Thursday, May 22, 2014
បទអត្ថាធិប្បាយ៖ គណបក្សប្រឆាំងចាញ់ឆ្នោត ដើរអួតប្រាប់គេឯងថាឈ្នះ!
អំនួត
និងការបោកប្រាស់ប្រជាពលរដ្ឋ បានកើតឡើងជាថ្មីទៀត
បន្ទាប់ពីការបោះឆ្នោតរួចភ្លាមៗនារសៀលថ្ងៃទី១៨ ខែឧសភា ឆ្នាំ២០១៤
គឺនៅពេលលទ្ធផលផ្លូវការមិនទាន់បានប្រកាសនៅឡើយ លោក សម រង្ស៊ី ប្រធានគណបក្សសង្រ្គោះជាតិបានថ្លែងក្នុងសន្និសីទកាសែត
ថា គណបក្សរបស់ខ្លួនឈ្នះឆ្នោតយ៉ាងភ្លូកទឹកភ្លូកដី។
ប៉ុន្តែ តាមការពិត លទ្ធផលបោះឆ្នោតនៅទូទាំងប្រទេសបានបង្ហាញថា
គណបក្សប្រជាជនកម្ពុជា (CPP)ជាអ្នកឈ្នះ។ សម្លេងឆ្នោតនៅថ្នាក់ខេត្តគណបក្សប្រជាជនកម្ពុជា
ទទួលបាន៨៤២១សម្លេង ស្មើនឹង៧៣,៥៩ភាគរយ
រីឯគណបក្សសង្គ្រោះជាតិបានទទួលឆ្នោតតែត្រឹម២៩៧២សម្លេង ស្មើនឹង២៥,៩៧ភាគរយប៉ុណ្ណោះ។បើគណនាសម្លេងឆ្នោតថ្នាក់ស្រុក
គឺគណបក្សប្រជាជនកម្ពុជា ទទួលសម្លេងគាំទ្របានចំនួន ៨៣៧៩ សម្លេង
ស្មើនឹង៧៣,២៨ភាគរយ ដែលគណបក្សសង្គ្រោះជាតិបានទទួលសម្លេងឆ្នោតត្រឹមតែ
២៩៥៩ ស្មើនឹង២៥,៨៨ភាគរយ។
យោងលើលទ្ធផលនេះ បើធៀបនឹងការគណនាតាមចំនួនសមាជិកឃុំ
គណបក្សប្រជាជនកម្ពុជាបានកើនចំនួន១៣អាសន: នៅថ្នាក់ស្រុក រឺឯគណបក្សសង្រ្គោះជាតិ(គណបក្សសម
រង្ស៊ី និងគណបក្សសិទ្ធិមនុស្ស) បានបាត់បង់អាសន:របស់ខ្លួនអស់ចំនួន១០អាសនៈ។
របាយការណ៍ជាក់ស្តែងបង្ហាញថា
ការធ្លាក់ចុះសម្លេងឆ្នោតយ៉ាងគំហុករបស់គណបក្សប្រឆាំង
ត្រូវបានគេមើលឃើញថា ភាពជាអ្នកកាន់កាប់អាសនៈដ៏ច្រើនរបស់គណបក្សប្រជាជនកម្ពុជានៅតែរឹងមាំ
មិនរង្គើឡើយ។ ជាក់ស្តែង គ្រាន់តែនៅក្នុងខេត្តព្រៃវែងមួយប៉ុណ្ណោះ គណបក្សប្រជាជនកម្ពុជា បានកើនអាសនៈជាប្រធានក្រុមប្រឹក្សាថ្នាក់ស្រុកចំនួន៣។
យោងលើព័ត៌មានច្បាស់ការមួយបានបង្ហាញថា បន្ទាប់ពីទទួលបរាជ័យ
ថ្នាក់ដឹកនាំគណបក្សប្រឆាំងបានស្តីបន្ទោសគ្នា និងគំរាមបង្ហោះរូបថត
ក្រុមប្រឹក្សា ស្រុក ឃុំ អ្នកដែលបានងាកមកបោះឆ្នោតគាំទ្រគណបក្សប្រជាជនកម្ពុជា
ចំនួន៥នាក់នៅខេត្តកំពង់ស្ពឺ ជាមួយនឹងការគំរាមបណ្តេញអ្នកទាំងនោះចេញពីបក្ស
ដោយចោទថា «ក្បត់បក្ស» ។ ទាំងអស់នេះ
គឺជាសញ្ញានៃការបែកបាក់ផ្ទៃក្នុងដ៏ជ្រាលជ្រៅរបស់ក្រុមបក្សប្រឆាំង។
បើទោះជាបាត់បង់អាសនៈអស់ចំនួន១០
ប៉ុណ្ណឹងហើយ ប៉ុន្តែលោកសម រង្ស៊ី
នៅតែបំពានដោយគឃ្លើនក្នុងការភូតកុហកដោយឥតអៀនខ្មាស ហើយខំប្រឹងបោកប្រាស់
បំភ័ន្តគេឯង ក្នុងកាយវិការដូចជាអរខិបរខុប។
អ្នកវិភាគនយោបាយគេមើលឃើញទៀតថា
ហេតុអ្វីក៏ លោក សម រង្ស៊ី បញ្ចេញនូវ អាប្បកិរិយាសប្បាយរីករាយខ្លាំងម្លេះ
ក្នុងការស្រែកទទួលអបអរសាទរលទ្ធផល នៃគ.ជ.ប. ដែលបាន ខិតខំរៀបចំឲ្យមានការបោះឆ្នោតប្រព្រឹត្ដទៅតាំងពីដើម
រហូតដល់ចប់ចុងចប់ដើម។ អ្វីដែលគេ មិនយល់នោះ គឺថា តាំងពីដើមទីមកម្លេះ លោកសម
រង្ស៊ី និងថ្នាក់ដឹកនាំរបស់គាត់បានប្រមាថមាក់ងាយ
គ.ជ.ប មិនទទួលស្គាល់ គ.ជ.ប. ទាមទារឲ្យមានការផ្លាស់ប្ដូរ គ.ជ.ប ក្រោមលេសថា មិនឯករាជ្យ និងជាចោរ។ល។ តែទង្វើក្អេងក្អាងប្រកបដោយភាពអំនួតរបស់បក្សប្រឆាំងនាពេលនេះ
ហាក់កំពុងចាត់ទុកនូវការដឹកនាំរបស់ គ.ជ.ប.ប្រៀបបានជា
អាទិទេពរបស់ខ្លួនទៅវិញ។ ក្នុងន័យនេះអ្នកវិភាគនយោបាយគេ គិតថា លោកសម
រង្ស៊ី និងក្រុមគូកនរបស់គណបក្សនេះ មិនកំពុងតែវង្វេងវង្វាន់ទេឬអ្វី?។
ព្រឹត្ដិការណ៍ថ្មីៗ
ក៏បានឆ្លុះបញ្ចំងពីនយោបាយក្រៅប្រទេសរបស់លោក សម រង្ស៊ី ដែល កំពុងដើរទ្បាំប៉ា
គ្រប់ទីកន្លែងដើម្បីផ្លុំត្រចៀក ពួកអ្នកនយោបាយមួយចំនួនដែលងាយក្នុងការ
អូសទាញថា បក្សខ្លួនជាអ្នកឈ្នះឆ្នោត នាការបោះឆ្នោតកាលពីថ្ងៃទី២៨ ខែកក្កដា
ឆ្នាំ២០១៣ កន្លងមកនេះ ក្រោមលេសធ្វើជាទាត់ចោលលទ្ធផលបោះឆោ្នត ក្រោយពីដឹងថា
ការតវ៉ាតាម ផ្លូវច្បាប់ត្រូវទទួលបរាជ័យ ដោយចាប់យកដងផ្លូវ និងប្រជាពលរដ្ឋមួយចំនួនជាចំណាប់ខ្មំាង
ក្នុងការដើរក្បួនតវ៉ាតាមការស្រមើស្រមៃចង់បានអំណាចផ្ទាល់ខ្លួន។ ជាក់ស្ដែងពួកគេ
បានងាក មកចរចា ទាមទារយកតំណែងប្រធានរដ្ឋសភាក្រោមការលាក់បាំងថា ធ្វើឲ្យមានតុល្យភាព
អំណាចជាមួយគណបក្សប្រជាជន។ មិនតែប៉ុណ្ណោះ លោក សម រង្ស៊ី តែងតែធ្វើការវាយ
ប្រហារទៅនយោបាយអព្យាក្រឹត្យរបស់ សម្ដេចតេជោ ហ៊ុន សែន ប្រមុខរដ្ឋាភិបាល ក្នុងន័យកេងចំណេញផ្នែកនយោបាយថា
បានទៅចាប់ដៃជាមួយចិន បោះបង់អាមេរិក។ ផ្ទុយទៅវិញនៅក្នុងផលប្រយោជន៍ផ្ទាល់ខ្លួនគេឃើញ
លោក សម រង្ស៊ី បែរជាធ្វើរណេបរណប ជាមួយចិន ដោយបានប្រាប់ស្ថានីយ៍ទូរទស្សន៍ចិនមួយថា
បក្សប្រឆាំងគាំទ្រការទាមទារទឹកដីរបស់ចិន ដោយប្រឆាំង វៀតណាមនៅសមុទ្រចិនខាងត្បូង។
លោក សម រង្ស៊ី បានប្រាប់ទូរទស្សន៍Phoenixថា«
ចំណុចនេះបង្ហាញថា យើងមានគំនិតមិនស្របជាមួយអាមេរិកទេ
ព្រោះអាមេរិកគាំទ្រវៀតណាម។ បក្សសង្រ្គោះជាតិឈរខាងចិន » ។ ការគាំទ្រចិន មានន័យថា
លោក សម រង្ស៊ី កំពុងតែដើរផ្ទុយពីនយោបាយអាមេរិក និងបានប្រឆាំងយ៉ាងចេញមុខជាមួយរដ្ឋាភិបាលអាមេរិក។
ត្រង់ចំណុចនេះធ្វើឲ្យអ្នកវិភាគនយោបាយក្នុងស្រុកគេឆ្ងល់ថា
ក្រុមលោក សម រង្ស៊ី ដែល ជានិច្ចកាល តែងលើកតម្កើងនយោបាយអាមេរិកជាគ្រូបាធ្យាយ
ដែលម៉ាត់ណាក៏ប្រកាសក្ដែងៗ ថា « បក្សខ្លួនដើរតាមមាគ៌ាអាមេរិកដោយឥតងាករេ
» ព្រមទាំងអួតអាងថា អាមេរិកក្ដី អាណិកជនខ្មែរនៅអាមេរិកក្ដី
គាំទ្របក្សខ្លួនមិនចាញ់មេដឹកនាំអាមេរិកទេ។ មិនតែប៉ុណ្ណោះពួកគេ ស្ទើរតែហ៊ានស្បថសច្ចាថា
សូមជ្រកក្រោមទង់អាមេរិកលុះអវសាន្ដ។
បើហេតុនេះគេសួរថា តើលោក សម រង្ស៊ី
ពិតជាអ្នកនយោបាយតថភាពនិយម ឬទេ? បើខ្លួនបានដឹកនាំប្រទេស មិនមានជំហរជាក់លាក់នោះ
ក្នុងការថ្លឹងថ្លែងប្រទេសណាជាមិត្ដ ប្រទេសណាជាសត្រូវ ឬក៏មិនមានជំហរឯករាជ្យ
ឬមានជំហរមិនលំអៀងខាងណា ដើម្បីឲ្យប្រទេសមហាអំណាចគាំទ្រកម្ពុជា ទោះក្នុងកាលៈទេស: ណាក៏ដោយ។
អស់រយ:ពេល៥អាណត្ដិកន្លងមកនេះ
ចាប់តាំងពីកាលបោះឆ្នោតអាណត្ដិទី១ក្រោមការ រៀបចំដោយ UNTAC សម្ដេច ហ៊ុន
សែន
បានខិតខំដឹកនាំនាវាកម្ពុជាហែលឆ្លងកាត់ ព្យុះភ្លៀង ដែលបោកបក់មកពីគ្រប់ទិសទី
កម្លាំងនយោបាយមកពីប៉ូលខាងកើត និងកម្លាំងនយោបាយមក ពីប៉ូលខាងលិច
ព្រមទាំងការបង្កដោយក្រុមអគតិទាំងនៅកម្ពុជា និងនៅបរទេស ដែលមាននិន្នាការប្រឆាំងជាពិសេស
« NGOs » ។ ប្រទេសកម្ពុជាដែលបានរួចផុតពីគ្រោះមហន្ដរាយរបបខ្មែរក្រហមពីបាតដៃទទេ
សេដ្ឋកិច្ចប្រទេសដែលស្ថិតក្រោមសូន្យ បានឆ្លងកាត់មកដល់ស្ថានភាពបច្ចុប្បន្នដែលពិភពលោកចាត់ទុកកម្ពុជាថា
មានកំណើនសេដ្ឋកិច្ចយ៉ាងលឿន មិនមែនជាការធម្មតាទេ។
អ្នកវិភាគគេនំាគ្នាចោទសួរថា
តើលោកសម រង្ស៊ី និងថា្នក់ដឹកនាំរបស់ខ្លួនល្មមដល់ពេល
ទទួលស្គាល់ពីចំណុចខ្សោយរបស់ខ្លួនពីការភូតកុហក
ដែលបច្ចុប្បន្នត្រូវបានគេមើលឃើញនៅលើគោគអស់ទៅហើយ ដោយត្រូវហ៊ានទទួលស្គាល់ថា ការរស់រានមានជីវិត
ការកើនឥទ្ធិពលរបស់បក្សខ្លួនដែលកើនរហូតដល់៥៥អាសន: គឺដោយសារសិល្បៈនៃការភូតភររបស់ខ្លួន
មិនចេះចប់ មិនចេះហើយ ដោយសារការបោកបញ្ឆោតប្រជាពលរដ្ឋដែលគេមិនបានដឹងអំពី
ស្ថានភាពពិតប្រាកដរបស់ស្រុកទេស និងពិភពលោក។
បើយ៉ាងនេះ តើលោក សម រង្ស៊ី
និងថ្នាក់ដឹកនាំ របស់ខ្លួនហ៊ានទទួលស្គាល់ការពិតថា ខ្លួនជាអ្នកចាញ់ឆ្នោតហើយឬនៅ?
តើគណបក្សសង្រ្គោះជាតិហ៊ានប្រកាសថា គណបក្សប្រជាជនឈ្នះឆ្នោតបាន៦៨អាសន:
ហើយបក្សខ្លួនបានទទួល ៥៥អាសន:ហើយឬនៅ?
បើបច្ចុប្បន្នខ្លួនបានទទួលស្គាល់ការពិតនូវឯករាជ្យភាពនៃស្ថាប័ន
គ.ជ.ប.ក្នុងការគ្រប់
គ្រងដំណើរការទូទៅនៃការបោះឆ្នោតក្រុមប្រឹក្សាខេត្ដ
រាជធានី ស្រុក ខណ្ឌ ដែលខ្លួនបាននិងកំពុងអបអរសាទរ យ៉ាងកក់ក្ដៅនោះ។
បើមិនអីចឹងទេតើយន្ដការឯករាជ្យភាពនៃស្ថាប័នមួយស្ថិតលើការអនុវត្ដច្បាប់
ឬ ស្ថិតនៅលើយន្ដការបុគ្គលបក្សប្រឆាំងជាអ្នកកំណត់!។
អត្ថបទដោយ៖
រត្ន័ សណ្ដាប់
សុន្ទរកថា ឯកឧត្តមបណ្ឌិតសភាចារ្យ សុខ អាន ក្នុងពិធីបើក «ពិព័រណ៍អប់រំឧត្តមសិក្សាប្រទេសចិនលើកទី២»
រាជបណ្ឌិត្យសភាកម្ពុជា
ថ្ងៃទី២២
ខែឧសភា ឆ្នាំ២០១៤
- លោក លី ជាវគង់ ភារធារីនៃសាធារណរដ្ឋប្រជាមានិតចិនប្រចាំនៅព្រះរាជាណាចក្រកម្ពុជា
- លោកជំទាវ ខ្លូត ធីតា ប្រធានរាជបណ្ឌិត្យសភាកម្ពុជា
- លោកស្រី លីវ ជីងហួយ អគ្គលេខាធិការក្រុមប្រឹក្សាជាតិអាហារូបករណ៍របស់ប្រទេសចិន
- ឯកឧត្តម លោកជំទាវ បណ្ឌិតសភាចារ្យ សាស្ត្រាចារ្យ អស់លោក លោកស្រី សមាជិក
សមាជិកា នៃអង្គពិធីទាំងមូល ភ្ញៀវកិត្តិយសជាតិនិងអន្តរជាតិ ជាទីមេត្រី!
ថ្ងៃនេះ ខ្ញុំមានសេចក្តីសោមនស្សរីករាយចូលរួមជាមួយ ឯកឧត្តម លោកជំទាវ បណ្ឌិតសភាចារ្យ
សាស្ត្រាចារ្យ អស់លោក លោកស្រី ក្មួយៗនិស្សិត ភ្ញៀវកិត្តិយសជាតិនិងអន្តរជាតិ ក្នុងពិធីបើក «ពិព័រណ៍អប់រំឧត្តមសិក្សាប្រទេសចិនលើកទី២»
ដ៏មានសារៈសំខាន់ នាពេលនេះ។ ឆ្លៀតឱកាសនេះ ខ្ញុំសូមសម្តែងនូវការកោតសរសើរ
និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការទាំងអស់នៃវិទ្យាស្ថានខុងជឺនៃរាជបណ្ឌិត្យសភាកម្ពុជា និងសាកលវិទ្យាល័យអាស៊ីអឺរ៉ុប
ដែលបានសហការរៀបចំពិព័រណ៍នេះឡើងសំដៅចូលរួមលើកកម្ពស់គុណភាព និងប្រសិទ្ធភាពនៃការបណ្តុះបណ្តាលធនធានមនុស្សនៅកម្ពុជា។ ខ្ញុំក៏សូមសម្តែងនូវអំណរគុណចំពោះស្ថានទូតនៃសាធារណរដ្ឋប្រជាមានិតចិនប្រចាំនៅព្រះរាជាណាចក្រកម្ពុជា
ក្រុមប្រឹក្សាជាតិអាហារូបករណ៍នៃសាធារណរដ្ឋប្រជាមានិតចិន
និងបណ្តាគ្រឹះស្ថានឧត្តមសិក្សាចិន ដែលបានចូលរួមឧបត្ថម្ភគាំទ្រដល់ការរៀបចំពិព័រណ៍នេះ។
តាមរបាយការណ៍របស់លោកជំទាវបណ្ឌិតសភាចារ្យ
ខ្លូត ធីតា ប្រធានរាជបណ្ឌិត្យសភាកម្ពុជាបានបញ្ជាក់ថា ពិព័រណ៍លើកទី១ ត្រូវបានរៀបចំឡើងនៅសាកលវិទ្យាល័យអាស៊ីអឺរ៉ុប
កាលពី ថ្ងៃទី១៧ ខែឧសភា ឆ្នាំ២០១៣ ដោយមានការចូលរួមពីសាកលវិទ្យាល័យល្បីៗរបស់ចិនចំនួន១៤។ ដោយឡែក ពិព័រណ៍លើកទី២នេះ មានសាកលវិទ្យាល័យល្បីៗរបស់ចិនចំនួន ២២ បានមកចូលរួម
ផងដែរ។
ការជួបជុំគ្នានៅថ្ងៃនេះ
គឺជាព្រឹត្តិការណ៍លើកទី២នៃ «ពិព័រណ៍អប់រំឧត្តមសិក្សាប្រទេសចិន» ដែលរៀបចំឡើងដោយវិទ្យាស្ថានខុងជឺនៃរាជបណ្ឌិត្យសភាកម្ពុជា។
វិទ្យាស្ថានខុងជឺនៃរាជបណ្ឌិត្យសភាកម្ពុជាបានបញ្ជាក់ថា ការតាំងពិព័រណ៍លើកទី១កន្លងទៅ បានទាក់ទាញនិស្សិតកម្ពុជាជាង៤ពាន់នាក់ចូលមកទស្សនា
ហើយក៏លើកទឹកចិត្តដល់និស្សិតរាប់រយនាក់ទៅសិក្សានៅប្រទេសចិន។
ជារៀងរាល់ឆ្នាំ សាធារណរដ្ឋប្រជាមានិតចិន
បានផ្តល់អាហារូបករណ៍ជាច្រើនដល់និស្សិតកម្ពុជា។ ដោយសារធនធានមនុស្សជាកត្តាសំខាន់មិនអាចខ្វះបានក្នុងការអភិវឌ្ឍ
ខ្ញុំសង្ឃឹមយ៉ាងមុតមាំថា ស្ថានទូតចិនប្រចាំកម្ពុជា និងក្រុមប្រឹក្សាជាតិអាហារូបករណ៍របស់ប្រទេសចិននឹងពិចារណាផ្តល់អាហារូបករណ៍ឱ្យកាន់តែច្រើនបន្ថែមទៀតដល់និស្សិតកម្ពុជា។
ឯកឧត្តម
លោកជំទាវ អស់លោក លោកស្រី!
កាលពីថ្ងៃទី២២ ខែធ្នូ ឆ្នាំ២០១៣
កន្លងមកនេះ នៅក្នុងពិធីបិទសន្និសីទអន្តរជាតិលើកទី២របស់វិទ្យាស្ថានខុងជឺនៃរាជបណ្ឌិត្យសភាកម្ពុជា ស្តីពី «ខួប៥៥ឆ្នាំនៃទំនាក់ទំនងការទូតកម្ពុជា-ចិន» ខ្ញុំក៏បានរំឭកអំពីប្រវត្តិនៃទំនាក់ទំនងរវាងប្រទេសយើងទាំងពីរដែលមានតាំងពីយូរលង់ណាស់មកហើយ
ហើយបច្ចុប្បន្ននេះ ទំនាក់ទំនង ចំណងមិត្តភាព សាមគ្គីភាព និងភាតរភាពនេះ កាន់តែមានភាពស្អិតរមួតថែមទៀត ដោយឈរលើគោលការណ៍គោរពអធិបតេយ្យភាព និងការផ្តល់ផលប្រយោជន៍ដល់គ្នាទៅវិញទៅមក រហូតសម្រេចបាននូវដំណាក់កាលថ្មីដ៏គួរឱ្យកត់សម្គាល់
គឺភាពជាដៃគូយុទ្ធសាស្ត្រគ្រប់ជ្រុងជ្រោយ។ ជាលទ្ធផល កិច្ចសហប្រតិបត្តិការលើគ្រប់វិស័យកាន់តែត្រូវបានពង្រឹង និងពង្រីកថែមទៀត ដែលជាកត្តានាំមកនូវការអភិវឌ្ឍសេដ្ឋកិច្ច-សង្គម សម្រាប់ផលប្រយោជន៍ទៅវិញទៅមក នៃប្រជាពលរដ្ឋ និងប្រទេសយើងទាំងពីរ។ ជាងនេះទៅទៀត នៅក្នុងគោលនយោបាយការបរទេស
រាជរដ្ឋាភិបាលកម្ពុជាជានិច្ចកាលគាំទ្រគោលនយោបាយចិនតែមួយ និងជាដៃគូយុទ្ធសាស្ត្រដ៏ស៊ីជម្រៅ។ នេះគឺឆ្លុះបញ្ចាំងឱ្យឃើញនូវជំហរឥតងាករេរបស់រាជរដ្ឋាភិបាលកម្ពុជា ចំពោះគោលនយោបាយការបរទេសអព្យាក្រឹត
សន្តិសហវិជ្ជមាន មិនចូលបក្សសម្ព័ន្ធ
កសាងទំនាក់ទំនងមិត្តភាពនិងសហប្រតិបត្តិការជាមួយគ្រប់ប្រទេស
ដោយឈរលើគោលការណ៍សមភាព គោរពឯករាជ្យ អធិបតេយ្យ បូរណភាពទឹកដី
និងមិនជ្រៀតជ្រែកចូលកិច្ចការផ្ទៃក្នុងគ្នា។
ឯកឧត្តម
លោកជំទាវ អស់លោក លោកស្រី !
គ្រឹះស្ថានសិក្សា
រួមទាំងស្ថាប័នដទៃទៀតទាំងអស់ត្រូវបានបំផ្លិចបំផ្លាញទាំងស្រុងដោយរបបប្រល័យពូជសាសន៍ក្នុងរយៈពេលតែជាងបីឆ្នាំប៉ុណ្ណោះ។
បន្ទាប់ពីថ្ងៃរំដោះ ៧ មករា ១៩៧៩យើងបានឆ្លងកាត់ការលំបាកគ្រប់បែបយ៉ាង ដោយដៃម្ខាងខិតខំប្រឹងប្រែងស្ដារ និងកសាងជាតិមាតុភូមិជាទីស្នេហានៃយើងពីបាតដៃទទេ និងដៃម្ខាងទៀតខិតខំការពារមិនឱ្យមានការវិលត្រឡប់មកវិញនៃរបបប្រល័យពូជសាសន៍។ លើសពីនេះទៀត តាមរយៈគោលនយោបាយឈ្នះ-ឈ្នះរបស់សម្តេចតេជោនាយករដ្ឋមន្ត្រី ការផ្សះផ្សារ បង្រួបបង្រួម និងឯកភាពជាតិ ត្រូវបានសម្រេចឡើង
ដោយពុំមានការបង្ហូរឈាមគ្នាឡើយ ហើយកម្ពុជាទទួលបានសន្តិភាពពេញលេញទូទាំងប្រទេស ដែលយើងពុំធ្លាប់ទទួលបានឡើយនៅក្នុងរយៈកាលប្រមាណ ៥០០ឆ្នាំ ចុងក្រោយនេះ។
សុខសន្តិភាព និងស្ថិរភាពនយោបាយ គឺជាមូលដ្ឋានដ៏រឹងមាំសម្រាប់ធានាបាននូវការអភិវឌ្ឍលើគ្រប់វិស័យ សំដៅលើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាជន។ ជាក់ស្តែង ក្នុងឆ្នាំ២០១២ កម្ពុជាសម្រេចបាននូវកំណើនសេដ្ឋកិច្ច ៧,៣% ហើយកំណើននេះត្រូវបានប៉ាន់ស្មានថាស្ថិតក្នុងរង្វង់ពី ៧% ទៅ ៨% នៅឆ្នាំបន្តបន្ទាប់
ដោយរក្សាបាននូវអតិផរណាទាប។ ផ្អែកលើកំណើនដ៏ខ្ពស់នេះ កម្ពុជាសម្រេចបានជោគជ័យក្នុងការកាត់បន្ថយភាពក្រីក្រ ហើយនឹងក្លាយជាប្រទេសដែលមានប្រាក់ចំណូលមធ្យមកម្រិតទាបក្នុងពេលអនាគតដ៏ខ្លីខាងមុខនេះ
និងឈានទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។
រាជរដ្ឋាភិបាល
ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងយកចិត្តទុក ដាក់ខ្ពស់ទៅលើវិស័យអប់រំ
ដែលជាវិស័យអាទិភាពមួយដ៏សំខាន់ ដោយហេតុថាវិស័យនេះ គឺជាឆ្អឹងខ្នងសម្រាប់ទ្រទ្រង់ការអភិវឌ្ឍសេដ្ឋកិច្ចជាតិ
ព្រមទាំងការអភិវឌ្ឍវិស័យដទៃៗទៀត។ វិស័យអប់រំទាំងមូលមានការរីកចម្រើនជាបន្តបន្ទាប់គួរឱ្យកត់សម្គាល់ ទាំងបរិមាណនិងគុណភាព ជាក់ស្តែង សាលារៀនចំណេះទូទៅ គ្រឹះស្ថានឧត្តមសិក្សា និងចំនួនសិស្ស
និស្សិតចុះឈ្មោះចូលរៀននៅគ្រប់ភូមិសិក្សាទាំងផ្នែកសាធារណៈ និងផ្នែកឯកជន មានការរីកដុះដាលយ៉ាងខ្លាំង ដែលនេះគឺជាមូលដ្ឋានគ្រឹះដ៏ចាំបាច់សម្រាប់ឈានទៅពង្រឹងគុណភាពអប់រំឱ្យកាន់តែប្រសើរឡើងថែមទៀត។ ជោគជ័យទាំងនេះ គឺជាការរួមចំណែកយ៉ាងសំខាន់ដល់ការលើកកម្ពស់ ការអភិវឌ្ឍធនធានមនុស្សឱ្យឆ្លើយតបទៅនឹងតម្រូវការទីផ្សារការងារ ។
ឯកឧត្តម
លោកជំទាវ អស់លោក លោកស្រី !
ការរៀបចំ
«ពិព័រណ៍អប់រំឧត្តមសិក្សាប្រទេសចិន» នេះ
គឺជាការរួមចំណែកដ៏សំខាន់ ឆ្លើយតបទៅនឹងតម្រូវការថ្មីៗនៃការអភិវឌ្ឍធនធានមនុស្សកម្ពុជា ប្រកបដោយគុណភាពខ្ពស់ទាំងចំណេះដឹង ចំណេះធ្វើ គុណធម៌
និងសីលធម៌។ ខ្ញុំសូមលើកទឹកចិត្ត និងគាំទ្រឱ្យមានការងារពិព័រណ៍នេះជារៀងរាល់ឆ្នាំ ដើម្បីផ្តល់ពុទ្ធិនិងបទពិសោធន៍បន្ថែមដល់សិស្ស-និស្សិតកម្ពុជា
អំពីស្ថានភាពសិក្សាថ្នាក់ឧត្តមសិក្សា នៅប្រទេសចិន។ ពិព័រណ៍នេះក៏ជាការរួមចំណែកជាមួយរាជរដ្ឋាភិបាលកម្ពុជា នៅក្នុងកិច្ចខិតខំប្រឹងប្រែងកំណែទម្រង់វិស័យអប់រំឱ្យកាន់តែស៊ីជម្រៅថែមទៀត។ លើសពីនេះទៀត ពិព័រណ៍នេះក៏រួមចំណែកផងដែរដល់បេសកកម្មពង្រឹងនិងពង្រីកចំណងការទូតរវាងព្រះរាជាណាចក្រកម្ពុជា
និងសាធារណរដ្ឋប្រជាមានិតចិន តាមរយៈ ទំនាក់ទំនងនៃវិស័យអប់រំនៃប្រទេសយើងទាំងពីរ។
ជាថ្មីម្តងទៀត ខ្ញុំសូមសម្តែងនូវអំណរគុណយ៉ាងជ្រាលជ្រៅចំពោះរដ្ឋាភិបាលនិងប្រជាជននៃសាធារណរដ្ឋប្រជាមានិតចិន ក្រុមប្រឹក្សាជាតិអាហារូបករណ៍នៃប្រទេសចិន និងបណ្តាគ្រឹះស្ថានឧត្តមសិក្សាចិន ដែលបានចូលរួមជួយឧបត្ថម្ភគាំទ្រដល់ដំណើរការរៀបចំពិព័រណ៍អប់រំថ្នាក់ឧត្តមសិក្សារបស់ប្រទេសចិន
និងសូមសម្តែងនូវការកោតសរសើរចំពោះថ្នាក់ដឹកនាំនិងមន្រ្តីរាជការទាំងអស់របស់រាជបណ្ឌិត្យសភាកម្ពុជា វិទ្យាស្ថានខុងជឺនៃរាជបណ្ឌិត្យសភាកម្ពុជា និងសាកលវិទ្យាល័យអាស៊ីអឺរ៉ុប ដែលបានបញ្ចេញអស់នូវកម្លាំងកាយចិត្តនិងប្រាជ្ញាស្មារតី ក្នុងការធ្វើឱ្យពិព័រណ៍នេះដំណើរការបានយ៉ាងល្អ។
ជាទីបញ្ចប់
ខ្ញុំសូមជូនពរឯកឧត្តម លោកជំទាវ បណ្ឌិតសភាចារ្យ
សាស្ត្រាចារ្យ អស់លោក លោកស្រី ក្មួយៗនិស្សិត ភ្ញៀវកិត្តិយសជាតិនិងអន្តរជាតិទាំងអស់ សូមទទួលបានជោគជ័យគ្រប់ភារកិច្ច មានសុខភាពល្អ និងសុភមង្គលក្នុងក្រុមគ្រួសារ និងសូមឱ្យចំណងមិត្តភាពរវាងប្រទេសយើងទាំងពីរកម្ពុជា-ចិន ស្ថិតស្ថេរអមតៈ
រុងរឿងជាភិយ្យោភាព តរៀងទៅ។
ខ្ញុំសូមប្រកាសបើក «ពិព័រណ៍អប់រំឧត្តមសិក្សាប្រទេសចិនលើកទី២» នាពេលនេះ។
សូមអរគុណ!
Subscribe to:
Posts (Atom)