Wednesday, April 30, 2014
មន្ត្រីជាន់ខ្ពស់ UN គាំទ្រយុទ្ធសាស្ត្រចតុកោណរបស់រាជរដ្ឋាភិបាលកម្ពុជា
ឯកឧត្តម ហាវលៀង ស៊ូ (Haoliang Xu) ឧបការីអគ្គលេខាធិការ អង្គការ សហប្រជាជាតិ និងជានាយកការិយាល័យប្រចាំតំបន់អាស៊ី និងប៉ាស៊ីហ្វិក បានជម្រាបជូនសម្តេចអគ្គមហាសេនាបតីតេជោ ហ៊ុន សែន ថា ឯកឧត្តម និងកម្មវិធីអភិវឌ្ឍន៍អង្គការសហប្រជាជាតិ (UNDP) មានមោទនភាពណាស់ ដែលបានធ្វើជាដៃគូ ជាមួយរាជរដ្ឋាភិបាលកម្ពុជា និងត្រៀមជានិច្ច ដើម្បីគាំទ្រទៅដល់យុទ្ធសាស្ត្រចតុកោណរបស់រាជរដ្ឋាភិបាលកម្ពុជា។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រី បានឱ្យដឹងថា ក្នុងឱកាសប្រាស្រ័យការងារ ជាមួយសម្ដេចតេជោនៅវិមានសន្តិភាព នាព្រឹកថ្ងៃទី២៩ ខែមេសា ឆ្នាំ២០១៤នេះ ឯកឧត្តម ហាវលៀង ស៊ូ (Haoliang Xu) បានមានប្រសាសន៍ឲ្យដឹងថា ឯកឧត្តមបានមកកាន់ព្រះរាជាណាចក្រកម្ពុជា កាលពី១០ឆ្នាំមុន, នៅពេលនេះ ឯកឧត្តមបានមើលឃើញថា កម្ពុជាមានការអភិវឌ្ឍយ៉ាងខ្លាំងបំផុត ហើយតាមរយៈរបាយការណ៍ ដែលឯកឧត្តមបានអានកន្លងមក ក៏បានឆ្លុះបញ្ចាំងផងដែរ ពីការរីកចម្រើន និងការអភិវឌ្ឍយ៉ាងឆាប់រហ័សរបស់កម្ពុជា។ ឯកឧត្តម ស៊ូ បានបញ្ជាក់ថា ការរីកចម្រើន និងការអភិវឌ្ឍនេះ គឺមានសហគមន៍អន្តរជាតិធ្វើជាសាក្សី ហើយសម្រាប់រូបឯកឧត្តមផ្ទាល់ និងកម្មវិធីអភិវឌ្ឍអង្គការសហប្រជាជាតិ (UNDP) មានមោទនភាពណាស់ ដែលបានធ្វើជាដៃគូជាមួយរាជរដ្ឋាភិបាលកម្ពុជា ហើយត្រៀមជានិច្ចដើម្បីគាំទ្រទៅដល់យុទ្ធសាស្ត្រចតុកោណ របស់រាជរដ្ឋាភិបាលកម្ពុជា។
ឯកឧត្តម ហាវលៀង ស៊ូ (Haoliang Xu) បានជម្រាបសម្ដេចតេជោទៀតថា លោកធ្វើដំណើរមកកាន់កម្ពុជានៅពេលនេះ គឺដើម្បីពិនិត្យមើលការងារពាក់កណ្តាលអាណត្តិរបស់ កម្មវិធីអភិវឌ្ឍអង្គការសហប្រជាជាតិ ដែលពាក់ព័ន្ធទៅនឹងវឌ្ឍនភាព និងការប្រឈម ក៏ដូចជាធ្វើយ៉ាងណារៀបចំផែនការឱ្យមានសង្គតិភាព ជាមួយនឹងផែនការយុទ្ធសាស្ត្ររបស់រាជរដ្ឋាភិបាលកម្ពុជា។
សម្តេចតេជោនាយករដ្ឋមន្ត្រី បានសម្តែងនូវសេចក្តីរីករាយចំពោះប្រសាសន៍របស់ឯកឧត្តម ហាវលៀង ស៊ូ (Haoliang Xu) ដែលបានលើកឡើងថា អង្គការសហប្រជាជាតិ ជាដៃគូអភិវឌ្ឍន៍ជាមួយកម្ពុជា ពិសេសចំពោះការលើកឡើងថា រៀបចំផែនការឱ្យមានសង្គតិភាពជាមួយនឹងផែនការយុទ្ធសាស្ត្ររបស់រាជរដ្ឋាភិបាលកម្ពុជា ជាពិសេសយុទ្ធសាស្ត្រចតុកោណ។
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍រំលឹកអំពីកិច្ចការដែលរាជរដ្ឋាភិបាលកម្ពុជា បានធ្វើក្នុងកំណែទម្រង់ឡូត៍នេសាទនិងកំណែទម្រង់ដីធ្លី។ នៅក្នុងកំណែទម្រង់ដីធ្លី សម្តេចតេជោបានគូសបញ្ជាក់ថា មានបញ្ហាប្រឈមចំនួន៤ ដែលដៃគូអភិវឌ្ឍន៍ គប្បីមានការពិចារណា ដើម្បីសហការគាំទ្រ ទៅដល់ការតាំងទីលំនៅថ្មីរបស់ពលរដ្ឋបន្ទាប់ពីទទួលបានប័ណ្ណកម្មសិទ្ធិ ដោយសារទីតាំងថ្មីនោះ នៅមានកង្វះ ផ្លូវថ្នល់ ទឹកស្អាត មណ្ឌលសុខភាព និងសាលារៀន៕
សម្តេចតេជោរីករាយនិងស្វាគមន៍ចំពោះដំណើរការរបស់រោងចក្រ Minibea ជប៉ុននៅកម្ពុជា
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានសម្តែងនូវការរីករាយ និងស្វាគមន៍ចំពោះដំណើរការរីកចម្រើន ក្នុងការផលិត និងបង្កើននូវផលិតផលថ្មីរបស់រោចក្រ Minibea នៅក្នុងព្រះរាជាណាចក្រកម្ពុជា។
ក្នុងឱកាសអនុញ្ញាតឲ្យលោក Yoshihisa Kainuma ប្រធានក្រុមហ៊ុន Minibea មកពីប្រទេសជប៉ុន ចូលជួបសម្ដែងការគួរសមនារសៀលថ្ងៃទី២៨ ខែមេសា ឆ្នាំ២០១៤នៅវិមានសន្តិភាព សម្ដេចតេជោនាយករដ្ឋមន្ត្រី បានសម្ដែងនូវការរីករាយជាមួយនឹងវឌ្ឍនភាពរបស់រោងចក្រ Minibea ដោយសម្តេចបានមានប្រសាសន៍បញ្ជាក់ថា ការបញ្ជាទិញបន្ថែមពីរោងចក្រនោះគឺឆ្លុះបញ្ចាំងអំពីជំនឿទុកចិត្ត ទៅលើរោងចក្រនៅក្នុងព្រះរាជាណាចក្រកម្ពុជា។ ម្យ៉ាងទៀតការវិលត្រឡប់មកជាមួយនឹងបុគ្គលិក កម្មករថែមទៀតមកបម្រើការងារនៅក្នុងរោងចក្រនោះ ក៏ជាការឆ្លុះបញ្ចាំងនៃជំនឿទុកចិត្តមកលើរោងចក្រផងដែរ។
តាមរយៈឯកឧត្តម អ៊ាង សុផល្លែត ជំនួយការសម្ដេចតេជោបានឲ្យដឹងថា លោក Kainuma បានជម្រាបជូនសម្ដេចតេជោអំពីវឌ្ឍនភាពនៃរោងចក្រ Minibea នៅកម្ពុជា ដែលបានបើកឲ្យដំណើរការកាលពីខែធ្នូឆ្នាំ២០១១ កន្លងមកនេះ ។ រយៈពេល២ឆ្នាំ ៦ខែកន្លងមក រោងចក្របានទទួលកម្មករចំនួន ៥០០០នាក់ និងនៅខែមិថុនាខាងមុខនេះនឹងឈានដល់ទទួលកម្មករចំនួន ៦០០០នាក់ ដើម្បីបម្រើការងារនៅក្នុងរោងចក្រនេះ ។ លោកក៏បានជម្រាបជូនព័ត៌មានល្អជូនសម្ដេចតេជោថា ក្នុងឆ្នាំនេះរោងចក្ររបស់ក្រុមហ៊ុនបានទទួលការបញ្ជាទិញបន្ថែមទៀត ដែលក្នុងបញ្ហានេះបុគ្គលិកបម្រើការងារក្នុងរោងចក្រនឹងមានការកើនឡើង។
លោក Kainuma ប្រធានក្រុមហ៊ុន Minibea ក៏បង្ហាញនូវសេចក្តីរីករាយផងដែរ ដោយសារកាលពីបុណ្យឆ្នាំកន្លងទៅនេះ បុគ្គលិក កម្មករ បានវិលទៅផ្ទះវិញដើម្បីចូលរួមពិធីបុណ្យចូលឆ្នាំរបស់ជាតិ ហើយនៅពេលត្រឡប់មកវិញបាននាំមកនូវកម្មករ បុគ្គលិកដទៃទៀតមកដាក់ពាក្យបម្រើការងារនៅក្នុងរោចក្រផងដែរ ដែលនេះជាសក្ខីភាពឆ្លុះបញ្ចាំងនូវការពេញចិត្តរបស់បុគ្គលិកក្នុងការបម្រើការងារនៅក្នុងរោងចក្រ Minibea។ លោកប្រធានក្រុមហ៊ុនក៏បានជម្រាបជូនសម្ដេចតេជោផងដែរអំពីគម្រោងថ្មីរបស់ក្រុមហ៊ុនដែលនឹងផលិតភ្លើង LED សម្រាប់ប្រើប្រាស់នៅក្នុងទីធ្លាសាធារណៈផង នៅក្នុងអាយហ្វូនផង ក៏ដូចជាសម្រាប់កាមេរ៉ាសុវត្ថិភាពផងដែរ។
ពាក់ព័ន្ធនឹងគម្រោងថ្មីរបស់រោងចក្រ Minibea សម្ដេចតេជោនាយករដ្ឋមន្ត្រីបានស្វាគមន៍នឹងគម្រោងថ្មីដែលក្រុមហ៊ុនទើបរកឃើញ និងត្រៀមនឹងផលិត ដោយសម្តេចបានចាត់ទុកថា ផលិតផលថ្មីនេះនឹងជួយដល់ការកាត់បន្ថយការប្រើប្រាស់អគ្គិសនីផងដែរ៕
បទសម្ភាសន៍ ឯកឧត្តម អ៊ិត សំហេង, វិស័យការងារនៅក្នុងប្រទេសកម្ពុជា
បទសម្ភាសន៍ ឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ស្តីពី «វិស័យការងារនៅក្នុងប្រទេសកម្ពុជា»
Subscribe to:
Posts (Atom)