នៅទីស្តីការគណៈរដ្ឋមន្រ្តី នារសៀលថ្ងៃទី ១៣ ខែ កុម្ភៈ ឆ្នាំ ២០១៣ ក្រោមអធិបតីភាព ឯកឧត្តមបណ្ឌិតសភាចារ្យ សុខ អាន
ឧបនាយករដ្ឋមន្រ្តី
រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
មានប្រារព្ធពិធីចុះហត្ថលេខាលើកិច្ចព្រមព្រៀងមួយ
រវាងរាដ្ឋាភិបាលនៃព្រះរាជាណាចក្រកម្ពុជា
និងរដ្ឋាភិបាលសាធារណរដ្ឋសហព័ន្ធអាល្លឺម៉ង់
សម្រាប់គាំទ្រកិច្ចសហប្រតិបត្តិការបោសសំអាតមីនដោយអង្គភាព
សកម្មភាពកំចាត់មីនកម្ពុជា (ស៊ីម៉ាកៈ CMAC) ក្នុងឆ្នាំ ២០១៣
នៅក្នុងខេត្តសៀមរាប និងខេត្តឧត្តមរមានជ័យ ។
កិច្ចព្រមព្រៀងដែលមានទឹកប្រាក់ចំនួន ១.១១២.៥០០យូរ៉ូ (ប្រហែល ១.៤៣លានដុល្លារសហរដ្ឋអាមេរិក) ត្រូវបានចុះហត្ថលេខាដោយ ឯកឧត្តម ប្រាក់ សុខុន រដ្ឋមន្រ្តីអមនាយករដ្ឋមន្រ្តី និងជាអនុប្រធានអជ្ញាធរកម្ពុជា គ្រប់គ្រងសកម្មភាពកំចាត់មីន និងជួយសង្រ្គោះជនពិការដោយសារមីន ជាមួយឯកឧត្តម វ៉ុលហ្កែង ម៉ូសឺរ ( Wolfgang Mosez ) ឯកអគ្គរដ្ឋទូតវិសាមញ្ញ និងពេញ សមត្ថភាព សាធារណរដ្ឋសហព័ន្ធអាល្លឺម៉ង់ ប្រចាំព្រះរាជាណាចក្រកម្ពុជា ។
ឯភារកិច្ចបោសសំអាតមីននៅក្នុងទឹកដីនៃខេត្តទាំង ២ខាងលើ គឺអង្គភាពទី ៦ នៃមជ្ឈ-មណ្ឌលសកម្មភាពកំចាត់មីនកម្ពុជា (ស៊ីម៉ាក់) ។
ជាមួយនឹងការថ្លែងអំណរគុណចំពោះរដ្ឋាភិបាល និងប្រជាជនអាល្លឺម៉ង់ ឯកឧត្តមបណ្ឌិតសភាចារ្យ សុខ អាន ការកត់
សម្គាល់ថាពិធីចុះហត្ថលេខាលើកិច្ចព្រមព្រៀង
សម្រាប់គាំទ្រកិច្ចសហប្រតិបត្តិការបោសសំអាតមីន ក្នុងឆ្នាំ ២០១៣
នៅក្នុងខេត្តសៀមរាប និងខេត្តឧត្តរមានជ័យ
ថាជាការឆ្លុះបញ្ចាំងអំពីការបន្តគាំទ្រផ្តល់ជំនួយមនុស្សធម៌របស់
ប្រទេសអាល្លឺម៉ង់ ក្នុងសកម្មភាពកំចាត់មីន
និងអភិវឌ្ឍន៍សេដ្ឋកិច្ចរបស់ព្រះរាជាណាចក្រកម្ពុជា ។
ឯកឧត្តមបណ្ឌិត សុខ អាន មានប្រសាសន៍ថា
សម្រាប់រាជរដ្ឋាភិបាលកម្ពុជា
សកម្មភាពកំចាត់មីនមិនគ្រាន់តែទាក់ទងនឹងបញ្ហាសន្តិសុខប៉ុណ្ណោះទេ
ប៉ុន្តែវាជាកត្តាដ៏មានអត្ថន័យ
និងមានសារៈសំខាន់ក្នុងការកាត់បន្ថយភាពក្រីក្រ
និងបង្កើនការអភិវឌ្ឍន៍ ។ ព្រោះថា ដីមិនអាចត្រូវបង្កបង្កើនផលបាន
និងមិនអាចបង្កើតនូវការអភិវឌ្ឍន៍សេដ្ឋកិច្ចបានឡើយ
ប្រសិនបើផ្ទៃដីនៅបន្សល់គ្រាប់មីន យុទ្ធភ័ណ្ឌមិនទាន់ផ្ទុះ
និងកាកសំណល់ពីសង្រ្គាម ។
ឯកឧត្តមបណ្ឌិត សុខ អាន បានមានប្រសាសន៍បញ្ជាក់ថា
យើងត្រូវបន្តរំដោះផ្ទៃដីអំពីមីនដើម្បីធ្វើឲ្យប្រាកដថា
ប្រជាជនរបស់យើងអាចប្រើប្រាស់ដីសម្រាប់ដាំដុះ និងធ្វើកសិដ្ឋានបាន
ដោយសុវត្ថិភាព ។ ទន្ទឹមគ្នានោះដែរ
យើងត្រូវបង្កើនល្បឿនសហប្រតិបត្តិការបោសសំអាតមីនក្នុង
តំបន់អាទិភាពមួយចំនួនទៀត
ដូចជាតំបន់នៅជុំវិញប្រាសាទជាប្រវត្តិសាស្រ្ត និងតំបន់ដែលមានសារៈ
សំខាន់ខាងទេសចរណ៍ដទៃទៀត
ក្នុងគោលបំណងដើម្បីជម្រុញការអភិវឌ្ឍន៍សេដ្ឋកិច្ចសង្គមរបស់យើង ។
ឯកឧត្តម ប្រាក់ សុខុន រដ្ឋមន្រ្តីអមនាយករដ្ឋមន្រ្តី
និងជាអនុប្រធានអជ្ញាធរកម្ពុជា គ្រប់គ្រងសកម្មភាពកំចាត់មីន
និងជួយសង្រ្គោះជនពិការដោយសារមីន បានបញ្ជាក់ថា៖
«គម្រោងនេះនឹងជួយឲ្យស៊ីម៉ាក់អាចបោសសំអាតផ្ទៃដី បានចំនួន ៩២០ហិកតា
ដែលនឹងផ្តល់ផលប្រយោជន៍ដល់ប្រជាជនដោយផ្ទាល់ចំនួន៩៥០គ្រួសារ
និងមិនផ្ទាល់ ៥.០៤១គ្រួសារ» ។
ឯកឧត្តម ប្រាក់ សុខុន បានថ្លែងថា
គម្រោងដែលចុះហត្ថលេខានៅពេលនេះ គឺមានន័យ
យ៉ាងជ្រាលជ្រៅបំផុតសម្រាប់ពលរដ្ឋកម្ពុជា
ពិសេសអ្នកនៅក្នុងខេត្តសៀមរាប និងឧត្តរមានជ័យ
អាចរស់នៅបានដោយគ្មានការភ័យខ្លាចនិងគ្មានគ្រោះថ្នាក់ដោយសារគ្រាប់មីន ។
មានប្រសាសន៍ក្នុងពិធីចុះហត្ថលេខានេះដែរ
ជាមួយនឹងការទទួលស្គាល់អំពីការយកចិត្តទុកដាក់ខ្ពស់របស់រាជ
រដ្ឋាភិបាលកម្ពុជាក្នុងការបោសសំអាតមីន និងយុទ្ធភ័ណ្ឌមិនទាន់ផ្ទុះ
ដែលជាកាកសំណល់នៃអតីតកាលមួយដ៏អភ័ព្វ
មានទម្ងន់យ៉ាងធ្ងន់ធ្ងរលើសន្តិភាព
និងសុភមង្គលនៃប្រជាជនក្នុងតំបន់ពាក់ព័ន្ធ ឯកឧត្តម វ៉ុលហ្កែង ម៉ូសឺរ ( Wolfgang Mosez
) បានមានប្រសាសន៍ថា
ឯកឧត្តមមានមោទនភាពដោយប្រទេសអាល្លឺម៉ង់កំពុងតែរួមវិភាគទានជាមួយ
នឹងបណ្តាប្រទេសជាមិត្តដទៃទៀតក្នុងការជួយកំចាត់មីននៅក្នុងប្រទេស
កម្ពុជា ។
ចាប់ពីឆ្នាំ ១៩៩៩មក រដ្ឋាភិបាលនៃសាធារណរដ្ឋសហព័ន្ធអាល្លឺម៉ង់
បានផ្តល់ថវិកាប្រមាណជាង
១៥លានដុល្លារអាមេរិកដល់កម្ពុជាសម្រាប់គាំទ្រការបោសសំអាតមីននៅ
ក្នុងខេត្តសៀមរាប និងឧត្តរមានជ័យ ។
តាមរបាយការណ៍របស់ស៊ីម៉ាក់ចេញដើមខែ មករា ឆ្នាំនេះបានឲ្យដឹងថា
ស៊ីម៉ាក់បោសសំអាតបានផ្ទៃដី ៣៨.៧៣៦ហិកតា បានរកឃើញ
និងបំផ្លាញចោលគ្រាប់មីនប្រឆាំងមនុស្សប្រមាណ ៤ម៉ឺនគ្រាប់
និងគ្រាប់មីនប្រឆាំងនឹងរថក្រោះចំនួន ៦៦០គ្រាប់
និងរកឃើញយុទ្ធភ័ណ្ឌមិនទាន់ផ្ទុះប្រមាណជាង ១៧ម៉ឺនគ្រាប់ ។
សូមបញ្ជាក់ថា កាលពីខែ វិច្ឆិកា ឆ្នាំ ២០១១ ព្រះរាជាណាចក្រកម្ពុជា
ក្នុងនាមជាម្ចាស់ផ្ទះបានរៀបចំដោយជោគជ័យ នៅកិច្ចប្រជុំលើកទី១១
នៃរដ្ឋភាគីនៃអនុសញ្ញាហាមឃាត់គ្រាប់មីនប្រឆាំងមនុស្ស
ដែលមានអ្នកចូលរួមប្រមាណ ៩០០នាក់ មកពីជាង ១៥០ប្រទេស
និងអង្គការអន្តរជាតិមួយចំនួនទៀត ដែលជាឱកាសសម្រាប់កម្ពុជា
ក៏ដូចជាបណ្តាប្រទេសដែលប៉ះពាល់ដោយសារគ្រាប់មីន
បង្ហាញនូវករណីប្រតិបត្តិការមនុស្សធម៌បោសសំអាតមីនក្នុងកម្រិត
អន្តរជាតិ និងផ្លាស់ប្តូរបទពិសោធន៍ក្នុងសកម្មភាពកំចាត់មីន
ដើម្បីសម្រេចនូវគោលដៅរួមក្នុងការធ្វើឲ្យពិភពលោករួចផុតពីផលប៉ះពាល់
នៃគ្រាប់មីន ៕