លោក ហ្សាង ម៉ីងប៉ី (Zhang Mingpei) ប្រធានមន្ទីរកសិកម្មខេត្តគ័ងស៊ី នៃសាធារណរដ្ឋប្រជាមានិតចិន បានដឹកនាំគណៈប្រតិភូ ដែលរួមមានអ្នកជំនាញការខាងកសិកម្ម អ្នកវិនិយោគលើវិស័យកសិកម្ម និងក្រុមហ៊ុនផលិតផលិតផលកសិកម្ម បានមានប្រសាសន៍ជម្រាបជូនសម្តេចតេជោនាយករដ្ឋមន្ត្រីថា ក្នុងដំណើរទស្សនកិច្ចរបស់លោកមកកាន់ព្រះរាជាណាចក្រកម្ពុជានៅពេលនេះ គឺដើម្បីអនុវត្តន៍នូវរាល់កិច្ចការទាំងឡាយ ដែលថ្នាក់ដឹកនាំនៃប្រទេសទាំងពីរ (ចិន-កម្ពុជា) បានឯកភាពគ្នាក្នុងពេលកន្លងមក។ លោក ហ្សាង ម៉ីងប៉ី បានមានប្រសាសន៍បែបនេះ ក្នុងជំនួបសម្តែងការគួរសម និងពិភាក្សាការងារ ជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី៨ ខែមករា ឆ្នាំ២០១៣ នៅវិមានសន្តិភាព រាជធានីភ្នំពេញ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រី បានមានប្រសាសន៍ឲ្យដឹងថា លោក សាង ម៉ីងប៉ី (Zhang Mingpei) បានជំរាបជូនសម្តេចតេជោនូវគំរោងសំខាន់ៗចំនួន៧ ដែលនឹងត្រូវអនុវត្តន៍ ក្នុងនោះរួមមាន៖
ទី១-គំរោងឧស្ម័នធម្មជាតិនៅតាមជនបទ។
ទី២-រោងចក្រម៉ាស៊ីនកិនស្រូវដែលកំពុងតែដាក់ឲ្យប្រើប្រាស់។
ទី៣-គំរោងការពារ និងកំចាត់សត្វល្អិតលើវិស័យកសិកម្ម។
ទី៤-គំរោងពិនិត្យគុណភាពអនាម័យម្ហូមអាហារ។
ទី៥-គំរោងអភិវឌ្ឍន៍លើវិស័យកសិកម្មដាំដុះលើផ្ទៃដី ដែលក្រុមហ៊ុនចិនទទួលបាន។
ទី៦-មជ្ឈមណ្ឌលកសិកម្មគំរូ។
ទី៧-ការបណ្តុះបណ្តាលលើផ្នែកកសិកម្ម ក្នុងនោះមានមួយផ្នែកកំពុងតែដំណើរការ និងមួយផ្នែកទៀតកំពុងតែជំរុញដំណើរការរបស់ខ្លួនទៅមុខ។
ឯកឧត្តម អ៊ាង សុផល្លែត បានមានប្រសាសន៍ឲ្យដឹងថា លោក ហ្សាង ម៉ីងប៉ី ក៏បានជំរាបជូនសម្តេចតេជោនាយករដ្ឋមន្ត្រី អំពីកិច្ចពិភាក្សាជាមួយឯកឧត្តម ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលបានឈានទៅចុះលើអនុស្សារណៈយោគយល់គ្នាស្តីពីការជំរុញកិច្ចសហប្រតិបត្តិការផ្នែកទំនាក់ទំនង និងកសិកម្មនៃប្រទេសទាំងពីរឲ្យកាន់តែរឹងមាំ ឡើងថែមទៀត។ ខេត្តគ័ងស៊ីមានបំណងជួយដល់ប្រទេសកម្ពុជា ដោយគ្មានលក្ខខ័ណ្ឌខាងបទពិសោធន៍ និងបច្ចេកវិទ្យានៃវិស័យកសិកម្មផងដែរ។ ជាមួយគ្នានេះ លោកហ្សាង ម៉ីងប៉ី ក៏បាននាំមកជាមួយនូវអង្ករចំនួន ១០០តោន ជូនដល់សម្តេចតេជោនាយករដ្ឋមន្ត្រីផងដែរ។
ឯកឧត្តម អ៊ាង សុផល្លែត មានប្រសាសន៍ឲ្យដឹងថា ជាការឆ្លើយតបសម្តេចតេជោនាយករដ្ឋមន្ត្រីបានថ្លែងនូវអំណរគុណ ចំពោះថ្នាក់ដឹកនាំខេត្តគ័ងស៊ី ដែលបានឧបត្ថម្ភនូវអង្ករចំនួន ១០០តោន ដល់កម្ពុជា និងបានសំដែងនូវសេចក្តីសប្បាយរីករាយចំពោះការរីកចម្រើនលើទំនាក់ទំនងកិច្ចសហប្រតិបត្តិការរវាងខេត្តក្វាងស៊ី និងកម្ពុជា ដែលជាកត្តាជំរុញនូវទំនាក់ទំនងល្អរវាងប្រទេសយើងទាំងពីរ (កម្ពុជា-ចិន)។
ទន្ទឹមនឹងនេះ សម្តេចតេជោក៏បានស្នើឲ្យខេត្តក្វាងស៊ីធ្វើយ៉ាងណាពង្រឹងនូវទំនាក់ទំនង និងកិច្ចសហប្រតិបត្តិការក្នុងការផ្ទេរបច្ចេកវិទ្យា ក៏ដូចជាជំរុញអ្នកវិនិយោគ មកវិនិយោគនៅកម្ពុជា ជាពិសេសទៅលើការកែច្នៃ និងសំភារៈកសិកម្ម។ ដោយឡែកអង្ករចំនួន ១០០តោន សម្តេចតេជោនាយករដ្ឋមន្ត្រី នឹងប្រគល់ជូនដល់កាកបាទក្រហមកម្ពុជា ដើម្បីបំរើដល់សកម្មភាពមនុស្សធម៌ ក្នុងការជួយដល់ប្រជាពលរដ្ឋដែលងាយរងគ្រោះ៕