នៅខេត្តកែប ថ្ងៃទី៧ ខែធ្នូ ឆ្នាំ២០១៣
សូមគោរព
- ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តី និងជាតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាទីគោរពដ៏ខ្ពង់ខ្ពស់!
- ឯកឧត្តម កែន សត្ថា អភិបាលនៃគណៈអភិបាលខេត្តកែប
- ឯកឧត្តម Galip Gur ប្រធានក្លឹបឆ្នេរសមុទ្រដែលស្អាតបំផុតលើសកលលោក
- ឯកឧត្តមប្រធានគណៈប្រតិភូមកពីក្រសួងទេសចរណ៍ប្រទេស ឡាវ ភូមា និងវៀតណាម
(CLMV )និងមហាអនុតំបន់ទន្លេមេគង្គ និង (GMS)
- ឯកឧត្តម លោកជំទាវ ឯកអគ្គរាជទូត ឯកអគ្គរដ្ឋទូត និងតំណាងអង្គទូត
- ឯកឧត្តម លោកជំទាវ លោក លោកស្រី ភ្ញៀវកិត្តិយសជាតិ និងអន្តរជាតិ បងប្អូនប្រជាពលរដ្ឋទាំងអស់ ជាទីមេត្រី!
ជាបឋម ក្នុងនាមក្រសួងទេសចរណ៍ និងគណៈកម្មការអន្តរស្ថាប័នដើម្បីរៀបចំពិធីបុណ្យសមុទ្រ ខ្ញុំបាទសូមគោរពសំដែងនូវកិច្ចស្វាគមន៍ចំពោះវត្តមានដ៏ខ្ពង់ខ្ពស់របស់ ឯកឧត្តមបណ្ឌិត សភាចារ្យ សុខ អាន ឧបនាយក រដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាតំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានអញ្ជើញជាអធិបតីភាព ដ៏ខ្ពង់ខ្ពស់ក្នុងពិធីបើកពិធីបុណ្យសមុទ្រ ដែលបាននឹងកំពុងរៀបចំប្រព្រឹត្តទៅចាប់ពីថ្ងៃទី ៦-៨ ខែធ្នូ ឆ្នាំ២០១៣ នៅលើទឹកដីនៃខេត្តកែប ដែលជាខេត្តមួយប្រកបដោយសក្តានុពលទេសចរណ៍តំបន់ឆ្នេរដ៏ទាក់ទាញរបស់កម្ពុជា។
ខ្ញុំក៏សូមថ្លែងអំណរគុណចំពោះវត្តមាន របស់ឯកឧត្តម Galip Gur ប្រធានក្លឹបឆ្នេរសមុទ្រដែលស្អាតបំផុតលើសកលលោក និងលោកជំទាវ គណៈប្រតិភូក្លឹបឆ្នេរសមុទ្រដែលស្អាតបំផុតលើសាកលលោក ដែលអញ្ជើញមកពីឆ្នេរសមុទ្រជាសមាជិកក្លឹបពីគ្រប់ទិសទីនៃសកលលោក និងគណៈប្រតិភូទេសចរណ៍ CLMV និង GMS ឯកអគ្គរាជទូត ឯកអគ្គរដ្ឋទូត តំណាងអង្គទូត ឯកឧត្តម លោកជំទាវ លោក លោកស្រី ភ្ញៀវកិត្តិយសជាតិ និងអន្តរជាតិ ផ្នែកឯកជន និងបងប្អូនប្រជាពលរដ្ឋ ដែលបានអញ្ជើញចូលរួមយ៉ាងច្រើនកុះករក្នុងពិធីនេះ ប្រកបដោយសេចក្តីសប្បាយរីករាយ។
- ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ជាទីគោរពដ៏ខ្ពង់ខ្ពស់!
- ឯកឧត្តម លោកជំទាវ អស់លោក-លោកស្រី!
ពិធីបុណ្យសមុទ្រឆ្នាំ២០១៣ នេះ ប្រារព្ធធ្វើឡើង ដោយផ្សារភ្ជាប់ជាមួយនឹងកិច្ចប្រជុំមហាសន្និបាតលើកទី៩នៃក្លឹបឆ្នេរសមុទ្រដែលស្អាតបំផុតលើសាកលលោក សន្និសីទអន្តរជាតិក្រោមប្រធានបទ "សមុទ្រខៀវស្រងាត់ ទីក្រុងបៃតង" កិច្ចប្រជុំថ្នាក់រដ្ឋមន្ត្រីទេសចរណ៍ កម្ពុជា-ឡាវ-មីយ៉ាន់ម៉ា-វៀតណាមលើកទី ២ និងកិច្ចប្រជុំក្រុម ការងារទេសចរណ៍មហាអនុតំបន់មេគ្គងលើកទី៣២ ដែលពិធីបើកមហាសន្និបាតបានប្រារព្ធទៅដោយមហាឡារឹក ក្រោមអធិបតីដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅលើរមនីយដ្ឋានឋានសួគ៌បូកគោ កាលពីព្រឹកថ្ងៃទី ០៦ ខែធ្នូ ឆ្នាំ ២០១៣ ម្សិលមិញនេះ។
ឆ្លៀតឳកាសនេះ ខ្ញុំសូមអបអរសាទរចំពោះឆ្នេរសមុទ្រថ្មីពីរទៀត ដែលត្រូវបានមហាសន្និបាតអនុម័ត និងប្រកាសជាផ្លូវការជាសមាជិកពេញសិទ្ធិរបស់ក្លឹបៈ
ទី១.គឺឆ្នេរ សាការូន (Sakarun) របស់ប្រទេស ក្រូអាតស៊ី និង
ទី២.គឺឆ្នេរ ម៉ាតស៊ូស៊ីម៉ា (Matsushima) របស់ប្រទេសជប៉ុន
ដែលធ្វើអោយក្លឹបឆ្នេរសមុទ្រដែលស្អាតបំផុតលើពិភពលោក មកដល់បច្ជុប្បន្នមានសមាជិកពេញសិទ្ធិចំនួន៣៦មកពីប្រទេស២៥ និងអបអរសាទរឆ្នេរថ្មីពីរទៀតដែលត្រូវបានមហាសន្និបាតអនុម័ត និង ទទួលស្គាល់ជាបេក្ខភាពថ្មីគឺ
ទី១.គឺឆ្នេរ តូយ៉ាមា (Toyama) របស់ប្រទេសជប៉ុន
ទី២.គឺឆ្នេរ ណេហ្គឺ អាល់ហូស៊ីម៉ា (Nekour Al Hoceima) របស់ប្រទេសម៉ូរ៉ូកូ
ទន្ទឹមនឹងនេះ យើងសូមអបអររសាទរចំពោះកិច្ចប្រជុំថា្នក់រដ្ឋមន្ត្រីទេសចរណ៍ CLMV ដែលបានឯកភាពខ្ពស់ក្នុងការជំរុញយុទ្ធនាឃោសនាផ្សព្វផ្សាយរូមគ្នា “ប្រទេសបួន គោលដៅតែមួយ (Four Countries, One Destination)” នឹងជំរុញសម្រេចផែនការទាក់ទាញទេសចរណ៍អន្តរជាតិអោយបាន ២៥លាននាក់ នៅឆ្នាំ ២០២០(ដែលក្នុងនោះទេសចរណ៍ផ្ទៃក្នុងប្រទេស CLMV មានចំនួន ៤លាននាក់) ដោយជំរុញការតភ្ជាប់ និងការសម្រួលការធ្វើដំណើរ និងដឹកជញ្ជួនទេសចរណ៍អោយបានកាន់តែប្រសើរឡើង។ ហើយក៏សូមអបអរសាទរផងដែរ ចំពោះកិច្ចប្រជុំក្រុមការងារទេសចរណ៍ GMS ដែលបានឯកភាពគ្នាខ្ពស់ជំរុញការអនុវត្តយុទ្ធសាស្រ្តអភិវឌ្ឍទេសចរណ៍ នៅក្នុងតំបន់ (២០១១-២០១៥) ដោយផ្តោតលើការងារផ្សព្វផ្សាយ ការអភិវឌ្ឍហេដ្ឋារចនាសម្ព័ន្ធ និងការកាត់បន្ថយភាពក្រីក្ររតាមរយៈវិស័យទេសចរណ៏។
- ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ជាទីគោរពដ៏ខ្ពង់ខ្ពស់!
- ឯកឧត្តម លោកជំទាវ អស់លោក-លោកស្រី!
ការរៀបចំពិធីបុណ្យសមុទ្រនេះ គឺជាព្រឹត្តិការណ៍ទេសចរណ៍ដ៏ទាក់ទាញ សម្រាប់តំបន់ឆ្នេរសមុទ្រកម្ពុជា ដែលមិនត្រឹមតែចូលរួមចំណែកក្នុងការផ្សព្វផ្សាយពីសក្តានុពលទេសចរណ៍នៃតំបន់ឆ្នេរសមុទ្រកម្ពុជា (ខេត្តកំពត ខេត្តកែប ខេត្តព្រះសីហនុ និងខេត្តកោះកុង) ប៉ុណ្ណោះទេ ប៉ុន្តែក៏ចូលរួមចំណែកយ៉ាងសំខាន់ដល់ការគាំទ្រនយោបាយរបស់រាជរដ្ឋាភិបាលកម្ពុជា ក្នុងការយកចិត្តទុកដាក់អភិវឌ្ឍតំបន់ឆ្នេរប្រកបដោយនិរន្តភាព និងការទទួលខុសត្រូវខ្ពស់ ជាពិសេសការការពារ និងអភិរក្សធនធានធម្មជាតិ ដោយឈរលើការប្តេជ្ញាចិត្តរួមមួយច្បាស់លាស់ក្នុងការរក្សាតុល្យភាពរវាងផលប្រយោជន៍ខាងផ្នែកបរិស្ថាន សេដ្ឋកិច្ច-សង្គម និងវប្បធម៌។ ព្រមជាមួយនេះ ពិធីបុណ្យសមុទ្រ គឺជាឱកាសដ៏ល្អប្រសើរដើម្បីផ្សព្វផ្សាយចលនាប្រលងប្រណាំង "ទីក្រុងស្អាត រមណីដ្ឋានស្អាត សេវាល្អ" និង”ចលនាប្រលងប្រណាំងឆ្នេរស្អាត” លើកកម្ពស់គុណភាពសេវាកម្មទេសចរណ៍ ជំរុញដល់ការអភិវឌ្ឍហេដ្ឋារចនាសម្ព័ន្ធ ការអភិវឌ្ឍធនធានមនុស្ស និងការអប់រំប្រជាពលរដ្ឋឲ្យយល់ដឹងពីសារៈប្រយោជន៍នៃឆ្នេរសមុទ្រកម្ពុជា។
នៅក្នុងពិធីបុណ្យសមុទ្រឆ្នាំនេះ គណៈកម្មការអន្តរស្ថាប័នបានរៀបចំឲ្យមានជាសកម្មភាពសំខាន់ៗចំនួន ដូចខាងក្រោមៈ
១- ការបង្ហាញក្បួនព្យុះហយាត្រា (ដែលក្នុងនោះ អ្វីដែលជាទីមោទនៈភាពរបស់កម្ពុជា គឺការបង្ហាញពី មធ្យោបាយធ្វើដំណើរបៃតង ដូចជា រថយន្តអគ្គីសនីរបស់ក្រុមហ៊ុនហេងអភិវឌ្ឍន៍ ទោចក្រយាន អគ្គីសនី រឺម៉កអគ្គីសនី និងមនុស្សយន្តចាប់សំរាម (ដែលសិក្សាស្រាវជ្រាវ និងផលិតឡើងដោយ ក្រុមនិស្សិត និងសាស្រ្តាចារ្យនៃវិទ្យាស្ថានបច្ចេកវិទ្យាកម្ពុជា និងសាកលវិទ្យាល័យន័រតុន ក្រោមការ ជួយឧបត្ថម្ភជាថវិកាពីក្រុមហ៊ុន Cambodia Beer)។
២- សកម្មភាពកីឡាលើទឹក និងកីឡាលើឆ្នេរ មានដូចជាកីឡាបាល់ទះលើឆ្នេរខ្សាច់ រត់ប្រណាំង-ជិះកង់- ហែលទឹក (Tri-Athlon) ប្រណាំងម៉ូតូលើទឹក ការបង្ហាញក្បាច់គុនល្បុក្តតោ ប្រដាល់បុរាណខ្មែរ ពិសេសឆ្នាំនេះមានការចូលរួមពីប្រភេទកីឡាលើអាកាស (Aero show)។
៣- មហោស្រពម្ហូបអាហារ ស្រា និងភេសជ្ជៈ និងការតាំងពិព័រណ៍ការប្រកួតរូបភាព សមិទ្ធផលផលិតផល និងគម្រោងអភិវឌ្ឍតំបន់ឆ្នេរ។
៤- ការប្រគុំតន្ត្រី ការសម្តែងទស្សនីយភាពសិល្បៈ និងការបាញ់កាំជ្រួចអបអរសាទរ។
៥- ពិធីដាំដើមឈើគុជ៍មិត្តភាព “ទេសចរម្នាក់ ដើមឈើមួយដើម”
ប្រការគួរកត់សំគាល់ និងជាទីមោទនៈសំរាប់ពិធីបុណ្យសមុទ្យឆ្នាំនេះ គឺមានការចូលរួមជាច្រើនពីផ្នែកសាធារណៈ និងឯកជន និងប្រជាពលរដ្ឋមូលដ្ឋាន ហើយបុណ្យសមុទ្រនេះប្រព្រឹត្តទៅស្របគ្នាជាមួយនឹងការតាំងពិព័រណ៍ផលិតផលរបស់ក្រសួងពាណិជ្ជកម្មផងដែរ។
ឆ្លៀតក្នុងឱកាសនេះ ក្នុងនាមប្រធានស្ថាប័ន យើងខ្ញុំសូមកោតសរសើរ និងថ្លែងអំណរគុណចំពោះឯកឧត្តមអភិបាល និងគណៈអភិបាល និងបងប្អូនប្រជាពលរដ្ឋខេត្តកែប ដែលបានខិតខំប្រឹងប្រែងសហការ ជាមួយ ក្រសួង ស្ថាប័នពាក់ព័ន្ធ សហភាពសហព័ន្ធយុវជនកម្ពុជា ផ្នែកឯកជន ធ្វើការរៀបចំ និងអភិវឌ្ឍហេដ្ឋារចនាសម្ព័ន្ធរូបវ័ន្តសំខាន់ៗនៅខេត្តកែបបានល្អប្រសើរ ព្រមទាំងបានបំផុសចលនាចូលរួមយ៉ាងសកម្ម និងផុលផុសក្នុងការថែរក្សា ការពារបរិស្ថាន អនាម័យ សំរាម និងសណ្តាប់ធ្នាប់នៅតាមទីសាធារណៈ ទីក្រុង និងតាមតំបន់ឆ្នេរខេត្តកែប ដែលធ្វើឲ្យខេត្តកែបប្រែមុខមាត់ថ្មី និងសក្តិសមជាគោលដៅទេសចរណ៍សំរាកលំហែកំសាន្តប្រកបដោយភាពទាក់ទាញ និងស្រស់បំព្រង។
ខ្ញុំសូមថ្លែងអំណរគុណដល់ ឯកឧត្តម អភិបាល និងគណៈអភិបាល និងប្រជាពលរដ្ឋខេត្តកំពត ដែលបានខិតខំរៀបចំអភិវឌ្ឍហេដ្ឋារចនាសម្ព័ន្ធ និងថែរក្សាអនាម័យ បរិស្ថានបានយ៉ាងល្អស្អាត ដើម្បីចូលរួមរៀបចំអបអរសាទរកិច្ចប្រជុំនានានៅក្នុងខេត្ត ហើយដែលសកម្មភាពទាំងនេះពិតជាបានចូលរួមគាំទ្រដល់ការរៀបចំពិធីបុណ្យសមុទ្រនៅខេត្តកែបនេះផងដែរ។
ខ្ញុំក៏សូមឆ្លៀតឱកាសថ្លែងអំណរគុណយ៉ាងជ្រាលជ្រៅដល់ក្រសួងសាធារណៈការ និងដឹកជញ្ជូន ដែលបានជួយស្ថាបនាផ្លូវជាតិពីខេត្តកំពតមកកាន់ខេត្តកែបបានល្អប្រសើរ និងសូមអរគុណដល់ធនាគារអភិវឌ្ឍន៍អាស៊ី (ADB) ដែលបានជួយសិក្សារៀបចំគម្រោងអភិវឌ្ឍន៍ទេសចរណ៍នៅតំបន់ឆ្នេរសមុទ្រកម្ពុជា ពិសេសនៅខេត្ត កែប និងខេត្តកំពត ដែលនឹងធ្វើឲ្យតំបន់ឆ្នេរសមុទ្រកម្ពុជាកាន់តែមានភាពទាក់ទាញទាំងផ្នែកហេដ្ឋារចនាសម្ព័ន្ធ និងផ្នែកបរិស្ថាន។
- ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ជាទីគោរពដ៏ខ្ពង់ខ្ពស់!
- ឯកឧត្តម លោកជំទាវ អស់លោក-លោកស្រី!
ជាការពិតណាស់ ប្រសិនបើយើងចង់បានការអភិវឌ្ឍតំបន់ឆ្នេរមួយប្រកបដោយការទទួលខុសត្រូវខ្ពស់ យើងមិនអាចកាត់ផ្តាច់ទំនាក់ទំនងដ៏ស្អិតរមួតរវាងឆ្នេរសមុទ្រ និងទីក្រុងជាប់ឆ្នេរឡើយ។ ឆ្នេរសមុទ្រល្អស្អាត ខៀវស្រងាត់ សំបូរដោយជីវៈចំរុះ និងទីក្រុងដែលមានសេវាកម្មទេសចរណ៍ល្អ និងមានសន្តិសុខ សណ្តាប់ធ្នាប់ អនាម័យ បរិស្ថានល្អ ពិតជានឹងចូលរួមចំណែកយ៉ាងសំខាន់ដល់ការអភិវឌ្ឍទេសចរណ៍នៅតំបន់ឆ្នេរបានល្អប្រសើរ។ ទីក្រុងមានការអភិវឌ្ឍប្រកបដោយការទទួលខុសត្រូវខ្ពស់ នឹងមិនបង្កផលប៉ះពាល់មកលើតំបន់ឆ្នេរសមុទ្រឡើយ។ ដូចនេះដើម្បីធានាថា ការអភិវឌ្ឍទីក្រុងមិនបង្កផលអវិជ្ជមានមកតំបន់ឆ្នេរ ចាំបាច់ណាស់ត្រូវតែអភិវឌ្ឍទីក្រុងនោះឲ្យក្លាយជាទីក្រុងបៃតងដោយគោរពតាមគោលការណ៍ និងស្តង់ដាទីក្រុងស្អាត។ ទីក្រុងបៃតង (Eco City/ Green City) មិនត្រឹមតែអាចកាត់បន្ថយផលប៉ះពាល់មកលើតំបន់ឆ្នេរប៉ុណ្ណោះទេ តែថែម ទាំងជួយទាក់ទាញទេសចរឲ្យមកកំសាន្តតំបន់ឆ្នេរថែមទៀតផង ព្រោះថាទីក្រុងបៃតងគឺជាច្រកចូល (Gateway) របស់ឆ្នេរសមុទ្រ។ ផ្ទុយទៅវិញ បើការអភិវឌ្ឍទីក្រុងមិនគោរពតាមគោលការណ៍ និងស្តង់ដាទីក្រុងស្អាតនោះទេ តំបន់ឆ្នេរអាចនឹងទទួលរងផលប៉ះពាល់ ហើយអាចរងផលប៉ះពាល់ដល់ភាពទាក់ទាញទេសចរណ៍។
ភាពសម្បូរបែបនៃធនធានធម្មជាតិ និងវប្បធម៌នៅតាមបណ្តាឆ្នេរសមុទ្រ និងកោះនានា គឺជាឧត្តមភាពប្រកួតប្រជែង (Competitive Advantage) ក្នុងការអភិវឌ្ឍវិស័យទេសចរណ៍នៅកម្ពុជា។ សក្តានុពល ទាំងនេះបានធ្វើឲ្យតំបន់ឆ្នេរសមុទ្រកម្ពុជាកំពុងទទួលស្វាគមន៍កំណើននៃការមកដល់ទេសចរជាតិ និងអន្តរជាតិ។ ជាក់ស្តែងនៅឆ្នាំ២០១២ កន្លងទៅ ចំនួនទេសចរអន្តរជាតិដែលមកទស្សនាតំបន់ឆ្នេរមានចំនួន ២៨០.៦៥៨នាក់ កើនឡើង៤៥.៣% និងទេសចរក្នុងស្រុកចំនួន ១.៨២៧.៩២៧នាក់ កើនឡើង ៨% ធៀបនឹងឆ្នាំ២០១១។ សម្រាប់រយៈពេល១០ខែ ដើមឆ្នាំ២០១៣ នេះ ចំនួនទេសចរអន្តរជាតិមកទស្សនតំបន់ឆ្នេរមានចំនួន ៤១៨.៨៣៩នាក់ កើនឡើង៨៤.១% ធៀបនឹងរយៈពេលដូចគ្នាឆ្នាំ២០១២។ តាមការព្យាករណ៍ នៅឆ្នាំ២០១៥ តំបន់ឆ្នេរសមុទ្រកម្ពុជាអាចនឹងទទួលបានទេសចរអន្តរជាតិប្រមាណ ១លាននាក់ និងនៅឆ្នាំ២០២០ ប្រមាណ ២លាននាក់។ ការរីកចម្រើននៃវិស័យទេសចរណ៍ ពិតជាបានចូលរួមចំណែកយ៉ាងខ្លាំងក្នុងការអភិវឌ្ឍសេដ្ឋកិច្ច-សង្គម ពិសេស ចូលរួមដល់ការសម្រេចនូវគោលដៅអភិវឌ្ឍន៍សហស្សវត្សរបស់អង្គការសហប្រជាជាតិ ក៏ដូចជាយុទ្ធសាស្រ្តចតុកោណដំណាក់កាលទីបីរបស់រាជរដ្ឋាភិបាលអាណត្តិទី៥ ដើម្បី “កំណើនការងារ ប្រសិទ្ធភាព និងសមធម៌”។
ក្នុងឳកាសនៃការប្រារព្ធពិធីបុណ្យសមុទ្រដ៏ថ្លៃថ្លានេះ យើងខ្ញុំសូមថ្លែងអំណរគុណ និងអបអរសាទរចំពោះសន្និសីទអន្តរជាតិស្តីពី “សមុទ្រខៀវស្រងាត់ ទីក្រុងបៃតង”ដែលបានដាក់ចេញនូវសេចក្តីថ្លែងការណ៏បូកគោស្តីពីការអភិវឌ្ឍទីក្រុងតំបន់ឆ្នេរប្រកបដោយនិរន្តរភាព (Bokor Declaration on Sustainable Development of Coastal City) កាលពីព្រឹកថ្ងៃនេះ ដែលសេចក្តីថ្លែងការណ៍នេះនឹងក្លាយជាធាតុចូល (Input) សំខាន់ៗ សម្រាប់ជាឯកសារយោងក្នុងការរៀបចំផែនការគ្រប់គ្រង និងអភិវឌ្ឍតំបន់ឆ្នេរប្រកបដោយនិរន្តរភាព និងការទទួលខុសត្រូវខ្ពស់។ ជាមួយនេះផងដែរ ក្នុងនាមគណៈប្រតិបត្តិសមាជិកពេញសិទ្ធិនៃក្លឹបឆ្នេរសមុទ្រ ខ្ញុំសូមថ្លែងអំណរគុណចំពោះអង្គការភាពជាដៃគូពិភពលោកសម្រាប់ការអភិវឌ្ឍទេសចរណ៍ (Global Partnership for Sustainable Tourism) ដែលបានចុះហត្ថលេខាជាដៃគូរបស់ក្លឹប ក្នុងក្របខណ្ឌនៃកម្មវិធីបរិស្ថានរបស់ អង្គការសហប្រជាជាតិ (United Nation Environmental program-UNEP)
- ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ជាទីគោរពដ៏ខ្ពង់ខ្ពស់!
- ឯកឧត្តម លោកជំទាវ អស់លោក-លោកស្រី!
ប្រជាជនកម្ពុជាទាំងមូល ក៏ដូចជាប្រជាជននៅតំបន់ឆ្នេរសមុទ្រ សូមសំដែងនូវអំណរគុណយ៉ាងជ្រាលជ្រៅបំផុតចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានចាត់ទុកតំបន់ឆ្នេរសមុទ្រកម្ពុជាជាប៉ូលសេដ្ឋកិច្ចមួយដ៏សំខាន់របស់ប្រទេសជាតិ ហើយដែល សម្តេចតេជោ តែងបានដាស់តឿន និងក្រើនរំលឹកឲ្យយកចិត្តទុកដាក់ធ្វើការអភិវឌ្ឍប្រកបដោយនិរន្តរភាព និងការទទួលខុសត្រូវខ្ពស់ ដោយធានារក្សាការពារ និងអភិរក្សជីវៈចំរុះ និងបរិស្ថាននៃតំបន់ឆ្នេរសមុទ្រនេះ ឲ្យក្លាយជាគោលដៅទេសចរណ៍សំរាកលំហែកំសាន្តមួយប្រកបដោយភាពទាក់ទាញសំរាប់យើងទាំងអស់គ្នានៅពេលបច្ចុប្បន្ន និងសំរាប់កូនចៅយើងទៅអនាគត។ ប្រជាជនកម្ពុជាទាំងមូល ក៏ដូចជាប្រជាជននៅតំបន់ឆ្នេរសមុទ្រ សូមគោរពជូនពរសម្តេចតេជោនាយករដ្ឋមន្រ្តី សូមប្រកបតែនឹងសុខភាពល្អបរិបូរណ៍ កំលាំងខ្លាំងក្លា ប្រាជ្ញាឈ្លាសវៃ ដើម្បីបន្តដឹកនាំប្រទេសជាតិឆ្ពោះទៅកាន់ភាព សំបូររុងរឿង និងសុភមង្គលដល់ប្រជាជន។
មុននឹងបញ្ចប់ តាងនាមគណៈកម្មការអន្តរស្ថាប័នដើម្បីរៀបចំពិធីបុណ្យសមុទ្រ ខ្ញុំក៏សូមថ្លែងអំណរគុណចំពោះផ្នែកឯកជន ដែលបានឧបត្ថម្ភក្នុងពិធីនេះដូចជា ក្រុមហ៊ុនស្រាបៀរកម្ពុជា ក្រុមហ៊ុនស្រាបៀរអង្គរ ធានាគារកាណាឌីយ៉ា សណ្ធាគារសុខា ក្រុមហ៊ុនអាត់ហ្វូដ (ATTWOOD) ក្រុមហ៊ុនទេសចរណ៍ម៉ាឡេស៊ី អាកាសយានដ្ឋានកម្ពុជា សមាគមម៉ូតូធំ ក្រុមហ៊ុន Reddot ក្រុមហ៊ុន Cambo ក្រុមហ៊ុន Outdoor ក្រុមហ៊ុនហង្សមាស សណ្ឋាគារអាល់មិន និងក្រុមហ៊ុនស្រាក្រហមសាតូ (Chateaux) និងភោជនីយដ្ឋានផ្សេង ព្រមទាំងអ្នកឧបត្ថម្ភ ផ្សេងៗទៀត (សូមអធ្យាស្រ័យដែលមិនអាចរៀបរាប់អស់បាន) កីឡាករ-កីឡាការនី សិល្បករ-សិល្បការនី ដែលបានចូលរួមយ៉ាងសកម្មក្នុងការរៀបចំពិធីបុណ្យសមុទ្រឆ្នាំនេះ និងរួមចំណែកធ្វើឲ្យក្រុងកែប រីកមុខមាត់ថ្មី សក្តិសមជាគោលដៅទេសចរណ៍សំរាកលំហែដ៏ល្អមួយនាទិសនីរតី។
យើងខ្ញុំ ក្នុងនាមគណៈកម្មការអន្តរស្ថាប័នរៀបចំពិធីបុណ្យសមុទ្រនេះ ក៏សូមអភ័យទោសចំពោះការខ្វះខាតមួយចំនួនដែលអាចកើនមានឡើងនៅក្នុងពិធីនេះ។
ជាទីបញ្ចប់ ខ្ញុំបាទសូមគោរពជូនពរ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាតំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោនាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវ ឯកឧត្តម លោកជំទាវ លោក លោកស្រី អ្នកនាងកញ្ញា សូមជួប ប្រទះតែពុទ្ធពរ ទាំង៤ប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
សូមអរគុណ!