នៅក្នុងឱកាសអញ្ជើញជាអធិបតី
ក្នុងពិធីប្រគល់សញ្ញាបត្រគ្រូបង្រៀនកម្រិតឧត្តម (បរិញ្ញា+១) ជំនាន់ទី១៧ និងគ្រូបង្រៀន
កម្រិតមូលដ្ឋានឯកទេសភាសាបារាំង-ខ្មែរ
ជំនាន់ទី៤
ដល់គរុនិស្សិត និងគរុសិស្សនៃវិទ្យាជាតិអប់រំ ក្នុងរាជធានីភ្នំពេញ
នាថ្ងៃទី៤ ខែមីនា ឆ្នាំ២០១៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
បានមានប្រសាសន៍រំលឹកឡើងវិញនូវពាក្យ NATO
ដែលសម្តេចចង់គូសបញ្ជាក់ថា
NATO នៅក្នុងប្រទេសកម្ពុជា
គឺជាក្រុមបានតែនិយាយ តែអត់ធ្វើ «No
Action Talk Only» មិនមែនសម្តៅទៅរកខ្លឹមសារពិតនៃអង្គការសន្ធិសញ្ញាអាត្លង់ទិកខាងជើង (North
Atlan Tic Treaty Organizaion) នោះទេ។
សម្តេចតេជោនាយករដ្ឋមន្ត្រីបានមានប្រសាសន៍ពន្យល់ថា
ការធ្វើដំណើររាប់ពាន់រាប់ម៉ឺនគីឡូម៉ែត្រ ត្រូវចាប់មួយជំហានម្តងៗ មិនអាចហោះហើរទៅបានទេ។
សម្តេចតេជោមានប្រសាសន៍បញ្ជាក់ថា ខ្ញុំគិតថា វាមិនសមហេតុសមផលធ្វើជាមនុស្សទេ
បើគ្រាន់តែខ្លួនថា កើតពីកន្លែងណា
ចេញពីកន្លែងណា ក៏ខ្លួនមិនហ៊ានទាំងទទួលស្គាល់ផង។
តើគុណធម៌នេះ វាជាគុណធម៌របស់មនុស្ស
ឬក៏ជាគុណធម៌របស់តិរច្ឆាន? ព្រោះតិរច្ឆានវាអត់ស្គាល់ម៉ែ
ស្គាល់ឪរបស់វាទេ ទោះជាម៉ែឪរបស់វា
កូនរបស់វាក៏វាពាក់ដែរ។ សម្តេចតេជោនាយករដ្ឋមន្ត្រីមានប្រសាសន៍សង្កត់ធ្ងន់ថា
សម្រាប់យើងជាមនុស្ស យើងមិនបានថាគេជាតិរច្ឆានទេ
ប៉ុន្តែជាធាតុ ហើយជាការពិតយើងបានកើតចេញមកពីឪពុកម្តាយរបស់យើង
ហើយឪពុកម្តាយរបស់យើងស្ថិតនៅក្នុងស្ថានភាពបែបណាកាលពីដំណាក់កាលចាប់ផ្តើមដើមដំបូង
តើជីដូនជីតារបស់យើងឆ្លងកាត់របៀបណា?។ «សង្គ្រាម
គ្រាប់បែក របបប្រល័យពូជសាសន៍»
បានធ្វើឲ្យប្រទេសជាតិរលំរលាយ វាជារឿងដែលអកុសលណាស់ ហើយគ្មានប្រទេសណានៅលើពិភពលោក ដែលមានទីក្រុងហើយគ្មានមនុស្សនៅនោះទេ
ហើយក៏គ្មានប្រទេសណា ដែលនៅចុងសតវត្សទី២០
បែរជាប្រទេសមួយគ្មានចាយវាយប្រាក់
គ្មានសាលារៀន
គ្មានអ្វីៗទាំងអស់។ យើងចាប់ផ្តើមពីបាតដៃទទេ ហើយបាតដៃដែលរបួសទៀតផង។
គួររំលឹកថា កាលពីថ្ងៃទី៣
ខែមីនា ឆ្នាំ២០១៣ ក្នុងទិវាវប្បធម៌ជាតិលើកទី១៥ សម្តេចតេជោនាយករដ្ឋមន្ត្រីបានធ្វើការរិះគន់ទៅដល់ក្រុមបានត្រឹមតែនិយាយ
តែមិនធ្វើ (NATO:
No Action Talk Only) ដែលបានបំភ្លេចចោលនូវអតីតកាលដ៏ជូរចត់ក្នុងការឆ្លងកាត់របបប្រល័យពូជ សាសន៍ ហើយបានយកប្រទេសកម្ពុជា ទៅប្រៀបធៀបនឹងបណ្តាប្រទេសមួយចំនួន ដែលមិនធ្លាប់បានឆ្លងកាត់អតីតកាលដូចកម្ពុជា។
សម្តេចតេជោនាយករដ្ឋមន្ត្រីបានមានប្រសាសន៍ថា
សម្តេចមិនមែនដៀមដាមឲ្យនរណាម្នាក់នោះទេ តែវាហួសហេតុពេក ហើយចំពោះបញ្ហាខ្មែរក្រហមវិញ គឺឥឡូវនេះទើបពួកគេនាំគ្នាកាត់ទោស ប៉ុល ពត ប៉ុន្តែកាលពីអតីតកាលគេយក ប៉ុល ពត ទៅអង្គុយនៅអង្គការសហប្រជាជាតិ វាអយុត្តិធម៌នៅកន្លែងហ្នឹង។ យើងមិនថាអីឲ្យគេទេ ប៉ុន្តែគ្រាន់តែពេលខ្លះ យើងដូចជាចង់អស់សំណើចដែរ។ សម្តេចតេជោមានប្រសាសន៍ថា "ថ្ងៃមុន គាំទ្រ ប៉ុល ពត ឲ្យអង្គុយនៅអង្គការសហប្រជាជាតិ
ថ្ងៃនេះទាមទារកាត់ទោស ប៉ុល
ពត លើសយើងទៅទៀត។ សម្តេចតេជោបញ្ជាក់ថា យើងកាត់ទោសកាលពីឆ្នាំ១៩៧៩ គេអត់ទទួលស្គាល់ថាការកាត់ទោសនោះត្រឹមត្រូវទេ
ឥឡូវនេះកាត់ទៅ កំពុងតែកាត់ទោសស្រាប់ហើយតើ"។
សម្តេចតេជោនាយករដ្ឋមន្ត្រីបានមានប្រសាសន៍ថា បើខ្លួនមិនទទួលស្គាល់ទៅដល់ប្រភពដើមរបស់ខ្លួនផង តើខ្លួនទៅធ្វើអ្វីកើតទៀត ហើយគុណធម៌របៀបហ្នឹងតើវាជាប្រភេទតិរច្ឆាន ឬក៏ជាមនុស្ស?។
“ខ្ញុំនិយាយនេះ អត់ហួសហេតុទេ ព្រោះខ្ញុំគ្រាន់តែសុំសិទ្ធិបកស្រាយបំភ្លឺអំពីចរិតមនុស្ស តើធាតុជាមនុស្ស ឬធាតុជាតិរច្ឆាន?
បើវាអត់ស្គាល់ប្រភពដើមផងនោះ”។ សម្តេចតេជោបានលើកជាសំណួរថា
ហ្នឹងហើយជារបបផ្តាច់ការ នៅពេលដែលអ្នកឯងកំពុងតែទិតៀនខ្ញុំ? នោះហើយបង្ហាញអំពីសេរីភាពក្នុងការបញ្ចេញមតិនៅពេលដែលគេជេរថា របបផ្តាច់ការ
ប៉ុន្តែពាក្យដែលគេប្រើថាផ្តាច់ការ គឺមានន័យស្មើថា មានសិទ្ធិបញ្ចេញមតិ។ សម្តេចតេជោមានប្រសាសន៍បញ្ជាក់ថា ក្នុងភាពជាមនុស្សដែលមិនមែនជាតិរច្ឆានគួរតែត្រូវដឹងថា ខ្លួនចេញដំណើរពីកន្លែងណា ហើយដើរតាមផ្លូវណាហ្នឹងមានគោលដៅទៅណាឲ្យច្បាស់ បើខ្លួនបដិសេធចោល សូម្បីតែការចេញដំណើរហើយ
គឺមិនធម្មតាហើយ។
សម្តេចតេជោនាយករដ្ឋមន្ត្រីក៏បានមានប្រសាសន៍ឲ្យដឹងថា កម្ពុជានឹងធ្វើជាម្ចាស់ផ្ទះការប្រកួតស៊ីហ្គេមនៅឆ្នាំ២០២៣
ខាងមុខនេះ។ ទាក់ទងនឹងបញ្ហានេះ សម្តេចបានលើកជាសំណួរថា
ហេតុអ្វីកម្ពុជាមិនធ្វើជាម្ចាស់ផ្ទះនៅឆ្នាំ២០១៥ ឬឆ្នាំ២០១៧ ឲ្យហើយទៅ?។
សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា កម្ពុជាត្រូវការទុនវិនិយោគ ដើម្បីបម្រើឲ្យប្រជាពលរដ្ឋជាមុនសិន ដូចជាការធ្វើផ្លូវ
ស្ពាន សាលារៀន
ប្រឡាយទឹក និងមន្ទីរពេទ្យជាដើម ហើយបញ្ហានេះសម្តេចក៏បានពន្យល់ទៅថ្នាក់ដឹកនាំនៃប្រទេសជាសមាជិកអាស៊ានផងដែរ។
សម្តេចតេជោបានបញ្ជាក់ថា ប្រទេសឡាវបានធ្វើជាម្ចាស់ផ្ទះកីឡាស៊ីហ្គេមរួចហើយ
ចំណែកឯប្រទេសភូមាឆ្នាំនេះក៏បានធ្វើជាម្ចាស់ផ្ទះរៀបចំផងដែរ
ប៉ុន្តែកម្ពុជាមានតម្រូវការត្រូវធ្វើអ្វីៗផ្សេងទៀត។ សម្តេចតេជោបានពន្យល់ថា
សម្រាប់កន្លែងប្រកួតមិនមែនជាបញ្ហាធំនោះឡើយ ប៉ុន្តែការស្នាក់នៅរបស់កីឡាករដែលមានចំនួនប្រមាណ
៦ពាន់នាក់ គឺជាបញ្ហាធំ។ សម្តេចតេជោបានបញ្ជាក់ថា ប្រទេសឡាវ គេបានចំណាយថវិកាចន្លោះពី
២០០-៣០០លានដុល្លារ ក្នុងការរៀបចំការប្រកួតកីឡាស៊ីហ្គេមនេះ។
ទាក់ទងនឹងតួនាទីដឹកនាំរាជរដ្ឋាភិបាលកម្ពុជានៅក្នុងឆ្នាំ២០២៣
ដែលត្រូវរៀបចំការប្រកួតកីឡាស៊ីហ្គេម ខាងមុខនោះ សម្តេចតេជោនាយករដ្ឋមន្ត្រីបានមានប្រសាសន៍ថា
នៅពេលនោះ សម្ដេចមានអាយុ ៧១ឆ្នាំ
ហើយនឹងមាននាយករដ្ឋមន្ត្រីថ្មី ប៉ុន្តែសម្រាប់ខ្ញុំគ្រាន់តែអាចតែប៉ុណ្ណោះ។ មានមនុស្សមួយចំនួនគេនិយាយថា ខ្ញុំធ្វើនាយករដ្ឋមន្ត្រីយូរណាស់ហើយ។ “រឿងយូរ ឬឆាប់វាអត់សម្រេចលើខ្ញុំទេ យូរ ឬឆាប់លើប្រជាជនបោះឆ្នោតទេ ហេតុដូចម្តេចក៏ចាប់បង្ខំ”។ បើអស់លោកឈ្នះ ខ្ញុំនឹងទៅផ្ទេរតំណែងនៅវិមានសន្តិភាព។ សម្តេចតេជោមានប្រសាសន៍ថា ម្ខាងចង់ពង្រឹងនីតិរដ្ឋ ប្រជាធិបតេយ្យត្រូវតែអមដោយនីតិរដ្ឋ បើប្រជាធិបតេយ្យមិនអមដោយច្បាប់ គឺអានាធិបតេយ្យហើយ
ដល់អានាធិបតេយ្យ អ្នកដែលគ្រោះថ្នាក់គឺប្រជាជន៕
សូមបញ្ជាក់ថា
នៅវិទ្យាស្ថានជាតិអប់រំនាព្រឹកថ្ងៃទី៤ ខែមីនា ឆ្នាំ២០១៣
មានប្រាព្ធពិធីប្រគល់សញ្ញាបត្រគ្រូបង្រៀនកម្រិតឧត្តម (បរិញ្ញាបត្របូក១
ជំនាន់ទី១៧)
និងគ្រូបង្រៀន កម្រិតមូលដ្ឋានឯកទេសភាសាបារាំង-ខ្មែរ ជំនាន់ទី៤
ដល់គរុនិស្សិត និងគរុសិស្សនៃវិទ្យាជាតិអប់រំសរុបចំនួន ១០៥៣នាក់ ក្នុងនោះមានស្រីចំនួន ៣០៩នាក់៕