Wednesday, August 14, 2013
អគ្គទេសាភិបាលប្រទេសនូវែលហ្សេឡង់ទទួលស្គាល់ថាការបោះឆ្នោតនៅកម្ពុជាប្រព្រឹត្តទៅដោយសេរី ត្រឹមត្រូវ គ្មានអំពើហឹង្សា
ឯកឧត្តម ឧត្តមសេនីយ៍ឯក Sir Jerry Mateparae អគ្គទេសាភិបាល នៃប្រទេសនូវែលហ្សេឡង់មានប្រសាសន៍នារសៀលថ្ងៃទី១០ ខែសីហា ឆ្នាំ២០១៣ បានចាត់ទុកលទ្ធផលនៃការបោះឆ្នោតជ្រើសតាំងតំណាងរាស្រ្តនីតិកាលទី៥ កាលពីថ្ងៃទី២៨ ខែកក្កដា ឆ្នាំ២០១៣ ថា ប្រព្រឹត្តទៅដោយសេរី ត្រឹមត្រូវ គ្មានអំពើហឹង្សា និងដោយសន្តិភាព។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តី ក្នុងជំនួបពិភាក្សាជាមួយសម្តេចអគ្គមហាសេនាបតីតេជោ ហ៊ុន សែន នៅវិមានសន្តិភាព ឯកឧត្តម ឧត្តមសេនីយ៍ឯក Sir Jerry Mateparae បានមានប្រសាសន៍ថា ឯកឧត្តមសូមទទួលស្គាល់លទ្ធផលនៃការបោះឆ្នោតជ្រើសតាំងតំណាងរាស្រ្តនីតិកាលទី៥ កាលពីថ្ងៃទី២៨ ខែកក្កដា ឆ្នាំ២០១៣ ថា ប្រព្រឹត្តទៅដោយសេរី ត្រឹមត្រូវ គ្មានអំពើហឹង្សា និងដោយសន្តិភាព ជាមួយគ្នានេះ ឯកឧត្តម សូមគាំទ្រនូវរាល់នីតិវិធី ដែលកំពុងតែដំណើរការក្នុងការត្រួតពិនិត្យលទ្ធផលបោះឆ្នោតផងដែរ។
ឯកឧត្តម ឧត្តមសេនីយ៍ឯក Sir Jerry Mateparae បានថ្លែងថា ឯកអគ្គរដ្ឋទូតនូវែលហ្សេឡង់ប្រចាំកម្ពុជាបានចូលរួមធ្វើជាអ្នកសង្កេតការណ៍នៃដំណើរការបោះឆ្នោតនេះ ហើយតាមការវាយតំលៃរបស់ឯកឧត្តមឯកអគ្គរដ្ឋទូត ដែលឯកឧត្តមទទួលបាននោះ គឺការបោះឆ្នោតកាលពីថ្ងៃទី២៨ ខែកក្កដា បានប្រព្រឹត្តទៅដោយគ្មានអំពើហឹង្សា និងដោយមានការចូលរួមយ៉ាងច្រើនកុះករពីសំណាក់ប្រជាជនកម្ពុជា។ ឯកឧត្តម Jerry Mateparae មានប្រសាសន៍ថា ដំណើរទស្សនកិច្ចរបស់ឯកឧត្តមមកកាន់ប្រទេសកម្ពុជានៅពេលនេះ គឺដើម្បីបញ្ជាក់នូវការប្តេជ្ញាចិត្ត របស់ប្រទេសនូវែលហ្សេឡង់ពាក់ព័ន្ធទៅនឹងវិស័យធនាគារនៅក្នុងប្រទេសកម្ពុជា និងម៉្យាងវិញទៀត ដើម្បីជំរុញទំនាក់ទំនងរវាងប្រជាជន និងប្រជាជនដែលជាកត្តាដ៏មានសារៈសំខាន់ ក្នុងការជំរុញទំនាក់ទំនងកិច្ចសហប្រតិបត្តិការនៃប្រទេសទាំងពីរ ឲ្យកាន់តែរឹងមាំរីកចម្រើនទ្វេឡើងថែមទៀត។
សម្តេចតេជោនាយករដ្ឋមន្រ្តីបានមានប្រសាសន៍ចាត់ទុកថា ដំណើរទស្សនកិច្ច របស់ឯកឧត្តមអគ្គទេសាភិបាល នៃប្រទេសនូវែលហ្សេឡង់មកកាន់ប្រទេសកម្ពុជានៅពេលនេះ នឹងពង្រឹងបន្ថែមទៀតនូវទំនាក់ទំនងកិច្ចសហប្រតិបត្តិការនៃប្រទេសទាំងពីរកម្ពុជា-នូវែលហ្សេឡង់ឲ្យកាន់តែរឹងមាំថែមទៀត។
សម្តេចតេជោនាយករដ្ឋមន្រ្តី បានថ្លែងនូវអំណរគុណជូនចំពោះរដ្ឋាភិបាល និងប្រជាជននូវែលហ្សេឡង់ ដែលបានចូលរួមចំណែកក្នុងការស្វែងរកសន្តិភាព ពិសេសបានបញ្ជូនកម្លាំងតាមរយៈអ៊ុនតាក់ ដើម្បីស្វែងរកសន្តិភាព និងការបង្រួបបង្រួមជាតិនៅកម្ពុជា។ សម្តេចនាយករដ្ឋមន្រ្តីក៏បានថ្លែងនូវអំណរគុណជូនចំពោះប្រជាជននូវែលហ្សេឡង់ ដែលបានផ្តល់នូវជំនួយអភិវឌ្ឍន៍ដល់ប្រទេសកម្ពុជាក្នុងនោះរួមទាំងជំនួយដល់ការអភិវឌ្ឍធនធានមនុស្សផងដែរ។
សូមបញ្ជាក់ថា ក្នុងអំឡុងពេលទស្សនកិច្ចរយៈពេល ៥ថ្ងៃនេះ ឯកឧត្តមអគ្គទេសាភិបាលនូវែលហ្សេឡង់ និងលោកជំទាវក៏បានចូលក្រាបបង្គំគាល់ព្រះករុណា ព្រះមហាក្សត្រ និងបានជួបដាច់ដោយឡែកជាមួយសម្តេច ហេង សំរិន ប្រធានរដ្ឋសភា និងជួបជាមួយឯកឧត្តម សាយ ឈុំ អនុប្រធានទី ១ ព្រឹទ្ធសភាផងដែរ៕
Subscribe to:
Posts (Atom)