កំណត់ហេតុនៃកិច្ចពិភាក្សា (R,D) ម្រាប់គម្រោងសាងសង់ មជ្ឈមណ្ឌលបណ្ដុះបណ្ដាលអាកាសចរណ៍ស៊ីវិលនៅកម្ពុជាហៅកាត់ថា (CATC) ដែលមានទឹកប្រាក់ចំនួន ១០,១លានដុល្លារអាមេរិកជាជំនួយឥតសំណងរបស់រដ្ឋាភិបាល និងប្រជាជននៃសាធារណរដ្ឋកូរ៉េ ត្រូវបានចុះហត្ថលេខាដោយ ឯកឧត្តមបណ្ឌិតសភាចារ្យ សុខ អានឧបនាយករដ្ឋមន្ដ្រីរដ្ឋមន្ដ្រី ទទួលបន្ទុក ទីស្ដីការគណៈរដ្ឋមន្ដ្រី និងលោកស្រី Baek Sook Hee តំណាងទីភ្នាក់ងារ សហប្រតិបត្ដិការអន្ដរជាតិកូរ៉េ (KOICA) ប្រចាំកម្ពុជានារសៀលថ្ងៃ សុក្រទី១១ ខែតុលា ឆ្នាំ២០១៣ នៅទីស្ដីការគណៈរដ្ឋមន្ដ្រីដោយមានការ ចូលរួមពីឯកឧត្តមគឹមហាន់ស៊ូឯកអគ្គរដ្ឋទូតនៃសាធារណរដ្ឋកូរ៉េនៅកម្ពូជា និងប្រតិភូរបស់ទីភ្នាក់ងារសហប្រតិបត្ដិការអន្ដរជាតិកូរ៉េ KOICA និងមន្ដ្រីរបស់ទីស្ដីការគណៈរដ្ឋមន្ដ្រី ជាច្រើនរូបទៀត។
ឯកឧត្តមបណ្ឌិត សុខ អាន ក្នុងនាមរាជរដ្ឋាភិបាលកម្ពុជាបានមានប្រសាសន៍ថ្លែងអំណរគុណចំពោះរដ្ឋាភិបាល និងប្រជាជននៃសាធារណរដ្ឋកូរ៉េសម្រាប់ការគាំទ្រ និងបន្ដកិច្ចសហប្រតិបត្ដិការជាមួយកម្ពុជា ក្នុងការផ្តល់ថវិការសាងសង់មជ្ឈមណ្ឌលបណ្ដុះបណ្ដាលអាកាសចរណ៍ស៊ីវិលជាលើកដំបូងនៅកម្ពុជា ដែលជាមជ្ឈមណ្ឌលបណ្ដុះបណ្ដាលដ៏មានសារសំខាន់។ ឯកឧត្តមឧបនាយករដ្ឋមន្ដ្រីបានមានប្រសាសន៍ឲ្យដឹងថាៈ គម្រោង"ការបង្កើតមជ្ឈមណ្ឌលបណ្ដុះបណ្ដាលអាកាសចរស៊ីវិលនៅក្នុងប្រទេសកម្ពុជា "គឺមានសារសំខាន់ខ្លាំងណាស់ក្នុងការជួយប្រទេសកម្ពុជា ដើម្បីទទួលបានចំណេះដឹង និងបច្ចេកវិទ្យាចាំបាច់ដើម្បីធ្វើឱ្យប្រសើរឡើងនូវវិស័យឧស្សាហកម្មអាកាសចរណ៍របស់ខ្លួន។ លើសពីនេះទៀតគម្រោងនេះ ក៏ជាឱកាសមួយដ៏មានសារសំខាន់សម្រាប់ប្រទេសកូរ៉េ ដើម្បីចែករំលែកបទពិសោធន៍ និងចំណេះដឹងរបស់ខ្លួននៅក្នុងវិស័យអាកាសចរណ៍ ក្នុងការពង្រឹងភាពជាដៃគូដ៏រឹងមាំ និងកិច្ចសហប្រតិបត្ដិការរវាងរដ្ឋាភិបាល និងប្រជាជននៃសាធារណរដ្ឋកូរ៉េ និងព្រះរាជាណាចក្រកម្ពុជា។ រាជរដ្ឋាភិបាលកម្ពុជាបានយកចិត្ដទុកដាក់ ជាពិសេសក្នុងការបណ្ដុះបណ្ដាលអ្នកជំនាញផ្នែកអាកាសចរណ៍ និងការអប់រំ ដើម្បីបង្កើនសមត្ថភាពជាតិ ដើម្បីឱ្យវិស័យអាកាសចរណ៍ដំណើរការទៅប្រកបដោយសុវត្ថិភាព ដែលជាការជំរុញបង្កើនវិស័យទេសចរណ៍ ដែលជាផ្នែកមួយដ៏សំខាន់ក្នុងការជំរុញកំណើនសេដ្ឋកិច្ច។
ឯកឧត្តមបណ្ឌិតឧបនាយករដ្ឋ មន្ដ្រីបានមានប្រសាសន៍ថា ឧស្សាហកម្មដឹកជញ្ជូនផ្លូវអាកាសបានដើរតួនាទីយ៉ាងសំខាន់នៅក្នុងសកម្មភាពសេដ្ឋកិច្ចពិភពលោក និងជាវិស័យមួយដែលមានការរីកលូតលាស់លឿនបំផុត។ ឯកឧត្តម សុខ អាន បានឲ្យដឹងថា ប្រទេសកម្ពុជាបានទទួលអ្នកដំណើរផ្លូវអាកាសចំនួន ៤,៣លាននាក់ ក្នុងឆ្នាំ២០១២ កើនឡើង១៤,៧ភាគរយ បើប្រៀបធៀបទៅក្នុងឆ្នាំ២០១១ មានអ្នកដំណើរផ្លូវអាកាសចំនួន ៣,៦៦ លាននាក់ ។ អ្នកដំណើរតាមផ្លូវអាកាសពីខែមករាដល់ខែសីហា ឆ្នាំ២០១៣ បានឡើងដល់៣,៣២លាននាក់ កើនឡើង១៥,៦ ភាគរយបើប្រៀបធៀប ទៅនឹង២,៧លាននាក់សម្រាប់រយៈ ពេលដូចគ្នាក្នុងឆ្នាំ២០១២ ។
សូមបញ្ជាក់ថា គម្រោងសាងសង់មជ្ឈមណ្ឌលបណ្ដុះបណ្ដាលអាកាសចរណ៍ស៊ីវិលនៅកម្ពុជានឹងត្រូវអនុវត្ដក្នុងរយៈពេល៤ឆ្នាំ ដោយចាប់អនុវត្ដពីខែតុលា ឆ្នាំ២០១៣ ដល់ឆ្នាំ២០១៧។ មជ្ឈមណ្ឌលបណ្ដុះបណ្ដាលអាកាសចរស៊ីវិល នឹងត្រូវសាងសង់ក្នុងអាកាសយានដ្ឋានអន្ដរជាតិភ្នំពេញ។ រដ្ឋាភិបាលសាធារណរដ្ឋកូរ៉េបានផ្ដល់ ១០,១លានដុល្លារអាមេរិក (USD1០,1០០,០០០) សម្រាប់សាងសង់មជ្ឈមណ្ឌលបណ្ដុះ បណ្ដាលអាកាសចរណ៍ស៊ីវិល ការបង្កើតផែនការមេ សម្រាប់អភិវឌ្ឍធនធានអាកាសចរណ៍ស៊ីវិលកម្ពុជាបញ្ជូន ជំនាញការកូរ៉េមកកម្ពុជាបណ្ដុះបណ្ដាលនៅប្រទេស និងផ្ដល់ឧបករណ៍បរិក្ខារ។
បើយោងទៅតាមរដ្ឋលេខាធិការដ្ឋានអាកាសចរណ៍ស៊ីវិលសម្រាប់ចំនួន ៥០ភាគរយនៃភ្ញៀវទេសចរអន្ដរជាតិមកកាន់ប្រទេសកម្ពុជា តាមផ្លូវអាកាស។ ការហោះហើរនេះបានឈានដល់ ៤៨.៧៨៩ ជើងក្នុងឆ្នាំ២០១២ កើន ឡើង៨,២ភាគរយ បើប្រៀបធៀបទៅ នឹងឆ្នាំ២០១១ មានជើងហោះហើរ ចំនួន៤៤.៧៨០ជើង។ ការព្យាករណ៍របស់ ICAO ចរាចរផ្លូវអាកាសនឹងកើនទ្វេដងនៅក្នុងរយៈពេល ១៥ឆ្នាំបន្ទាប់។ បណ្ដាប្រទេសនៅក្នុងតំបន់ និងពិភពលោកកាន់តែខ្លាំងឡើងជារៀងរាល់ឆ្នាំផ្អែក លើវិស័យឧស្សាហកម្មអាកាសចរណ៍ ដើម្បីជំរុញកំណើនសេដ្ឋកិច្ចយ៉ាងសំខាន់ រួមចំណែកដល់សុខភាពសុខុមាលភាព និងសេដ្ឋកិច្ចជារួម៕