ថ្លែងនៅក្នុងពិធីបើកកិច្ចប្រជុំរដ្ឋមន្រ្តីទទួលបន្ទុកសុខុមាលភាពសង្គម
និងអភិវឌ្ឍន៍អាស៊ានលើកទី៨ កិច្ចប្រជុំរដ្ឋមន្រ្តីទទួលបន្ទុកសុខុមាលភាព និងអភិវឌ្ឍន៍អាស៊ានបូកបីលើកទី៤
និងកិច្ចប្រជុំពាក់ព័ន្ធជាច្រើនទៀត សម្តេចតេជោនាយករដ្ឋមន្រ្តីមានប្រសាសន៍ថា
រាជរដ្ឋាភិបាលនីតិកាលទី៥ នៃរដ្ឋសភា ដែលនឹងបង្កើតឡើងក្នុងពេលឆាប់ៗនេះ នឹងផ្តោតការយកចិត្តទុក
ដាក់ខ្ពស់ និងបង្កើនកិច្ចប្រឹងប្រែងទ្វេដង ដើម្បីអភិវឌ្ឍន៍វិស័យសង្គមកិច្ចឲ្យមានវិសាលភាពទូលំទូលាយ
និងកាន់តែស៊ីជម្រៅថែមទៀត ដើម្បីធ្វើឲ្យសុខុមាលភាពរបស់ប្រជាជនមានស្ថានភាពកាន់តែប្រសើរឡើង
តាមរយៈការពង្រឹងសេវាសង្គមកិច្ច សម្រាប់ជួយជនរងគ្រោះ និងជនងាយរងគ្រោះគ្រប់ប្រភេទ
ព្រមទាំងបង្កើនប្រព័ន្ធសន្តិសុខសង្គមឲ្យកាន់តែរឹងមាំ សម្រាប់ធានារ៉ាប់រងចំពោះហានិភ័យសង្គមជាយថាហេតុ
និងដើម្បីធ្វើឲ្យសេវាសង្គមកិច្ចកាន់តែនៅកៀកនឹងប្រជាជន ព្រមទាំងមានការចូលរួមដ៏សកម្មពីប្រជាជនផងដែរ។
សម្តេចតេជោថ្លែងថា កិច្ចប្រជុំដែលប្រារព្ធនៅពេលនេះគឺ
ជាព្រឹត្តិការណ៍ដ៏មានសារៈសំខាន់ សម្រាប់រួមចំណែកធ្វើឲ្យសម្រេចបាននូវគោលដៅដ៏ពិសិដ្ឋរបស់យើង
ក្នុងចំណោមសសរស្ដម្ភទាំង៣ ក្នុងនោះមានការលើកកម្ពស់សុខុមាលភាព និងជីវភាពរស់នៅរបស់ប្រជាជនអាស៊ាន
តាមរយៈការផ្តល់ឲ្យប្រជាពលរដ្ឋទទួលបានកាលានុវត្តភាពស្មើគ្នា សម្រាប់ការអភិវឌ្ឍសុខុមាលភាព
និងយុត្តិធម៌សង្គម ជាពិសេស«ការអភិវឌ្ឍសេវាសង្គមកិច្ចសម្រាប់មនុស្សគ្រប់គ្នា»។
កិច្ចប្រជុំជាច្រើនដែលបានប្រព្រឹត្តទៅនៅខេត្តសៀមរាប
ដែលចូលរួមដោយរដ្ឋមន្រ្តីទទួលបន្ទុក សុខុមាលភាពសង្គមអាស៊ាន និងអភិវឌ្ឍន៍អាស៊ាន
ដោយរួមមានទាំងកិច្ចប្រជុំបូកបីផងនោះ បានបង្ហាញឲ្យឃើញយ៉ាងច្បាស់អំពីចំណងមិត្តភាព
និងកិច្ចសហប្រតិបត្តិការដ៏រឹងមាំរបស់អាស៊ាន ក្នុងការប្តេជ្ញាបន្តធ្វើការជាមួយគ្នាយ៉ាងស្វាហាប់ឆ្ពោះទៅរកការកសាង
«សហគមន៍អាស៊ានឆ្នាំ២០១៥» ដោយផ្អែកលើសសរស្តម្ភទាំង៣ គឺ«សហគមន៍នយោបាយ
និងសន្តិសុខអាស៊ាន» «សហគមន៍សេដ្ឋកិច្ចអាស៊ាន» និងសហគមន៍សង្គម-វប្បធម៌អាស៊ាន»ដែលមានភាពប្រទាក់ក្រឡាគ្នា
និងមានការពាក់ព័ន្ធគ្នាទៅវិញទៅមកមិនអាចកាត់ផ្តាច់បាននោះ។ សម្តេចតេជោមានប្រសាសន៍ដោយរំពឹងទុកថា
«ខ្ញុំសង្ឃឹមថា កិច្ចពិភាក្សាជាដៃគូនេះនឹងបង្ហាញនូវកិច្ចសហប្រតិបត្តិការយ៉ាងជិតស្និទ្ធ
និងទទួលបានលទ្ធផលជាផ្លែផ្កាដ៏ល្អប្រសើរច្រើនទៀតជាមិនខានឡើយ។
សម្តេចតេជោនាយករដ្ឋមន្ត្រីបានមានប្រសាសន៍ថា
មុនដំណាច់ទសវត្សរ៍ទី ១ នៃសតវត្សទី ២១ នេះប្រទេសកម្ពុជាមានបំណងនឹងដណ្តើមកាន់កាប់នូវជោគវាសនារបស់
ខ្លួនឡើងវិញឲ្យបានពេញលេញ ហើយក្លាយខ្លួនជាដៃគូពិតប្រាកដក្នុងកិច្ចការតំបន់
និងពិភពលោក ព្រមទាំងក្លាយខ្លួនជាប្រជាជាតិ ដែលមានសេរីភាពពិតប្រាកដ និងរួចផុតពីភាពក្រីក្រ។
ឯកឧត្តម
អ៊ិត សំហេង រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទាថ្លែងថា
កិច្ចប្រជុំរដ្ឋមន្រ្តីទទួលបន្ទុកសុខុមាលភាពសង្គម និងអភិវឌ្ឍន៍អាស៊ានលើកទី៨
កិច្ចប្រជុំរដ្ឋមន្រ្តីទទួលបន្ទុកសុខុមាលភាព
និងអភិវឌ្ឍន៍អាស៊ានបូកបីលើកទី៤ និងកិច្ចប្រជុំពាក់ព័ន្ធលើកនេះប្រព្រឹត្តទៅ
ក្រោមប្រធានបទ «ការអភិវឌ្ឍសេវាសង្គមកិច្ចសម្រាប់មនុស្សគ្រប់រូប»
ដោយផ្តោតលើសុខុមាលភាពកុមារ ជនពិការ និងមនុស្សចាស់
ព្រោះកុមារ ជនពិការ និងមនុស្សចាស់គឺជាក្រុមជនងាយរងគ្រោះ ដែលត្រូវបានផ្តល់អាទិភាពខ្ពស់នៅក្នុងក្របខ័ណ្ឌយុទ្ធសាស្រ្តអាស៊ានស្តីពីសុខុមាលភាពសង្គម
និងការអភិវឌ្ឍ(២០១១-២០១៥)។ កម្ពុជាពិតជាមានកិត្តិយស និងមោទនភាពក្រៃលែង
ដោយបានទទួលធ្វើជាម្ចាស់ផ្ទះនៃកិច្ចប្រជុំលើកនេះប្រកបដោយភាពម្ចាស់ការ
និងការទទួលខុសត្រូវ សំដៅឆ្ពោះទៅសម្រេចឲ្យបាននូវគោលដៅរួម ដូចមានចែងនៅក្នុងធម្មនុញ្ញអាស៊ាន
ពោលគឺការបង្កើតសហគមន៍អាស៊ាននៅឆ្នាំ ២០១៥។
នៅក្នុងពិធីបើកកិច្ចប្រជុំរដ្ឋមន្រ្តីទទួលបន្ទុកសុខុមាលភាពសង្គម
និងអភិវឌ្ឍន៍អាស៊ានលើកទី ៨ កិច្ចប្រជុំរដ្ឋមន្រ្តីទទួលបន្ទុកសុខុមាលភាព និងអភិវឌ្ឍន៍អាស៊ានបូកបីលើកទី៤នេះ
សម្តេចតេជោនាយករដ្ឋមន្រ្តីបានផ្តល់អនុសាសន៍ជា ច្រើនដែលមានដូចជា៖
ទី១-ដើម្បីឈានទៅពង្រឹងសសរស្តម្ភសហគមន៍សង្គមវប្បធម៌អាស៊ាន
ត្រូវយកចិត្តទុកដាក់ លើកកម្ពស់នូវកិច្ចគាំពារសង្គម ទាំងថ្នាក់ជាតិ និងថ្នាក់ក្រោមជាតិឲ្យស្របតាមបរិការណ៍នៃប្រទេសជាសមាជិកអាស៊ាន
ដើម្បីធ្វើឲ្យមនុស្សគ្រប់រូប ពិសេសអ្នកដែលមានជីវភាពក្រីក្រ និងជនងាយរងគ្រោះ
ជនពិការ ជនចាស់ជរា យុវជនបោះបង់ការសិក្សា ពលករចំណាកស្រុក
និងជនរងគ្រោះផ្សេងៗទៀត មានសិទ្ធិទទួលបាននូវកិច្ចគាំពារសង្គមស្មើៗគ្នា
និងសេវាសំខាន់ៗដែលជាតម្រូវការចាំបាច់សម្រាប់ការរស់នៅរបស់ពួក គេ។
ទី២-ការអនុវត្តកិច្ចគាំពារសង្គម
គឺជាសមិទ្ធផលនៃរដ្ឋជាសមាជិកអាស៊ាន និងជាបញ្ហាអន្តរ វិស័យមួយ ដូច្នេះក្នុងការអនុវត្តតម្រូវឲ្យមានវិធីសាស្រ្តសមស្រប
ដោយមានការចូលរួមពីគ្រប់ភាគីពាក់ព័ន្ធ។
ទី៣-កំណត់ឲ្យបានច្បាស់លាស់នូវគោលការណ៍យុទ្ធសាស្រ្ត
និងយន្តការក្នុងការពង្រឹកវិសាលភាពកិច្ចគាំពារសហគមន៍របស់យើង។
ទី៤-ត្រូវរៀបចំឲ្យមានផែនការសកម្មភាពអនុវត្តន៍ការត្រួតពិនិត្យ
និងការតាមដានវាយតម្លៃនៃ សេវាកិច្ចគាំពារសង្គមគ្រប់កម្រិត ដើម្បីធានាបាននូវការឆ្លើយតបទៅនឹងតម្រូវការរបស់ប្រជាជនទាំងអស់គ្នា។
ទី៥-បន្តធ្វើការរួមគ្នាបន្តថែមទៀត
ដើម្បីបន្តភាពស្នូលរបស់អាស៊ានក្នុងតំបន់ និងបន្តពង្រឹងកិច្ចសហប្រតិបត្តិការនៅគ្រប់កម្រិត
ជាពិសេសតាមរយៈក្របខ័ណ្ឌអាស៊ាន និងអាស៊ានបូកបី ដោយផ្អែកលើផែនការសកម្មភាពជាក់ស្តែងស្តីពីកិច្ចសហប្រតិបត្តិការ
នៃសង្គមវប្បធម៌អាស៊ាន។ ក្នុងនោះត្រូវធ្វើឲ្យសកម្មថែមទៀត ក្នុងការលើកឡើងនូវអនុសាសន៍
និងវិធានការនានា ដើម្បីលើកកម្ពស់កិច្ចសហប្រតិបត្តិការអាស៊ាន។
ទី៦-ពង្រឹង និងពង្រីកសហប្រតិបត្តិការល្អក្នុងចំណោមរដ្ឋមន្រ្តីទទួលបន្ទុក
សុខុមាលភាពសង្គម និងអភិវឌ្ឍន៍អាស៊ាន ដែលជាគន្លឹះសំខាន់សម្រាប់ដោះស្រាយបញ្ហានានាក៏ដូចជាបញ្ហាប្រឈមទាំងឡាយ
សំដៅធ្វើឲ្យគោលការណ៍នៃការអនុវត្តសេវាសង្គមកិច្ចសម្រាប់ទាំងអស់គ្នាទទួលបាននូវភាពរលូន
និងជោគជ័យ។ ក្នុងនោះត្រូវផ្តោតការសិក្សាលើសង្គម ហើយបន្តស្វែងយល់ឲ្យកាន់តែស៊ីជម្រៅ
លើលទ្ធភាពដែលអាចកើតឡើងចំពោះប្រជាពលរដ្ឋ ពិសេសជនក្រីក្រ និងជនងាយរងគ្រោះ
ដែលជាបញ្ហាប្រឈមកើតចេញពីការធ្វើសមាហរណកម្មអាស៊ាននៅឆ្នាំ២០១៥ ។
ទី៧-ពង្រឹង និងពង្រីកកិច្ចសហប្រតិបត្តិការល្អក្នុងចំណោមស្ថាប័នជាតិ
និងអន្តរជាតិ ដៃគូអភិ វឌ្ឍន៍អង្គការមិនមែនរដ្ឋាភិបាល ដើម្បីកៀរគរប្រភពធនធានថវិកា
និងបច្ចេកទេសក្នុងការចូលរួមអភិវឌ្ឍន៍វិស័យគាំពារសុខុមាលភាពសង្គម ឲ្យមានការរីកចម្រើន។
ប្រការនេះកិច្ចគាំពារសង្គម គឺជាការវិនិយោគលើការអភិវឌ្ឍជាតិ ហើយដែលបានផ្តល់មកវិញនូវការកាត់បន្ថយភាពក្រីក្រចំពោះប្រជាពលរដ្ឋយើង។
ទី៨-យកចិត្តទុកដាក់ពិភាក្សានិងផ្តល់អនុសាសន៍ទៅលើគោលការណ៍យុទ្ធសាស្រ្ត
និងយន្តការដែលមានក្នុងសេចក្តីព្រាង នៃសេចក្តីថ្លែងការណ៍អាស៊ានស្តីពីការពង្រឹងកិច្ចគាំពារសង្គម
និងសេចក្តីថ្លែងការណ៍ស្តីពីការលុបបំបាត់អំពើហិង្សាលើស្រ្តី និងកុមារ
ដើម្បីជាមូលដ្ឋានសម្រាប់កិច្ចប្រជុំកំពូល អាស៊ាននៅប្រទេសព្រុយណាដារ៉ូសាឡឹម
នាខែតុលា ឆ្នាំ ២០១៣ ខាងមុខនេះ។
កិច្ចប្រជុំរដ្ឋមន្រ្តីទទួលបន្ទុកសុខុមាលភាពសង្គម
និងអភិវឌ្ឍន៍អាស៊ាន និងកិច្ចប្រជុំពាក់ព័ន្ធ
តែងត្រូវបានប្រារព្ធឡើងក្នុងរយៈពេល ៣ ឆ្នាំម្តង
ដើម្បីពិនិត្យពិភាក្សាលើបញ្ហាទាក់ទងនឹងការលើក កម្ពស់សុខុមាលភាព
និងជីវភាពរស់នៅរបស់ប្រជាជនអាស៊ាន តាមរយៈការផ្តល់នូវឱកាសស្មើគ្នាក្នុងការទទួលបានសេវាសមស្រប
សម្រាប់ការអភិវឌ្ឍមនុស្ស សុខុមាលភាព និងយុត្តិធម៌សង្គម។កិច្ចប្រជុំនេះប្រារព្ធឡើងលើកទី១
នៅឆ្នាំ១៩៧៧ នៅទីក្រុងហ្សាកាតា ប្រទេសឥណ្ឌូណេស៊ី និងកិច្ចប្រជុំបន្តបន្ទាប់ត្រូវបានប្រារព្ធឡើងនៅក្នុងបណ្តា
ប្រទេសដែលជាសមាជិកអាស៊ាន។ ប្រទេសកម្ពុជាបានចូលរួមក្នុងកិច្ចប្រជុំមន្រ្តីទទួលបន្ទុក
សុខុមាលភាពសង្គម និងអភិវឌ្ឍន៍អាស៊ាន ចាប់តាំងពីកិច្ចប្រជុំលើកទី៤ នៅប្រទេសសិង្ហបុរី
កាលពីឆ្នាំ ២០០១ មកម្ល៉េះ។
សូមបញ្ជាក់ផងដែរថា
នៅមុនពិធីបើកកិច្ចប្រជុំថ្នាក់រដ្ឋមន្រ្តីទទួលបន្ទុក សុខុមាលភាពសង្គម និងការអភិវឌ្ឍអាស៊ានលើកទី៨
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាបានទទួលជួបពិភាក្សាការងារ
ជាមួយគណៈប្រតិភូរដ្ឋមន្រ្តីទទួល បន្ទុកសុខុមាលភាពសង្គម និងអភិវឌ្ឍ អាស៊ានលើកទី៨
បូកបី ដឹកនាំដោយឯកឧត្តម Pehin
Dato Paduka Haji Hazair Haji Abdullah រដ្ឋមន្រ្តីវប្បធម៌ យុវជន
និងកីឡា នៃ ប្រទេសប្រុយណេ។ ឯកឧត្តម Pehin Dato Paduka Haji Hazair Haji
Abdullah មានប្រសាសន៍ថ្លែង នូវអំណរគុណជូនចំពោះរាជរដ្ឋាភិបាលកម្ពុជា
ដែលបានរៀបចំ និងទទួលស្វាគមន៍គណៈប្រតិភូទាំង អស់ក្នុងភាពកក់ក្តៅបំផុត៕