់​ធ្យូង នៅ​ក្បែរ​តំបន់​ជី​ផាត​ សូមមេត្តា​បញ្ឈប់​សកម្មភាពចូល​កាប់​ឈើ។

សម្តេច​តេ​ជោ​នាយករដ្ឋមន្ត្រី​បាន​មាន​ប្រសាសន៍​​ឲ្យ​ដឹង​ថា សម្តេច​មិន​លើកទឹកចិត្ត​ឲ្យ​ធ្វើ​​ឡឥដ្ឋ ឡក្បឿង​ទេ ព្រោះ​មានមុខ​ទំនិញ​ខ្លះ​​ យើង​សុខចិត្ត​ធ្វើការ​នាំចូល ​ទោះបី​ជា​មាន​គេ​បន្ទោស​ក្តី។  បើ​គិត​ជា​សេដ្ឋកិច្ច​វិញ ដើម្បី​ផលិត​បាន​ឥដ្ឋក្បឿង​មួយ​ឡ តើ​យើង​ត្រូវ​ប្រើ​អុស​អស់​ប៉ុន្មាន? ដូច្នេះ ​វា​ត្រូវ​ចំណាយ​ច្រើន​ណាស់ នៅ​ពេល​ដែល​មិន​​មាន​ទំនិញ​ដូចគ្នា​នេះ​ នាំ​ចូល​មក​មាន​តម្លៃ​តិច​ថោក​ជាង​ការ​ផលិត​នៅ​ក្នុង​ស្រុក ហើយ​មាន​សំភារៈ​សំណង់​ខ្លះ​ផលិត​ក្នុងស្រុក​បំផ្លា​ញ​អស់​ព្រៃឈើ។ ជាមួយ​គ្នា​នេះ​សម្តេច​តេជោ​នាយក​រដ្ឋមន្ត្រី​មាន​ប្រសាសន៍​ថា សម្តេចនឹង​លើក​ទឹក​ចិត្ត​ បើ​សិន​ជា​មាន​ក្រុមហ៊ុន​នាំចូល​នូវ​បច្ចេកវិទ្យា​ថ្មី ​ក្នុង​ការផលិត​ឥដ្ឋក្បឿង ដោយ​មិន​ប្រើ​ប្រាស់​ឈើ​នោះ។

ទន្ទឹម​នឹង​នេះសម្តេច​តេជោ​នាយក​រដ្ឋមន្ត្រី​បាន​បញ្ជាក់​ជា​ថ្មីម្តង​ទៀត អំពី​ការ​មិន​អនុញ្ញាត​ឲ្យ​ក្រុម​ហ៊ុន​ឯកជនរុករក​រ៉ែទី​តា​ញ៉ូម ដែល​មាន​តម្លៃ​រាប់​សិប​លាន​ដុល្លារ​អាមេរិក នៅ​តំបន់​ព្រៃភ្នំ ក្នុង​ខេត្ត​កោះកុង​។ នោះ​មក​ពី​ទំហំ​ដ៏​ធំនៃ​មហន្តរាយ​ដល់​ធនធានធម្មជាតិ រួមមាន ព្រៃភ្នំ និង​ទឹក​សមុទ្រ​ជាដើម ជាពិសេស​ គឺ​បើ​សិន​ជា​មាន​អាជីវ​កម្ម​រុករក​រ៉ែនៅ​តំបន់​ព្រៃ​ភ្នំ​នោះ នឹង​ធ្វើឲ្យ​ប៉ះពាល់​យ៉ាង​ធ្ងន់​ធ្ងរ​ដល់​តំបន់​ទេសចរណ៍​ទើប​បង្កើត​ថ្មី “ជី​ផាត”​។

សម្តេច​តេជោ​នាយក​រដ្ឋមន្ត្រីបាន​មានប្រសាសន៍ឲ្យ​ដឹងថា នៅ​ជី​ផាត​នឹង គឺ​ថា​ខ្ញុំ​បានបញ្ជាក់​ម្តង​ហើយ ទោះបីជា​តម្លៃ​ណា​ក៏ដោយ​ចុះ គឺថា អត់​ទេ​។ សូម​ទុក​សិន​។ មហន្តរាយ​។ ទី​តា​ញ៉ូម មានតម្លៃ​គឺថា​ច្រើន​ពាន់​លាន រាប់សិប​ពាន់​លាន​ដុល្លារ​។ ទី​តា​ញ៉ូម នៅ​ជី​ផាត​។ ប៉ុន្តែ​ដើម្បី​ធ្វើ​អា​ណុង​បាន វា​ត្រូវ​បក​យក​អា​ស្បែក​វា​ចេញ ដល់​ទៅ​២​ម៉ឺន​ហិកតា​ផ្លាយ (ព្រៃឈើ)​។ បើ​២​ម៉ឺន​ហិកតា គឺ​វា​អស់ ចំ​អា​តំបន់​ដំរី​ដើរ​។ អា​នឹង​មួយ​។ ប៉ុន្តែ​មហន្តរាយ​ជាង​នោះ​ទៀត គឺ​បាន​សេចក្តីថា “ទឹកល្អក់​ទាំង​ប៉ុន្មាន ហូរ​ចុះ​ទៅ​ក្នុង​សមុទ្រ​ទាំងអស់​។ អីចឹង​ទេ វា​មិនមែនសមុទ្រ​ទឹក​ខៀវ វា​ទៅ​ជា​សមុទ្រ​ទឹក​ក្រហម​។ អីចឹង បាន​ជា​តំបន់​ជី​ផាត ត្រូវ​រក្សា” ​​។

ពាក់​ព័ន្ធ​នឹង​ទស្សន​ទាន​សម្រាប់​អភិវឌ្ឍន៍​តំបន់​ទេសចរណ៍​ធម្មជាតិ​វិញ សម្តេច​​តេ​ជោ​នាយក​រដ្ឋ​មន្ត្រី​បាន​មាន​ប្រសាសន៍​ឲ្យ​ដឹង​​ថា គេ​មិនដែល​កាប់​ឈើ​ទេ ដូចជា​តំបន់​ទេស​ច​រ​ណ៍​គីរីរម្យ បូកគោ ជី​ផាត ជាដើម គឺជា​តំបន់​ការពារ​ព្រៃឈើ​ទៅវិញ​ទេ ដែល​ត្រូវតែ​ដាំ​ឡើង​វិញ។
រាជរដ្ឋាភិបាល​បាន​បញ្ចប់​ដំណាក់កាល​ទី១ កាលពីដើម​ខែ​មករា​ ឆ្នាំ២០១៣ បន្ទាប់ពី​បាន​ដំ ណើ​រ​​ការ​អស់​រយៈពេល ៦ខែ​ ក្នុង​ការ​អនុវត្ត​បទបញ្ជា​លេខ០១ នៃ​នយោបាយ​ចាស់ សកម្ម​ភាព​ថ្មី លើ​វិស័យ​ដីធ្លី ដោយ​ធ្វើការ​វាស់វែង​ក្បាល​ដីសម្រេច​បាន ៣៤ម៉ឺន​ក្បាលដី​ ស្មើនឹង​ទំហំ​ប្រមាណ ៥៥ម៉ឺនហិកតា បាន​បិទ​ផ្សាយ​ជា​សាធារណៈ​នូវ​ទិន្នន័យ​ក្បាល ដែល​រង់​ចាំតែ​ធ្វើ​ពិធី​ចែក​ប័ណ្ណ​បាន​ជាង ១៣ម៉ឺន​ក្បាលដី ពាក់​ពន្ធ័​នឹង​ប្រជាពលរដ្ឋ ៨ម៉ឺន​គ្រួសារ និង​ប្រជាពលរដ្ឋ​បាន​ទទួល​ប័ណ្ណ​ដល់ដៃ​ហើយ​ជិត ៨ម៉ឺន​ប័ណ្ណ។ នៅ​ក្នុង​បេសកកម្ម​ចែក​ប័ណ្ណ​កម្មសិទ្ធិ​ដីធ្លី​ជូន​ប្រជាពលរដ្ឋ​នៅ​ក្នុង​ ខេត្ត​ទាំង​២០ សម្តេច​តេ​ជោ​នាយករដ្ឋមន្ត្រី​បាន​ប្រគល់​​ដោយ​ផ្ទាល់​ដៃ​ជូន​ប្រជាពលរដ្ឋ​ចំនួន ១៣.៦១០គ្រួសារ​ មាន ២២.៤៦៦ក្បាលដី ស្មើនឹង ៣៩.៣៦៨ហិកតា។

ដំណាក់កាល​ទី២ នៃ​ការវាស់វែង​ដីធ្លី​ផ្តល់​កម្មសិទ្ធិ​ជូន​ប្រជាជន​ បាន​ចាប់​ផ្តើម​កាលពី​ពាក់ កណ្តាល ខែ​មករា ឆ្នាំ២០១៣ ដែល​គ្រោង​នឹង​បញ្ចប់​នៅមុន​យុទ្ធនា​ការបោះឆ្នោត​សកល​អាណត្តិ​ទី៥ ក្នុង​ខែមិថុនា ឆ្នាំ២០១៣ ខាង​មុខ។
សម្តេច​តេជោ​បាន​ចាត់​ទុក​បេសកកម្ម ​ជា​ប្រវត្តិសាស្ត្រ​នៃ​ការអនុវត្ត​នយោបាយ​ចាស់​ សកម្ម​ភាព​ថ្មី​លើ​វិស័យ​ដីធ្លី​នេះ គឺជា ឱកាស​ដ៏​កម្រ​មាន​សម្រាប់​យុវជន​ជំនាន់​ថ្មី ក្នុង​សម័យ​​សម្តេច​​តេ​ជោ​ ដែល​បាន​ចូលរួម​បំពេញ​បេសកកម្មជូន​ជាតិ​មាតុភូមិ និង​ប្រជាជន។ ជាង​នេះ​ទៅ​ទៀត​ក្នុង​ឋានៈ​ជា​វីរៈ​យុវជន​ស្ម័គ្រចិត្ត ក្រៅពី​ការ​ដកពិសោធន៍​លើ​ការងារ​ជំនាញ​ក្នុង​​​ការងារ​ចុះបញ្ជី​ដីធ្លី​ មាន​លក្ខណៈ​ជា​ប្រព័ន្ធ ក្មួយ​ៗ​យុវជន​នូវ​បាន​បង្កើត​ស្នាដៃ​ជាច្រើន​ទៀត​ដល់​សង្គម ទាំងនោះ​សរ​បញ្ជាក់​ឲ្យ​ឃើញ​ពី​ទឹកចិត្ត​គោរព​ស្រឡាញ់​ប្រជាជន ការ​ចែក​រំលែក​នូវ​ការ​លំបាក​របស់​ប្រជាជន ការ​យល់​ដឹង​ពី​សុខទុក្ខ​របស់​ប្រជាជន​ផ្សារភ្ជាប់​ខ្លួន​​ជាមួយ​ប្រជាជន ដែល​ទាំង​អស់​នោះ​សុទ្ធ​តែ​ជា​អនុស្សាវរីយ៍​ដ៏​ល្អ និង​មិន​អាច​​បំភ្លេច​បាន​​ក្នុង​ទឹក​ចិត្ត​របស់​ប្រជាជន និង​ក៏​ជា​ការ​អនុវត្ត​យ៉ាង​ល្អ​នូវ​ប្រពៃណី នៃ​ការ​ផ្តាំផ្ញើ​របស់​សម្តេច​​តេ​ជោ​នាយក​រដ្ឋមន្ត្រី និង​លោកជំទាវកិត្តិ​ព្រឹទ្ធ​បណ្ឌិត ដែល​ថា ​ពេល​នៅ​ឲ្យ​ប្រជាជន​ស្រឡាញ់​ពេល​ចេញទៅ​ឲ្យ​ប្រជាជន​នឹក។ បើ​ទោះ​បី​ជា​រយៈពេល​នៃ​ការ​បំពេញ​ការ​ងារ​ជា​ប្រវត្តិសាស្ត្រ​នោះ ពិត​ជា​មាន​រយៈ​ពេល​ខ្លី​ក៏​ពិត​មែន តែ​មាន​អត្ថន័យ​ដ៏​ធំធេង​សម្រា​ប់​ជីវិត​យុវវ័យរបស់​ក្មួយៗ​យុវជន ក្មួយ​ៗ​កាន់​តែ​មាន​​ភាព​រឹង​មាំ​ទាំង​ផ្លូវ​កាយ និង​ផ្លូវចិត្ត ដែល​ជា​គុណសម្បត្តិ​និង​ជា​គុណធម៌របស់​ពលរដ្ឋ​គ្រប់រូប ដើម្បី​ត្រៀម​រៀបចំ​ខ្លួន​បន្តវេន​ពី​ជំនាន់​រៀមច្បង​នោះ។

គួរ​ជម្រាប​ជូន​ដែរ​ថា សម្តេច​អគ្គមហា​សេនា​បតីតេជោ ហ៊ុន សែន និង​លោកជំទាវ​កិត្តិ​ព្រឹទ្ធ​បណ្ឌិត ប៊ុន រ៉ានី បាន​អញ្ជើញ​ចែក​ប័ណ្ណកម្មសិទ្ធិ​ដីធ្លីជា​លើក​ចុងក្រោយ ដល់​ប្រជាពលរដ្ឋ រស់នៅ​ភូមិ​ត្រពាំង​ឈើ​ត្រាវ និង​ភូមិ​គគីរ ឃុំ​ឫស្សី​ជ្រុំ ស្រុក​ថ្មបាំង ខេត្ត​កោះកុង នា​ព្រឹក​ថ្ងៃទី​២៨ ខែ​មករា ឆ្នាំ​២០១៣​។ ​សម្តេចតេជោនាយករដ្ឋមន្ត្រី បាន​ចាប់ផ្តើម​ចុះ​ចែក​ប័ណ្ណកម្មសិទ្ធិ​ដីធ្លីលើក​ទី១ កាលពី​ថ្ងៃ​ទី​២១ ខែ​កញ្ញា ឆ្នាំ​២០១២ នៅឯ​ខេត្ត​ក្រចេះ​៕

Friday, January 25, 2013

សម្ដេច​​តេជោ​​ណែនាំ​​ឲ្យ​​ថ្នាក់​ដឹក​នាំ​​គ្រប់​​ជាន់​ថ្នាក់​​នៃ​កង​​​យោធ​ពល​​ខេមរ​ភូមិន្ទធ្វើ​គំរូ​​ដល់​​ថ្នាក់​​ក្រោម

នៅ​ក្នុង​ឱកាស​អញ្ជើញ​ជា​អធិបតី​ពិធី​បិទ​វគ្គ​បណ្តុះ​បណ្តាល​ នាយ​ទាហាន​ជើងគោក​ជំនាន់​ទី១ នាយ​ទាហាន​សកម្ម​ជំនាន់​ទី១៣ និង​សម្ពោធ​ដាក់​ឲ្យ​ប្រើប្រាស់​នូវ​សមិទ្ធផល និង​ការ​បើក​ការ​ដ្ឋាន​សាងសង់​បន្ត​ ជា​ជំនួយ​របស់​សាធារណរដ្ឋ​ប្រជា​មានិត​ចិន ​ជូន​ដល់​វិទ្យាស្ថាន​កង​ទ័ព​ជើង​គោក​ថ្លុក​តាសេក ស្ថិត​នៅឃុំ​ត្រែង​ត្រយឹ​ង ស្រុក​ភ្នំស្រួច ខេត្ត​កំពង់ស្ពឺ នាថ្ងៃទី២៤ ខែ​មករា ឆ្នាំ២០១៣ នាយ​ឧ​ត្ត​ម​សេនីយ៍​ផុត​លេខ​ផ្កាយ​មាស៥ សម្តេច​អគ្គ​មហា​សេនា​បតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជា​ណាច​ក្រ​កម្ពុជា​ បាន​ណែនាំឲ្យ​ជួរ​ថ្នាក់​ដឹកនាំ​គ្រប់​ជាន់​ថ្នាក់​នៅ​ក្នុង​កង​យោធពល​ ខេមរភូមិន្ទ​ត្រូវ​ធ្វើ​គំរូ​ដល់​ថ្នាក់​ក្រោម។ សម្តេច​តេជោ​មាន​ប្រសាសន៍​ឲ្យ​ដឹង​ថា ​កន្លង​មក​មាន​បាតុភាព​ប្រែធាតុ​មួយ​ចំនួន​ រហូតដល់​នាយ​ទាហាន​ជាន់​ខ្ពស់​ខ្លះ​ មិន​គោរព​ច្បាប់​លក្ខន្ដិកៈ​ទូទៅ​ចំពោះ​យោធិន​នៃ​កង​យោធពល​ខេមរភូមិន្ទ និង​បទ​វិន័យ​ទូទៅ ហើយ​អ្វី​ដែល​គួរ​ឱ្យ​ចាប់​អារម្មណ៍​នោះ​ គឺថា​ការ​តម្លើង​ឋានន្ដរស័ក្ដិ​នាយទាហា​ន ដោយ​គ្មាន​ឆ្លង​កាត់​ការ​បណ្ដុះ​បណ្ដាល គ្មាន​សញ្ញាបត្រ និង​មុខតំណែង​សំពីង​សំពោង​ដែល​គ្មាន​ការ​ចាំ​បាច់។ ប្រការ​នេះ​សម្តេច​តេជោ​បញ្ជាក់​ថា គឺ​បណ្ដាល​មក​ពី​ការ​តែងតាំង​ខ្វះ​វិធានការ​សន្ដិសុខ និង​ប្រភព​មិន​ច្បាស់​លាស់ ជាពិសេស​មិន​បាន​ឆ្លងកាត់​ការ​បណ្ដុះ​បណ្ដាល ដែល​នាំ​ឱ្យ​មាន​ការ​ខុស​ឆ្គង រហូត​ដល់​ល្មើស​វិន័យ​របស់​កងទ័ព និង​ច្បាប់​របស់​រដ្ឋ​ទៀត​ផង។
ទាក់​ទង​នឹង​ការ​ហ្វឹកហ្វឺន​ដល់​កង​ទ័ព សម្តេចតេ​ជោបាន​មាន​ប្រសាសន៍​ថា ដោយ​ការងារ​ហ្វឹក​ហ្វឺន​មាន​សារៈសំខាន់​ក្នុង​ការ​ផ្ដល់​ចំណេះដឹង​គ្រប់​ ផ្នែក ដល់​កងទ័ព​សម្រាប់​វិស័យ​ការពារ​ជាតិ ខ្ញុំ​ស្នើ​ឱ្យ​ក្រសួងការពារជាតិ​ធ្វើការ​សិក្សា​ស្រាវជ្រាវ​រៀប​ចំ​បទ​ ដ្ឋាន​គតិ​យុ​ត្ដិ ជា​អនុក្រឹត្យ និង​ប្រ​កា​ស​ស្ដីពី​ការងារ​ហ្វឹកហ្វឺន​កង​យោធពល​ខេមរភូមិន្ទ ដើម្បី​ជំរុញ​ការអនុវត្ដ​ការងារ​ហ្វឹកហ្វឺន​កង​ទ័ព​ឱ្យ​មាន​របៀបរៀបរយ និង​ការ​គោរព​ច្បាប់​ឱ្យ​មាន​ប្រសិទ្ធ​ភាព​តាមរយៈការ​ហ្វឹកហ្វឺន និង​បណ្ដុះ​បណ្ដាល។ ចំពោះ​ការងារ​ហ្វឹក​ហ្វឺន​ ​កងទ័ព​ត្រូវ​យក​ចិត្ដ​ទុកដាក់​អំពី​គុណភាព​ សមត្ថ​ភាព​កងទ័ព​ ទាំងក្នុង​ការ​ចាត់តាំង​ប្រយុទ្ធ ​បម្រើ​ការ​ប្រយុទ្ធ និង​ការ​បំ​ពេញមុខ​នាទី​ដែល​ទទួល​ខុសត្រូវ​រៀងៗខ្លួន​ដើម្បី​ពង្រឹង​ប្រៀប​ ការពារជាតិ។ សម្តេច​តេជោ​នាយក​រដ្ឋមន្ត្រី​បញ្ជាក់​ថា កង​ទ័ព​មិន​ត្រឹម​តែ​មាន​ចំ​ណេះ​ដឹង​អំពី​ក្បួន​យុទ្ធសាស្ដ្រ​យោធា​ប៉ុណ្ណោះ ​ទេ ប៉ុន្ដែ​ថែមទាំង​ត្រូវ​មាន​ចំណេះដឹង​អំពី​វិទ្យាសាស្ដ្រសង្គម និង​ច្បាប់​នានា​របស់​រដ្ឋ​ទៀត​ផង ដែល​នេះ​ជា​កត្ដា​សត្យា​នុម័តនៃ​ភាព​រឹងមាំ​របស់​កងទ័ព​ក្នុង​ឋានៈ​ជា​ អ្នកការពារ​ជាតិ​មាតុភូមិ នៃ​ព្រះរាជាណាចក្រ​កម្ពុជា។
សម្តេច​តេជោ​នាយក​រដ្ឋមន្ត្រី​បាន​សម្ដែង​នូវ​អំណរ​ ស្វាគមន៍​ដ៏​កក់ក្ដៅ​ជូន​ ចំពោះ​គណៈប្រតិភូ​ជាន់​ខ្ពស់​នៃ​កងទ័ព​រំដោះ​ប្រជាជន​ចិន ដែល​បាន​អញ្ជើញ​មក​ចូលរួម​ក្នុង​ពិធី។ ​តាមរយៈ​ប្រតិភូ​អគ្គសេនាធិការ​នៃ​កង​ទ័ព​រំដោះ​ប្រជាជន​ចិន​ ដឹកនាំ​ដោយ​លោកឧត្តម​សេនីយ៍ ហ្គី ជៀន ហ្គូ (Qi Jain gou) សម្តេច​តេ​ជោ​ បាន​ស្នើ​ដល់​គណៈប្រតិភូ​ពាំនាំ​នូវ​បណ្ដាំ​ផ្ញើ​នៃ​សេចក្ដី​ថ្លែងអំណរ​គុណ​ ដ៏​ជ្រាលជ្រៅ​របស់​រាជរដ្ឋាភិបាល និង​កងទ័ព​កម្ពុជា​ ចំពោះ​រដ្ឋាភិបាល និង​កងទ័ព​នៃ​សា​ធា​រណៈរដ្ឋ​ប្រជាមានិត​ចិន ដែលបាន​ជួយឧបត្ថម្ភ​គាំទ្រ​គ្រប់បែបយ៉ាង​ដល់​ការ​កំណែទម្រង់ ការ​កសាង និង​ការពង្រឹង​កង​យោធពលខេមរភូមិន្ទ​ក្នុង​រយៈពេល​កន្លងមក​។ សម្តេច​តេ​ជោ​ក៏​បាន​ថ្លែង​នូវ​ការ​កោត​សរសើរ​ដោយ​ផ្ទាល់ ចំពោះ​អនុព័ន្ធយោធា​ចិន​ប្រចាំ​នៅ​កម្ពុជា និង​ទីប្រឹក្សា​​យោធា​ចិន​ប្រចាំ​នៅ​វិទ្យាស្ថាន​ទ័ព​ជើង​គោក ដែល​បាន​សហការ​ល្អជា​មួ​យក​ង​យោធ​ពល​ខេមរភូមិន្ទ តាមរយៈ​ការ​ជួយ​ឧបត្ថម្ភ​គាំទ្រ​ជាច្រើន ទាំងកម្លាំងកាយ​ចិ​ត្ដ ប្រាជ្ញា​ស្មារតី សម្ភារៈ និង​ថវិកា​ដោយបាន​ជួយ​កសាង​ហេដ្ឋារចនាសម្ព័ន្ធ​វិទ្យាស្ថាន​ទ័ពជើងគោក​ ចាប់តាំងពី​ឆ្នាំ២០០២ រហូតមក។
លោក​ឧត្តម​សេនីយ៍​ឯក ហ្គី ជៀន ហ្គូ (Qi Jain gou) អគ្គសេនាធិការរងនៃ​កងទ័ព​រំដោះ​ប្រជា​ជន​ចិន​ដែល​មាន​វត្ត​មាន​នៅ​ក្នុង​ ពិធី​នោះ​ដែរ បានមាន​ប្រសាសន៍​ចាត់​ទុកពិធី​បិទ​វគ្គ​បណ្តុះ​បណ្តាល​នាយទាហាន​ជើងគោក​ ជំនាន់​ទី១ នាយទាហាន​សកម្ម​ជំនាន់​ទី១៣ និង​សម្ពោធ​ដាក់​ឲ្យ​ប្រើប្រាស់​នូវ​សមិទ្ធផល និង​ការ​បើក​ការ​ដ្ឋាន​​សាងសង់​បន្ត​ ជា​ជំនួយរបស់​សាធារណរដ្ឋ​ប្រជាមានិត​ចិន ​ជូន​ដល់​វិទ្យាស្ថាន​កង​ទ័ព​ជើង​គោកថ្លុក​តាសេក ស្ថិត​នៅឃុំ​ត្រែង​ត្រយឹ​ង ស្រុក​ភ្នំស្រួច ខេត្ត​កំពង់ស្ពឺ ថា ​គឺជា​ទិវា​ជា​ប្រវត្តិសាស្ត្រ​សំរាប់​កងទ័ព​នៃ​ប្រទេស​ទាំងពីរ​ កម្ពុជា ចិន។ លោក ហ្គី ជៀនហ្គូ បានមានប្រសាសន៍​វាយ​តម្លៃថា វិទ្យាស្ថាន​កងទ័ពជើងគោក​របស់​ប្រទេស​កម្ពុជា នឹង​ធ្វើដំណើរ​តាម​ទាន់​ការអភិវឌ្ឍ នៃ​ទំនើបភាវូបនីយកម្ម​យោធា​យ៉ាង​ពិសេស​របស់ខ្លួន និង​ខិតខំ​ប្រឹងប្រែង​បណ្តុះ​បណ្តាល​ធនធាន​មនុស្ស ដែល​មាន​គុណភាព​ខ្ពស់​កាន់​តែ​ច្រើន​ឡើងៗ ដើម្បី​រួមចំណែក​ដល់​កិច្ច​កសាង​និង​អភិវឌ្ឍន៍ នៃ​កងយោធពល​ខេមរភូមិន្ទ។
ទាក់​ទឹង​នឹង​កិច្ច​សហ​ប្រតិ​បត្តិការ​ទ្វេភាគី(កម្ពុជា-ចិន) លោក​ឧ​ត្ត​ម​សេនីយ៍​ឯក ហ្គី ជៀនហ្គូ មាន​ប្រសាសន៍​បញ្ជាក់​ថា ទំនាក់ទំនង​កិច្ច​សហប្រតិបត្តិការ​នៃ​ប្រទេស​យើង​ទាំងពីរ ​​មិនអាច​មាន​អ្វី​អាច​ប្រែប្រួល​បានឡើយ។ មិត្តភាព​ចិន-កម្ពុជា ​បានឆ្លងកាត់​ការសាកល្បង​នៃ​ការ​ប្រែ​ប្រួល​ស្ថានភាព​អន្តរជាតិ​ជាច្រើន ប៉ុន្តែ​បច្ចុប្បន្ននេះ​បាន​ក្លាយជា​គំរូនៃ​ទំនាក់ទំនង​មិត្តភាព​រវាង​ ប្រទេស​ និង​ប្រទេស។ លោក​ឧត្តម​សេនីយ៍​ឯក ហ្គី ជៀនហ្គូ អគ្គសេនាធិការ​រង​នៃ​កង​ទ័ព​រំដោះ​ប្រជាជន​ចិន​ បាន​មាន​ប្រសាសន៍​ឲ្យ​ដឹង​ថា តទៅ​អនាគត​ភាគី​ចិន​នឹងបន្ត​ពួតដៃគ្នា​ជា​មួយ​នឹង​មិត្តភក្តិ​កម្ពុជា​យ៉ាង​ ជិតស្និត បង្កើន​ការផ្លាស់ប្តូរ​កិច្ច​សហ​ប្រតិបត្តិការ​ចាប់​ដៃ ខិតខំ​កសាង និង​អភិវឌ្ឍន៍​ប្រវត្តិសាស្ត្រ​ថ្មី ​ឲ្យ​កាន់តែ​ល្អ​បវរ​នៃ​ភាពជា​ដៃ​គួ​សហប្រតិបត្តិការ​យុទ្ធ​សាស្ត្រ លើ​គ្រប់​វិស័យ​និង​ប្រទេស​ទាំងពីរ​ចិន និង​កម្ពុជា។
លោក​ឧត្តម​សេនីយ៍​ឯក ម៉ម យឿន នាយក​វិទ្យាស្ថាន​កងទ័ព​ជើង​គោក​មាន​ប្រសាសន៍​ឲ្យ​ដឹង ថា វិទ្យាស្ថាន​បានទទួល​បទបញ្ជា​ឲ្យ​ធ្វើការ​បណ្តុះ​បណ្តាល​នាយ​ទាហាន​កងទ័ព​ ជើង​គោក​ជំនា​ន់​ទី១ រយៈពេល ៤ឆ្នាំ បាប់​ពីថ្ងៃ​ទី២៥ ខែមករា ​ឆ្នាំ២០០៩ ដល់​ថ្ងៃទី២៥ ខែមករា ​ឆ្នាំ ២០១៣ មាន​សិក្ខា​កាម​ចំនួន ១៦០នាក់ ​ក្នុងនោះ​ទទួលបាន​និទ្ទេស​ល្អ​ណាស់​ចំនួន ២នាក់​និទ្ទេស​ល្អ ១១៤នាក់ និទ្ទេស​ល្អបង្គួរ ៤៣នាក់ និង​និទ្ទេស​មធ្យម ១នាក់។ លោក​ឧ​ត្ត​ម​សេនីយ៍​ឯក​មាន​ប្រសាសន៍​បន្តថា នៅ​ឆ្នាំ​ទី៤ នៃ​វគ្គ​សិក្សា​សិស្ស​នាយទាហាន​កងទ័ព​ជើងគោក​ជំនា​ន់​ទី១ បាន​ទទួល​អាហារូបករណ៍​ទៅ​សិក្សាផ្នែក​អន្តរា​វុ​ធ​នៅ​ប្រទេស​ចិន​ចំនួន ១៦០នាក់ រយៈ​ពេល ៤ខែ និង​បាន​បន្ត​ការចុះទៅ​សិក្សា​ជាក់ស្តែង នៅតាម​បណ្តា​កងឯកភាព​តាម​បណ្តា​យ​ព្រំ​ដែន​កម្ពុជា-ថៃ ​រយៈពេល ៤២ថ្ងៃ។ ដោយឡែក​សំរាប់​វគ្គនាយទាហាន​សកម្ម​ជំនា​ន់ទី១៣ ធ្វើ​ការ​បណ្តុះបណ្តាល​រយៈ​ពេល​ ៤ឆ្នាំ មាន​សិក្ខាកាម​ចំនួន ១០៤នាក់ ក្នុងនោះ​ទទួលបាន​និទ្ទេស​ល្អ​ណាស់ ១នាក់ និទ្ទេស​ល្អ ៣៣នាក់ និទ្ទេស​ល្អ​បង្គួរ ៤៥នាក់ និទ្ទេសមធ្យម ២៤នាក់ និង​មិន​គ្រប់​លក្ខណៈ​ទទួល​សញ្ញាបត្រ ១នាក់។
ដោយ​អនុលោម​តាម​កិច្ចព្រមព្រៀង​សហប្រតិបត្តិការ​រវាង​ក្រសួងការពារជាតិ​ ទាំងពីរ ​កម្ពុជា​-ចិន ក្រោម​ជំនួយ​ដ៏​ថ្លៃថ្លា​នៃ​សាធារណរដ្ឋ​ប្រជា​មានិត​​ចិន វិទ្យាស្ថាន​កងទ័ពជើងគោក​បាន​ចាប់​ផ្តើម​​ដំណើរការ​សាងសង់ និង​បំពាក់​នូវ​គ្រឿង​សម្ភារៈ​សម្រាប់​ការហ្វឹកហ្វឺន​ពី​ឆ្នាំ១៩៩៩ រហូត​មក​ដល់​ដើមឆ្នាំ២០១២ មាន៥ ដំណាក់​កាល​រួចមកហើយ និង​ឈានដល់​ដំណាក់កាល​ទី៦ កាលពី​បំណាច់​ឆ្នាំ២០១២។ ​ផ្អែក​តាមគំរោង​ជំនួយ​សម្រាប់​ឆ្នាំ២០១២-២០១៣ ដែល​មាន​ទឹក​ប្រាក់ ៨៩លាន​យ៉​ន់ ក្រោយពី​ការសាងសង់​អគារស្នាក់នៅ និង​អគារ​ផ្ទះបាយ​សម្រាប់​កម្ម​សិក្សា​ការី រួច​នឹង​បន្ត​ការសាងសង់​អគារ​ការិយាល័យ​ធ្វើការ​របស់យោធា​ចា​រ្យកម្ពស់ ៤ជាន់ និង​​អគារ​សាលប្រជុំ​ចំណុះ ១២០០នាក់​ រួមទាំង​ការបំពាក់​សម្ភារៈ​បរិក្ខា​រជាច្រើន​ទៀតផង​ដែរ​។

សម្តេច​​តេ​ជោ​ដាក់​​ចេញ​ភារ​កិច្ច​​សំខាន់​ៗ​៥​យ៉ាង ​សម្រាប់​កង​យោធពល​​ខេម​រភូមិន្ទ​​អនុវត្ដ

អនុ​សាសន៍ទាក់​ទង​នឹងភារកិច្ច​សំខាន់ៗចំនួន​៥យ៉ាង ដើម្បី​អនុវត្តន៍ឲ្យ​មាន​ប្រសិទ្ធ​ភាព​ ក្នុង​បុព្វ​ហេតុ​ការពារប្រជា​ជន​ និង​បូរណភាព​ទឹក​ដី ក៏​ដូច​ជា​លើក​កម្ពស់​សមត្ថភាព​ប្រតិបត្តិការ ដែល​រួម​មាន៖ ទី១-កិច្ចការពារ​បូរណ​ភាព​ទឹកដី។ ទី២-សន្ដិសុខ​មនុស្ស។​ ទី៣-សន្ដិសុខ​ដែន​សមុទ្រ។ ទី៤-ការធ្វើ​សមាហរណកម្ម​កង​យោធពល​ខេមរភូមិន្ទនៅក្នុង​តំបន់ និង​អន្ដរជាតិ។ ទី៥-កសាង​សមត្ថភាព​សម្រាប់​ប្រតិ​ប​ត្ដិ​ការសង្គ្រោះ​ពេល​មាន​គ្រោះ​ មហន្ដរាយ។ ត្រូវ​បាន​នាយ​​ឧ​ត្ត​ម​សេនីយ៍​ផុត​លេខ​ផ្កាយ​មាស៥ សម្តេច​​អគ្គ​មហា​សេនា​បតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ប្រកាស​ជូន​ដល់កង​យោធពល​ខេមរភូមិន្ទ នា​ព្រឹក​ថ្ងៃ​ទី២៤ ខែមករា ឆ្នាំ២០១៣។
ការងារ និង​ភារកិច្ច​សម្រាប់​កង​យោធពល​ខេមរភូមិន្ទអនុវត្តន៍​ ​ ដែល​បាន​ដាក់​ចេញ​​ដោយ​សម្តេច​អគ្គ​មហា​សេនាបតី​តេ​ជោ ហ៊ុន សែន នា​ថ្ងៃទី២៤ ខែ​មករា ឆ្នាំ២០១៣ នៅ​ក្នុង​ពិធី​បិទ​វគ្គ​បណ្តុះ​បណ្តាល​នាយ​ទាហាន​ជើងគោក​ជំនាន់​ទី១ នាយទាហាន​សកម្ម​ជំនាន់​ទី១៣ និង​សម្ពោ​ធ​ដាក់​ឲ្យ​ប្រើប្រាស់​នូវ​សមិទ្ធផល និង​ការ​បើក​ការដ្ឋាន​សាងសង់​បន្ត ​ជា​ជំនួយ​របស់​សាធារ​ណ​រដ្ឋ​ប្រជាមានិត​ចិន ​ ជូន​ដល់​វិទ្យាស្ថាន​កងទ័ពជើងគោកថ្លុក​តាសេក ឃុំ​ត្រែង​ត្រយឹ​ង ស្រុក​ភ្នំស្រួច ខេត្ត​កំពង់ស្ពឺ នោះ​រួមមាន៖
ទី១-កិច្ចការពារ​បូរណ​ភាព​ទឹកដីៈ នេះ​ជា​កាតព្វកិច្ច​របស់​ពល​រដ្ឋ​កម្ពុជា​គ្រប់រូប ​ហើយ​ដែល​កង យោធពលខេមរភូមិន្ទ ​និង​កង​នគរ​បាល​ជាតិ​ត្រូវ​ធ្វើជា​កម្លាំង​ស្នូល​ប្រឆាំង​សង្គ្រាម​ ឈ្លានពាន​ពី​គ្រប់មជ្ឈដ្ឋាន ដើម្បី​ការពារ​ទឹកដី ការពារ​ប្រជាជន ការពារ​ផលប្រយោជន៍​ប្រទេសជាតិ រក្សា​ស្ថិរភាព​នយោ​បាយ សន្ដិសុខ សណ្ដាប់ធ្នាប់​សង្គម ដែល​ទទួល​បាន​សន្ដិភាព​​រួច​មក​ហើយ និង​បង្ក​លក្ខណៈ​ដល់​ការអភិវឌ្ឍ​ប្រទេសជាតិ​លើ​គ្រប់​វិស័យ។ ប្រការ​នេះ​ទាមទារ​ឱ្យ​កង​យោ​ធ​ពល​ខេមរភូមិន្ទ​មាន​សមត្ថភាព មាន​វិជ្ជាជីវៈ​ច្បាស់លាស់ និង​ប្រកាន់ខ្ជាប់​នូវ​វិន័យ សីលធម៌ អត្ដ​ចរិត​គោរពបទ​ប្ប​ញ្ញ​ត្ដិ បទបញ្ជា​របស់កង​យោធពល​ខេមរភូមិន្ទ និង​គោរព​ច្បាប់​ផ្សេងៗ​ទៀត​របស់​រដ្ឋ ហើយ​ត្រូវ​យក​​ចិ​ត្ដ​ទុកដាក់​ពង្រឹងពង្រីកគុណភាព​របស់​កងទ័ព ​តាម​ផែនការ​កែ​ទ​ម្រង់​ដែល​បាន​ដាក់​ក្នុង​រយៈពេល ៥ឆ្នាំ​ម្ដង។ នៅ​ក្នុង​កាលៈទេសៈ​​ដែល​មាន​ការវិវាទ​ព្រំដែន ការ​គំរាម​ពី​សំណាក់​ឧក្រិដ្ឋ​កម្ម​ឆ្លងកាត់​ព្រំដែន គ្រឿងញៀន និង​អំពើភេរវកម្ម​អន្ដរ​ជាតិ នៅតែ​ជា​កង្វល់​ដ៏​ចម្បង​នៃ​សន្ដិសុខ​ជាតិ កង​យោធពល​ខេមរភូមិន្ទ​ចាំបាច់​ត្រូវតែ​ពង្រឹង​សមត្ថភាព​ការពារ​ព្រំដែន ដើម្បី​រក្សា​បាន​​នូវ​សន្ដិសុខ និង​ស្ថិរភាព ជាមួយ​ប្រទេសជិតខាង ដើម្បីធានា​សន្ដិសុខ​សម្រាប់​ប្រជាជាតិ​ទាំងមូល។ ការ​ពង្រឹង​វត្ដ​មាន​កម្លាំង​ការពារ​ព្រំដែន​ពុំ​មែន​មាន​ន័យ​ថា ជា​ការ​ប្រឈមមុខ​ណាមួយ​នោះ​ឡើយ។ ផ្ទុយទៅវិញ គឺ​ការ​យល់​ដឹង និង​ការ​កសាង​ទំនុក​ទុក​ចិត្ដ​ជាមួយ​ប្រទេសជិតខាង។ ម្យ៉ាងវិញទៀត ការ​មាន​ទំនាក់ទំនង​ជាប្រចាំ​ជាមួយ​ដៃគូ​ទាំង​ឡាយ​នឹង​អាចជួយ​បង្កើន​ទំនុក​ ចិត្ដ និង​សម្ព័ន្ធភាព​បាន​កាន់តែ​ល្អ​ប្រសើរ​ថែមទៀត។ ជាមួយ​នោះ​ការងារ​បោះ​បង្គោល​ខណ្ឌសីមា​ព្រំដែន​គោក និង​ការកំណត់​ព្រំដែន​សមុទ្រ​រវាង​ព្រះ​រាជា​ណា​ចក្រ​កម្ពុជា និងសាធារណរដ្ឋ​សង្គមនិយម​វៀតណាម ខ្ញុំ​បាន​ធ្វើ​អធិប្បាយ និង​ផ្ដល់​ការ​បំភ្លឺ​នៅ​សម័យប្រជុំ​ពេញអង្គ​រដ្ឋសភា កាលពី​ថ្ងៃទី៩ ខែ​សីហា ឆ្នាំ២០១២ រួច​មក​ហើយ សង្ឃឹមថា​បង​ប្អូន​នឹង​យល់​ច្បាស់ គ្មាន​ស្រ​ពិចស្រពិល​ទៀត​ឡើយ។ ទន្ទឹម​នឹង​នេះ ក្រសួងការពារជាតិ និង​អគ្គ​មេ​បញ្ជា​ការ​​ត្រូវ​យក​ឯកសារ​នេះ ដាក់បញ្ចូល​ក្នុង​កម្មវិធី​បណ្ដុះបណ្ដាល​គ្រប់​កម្រិត និង​ផ្ដល់​ការ​បង្រៀន​ឱ្យ​យោធិន​កាន់តែ​យល់​ច្បាស់​ថែម​ទៀត។
ទី២-សន្ដិសុខ​មនុស្សៈ ការលើក​ទិសដៅ​គិតគូរ​អំពី​សន្ដិសុខ​មនុស្ស គឺជា​ទស្សនាទាន​កំពុង​រីក​ដុះដាល​លើ​ចក្ខុវិស័យ​លំដាប់​អន្ដរជាតិ តំបន់ និង​ក្នុងប្រទេស ព្រោះ​ជាការ​រីកចម្រើន និង​ការ​អភិវឌ្ឍ ដែល​ពិភពលោក​ក្លាយ​ទៅ​ជា​ទីតាំង​រាបស្មើ នោះ​នឹងមាន​ការគិតគូរ​កាន់​តែ​ខ្លាំង​ឡើង អំពី​សិទ្ធិមនុស្ស និង​សេរីភាព​នានា។ ចំពោះ​កម្ពុជា សន្ដិសុខ​មនុស្ស​គឺជា​កត្ដា​គន្លឹះ​ដែល​ត្រូវ​យក​ចិ​ត្ដ​ទុកដាក់​ឱ្យ​បាន​ មុតមាំ​បំផុត។ ជា​សត្យានុម័ត​មនុស្ស​ចាំបាច់​ត្រូវ​ទទួលបានការ​ការពារ​ពី​ការ​គំរាម​ដោយ​ ជំងឺ ការ​អត់​ឃ្លាន ភាព​គ្មាន​ការងារ​ធ្វើ អំពើ​ហិង្សា​ក្នុង​គ្រួសារ និង​អ្នកដទៃ ការ​គៀបសង្កត់​ផ្នែក​នយោបាយ ស្មារតី ជនជាតិ សាសនា និង​មហន្ដរាយ​ផ្នែក​បរិស្ថាន​ជាដើម ។ល។ ដែល​តែង​កើតមាន​សម្រាប់​ការរស់នៅជាប្រចាំ​ថ្ងៃ។ ក្នុង​ខ្លឹមសារ​នេះ សន្ដិសុខ​មនុស្ស​ពុំ​មែន​ត្រឹមតែ​ជា​ការ​ព្រួយបារម្ភ​អំពី​ការ​គំរាម​ ដោយអាវុធ​នោះ​ទេ ប៉ុន្ដែ​គឺជា​កង្វល់​អំពី​ការរស់នៅ និង​សេចក្ដីថ្លៃថ្នូរ​ទៀតផង។ បញ្ហា​នេះ រាជរដ្ឋាភិបាល កម្ពុជា​បាន​អនុវត្ដ​ដោយមាន​ប្រសិទ្ធភាព​នៅ​ក្នុង​ការ​បញ្ចប់​ សង្គ្រាមស៊ីវិល ហើយ​កំពុង​ត្រូវ​បាន​អនុវត្ដជា​បន្ដ​រហូតមកដល់​បច្ចុប្បន្ន និង ទៅ​អនាគត។
ទី៣-សន្ដិសុខ​ដែនសមុទ្រៈ សមុទ្រ​កម្ពុជា ​គឺជា​ច្រក​ចេញ​ចូល​នៃ​ពាណិជ្ជកម្ម​ជាមួយ​ប្រជាជាតិ​ជុំវិញ​ពិភព​លោក។ ឆ្នេរ​កោះ​ទាំងឡាយ​ជា​គោលដៅ​សេដ្ឋកិច្ច និង​ជា​តំបន់​ទាក់ទាញ​វិនិយោគ​បរទេស​ផង​ដែរ។ សក្ដានុពល​សេដ្ឋកិច្ច​មាន​ភោគផល​ជាច្រើន​នៅ​សមុទ្រ ក្នុង​នោះ​រួមមាន​សារ​ធាតុ​សរីរាង្គ សារ​ធាតុ​អសរីរាង្គ រួម​ទាំង​ប្រេង និង​ឧស្ម័ន​ធម្មជាតិ ដែល​អាច​នឹង​ទាញ​យក​បាន​ជា​ប្រយោជន៍​សម្រាប់​ខឿន​សេដ្ឋកិច្ច​ជាតិ។ ក្នុងន័យ​នេះ កិច្ចការពារ​ដែនសមុទ្រ គឺជា​កាតព្វ​កិច្ច​របស់​កង​យោធ​ពល​ខេ​មរភូមិន្ទ និង​ស្ថាប័ន​ពាក់ព័ន្ធ​ដទៃទៀត​របស់​រាជរដ្ឋាភិបាល ប៉ុន្ដែ​ការ​ទទួល​ខុស​ត្រូវ​ជា​ស្នូល គឺ​កងទ័ព​ជើងទឹក​ត្រូវ​ថែរក្សា​ការពារ​បូរណភាព​ដែនសមុទ្រ សន្ដិ​សុខ​សមុទ្រ ដើម្បី​ទប់ស្កាត់​បទល្មើស​នានា មាន​ជាអាទិ៍​​ការ​នេសាទ​ខុសច្បាប់ ការ​រត់​ពន្ធ​ទំនិញ រត់ពន្ធ​មនុស្ស ជួញដូរ​គ្រឿ​ង​ញៀន អន្ដោ​ប្រវេ​ស​ខុសច្បាប់ និង​ប្លន់​ប្រដាប់​អាវុធ​នៅ​ដែន​សមុទ្រ។ល។ ក្រៅ​ពី​នេះកត្ដា​បរិស្ថាន​ក៏​ជា​ប្រភព​ដែល​ត្រូវ​គ្រប់គ្រង​ថែរក្សា​ឱ្យ​ បាន​គង់វង្ស​ផង​ដែរ ព្រោះថា​វា​អាច​នឹង​កើតមាន​តាមរយៈការ​បង្ក​ឡើង​ដោយ​មនុស្ស និង​បញ្ហា​ធម្មជាតិ​ដែល​​មិន​អាច​គិតទុក​ជាមុន​បាន ដូច្នេះ​កិច្ច​សហប្រតិបត្ដិ​ការ​​ជាមួយ​បណ្ដា​ប្រទេសក្នុង​តំបន់ និង​​ប្រទេស​ជិត​ខាង​ក្នុង​ការ​ធ្វើ​ល្បាត​រួមគ្នា​លើ​ផ្ទៃ​សមុទ្រ​គឺជា​ មធ្យោបាយ​ដ៏​ល្អដើម្បី​កាត់ បន្ថយ​​វិបត្ដិ និង​បង្ក្រាប​សកម្មភាព​ល្មើស​ច្បាប់​ផ្សេងៗ និង​ការពារ​ការ​ជ្រៀតចូល​នៃ​អំពើ​ភេរវ​កម្ម និងឧក្រិដ្ឋ​កម្ម​ឆ្លងដែន ដើម្បី​សន្ដិសុខ​ក្នុង​ប្រទេសជាតិ។
ទី៤-ការ​ធ្វើ​សមាហរណ​កម្ម​កងយោធពល​ខេមរភូមិន្ទនៅក្នុង​តំបន់ និង​អន្ដរជាតិៈ ក្នុង​កាលៈ​ទេសៈដែល​ប្រទេស​កម្ពុ​ជា​មាន​សន្ដិភាព កងយោធពល​ខេមរភូមិន្ទ​បាន​ផ្ដោត​ការ​យក​ចិ​ត្ដ​ទុក​ដាក់​ទៅលើ​ការធ្វើ​ សមាហរណកម្ម​ទៅ​ក្នុង​តំបន់ និង​អន្ដរជាតិ​នៅ​គ្រប់​វិស័យ ជាពិសេស​វិស័យ​សន្ដិសុខ​ត្រូវ​ពង្រឹង ទំនាក់ទំនង និង​កិច្ច​សហប្រតិបត្ដិ​ការ​ទ្វេភាគី ពហុភាគី ហើយ​ខិតខំ​រួមចំណែក ដើម្បី​ធ្វើ​ឱ្យ​យន្ដការសន្ដិសុខ​ទាំងឡាយ​របស់​អាស៊ាន​ក្លាយទៅជា​យន្ដការ​ អនុវត្ដ​ដ៏​មាន​ប្រសិទ្ធភាព នៅ​ក្នុង​ការ​ដោះ​ស្រាយ​វិបត្ដិ និង​បញ្ហាផ្សេងៗ​នៅ​ក្នុង​តំបន់។ គោលដៅ​សំខាន់ គឺ​ការ​បង្កើន​ប្រសិទ្ធភាព​របស់​យន្ដការសន្ដិសុខ​អាស៊ាន និង​ការ​កសាង​សហគមន៍ សន្ដិសុខ​អាស៊ាន​ឱ្យ​បាន​នៅ​ឆ្នាំ២០១៥។ ក្នុង​ការ​កសាងសន្ដិភាព​ពិភពលោក​ចាប់​តាំង​ពី​​ខែ​មេសា ឆ្នាំ២០០៦ មក​កង​យោធពល​ខេមរភូមិន្ទ​ចាប់ផ្ដើម​ប្រតិ​ប​ត្ដិការ​ដោះមីន​មនុស្សធម៌ និង​បំពេញភារកិច្ច​ជា​អ្នកសង្កេតការណ៍​យោធា​ប្រកប​ដោយ​ប្រសិទ្ធភាព និងជោគជ័យ​នៅ​ប្រទេស​ស៊ូដង់​នៃ​ទ្វីបអាហ្វ្រិក ក្នុង​បេសកកម្ម​រក្សា​មនុស្សធម៌​កង​រក្សា​សន្ដិភាព​របស់អង្គការ​សហ​ប្រជា​ ជាតិ។ 
តទៅ​អនាគត​យើង​នៅតែ​បន្ដ​ការងារ​ទៀត ហើយ​នឹង​អាច​ត្រៀម​រៀបចំពង្រឹង​លក្ខណៈ​សម្បត្ដិ និង​គុណ​ភាព​ផ្សេងៗឱ្យមាន​វិជ្ជាជីវៈ​ច្បាស់លាស់ចំពោះ​ភារកិច្ច​នានា ​ដែលកំពុង​តម្រូវ​ការ​​ពី​អន្ដរជាតិ ​គឺ​រៀបចំ​បេក្ខភាព​មន្ដ្រី​ជាន់ខ្ពស់ ក្នុង​ការងារ​រក្សា​សន្ដិភាព​នៅ​អង្គការ​សហ​ប្រ ជា​​ជាតិ និង​បេក្ខជន​ផ្សេងៗ​ទៀត។
ទី៥-កសាង​សមត្ថភាព​សម្រាប់​ប្រតិ​ប​ត្ដិ​ការសង្គ្រោះ​ពេល​មាន​គ្រោះ​មហន្ដរាយៈ គ្រោះមហ ​ន្ដ​រាយធម្មជាតិ​អាច​នឹង​កើតឡើង​ជាយថាហេតុ និង​បង្ក​ឱ្យ​ខូចខាត​មាន​ទំហំធំៗជាច្រើន ដោយ​មិនអាច​គិតទុកជាមុន​បានឡើយ។ អ្នកវិទ្យាសាស្ដ្រ​ភាគច្រើន​បាន​សម្ដែង​នូវ​ការ​ព្រួយ​បារម្ភ​អំពី​ ការផ្លាស់ប្ដូរ​ធាតុអាកាស​នា​ពេល​អនាគត​។ ហេតុនេះតម្រូវ​ឱ្យ​មាន​​ការ​ឆ្លើយ​តប​ក្នុង​ប្រតិ​ប​ត្ដិ​ការ​​នេះ ឱ្យ​បាន​ទាន់​ពេលវេលា​ពី​សំណាក់​កងកម្លាំងប្រដាប់អាវុធ និង​មានការ​សហការ​រវាង​ស្ថាប័ន​ស៊ីវិល។
ទាក់​ទង​នឹង​ភារកិច្ច​ទី៥នេះ សម្តេច​តេជោ​នាយករដ្ឋមន្ត្រី​មានប្រសាសន៍ឲ្យ​ ដឹងថា កងយោធ​ពល​​ខេមរភូមិន្ទ បាន​អនុវត្ដ​រួចមកហើយ​ក្នុង​ប្រតិ​ប​ត្ដិ​ការសង្គ្រោះ​ដូចជា​គ្រោះ​ទឹក​ ជំនន់ គ្រោះ​រាំងស្ងួត គ្រោះ​អគ្គីភ័យ ការ​ដោះ​មីន​រំដោះ​ដី ស្រែ​ជូន​ប្រជាពលរដ្ឋ​សម្រាប់​បង្កបង្កើនផល និង​ការ​បញ្ជូន​​ក្រុម​គ្រូពេទ្យ​​ស្ម័គ្រចិត្ដ ​ចុះ​ពិនិត្យ​ព្យាបាលជំងឺ​ជូន​ប្រជាជន​នៅ​តាម​ជនបទ​ដាច់​ស្រ​យាល ព្រមទាំង​បាន​ចាត់តាំង​តំណាង​ក្រសួង​ការពារជាតិ ចូលរួម​ក្នុង​គណៈកម្មាធិការ​ជាតិ​សង្គ្រោះ​​គ្រោះ​មហន្ដរាយ ដើម្បី​ងាយស្រួល​ក្នុងការ​ដឹកនាំ​បញ្ជាបណ្ដា​អង្គភាព​ធ្វើ​ប្រតិ​ប​ត្ដិ​ការ ​សង្គ្រោះ​បាន​ទាន់​ពេល​វេលា​៕