កម្ពុជាបាននិងកំពុងត្រៀមរៀបចំសម័យប្រជុំពេញអង្គលើកទី៣៧ នៃគណៈកម្មាធិការបេតិកភ័ណ្ឌពិភពលោកយ៉ាងមមាញឹក មុននឹងឈានដល់សម័យប្រជុំជាផ្លូវការដែលនឹងប្រព្រឹត្តិទៅពីថ្ងៃទី ១៦ ដងល់ថ្ងៃទី ២៧ ខែមិថុនា ឆ្នាំ ២០១៣។
ឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្រ្តី ក្នុងនាមប្រធានអនុគណៈកម្មការព័ត៌មាន និងសារគមនាគមន៏បានដឹកនាំប្រជុំលើកទី២ ត្រៀមរៀបចំការងារព័ត៌មាន ផលិត និងផ្សព្វ ផ្សាយកាលពីថ្ងៃទី០១ ខែមីនា ឆ្នាំ ២០១៣ នៅទីស្តីការគណៈរដ្ឋមន្រ្តី។
អញ្ជើញចូលរួមនៅក្នុងកិច្ចប្រជុំនេះផងដែររួមមាន ឯកឧត្តម លោកជំទាវ ប្រធាន អនុប្រធាន អគ្គលេខាធិការ នៃលេខាធិការដ្ឋាន អនុគណកម្មាការ និងគណៈកម្មាធិការជាតិ UNESCO ឯកឧត្តម លោកជំទាវ តំណាងសាលារាជធានីភ្នំពេញ តំណាងសហភាពសហព័ន្ធយុជនកម្ពុជា និងតំណាងបណ្តាញផ្សព្វផ្សាយ វិទ្យុ និងទូរទស្សន៍ក្នុងស្រុក។
ជាកិច្ចចាប់ផ្តើម ឯកឧត្តមស្វាយ ស៊ីថា បានលើកឡើងថា អនុគណៈកម្មាការព័ត៌មាន និងសារគមនាគមន៏ នឹងគ្របដណ្តប់ការងារលើការដ្ឋានធំៗចំនួនពីរគឺ៖
ការរដ្ឋានទី១ វេទិការអន្តរជាតិស្តីពីបេតិកភ័ណ្ឌពិភពលោកដែលនឹងប្រព្រឹត្តិទៅពីថ្ងៃទី០៩ ដល់ ថ្ងៃទី១៧ ខែមិថុនា ឆ្នាំ ២០១៣ នៅទីក្រុងសៀមរាប។ តំណាងយុវជនអន្តរជាតិ នឹងចូលរួមក្នុងវេទិការបើកជាផ្លូវការសម័យប្រជុំពេញអង្គលើកទី ៣៧ នៃគណៈកម្មាធិការបេតិកភ័ណ្ឌពិភពលោកនៅទីក្រុងភ្នំពេញ ដោយលើកឡើងពីអ្វីដែលយុវជន បានរៀនសូត្រពីមនុស្សចាស់ លើការងារវប្បធម៌ជាពិសេសបេតិកភ័ណ្ឌពិភពលោក ដើម្បីបន្តវេន។
ការដ្ឋានទី២ គឺសម័យប្រជុំពេញអង្គលើកទី៣៧ នៃគណៈកម្មាធិការបេតិកភ័ណ្ឌពិភពលោក ដែលនឹងប្រព្រឹត្តិទៅពីថ្ងៃទី១៦ ដល់ថ្ងៃទី២៧ ខែមិថុនា ឆ្នាំ ២០១៣ នៅទីក្រុងភ្នំពេញ និងនៅទីក្រុងសៀមរាប។ លើសពីនេះទៀតឯកឧត្តម ប្រធានអនុគណៈកម្មាការព័ត៌មាន និងសារគមនាគមន៏ ក៏បានរំលឹកឡើងវិញផងដែរបន្ទាប់ពីកិច្ចប្រជុំលើកទី១ កាលពីថ្ងៃទី ១៩ ខែកុម្ភៈឆ្នាំ ២០១៣ នូវអ្វីដែលបានឯកភាពរួចហើយ រួមមាន៖
-ក្រសួងព័ត៌មានគួរតែទទួលបន្ទុកចុះបញ្ជី និងចេញប័ណ្ណសារព័ត៌មានដោយសហការជាមួយ NIDA អាជ្ញាធរអគ្គលេខាធិការដ្ឋានអាជ្ញាធរជាតិទទួល បន្ទុកកិច្ចការអភិវឌ្ឍន៍ វិស័យបច្ចេកវិទ្យាគមនាគមន៍ព័ត៌មានវិទ្យានៃទីស្តីការគណៈរដ្ឋមន្រ្តី។
-ទូរទស្សន៍ជាតិកម្ពុជា គួរតែអ្នកទទួលខុសត្រូវការងារផ្សាយផ្ទាល់ពីសម័យប្រជុំពេញអង្គលើកទី៣៧ និងគ្របដណ្តប់ព័ត៌មានទាំងស្រុងលើសកម្មភាពយុវជន អន្តរជាតិនៅសៀមរាប មុននឹងផលិតចេញបទយកការណ៏ខ្លីរយៈពេល៥នាទី ដើម្បីយុវជនអន្តរជាតិចាក់បង្ហាញនាឱកាសបើកសម័យប្រជុំពេញអង្គ។ គួរតែទូរទស្សន៍ក្នុងស្រុកដទៃទៀតផ្សាយបន្តផ្ទាល់ពីទូរទស្សន៍ជាតិ។ វិទ្យុជាតិអាចនឹងធ្វើការផ្សាយផ្ទាល់ផងដែរពីព្រឹត្តិការណ៏ជាសាកលនេះដោយសហការណ៏ជាមួយវិទ្យុដទៃទៀតដើម្បីទទួលបានការគ្របដណ្តប់ផ្សាយនៅទូទាំងប្រទេស។
-ឯកឧត្តម ម៉ៅ អាយុទ្ធ រដ្ឋលេខាធិការ ក្រសួងព័ត៌មានគួរតែ ទទួលបន្ទុករៀបចំបើកវគ្គបណ្តុះបណ្តាលរយៈពេល ១ ថ្ងៃ នៅទីស្តីការគណៈរដ្ឋមន្រ្តីជូនដល់ពិធីករ ពិធីការិនី និងអ្នកសារព័ត៌មាន ដើម្បីមានចំណេះដឹងទូទៅនិងមូលដ្ឋានរឹងមាំដើម្បីឈានទៅអត្ថាធិប្បាយ ព្រឹត្តិការណ៏ នៃសម័យប្រជុំពេញអង្គដែលកម្ពុជាជាម្ចាស់ផ្ទះ។
-ជាចុងក្រោយអង្គប្រជុំក៏បានបំភ្លឺ និងសម្រេចលើការងារមួយចំនួនទៀត បន្ទាប់ពីប្រាស្រ័យទាក់ទងនិងបំភ្លឺពីអង្គការ UNESCO តាមរយៈឯកឧត្តម សួស យ៉ារ៉ា ប្រធានលេខា ធិការដ្ឋានរៀបចំសម័យប្រជុំពេញអង្គលើកទី៣៧។ ឯកឧត្តម សួស យ៉ារ៉ា ក៏បានបញ្ជាក់ផងដែរថា គេហទំព័រ www.whc37cambodia 2013.kh នឹងបង្ហោះជាផ្លូវការចាប់ពីថ្ងៃទី១០ ខែមីនា ឆ្នាំ២០១៣នេះតទៅ។ ឯកឧត្តម សួស យ៉ារ៉ា ក៍ នឹងត្រៀមផ្សព្វផ្សាយដល់យុវជនកម្ពុជាផងដែរ ជុំវិញសម័យប្រជុំពេញអង្គលើកទី ៣៧ នេះ។
- អាជ្ញា NIDA ក៍នឹងរៀបចំផ្សាយផ្ទាល់តាមរយៈ Internet Live Video Streaming ជាបីភាសា ខ្មែរ បារាំង និងអង់គ្លេស ដោយសហការជាមួយនិងទូរទស្សន៍ជាតិកម្ពុជា។ NIDA ក៏រៀបចំផ្សព្វផ្សាយគេហទំព័រនេះជាប្រចាំផងដែរជាមួយឯកឧត្តម សាយ សំអាល់ អគ្គលេខា ធិការរងរាជរដ្ឋាភិបាលកម្ពុជា។ ប៉ុន្តែទោះជាយ៉ាងណាក៏ដោយ អនុគណៈកម្មកាការព័ត៌មាន និងសារគមនាគមន៍ នឹងស្នើសុំសម្រេចដ៏ខ្ពង់ខ្ពស់ ពីឯកឧត្តមបណ្ឌិតសភាចារ្យ សុខ អានឧបនាយករដ្ឋមន្រ្តី និងជាប្រធានគណៈកម្មាធិការរៀបចំសម័យប្រជុំពេញអង្គលើកទី ៣៧ នឹង ស្នើសុំសម្រេចផងដែរ ដើម្បីរៀបចំសាលសារព័ត៌មាន នៅវិមានសន្តិភាព បន្ថែម និងសាលសារព័ត៌មានដែលបានជ្រើសរើសរួចហើយដោយបេសកជន UNESCO កាលពីពាក់កណ្តាល ខែ មករា ឆ្នាំ ២០១៣ នៅវិមានសន្តិភាពដើម្បីបង្កលក្ខណៈងាយស្រួលជូនដល់អ្នកយកព័ត៌មានជាតិ និងអន្តរជាតិ។
ក្រៅពីនេះ ការងារផលិតស្ពុត ផលិតបទយកការណ៏ និងវេទិការតុមូល នឹងត្រូវចាប់ផ្តើមផលិត និងផ្សព្វផ្សាយចាប់ពីខែ មេសា ឆ្នាំ ២០១៣ ដោយលេខាធិការដ្ឋាន និងអនុគណៈកម្មាការព័ត៌មាន និងសារគមនាគមន៍ ដែលតំណាងដោយឯកឧត្តម ឌឹម សុវណ្ណារុំ ជំនួយការអមទីស្តីការគណៈរដ្ឋមន្រ្តី។
លោក អន នាង នាយករងខុទ្ទការល័យសាលារាជធានីភ្នំពេញបានផ្តល់ព័ត៌មានជូនឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្រ្តី និងជាអនុប្រធានអនុគណៈកម្មាធិការព័ត៌មាន និងសារគមនាគមន៍ថា ឯកឧត្តម កែប ជុតិមា អភិបាលនៃគណៈអភិបាលរាជធានីភ្នំពេញ នឹងផ្តល់កិច្ចសហប្រតិបត្តិការណ៍ជុំវិញការងារផ្សព្វផ្សាយតាមស្លាកសញ្ញាធំៗ តាមអេក្រង់ ទូរទស្សន៍ ដើម្បីបង្ហាញពីមុខមាត់ដែលកម្ពុជាធ្វើជាម្ចាស់ផ្ទះ និងស្វាគមន៍គណៈប្រតិភូអន្តរជាតិដែលមកពីប្រទេសចំនួន ប្រមាណ១៩០ប្រទេស។
លោកហួត ឃាងវេង អគ្គនាយករង ទូរទស្សន៍ បាយ័ន ក៏បានទទួលយកនូវសំណើសុំអនុញ្ញាត ប្រើប្រាស់រថយន្តផ្សាយពិសេស LED ដើម្បីបញ្ចាំងពីព្រឹត្តិការណ៍បើកនិងបិទ នៃសម័យប្រជុំពេញអង្គលើកទី ៣៧នេះផងដែរ។
មុននឹងបិទអង្គប្រជុំ ឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្រ្តី និងជាអនុប្រធានអនុគណៈកម្មាធិការព័ត៌មាននិងសារគមនាគមន៍បានស្នើសុំឲ្យ វិទ្យុ និងទូរទស្សន៍ចាប់ផ្តើមផ្សព្វផ្សាយចាប់តាំពីពេលឥឡូវនេះតទៅដោយសហការជាមួយ អង្គការ UNESCO និងលេខាធិការដ្ឋានរៀបចំសម័យប្រជុំពេញអង្គលើកទី ៣៧ នៃគណម្មាធិការ បេតិកភ័ណ្ឌពិភពលោក ដើម្បីផ្សព្វផ្សាយជូនសាធារណជនជាតិ និងអន្តរជាតិឲ្យបានយល់ជ្រួត ជ្រាបពីមោទនភាពជាតិកម្ពុជា តាំពីការចុះបញ្ជីប្រាសាទព្រះវិហារជាបេតិកភ័ណ្ឌពិភពលោក កាលពីថ្ងៃទី០៧ កក្កដា ឆ្នាំ ២០០៨ រហូតដល់ កម្ពុជាជាប់ឆ្នោតជាប្រធាន គណៈកម្មាធិការបេតិកភណ្ឌពិភពលោក និងក្លាយខ្លួនជាម្ចាស់ផ្ទះរៀបចំសម័យប្រជុំពេញអង្គលើកទី៣៧នៅលើទឹកដី នៃអតីតអាណាចក្រខ្មែរ ប្រហែលប្រមាណ ១០០០ឆ្នាំ ក្រោយមក ក្រោមអគមគ្គុទេស ដឹកនាំ សម្តេចអគ្គមហាសេនាបតីហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។
