សម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី១៤ ខែមីនា ឆ្នាំ២០១៣ បានមានប្រសាសន៍ឲ្យដឹងថា
មេដឹកនាំគណបក្សប្រឆាំងធ្លាប់បរាជ័យ ជាមួយសម្តេច ៣ដង រួចមកហើយ
ក្នុងការចូលរួមបោះឆ្នោតសកលនាពេលកន្លងមក។
នៅក្នុងពិធីបញ្ចុះសីមា
និងសម្ពោធសមិទ្ធផលនៅក្នុងវត្តនន្ទមុនី ក្នុងសង្កាត់ស្ទឹងមានជ័យ ខណ្ឌមានជ័យ
រាជធានីភ្នំពេញ សម្តេចតេជោនាយករដ្ឋមន្ត្រី បានមានប្រសាសន៍ដោយមិនបញ្ចេញអត្តសញ្ញាណមេដឹកនាំគណបក្សប្រឆាំងនោះថា
លោកឯងថា ខ្ញុំកំសាកញីយ៉ាងដូចម្តេច?
មិនមែនមិនធ្លាប់ប្រកួតជាមួយគ្នាឯងណា លោកឯងធ្លាប់ប្រកួត ហើយខ្ញុំវាយដួលចំនួន ៣ដង រួចហើយ បើសិនជាខ្ញុំវិញដួលប៉ុណ្ណឹង
ខ្ញុំលាលែងឈប់ធ្វើប្រធានបក្សហើយ។
សម្តេចតេជោថ្លែងថា
លោកឯងនិយាយថា ខ្ញុំអត់ហ៊ានប្រកួតជាមួយលោកឯងទេកំសាកញី
តែលោកឯងចាំបានទេ ឆ្នាំ១៩៩៨ ឆ្នាំ២០០៣ និងឆ្នាំ២០០៨ លោកឯងជេរខ្ញុំនៅមុខផ្ទះរបស់ខ្ញុំ ក្នុងពេលយុទ្ធនាការ (ដូរ ឬមិនដូរៗ!!!) ហើយនៅតែចាញ់ក្នុងការបោះឆ្នោតរហូត។
សម្តេចតេជោសែនមានប្រសាសន៍ថា
នៅពេលលោកឯងចេញទៅ លោកឯងនិរទេសខ្លួនឯង មិនមែនរាជរដ្ឋាភិបាលដេញទេ ហើយនៅម៉ោងនេះ ពេលនេះ អត់មានអ្នកណារារាំងលោកឯងមិនឲ្យមកទេ
សុំអញ្ជើញមកវិញ មកប្រកួតមក
អ្នកណាគេហាមឃាត់បំពេញផ្លូវច្បាប់យ៉ាងណាជារឿងរបស់លោកឯង
វាមិនមែនទាក់ទងជាមួយខ្ញុំទេ។ សម្តេចតេជោនាយករដ្ឋមន្ត្រីបញ្ជាក់ថា លោកឯងចេញទៅ ខ្ញុំក៏មិនបានដេញ
លោកឯងមកវិញខ្ញុំក៏មិនឃាត់ «ផ្លូវច្បាប់សុទ្ធសាធ
ខ្ញុំអត់មានសិទ្ធិអ្វីលើសពីហ្នឹងទេ»។
សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា លោកឯងធ្លាប់និយាយជិះយន្តហោះមកជាមួយ
អូបាម៉ា ប្រធានាធិបតីអាមេរិកាំងទៀតផង។ ពួកប្រឆាំងនៅភ្នំពេញគេសប្បាយចិត្តណាស់ គេនិយាយថាហ្នឹងហើយលទ្ធផលនៃការកៀបសង្កត់
មេយើងនឹងមកដល់ ហើយជិះយន្តហោះជាមួយប្រធានាធិបតីអាមេរិកទៀតផង។
ទាក់ទងនឹងបញ្ហានេះ សម្តេចតេជោមានប្រសាសន៍បញ្ជាក់ថា តាមពិតលោក អូបាម៉ា
មិនបាននិយាយមួយម៉ាត់ពីរឿងមេដឹកនាំបក្សប្រឆាំង នៅពេលដែលបានជួបជាមួយខ្ញុំនៅក្នុងខែវិច្ឆិកា
ឆ្នាំ ២០១២ នៅរាជធានីភ្នំពេញនោះ។
ទាក់ទងនឹងការចរចា ដើម្បីបង្រួបបង្រួមជាតិរវាងភាគីខ្មែរ
នាពេលកន្លងមក សម្តេចតេជោនាយករដ្ឋមន្ត្រីមានប្រសាសន៍ថា បើនិយាយពីការចរចាកាលពីពេលមុន សុទ្ធតែអស់ទាស់ហើយ។
ខ្ញុំអាយុ ៣៥ឆ្នាំ ត្រូវចូលចរចាជាមួយដៃគូ៣
ដែលជាអ្នកជើងចាស់ដូចជាព្រះករុណា ព្រះបិតាជាប្រធានាធិបតីកម្ពុជាប្រជាធិបតេយ្យ
សឺន សាន ដែលជាអតីតនាយករដ្ឋមន្ត្រីជាន់ដើម ជានាយករដ្ឋមន្ត្រីកម្ពុជាប្រជាធិបតេយ្យ ខៀវ សំផន ធ្លាប់ជាប្រធានរដ្ឋរបស់កម្ពុជាប្រជាធិបតេយ្យ
និងជាអនុប្រធាននៃរដ្ឋាភិបាលចម្រុះកម្ពុជាប្រជាធិបតេយ្យ។
សម្តេចតេជោថ្លែងថា ខ្ញុំចរចា
៣ ទល់ ១ ខ្ញុំសូមប្រាប់អ្នកឯងទៅ អ្នកឯងមិនមែនជាដៃគូររបស់
ហ៊ុន សែន ទេ។ សូម្បីតែសម្តេចក្រុមព្រះនរោត្តម
រណឫទ្ធិ ក៏មិនមែនជាដៃគូររបស់ ហ៊ុន
សែន ទេ ឪរបស់សម្តេចក្រុមព្រះទេ ទើបជាដៃគូររបស់ ហ៊ុន សែន។ ហ៊ុន សែន មិនដែលខ្លាចអ្វីទាំងអស់ចាប់តាំងពីថ្ងៃទី២០
ខែមិថុនា ឆ្នាំ១៩៧៧
ហ៊ុន សែន ដឹកនាំការតស៊ូមិនខ្លាចស្លាប់ទេ។ ព្យុះភ្លៀងយ៉ាងណាទ្រាំរស់ ស៊ីអត់ស៊ីឃ្លាន នៅជាមួយប្រជាជន។
សម្តេចតេជោសែនមានប្រសាសន៍ថា ខ្លួនឯងខ្លាចស្រមោលខ្លួនឯង រត់ខ្លួនឯងចោលកូនចៅ ហើយទៅប្រៀបធៀបខ្លួនឯងជាមួយលោកស្រី អ៊ុង សានស៊ូជី
របស់ប្រទេសភូមា។
លោកស្រី អ៊ុង សានស៊ូជី រដ្ឋាភិបាលមីយ៉ាន៉ម៉ា ចង់ឲ្យចេញទៅក្រៅប្រទេស តែលោកស្រី អ៊ុង
សានស៊ូជី សុខចិត្តជាប់គុក តែម្នាក់នេះ
(មេដឹកនាំគណបក្សប្រឆាំង) គិតតែពីរត់ចោលស្រុក ព្រោះគេអាងមានលិខិតឆ្លងដែន២
ដូច្នេះអ្នកនយោបាយមានសញ្ជាតិ២ នេះកុំសូវទុកចិត្តពេក។
សូមបញ្ជាក់ផងដែរថា ថ្មីៗនេះមានវិទ្យុបរទេសមួយ
បានដកស្រង់សំដីរបស់លោក អ៊ូ វីរៈ
ប្រធានមជ្ឈមណ្ឌលសិទ្ធិមនុស្សកម្ពុជា
ដែលធ្វើការវិភាគទាក់ទងនឹងករណីសម្តេចក្រុមព្រះ នរោត្តម រណឫទ្ធិ ចង់វិលចូលក្នុងឆាកនយោបាយជាមួយគណបក្សប្រឆាំង
មកផ្សាយដោយចោទប្រកាន់ថា គណបក្សប្រជាជនកម្ពុជា
(CPP) នឹងមិនអនុញ្ញាតឲ្យសម្តេចក្រុមព្រះនរោត្តម រណឫទ្ធិ ចូលនយោបាយវិញជាដាច់ខាត។ ការចង់ប្តឹង និងមិនចង់ប្តឹង គឺជាការសម្រេចរបស់ CPP ទេ ប៉ុន្តែ CPP
នឹងឆ្លើយតបជាមួយនឹងការគំរាមកំហែង ដែលខ្ញុំមើលទៅបើសម្តេចក្រុមព្រះចូលក្នុងបក្សប្រឆាំង បក្សកាន់អំណាចនឹងប្រតិកម្មហើយ។
បើសិនព័ត៌មានខាងលើជាការពិត សម្តេចក្រុមព្រះបានក្លាយខ្លួនជា
«ចំណាប់ខ្មាំងនយោបាយរបស់គណបក្សគ្រប់គ្រងអំណាចបច្ចុប្បន្ន» ហើយ។
ឆ្លើយតបនឹងការវិភាគបែបនេះ
សម្តេចតេជោនាយករដ្ឋមន្ត្រីក៏បានថ្លែងនៅក្នុងពិធីបញ្ចុះសីមា
និងសម្ពោធសមិទ្ធផលនៅក្នុងវត្តនន្ទមុនីនោះថា នេះជារឿងគួរឲ្យអស្ចារ្យ។ រឿងនេះសម្តេចក្រុមព្រះ ធ្វើយ៉ាងម៉េច? ខ្ញុំអត់ដឹងទេ ប៉ុន្តែខ្ញុំសង្ឃឹមថា
ព្រះអង្គគឺមិនខ្ជីខ្ជានោះទេ។ ពាក់ព័ន្ធនឹងបញ្ហាបណ្ដឹងរបស់លោក ញឹក
ប៊ុនឆៃ ប្តឹងសម្តេចក្រុមព្រះថា
លក់ឧទ្ធម្ភាគចក្រ ខ្ញុំបានប្រាប់ទៅឯកឧត្តម
ញឹក ប៊ុនឆៃ កាលពីរាត្រីថ្ងៃទី១៣ ខែមីនា ឆ្នាំ២០១៣ ថា «ការប្តឹងសម្តេចក្រុមព្រះ នរោត្តម រណឫទ្ធិ
ស្មើនឹងការប្តឹង ហ៊ុន សែន ហើយមូលហេតុងាយយល់ទេ ព្រោះសម្តេចក្រុមព្រះចង់យកយន្តហោះទៅណាត្រូវសុំការអនុញ្ញាតពីនាយករដ្ឋមន្ត្រី ដូច្នេះខ្ញុំចង់ឲ្យអ្នកដឹកនាំគណបក្សហ៊្វុនស៊ិនប៉ិចមានភាពឈ្លាសវៃ ជាងនេះបន្តិចបានទេ។ ខ្ញុំនិយាយដោយត្រង់
ខ្ញុំអន់ចិត្តដែររឿងនេះ។
សម្តេចតេជោបានមានប្រសាសន៍បញ្ជាក់ថា
ខ្ញុំមិនជឿថា សម្តេចក្រុមព្រះដល់ថ្នាក់ទៅធ្វើជាបក្សប្រឆាំងទេ ព្រោះជាការប្រមាថដ៏ធ្ងន់ធ្ងរចំពោះវិញ្ញាណក្ខន្ធរបស់ព្រះបិតារបស់ព្រះអង្គ
ក៏ដូចជាព្រះរាជវង្សានុវង្ស។ ខ្ញុំមិនជឿថា សម្តេចក្រុមព្រះដាក់ព្រះកាយឲ្យគេមើលងាយ
មើលថោក រត់ពីកន្លែងមួយទៅកន្លែងមួយនោះទេ
ហើយព្រះអង្គក៏ទើបប្រកាសក្នុងពេលថ្មីៗនេះ មិនឲ្យរាជវង្សានុវង្សចូលក្នុងនយោបាយទៀតផង។ ម្យ៉ាងទៀត
ទើបនឹងធ្វើបុណ្យព្រះបរមសព ព្រះបរមរតនកោដ្ឋ រួចហើយ ទើបនឹងជួបជុំគ្នាព្រះរាជវង្សានុវង្ស និងអ្នកនៅជាមួយគ្នា បែរជាប្តឹងគ្នា ហើយមានអ្នកវិភាគឡប់ៗមកលើកឡើងថា
រឿងប្តឹងមិនប្តឹងស៊ីសងលើ CPP ទៅវិញ?។
សម្តេចតេជោមានប្រសាសន៍ដោយធ្វើការសន្និដ្ឋានថា ព្រះអង្គមិនដាក់ខ្លួនធ្វើបែបនេះទេ ព្រោះនាយករដ្ឋមន្ត្រី
ហ៊ុន សែន ក៏ដូចជា
CPP ដង្ហែការពាររាជានិយមស្មោះស្ម័គ្រប៉ុណ្ណឹងហើយ ព្រះអង្គទៅនៅជាមួយគណបក្សប្រឆាំង មិនខុសអ្វីដែលព្រះអង្គចង់ឲ្យរាជានិយមគង់វង្ស ប៉ុន្តែព្រះអង្គនឹងបំផ្លាញរាជានិយមខ្លួនឯង។
សម្តេចតេជោមានប្រសាសន៍ថា សម្តេចក្រុមព្រះអស់ទាំងផ្លូវដើរ ព្រះអង្គទៅតោងជើងពួកប្រឆាំង
ដែលធ្លាប់ជាកូនចៅខ្លួន ដែលព្រះអង្គមិនអាចធ្វើទៅកើតទេ
ត្រូវវិភាគកន្លែងនេះ។ ប្រការមួយទៀតបើព្រះអង្គទៅមែនសូមកុំភ្លេចថា
កាលពីដើមឡើយ សម្តេចក្រុមព្រះបានប្រើព្រះនាមព្រះបិតា
ព្រះបាទសម្តេចព្រះនរោត្តម សីហនុ
ក្នុងការឃោសនាបោះឆ្នោតជាមួយខ្ញុំនៅឆ្នាំ១៩៩៣ ឆ្នាំ១៩៩៨ ឆ្នាំ ២០០៣ ឆ្នាំ២០០៨
ហើយខ្លឹមសារពិតនៅពេលនោះ គឺបោះឆ្នោតប្រណាំងប្រជែងរវាងព្រះករុណាសម្តេចព្រះនរោត្តម
សីហនុ និង ហ៊ុន សែន ព្រោះគណបក្សហ៊្វុនស៊ិនប៉ិចបាននិយាយថា
បើស្រឡាញ់សម្តេចឪ បោះឆ្នោតឲ្យហ៊្វុនស៊ិនប៉ិច។
ចំណែក CPP និយាយថា
បើចង់ឲ្យ ហ៊ុន សែន ធ្វើជានាយករដ្ឋមន្ត្រី បោះឆ្នោតឲ្យ CPP។
ពាក់ព័ន្ធនឹងការវិភាគរបស់ប្រធានមជ្ឈមណ្ឌលសិទ្ធិមនុស្សកម្ពុជា
សម្តេចតេជោមានប្រសាសន៍វាយតម្លៃថា
បើឡប់តែធុនហ្នឹងធ្វើអ្នកវិភាគយ៉ាងដូចម្តេចកើត? គួរចៀសឆ្ងាយពីខ្ញុំបន្តិចបានទេ?។ សម្តេចតេជោថ្លែងថា
លោក អ៊ូ វីរៈ លោកគួរតែចេះដឹងជាងនេះឲ្យបានច្រើនបន្តិចបានទេ។ លោកពិតជាមានសិទ្ធិ ហើយខ្ញុំក៏មានសិទ្ធិដែរ
ខ្ញុំគិតថា ការវិភាគរបស់លោកអន់ណាស់ គួរតែទៅរៀនសារជាថ្មីជាមួយសិស្សនៅបឋមសិក្សា
ឬមធ្យមសិក្សាវា គ្រាន់បើជាង។
គួរបញ្ជាក់ថា សមិទ្ធផលខាងអាណាចក្រ
និងពុទ្ធិចក្រ ដែលចូលរួមកសាងឡើងដោយមន្ត្រីគណបក្សប្រជាជនកម្ពុជា
ហើយត្រូវបានកាត់ឫសសីមា និងសម្ពោធដាក់ឲ្យប្រើប្រាស់រួមគ្នានៅក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ
ហ៊ុន សែន ពេលនោះរួមមានព្រះវិហារទំហំ ២៤មx១២ម កំពស់ ៣២ ម៉ែត្រ រួមទាំងឧបដ្ឋានសាលា របង
ក្លោងទ្វា ការចាក់សាបក្នុងបរិវេណវត្តដែលសរុបថវិកាអស់ចំនួនជាង
៤០ ម៉ឺនដុល្លារសហអាមេរិក
និងប្រាក់រៀលចំនួនជាង ២០០ លាន រៀល៕
អត្ថបទៈ អង្គភាពព័ត៌មាន និងប្រតិកម្មរហ័ស