Monday, September 29, 2014

ឯកឧត្តម សុខ អាន អនុញ្ញាត​ឱ្យប្រតិភូ​អភិបាល​ក្រុងប៊ូសាន​នៃប្រទេស​កូរ៉េខាង​ត្បូង ចូលជួប សំដែង​ការ​គួរសម

ឯកឧត្តមឧបនាយករដ្ឋមន្ត្រី សុខ អាន រដ្ឋមន្ត្រី​ទទួល​បន្ទុកទីស្តីការគណៈរដ្ឋមន្ត្រី បាន​អនុញ្ញាត​ឱ្យ ឯកឧត្តម SUH Byung Soo អភិបាល​ក្រុង​ប៊ូសាន​​នៃសាធារណ​រដ្ឋកូរ៉េចូល​ជួប​សំដែង​ការគួរ​សម និងពិភាក្សាការងារក្នុង​ឱកាស​មកបំពេញទស្សនកិច្ចនៅកម្ពុជា។ ក្រោយ​ពីជំនួប​បានបញ្ចប់ ដែលធ្វើ​ឡើង​នៅវិមាន​មិត្តភាព កាលពីរសៀលថ្ងៃទី២៩ ខែកញ្ញានេះ ភាគីទាំងពីរបាន​ផ្តោតទៅលើការ​ពង្រឹងទំនាក់​ទំនង​ទ្វេភាគី រវាងប្រទេសកម្ពុជា ជាមួយ​សាធារណ ​រដ្ឋកូរ៉េ ក៏ដូចជារវាងទីក្រុងភ្នំពេញ និងទីក្រុងប៊ូសាន ។ 


ក្នុងកិច្ចពិភាក្សានោះដែរ ឯកឧត្តម ឧបនាយក​រដ្ឋមន្ត្រី សុខ អាន បានមានប្រសាសន៍ថា កម្ពុជា​មាន​សក្តានុពលខ្ពស់ផ្នែកវិស័យទេសចរណ៍ ដោយសារ​កម្ពុជាមាន​ធនធាន​បេតិកភណ្ឌ​វប្បធម៌​​សម្បូ​របែប និងមាន​ប្រាង្គ​ប្រាសាទ​បុរាណរាប់ពាន់ ពិសេសកម្ពុជា​កំពុង​ពង្រីក​វិស័យ​អេកូទេសចរណ៏ ដោយ​សារកម្ពុជា​មាន​ឆ្នេរ​សមុទ្រល្អ ក្នុង​ចំណាត់​ថ្នាក់ឆ្នេរ​ស្អាត​របស់​ពិភពលោក ហើយមាន​ទេសភាព​ធម្មជាតិ​ដ៏​ប្រណិត ដែលអា​ច​ទាក់ទាញ​អ្នកទេស​ចរ​បរ​ទេស​ឲ្យមកទស្សនា និងកម្សាន្ត​យ៉ាង​សប្បាយនៅកម្ពុជា។


  

ឯកឧត្តមឧបនាយករដ្ឋមន្ត្រី ក៏បានអបអរសាទរ និងកោតសរសើរចំពោះការហោះហើរដោយត្រង់ ពីកូរ៉េខាងត្បូងមកកាន់កម្ពុជា ។ ឯកឧត្តម សង្ឃឹមថា នៅពេលខាងមុខ នឹងមានការ​បង្កើន​ជើង​ហោះ​ហើរដោយត្រង់នេះបន្ថែមទៀតរវាងប្រទេសទាំងពីរ ដើម្បីរួម​ចំណែកលើក​កម្ពស់​វិស័យ​ទេសចរណ៍​នៅកម្ពុជា ។

ឯកឧត្តម សុខ អាន បានចាត់ទុកថា សាធារណៈរដ្ឋកូរ៉េ គឺមានចំណាត់ថ្នាក់ល្អ ក្នុងការ​វិនិយោគ​នៅកម្ពុជា ហើយបានពិនិត្យមើលឡើងវិញនូវការបង្កើតទំនាក់ទំនងការទូតរវាងប្រទេសទាំងពីរ ដែលមានតាំងពី ឆ្នាំ១៩៩៧ -១៩៩៨មក ដែលរហូតមកដល់ពេលនេះ ទំនាក់ទំនងទ្វេភាគីនេះ កាន់តែមានការរីកចំរើនច្រើន។

លើសពីនេះទៀត ឯកឧត្តម បានជំរុញនិងលើកទឹកចិត្តឲ្យសាធារណៈរដ្ឋកូរ៉េ ចូលរួម​ថតខ្សែភាព​យន្តស្តីពីវិស័យទេសចរណ៍នៅកម្ពុជា ដើម្បីជួយលើកស្ទួយដល់វិស័យទេសចរណ៍នៅកម្ពុជា។




នៅក្នុងឱកាសនោះដែរ ឯកឧត្តម សុខ អាន ក៏បានបញ្ជាក់ជូនប្រតិភូកូរ៉េ អំពីការត្រៀមរៀប​ចំបើក​កិច្ចប្រជុំគណៈកម្មការសម្របសម្រួលអន្តរជាតិមួយសម្រាប់អភិរក្សអង្គរដែលហៅកាត់ថា ( ICC អង្គរ ) នៅខែធ្នូខាងមុខនេះ ដោយមានការចូលរួមពីបណ្តាប្រទេសជាមិត្តជាច្រើន ដើម្បី​ពិភាក្សា​លើការងារអភិរក្សអង្គរ។ ឯកឧត្តម SUH Byung Soo អភិបាលក្រុងប៊ូសាន បានបញ្ជាក់ជូនថា អ្នក​វិនិយោគនៅកូរ៉េខាងត្បូង មានការចាប់អារម្មណ៍យ៉ាងខ្លាំងចំពោះការវិនិយោគនៅកម្ពុជា ពិសេស គឺចង់​ធ្វើការវិនិយោគលើវិស័យទេសចរណ៍នេះតែម្តង ដោយសារ​កម្ពុជាមាន​សក្តានុ​ពលខ្ពស់​ផ្នែកឧស្សាហកម្មទេសចេរណ៍ដ៏សម្បូរបែបនេះ៕

 អត្ថបទដោយ៖ ខេមរា

ប្រធានអង្គការ​មាតា​ធម្មជាតិ លោក អាឡិច ហ្សង់ដ្រូ ល្មើស​ច្បាប់ ដឹកនាំ​បិទផ្លូវ​បង្កការ​កក​ស្ទះចរាចរ

ប្រធាន​អង្គការមួយ​ឈ្មោះ​« មាតា​ធម្មជាតិ »​ ​ជា​ជន​ជាតិ​អេស្បាញ​ គឺ​​លោក Alex jandro Gonzalez Davidson ( អាឡិច ហ្សង់​ដ្រូ ហ្សន់ហ្សាឡេ ដាវីតសុន) អាយុ​៣៤ឆ្នាំ​ បាន​ដឹក​នាំ​គ្នី​គ្នា​របស់​ខ្លួន​មួយ​ចំ​នួន​​ បិ​ទ​ផ្លូវ​សាធារណៈនៅចំ​ណុច​ច្រាំង​ត្រឡាច ស្ថិត​ក្នុង​ខេត្ត​កោះ​កុង​ ក្នុង​អ្វី​​ដែល​លោក​គិត​ថា ជា​ការ​ប្រឆាំង​នឹង​គម្រោង​សាង​សង់​ទំ​នប់​វារី​អគ្គីសនី​ ។

          សកម្មភាពបំ​ពាន​ច្បាប់​​របស់​លោក អាឡិច ហ្សង់​ដ្រូ បាន​ធ្វើ​ឲ្យ​ប៉ះ​ពាល់​ធ្ងន់​ធ្ងរដល់​ចរាចរ ​និង​បង្ក​ការ​អាក់​ខាន​ក្នុង​ការ​ធ្វើ​ដំ​ណើររបស់​អ្នកដទៃ​ទៀត​ដែល​ត្រូវ​ ឆ្លង​កាត់​ទី​នោះ​។

          ក្នុង​ឋានៈជាជន​បរទេស​មួយ​រូប​ លោក អាឡិច ហ្សង់​ដ្រូ ហ្សន់ហ្សាឡេ ដាវីតសុន មិន​ត្រឹម​តែ​បាន​ញុះញង់​ប្រជា​ពលរដ្ឋ​ និង​បក្ខពួក​របស់​ខ្លួន​មួយ​ក្រុម​តូច​ប្រឆាំង​នឹង​ផែន​ការ​អភិវឌ្ឍ​របស់​ប្រទេស​កម្ពុជា​ប៉ុណ្ណោះ​ទេ ថែម​ទាំងបង្ក​ចលាចល​ រារាំង​ ប្រឆាំងអា​ជ្ញាធរដែន​ដី​ទៀត​ផង​។ តើ​ជន​បរទេស​ម្នាក់​នេះ​ ជាកូន​ជឹង​ ជា​ឈ្នាន់​បំ​រើ​​​នយោបាយ​ឲ្យ​គណបក្ស​ប្រឆាំង​ ឬ​ក៏​ជា​ជន​អានាធិបតេយ្យ​ចង់​ធ្វើ​ជា​បង​ធំ​ ប្រឆាំង​នឹង​ច្បាប់​នៅ​ស្រុក​ខ្មែរ?

          វា​មិន​មែន​គ្រាន់​តែ​ជា​ការ​ប្រើប្រាស់​សិទ្ធិ​ក្នុង​ការ​បញ្ចេញ​មតិ​ប៉ុណ្ណោះ​ទេ ប៉ុន្តែ ជន​ជាតិ​អេស្បា​ញ​ ជា​ប្រធាន​អង្គការ​រូប​នេះ​ បាន​ធ្វើ​សកម្មភាព​ដ៏​ជ្រុល​ហួស​ព្រំ​ដែន​កំ​ណត់​នៃ​​ច្បាប់ គឺ​ការ​បិទ​ផ្លូវ​សាធារ​ណៈ ដែល​​ជា​អំពើ​បំ​ពាន​ច្បាប់​ទាំង​កំ​រោល​​។
          បន្ទាប់​ពី​ពិនិត្យ​ឃើញ​ទង្វើ​ច្រងេង​ច្រងាង​របស់​ជន​បរទេស​រូប​នេះ និងការ​​សម្រប​សម្រួល​នៅ​កន្លែង​កើត​ហេតុ​មិន​បាន​សម្រេច​ ​អាជ្ញាធរដែន​ដី​ខេត្ត​កោះ​កុង​ ដែល​ជា​​មន្ត្រី​អនុវត្ត​ច្បាប់​ ក៏​បាន​នាំ​ខ្លួន​លោក អាឡិច ហ្សង់​ដ្រូ ទៅ​សាកសួរ និង​ធ្វើ​កំ​ណត់​ហេតុ​នៅ​ការិយាល័យ​របស់​សមត្ថកិច្ច​ខេត្ត​។
          នៅ​ក្នុង​​ចំ​លើយ​សារភាព​ដែល​សរសេរដោយ​ដៃជាភាសាខ្មែរ មាន​​ហត្ថលេខា និង​ស្នាម​ផ្តិត​មេដៃ​ ចុះ​ថ្ងៃ​ទី​១៥ ខែ​កញ្ញា ឆ្នាំ​២០១៤ ជន​បរទេស​រូប​នេះ បាន​ទទួល​ស្គាល់​ថា ​ខ្លួន​គេពិត​ជា​​បាន​ធ្វើ​ខុសច្បាប់​ និង​បាន​សូម​អភ័យ​ទោស​ចំ​ពោះ​កំ​ហុស​ឆ្គង​របស់​ខ្លួន​ ដែល​បាន​ធ្វើ​សកម្មភាព​ចត​ឡាន​ទទឹង​ផ្លូវ ដោយ​មូល​ហេតុគ្រាន់​តែ​គេ​បាន​លឺដំ​ណឹង​ពី​សហគមន៍​នៅ​តំ​បន់​អារ៉ែង​ ថាមាន​ក្រុម​ហ៊ុន​មួយ​នឹង​ធ្វើ​ការ​សាង​សង់​ទំ​បន់​វារី​អគ្គីសនី​នៅ​តំ​បន់​នោះប៉ុណ្ណោះ​​ គឺ​គាត់​អាច​នឹង​មិន​មាន​ការ​សិក្សា​ស្វែងយល់​ឲ្យ​បានស៊ី​ជម្រៅ​អំ​ពី​ អត្ថប្រយោជន៍​ដែល​បាន​មក​ពី​ការ​សាង​សង់​ទំ​បន់​វារី​អគ្គី​សនី​នៅ​តំ​បន់​នោះ​ទេ។
          ក្នុង​កំ​ណត់​ហេតុ​ លោក អាឡិច ហ្សង់​ដ្រូ ​បាន​សន្យាថា ថ្ងៃ​ក្រោយ​លោក​នឹង​មិន​ធ្វើ​ទង្វើណា​ដែល​ខុស​នឹង​សណ្តាប់​ធ្នាប់​សាធារណៈ និង​ប៉ះ​ពាល់​ដល់​អាជ្ញាធរខេត្ត​ទៀត​ឡើយ​ និង​បាន​សូម​ការ​អភ័យ​ទោសពី​ឯកឧត្តម​ អភិបាល​ខេត្ត​កោះ​កុង ចំ​ពោះ​កំ​ហុស​នៃ​ការ​បិទ​ផ្លូវ​។

          ការ​សារភាព​ដូចគ្នា​នេះ ក៏​បាន​ធ្វើ​ឡើង​ផង​ដែរដោយ​បក្ខពួក​គូកន និង​ប្រជាពល​រដ្ឋ​ចំ​នួន​១០​នាក់ ដែល​ចាញ់​ការ​ញុះ​ញង់​របស់​ប្រធាន​អង្គការ​មាតាធម្មជាតិ បាន​សន្យាចំ​ពោះ​មុខសមត្ថកិច្ច​ថា តទៅ​ថ្ងៃ​មុខ​ បើ​ពួក​ខ្ញុំ​ទាំង​អស់​គ្នា​ធ្វើ​សកម្មភាព​បែប​នេះ​ទៀត​ សូម​ឲ្យ​សមត្ថកិច្ច​ដាក់​ទោស​តាម​ផ្លូវ​ច្បាប់​​។
          សូម​បញ្ជាក់​ថា យោង​តាម​ច្បាប់​ចរាចរផ្លូវ​គោក​ មាត្រា​៧៨ បាន​ចែង​យ៉ាង​ច្បាស់​ថា ជន​ណា​ប្រើ​ប្រាស់​មធ្យោបាយ​ណាមួយ​ ដើម្បី​ជា​ឧបសគ្គដល់​ចរាចរណ៍​សាធារណៈ ត្រូវ​ផ្តន្ទាទោស​ដាក់​ពន្ធ​នាគារ​ពី​១ខែ​ទៅ​១ឆ្នាំ​ និង​ពិន័យ​ជា​ប្រាក់​ពី​ម្ភៃ​ម៉ឺន​រៀល ទៅ​ពីរលាន​រៀល​។

          ដូច្នេះ ក្នុង​ករណី​ជន​ជាតិ​អេស្បាញរូប​នេះ ដែល​បាន​បិទ​ផ្លូវ​សាធារណៈ ប្រសិន​បើ​សកម្មភាព​នេះ​ មិន​ត្រូវ​បាន​ទទួល​យកការសម្រប​សម្រួល​ពី​សមត្ថកិច្ច​នោះ​ទេ លោកអាឡិច ហ្សង់​ដ្រូ ហ្សន់ហ្សាឡេ ដាវីតសុន នឹង​ត្រូវ​ប្រឈម​ចំ​ពោះ​មុខ​ច្បាប់​ ហើយ​មិន​ត្រឹម​តែប៉ុណ្ណោះ​ បើ​ប្រធាន​អង្គការ​រូប​នេះ នៅ​តែរឹង​រូសចចេះ​មានៈមិនស្គាល់​ពី​កំ​ហុស​របស់​ខ្លួន​ ហើយ​បង្ក​ការ​ប៉ះពាល់​ធ្ងន់ធ្ងរ​ដល់​សន្តិ​សុខ​ សណ្តាប់​ធ្នាប់​សង្គម​ ឬ​ក៏​រារាំង​ បំ​ផ្លាញ​ដល់​ការ​អនុវត្តន៍​ច្បាប់ ជន​បរទេស​រូប​នេះ អាច​នឹង​ត្រូវ​បណ្តេញ​ចេញ​ពី​កម្ពុជា​ តាម​រយៈការ​អនុវត្ត​ច្បាប់​អន្តោ​ប្រវេសន៍​ ពី​ព្រោះ​សកម្មភាព​របស់​លោក អាឡិច ហ្សង់​ដ្រូ មិន​មែន​ជា​ការ​ប្រើប្រាស់​ត្រឹម​តែ​សិទ្ធិ​បញ្ចេញ​មតិ​ប៉ុណ្ណោះ​ទេ វាគឺ​ជា​ការ​ញុះ​ញង់​ បង្ក​ចលាចល​សង្គម​។

លោក អាឡិច ហ្សង់​ដ្រូ គួរ​គប្បី​ធ្វើ​សកម្មភាពត្រឹម​ត្រូវ​ស្រប​តាម​ច្បាប់​របស់​កម្ពុជា​ និង​ព្រំ​ដែន​នៃ​វិជ្ជាជី​វៈរបស់​ខ្លួន​ដែល​ជា​អង្គ​ការ​ឯករាជ្យ​ មិន​ត្រូវ​ពាក់​ព័ន្ធ​ក្នុង​រឿង​នយោបាយ​ឡើយ​។
យោង​តាម​ការ​បំ​ភ្លឺរបស់​ក្រសួង​រ៉ែ​ និង​ថាម​ពល​​លើ​គម្រោង​វារី​អគ្គីសនី​ស្ទឹង​អារ៉ែង ផ្សព្វ​ផ្សាយ​ថ្ងៃ​ទី​៣០ ខែ​កញ្ញា ឆ្នាំ​២០១៤នេះ​ បាន​បញ្ជាក់​ថា គម្រោង​វារី​អគ្គីសនី​ស្ទឹង​អារ៉ែង​ ត្រូវ​បាន​កំ​ណត់​សម្រាប់​ការ​អភិវឌ្ឍ​តាំង​ពី​មុន​ឆ្នាំ​១៩៧០ ជា​មួយ​គម្រោង​វារី​អគ្គីសនី​ដទៃ​ទៀត​នៅ​ភាគ​ខាង​លិច ដូចជា ​កំ​ចាយ អា​តៃ​ ឬស្សី​ជ្រុំ តាតៃ ជា​ដើម​។

ការ​សិក្សាបច្ចេកទេស​ និង​បរិស្ថាន​ធម្មជាតិ​ និង​សង្គម​ បាន​ចាប់​ផ្តើម​តាំង​ពី​ឆ្នាំ​២០០៦  និង​នៅ​ខែ វិច្ឆិកា ខែ​ធ្នូ  ឆ្នាំ​ ២០១៣ មាន​ការ​ផ្ទៀង​ផ្ទាត់​ឡើង​វិញ​​នូវ​លទ្ធ​ផល​សិក្សាវាយ​តម្លៃ​ផល​ប៉ះ​ពាល់​បរិស្ថាន និង​សង្គម​ជំ​ហ៊ាន​ដំ​បូង។

ក្រសួង​រ៉ែ​ និង​ថាម​ពល​ បាន​ឱ្យ​ដឹង​ថា ផល​ដែល​ទទួល​បាន​ពី​គម្រោង​វារី​អគ្គីសនី​ស្ទឹង​អារ៉ែង​នេះ មាន​អានុភាព​តម្លើង​ត្រឹម​១០៨ មេហ្គាវ៉ាត់ ប៉ុន្តែ​ វារី​អគ្គី​សនី​នេះ​អាចដំ​ណើរការស្ទើរពេញមួយ​ឆ្នាំ​ ដែល​បរិមាណ​ថាម​ពល​ផលិតបាន​ប្រចាំ​ឆ្នាំ​រហូត​ដល់៥៩៥ លាន​គី​ឡូ​វ៉ាត់​ម៉ោង ច្រើន​ជាង​វារី​អគ្គី​សនី​កំ​ចាយដែល​ផលិត​ថា​តែ​៤៩៨ លាន​គី​ឡូ​វ៉ាត់​ម៉ោង ទោះ​ជា​អានុភាព​តម្លើង​ធំ​ជាង​ដល់​ទៅ​១៩៤​មេហ្គាវ៉ាត់​ដ៏​ដោយ​។ ទន្ទឹម​នោះ​ គម្រោង​វារី​អគ្គី​សនី​ស្ទឹង​អារ៉ែង ក៏​ដូច​ជាវារី​អគ្គីសនី​ដទៃ​ទៀត​ដែរនឹង​ទទួល​នូវ​អត្ថប្រយោជន៍​ជាច្រើន​ ដូចជា​ធានាសន្តិសុខថាម​ពល​ ធានានូវ​ស្ថេរភាព​ និង​គុណ​ភាព​នៃ​ការ​ផ្គត់​ផ្គង់​ ការពារទឹក​ជំ​នន់​ អាច​ចែក​ចាយ​ និង​ផ្គត់​ផ្គង់ថាម​ពល​អគ្គីសនី​ទូ​ទាំង​ប្រទេស​តាម​បណ្តាញ​បញ្ជូន​ជាតិ និង​ជា​រមណី​ដ្ឋាន​ទេសចរណ៍​ធម្មជាតិ (​ អេកូ​ទេសចរណ៍​) និង​ផលប្រយោជន៍​ជា​ច្រើន​ទៀត ជា​ពិសេស ការ​កាត់​បន្ថយភាព​ក្រី​ក្រដល់​ប្រជាពលរដ្ឋ​ និង​បង្កើត​ការងារ​ជូន​ប្រជាពលរដ្ឋ​ជា​ដើម​។

ទោះ​យ៉ាង​ណា​ ក្រសួង​រ៉ែ​ និង​ថាម​ពល​ បាន​អះ​អាង​ថា គម្រោង​វារី​អគ្គី​សនី​ស្ទឹង​អារ៉ែង​នេះ ក្រសួង​នឹង​ខិត​ខំ​រក​វិធី​ធ្វើ​ការ​អភិរក្ស​ និង​កាត់​បន្ថយ​​ផល​ប៉ះ​ពាល់​​​ឲ្យ​នៅ​តិច​បំ​ផុត​ ហើយ​ថា គម្រោង​វារី​អគ្គី​សនី​នេះ​ត្រូវ​មាន​ការ​សិក្សាលម្អិត​អំពី​ផល​ប៉ះ​ពាល់បន្ថែម​ទៀត និង​ការ​ស្វែង​រក​វិធាន​ដោះ​ស្រាយ​ផល​ប៉ះ​ពាល់​ទាំង​នោះ​។ បច្ចុប្បន្ន អ្នក​សិក្សា​ជំ​ហាន​បន្ទាប់​នៃ​គម្រោង​វារី​អគ្គី​សនី​ស្ទឹង​អារ៉ែង កំ​ពុង​ព្យាយាម​ចូល​ទៅ​សិក្សា​លម្អិត​នៅ​តំ​បន់​នោះ​៕
សូម​អាន​ការ​បំ​ភ្លឺ​របស់​ក្រសួង​រ៉ែ​ និង​ថាម​ពល​៖




អត្ថបទដោយ៖ សុភាព

សម្តេច​តេជោ ហ៊ុន សែន ស្វាគមន៍​ចំពោះ​ការ​បន្ត​កិច្ច​សហការ រវាង រាជធានី​ភ្នំពេញ និងទីក្រុង​ប៊ូសាន នៃសាធារ​ណរដ្ឋកូរ៉េ

សម្ដេចអគ្គមហាសេនាបតីតេជោ ហ៊ុន សែន នាយ​ករដ្ឋមន្ត្រី នៃព្រះ រាជាណាចក្រ កម្ពុជា បាន​អនុញ្ញាតឱ្យ ឯកឧត្តម SUH Byung Soo អភិ​បាលក្រុងប៊ូសាន នៃ សាធារណរដ្ឋកូរ៉េ​ចូល​ជួប​សំដែងការគួរសម និងពិភាក្សា​ការងារ​ក្នុង​ឱកាសមក បំពេញទស្សនកិច្ចនៅកម្ពុជា។

ក្រោយពីជំនួប​បានបញ្ចប់​ដែល​ធ្វើឡើង​នៅវិមាន​សន្តិភាព នារសៀល ថ្ងៃទី២៩កញ្ញា នេះ ឯកឧត្តម កៅ គឹមហួន រដ្ឋមន្ត្រី​ប្រតិភូ​អមនាយក​រដ្ឋមន្ត្រី បានប្រាប់​អ្នក​យក​ព័ត៌មាន​ថា៖ នៅក្នុ្ងងជំនួបនេះ ភាគីទាំង​ពីរបាន​ផ្តោត​ទៅលើការ​ពង្រឹងទំនាក់ទំនង ទ្វេភាគី រវាង​ប្រទេស​​កម្ពុជា ជាមួយសាធារណរដ្ឋកូរ៉េ ក៏ដូចជា​រវាង ទីក្រុងភ្នំពេញ និងទីក្រុងប៊ូសាន ដោយ​​សារ​ទីក្រុង ប៊ូសាន នឹងទទួល​រៀបចំ​កិច្ច​ប្រជុំកំពូល អនុ ស្សាវរីយ៍ អាស៊ាន និង​សាធារណ​រដ្ឋកូរ៉េនៅខែ ១២ខាងមុខ ដែល​សម្តេច នឹង ត្រៀមទៅ​ចូលរួម​ក្នុងកិច្ច​ប្រជុំកំពូល​ក៏ដូចជាទស្សនកិច្ចជាផ្លូវការនៅ សាធារណរដ្ឋ កូរ៉េនោះ។

ក្នុងកិច្ចពិភាក្សានោះដែរ សម្តេចតេជោ និង​ឯក​ឧត្តម​អភិបាលក្រុងប៊ូសាន ក៏បាន ផ្តោត ជា​សំខាន់​លើការ​ទទួល​អ្នកវិនិយោគ​ក៏ដូច​ជាអ្នក​ទេសចរណ៍​របស់កូរ៉េ រួមទាំង បញ្ហាបទពិសោធន៍ របស់ប្រទេសកូរ៉េ ដែលពាក់ព័ន្ធនឹងចលនាភូមិថ្មី ដែលជាបទ ពិសោធន៍ដ៏ល្អរបស់កូរ៉េ ហើយសំខាន់ជាងនេះទៀត គឺជំរុញកិច្ចសហប្រតិបត្តិការ រវាង រាជធានីភ្នំពេញ និងទីក្រុងប៊ូសាន ដោយជំរុញឱ្យមានការពិភាក្សា និងពិនិត្យ មើលឡើងវិញពីកិច្ចសហប្រតិបត្តិការក្នុងរយៈពេល៥ឆ្នាំកន្លងទៅ ហើយក៏បានឯកភាពបន្តរយៈ កិច្ចសហការក្នុងរយៈពេល៥ឆ្នាំតទៅទៀត ។

សម្តេចតេជោនាយករដ្ឋមន្ត្រីក៏បានអបអរសាទរចំពោះការបន្តកិច្ចសហការ រវាង រាជធានីភ្នំពេញ និងទីក្រុងប៊ូសាន ក្នុងរយៈពេល៥ឆ្នាំតទៅមុខទៀត ក៏ដូចជា ការ ឱ្យពិនិត្យមើលឡើងវិញនូវការបង្កើតទំនាក់ទំនងការទូតរវាងប្រទេសទាំងពីរ ដែលមានតាំងពី ឆ្នាំ១៩៩៧ -១៩៩៨មកដែលរហូតមកដល់ពេលនេះ ទំនាក់ទំនងទ្វេភាគីនេះកាន់តែមានការរីកចំរើនច្រើន។ ជាក់ស្តែងដូចឃើញស្រាប់ហើយនៅកម្ពុជាសព្វថ្ងៃ គឺមានអ្នកទេសចរណ៍កូរ៉េ និងអ្នកវិនិយោគកូរ៉េ ជាច្រើន ហើយផលិតផលដែលបាននាំចូលពីកូរ៉េក៏មានចំនួនច្រើនដែរ។ ជារួមសម្តេចតេជោ នាយករដ្ឋមន្ត្រីក៏ដូចជាឯឧ អភិបាលក្រុងប៊ូសាន គឺមានការរីករាយចំពោះទំនាក់ទំនងទ្វេភាគីនេះ ជាពិសេសវិស័យសេដ្ឋកិច្ច និងនយោបាយ៕
អត្ថបទដោយ៖ ខេមរា                      

សម្តេច​តេជោ សុំ​ឲ្យ​​ប្រជាពល​រដ្ឋមាន​​ការ​​យោគ​យល់ និង​អធ្យា​ស្រ័យ​​ចំ​ពោះ​​ទឹក​​លិច​​ក្នុង​​រាជ​ធានី​ភ្នំ​ពេញ​

សម្តេចតេជោ ហ៊ុន សែន នាយករដ្ឋមន្រ្តី នៃ​ព្រះ​រាជា​ណាចក្រកម្ពុជា បានសុំឲ្យប្រជា​ពលរដ្ឋរស់​នៅក្នុងរាជ​ធានីភ្នំពេញ មានការយោគយល់ និង​អធ្យាស្រ័យ​ចំពោះទឹកលិច​ក្នុងរាជធានីភ្នំពេញ ដ៏ធ្ងន់ធ្ងរ កាលពីថ្ងៃ​អាទិត្យ​ទី២៨ខែកញ្ញា។ សម្តេច​​បានបញ្ជាក់ថា អាជ្ញាធរ កំពុង​មាន​វិធាន​ការ​ដើម្បី​បូមទឹក​ចេញពី​រាជធានី​ភ្នំពេ​ញ កុំឲ្យមាន​ទឹកលិច​ខ្លាំង​នៅពេលភ្លៀងធ្លាក់ តាម​រយៈ​ការ​បង្កើតប្រព័ន្ធលូ ។

ការថ្លែងបែបនេះ បានធ្វើ​ឡើងក្នុងឱកាស ដែល​សម្តេចតេជោ អញ្ជើញ​ជា​អធិបតីក្នុង​ពិធីប្រគល់​សញ្ញាបត្រ ដល់​​និស្សិតសាកលវិទ្យាល័យបៀលប្រាយ នាព្រឹកថ្ងៃទី២៩ខែ​កញ្ញា ឆ្នាំ២០១៤ នៅមជ្ឈមណ្ឌល​កោះពេជ្រ ។

សម្តេចតេជោ ហ៊ុន សែន បានថ្លែងថា ទឹកភ្លៀងកាលពីថ្ងៃអាទិត្យទី២៨ ខែកញ្ញា លិច​កម្ពស់​ពី៧០-៨០មិល្លី​ម៉ែត្រ ។ សម្តេច បានអំពាវនាវសុំឲ្យមានការយោគយល់ តែទោះ​ជាយ៉ាងណា យើងកំពុងចាត់​វិធានការ​ទាញ​យក​ទឹកចេញពីទីក្រុងតាមរយៈបង្កើតប្រព័ន្ធលូ។ ជាមួយគ្នានេះ សម្តេចតេជោ បានលើកឡើងពីការ​ព្យា​ករណ៍​​​របស់ឧតុនិយមផងដែរថា ទឹក​ភ្លៀង​នឹងអស់នៅក្នុងសប្តាហ៍ទី២-៣ ក្នុងខែវិច្ចិកា ហើយរដូវ​រងា​នា​ឆ្នាំនេះ មាន​រយៈពេលវែង ។ សម្តេច​តេជោ ហ៊ុន សែន ក៏បានអំពាវនាវឲ្យប្រជាកសិករត្រូវទប់ទឹកទុក ដើម្បីបង្ក​បង្កើន​ផល​ផងដែរ ទោះបីបច្ចប្បន្នកំពុងមានធ្លាក់ខ្លាំងក្តីកុំបង្ហូរទឹកចោល ។

ទាក់ទង​នឹង​ការធ្វើ​បាតុកម្មតវ៉ា​ប្រឆាំង​ចំពោះ​រាជរដ្ឋាភិបាល សម្តេច​តេ​ជោហ៊ុន សែន បានលើកឡើង​ពី​ជំហរ​របស់​រាជរដ្ឋាភិបាល​កម្ពុជា​ថា  ការទទួល​យក​ជនភៀសខ្លួន​បរទេសមក​កម្ពុជាត្រូវធ្វើ​ដោយ​គោលការណ៍​ស្ម័គ្រ​ចិត្ត​។ សម្តេច​បាន​មាន​ប្រសាសន៍បន្តថា ជាធម្មតា នៅ​ប្រទេស​ណា ក៏មាន​ការធ្វើ​បាតុកម្មតវ៉ា​ប្រឆាំង​នឹង​​​ការទទួលយក​ជន​ភៀសខ្លួន​បរ​ទេស​ដែរដូចជា​នៅ​ប្រទេស​អូស្ត្រាលី ហើយ​នៅ​កម្ពុជាក៏មាន​ដូចគ្នា​នេះ​ដែរ​

សម្តេច​តេ​ជោ ហ៊ុន សែន បាន​មានប្រសាសន៍ថាការទទួលយកជនភៀសខ្លួន​បរទេសមក​កម្ពុជា​ត្រូវធ្វើ​ដោយ​គោលការណ៍​ស្ម័គ្រចិត្ត មិនមែន​ដោយ​ការចាប់បង្ខំ​នោះទេ គឺ​ធ្វើ​សំភាសន៍​ ហើយបើ​គេ​ចង់​មក​កម្ពុជា យើង​ទទួល តែបើ​គេ​ថា កម្ពុជា​មិន​គ្រប់​ស្តង់ដារ គេ​មិន​មកជា​សិទ្ធិ​របស់គេ​ តែ​សម្តេច​ថា ប្រទេស​អូស្ត្រា​លី​​គេមាន​ជំ​នឿថា កម្ពុ​ជាមាន​លក្ខណៈ​គ្រប់គ្រាន់ក្នុងការ​ទទួលយក​ជ​ន​ភៀសខ្លួន​​។ សម្តេច​បាន​បញ្ជាក់​ថាៈ​វា​ជា​កាតព្វ​កិច្ច​​អន្តរ​ជាតិ​៕

អត្ថបទ​ដោយ​៖ ខេមរា

សម្តេច​តេជោ ​ បន្ត​​អំ​ពាវ​​នា​វ​ឱ្យ​​គ្រប់​​គ្រឹះ​​ស្ថាន​​ឧត្ត​ម​​សិក្សា​​ពង្រឹង​​គុណ​ភាព​​អប់រំ​​ឲ្យ​កាន់​តែ​ប្រសើរ

ប្រមុខ​រាជ​រដ្ឋាភិបាល​កម្ពុជា​ សម្តេច​អគ្គ​មហា​សេនា​បតី​តេជោ ​ហ៊ុន​ សែន​ បាន​សំដែង​នូវ​មោ​ទ​ន​​ភាព​ជា​ថ្មី​ម្តង​ទៀត​ចំពោះ​គោល​នយោបាយ​ដែល​រាជ​រដ្ឋាភិបាល​បាន​ដាក់​ចេញ​ និង​ផ្តល់​ឱ្យកាស​ឱ្យ​​វិស័យ​ឯកជន​ចូល​រួម​វិនិយោគ​ក្នុង​វិស័យ​បណ្តុះ​បណ្តាល​ធន​ធាន​មនុស្ស​ ហើយ​សម្តេច ​នៅ​តែ​បន្ត​អំ​ពាវ​នាវ​ឱ្យ​គ្រប់​គ្រឹះ​ស្ថាន​ឧត្តម​សិក្សា​ពង្រឹង​គុណ​ភាព​អប់រំ​។

សម្តេច​តេជោ ហ៊ុន សែន ​នាយក​រដ្ឋ​មន្ត្រី​ បាន​លើក​​ឡើង​បែបនេះ​ក្នុង​ខណៈ​អញ្ជើញ​ជា​អធិបតី​ដ៏​ខ្ពង់​ខ្ពស់​ក្នុង​ពិធី ​ប្រគល់​សញ្ញាបត្រ​ជូនដល់​និស្សិត​ជ័យ​​លាភី​ចំនួន​ ៤.២៥០​នាក់ ​នៃ​សាកល​វិទ្យា​ល័យ​បៀល​​​ប្រាយ ​ដែល​​ធ្វើឡើង​នៅ​មជ្ឈ​មណ្ឌល​សន្និបាត​ និង​ពិព័រណ៍​កោះពេជ្រ​ នា​ព្រឹក​ថ្ងៃទី​២៩ ​ខែ​កញ្ញា​​នេះ​។

យោង​តាម​របាយ​ការណ៍​របស់លោក ឌៀប​ សីហា សាកល​វិទ្យាធិការ​នៃ​សាកល​វិទ្យាល័យ ​បៀល​ប្រាយ ​បានឱ្យ​ដឹងថា និស្សិត​ជ័យលាភី​ដែល​ទទួល​សញ្ញា​ប័ត្រ​នេះ ​មាន​ថ្នាក់​បរិញ្ញា​បត្រ​រង ​បរិញ្ញា​បត្រ​​​​ជាន់​ខ្ពស់​ និង​ថ្នាក់ប​ណ្ឌិត ​ដែល​បាន​បញ្ចប់​ការ​សិក្សា​ចាប់​តាំង​ពី​ឆ្នាំ​សិក្សា ​២០០៨ - ២០០៩​​ដល់​ឆ្នាំ​សិក្សា​២០១៣-​២០១៤ ​ហើយ​ក្នុង​ចំណោម​នេះ​ក៏​មាន​និស្សិត​អាហា​រូបករណ៍ ​របស់​សម្តេច​​តេជោ ​និង​សម្តេច​កិត្តិ​ព្រឹទ្ធ​បណ្ឌិត​ចំនួន​១២៦​នាក់​ផង​ដែរ​។

របាយ​ការណ៍​បាន​បន្ត​ទៀត​ថា ​ក្នុង​​រយៈ​ពេល​១៤​ឆ្នាំ​កន្លង​មក​នេះ​ សាកល​វិទ្យាល័យ​បាន ​និង​កំពុង​បណ្តុះ​បណ្តាល​ និង​អភិវឌ្ឍន៍​ធន​ធាន​​មនុស្ស​ស្រប​តាម​ចក្ខុ​វិស័យ​ និង​ផែន​ការ​យុទ្ធ​សាស្ត្រ​របស់​ខ្លួន​ និង​គោល​នយោបាយ ​និង​យុទ្ធ​សាស្ត្រ​​វិស័យ​អប់រំ​របស់​ក្រសួង​អប់រំ​ យុវជន​ និង​កីឡា ហើ​យ​គិត​មក​ដល់​ឆ្នាំ​សិក្សា ​២០១៣-​២០១៤ ​សាកល​វិទ្យាល័យ ​បាន​និង​កំពុង​បណ្តុះ​បណ្តាល និសិ្សត​ចំនួន​៦០.០៧៩​​នាក់ ​ចំណែក​និស្សិត​ដែល​បាន​បញ្ចប់​ការ​សិក្សា​គ្រប់​កំរិត​ពី​សាកល​វិទ្យាល័យ​នេះ ​មាន​ចំនួន​​សរុប​៣៧.៦១២​នាក់​ដោយ​គិត​ទាំង​​និស្សិត​ជ័យ​លាភី​ដែល​ទទួល​សញ្ញា​បត្រ​នា​ពេល​នេះ​ផង​។

ព្រម​ជា​មួយ​នឹង​ការ​កោត​សរសើរ​ចំពោះ​វឌ្ឍនភាព​ទាំង​ឡាយ​ដែល​សាកល​វិទ្យាល័យ​ បៀល​ប្រាយ​សម្រេច​បាន ​សម្តេច​តេជោ​ នៅតែ​ប​ន្ត​អំពាវនាវ​ឱ្យ​មាន​ការ​ខិត​ខំ​ពង្រឹង​គុណ​ភាព​អប់រំ​ជា​បន្ត​ទៀត​។​ សម្តេច​តេជោ បា​ន​លើក​ឡើង​ថា​ សាលា​នីមួយៗគឺ​ត្រូវ​ជំរុញ​ការ​ពង្រឹង​គុណភាព ​ហើយ​រក​សាស្ត្រា​ចារ្យ​​ដែល​មាន​គុណភាព​ដើម្បី​ជំរុញ​ការ​បណ្តុះ​ បណ្តាល​ឱ្យ​បាន​ល្អ​ ព្រោះ​ធនធាន​មនុស្ស​របស់​យើង​ត្រូវ​​ប្រកួត​ប្រជែង​ទីផ្សារ​ក្នុង​ប្រទេស​ផង ​​និង​ត្រូវ​ប្រកួត​ប្រជែង​ជា​មួយ​នឹង​បណ្តា​ប្រទេស​នានា​ក្នុង​ក្រប​ខណ្ឌ​ តំបន់​ និង​ពិភព​លោក​ផង​ដែរ៕

អត្ថបទ​ដោយ៖ ខេមរា

រដ្ឋមន្ត្រី​​ក្រសួង​​បរិស្ថាន៖ រាជ​រដ្ឋា​ភិបាល​​បង្ហាញ​​ផែន​​ការ​​ជាក់​​លាក់​​ក្នុង​​ការ​​គ្រប់​​គ្រង​​ដី​​សម្បទាន​​សេដ្ឋកិច្ច​

ភ្នំពេញ៖ រាជរដ្ឋាភិបាល​កម្ពុជា​តាម​រយៈ​ក្រសួង​បរិស្ថាន នៅថ្ងៃទី២៩ ខែកញ្ញា ឆ្នាំ ២០១៤​នេះ បានបង្ហាញអំពីផែនការគ្រប់គ្រងដី​សម្បទាន​សេដ្ឋកិច្ច និង​បានដក​ហូតដី​​ពីក្រុម​ហ៊ុន​មួយ​ចំនួន​ដែលរដ្ឋបានផ្តល់សម្បទានកន្លងមក ក៏ដូចជាធ្វើការត្រួតពិនិត្យឡើងវិញ លើ​ក្រុម​ហ៊ុន​ទាំងអស់ឡើងវិញ នេះ​បើ​តាម​ការ​បញ្ជាក់​របស់​ឯកឧត្តម សាយ សំ​អាល់​ រដ្ឋ​មន្ត្រី​ក្រសួង​បរិស្ថាន​។ 

ឯកឧត្តមរដ្ឋមន្ត្រី សាយ សំអាល់ បានមានប្រសាសន៍ដូច្នេះនៅទីស្តីការក្រសួងបរិស្ថានក្នុងន្និសីទសារព័ត៌មាន កាលពី​រសៀល​ថ្ងៃ​ទី​២៩ ខែ​កញ្ញា ឆ្នាំ​២០១៤​នេះ​ ស្តីពី គោលនយោបាយរបស់រាជរដ្ឋាភិបាលកម្ពុជា ក្នុងការគ្រប់គ្រងដីសម្បទានសេដ្ឋកិច្ច និងការបន្តពង្រឹងប្រសិទ្ធិភាពលើការងារគ្រប់គ្រងដីសម្បទានសេដ្ឋកិច្ច

ឯកឧត្តម សាយ សំអាល់ បានបន្តថា ការលុបចោលនូវការវិនិយោគនេះ ក៏ជាការប្តេជ្ញាចិត្ត​និង​ផ្នែកនយោបាយខ្ពស់ របស់​រាជរដ្ឋាភិបាលនៅក្នុងអាណត្តិទី៥នេះ 

តាមរយៈគោលនយោបាយរបស់រាជរដ្ឋាភិបាល ក្នុងនីតិកាលទី៥នេះ ឯកឧត្តមរដ្ឋមន្ត្រី​ក្រសួង​បរិស្ថាន​​ បាន​បញ្ជាក់​ថា​ « រាជ​រដ្ឋាភិបាល​នឹងមិនផ្តល់ដីសម្បទានថ្មីទៀតទេ ប៉ុន្តែដីសម្បទានដែលបានផ្តល់ទៅហើយក្នុងវិស័យកសិឧស្សាហកម្ម វិស័យទេសចរណ៍ រាជ​រដ្ឋា​ភិបាល នឹងធ្វើការត្រួតពិនិត្យឡើងវិញទាំងអស់ ដើម្បីមើលថា តើក្រុមហ៊ុនដែល​បានទទួល​ដីសម្បទានពីរដ្ឋាភិបាល​អាចធ្វើការអភិវឌ្ឍន៍ទៅរួចតាមកិច្ចសន្យារបស់ខ្លួនដែររឺទេ? ហើយ​បើ​មិន​អាចទៅរួចទេ រាជរដ្ឋាភិបាលនឹងដកហូតមកវិញ» ។
ក្នុង​វិធាន​ការ​ក្តៅ​របស់​រដ្ឋមន្ត្រី​ថ្មី​ក្រសួង​បរិស្ថាន យ៉ាង​ហោចណាស់​មានក្រុមហ៊ុនចំ​នួន​ដំបូង ដែល​ក្រសួង​បាន​ធ្វើការដកហូត។ ឯកឧត្តម សាយ សំ​អាល់​ បាន​អះ​អាង​ថា ការពិតមាន ក្រុមហ៊ុន ៣ដំបូង ដែលក្នុងនោះ២បានផ្ទេរមកឲ្យរដ្ឋវិញនូវ​ផ្ទៃ​ដី​ចំនួន២ម៉ឺនហិតា និងមួយទៀត ដោយស្នើសុំដើម្បីសិក្សាអំពីរ៉ែ ប៉ុន្តែបានស្នើសុំប្រគល់មករដ្ឋាភិបាលវិញហើយ​។

ឯកឧត្តម​ បាន​បន្ត​ថា ដីនៅតំបន់នោះ គឺយកទៅមានបញ្ហា ហើយ​ថាគេឲ្យមកវិញនោះ គឺ​មិន​មែន​អញ្ចឹង​ទេ គឺគេធ្វើការសិក្សាជំហានដំបូងទៅដូចជាមិនអំណោយផលសំរាប់​​​ ការអភិវឌ្ឍន៍ទើបខាង​ក្រុម​ហ៊ុនផ្ទេរដីនោះមកឲ្យរដ្ឋវិញ។

ឯកឧត្តម​រដ្ឋមន្ត្រី​​​​ សាយ សំ​អាល់​ បានបញ្ជាក់ជូនថា មុននឹងធ្វើការដកហូតនោះ យើងបានធ្វើការសិក្សាស្រាវជ្រាវយ៉ាងហ្មត់ចត់ និងយកចិត្តទុកដាក់ជាទីបំផុត និងបានពិនិត្យ​យ៉ាង​ល្អិតល្អន់ មុនយើងធ្វើការសម្រេចចិត្តដកហូត ហើយនិងបន្តពិនិត្យក្រុមហ៊ុនដ៏ទៀត ថាមានលទ្ធភាពធ្វើការអភិវឌ្ឍន៍ ឬទេ ដើម្បីយើងធ្វើការសម្រេចចិត្តបន្តទៀត។

ឯកឧត្តម​ បាន​បន្ថែម​ទៀត​ថា សព្វថ្ងៃនេះ រាជរដ្ឋាភិបាលបានរៀបចំនូវយន្តការមួយ ដែលមានក្រសួងដែនដី នគររូបនីយកម្ម ក្រសួងកសិកម្ម ក្រសួងមហាផ្ទៃ ក្រសួងសេដ្ឋកិច្ច​ហិរញ្ញវត្ថុ ព្រមទាំងនាយកដ្ឋាន ក្រសួង​បរិស្ថាន។ ឯកឧត្តម មាន​ប្រសាសន៍​បន្ថែមថា យន្តការថ្មី​នេះ​ គឺប្តេជ្ញាក្នុង​ការរៀបចំផែនទីឯកភាពដើម្បីកំណត់ឲ្យច្បាស់ថា តើតំបន់ណាជាតំបន់ភូមិដ្ឋានរបស់ប្រជាជន និងតំបន់ណាជាតំបន់អភិរក្ស តែឥឡូវនេះកំពុងដកហូត ​និងវាយតំលៃចំនួនដីដែលយើងដកមកវិញ និងចំនួនដីដែលនៅសេសសល់។

ប៉ុន្តែ ឯកឧត្តម សាយ សំ​អាល់ ​បាន​បញ្ជាក់​ថា  ចំពោះក្រុមហ៊ុនដែលបានចុះកិច្ចសន្យាទៅហើយ គឺ​យើងរក្សានៅដដែល តែចំពោះក្រុមហ៊ុនដែលបានអនុវត្ត​គោលការណ៍ត្រឹម​ត្រូវ​ ហើយដែលនឹត្រូវចុះកិច្ចសន្យាថ្មីជាមួយរាជរដ្ឋាភិបាល យើងកំណត់យកតែ៥០ឆ្នាំទេ តែករណីក្រុមហ៊ុននោះធ្វើបានល្អ នៅឆ្នាំទី៤៥ គាត់អាចចរចារជាមួយរាជរដ្ឋាភិបាល ដើម្បីបន្ត​ដំឡើងការ​របស់​ខ្លួនបាន៕

អត្ថបទដោយ៖  សុភាព​

រដ្ឋាភិបាល​​អូស្ត្រា​លី ជា​អ្នក​​ទទួល​​បន្ទុក​​ឧបត្ថម្ភ​​ចំ​ណាយ​​លើ​ការ​​រស់​​នៅ​ប្រចាំ​​ថ្ងៃ​​របស់​​ជន​​ភៀស​ខ្លួន​​រយៈ​ពេល​​១២ខែ​ និង​​ពិនិត្យ​​សុខភាព​​រយៈ​ពេល​៥ឆ្នាំ

នៅ​ព្រឹក​ថ្ងៃ​ទី​២៩ ខែ​កញ្ញា​ ឆ្នាំ​២០១៤នេះ ក្នុង​សន្និសីទ​កាសែត​នៅ​ក្រសួង​មហាផ្ទៃ​ ​ ឯកឧត្តម​ ឡុង វិសាលោ រដ្ឋ​លេខាធិការ​ក្រសួង​ការបរទេស​ និង​សហប្រតិបត្តិ​ការអន្តរជាតិ​ បាន​បញ្ជាក់​ថា រដ្ឋាភិ​បាល​​អូស្ត្រាលី​ គឺជា​អ្នក​ចំ​ណាយ​លើការ​រស់​នៅ​ប្រចាំ​ថ្ងៃ​របស់​ជន​ភៀសខ្លួន​រយៈពេល​១២ខែ និង​ការ​ពិនិត្យ​សុខភាព​លើជន​ភៀសខ្លួន​មក​ពី​ប្រទេស​អូស្ត្រា​លី​ទាំង​អស់​រយៈពេល​៥ឆ្នាំ​ ហើយ​ថា ជន​ភៀសខ្លួន​ទាំង​នោះ​នឹង​មានអត្តៈសញ្ញាណ​ប័ណ្ណ​គ្រប់​ៗ​គ្នា​ដូចខ្មែរផង​ដែរ។

ឯកឧត្តម​ ឡុង វិសាលោ បាន​ឲ្យ​ដឹង​ថា មុន​នឹង​ទទួល​យក​ជន​ភៀសខ្លួន​ពី​អូស្ត្រា​លី​មក​រស់​នៅ​កម្ពុជា គឺ​សុទ្ធ​តែ​បាន​ឆ្លង​កាត់​ការ​សម្ភាសន៍​ និងផ្តល់​ឋានៈជា​ជន​ភៀសខ្លួន​រួចហើយ ស្រប​តាម​អនុសញ្ញាឆ្នាំ​១៩៥១ ស្តី​ពី​ជន​ភៀសខ្លួន​។ ឯកឧត្តម​ បាន​ឲ្យ​ដឹង​ថា ​ កម្ពុជា​ត្រូវ​តែ​​ពិនិត្យ​សព្វ​គ្រប់​បែ​បយ៉ាង​ទាំង​អស់ និង​ផ្អែក​តាម​​ច្បាប់​ជា​មូល​ដ្ឋាន​​  ។ ក្រៅ​ពី​នេះ គឺ​ត្រូវ​​មាន​ការ​តាម​ដាន​ សិក្សាអំ​ពី​បញ្ហា​សុខភាព  និង​ស្រាវ​ជ្រាវ​ច្បាស់​លាស់​ពី​បញ្ហា​ពាក់​ព័ន្ធ​នានា ជា​ពិសេសមិន​អនុញ្ញាតិនោះ​ទេ បើ​ពាក់ព័ន្ធ​នឹង​ក្រុម​​​ភេរវកម្ម ហើយ​ថា ការ​ទទួល​យក​ជន​ភៀសខ្លួន​ទាំង​នេះ គឺ​ឈរលើ​គោល​ការណ៍​ស្មគ្រ័​ចិត្ត​ និង​ដោយ​គ្មាន​ការ​បង្ខិត​បង្ខំ​ឡើយ​។

ដូច្នេះ​ ​ជា​ដំ​បូង​ ជន​ភៀស​ខ្លួន​ទាំង​នោះអនុញ្ញាតិ​ឲ្យ​រស់​នៅ​ទី​ក្រុង​ភ្នំ​ពេញ​ ហើយ​ក្រោយ​ពី​ការ​រៀប​ចំ​រួច​​រាល់​ហើយ​ នឹង​បញ្ជូន​ទៅ​រស់​នៅ​ក្រៅ​រាជ​ធានី​ភ្នំ​ពេញ​ ។ ក្នុង​ន័យ​ថា ត្រូវ​មាន​ការ​រៀប​ចំ​ជា​ដំ​ណាក់​កាលៗក្នុង​កម្ម​វិធី​តម្រង់​ទិស​ជា​មុន និង​រស់​នៅ​ជា​បណ្តោះ​អាសន្ន​សិន​​។ ក្រៅ​ពី​នេះ ជន​ភៀស​ខ្លួន​ទាំង​នោះ​ ត្រូវ​បាន​បង្រៀន​ភាសាខ្មែរ ដើម្បី​ងាយ​ស្រួល​ទំ​នាក់​ទំ​នង​គ្នា​ជា​មួយ​ប្រជា​ពល​រដ្ឋខ្មែរ មុន​នឹង​បញ្ជូន​ទៅ​រស់​នៅ​ក្រៅ​រាជ​ធានី​ភ្នំ​ពេញ​។      ការ​រស់​នៅ​ក្នុង​ដំ​ណាក់​កាល​បណ្តោះ​អាសន្ន​ គឺ​ជា​ចំ​ណាយ​​របស់​អូស្ត្រា​លី​ ដូចជា​ការ​បណ្តុះ​បណ្តាល​មុខវិជ្ជា​ជី​វៈ ការ​បង្រៀន​ភាសា ការ​ពិនិត្យ​តាម​ដាន​សុខភាព មុន​នឹង​ទៅ​រស់​នៅ​កន្លែង​អចិន្ត្រៃយ៍។

ឯកឧត្តម ឡុង វិសាលោ បាន​បញ្ជាក់​ថា ការ​រស់​នៅ​ក្នុង​ប្រទេស​កម្ពុជា​ ​ជន​ភៀសខ្លួន​ទាំង​នោះ ត្រូវ​តែ​​​គោរព​ច្បាប់​របស់​កម្ពុជា​  ត្រូវ​អនុវត្ត​តាម​អនុសញ្ញា​ស្តី​ពី​ជន​ភៀស​ខ្លួន​ឆ្នាំ​១៩៥១  អនុក្រិត្យ​លេខ​២២៤ ប៉ុន្តែ ជន​ភៀស​ខ្លួន​ទាំង​នោះ​ មាន​សិទ្ធិមិ​ន​ត្រូវ​គេបណ្តេញ​ចេញ​ឡើយ​ ហើយថាបើ​គេមិន​ចង់​រស់​នៅ​ទី​នេះបន្ត គឺ​អូស្ត្រា​លី ត្រូវ​ផ្តល់​សិទ្ធិ​ឲ្យ​អ្នក​ទាំង​នោះ​ ដើម្បី​ទៅ​រស់​នៅ​កន្លែង​ថ្មី​។

ឯកឧត្តម​  ឡុង វិសាលោ បន្ថែម​​ថា កិច្ច​ព្រម​ព្រៀង​រវាង​កម្ពុជា‑ អូស្ត្រា​លី (​MOU)ក្នុង​រយៈពេល​៤ឆ្នាំ​នេះ  គឺ​ខាង​កម្ពុជាក៏​គ្មាន​សិទ្ធិ​លុប​ចោល​អនុស្សារណៈនោះ​ទេ​ គឺ​ថា បើ​មាន​បញ្ហា​កើត​ឡើង​ណា​មួយ​ ភាគី​ទាំង​ពីរត្រូវ​ពិភាក្សា​គ្នា​ និង​បន្ត​ធ្វើ​វិសោធនកម្ម​​បន្ថែម​ទៀត មុន​នឹង​ឈាន​ដល់​ការ​​លុប​ចោល​ (MOU)​។

ឯកឧត្តម​ បាន​បន្ថែម​ថា សិទ្ធិ​ទទួល​ជន​ភៀស​ខ្លួន​នៅ​កម្ពុជា​ មិន​មែន​ជា​រឿង​ថ្មី​របស់​កម្ពុជា​នោះ​ទេ​ កន្លង​មក​ កម្ពុជា​ក៏​ធ្លាប់​បាន​អនុវត្ត​ជា​ហូរ​ហែរ ដូច​ជា​ ក្នុង​រឿង​ ជន​ភៀសខ្លួន​ម៉ុង​តាញ៉ា ជា​ដើម​ ហើយ​ថា សកម្ម​ភាព​នេះ គឺ​ជា​កាយ​វិការ​ប្រកប​ដោយ​​មនុស្ស​ធម៌​ ដែល​ពី​មុន​កម្ពុជា​ក៏​ធ្លាប់​មាន​ការ​រស់​នៅ​ជា​ជន​ភៀស​ខ្លួន​ និង​ធ្លាប់​ពឹង​ពាក់​ប្រទេស​ដទៃ​ដែរ។

ឯកឧត្តម​ ឡុង វិសាលោ ក៏​បាន​ជម្រាប​អំ​ពី​អត្ថប្រយោជន៍​ដែល​កម្ពុជា​ទទួល​យក​ជន​ភៀសខ្លួននេះ​ផង​ដែរថា នេះ​គឺជា​កាតព្វ​កិច្ច​អន្តរជាតិ​ ដែល​កម្ពុជា​ក៏​ជា​ប្រទេស​ហត្ថលេខី​នៃ​អនុសញ្ញា ស្តី​ពី​ជន​ភៀស​ខ្លួន​ ​ជា​មុខ​មាត់​ និងក៏​​ជា​កិត្យា​នុភាព​របស់​កម្ពុជា​លើ​ឆាក​អន្តរជាតិ​ផង​ដែរ នូវ​កាយ​វិការមនុស្ស​ធម៌​នេះ តាម​រយៈការ​បង្ហាញ​នូវ​លទ្ធ​ភាព​របស់​កម្ពុជាក្នុង​ការ​ទទួល​យក​ជន​ភៀស​ខ្លួន អូស្ត្រា​លី​ មក​រស់​នៅ​កម្ពុជា​នេះ​។ ឯកឧត្តម រដ្ឋលេខាធិការ បាន​បន្ថែម​ថា ជន​ភៀសខ្លួន​អូស្ត្រាលី​ នឹង​ចាប់​ផ្តើម​បញ្ជូន​មក​ប្រទេស​កម្ពុជា​នៅ​ចុង​ឆ្នាំ​២០១៤នេះ ហើយ​បើ​យូរអាច​នឹង​ពន្យាពេល​ដល់​ដើម​ឆ្នាំ​២០១៥ ប៉ុន្តែ​ ការ​បញ្ជូន​មក​លើក​ដំ​បូង​ នឹង​មាន​ចំ​នួន​តែក្រោម​១០​នាក់​ប៉ុណ្ណោះ​។​


ជា​មួយ​គ្នា​នេះ ឯកឧត្តម​ក៏​បាន​បញ្ជាក់​អំពី​ការ​ដែល​កម្ពុជា​ទទួល​ថវិកា ពី​អូស្ត្រា​លី នោះ គឺ​ថវិកាទាំង​អស់​នោះ​ ជា​ផ្នែក​មួយ​សម្រាប់​ទ្រទ្រង់​ជំ​នួយ​អភិវឌ្ឍ​ន៍​កម្ពុជា​តែប៉ុណ្ណោះ​ គឺ​មិន​មែន​យក​មក​ជួយ​ដល់​ជន​ភៀស​ខ្លួន​ ឬ​ក៏​ទៅ​ធ្វើ​អ្វី​ក្រៅ​ពី​គម្រោង​អភិវឌ្ឍ​ន៍​នោះ​ឡើយ​។ 

សម្តេច​តេជោ ៖ កម្ពុជា​មាន​លទ្ធភាព​គ្រប់​គ្រាន់​ក្នុង​ការ​ទទួល​ជន​ភៀសខ្លួន

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា « ការដែល​អូស្ត្រាលី​សម្រេច​ចិត្ត​បញ្ជូនជនភៀសខ្លួនមកកាន់កម្ពុជា គឺដោយ សារ តែ អូស្ត្រាលី យល់ ឃើញ ថា ប្រទេស​កម្ពុជាមានលទ្ធភាពគ្រប់គ្រាន់ សម្រាប់​ផ្តល់មុខរបរដល់ ជនភៀសខ្លួនទាំងនោះ ប្រកបរបរចិញ្ចឹមជីវិត »។

សម្តេចតេជោ ថ្លែងដូច្នេះ នៅក្នុងពិធី​ប្រគល់​សញ្ញាបត្រ ដល់និស្សិត សាកល វិទ្យាល័យ បៀល ប្រាយ នាព្រឹកថ្ងៃទី២៩ ខែកញ្ញា ឆ្នាំ​២០១៤​នេះ នៅមជ្ឈមណ្ឌលសន្និបាត កោះ​ពេជ្រ ហើយក៏ជាការឆ្លើយតបទៅនឹងប្រតិកម្ម របស់អង្គការសង្គមស៊ីវិលមួយចំនួន ដែលនិយាយថា កម្ពុជាមិនមែនជាប្រទេសសមស្រប និង មាន សមត្ថភាព ដើម្បីទទួលជនភៀសខ្លួនឡើយ។



ក្រុមអង្គការសង្គមស៊ីវិលជាតិ និង​អន្តរ​ជាតិ​មួយ​ចំនួន បានលើកឡើង ថា ភាពជាក់ស្តែង​នៅកម្ពុជា​មិនអាចក្លាយ​ជាប្រទេស​មួយ​ដែល​សម​ស្រប​តាមស្តង់​ដាអន្តរជាតិ​ក្នុងការទ​ទួល​យក​ជនភៀសខ្លួនឲ្យមករស់នៅបានទេ ដោយ​អះអាងថា ទី១ ប្រទេសកម្ពុជា​ជាប្រទេស​ក្រីក្រ​នៅ​ពឹងផ្អែកលើជំនួយបរទេស គឺ​កម្ពុជា​នៅសុំលុយ​គេដើម្បីរស់ជារៀងរាល់ឆ្នាំ ទី២ ការអត់ការងារធ្វើនៅកម្ពុជាមានអត្រាខ្ពស់ ដែលកាតព្វ កិច្ច របស់ ប្រទេស ម្ចាស់ ផ្ទះ(កម្ពុជា)ក្នុងការទទួលជនភៀស​ខ្លួន​ត្រូវ​តែបង្កលក្ខណៈងាយស្រួលក្នុងការផ្តល់ការងារធ្វើដល់ជនភៀសខ្លួនទាំងនោះ និងទី៣ កម្ពុជា ជាប្រទេសស្ថិតក្នុងបញ្ជីរំលោភសិទ្ធិមនុស្ស និងរំលោភច្បាប់អន្តរជាតិយ៉ាងខ្លាំង ដូច្នេះ អង្គការ​ទាំងនោះ មានការព្រួយបារម្ភថា ជនភៀសខ្លួនមកពីប្រទេសអូស្ត្រាលី អាចប្រឈម​នឹងការ​រំលោភ​សិទ្ធិមនុស្សបន្ថែមទៀត។

ក៏ប៉ុន្តែ ពាក់ព័ន្ធនឹងកិច្ចព្រមព្រៀងរវាងកម្ពុជា អូស្ត្រាលី លើការបញ្ជូនជនភៀសខ្លួន ពីប្រទេស​អូស្រ្តាលី មករស់នៅនៅកម្ពុជានោះ សម្តេចតេជោ ហ៊ុន សែន នាយក រដ្ឋមន្រ្តី នៃព្រះរា​ជាណា​ចក្រ​កម្ពុជា បានប្រកាសបញ្ជាក់ថា ការបញ្ជូនជនភៀសខ្លួននេះ ធ្វើឡើងតាម គោលការណ៍ស្ម័គ្រចិត្ត មិន​មែន​​ជាការ​ចាប់​បង្ខំ ហើយក៏ជាកាតព្វកិច្ចអន្តរជាតិរបស់កម្ពុជាផងដែរ។ សម្តេចតេជោ ហ៊ុន សែន បានគូសបញ្ជាក់ថា «យើង​មិន​ចេះតែ​ធ្វើ​ទទឹង​ទិស​នោះទេ ហើយក៏គ្មាននរ ណាចេះតែមក អត់ស្គាល់កម្ពុជាជាអ្វីនោះដែរ»។

សូម​បញ្ជាក់​ថា កម្ពុជា និងអូស្ត្រាលី បាន​ចុះ​កិច្ចព្រមព្រៀងលើការទទួលយក និង​បញ្ជូន​ខ្លួនជន ភៀសខ្លួនពីប្រទេស​អូស្ត្រាលី​ឲ្យ​មក​រស់នៅកម្ពុជា កាល​ពីថ្ងៃសុក្រ ទី២៦ ខែកញ្ញា ឆ្នាំ២០១៤ សប្តាហ៍មុននេះ ។ ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ឯកឧត្តម ស ខេង បាន​បញ្ជាក់ថា កិច្ចព្រមព្រៀងនេះ ធ្វើឡើង ក្នុង​ក្រប​ខណ្ឌ មនុស្សធម៌តែប៉ុណ្ណោះ។ សូមបញ្ជាក់ថា នៅ​ព្រឹក​ថ្ងៃទី២៩ ខែកញ្ញា ឆ្នាំ ២០១៤នេះ ឯកឧត្តម ឡុង វិសាលោ រដ្ឋលេខាធិការ ក្រសួង​ការបរទេស និងសហប្រតិបត្តិការអន្តរជាតិ ឯកឧត្តម កើត រិទ្ធ រដ្ឋលេ​ខាធិការ​ក្រសួង​យុត្តិធម៌ ​និង​មន្ត្រី​ជាន់​ខ្ពស់​មួយ​ចំនួន​របស់​ក្រសួងមហាផ្ទៃ មាន ឯកឧត្តម នាយឧត្តមសេនីយ៍ សុខ ផល អគ្គនាយក នៃអគ្គនាយក​ដ្ឋាន​ជនអន្តោប្រវេសន៍ ឯកឧត្តម ខៀវ សុភគ អ្នកនាំពាក្យក្រសួងមហាផ្ទៃ ក៏បាន​ធ្វើសន្និសីទ​សារព័ត៌មាន​បំភ្លឺអំពី ករណី​នេះ​ផង​ដែរ៕

អគ្គនា​យកដ្ឋានអន្តោ​ប្រវេសន៍ ៖ ជនភៀ​សខ្លួនដែ​លមកពី​អូស្ត្រាលី មករស់​នៅកម្ពុជា សាក​ល្បង​លើកដំ​បូង​មានចំនួន​ក្រោម​១០នាក់

ឯកឧត្តម នាយឧត្តមសេនីយ៏ សុខ ផល អគ្គនាយក នៃអគ្គនាយកដ្ឋានជនអន្តោប្រវេសន៍ នៃក្រសួង​មហាផ្ទៃ បានមានប្រសាសន៏ថា ការទទួល​យកជន​ភៀសខ្លួនរាល់ថ្ងៃនេះ គឺជាការអនុវត្តកាតព្វកិច្ច ក្នុងនាមជា​ប្រទេសដែល​ជាម្ចាស់​ហត្ថលេខី​ក្នុង​ឆ្នំា​១៩៥៤ និង១៩៦៧ ។ ដូច្នេះចំពោះ​ការអនុវត្តសិទ្​ធិ​នេះ​គឺចាប់តំាងពីឆ្នំា១៩៩២ ដែល ព្រះករុណា ព្រះបាទសម្តេច នរោត្តម សីហនុ គឺជាប្រធានSNC ដោយបានចុះហត្ថលេខា​ជាមួយនឹង​សមាជិក​ប្រធាន SNC ដទៃទៀត ដើម្បី​អនុវត្ត​នូវ​អនុសញ្ញានេះ ។

ឯកឧត្តម នាយឧត្តមសេនីយ៍ សុខ ផល មានប្រសាសន៍ដូច្នេះ ក្នុងសន្និសីទសារព័ត៌មាន ស្តីអំពី អនុស្សារណៈ​នៃការយោគយល់គ្នា រវាងរាជរដ្ឋាភិបាល​កម្ពុជា​និងរដ្ឋាភិបាលអូស្ត្រាលី ស្តីពីការតំាងទីលំនៅនៃជនភៀសខ្លួននៅកម្ពុជា ធ្វើទ្បើងនៅក្រសួងមហាផ្ទៃ នាព្រឹកថ្ងៃទី ២៩ ខែកញ្ញា ឆ្នំា២០១៤នេះ ។

ឯកឧត្តមបានបន្តថា អគ្គនាយកដ្ឋានអន្តោប្រវេសន៏ គឺជាអ្នកគ្រប់គ្រងលើបញ្ហានេះ ក្នុងនោះ មានទំាងជនភៀសខ្លួន មានទំាងអ្នកសុំសិទ្ធិជ្រកកោន​កំពុងដំណើរការ មានចំនួន៩១នាក់ ក្នុងនោះមាន៖ជនភៀសខ្លូនមាន៧០នាក់ ជនសុំសិទ្ធិ ជ្រកកោនមាន២១នាក់ ប៉ុន្តែវាខុសគ្នាត្រង់២១នាក់ គឺកំពុងតែ​ដាក់ពាក្យដើម្បីអោយពិនិត្យនូវលក្ខខ័ណ្ឌរបស់គាត់ រហូតដល់មានការប្រកាសរបស់ក្រសួងមហាផ្ទៃ ទើបអាចជាជនភៀសខ្លួនពិតប្រាកដ ហើយ៩១នាក់នេះ មាន៨សញ្ជាតិ មានដូចជា ភូមា ស្រីលង្កា វៀតណាម ប៉ាលីស្ទីន ប៉ាគីស្ថាន អេជូពី ថៃ ឥណ្ឌា ប៉ុន្តែបើតាមសិទ្ធិជនភៀសខ្លួនមកដល់ដំបូង គាត់អនុវត្ត​តាមការប្រមូលផ្តុំ បន្ទាប់មកគាត់នឹងមានសិទ្ធិរកការងារធ្វើ ប៉ុន្តែគាត់នៅតែជាជនភៀសខ្លួននិងជាជនសុំសិទ្ធិដដែល « ដូច្នេះជនភៀស​ខ្លួនដែល​មកពី​អូស្ត្រាលី ធ្វើការសាកល្បងដំបូងមានចំនួនក្រោមពី១០នាក់នេះ រស់នៅប្រមូលផ្តុំគ្នា គឺគាត់មិនអាចរកការងារអ្វីនៅក្នុងប្រទេសរបស់យើង ហើយខ្ញុំ​គិត​ថា មិនប្លែក​​អ្វីទេដោយអនុវត្តកាតព្វកិច្ច ជាអន្តរជាតិជាប្រទេសមួយផង ហើយយើងគ្រប់គ្រងសន្តិសុខបាន»។

ឯកឧត្តមនាយឧត្តមសេនីយ៏ បានបន្តថា ការធ្វើជម្រឿនអន្តោប្រវេសន៏ គឺយើងបានដំណើការហើយនៅ ២៥ ខេត្ត ក្រុង ។ កម្ពុជា គឺជាប្រទេសមួយដែលអនុវត្ត​តាមច្បាប់ជាតិ និងអន្តរជាតិដូច្នេះ ជនអន្តោប្រវេសន៏ដែលរស់នៅក្នុងប្រទេសកម្ពុជាយើង គឺយើងបានធ្វើសម្រង់តាំងពីឆ្នំា២០០២មកម៉្លេះ។ ហើយសម្រ់ង​លើកទី១ គឺចំពោះអ្នកដែលមានសិទ្ធិជាជនអន្តោប្រវេសន៏តំាងពីជំនាន់សម្តេច ព្រះបាទ សីហនុមកម្លេះ មានកាតខ្មៅ កាតទ្បាំងតាយ និងកាតផ្សេង ដោយសារ​តែរបបប៉ុល ពត កាប់សម្លាប់ ក៏រត់ទៅប្រទេសវៀតណាម សម័យលន់ នល់ ក៏បានរត់ទៅវិញ។ ទំាងអស់នេះមានតួរលេខជារួម ៧០១២នាក់ដែល​យើង​បានស្រង់ទុក។ ក្រៅពីនេះ ឯកឧត្តម នាយឧត្តមសេនីយ៏ បានបញ្ជាក់ថា ក្រសួងមហាផ្ទៃបានចាត់វិធានការ ដើម្បីដោះស្រាយអ្នកដែលគ្មានលិខិតស្នាម បញ្ជូនត្រលប់វិញ ក្នុងរយៈពេល២ខែ ៕
អត្ថបទ៖ GNN 

រដ្ឋមន្ត្រី​​ក្រសួង​​យុត្តិធម៌​ ប្រកាស​ពន្យា​ពេល​ការ​ឈប់​​ទទួល​​ពាក្យ​ និង​ការ​​បោះ​​ឆ្នោត​​ជ្រើស​តាំង​​សមាជិក​​​ឧត្តម​​ក្រុមប្រឹក្សា​អង្គ​ចៅ​ក្រម​

ឯកឧត្តម អង្គ​ វង្សវឌ្ឍានា រដ្ឋមន្ត្រី​ក្រសួង​យុត្តិធម៌  និង​ជាប្រធាន​គណៈកម្មការរៀប​ចំ​ការ​បោះ​ឆ្នោត​លើក​ទី​១ សម្រាប់​ការ​ជ្រើស​តាំង​សមាជិក​ឧត្តម​ក្រុមប្រឹក្សាអង្គ​ចៅ​ក្រម​ បាន​ជូន​ដំ​ណឹងអំពី​ការ​ពន្យា​ពេល​ឈប់​ទទួល​ពាក្យ​ដែល​នឹង​បញ្ចប់​នៅ​ថ្ងៃ​ទី​៣០ ខែ​កញ្ញា ឆ្នាំ​២០១៤ ត្រូវ​បាន​ពន្យា​ទៅដល់​​ថ្ងៃ​ទី​៩ ខែ​តុលា​ ឆ្នាំ​២០១៤​វិញ ហើយ​កាល​បរិច្ឆេទ​​នៃ​ការ​បោះ​ឆ្នោត​លើក​ទី​១ សម្រាប់​ការ​ជ្រើសតាំង​សមាជិក​​ឧត្តម​ក្រុមប្រឹក្សា​នៃ​អង្គ​ចៅ​ក្រម​ ដែល​នឹង​ប្រព្រឹត្តទៅ​នៅ​ថ្ងៃ​ទី​២៤ ‑២៥ ខែ​តុលា ឆ្នាំ ២០១៤ ត្រូវ​លើក​ពេល​ទៅ​ថ្ងៃ​ទី​៣១ ខែ​តុលា  និង​ថ្ងៃ​ទី​១‑ទី២ ខែវិច្ឆិកា ឆ្នាំ​២០១៤វិញ​។

សូម​អាន​សេចក្តី​ជូន​ដំ​ណឹង​របស់​រដ្ឋ​មន្ត្រី​ក្រសួង​យុត្តិធម៌