Friday, September 27, 2013
ឯកឧត្តមបណ្ឌិតសភាចារ្យ សុខ អាន ជំរុញឲ្យរដ្ឋមន្ត្រីថ្មីក្រសួងអប់រំយកចិត្តទុកដាក់អនុវត្តគោលការណ៍អប់រំសម្រាប់ទាំងអស់គ្នា
ឯកឧត្តមបណ្ឌិតសភាចារ្យ
សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី
នាព្រឹកថ្ងៃទី២៦ ខែកញ្ញា ឆ្នាំ២០១៣ បានផ្តល់អនុសាសន៍ឲ្យរដ្ឋមន្ត្រីថ្មីនៃក្រសួងអប់រំយុវជន
និងកីឡា យកចិត្តទុកដាក់ក្នុងការកសាងធនធានមនុស្ស
តាមរយៈនៃការអនុវត្តន៍គោលការណ៍ «ការអប់រំសម្រាប់ទាំងអស់គ្នា»
ឱ្យកាន់តែសកម្មនិងមានប្រសិទ្ធភាពបន្ថែមទៀត សំដៅធានាសមធម៌ក្នុងការទទួលបានសេវាអប់រំ
បន្តលើកកម្ពស់គុណភាពនិងប្រសិទ្ធភាពសេវាអប់រំគ្រប់កម្រិត ព្រមទាំងបន្តអភិវឌ្ឍស្ថាប័ន
និងសមត្ថភាពមន្ត្រីអប់រំ។
ក្នុងឱកាសអញ្ជើញជាតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាអាណត្តិទី៥ នៃរដ្ឋសភា
ក្នុងពិធីផ្ទេរ និងចូលកាន់តំណែងរដ្ឋមន្ត្រីក្រសួងអប់រំយុវជន និងកីឡា
គឺឯកឧត្តម ហង្ស ជួនណារ៉ុង ជំនួសឯកឧត្តម អ៊ឹម សិទ្ធី
ដែលត្រូវទៅបំពេញភារកិច្ចថ្មី ឯកឧត្តមបណ្ឌិតសភាចារ្យ សុខ អាន
បានមានប្រសាសន៍ឲ្យដឹងថា ប្រទេសមួយចំនួនដូចជា សិង្ហបុរី សាធារណរដ្ឋកូរ៉េ
មិនមែនជាប្រទេសដែលមានធនធានធម្មជាតិច្រើនដូចកម្ពុជានោះទេ
តែដោយសារតែគេមានមូលធនមនុស្ស ធ្វើឲ្យប្រទេសទាំងនោះមានសេដ្ឋកិច្ចរីកចម្រើន។
សម្រាប់ភារកិច្ចរបស់រដ្ឋមន្ត្រីក្រសួងអប់រំថ្មីអាណត្តិទី៥នេះ
ឯកឧត្តមបណ្ឌិតសភាចារ្យ សុខ អាន បានជំរុញឲ្យក្រសួងអប់រំយុវជន និងកីឡា យកចិត្តទុកដាក់ពង្រឹងគុណភាពអប់រំ
និងជួយតម្រង់ទិសការសិក្សារបស់យុវជន ឲ្យស្របតាមតម្រូវការទីផ្សារការងារ
ដើម្បីចៀសវាងភាពខ្វះ និងលើសរវាងមូលធនមនុស្សដែលបណ្តុះបណ្តាលបាន
និងទីផ្សារការងារដែលមានការរីកចម្រើន។
ឯកឧត្តមបណ្ឌិតសភាចារ្យ
សុខ អាន បានមានប្រសាសន៍ថា គុណភាពនៃការអប់រំ គឺជាគន្លឹះសម្រាប់ដោះស្រាយរាល់បញ្ហាប្រឈមនានា
ទាំងក្នុងអភិបាលកិច្ច ការអភិវឌ្ឍសេដ្ឋកិច្ចនិងសង្គម ក៏ដូចជាការអភិវឌ្ឍសហគមន៍
និងសង្គមគ្រួសារនីមួយៗ ហើយក្រសួងអប់រំ យុវជន និងកីឡា គឺជាតួអង្គដ៏សំខាន់មួយក្នុងចំណោមតួអង្គស្នូលនានា
នៅក្នុងការកសាងមូលធនមនុស្ស (Human
Capital) ឱ្យមានភាពរឹងមាំ ដើម្បីជាមូលដ្ឋានដ៏ចាំបាច់សម្រាប់ការធ្វើពិពិធកម្មសេដ្ឋកិច្ច
ការបង្កើនផលិតភាព និងសមត្ថភាពប្រកួតប្រជែង ដែលនឹងអនុញ្ញាតឱ្យកម្ពុជាចូលរួមប្រកបដោយប្រសិទ្ធភាព
និងសមធម៌ នៅក្នុងសហគមន៍អាស៊ាន នាឆ្នាំ២០១៥ ខាងមុខដ៏ខ្លី។
ដើម្បីសម្រេចនូវបេសកកម្មដ៏ធំធេងនិងជាគន្លឹះនេះ
ទាមទារឱ្យមានការសម្របសម្រួល និងការចូលរួមសហការយ៉ាងសកម្ម និងប្រកបដោយការទទួលខុសត្រូវខ្ពស់
រវាងក្រសួងអប់រំ យុវជន និងកីឡា និងក្រសួងស្ថាប័នពាក់ព័ន្ធទាំងអស់ ដូចជាក្រសួងការងារនិងបណ្តុះបណ្តាលវិជ្ជាជីវៈដែលទទួលបន្ទុកវិស័យអប់រំបណ្តុះបណ្តាលបច្ចេកទេស
និងវិជ្ជាជីវៈ (TVET) ក្រុមប្រឹក្សាជាតិមុខរបរ (NTB)
និងទីភ្នាក់ងារជាតិមុខរបរ (NEA) ព្រមទាំងវិស័យឯកជន
ដៃគូអភិវឌ្ឍន៍ និងអង្គការមិនមែនរដ្ឋាភិបាលនានា ដែលបំពេញការងារក្នុងវិស័យអប់រំ។
ឯកឧត្តមឧបនាយករដ្ឋមន្ត្រី
ក៏បានមានប្រសាសន៍ផ្តល់ជាអនុសាសន៍ឲ្យរដ្ឋមន្ត្រីថ្មី
នៃក្រសួងអប់រំយុវជន និងកីឡា រកវិធី
និងយកចិត្តទុកដាក់កាត់បន្ថយគម្លាតដែលនៅធំ រវាងអ្នកសិក្សាស្រាវជ្រាវ (Academic) និងអ្នកធុរៈកិច្ច
ដោយបង្កើតឲ្យមានការជួបគ្នារវាងអ្នកស្រាវជ្រាវ
និងអ្នកធុរៈកិច្ចដើម្បីអាចស្វែងយល់ពីគ្នា និងជួយគ្នាទៅវិញទៅមក។
សូមបញ្ជាក់ថា
នៅក្នុងកិច្ចប្រជុំពេញអង្គគណៈរដ្ឋមន្ត្រីលើកដំបូងក្នុងអាណត្តិទី៥
នៃរដ្ឋសភា នាថ្ងៃទី២៥ ខែកញ្ញា ឆ្នាំ២០១៣ នៅវិមានសន្តិភាព សម្តេចអគ្គមហាសេនាបតីតេជោ
ហ៊ុន សែន បានប្រកាសដាក់អនុវត្តន៍នូវ “យុទ្ធសាស្ត្រចតុកោណ” កំណើន សមធម៌ និងប្រសិទ្ធភាព
ដំណាក់កាលទី៣ បានផ្តោតចំណុចអាទិភាពជាច្រើនក្នុងវិស័យអប់រំផងដែរ៕
Subscribe to:
Posts (Atom)