Tuesday, February 25, 2014
កម្ពុជា-វៀតណាមជំរុញឲ្យមានកិច្ចសហប្រតិបត្តិការសម្រាប់ការតភ្ជាប់ខឿនសេដ្ឋកិច្ចប្រទេសទាំងពីរ
នៅ
ក្នុងជំនួបសម្តែងការគួរសម ជាមួយសម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី២៤ ខែកុម្ភៈ
ឆ្នាំ២០១៤ នៅវិមានសន្តិភាព ទីស្តីការគណៈរដ្ឋមន្ត្រី ឯកឧត្ដម Bui
Quang Vinh រដ្ឋមន្ត្រីក្រសួងផែនការ
និងវិនិយោគនៃសាធារណរដ្ឋសង្គមនិយមវៀតណាម បានមានប្រសាសន៍ឲ្យដឹងថា
វៀតណាមចង់ជំរុញឲ្យមានកិច្ចសហប្រតិបត្តិការផ្លាស់ប្ដូរបទពិសោធន៍
និងរៀបចំផែនការមេ
សម្រាប់ការតភ្ជាប់ខឿនសេដ្ឋកិច្ចរវាងប្រទេសទាំងពីរ
(កម្ពុជា-វៀតណាម)។
ឯកឧត្តម
អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានឲ្យដឹងថា
ឯកឧត្ដម Bui Quang Vinh
បានមានប្រសាសន៍ជម្រាបជូនសម្ដេចតេជោនាយករដ្ឋមន្ត្រីថា
ដំណើរទស្សនកិច្ចរបស់ឯកឧត្ដមមកកាន់ព្រះរាជាណាចក្រកម្ពុជានាពេលនេះ
គឺដើម្បីធ្វើការជាមួយក្រសួងផែនការកម្ពុជា
និងចូលរួមប្រជុំលើកទី៥
រវាងរដ្ឋមន្ត្រីក្រសួងផែនការនៃប្រទេសទាំងពីរ (កម្ពុជា-វៀតណាម)។
សម្ដេច
តេជោនាយករដ្ឋមន្ត្រីបានសម្តែងនូវការពេញចិត្ត
ចំពោះទំនាក់ទំនងរវាងក្រសួងផែនការនៃប្រទេសទាំងពីរ(កម្ពុជា-វៀតណាម)។
សម្តេចតេជោបានមានប្រសាសន៍ថា ប្រធានបទនាពេលនេះ
គឺការតភ្ជាប់ខឿនសេដ្ឋកិច្ចរវាងប្រទេសទាំងពីរ។
សម្ដេចតេជោនាយករដ្ឋមន្ត្រីក៏បានប្រគល់តួនាទីនេះ
ជូនរដ្ឋមន្ត្រីក្រសួងផែនការនៃប្រទេសទាំងពីរ
ធ្វើការរួមគ្នាដើរតួនាំមុខពិភាក្សាឲ្យអស់លើការតភ្ជាប់រយៈពេល
ខ្លី រយៈពេលមធ្យម និងរយៈពេលវែង ដោយបើកទស្សនៈឲ្យធំទូលំទូលាយ
ដើម្បីបើកការតភ្ជាប់នេះឲ្យបានល្អប្រសើរ៕
សម្តេចតេជោ ជំរុញឲ្យ ក្រុមប្រឹក្សាជាតិកម្ពុជាដើម្បីស្ត្រី បន្តយកចិត្តទុកដាក់ពីបញ្ហារបស់ស្ត្រី នៅក្នុងប្រជុំបូកសរុបសកម្មភាពការងារប្រចាំឆ្នាំ២០១៣ និងទិសដៅការងារឆ្នាំ២០១៤
សម្តេច
អគ្គមហសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
និងជាអនុប្រធានកិត្តិយស នៃក្រុមប្រឹក្សាជាតិកម្ពុជាដើម្បីស្ត្រី
នាព្រឹកថ្ងៃទី២៤ ខែកុម្ភៈ ឆ្នាំ២០១៤
បានជំរុញឲ្យក្រុមប្រឹក្សាជាតិកម្ពុជា ដើម្បីស្ត្រី
ដឹកនាំដោយក្រសួងកិច្ចការនារី បន្តតាមដានវាយតម្លៃការអនុវត្តអនុសញ្ញា
លុបបំបាត់រាល់ទម្រង់នៃការរើសអើងលើស្ត្រីភេទ (CEDAW)
ដើម្បីស្វែងយល់ពីបញ្ហាប្រឈមរបស់ស្ត្រី
និងចាត់វិធានការដោះស្រាយ។
ក្នុង
ឱកាសអញ្ជើញជាអធិបតី
ក្នុងកិច្ចប្រជុំបូកសរុបសកម្មភាពការងារប្រចាំឆ្នាំ២០១៣
និងទិសដៅការងារឆ្នាំ២០១៤
របស់ក្រុមប្រឹក្សាជាតិកម្ពុជាដើម្បីស្ត្រី នៅវិមានសន្តិភាព
សម្តេចតេជោ មានប្រសាសន៍ថា ថ្ងៃនេះក្រុមប្រឹក្សាជាតិកម្ពុជា
ដើម្បីស្ត្រី បានបើកកិច្ចប្រជុំប្រចាំឆ្នាំជាបន្តទៀត
ហើយក៏ជាការប្រជុំជាទៀងទាត់
របស់អង្គការចាត់តាំងមួយនេះក្រោមព្រះរាជាធិបតីភាពដ៏ខ្ពង់ខ្ពស់
បំផុតរបស់សម្តេចព្រះមហាក្សត្រី នរោត្តម មុនីនាថ សីហនុ
ព្រះវររាជមាតា ជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល
ជាព្រះប្រធានកិត្តិយស នៃក្រុមប្រឹក្សាជាតិកម្ពុជា ដើម្បីស្ត្រី។
ក្នុងឋានៈសម្តេចជាអនុប្រធានកិត្តិយសនៃក្រុមប្រឹក្សានេះ
សម្តេចតេជោបានមានប្រសាសន៍បញ្ជាក់ថា
សម្តេចបានដឹកនាំកិច្ចប្រជុំនេះជាទៀងទាត់
ដើម្បីធ្វើការត្រួតពិនិត្យទៅលើវឌ្ឍនភាពនានា
ដែលបានដាក់ចេញរយៈកាលកន្លងមកជាបន្តបន្ទាប់ ទាំង១៦ចំនុច ។
ជាមួយនឹងការវាយតម្លៃខ្ពស់ ពីលទ្ធផលការងារ
ដែលក្រុមប្រឹក្សាជាតិកម្ពុជាដើម្បីស្ត្រី និងស្ថាប័នពាក់ព័ន្ធ
សម្រេចបានក្នុងឆ្នាំ២០១៣ កន្លងទៅនេះ
សម្តេចតេជោនាយករដ្ឋមន្ត្រីបានណែនាំឱ្យក្រុមប្រឹក្សានេះ
បន្តតាមដានវាយតម្លៃការអនុវត្តអនុសញ្ញា CEDAW សេចក្តី សង្កេតសន្និដ្ឋាន
ច្បាប់ជាតិពាក់ព័ន្ធ នៅតាមបណ្តាខេត្ត ដើម្បីសិក្សាស្វែងយល់
ពីបញ្ហាប្រឈម និងវិធានការដើម្បីដោះស្រាយ។
សម្តេចបានជំរុញឱ្យអនុវត្តគោលនយោបាយជាតិ សមភាពយែនឌ័រ
និងរបាយការណ៍ជាតិលើកទី៤ និងលើកទី៥ ស្តីពីការអនុវត្ត អនុសញ្ញា
CEDAW តាមរយៈសិក្ខាសាលា និងប្រព័ន្ធផ្សព្វផ្សាយនានាដូចជាវិទ្យុ
ទូរទស្សន៍ គេហទំព័រ ព្រឹត្តិ ប័ត្រ ប័ណ្ណផ្នត់ រឿងអប់រំខ្លីៗ
និងខ្សែវីដេអូ ជាដើម។
សម្តេចបានជំរុញឱ្យមានការបើកវគ្គបណ្តុះបណ្តាល ស្តីពីអនុសញ្ញា CEDAW
ពីធីសារតាមជម្រើស និងភាពជាអ្នកដឹកនាំ ជូនថ្នាក់ដឹកនាំថ្នាក់ជាតិ
និងថ្នាក់ក្រោមជាតិ និងបន្តរៀបចំវេទិកាសិក្សាស្វែងយល់
ពីបញ្ហាប្រឈម ក្នុងការបំពេញតួនាទី ភារកិច្ច និងវិធានការដោះស្រាយ
សម្រាប់ថ្នាក់ដឹកនាំស្ត្រីដែលទើបទទួលបានការតែងតាំង។ ទន្ទឹមនេះ
សម្តេចបានណែនាំឱ្យបន្តសហការជាមួយក្រសួងកិច្ចការនារី
ផ្សព្វផ្សាយលទ្ធផល នៃការប៉ាន់ប្រមាណ អំពីស្ថានភាពសេដ្ឋកិច្ច
របស់ស្ត្រីនៅជនបទ។
លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី
និងជាប្រធានក្រុមប្រឹក្សាជាតិកម្ពុជាដើម្បីស្ត្រី
បានមានប្រសាសន៍ឲ្យដឹងថា ក្នុងឆ្នាំ២០១៣នេះ
រាជរដ្ឋាភិបាលបានអនុញ្ញាតឱ្យ គណៈប្រតិភូកម្ពុជាសរុបចំនួន១៥រូប
ក្នុងនោះស្ត្រី១១រូប នៃក្រសួង ស្ថាប័នទៅចូលរួម
ឆ្លើយការពាររបាយការណ៍ជាតិលើកទី៤ និងទី៥
របស់ប្រទេសកម្ពុជាស្តីពីការអនុវត្តអនុសញ្ញាCEDAW
នៅអង្គការសហប្រជាជាតិ(ទីក្រុងហ្សឺណែវ)។ គណៈកម្មការនេះ
បានទទួលស្គាល់ និងកោតសរសើរចំពោះរាជរដ្ឋាភិបាលកម្ពុជា
ដែលបានធ្វើឱ្យស្ថានភាពស្ត្រីកម្ពុជាមានភាពរីកចំរើន
ហើយបានធ្វើសេចក្តីសង្កេតសន្និដ្ឋាន៥២ចំណុច សម្រាប់ក្រសួង
ស្ថាប័នពាក់ព័ន្ធ បន្តកែលម្អ
ផែនការសកម្មភាពរបស់ខ្លួនប្រកបដោយប្រសិទ្ធភាពខ្ពស់។
ជារួមលទ្ធផលដែលក្រុមប្រឹក្សាជាតិកម្ពុជា ដើម្បីស្ត្រី
សំរេចបានក្នុងឆ្នាំ២០១៣ គឺដោយមានការជួយឧបត្ថម្ភគាំទ្រ
ទាំងស្មារតី សំភារៈ និងថវិកា ពីសម្តេចព្រះមហាក្សត្រី នរោត្តម
មុនីនាថ សីហនុ ព្រះវររាជមាតា ជាតិខ្មែរ ក្នុងសេរីភាព
សេចក្តីថ្លៃថ្នូរ និងសុភមង្គល ព្រះប្រធានកិត្តិយស
នៃក្រុមប្រឹក្សាជាតិកម្ពុជា ដើម្បីស្ត្រី និងសម្តេចតេជោ ហ៊ុន សែន
នាយករដ្ឋមន្ត្រី នៃព្រះរាជាណាចក្រកម្ពុជា និងជាអនុប្រធានកិត្តិយស
នៃក្រុមប្រឹក្សាជាតិកម្ពុជា ដើម្បីស្ត្រី។
លោកជំទាវ
អ៊ឹង កន្ថាផាវី ក៏បានមានប្រសាសន៍បញ្ជាក់ថា ជាមួយ
នឹងការគាំទ្រដ៏ខ្ពង់ខ្ពស់ពីថ្នាក់ដឹកនាំកំពូល លទ្ធផល
សំរេចបានគួរឱ្យកត់សំគាល់នេះ
ពិតជាបានមកពីការចូលរួមអនុវត្តយ៉ាងយកចិត្តទុកដាក់
និងសកម្មបំផុតរបស់ក្រសួង ស្ថាប័ន រាជរដ្ឋាភិបាល អាជ្ញាធរដែនដី
អាជ្ញាធរមានសមត្ថកិច្ច គ្រប់លំដាប់ថ្នាក់
និងអង្គការក្រៅរដ្ឋាភិបាលព្រមទាំងការឧបត្ថម្ភគាំទ្រទាំងថវិកា
ទាំងបច្ចេកទេស ពីដៃគូអភិវឌ្ឍន៍ ជាពិសេសគឺការចូលរួមរបស់ប្រជាជន
និងស្ត្រីគ្រប់ទិសទី ដែលបានរួមចំណែក ពន្លឿនការអនុវត្តសកម្មភាព
ប្រកបដោយភាពរលូន និងប្រសិទ្ធភាព៕
កម្ពុជា-ចិនជំរុញឲ្យមានការផ្លាស់ប្ដូរដំណើរទស្សនកិច្ចក្នុងស្រទាប់យុវជន
ក្នុង
ឱកាសអនុញ្ញាតឲ្យឯកឧត្ដម Chen Fengxiang អនុរដ្ឋមន្ត្រី
ក្រសួងទំនាក់ទំនងអន្តរជាតិនៃគណៈកម្មាធិការបក្សកុម្មុយនីស្តចិន
ចូល ជួបសម្ដែងការគួរសមនាព្រឹកថ្ងៃទី២៤ ខែកុម្ភៈ ឆ្នាំ២០១៤
សម្ដេចអគ្គមហាសេនាបតីតេជោ ហ៊ុន សែន
នាយករដ្ឋមន្ត្រីនៃព្រះរាជាណាចក្រកម្ពុជា
បានជំរុញឲ្យមាននូវទំនាក់ទំនង
និងផ្លាស់ប្ដូរទស្សនកិច្ចរវាងយុវជន និងយុវជន នៃប្រទេសទាំងពីរ
(កម្ពុជា-ចិន) ។
ឯកឧត្តម
អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានឲ្យដឹងថា
នៅក្នុងជំនួបសម្តែងការគួរសម នៅវិមានសន្តិភាព
ទីស្តីការគណៈរដ្ឋមន្ត្រី ឯកឧត្ដម Chen Fengxiang
បានមានប្រសាសន៍ជម្រាបជូនសម្ដេចតេជោនាយករដ្ឋមន្ត្រីអំពីជំនួប
រវាងឯកឧត្ដមផ្ទាល់ជាមួយឯកឧត្ដម សាយ ឈុំ
ដែលបានពិភាក្សាគ្នាយ៉ាងល្អប្រសើរ
ក្នុងការជំរុញការអនុវត្តការងាររួមគ្នា
លើអ្វីដែលថ្នាក់ដឹកនាំទាំងពីរបាឯកភាពគ្នាកន្លងមក។
ឯកឧត្តម
Chen Fengxiang
អនុរដ្ឋមន្ត្រីក្រសួងទំនាក់ទំនងអន្តរជាតិនៃគណៈកម្មាធិការបក្ស
កុម្មុយនីស្តចិន បានមានប្រសាសន៍ឲ្យដឹងថា
កិច្ចពិភាក្សានោះក៏បានផ្ដោតទៅលើការផ្លាស់ប្ដូរបទពិសោធន៍រវាង
គណបក្សទាំងពីរ (គណបក្សកុម្មុយនីស្តចិន-គណបក្សប្រជាជនកម្ពុជា)
ធ្វើយ៉ាងណាជំរុញឲ្យគណបក្សទាំងពីរ
មានការស្និទ្ធស្នាលកាន់តែខ្លាំងឡើង
និងពិភាក្សាទៅដល់ការផ្លាស់ប្ដូរព័ត៌មាន
និងជំរុញឲ្យមានការផ្លាស់ប្ដូរដំណើរទស្សនកិច្ចជាបន្តបន្ទាប់ទៀត
ជាពិសេសក្នុងស្រទាប់យុវជន។ ឯកឧត្ដម Chen Fengxiang
បានមានប្រសាសន៍ថា
ភាគីចិនមានសុទិដ្ឋិនិយមចំពោះជោគជ័យនៅក្នុងព្រះរាជាណាចក្រកម្ពុជា
ហើយបន្តគាំទ្ររាជរដ្ឋាភិបាលកម្ពុជា
ជាពិសេសក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន
សែន។
សម្ដេចតេជោនាយករដ្ឋមន្ត្រីបានសម្ដែងការស្វាគមន៍
និងកោតសរសើរដល់កិច្ចពិភាក្សានោះ ដោយសម្តេចបានមានប្រសាសន៍ថា
ត្រូវជំរុញបន្តកិច្ចសហប្រតិបត្តិការនេះ
ជាពិសេសលើអ្វីដែលថ្នាក់ដឹកនាំទាំងពីរបានសម្រេចរួចមកហើយ
និងត្រូវជំរុញផងដែរនូវទំនាក់ទំនង និងផ្លាស់ប្ដូរទស្សនកិច្ច
រវាងយុវជន និងយុវជន ព្រោះថាយុវជនគឺជាអ្នកស្នងដំណែងនាពេលអនាគត៕
Subscribe to:
Posts (Atom)