សម្តេចអគ្គមហាសេនាបតីតេជោ ហ៊ុន សែន បាន បង្ហាញនូវការគាំទ្រយ៉ាងពេញទំហឹងការធ្វើអាជីវកម្មរបស់ក្រុមហ៊ុន នេះនៅកម្ពុជា ក្នុងឱកាសទទួលជួបសវនាការជាមួយលោក Nobuaki Katoh ប្រធានសាជីវកម្ម Denso ជាក្រុមហ៊ុនមកពីប្រទេសជប៉ុននាថ្ងៃទី១១ ខែវិច្ឆិកា ឆ្នាំ២០១៣ នៅវិមានសន្តិភាព។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹងថា នៅក្នុងជំនួបនោះ សម្តេចតេជោនាយករដ្ឋមន្ត្រីបានស្វាគមន៍ចំពោះវត្តមានរបស់ក្រុមហ៊ុន Denso នៅក្នុងព្រះរាជាណាចក្រកម្ពុជា ដោយមានប្រសាសន៍បញ្ជាក់អំពីគោលនយោបាយរបស់រាជរដ្ឋាភិបាលថា គោលនយោបាយរបស់យើងគឺមិនត្រឹមតែទាក់ទងវិនិយោគមកកាន់កម្ពុជាប៉ុណ្ណោះទេ ប៉ុន្តែថែមទាំងជួយឲ្យវិនិយោគនោះមានការពង្រីកចង្វាក់ពាណិជ្ជកម្មកាន់តែធំទៅៗទៀតផង។ សម្តេចនាយករដ្ឋមន្ត្រីមានប្រសាសន៍ថា រាជរដ្ឋាភិបាលនឹងខិតខំរក្សាបរិយាកាសឲ្យកាន់តែល្អឡើងថែមទៀត សម្រាប់វិនិយោគនៅក្នុងកម្ពុជា ដោយសម្តេចតេជោបានជូនពរឲ្យក្រុមហ៊ុន Denso ទទួលបានជោគជ័យក្នុងអាជីវកម្មរបស់ខ្លួននៅកម្ពុជា។
ឯកឧត្តម អ៊ាង សុផល្លែត ឲ្យដឹងថា លោក Nobuaki Katoh ប្រធានសាជីវកម្ម Denso របស់ ប្រទេសជប៉ុនបានថ្លែងអំណរគុណយ៉ាងជ្រាលជ្រៅ ជូនចំពោះសម្តេចតេជោនាយករដ្ឋមន្ត្រី និងរាជរដ្ឋាភិបាលកម្ពុជា ដែលកន្លងបានគាំទ្រក្រុមហ៊ុន Denso របស់លោកដែលមានវត្តមាននៅកម្ពុជាតាំងពីខែកក្កដាមក។ លោក Nobuaki បានជម្រាបជូនសម្តេចតេជោនាយករដ្ឋមន្ត្រីថា ក្រុមហ៊ុន Denso ជាក្រុមហ៊ុនដែលដំឡើងគ្រឿងបង្គំរបស់គ្រឿងយន្តកង់២សម្រាប់នាំចេញទៅប្រទេស ថៃ និងវៀតណាម ហើយនៅពេលអនាគតនឹងមានការរៀបចំផលិតគ្រឿងបង្គំសម្រាប់យានយន្តកង់ ៤ ថែមទៀត។ លោក Nobuaki បាន បញ្ជាក់ថា ក្រុមហ៊ុនរបស់លោកគឺធ្វើការបណ្តុះបណ្តាលធនធានមនុស្សនៅក្នុងព្រះរាជាណាចក្រកម្ពុជាតែម្តង ដោយធ្វើយ៉ាងណានឹងប្រឹងប្រែងធ្វើឲ្យអ្នកបច្ចេកទេសកម្ពុជា ដែលទទួលបានការបណ្តុះបណ្តាលនោះនឹងក្លាយទៅជាអ្នកឯកទេសជំនាញ ហើយលោកនឹងប្រឹងប្រែងធ្វើយ៉ាងណាប្រតិបត្តិការ ដើម្បីចូលរួមចំណែកក្នុងការអភិវឌ្ឍកម្ពុជានោះ៕