លោក Yohei Watanabe ប្រធានគណៈកម្មាធិការសប្រតិបត្តិការធុរកិច្ចជប៉ុន-មេគង្គ បានមានប្រសាសន៍ជម្រាបសម្តេចអគ្គមហាសេនាបតីតេជោ ហ៊ុន សែន នាថ្ងៃទី៣ ខែមីនា ឆ្នាំ ២០១៤ថា អ្នកវិនិយោគជប៉ុនមានចំណាប់អារម្មណ៍យ៉ាងខ្លាំងចំពោះប្រទេសកម្ពុជា ដោយសារតែប្រទេសកម្ពុជាមានសក្តានុពលសេដ្ឋកិច្ច និងស្ថិតលើទីតាំងដ៏សំខាន់នៃច្រករបៀងខាងត្បូងផងដែរ។ នេះបើតាមការឲ្យដឹងពី ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តី។
ក្នុងឱកាសអនុញ្ញាតឲ្យចូលជួបសំដែងការគួរសម និងពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នៅវិមានសន្តិភាពក្នុងរាជធានីភ្នំពេញ លោក Yohei Watanabe បានមានប្រសាសន៍ថា ជាង ៩៩% នៃក្រុមហ៊ុនរបស់ជប៉ុន គឺជាប្រភេទក្រុមហ៊ុនខ្នាតតូច និងក្រុមហ៊ុនខ្នាតមធ្យម ។ ក្រុម ហ៊ុនទាំងអស់នោះមានចំណាប់អារម្មណ៍មកធ្វើការវិនិយោគ នៅតាមបណ្តាប្រទេសមួយចំនួននៅទ្វីបអាស៊ី។
លោក Yohei Watanabe មានប្រសាសន៍ថា បច្ចុប្បន្នជប៉ុនកំពុងតែបង្កើតឡើងនូវគណៈកម្មាធិការធុរកិច្ចជប៉ុន-មេគង្គ ដើម្បីជំរុញកិច្ចសហប្រតិបត្តិការជាមួយ និងបណ្តារដ្ឋាភិបាល និងអ្នកវិនិយោគនៅតាមប្រទេសអាស៊ី។
លោក Yohei Watanabe បានមានប្រសាសន៍ចំណាប់អារម្មណ៍ពីប្រទេសកម្ពុជាថា កម្ពុជាមានសក្តានុពលយ៉ាងខ្លាំង ពិសេសសក្តានុពលខាងការកែប្រែពីឧស្សាហកម្មអតិពលកម្មឲ្យទៅជាឧស្សាហកម្មបន្ថែមតម្លៃ ដែលឧស្សាហកម្មនោះនឹងជួយជំរុញកម្ពុជា ក្នុងការអភិវឌ្ឍធនធានមនុស្ស និងដើម្បីជំរុញសង្វាក់ផលិតកម្ម។ លោក Yohei Watanabe បានបញ្ជាក់ថា អ្នកវិនិយោគជប៉ុនមានបំណងពង្រឹងនូវកិច្ចសហប្រតិបត្តិការនៃប្រទេសទាំងពីរ (ជប៉ុន-កម្ពុជា) ឲ្យកាន់តែរឹងមាំទ្វេឡើងថែមទៀត។
លោក Yohei Watanabe ប្រធានគណៈកម្មាធិការសប្រតិបត្តិការធុរកិច្ចជប៉ុន-មេគង្គ មានបានចាត់ទុកកិច្ចព្រមព្រៀងអាកាសចរណ៍ស៊ីវិល ដើម្បីជំរុញការហោះហើរពីជប៉ុនមកកម្ពុជា និងពីកម្ពុជាទៅកាន់ជប៉ុន គឺពិតជាមានសារសំខាន់ ខ្លាំងណាស់នោះគឺជាការជំរុញអ្នក វិនិយោគរបស់ជប៉ុន និងអ្នកទេសចរមកកាន់កម្ពុជាឲ្យកាន់តែច្រើនឡើងថែមទៀត និងក៏ដើម្បីជំរុញកិច្ច សហប្រតិបត្តិការនៃប្រទេសទាំងពីរឲ្យកាន់តែខ្លាំងឡើងថែមទៀតពិសេសលើវិស័យវប្បធម៌។
លោកលោក Yohei Watanabe ប្រធានគណៈកម្មាធិការសប្រតិបត្តិការធុរកិច្ចជប៉ុន-មេគង្គដែលបានដឹកនាំគណៈប្រតិភូចំនួន ៣០រូប បានឲ្យដឹងថា ដំណើរទស្សនកិច្ចនៅកម្ពុជានាពេលនេះ គឺដើម្បីស្វែងយល់ពីបរិយាកាសវិនិយោគ បរិយាកាសសេដ្ឋកិច្ច និងបរិយាកាសនយោបាយនៅកម្ពុជា។
ពាក់ព័ន្ធទៅនឹងការស្វែងយល់ពីគណៈប្រតិភូអំពីអាទិភាព នៃវិស័យឧស្សាហកម្មនៅកម្ពុជា សម្តេចតេជោនាយករដ្ឋមន្រ្តីមានប្រសាសន៍ថា ឧស្សាហកម្មអាទិភាពរបស់កម្ពុជា គឺជាឧស្សាហកម្មកែច្នៃបង្កើនតម្លៃបន្ថែមលើវត្ថុធាតុដើម ដែលមាននៅក្នុងស្រុក ដើម្បីជំរុញការនាំចេញ និងឧស្សាហកម្មដទៃ ដែលនឹងនាំមកនូវការបណ្តុះបណ្តាលធនធានមនុស្ស និងជំរុញសង្វាក់ ផលិតដើម្បីធ្វើការនាំចេញ។
សម្តេចតេជោនាយករដ្ឋមន្រ្តីបានមានប្រសាសន៍ឲ្យដឹងថា បច្ចុប្បន្ននេះកម្ពុជាកំពុងតែជំរុញការកែច្នៃផលិតផលឲ្យទៅជាផលិតផលបញ្ចប់ ឬជាផលិតផលកែច្នៃពាក់កណ្តាលសម្រាប់ការនាំចេញ ដែលសម្តេចតេជោបានស្នើដល់អ្នកវិនិយោគទាំងមូលធ្វើការពិនិត្យលើផលិតផលអ្វីខ្លះ ដែលអាចធ្វើឲ្យក្លាយទៅជាផលិតផលសម្រេចនៅកម្ពុជា និងដើម្បីជាការជួយកម្ពុជាក្នុងការកាត់បន្ថយនូវការនាំចូល។
សម្តេចតេជោក៏បានលើកឡើងផងដែរពីបញ្ហាអង្ករ ដំឡូង ពោត និងកៅស៊ូ ដែលជាផលិតផលកម្ពុជាមាន ហើយក៏ជាផលិតផល អាចធ្វើការកែច្នៃទៅជាផលិតផលសម្រេច ឬផលិតផលពាក់កណ្តាលសម្រេច ដែលក្រុមហ៊ុនជប៉ុនគួរពិចារណាក្នុងការវិនិយោគ។
ទាក់ទងទៅនឹងការការហោះហើរត្រង់ (រវាងកម្ពុជា-ជប៉ុន) សម្តេចតេជោមានប្រសាសន៍ថា ពេលនេះការហោះហើរត្រង់ពីជប៉ុនមកកាន់កម្ពុជា និងពីកម្ពុជាទៅកាន់ ជប៉ុនកំពុងត្រូវបានធ្វើការសាកល្បង។ សម្តេចតេជោបញ្ជាក់ថា ការហោះហើរសាកល្បងនោះកំពុងធ្វើឡើងពីទីក្រុង តូក្យូ មកកាន់រាជធានីភ្នំពេញ ពីរាជធានីភ្នំពេញទៅកាន់ក្រុងសៀមរាប និងពីក្រុងសៀមរាប មកកាន់រាជធានីភ្នំពេញ និងពីរាជធានីភ្នំពេញទៅកាន់ក្រុងតូក្យូ។
សម្តេចតេជោមានប្រសាសន៍ថា នៅពេលដែលការហោះហើរសាកល្បងត្រូវបានបញ្ចប់ ក្រុមហ៊ុននឹងដំណើរការហោះហើរតែម្តង។
សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា នៅពេលដែលការហោះហើរនោះ (រវាងកម្ពុជា-ជប៉ុន) បានប្រព្រឹត្តទៅជាផ្លូវការហើយនោះ នឹងជួយជំរុញនូវកិច្ចសហប្រតិបត្តិការនៃប្រទេសទាំងពីរបន្ថែមពីលើកិច្ចសហប្រតិបត្តិការជាយុទ្ធសាស្រ្ត ដែលជប៉ុន និងកម្ពុជាកំពុងមាន។ សម្តេចតេជោបានផ្តល់នូវសេចក្តីសង្ឃឹមជឿជាក់ថា តាមរយៈការហោះហើរត្រង់នោះភាគីទាំងពីរ និងខិតខំប្រឹងប្រែងជំរុញកិច្ចសហប្រតិបត្តិការលើការវិនិយោគវិស័យទេសចរណ៍ និងវប្បធម៌ឲ្យកាន់តែល្អប្រសើរឡើងថែមទៀត៕