Monday, September 23, 2013
រាជរដ្ឋាភិបាលបង្ហាញសៀវភៅស ស្តីពីដំណើរការបោះឆ្នោតជ្រើសតាំងតំណាងរាស្ត្រអាណត្តិទី៥
នៅទីស្តីការគណៈរដ្ឋមន្ត្រីនាព្រឹកថ្ងៃទី២០ ខែកញ្ញា ឆ្នាំ២០១៣ ឯកឧត្តមកែវ រ៉េមី រដ្ឋលេខាធិការនៃទីស្ដីការគណៈរដ្ឋមន្ត្រី និងជាអនុប្រធានអង្គភាពព័ត៌មាន និងប្រតិកម្មរហ័ស បានប្រកាសថា ការស្នើសុំឲ្យបង្កើតគណៈកម្មការឯករាជ្យស៊ើបអង្កេតការបោះឆ្នោត ដោយបក្សប្រឆាំងអត់ទៅរួចទេ ព្រោះវាហួសកាលបរិច្ឆេទ និងនីតិវិធីទៅហើយ ហើយរដ្ឋសភានឹងបើកសម័យប្រជុំលើកដំបូងនៅថ្ងៃទី២៣ ខែកញ្ញា ឆ្នាំ២០១៣ ក្រោមព្រះរាជាធិបតីភាពរបស់ព្រះមហាក្សត្ស។ ការប្រកាសរបស់ឯកឧត្តម កែវ រ៉េមី បានធ្វើឡើងនៅក្នុងសន្និសីទសារព័ត៌មានមួយដើម្បីផ្សព្វផ្សាយអំពីសៀវភៅស ស្តីពីការបោះឆ្នោតជ្រើសតាំងតំណាងរាស្ត្រនីតិកាលទី៥ នៃរដ្ឋសភា ដែលបានប្រព្រឹត្តទៅកាលពីថ្ងៃទី២៨ ខែកក្កដា កន្លងទៅ ដែលសៀវភៅនេះមានកត់ត្រាអំពីព័ត៌មានទាំងឡាយ ស្ដីពីដំណើរការបោះឆ្នោតពាក់ព័ន្ធនឹងនីតិវិធីអនុវត្ដនៅគ្រប់ដំណាក់កាល ការដោះស្រាយបណ្ដឹង និងការចោទប្រកាន់នានា។
ឯកឧត្តម កែវ រ៉េមី បានលើកឡើងថា បន្ទាប់ពីការបោះឆ្នោតកន្លងទៅ មានអង្គការសង្គមស៊ីវិលខ្លះបានផ្សព្វផ្សាយ ធ្វើឲ្យមានការភ័ន្តច្រឡំចំពោះលទ្ធផលនៃការបោះឆ្នោតនោះ ជាពិសេសអង្គការខុមហ្វ្រេល ដែលអង្គការនេះបានផ្សព្វផ្សាយក្នុងរបៀបជាល្បិចកលមួយ ឲ្យមានការភ័ន្តច្រឡំ ដោយមិនបង្ហាញនូវភាពត្រឹមត្រូវនោះឡើយ។ ឯកឧត្តម កែវ រ៉េមី បានបញ្ជាក់ថា ការបោះឆ្នោតនៅកម្ពុជា គឺធ្វើឡើងតាមគោលការណ៍ស្ម័គ្រចិត្ត មិនមែនកំណត់ដោយច្បាប់តម្រូវឲ្យប្រជាពលរដ្ឋត្រូវតែទៅបោះនោះទេ ដោយប្រជាពលរដ្ឋម្នាក់ៗអាចទៅបោះឆ្នោតក៏បាន មិនទៅបោះឆ្នោតក៏បាន គ្មានច្បាប់ឯណាកំណត់ថា ត្រូវទៅបោះឆ្នោតនោះទេ។ ប៉ុន្តែទោះជាយ៉ាងនេះក្តី តាមលទ្ធផលដែលបានបង្ហាញកន្លងមកនេះបញ្ជាក់ថា ភាគរយនៃការចូលរួមបោះឆ្នោតរបស់ពលរដ្ឋកម្ពុជាខ្ពស់ជាងនៅសហរដ្ឋអាមេរិក និងនៅប្រទេសដទៃទៀត ដែលមានប្រជាពលរដ្ឋជាង ៦០ភាគរយបានចេញទៅបោះឆ្នោត ប៉ុន្តែនៅអាមេរិកវិញមានតែជាង ៣០ភាគរយប៉ុណ្ណោះ នៃប្រជាពលរដ្ឋដែលមានឈ្មោះបោះឆ្នោតបានចេញទៅបោះឆ្នោត។
ឯកឧត្តម កែវ រ៉េមី បានបញ្ជាក់ទៀតថា ការបោះឆ្នោតនៅកម្ពុជាបានប្រព្រឹត្តទៅដោយស្ងប់ស្ងាត់ល្អណាស់ ប្រជាពលរដ្ឋបានផុលផុសចេញទៅបោះឆ្នោតដោយគ្មានការគំរាមកំហែង ភ័យខ្លាចពីការបំភិតបំភ័យពីគណបក្សណាមួយឡើយ ហើយគាត់បានបញ្ចេញឆន្ទៈរបស់ខ្លួនតាមគំនិតដែលមានស្រាប់ និងបានបោះឆ្នោតទៅឲ្យគណបក្សមួយដែលគាត់ស្រឡាញ់ចូលចិត្ត។ ឯកឧត្តម កែវ រ៉េមី បានឲ្យដឹងថាទោះជាយ៉ាងនេះក្តី គណបក្សសង្គ្រោះជាតិនៅតែលើកឡើងពីភាពមិនប្រក្រតី និងទាមទារជាប់មិនដាច់ចំពោះលក្ខខណ្ឌផ្សេងៗ ដោយមិនគិតពីអ្វីដែលជាធាតុពិតនោះឡើយ។
ឯកឧត្តម កែវ រ៉េមីបានបញ្ជាក់ថា គណបក្សប្រជាជនកម្ពុជាមិនបានលួចឆ្នោតដូចការចោទប្រកាន់នោះទេ ហើយប្រសិនបើលួចក៏មិនដែលអ្នកណាល្ងង់លួចពី ៩០អាសនៈ ធ្លាក់មកនៅ ៦៨អាសនៈនោះដែរ។ នេះគឺជាធាតុពិតដែលជាសេចក្តីសម្រេចរបស់ប្រជាពលរដ្ឋកម្ពុជា ហើយក៏ជាលទ្ធផលមួយពិតប្រាកដតាមរយៈការបោះឆ្នោត ដែលត្រូវតែទទួល ស្គាល់នៅការពិតនេះ។ លោកបញ្ជាក់ថា បើនិយាយពីមិនសុខចិត្តចំពោះលទ្ធផលមានតែគណបក្សប្រជាជនទេ ដែលត្រូវតវ៉ា និងមិនសុខចិត្តចំពោះលទ្ធផលនេះ ពីព្រោះមានសមាជិកច្រើនណាស់បានសម្តែងការមិនពេញចិត្ត។ លោកបានលើកឡើងដែរថា នៅថ្ងៃបោះឆ្នោតមានអ្នកសង្កេតការណ៍ជាតិ អន្តរជាតិ ក្នុងនោះក៏មានសកម្មជននៃគណបក្សសង្គ្រោះជាតិផងដែរ ដែលមានចុះហត្ថលេខាទទួលស្គាល់លើលទ្ធផលក្រោយពីរាប់សន្លឹកឆ្នោត។ នៅពេលរាប់សន្លឹកឆ្នោតឃើញមួយគូសមួយ ឃើញពីរគូសពីរ គ្មានអ្នកណាអាចបន្លំបានទេ ហើយក្រោយមកអន្តរជាតិ ក៏បានវាយតម្លៃនូវភាពប្រសើរនៃដំណើរការបោះឆ្នោតនេះផងដែរ។
ទាក់ទងទៅនឹងការរាំងស្ទះដល់ការប្រជុំសភាបង្កឡើងដោយបក្សប្រឆាំង ឯកឧត្តម កែវ រ៉េមី បានបញ្ជាក់ថា ការប្រជុំសភាដំបូងនេះមិនចាំបាច់ ១២៣រូបទេ ចំនួន ១២៣រូប គឺគ្រាន់តែជាការរៀបចំបញ្ជីសម្រាប់ការបោះឆ្នោតតែប៉ុណ្ណោះ ប៉ុន្តែការប្រជុំដំបូងមិនចាំបាច់មាន១២៣រូបនោះទេ ហើយគណបក្សប្រជាជនកម្ពុជា ក៏មានសំឡេងលើសពី៥០បូក១ នៅក្នុងដំណើរការរដ្ឋសភានេះផងដែរ។ បញ្ហានេះក៏មានអ្នកច្បាប់ជាច្រើនធ្លាប់បកស្រាយរួចរាល់ហើយអំពីការប្រជុំសភាដំបូង និង ការបង្កើតរដ្ឋសភា និងរដ្ឋាភិបាលថ្មីនេះផងដែរ។
ឯកឧត្តមបន្តថា យោងតាមរដ្ឋធម្មនុញ្ញ យោងតាមបទបញ្ជាផ្ទៃក្នុងនៃរដ្ឋសភា ការអនុម័តនៃការបង្កើតក្បាលម៉ាស៊ីនដឹកនាំរដ្ឋសភា និងការបង្កើតរាជរដ្ឋាភិបាលនីតិកាលទី៥ អត់ត្រូវការសំឡេងអនុម័ត ២ ភាគ ៣ ទេ ដោយយើងបានធ្វើវិសោធនកម្ម រដ្ឋធម្មនុញ្ញរួចមកហើយ គឺមក ៥០% បូក១។
ឯកឧត្តម កែវ រ៉េមី បានបញ្ជាក់ទៀតថា ចំពោះករណីការប្រកាសរបស់គណបក្សប្រឆាំង ក្នុងការបន្តធ្វើបាតុកម្មតទៅទៀតនោះ លោកយល់ឃើញថា គណបក្សប្រឆាំងមិនបានឈ្នះឆ្នោតទេ តែគណបក្សប្រឆាំងចង់ដឹកនាំប្រទេស ហើយគណបក្សប្រឆាំងបានបង្កបរិយាកាសដោយបំភ្លៃនៃតួលេខបោះឆ្នោតទាំងអស់ ដើម្បីញុះញង់បញ្ចេះប្រជាពលរដ្ឋដែលពុំបានយល់ច្បាស់ឲ្យជ្រួលច្របល់ ទៅតាមគណបក្សប្រឆាំង ដែលធ្វើឲ្យមានបញ្ហាអស្ថិរភាពអសន្តិសុខក្នុងសង្គមជាតិ។ ម្យ៉ាងទៀត បើគណបក្សសង្គ្រោះជាតិដែលមានសំឡេងឆ្នោតជាង ២លាននាក់ បង្កីតនូវការបញ្ឆេះកំហឹងតាមការអូសទាញរបស់មេបក្សប្រឆាំង សួរថា ប្រជាពលរដ្ឋជាង ៣លាននាក់ គាំទ្របោះឆ្នោតជូនគណបក្សប្រជាជនកម្ពុជា ពួកគាត់សុខចិត្ដនៅស្ងៀមបានទេ?។
ឯកឧត្តម កែវ រ៉េមី បានបញ្ជាក់ថា ជាទម្លាប់របស់គណបក្សប្រឆាំងជារឿយៗបានប្រកាសថា ខ្លួននឹងមិនចូលរួមបោះឆ្នោត ឬបដិសេធលទ្ធផលបោះឆ្នោត។ ថ្ងៃបោះឆ្នោតមិនទាន់មកដល់ផង គណបក្សប្រឆាំងបានបដិសេធលទ្ធផលមុនការបោះឆ្នោតទៅហើយ ប៉ុន្ដែខ្លួននៅតែចូលរួមក្នុងការបោះឆ្នោតដដែល។ បញ្ហាត្រង់នេះឯកឧត្តម កែវ រ៉េមី បញ្ជាក់ថា ប្រសិនបើគណបក្សប្រឆាំង ឈ្នះឆ្នោតតើខ្លួនបដិសេធលទ្ធផលនៃការបោះឆ្នោតនេះដែរឬទេ?
Subscribe to:
Posts (Atom)