សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងក្រុមគ្រួសារបានអញ្ជើញទៅចូលរួមក្នុងពិធីបុណ្យភ្ជុំបិណ្ឌ នៅថ្ងៃ១៥រោច ខែភទ្របទ ឆ្នាំមមី ឆស័កពុទ្ធសករាជ២៥៥៨ ត្រូវនឹងថ្ងៃទី២៣ ខែកញ្ញា ឆ្នាំ២០១៤ ដែលជាថ្ងៃប្រារព្ធ ពិធីបុណ្យឆ្លងភ្ជុំបិណ្ឌជាមួយពុទ្ធបរិស័ទនៅវត្តហរិរក្សរាជិនី (វត្តវាំងចាស់) ស្ថិតក្នុងឃុំវាំងចាស់ ស្រុកឧដុង្គ ខេត្តកំពង់ស្ពឺ ក្នុងបរិយាកាសយ៉ាងរីករាយ និងសទ្ធារជ្រះថ្លាក្រៃលែង។
នៅលើសាលាឆាន់សម្តេចអគ្គមហាសេនាបតីតេជោ ហ៊ុន សែន បានអញ្ជើញអុជធូបទៀន ថ្វាយផ្កាភ្ញីបូជាព្រះពុទ្ធរូបព្រះអង្គតូចព្រះអង្គធំគ្រប់អង្គ ជាកិច្ចរំលឹកដល់គុណបុណ្យព្រះរតនត្រៃ តាមគន្លងប្រពៃណីព្រះពុទ្ធសាសនា ជាពិសេសដល់គុណបុណ្យព្រះសម្មាសម្ពុទ្ធព្រះបរមគ្រូ ដែលព្រះអង្គបានត្រាស់ដឹងនូវអនុត្តរៈសម្មាសម្ពោធិញ្ញាណ និងព្រះធម៌ដ៏វិសេសវិសាល បន្សល់ទុកឱ្យកូនចៅដែលកាន់សាសនាព្រះពុទ្ធបានគោរពប្រណិបតន៍ ចាប់តាំងពីដើមរៀងមករហូតដល់បច្ចុប្បន្ន។
បន្ទាប់ពីថ្វាយគន្ធពិដោរដល់ព្រះបដិមាគ្រប់អង្គរួចមក មហាឧបាសិកា ប៊ុន ស៊ាងលី សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត និងញាតិមិត្តគ្រប់ក្រុមគ្រួសារ ព្រមទាំងពុទ្ធបរិស័ទទាំងអស់បានអញ្ជើញប្រារព្ធបទនមស្ការ ព្រះរតនត្រៃថ្វាយបង្គំព្រះពុទ្ធរូប ថ្វាយបង្គំព្រះសង្ឃ និង សមាទានសីលទៅតាមប្រពៃណីព្រះពុទ្ធសាសនា ក្រោមកិច្ចដឹកនាំរបស់គណៈកម្មការអាចារ្យវត្ត។
មហាឧបាសិកា ប៊ុន ស៊ាងលី សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងក្រុមគ្រួសារ បាននាំយកនូវគ្រឿងសក្ការៈបូជា មានទៀនធូប ផ្កាភ្ញី ថ្វាយចំពោះព្រះរតនៈត្រ័យ និងនាំយកចង្ហាន់ទេយ្យទាន គ្រឿងឧបភោគ បរិភោគជាច្រើនមុខ និងបច្ច័យប្រគេនព្រះសង្ឃ រាប់បាត្របង្សុកូល ឧទ្ទិសមគ្គផលកុសលផលបុណ្យ ជូនចំពោះបុព្វការីជនមានមាតាបិតា ជីដូនជីតា ញាតិការទាំង៧សណ្តាន ជាពិសេសដួងវិញ្ញាណក្ខន្ធអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង លោកយាយ មហាឧបាសិកា ឌី ប៉ុក ដែលជាលោកឳពុក និងជាអ្នកម្តាយបង្កើតរបស់សម្តេចតេជោ ហ៊ុន សែន និង ឧទ្ទិសចំពោះវិញ្ញាណក្ខន្ធលោកមហាឧបាសក លីន គ្រី ជាឪពុកបង្កើតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី និង វិញ្ញាណក្ខន្ធរបស់កុមារា ហ៊ុន កំសត់ ដែលជាបុត្រច្បងរបស់សម្តេចតេជោ និង សម្តេចកិត្តិព្រឹទ្ធបណ្ឌិតផងដែរ។
មួយផ្នែកកុសលផលបុណ្យនេះ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងក្រុមគ្រួសារ ក៏បានឧទ្ទិសដល់វិញ្ញាណក្ខន្ធវីរជនស្នេហាជាតិគ្រប់រូប យុទ្ធជន យុទ្ធនារី នៃកងយោធពលខេមរភូមិន្ទវិញ្ញាណក្ខន្ធប្រជាពលរដ្ឋស្លូតត្រង់ជាង ៣លាននាក់ សូមទទួលមគ្គផល និងបានសោយសុខក្សេមក្សាន្ត និងសូមបារមីដែលថែរក្សាក្នុងលោក ជាពិសេសបារមីថែរក្សាវត្តវាំងចាស់ សូមជួយថែរក្សាព្រះរាជាណាចក្រកម្ពុជាឱ្យមានសុខសន្តិភាពយ៉ាងពេញលេញ ប្រជាពលរដ្ឋរស់នៅប្រកបដោយភាពសុខដុមរមនា ចៀសឆ្ងាយពីបាតុភូតធម្មជាតិផងទាំងពួង ប្រទេសជាតិមានការអភិវឌ្ឍលើគ្រប់វិស័យចាប់តាំងពីពេលនេះតរៀងទៅ។
ក្នុងឱកាសនោះ មហាឧបាសិកា ប៊ុន ស៊ាងលី សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិតបានប្រគេនបច្ច័យ ពីការចាប់មគ្គផលរបស់សប្បុរសជននានាក្នុងថ្ងៃបុណ្យឆ្លងជាច្រើនលានរៀល សម្រាប់កសាងវត្ត ប្រគេនបច្ច័យព្រះ សង្ឃ ទេយ្យទានមួយ ព្រមទាំងសម្ភារបរិក្ខារគ្រឿងឧបភោគបរិភោគ ចង្ហាន់ និង ភេសជ្ជៈជាច្រើនមុខទៀតផង។
សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតបានអញ្ជើញពូនភ្នំខ្សាច់ ដើម្បីជាកិច្ចដែលប្រជាពលរដ្ឋខ្មែរយើងគ្រប់រូបមានជំនឿតគ្នាមកថា ការពូនភ្នំខ្សាច់នេះ គឺជាការជម្រះនូវអំពើឆ្គាំឆ្គងទាំងឡាយណា ដែលមនុស្សយើងគ្រប់រូបបានប្រព្រឹត្តពីអតីតកាល។
សម្តេចតេជោនាយករដ្ឋមន្ត្រីក៏បានអញ្ជើញអុជទៀនធូប បូជាផ្កាភ្ញីថ្វាយនៅតាមទីសក្ការៈបូជានានាក្នុងវត្តវាំងចាស់ ក្នុងនោះនៅលើអតីតទួលប្រាសាទទេវាវិនិច្ឆ័យ ព្រះពុទ្ធរូបអង្គធំ ក្នុងព្រះវិហារ និងរូបសំណាកមេទ័ពខ្មែរផងដែរ។
តាមរាជពង្សាវតារជាសាស្រ្តាស្លឹករឹតនៅវត្តកោកកាកបានឱ្យដឹងថា វត្តវាំងចាស់ត្រូវបានកសាងឡើងក្នុងរាជព្រះបាទអង្គដួង ដែលកសាងក្នុងពេលដំណាលគ្នានឹងវត្តមួយចំនួនទៀតរួមមាន វត្តព្រះពុទ្ធសេយ្យាសន៍ វត្តគ្រាំងពន្លៃ វត្តព្រះវិហារសំណ វត្តស្លាគូរ និងវត្តវិហារខ្ពស់ ស្ថិតនៅក្នុងបរិវេណក្រុងឧត្តុង្គ ឮជ័យ ឬឧត្តុង្គមានជ័យ គឺជាសម័យកាលមួយដែលរាជវាំងខ្មែរត្រូវបានគ្រប់គ្រងម្តងដោយខ្លាទិសខាងលិច និងម្តងដោយក្រពើទិសខាងកើត។
បច្ចុប្បន្នទីតាំងព្រះវិហារចាស់ត្រូវបានជួសជុលឡើងវិញ ព្រមទាំងមានដាក់តាំងកាំភ្លើងធំបុរាណចំនួន ១១ដើមព័ទ្ធជុំវិញ។ រីឯព្រះវិហារថ្មីត្រូវបានកសាងនៅប៉ែកខាងជើងទីទួលព្រះវិហារចាស់។ ក្នុងបរិវេណអារាមនេះទាំងមូល មានកុដិព្រះសង្ឃស្នាក់នៅចំនួន២ និងអគារសាលាបាលី១ នៅក្បែរនោះ។
ចំណែកនៅប៉ែកខាងត្បូងជាប់របងវត្តវិញ គឺជាអគារសាលាបឋមសិក្សាវត្តវាំងចាស់ចំនួន ២ខ្នង ស្ថិតនៅដង្ហែគ្នាបណ្តោយថ្ងៃ។ នៅចំខាងលិចព្រះវិហារថ្មី គឺជាកុដិរបស់ព្រះចៅអធិការវត្តវាំងចាស់ ហើយនៅខាងជើងជាប់នឹងកុដិរបស់ព្រះចៅអធិការនេះ គឺជាសាលាឆាន់ដ៏ធំទូលាយ និងស្រស់ឆើតឆាយមិនចាញ់សាលាឆាន់ក្នុងទីអារាមនៅក្រុងភ្នំពេញទេ ដែលសមិទ្ធផលទាំងអស់នៅក្នុងទីអារាមនេះ ត្រូវបានផ្តួចផ្តើម និងឧបត្ថម្ភកសាងដោយសម្តេចតេជោ និងសម្តេចកិត្តិព្រឹទ្ធបណ្ឌិត អស់រយៈពេលជាច្រើនឆ្នាំមកហើយ៕