ក្នុងឱកាសអញ្ជើញចុះពិនិត្យការដ្ឋានសាងសង់ស្ពានអាកាសស្ទឹងមានជ័យ ក្នុងរាជធានីភ្នំពេញ នារសៀលថ្ងៃទី៣១ ខែកក្កដា ឆ្នាំ ២០១៣ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា សម្តេចកំពុងនៅក្នុងប្រទេសរួមសុខរួមទុក្ខជាមួយប្រជាពលរដ្ឋនិងកំពុងស្ថិតនៅក្នុងការកាន់អំណាចជានាយករដ្ឋមន្រ្តី ដែលគ្មានអ្នកណាមានសិទ្ធិមកបង្ខំឲ្យចុះចេញពីអំណាចបានឡើយ។ សម្តេចតេជោសែន ដែលជាអនុប្រធានគណបក្សប្រជាជនកម្ពុជា និងជាបេក្ខជននាយករដ្ឋមន្ត្រីសម្រាប់អាណត្តិទី៥ នៃរដ្ឋសភា ក៏បានប្រកាសឲ្យដឹងដែរថា សម្តេចត្រៀមនឹងជួបពិភាក្សាជាមួយ ឯកឧត្តម សម រង្ស៊ី ប្រធានគណបក្សសង្គ្រោះជាតិដើម្បីដោះស្រាយបញ្ហាដែលជាផលប្រយោជន៍របស់ប្រជាពលរដ្ឋ និងប្រទេសជាតិ។
វត្តមានជាលើកដំបូងបន្ទាប់ពីការបោះឆ្នោតសកលនាថ្ងៃទី២៨ ខែកក្កដា ឆ្នាំ២០១៣ កន្លងមកនេះ សម្តេចតេជោនាយករដ្ឋមន្រ្តី បានផ្ញើសារជូនប្រជាពលរដ្ឋតាមរយៈផ្តល់នូវបទសម្ភាសន៍ជូនអ្នកសារព័ត៌មានថា ខ្ញុំសូមយកឱកាសនេះ ដើម្បីថ្លែងជូនទៅកាន់ព្រះសង្ឃ និងប្រជាពលរដ្ឋថា ឥឡូវនេះខ្ញុំនៅក្នុងប្រទេស និងកំពុងស្ថិតនៅក្នុងការកាន់អំណាចជានាយករដ្ឋមន្រ្តីនៃរាជរដ្ឋាភិបាលនីតិកាលទី៤ ហើយក៏សូមអះអាងបញ្ជាក់ថា តើមានអ្នកណាមួយទៅដែលមានសិទ្ធិមកបង្ខំឲ្យនាយករដ្ឋមន្រ្តីក្នុងតំណែង ដែលជានាយករដ្ឋមន្រ្តីជាប់ឆ្នោតបោះបង់ចោលការងារ ហើយទទួលយកតំណែងនោះ។ តើមានអ្នកណា? មិនថាកងទ័ព មិនថាកម្លាំងដទៃទៀត ឬក៏ឥស្សរជននយោបាយដទៃទៀតនោះទេ វាជាការដើរផ្ទុយជាមួយនឹងរដ្ឋធម្មនុញ្ញ នៃព្រះរាជាណាចក្រកម្ពុជា។ សម្តេចតេជោមានប្រសាសន៍ថា ឥឡូវការបោះឆ្នោតបានកន្លងផុតទៅហើយ ប្រជាជាតិយើងបានសំដែងនូវមតិរួចស្រេចទៅហើយកាលពីថ្ងៃទី២៨ ខែកក្កដា ឆ្នាំ ២០១៣ បន្ទាប់ពីយុទ្ធនាការអស់រយៈពេលពេញមួយខែ។ ប្រជាពលរដ្ឋរបស់យើងបានខិតខំយ៉ាងច្រើនជាមួយនឹងការរក្សាការពារភាពអត់ធ្មត់ ភាពថ្លៃថ្នូរក្នុងឋានៈជាអ្នកចាស់ទុំផ្នែកនយោបាយ និងប្រជាធិបតេយ្យ សេរី ពហុបក្ស។ “ក្នុងនាមរាជរដ្ឋាភិបាលកម្ពុជាចំពោះគណៈកម្មាធិការជាតិរៀបចំការបោះឆ្នោត ក៏ដូចជាអាជ្ញាធរគ្រប់លំដាប់ថ្នាក់ កម្លាំងប្រដាប់អាវុធគ្រប់ប្រភេទ ព្រមទាំងព្រះសង្ឃ និងប្រជាពលរដ្ឋ ដែលបានចូលរួមនៅក្នុងដំណើរការប្រជាធិបតេយ្យនៅកម្ពុជានេះផងដែរ”។
សម្តេចតេជោសែន មានប្រសាសន៍ថា ទោះបីលទ្ធផលបោះឆ្នោតមិនទាន់បានបញ្ជាក់ជាផ្លូវការនៅឡើយ ប៉ុន្តែគេអាចដឹងថា មានតែគណបក្សនយោបាយ២ ប៉ុណ្ណោះ ដែលនៅក្នុងរដ្ឋសភានីតិកាលទី៥ ដែលខ្ញុំសូមគូសបញ្ជាក់ថា “បក្សណាឈ្នះ បក្សណាចាញ់វាមិនសំខាន់ទេសម្រាប់គណបក្សនយោបាយ ប៉ុន្តែយើងត្រូវដឹងថា ជាតិរបស់យើងជាអ្នកឈ្នះ”។ ចំណុចនេះមានសារៈសំខាន់ណាស់ ខ្ញុំឲ្យសារនយោបាយជាបន្តបន្ទាប់ ហើយចុងក្រោយខ្ញុំឲ្យសារនៅស្រុកបាធាយថា «សូមកុំឲ្យការបោះឆ្នោតមួយក្លាយទៅជាការបែកបាក់ជាតិ» នេះជាចំណុចពិសេស ហើយប្រជាជនរបស់យើងចង់បានអ្វី? តើប្រជាជនត្រូវការបិទផ្សារ បិទតូបលក់ដូរ បិទហាងកាហ្វេ ឬក៏បិទការ៉ាស់សាំង បិទធនាគារ ដែលនេះជាបញ្ហាត្រូវដាក់សំណួរចំពោះម្ចាស់ឆ្នោត។
សម្តេចតេជោមានប្រសាសន៍បញ្ជាក់ថា ឥឡូវនេះប្រជាពលរដ្ឋបានបញ្ចេញមតិរួចហើយ ទោះបីបក្សមានសម្លេងភាគច្រើន បក្សមានសម្លេងភាគតិច បក្សដែលអត់មានអាសនៈ ក្នុងសភាសុទ្ធតែទទួលបានសម្លេងឆ្នោតទាំងអស់ ដូច្នេះនេះជាជ័យជម្នះរបស់អ្នកណា ជាជ័យជម្នះ របស់ប្រជាជាតិរបស់យើង។ ឥឡូវបោះឆ្នោតរួចហើយ តើយើងចង់បានអ្វីទៀត? តើចង់បានស្ថានការណ៍វិលត្រឡប់ទៅរកឆ្នាំ១៩៧៥ ដែលបង្កជាការវឹកវរ ហើយនាំគ្នាចាកចេញពីទីក្រុង?។ ជាក់ស្តែងនៅល្ងាចថ្ងៃទី២៨ ខែកក្កដា ប្រជាពលរដ្ឋនាំគ្នាផ្អើលទៅដកប្រាក់នៅក្នុងធនាគារ ហើយចាក់សាំង និងប្រមូលទិញសម្ភារៈ។ ប៉ុន្តែថ្ងៃនេះខ្ញុំសប្បាយរីករាយណាស់ដោយប្រជាពលរដ្ឋរបស់យើងទាំងនៅក្នុងរាជធានីភ្នំពេញ ទាំងនៅតាមបណ្តាខេត្តមានភាពចាស់ទុំ ហើយមានភាពឈ្លាសវៃខាងនយោបាយ។ ខ្ញុំបានមកកាន់ទីនេះ ខ្ញុំបានជួបជាមួយនឹងចរាចរយ៉ាងច្រើន និងការលក់ដូរជាធម្មតារបស់ប្រជាពលរដ្ឋ។ បញ្ហាសំខាន់របស់យើងនៅទីនេះ មិនថាអ្នកណាឈ្នះ អ្នកណាចាញ់ទេ គឺត្រូវធ្វើឲ្យជាតិយើងឈ្នះ ហើយបង្រួបបង្រួមជាតិឲ្យបានសុខ ព្រោះយើងលំបាកណាស់ទម្រាំនឹងដើរមកដល់ការឯកភាពជាតិ ឯកភាពទឹកដី ដែលគ្មានតំបន់អបគមន៍ ដូចមុនឆ្នាំ១៩៩៨ ដែលប្រទេសកម្ពុជាមួយមានតំបន់ត្រួតត្រាច្រើន មានកម្លាំងប្រដាប់អាវុធប្រឆាំងគ្នាច្រើន។ ឥឡូវយើងផ្ទេរពីស្ថានភាពនៃការប្រយុទ្ធប្រឆាំងគ្នាដោយអាវុធ ដោយគ្រាប់កាំភ្លើង មកកាន់ការប្រកួតប្រជែងតាមរយៈសន្លឹកឆ្នោតវិញ ដែលនេះជាស្ថានភាពឈ្នះ ឈ្នះ សម្រាប់ប្រជាជាតិកម្ពុជាទាំងមូល។
សម្តេចតេជោនាយករដ្ឋមន្រ្តីមានប្រសាសន៍ថា បើសិនអ្នកណាមួយបង្កឲ្យមានចលាចលសម្រាប់សង្គម តើផលប៉ះពាល់ប៉ុនណាទៅលើស្ថិរភាពនយោបាយរបស់ប្រទេស ហើយជាងនេះទៅទៀតបញ្ហាទាក់ទងទៅនឹងវិស័យសេដ្ឋកិច្ចតែម្តង។ តើអ្នកទាំងអស់គ្នាចង់ឃើញថា ត្រូវឈរបន្តគ្នាដើម្បីទិញអង្ករ ទិញនំប៉័ង ឬបន្តអង្គុយបន្តកន្ទុយគ្នាដើម្បីចាក់សាំង ហើយទៅរកចាក់សាំងក៏គ្មានសាំងលក់ទៅទៀត ដោយសារប្រទេសជាតិមានសភាពការណ៍ចលាចល។
ទាក់ទិនទៅនឹងការបំពុលបរិយាកាសតាមរយៈបណ្តាញឃោសនាសង្គម (Facebook) សម្តេចតេជោបានមានប្រសាសន៍ថា ខ្ញុំសូមអំពាវនាវឲ្យប្រជាពលរដ្ឋ និងព្រះសង្ឃ នៅទូទាំងប្រទេសទុកចិត្តលើសភាពការណ៍នៃការគ្រប់គ្រងរបស់រាជរដ្ឋាភិបាល ហើយទុកចិត្តទៅលើខ្លួនឯង ដែលត្រូវដោះបញ្ហាដែលជាអាយុជីវិតរបស់ជាតិ។ មិនមែនប្រជាពលរដ្ឋ ទាំងអស់ដែលជាអ្នកបោះឆ្នោតត្រូវឡើងទៅធ្វើជានាយករដ្ឋមន្រ្តី ឬរដ្ឋមន្រ្តីទេ ព្រោះមានមុខតំណែងតែមួយចំនួនទេ ដូច្នេះ អ្នកដែលខំបង្កើតឡើងនូវបញ្ហានេះ បញ្ហានោះ បំផុសនូវបញ្ហានេះ បញ្ហានោះ បើទោះបីជាប្រឹងបំផុស យ៉ាងណាក៏មិនបានធ្វើនាយករដ្ឋមន្រ្តីទេ ហើយក៏មិនបានធ្វើរដ្ឋមន្រ្តីដែរ។ Facebook មួយចំនួនបានបង្ហោះរឿងមិនធម្មតា ប៉ុន្តែយើងដាក់ជាសំណួរថា អ្នកដែលបង្ហោះFacebookនោះ តើអ្នកហ្នឹងៗអាចឡើងធ្វើរដ្ឋមន្រ្តីបានទេ? គេឲ្យធ្វើរដ្ឋមន្រ្តីទេ? បានជាខំបង្កបរិយាកាសដែលធ្វើឲ្យសភាព ការណ៍ជាតិលិចលង់? ដែលនេះជាចំណុចដែលត្រូវថ្លឹងថ្លែង។
សម្តេចតេជោសែន មានប្រសាសន៍ថា ការបោះឆ្នោតបានកន្លងផុតទៅហើយៗអ្វីដែលសេស សល់គឺការដោះស្រាយបន្តតាមរយៈច្បាប់ដែលមានជាធរមាន ហើយតាមរយៈយន្តការដែលមានជាធរមាន មិនអាចធ្វើលើសពីនេះបានទេ។ ខ្ញុំសូមបញ្ជាក់ថា ខ្ញុំបានទទួលដំណឹងមិនទាន់ជាផ្លូវការពេកទេ ក៏ប៉ុន្តែមានគេជូនព័ត៌មានឲ្យខ្ញុំថា គណៈកម្មាធិការជាតិរៀបចំការបោះឆ្នោតនឹងដំណើរការដោះស្រាយ ហើយដំណើរការដោះស្រាយនោះគឺតាមរយៈនៃការចូលរួមដោយបណ្តាគណបក្សនយោបាយ និងសង្គមស៊ីវិល បើសិនជារឿងហ្នឹងវាពិតដូចអ្វីដែលខ្ញុំបានទទួលព័ត៌មានថា យន្តការរបស់គណៈកម្មាធិការជាតិរៀបចំការបោះឆ្នោតដើម្បីដោះស្រាយ បញ្ហាសេសសល់ ហើយដែលត្រូវបានបញ្ចូលបន្ថែម ដោយការចូលរួមពីបណ្តាបក្សនយោបាយ និងអង្គការក្រៅរដ្ឋាភិបាល ខ្ញុំយល់ថា នេះជាដំណើរវិជ្ជមាន ដែលជាការបើកផ្លូវមួយសម្រាប់ការដោះស្រាយបញ្ហាសេសសល់ឲ្យស្របទៅតាមច្បាប់ ព្រោះថា គណៈកម្មការនេះ ជាគណៈកម្មការទាក់ទងនឹងការបោះឆ្នោត ទាក់ទងនឹងវិវាទនៃការបោះឆ្នោត គឺគណៈកម្មាធិការបោះឆ្នោតជាតិគ្រប់ថ្នាក់មានភារកិច្ចដោះស្រាយ។ ប៉ុន្តែបើសិនជាគណៈកម្មាធិការជាតិ រៀបចំការបោះឆ្នោតយល់ឃើញថា មានការចាំបាច់ឲ្យគណបក្សនយោបាយ និងអង្គការសង្គមស៊ីវិល ចូលរួមសម្រាប់រាជរដ្ឋាភិបាល ក៏ដូចជាគណបក្សប្រជាជនកម្ពុជាក៏សូមស្វាគមន៍នូវការបើកទូលាយបែបនេះ ដើម្បីបង្ហាញពីតម្លាភាព និងដំណោះស្រាយដែលអាចទទួលយកបានទាំងអស់គ្នា។
សម្តេចតេជោបានមានប្រសាសន៍បញ្ជាក់បន្ថែមថា សភាពការណ៍នៅកម្ពុជាគឺវាដូច្នេះឯង ប៉ុន្តែយើងធ្លាប់រកដំណោះស្រាយចេញដោយឆ្នាំ១៩៩៣ ក៏មានបញ្ហា ១៩៩៨ ក៏មានបញ្ហា ឆ្នាំ ២០០៣ ក៏មានបញ្ហា ហើយឆ្នាំ២០០៨ មានបញ្ហាបន្តិចបន្តួច។ ចំណុចនេះមិនអាចឆ្លងផុតពីផ្លូវច្បាប់បានទេ ព្រោះយើងកំពុងអនុវត្តច្បាប់ ហើយចំណុចនានាពាក់ព័ន្ធនឹងការសម្របសម្រួលគ្នារវាងបណ្តាបក្សនយោបាយនោះ គណបក្សប្រជាជនកម្ពុជាសូមជម្រាបថា គណបក្សប្រជាជនកម្ពុជាបានប្រជុំគណៈអចិន្រ្តៃយ៍របស់ខ្លួនកាលពីថ្ងៃទី២៩ ខែកក្កដា ក្នុងនោះគឺយើងបានត្រៀមខ្លួនបើកចំហដើម្បីពិភាក្សានយោបាយរវាងបក្សដែលមានអាសនៈនៅក្នុងសភា ដើម្បីពិភាក្សាគ្នាអំពីការរៀបចំក្បាលម៉ាស៊ីនរបស់រដ្ឋសភា ដែលខ្ញុំគិតថា គ្មានអ្នកណាដោះស្រាយជំនួសខ្មែរ និងខ្មែរគ្នាឯងបានទេ មិនអាចយកបរទេសមកដោះស្រាយជំនួសយើង ហើយបរទេសមានតែការលើកទឹកចិត្តឲ្យយើងសន្ទនាគ្នាទៀតផង ហើយខ្ញុំក៏មានជំនឿជឿជាក់ថាប្រជាជនកម្ពុជាក៏មានជំនឿជឿជាក់ទៅលើអ្នកដឹកនាំនយោបាយនៅកម្ពុជាផងដែរថា នឹងដោះស្រាយបញ្ហាជាមួយគ្នាតាមផ្លូវនយោបាយ នៅក្នុងដំណើរការធ្វើយ៉ាងណាឲ្យសភាបានដំណើរការទៅមុខ។
សម្តេចតេជោនាយករដ្ឋមន្រ្តីមានប្រសាសន៍ថា តាមផ្លូវច្បាប់មកដល់ពេលនេះមិនទាន់មានការប្រកាសលទ្ធផលផ្លូវការទេ គឺមានការប្រកាសលទ្ធផលបណ្តោះអាសន្នប៉ុណ្ណោះ ដូច្នេះយើងត្រូវរង់ចាំបន្តទៀតដោយភាពអំណត់ ដោយភាពចាស់ទុំ ប៉ុន្តែក្នុងពេលវេលាមួយដែលយើងទាំងអស់គ្នាត្រូវខិតខំរួមគ្នាការពារស្ថិរភាពនយោបាយ ការពារស្ថិរភាពជីវភាពសេដ្ឋកិច្ចសង្គមឲ្យដំណើរការទៅជាធម្មតា។ បើមិនដូច្នោះទេ ខ្ញុំគិតថាប្រជាពលរដ្ឋរបស់យើងគាត់នឹងអាចយល់ថា បើបោះឆ្នោតម្តងវាមានបញ្ហាម្តង តើថ្ងៃក្រោយប្រជាពលរដ្ឋយើងនឹងជឿទុកចិត្តទៅលើការបោះឆ្នោតទៀតទេ។ បើសិនជាបង្កើតការញុះញង់ហើយធ្វើឲ្យប្រទេសជាតិធ្លាក់ទៅក្នុងភាព លិចលង់ស្រមោលអតីតកាលនឹងវិលត្រឡប់នោះ តើប្រជាជនយើងចង់បានទេ ខ្ញុំគិតថា គ្មានអ្នកណាចង់បានទេ ហើយគ្មានអ្នកណាចង់វេចបង្វេចរត់ទៀតទេ។
ទាក់ទងនឹងការទទួលបានអសនៈក្នុងសភារបស់គណបក្សនីមួយៗ សម្តេចតេជោថ្លែងថា បញ្ហាធ្លាក់ចុះអាសនៈច្រើន ឬតិចវាជាសិទ្ធិរបស់ប្រជាពលរដ្ឋផ្តល់ឲ្យ ហើយចំពោះការលើកឡើងថា លោក ហ៊ុន សែន ប្រហែលជាមិនធ្វើនាយករដ្ឋមន្រ្តីនៅអាណត្តិទី៥ ទេ ខ្ញុំសូមសួរថា តើអ្នកណានឹងមកយកតំណែងពី ហ៊ុន សែន។ មហាសន្និបាតរបស់គណបក្សប្រជាជនកម្ពុជាបានសម្រេចជាឯកច្ឆន្ទក្នុងការដាក់តំណែង ហ៊ុន សែន ធ្វើជានាយករដ្ឋមន្រ្តីនៅអាណត្តិទី៥ បន្ថែមលើនោះសន្លឹកឆ្នោត ដែលបានបោះឲ្យគណបក្សប្រជាជនគឺជាសន្លឹកឆ្នោតដែលបោះប្រាប់ថា ហ៊ុន សែន ត្រូវធ្វើនាយករដ្ឋមន្រ្តី ដូច្នេះគ្មានអ្នកណាហ៊ានមកលូកលាន់ជាមួយនឹងបញ្ហាបេក្ខភាពនាយក រដ្ឋមន្រ្តីនេះទេ លើកលែងតែខ្ញុំស្លាប់ លើកលែងតែខ្ញុំធ្វើការមិនបាន នេះជាសភាពការណ៍ដែលគេត្រូវមើលឃើញ ហើយត្រូវសិក្សាអំពីរដ្ឋធម្មនុញ្ញឲ្យបានច្បាស់សិន ។ ខ្ញុំគិតថា បណ្តាបក្សនយោបាយត្រូវតែមានការសម្របសម្រួលគ្នា ហើយយើងក៏បើកបេះដូងក្នុងការធ្វើការសម្របសម្រួល ដើម្បីរៀបចំក្បាលម៉ាស៊ីនរបស់រដ្ឋសភា ដើម្បីឲ្យដំណើរការឲ្យប្រទេសរបស់យើងមានលទ្ធិប្រជាធិបតេយ្យគ្រប់គ្រាន់ហើយ បញ្ហាអាសនៈឡើង ឬអាសនៈចុះវាមិនសំខាន់សម្រាប់យើងទេ ប៉ុន្តែវាសំខាន់សម្រាប់ជាតិរបស់យើងទាំងមូល។
សម្តេចតេជោសែន បានមានប្រសាសន៍ឲ្យដឹងថា សម្តេចបានប្រគល់ភារកិច្ចជូនឯកឧត្តម ស ខេង ឯកឧត្តម សាយ ឈុំ និងឯកឧត្តម សុខ អាន ដើម្បីត្រៀមធ្វើការសម្របសម្រួលជាមួយមេបក្សប្រឆាំង ដោយ បានថ្លែងថា ឯកឧត្តម សម រង្ស៊ី ដោយសារតែគាត់ធ្លាប់បានធ្វើលិខិតចូលរួមមរណទុក្ខឪពុករបស់ខ្ញុំ ដូច្នេះឯកឧត្តម សម រង្ស៊ី ប្រាកដណាស់គាត់ច្បាស់ជាយល់នៅពេលវេលាដ៏លំបាករបស់ខ្ញុំក្នុងការកាន់ទុក្ខ ដូច្នេះការដោះស្រាយនានា ខ្ញុំបានប្រគល់ទៅឲ្យយន្តការមួយសម្រាប់ការត្រៀមរៀបចំការពិភាក្សា ជាមួយនឹងឯកឧត្តម ស ខេង ឯកឧត្តម សាយ ឈុំ និងឯកឧត្តម សុខ អាន ដែលបញ្ហានេះវាត្រូវមានការសម្របសម្រួលមួយ «ប៉ុន្តែ ក្នុងករណីចាំបាច់ខ្ញុំក៏អាចនឹងប្រើប្រាស់ពេលវេលាដ៏លំបាករបស់ ខ្ញុំដើម្បីសន្ទនាជាមួយនឹងឯកឧត្តម សម រង្ស៊ី ផងដែរ»។
សម្តេចតេជោនាយករដ្ឋមន្រ្តី ក៏បានជំរុញឲ្យក្រុមការងាររបស់គណបក្សប្រជាជនកម្ពុជាបន្តចុះជួយដល់ប្រជាពលរដ្ឋ និងបានអំពាវនាវដល់អាជ្ញាធរឲ្យត្រៀមការពារប្រជាពលរដ្ឋទៅនឹង គ្រោះធម្មជាតិក្នុងពេលខាងមុខផងដែរ។
វត្តមានជាសាធារណៈរបស់សម្តេចអគ្គមហាសេនាបតីតេជោ ហ៊ុន សែន អនុប្រធានគណបក្សប្រជាជនកម្ពុជា និងជានាយករដ្ឋមន្រ្តីនីតិកាលទី៤ នៃរដ្ឋសភាបានឆ្លើយតបទៅនឹងពាក្យចចាមអារ៉ាម ដែលបាននិយាយថា សម្តេចតេជោបានចេញទៅបរទេស និងបានលាឈប់ពីមុខតំណែងនាយករដ្ឋមន្រ្តី ហើយក៏ជាសារបញ្ជាក់ទៅកាន់ពួកអគតិមួយចំនួនថា ជានិច្ចកាលសម្តេចតេជោនាយករដ្ឋមន្រ្តី តែងតែនៅជាប់ជាមួយប្រជាជនកម្ពុជាគ្រប់ពេលវេលា គ្រប់កាលៈទេសៈ ជាពិសេសក្នុងពេលដែលប្រជាពលរដ្ឋជួបប្រទះនឹងការលំបាកនោះ។
យោងតាមលទ្ធផលបឋមក្រៅផ្លូវការ ដែលប្រកាសដោយគណៈកម្មាធិការជាតិរៀបចំការបោះឆ្នោតជ្រើសតាំងតំណាងរាស្រ្តនីតិកាលទី៥ បានឲ្យដឹងថា គណបក្សប្រជាជនកម្ពុជាទទួលបានអាសនៈចំនួន៦៨ ចំណែកគណបក្សសង្រ្គោះជាតិ ដែលជាគណបក្សប្រឆាំងទទួលបានអាសនៈចំនួន៥៥៕