កន្លងមកថ្មីៗនេះ មានការចុះផ្សាយព័ត៌មានបំផ្លើសការពិត
តាមបណ្ដាញសារព័ត៌មានមួយចំនួនលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៤
ជាពិសេស ពាក់ព័ន្ធនឹងគម្រោងថវិកានៃខ្ទង់ចំណាយមិនទាន់បែងចែក ឬ ហៅម្យ៉ាងទៀតថា ជា
”ខ្ទង់ចំណាយផ្សេងៗ” របស់រាជរដ្ឋាភិបាល។ ក្នុងន័យនេះ
ក្រសួងសេដ្ឋកិច្ចនិងហិរញ្ញវត្ថុ សូមធ្វើការបកស្រាយបំភ្លឺជូនសាធារណជនជ្រាបអំពីគម្រោងថវិកានៃខ្ទង់ចំណាយមិនទាន់បែងចែក
ដូចតទៅ៖
ផ្អែកលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៤
រាជរដ្ឋាភិបាលបានគ្រោងចំណាយនៅក្នុងខ្ទង់ចំណាយមិនទាន់បែងចែក មានចំនួន ៦ ២២៤ ១៧៧ លានរៀល ស្មើនឹងប្រមាណ ១ ៥៣៧ លានដុល្លារអាមេរិក ហើយត្រូវជាប្រមាណ ៤៥,៨% នៃចំណាយថវិកាថ្នាក់ជាតិសរុប
គឺកើនឡើងប្រមាណ ១០,៦% ធៀបនឹងច្បាប់ស្តីពីហិរញ្ញវត្ថុឆ្នាំ២០១៣។ ជាក់ស្ដែង មួយភាគធំនៃចំណាយមិនទាន់បែងចែកនេះ
មានមុខសញ្ញាអស់ហើយ រួមមាន៖ (១)- ចំណាយចរន្ដក្នុងការអនុវត្តគម្រោងចំនួន ១៥០ ០០០
លានរៀល (កញ្ចប់នេះមិនតម្រូវឲ្យបែងចែកជាមុនទេ
ព្រោះជាថវិកាបដិភាគចរន្ដ ដែលនឹងត្រូវប្រើជាក់ស្តែងតាមលក្ខខណ្ឌនៃកិច្ចព្រមព្រៀងជាមួយដៃគូអភិវឌ្ឍ) (២)- សងការប្រាក់ទៅគេចំនួន ២៣០ ៨៧៧
លានរៀល(ឥណទាននេះមិនតម្រូវឲ្យមានការបែងចែកជាមុនទេ ព្រោះនឹងត្រូវអនុវត្តតាមលក្ខខណ្ឌដែលមានចែងក្នុងកិច្ចព្រមព្រៀង)
(៣)-ឧបត្ថម្ភធនជូនរាជធានី ខេត្ត ក្រុង ស្រុក ឃុំ សង្កាត់ចំនួន ៣៧៥ ៣២៦ លានរៀល (៤)-បង្វិលសងអាករលើតម្លៃបន្ថែម
(VAT) ចំនួន ៦០ ០០០ លានរៀល (ស្ថានបេសកកម្មការទូត
អង្គការអន្ដរជាតិនានា សហគ្រាសនាំចេញផលិតផលក្នុងស្រុកទៅក្រៅប្រទេស) (៥)- មូលនិធិថែទាំផ្លូវថ្នល់
ចំនួន ២៥០ ០០០ លានរៀល(កញ្ចប់ឥណទាននេះនឹងត្រូវផ្ទេរទៅឲ្យក្រសួងសាធារណការនិងដឹកជញ្ជូន
ភ្លាមនៅដើមឆ្នាំ២០១៤ តាមរយៈអនុក្រឹត្យផ្ទេរឥណទាន) (៦)- ការងារអធិបតេយ្យភាពចំនួន ៥០ ០០០ លានរៀល (៧)- ឧបត្ថម្ភធនដល់អគ្គិសនីកម្ពុជាចំនួន ១៩២ ២៥០ លានរៀល (កញ្ចប់ឥណទាននេះមានតែអគ្គិសនីកម្ពុជាប៉ុណ្ណោះ
ដែលមានសិទ្ធិប្រើប្រាស់ គឺមិនអាចយកទៅប្រើក្នុងគោលដៅផ្សេងបានឡើយ) (៨)- ការទូទាត់ប្រាក់កម្ចី
ចំនួន ៣៣០ ៩២៤ លានរៀល (សងប្រាក់ដើមទៅគេវិញ
ដូចនេះមិនចាំបាច់មានការបែងចែកជាមុនទេ ព្រោះនឹងត្រូវអនុវត្តតាមលក្ខខណ្ឌដែលមានចែងក្នុងកិច្ចព្រមព្រៀង) (៩)- ឲ្យអគ្គិសនីកម្ពុជាខ្ចីចំនួន
៧៤ ៩២៥ លានរៀល (ដើម្បីឲ្យអគ្គិសនីកម្ពុជាយកទៅកសាងខ្សែបញ្ជូនអគ្គិសនីទៅកាន់តំបន់ជនបទ)(១០)-
បដិភាគវិនិយោគចំនួន ២៦៤ ០០០ លានរៀល (កញ្ចប់នេះមិនតម្រូវឲ្យបែងចែកជាមុនទេ ព្រោះជាថវិកាបដិភាគមូលធន
ដែលនឹងត្រូវប្រើជាក់ស្តែងតាមលក្ខខណ្ឌនៃកិច្ចព្រមព្រៀងជាមួយដៃគូអភិវឌ្ឍ) (១១)- មូលនិធិទ្រទ្រងថវិកាដោយហិរញ្ញប្បទានក្រៅប្រទេសចំនួន
២៧០ ០០០ លានរៀល (ត្រូវបំពេញលក្ខខណ្ឌស្របតាមកិច្ចព្រមព្រៀងជាមួយដៃគូអភិវឌ្ឍមុននឹងទទួលបានថវិកា
ហើយបន្ទាប់ពីទទួលបានថវិកា ត្រូវមានការពិគ្រោះយោបល់ជាមួយដៃគូអភិវឌ្ឍសិន មុននឹងចាយ)
(១២)- ចំណាយមូលធនដោយហិរញ្ញប្បទានក្រៅប្រទេសចំនួន
៣ ៤៦០ ០០០ លានរៀល (ជាប្រភេទហិរញ្ញប្បទាន ពីដៃគូអភិវឌ្ឍ ដែលបានបែងចែកទៅតាមក្រសួង
ស្ថាប័ន អស់ហើយ ស្របតាមកិច្ចព្រមព្រៀងជាមួយដៃគូអភិវឌ្ឍ)។
ដូចនេះ ជាសរុប
ថវិកាមិនទាន់បែងចែកមានតែចំនួន ៥១៥ ៨៧៥ លានរៀល ប៉ុណ្ណោះ ស្មើប្រមាណ៣,៨%
នៃចំណាយថ្នាក់ជាតិសរុប ក្នុងនោះ (១)- ចំណាយវិនិយោគចំនួន ៤១៧ ០៧៥ លានរៀល ជាផ្នែកនៃឥណទានវិនិយោគសម្រាប់សាងសង់ហេដ្ឋារចនាសម្ព័ន្ធរូបវ័ន្តនានា ដូចជា ផ្លូវថ្នល់
ស្ពាន ធារាសាស្រ្ត សាលារៀន មន្ទីរពេទ្យ សំណង់អាគារផ្សេងៗរបស់រដ្ឋ
។ល។ ដែលត្រូវត្រៀមបម្រុងទុកសម្រាប់អនុវត្តតាមកាលៈ- ទេសៈចាំបាច់ រួមទាំងការខូចខាតដោយសារគ្រោះធម្មជាតិ និង (២)-ចំណាយចរន្ដត្រៀមបម្រុងចំនួន
៩៨ ៨០០ លានរៀល គឺជាឥណទាននៃចំណាយចរន្តសម្រាប់ប្រើប្រាស់ក្នុងគោលដៅនៃសេចក្ដីត្រូវការបន្ទាន់និងការចាំបាច់នានាជាយថាហេតុនានា រួមទាំងគោលដៅមនុស្សធម៌
គោលដៅដោះស្រាយផលវិបាកពីគ្រោះធម្មជាតិ និងសង្គម ក៏ដូចជាការងារអធិបតេយ្យភាព និង សន្តិសុខជាតិផងដែរ។
***************