Tuesday, January 13, 2015
កម្ពុជាថ្កោលទោសចំពោះអំពើភេរវកម្មនៅទីក្រុងប៉ារីស
ប្រទេសកម្ពុជា សូមថ្កោលទោសយ៉ាងខ្លាំងក្លាបំផុត ចំពោះការវាយភេរវកម្មដ៏ព្រៃផ្សៃ នៅប្រទេសបារាំងនាសប្តាហ៍មុននេះ ដែលបានបង្កឱ្យជនជាតិបារាំងស្លូតត្រង់បាត់បង់ជីវិត របួសជាច្រើននាក់ និងមានការតក់ស្លុតយ៉ាងខ្លាំងក្លា ហើយដែលជាការវាយប្រហារដ៏ធ្ងន់ធ្ងរដល់តម្លៃមូលដ្ឋាន នៃសេរីភាពបញ្ចេញមតិ និងសិទ្ធិប្រជាធិបតេយ្យ។
នេះជាខ្លឹមសារដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចារនៅក្នុងសៀវភៅចូលរួមមរណទុក្ខ នារសៀលថ្ងៃទី១២ ខែមករា ឆ្នាំ២០១៥ ក្នុងឱកាសដែលសម្តេច អមដំអមដំណើរដោយសមាជិកជាន់ខ្ពស់រាជរដ្ឋាភិបាល បានអញ្ជើញចូលរួមគោរពវិញ្ញាក្ខន្ធនៅក្នុងស្ថានទូតបារាំង ក្នុងរាជធានីភ្នំពេញ ចំពោះពលរដ្ឋបារាំង ដែលបានស្លាប់ និងរបួសក្នុងអំពើភេរវកម្មនៅទីក្រុងប៉ារីស កាលពីថ្ងៃទី០៧ ខែមករា ឆ្នាំ២០១៥។
សម្តេចតេជោបានសរសេរក្នុងនាមសម្តេចផ្ទាល់ រាជរដ្ឋាភិបាល និងប្រជាជនកម្ពុជាថា នៅក្នុងកាលៈទេសៈប្រកបដោយក្តីរន្ធត់នេះ ក្នុងនាមរាជរដ្ឋាភិបាល និងប្រជាជនកម្ពុជា និងក្នុងនាមខ្ញុំផ្ទាល់ ខ្ញុំសូមចូលរួមរំលែកទុក្ខយ៉ាងក្រៀមក្រំបំផុតដល់ក្រុមគ្រួសារ និងជនរងគ្រោះដែលបានបាត់បង់ជីវិតនៅក្នុងអំពើហិង្សាគួរឱ្យស្អប់ខ្ពើមនេះ និងសូមសម្តែងនូវសាមគ្គីភាព និងសមានចិត្តដ៏ជ្រាលជ្រៅជាមួយនឹងរដ្ឋាភិបាល និងប្រជាជនបារាំង៕
សម្តេចតេជោសម្ពោធដាក់ឱ្យដំណើរការវារីអគ្គិសនីស្ទឹងឫស្សីជ្រុំក្រោមដែលមានតម្លៃជិត៥០០លានដុល្លារអាមេរិក
វារីអគ្គិសនីស្ទឹងឫស្សីជ្រុំក្រោម ស្ថិតនៅតំបន់ជួរភ្នំក្រវ៉ាញ ឃុំបាក់ខ្លង ស្រុកមណ្ឌលសីមា ខេត្តកោះកុង មានចម្ងាយប្រមាណ ៣៥គីឡូម៉ែត្រ ពីទីតាំងខាងក្រោម និងចម្ងាយប្រមាណ ៤៩គីឡូម៉ែត្រពីទីតាំងខាងលើទៅទីរួមខេត្តកោះកុង ដែលតម្លៃ ៤៩៥លាន ៧សែន ៦ម៉ឺនដុល្លារអាមេរិក វិនិយោគទុនដោយក្រុមហ៊ុនមកពីសាធារណរដ្ឋប្រជាមានិតចិន បានសម្ពោធបើកដំណើរការជាផ្លូវការហើយ នៅព្រឹកថ្ងៃទី១២ ខែមករា ឆ្នាំ២០១៥ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ដោយចាត់ទុកវារីអគ្គិសនីស្ទឹងឫស្សីជ្រុំក្រោម ជាវារីអគ្គិសនីកំរិតធំបំផុតសម្រាប់កម្ពុជាសម្តេចអគ្គមហាសេនាបតីតេជោហ៊ុន សែន បានមានប្រសាសន៍វាយតម្លៃខ្ពស់ចំពោះភាគីពាក់ព័ន្ធ ដែលប្រឹងប្រែងរួមគ្នាសម្រេចបាននូវសមិទ្ធផលវារីអគ្គិសនីសម្ពោធដាក់ឱ្យដំណើរការនៅពេលនេះ និងកោតសរសើរដល់ក្រុមហ៊ុនសាជីវកម្ម China Huadian Hongkong company ប្រទេសចិន ដែលបានខិតខំសិក្សាកសាងទំនប់វារីអគ្គិសនីនៅក្នុងតំបន់ដាច់ស្រយាលមួយនេះ ដើម្បីបង្កើតឡើងនូវសមិទ្ធផលដ៏ធំមួយសម្រាប់ព្រះរាជាណាចក្រកម្ពុជា និងជាពិសេសបានថ្លែងអំណេគុណ ចំពោះការគាំទ្រទាំងឡាយរបស់រដ្ឋាភិបាលចិនដែលជានិច្ចកាល បានលើកទឹកចិត្តឱ្យបណ្តាក្រុមហ៊ុនរបស់ចិនមកវិនិយោគនៅក្នុងព្រះរាជាណាចក្រកម្ពុជា។
សម្តេចតេជោបានមានប្រសាសន៍បញ្ជាក់ថា ការសាងសង់វារីអគ្គិសនីស្ទឹងឫស្សីជ្រុំក្រោមនេះ ចិនមានលទ្ធភាពច្រើន បន្ថែមទៅដោយចិនមានទុនពិតប្រាកដនៅក្នុងការសាងសង់ មិនមែនគ្រាន់តែបញ្ហាទាក់ទង នឹងបញ្ហាបច្ចេកទេសក្នុងការសាងសង់នោះទេ តែមួយផ្នែកទៀតទាក់ទង ការតភ្ជាប់បណ្តាញ បើគ្រាន់តែមានវារីអគ្គិសនីនៅទីនេះ ហើយពុំមានបណ្តាញបញ្ជូនសម្រាប់ចែកចាយនោះទេ ប្រៀបដូចជាមានការផលិតរថយន្ត ប៉ុន្តែអត់មានផ្លូវបើកអញ្ចឹងដែរ។ ដូច្នេះហើយបានជារយៈពេលកន្លងទៅយើងបានប្រឹងប្រែងខ្លាំងណាស់ដើម្បីតភ្ជាប់ការផលិតវារីអគ្គិសនីពីតំបន់នេះ រួមមានឫស្សីជ្រុំក្រោម, អាតៃ និងតាតៃ ហើយវារីអគ្គិសនីស្ទឹងតាតៃនេះ ក៏នឹងធ្វើពិធីសម្ពោធដាក់ឱ្យប្រើប្រាស់នៅឆ្នាំ២០១៥ នេះផងដែរ។
ជាមួយនឹងការរំលឹកពីអតីតកាលដ៏យូរលង់ ជាពិសេសបើគិតត្រឹមតែពីឆ្នាំ១៩៧០ មកចុះតំបន់នេះជាតំបន់អសន្តិសុខ គឺខ្មែរមិនដែលគ្រប់គ្រងបាននោះ សម្តេចតេជោក៏បានមានប្រសាសន៍បញ្ជាក់ថា អញ្ចឹងទេ សមិទ្ធផលសន្តិភាព គឺផ្តល់ឱកាសឱ្យយើងមានលទ្ធភាព ដើម្បីបានអភិវឌ្ឍន៍វារីអគ្គិសនីនៅតំបន់នេះ ហើយបើសិនជាគ្មានសន្តិភាពដែលបង្កើតឡើងតាមរយៈនយោបាយឈ្នះឈ្នះទេ កុំនិយាយទៅដល់ការកសាងសមិទ្ធផល តែអ្វីៗក៏ត្រូវបំផ្លាញដែរ។ ផ្ទុយទៅវិញសមិទ្ធផលតំបន់វារីអគ្គិសនីនៅតំបន់នេះ មួយចំនួនក៏នឹងក្លាយទៅជាតំបន់ទេសចរណ៍ផងដែរ។ សម្តេចតេជោនាយករដ្ឋមន្ត្រីក៏បានអរគុណជាមួយនឹងទឹកចិត្តបង្រួបបង្រួមជាតិ នៃប្រជាពលរដ្ឋកម្ពុជា គ្រប់ភាគីពាក់ព័ន្ធ ដែលអនុញ្ញាតឱ្យប្រទេសរបស់យើងអាចបង្រួបបង្រួមបាន និងមានសន្តិភាពពេញលេញ ហើយផ្តល់ឱកាសអភិវឌ្ឍន៍នៅថ្ងៃនេះ។
ថ្លែងក្នុងឱកាសសម្ពោធដាក់ឲ្យប្រើប្រាស់វារីអគ្គិសនីឫស្សីជ្រុំក្រោម សម្តេចតេជោបានជំរុញឲ្យអាជ្ញាធរអគ្គិសនីកម្ពុជា អាជ្ញាធរដែនដី និងក្រសួងរ៉ែ និងថាមពល ពិនិត្យមើលការលក់ភ្លើងរបស់ផ្នែកឯកជន ដែលមកដល់ពេលនេះ តម្លៃអគ្គិសនី មិនបានចុះសោះ នៅពេលដែលតម្លៃប្រេងនៅលើទីផ្សារ មានការធ្លាក់ចុះជាងពាក់កណ្តាលទៅហើយនោះ។ ជាមួយនេះសម្តេចក៏បានស្នើឲ្យក្រុមហ៊ុនប្រេងឥន្ធនៈនៅក្នុងប្រទេសកម្ពុជា បន្តចុះថ្លៃបន្ថែមទៀត ព្រោះក្រសួងសេដ្ឋកិច្ច និងហិរញ្ញវត្ថុ បានធ្វើលិខិតទៅក្រុមហ៊ុនទាំងនោះឲ្យបញ្ចុះតម្លៃមកនៅត្រឹម ៣.៩០០ រៀលក្នុង ១លីត្រ តែមកទល់ពេលនេះក្រុមហ៊ុនសាំងមួយចំនួន មិនទាន់បានចុះនៅឡើយទេពិសេសក្រុមហ៊ុនបរទេស។
សម្តេចតេជោក៏បានស្នើឲ្យក្រុមហ៊ុនអគ្គិសនីកម្ពុជា សហការជាមួយអជា្ញធររាជធានីភ្នំពេញ ចុះធ្វើការសិក្សាផងដែរ ចំពោះលំនៅដ្ឋាន ដែលកម្មករកម្មការិនី កំពុងជួលស្នាក់នៅរាជធានីភ្នំពេញ ដែលមានជាង ៣ម៉ឺនបន្ទប់ ហើយដែលតម្លៃភ្លើងនៃបន្ទប់ជួលនោះ មានតម្លៃពី ៨៥០រៀល ទៅ ២៥០០រៀលក្នុងមួយគីឡូវ៉ាត់ម៉ោង ដែលម្ចាស់ផ្ទះជួលទារពីកម្មករ ដូចនេះត្រូវរកវិធីដោះស្រាយធ្វើយ៉ាងណា ដើម្បីឲ្យតម្លៃនេះមានការធ្លាក់ចុះសម្រាប់បងប្អូនកម្មករ។
ក្នុងគោលបំណងឲ្យប្រជាពលរដ្ឋក្នុងខេត្តកោះកុងទទួលបាន ផលប្រយោជន៍ពីវារីអគ្គិសនីនេះផងដែរនោះ សម្តេចតេជោមានប្រសាសន៍ថា ខេត្តកោះកុងនេះ បានផ្តល់ឱកាសច្រើនណាស់ ដល់ការអភិវឌ្ឍន៍ ផ្នែកផលិតអគ្គិសនីដែលមកដល់ពេលនេះ បានជាង ១.០០០ មេហ្គាវ៉ាត់ហើយតែការអភិវឌ្ឍនេះ គឺមិនមែនគ្រាន់តែអគ្គិសនី ជារឿងអគ្គិសនីនោះទេ អគ្គិសនី គឺជាសេដ្ឋកិច្ចសង្គម និងអគ្គិសនីជាបញ្ហាដទៃទៀតដែលមានការពាក់ព័ន្ធ ក្នុងដំណើរការរបស់ប្រទេសជាតិ។
ឯកឧត្តម ស៊ុយ សែម រដ្ឋមន្ត្រី ក្រសួងរ៉ែ និងថាមពលបានឲ្យដឹងថា វារីអគ្គិសនីស្ទឹងឫស្សីជ្រុំក្រោមនេះ មានទុនវិនិយោគចំនួន៤៩៥លាន ៧សែន ៦ម៉ឺនដុល្លារ វិនិយោគតាមរូបភាព សាងសង់តាមដំណើរការផ្ទេរ(BOT) រយៈពេលសម្បទាន ៣៥ឆ្នាំ ក្នុងនោះ៥ឆ្នាំសម្រាប់ការសាងសង់ និង ៣០ឆ្នាំសម្រាប់ធ្វើអាជីវកម្ម។ បរិមាណថាមពលផលិតប្រចាំឆ្នាំ១០២០ លានគីឡូវ៉ាត់ម៉ោង តម្លៃលក់អគ្គិសនី ៧,៣៥ សេនអាមេរិកក្នុង១គីឡូវ៉ាត់ម៉ោង។ ចំណូលពន្ធចូលរដ្ឋជាមធ្យមប្រមាណ ១២,៥៥ លាន ដុល្លារអាមេរិក ក្នុង១ឆ្នាំ ឬសរុបរួម ៣៧៦,៥លានដុល្លារអាមេរិក ក្នុងរយៈពេលសម្បទាន ៣០ឆ្នាំ។
អំពីហេដ្ឋារចនាសម្ព័ន្ធ និងលក្ខណៈបច្ចេកទេសសំខាន់ៗនៃគម្រោងនេះ មានទំនប់២ ដំណាក់ គឺទំនប់លើប្រវែង៤៣៩ម៉ែត្រ កំពស់១២៥ម៉ែត្រ និងទំនប់ក្រោមប្រវែង ៣២២ម៉ែត្រ កំពស់៥៨ ម៉ែត្រ។ មានស្ថានីយ៍វារីអគ្គិសនី២ គឺស្ថានីយ៍វារីអគ្គិសនីលើមានអានុភាព ២០៦មេហ្គាវ៉ាត់ និងស្ថានីយ៍វារីអគ្គិសនីក្រោម មានអានុភាព ១៣២មេហ្គាវ៉ាត់។ ខ្សែបញ្ជូនតុងស្យុង ២៣០គីឡូវ៉ុល ប្រវែង ១៥,៥គីឡូម៉េត្រ ពីស្ថានីយ៍វារីអគ្គិសនីស្ទឹងឫស្សីជ្រុំក្រោម ទៅភ្ជាប់ជាមួយខ្សែបញ្ជូនរបស់គម្រោងវារីអគ្គិសនីស្ទឹងតាតៃ និងបញ្ជូនទៅអនុស្ថានីយ៍ រួម អូសោម ដែលបន្តភ្ជាប់ទៅជាមួយខ្សែបណ្តាញបញ្ជូន ភ្នំពេញ-កំពង់ឆ្នាំង-ពោធិសាត់-បាត់ដំបង ដើម្បីផ្គត់ផ្គង់អគ្គិសនីទៅទូទាំងប្រទេស។ ខ្សែបញ្ជូនតង់ស្យុង២២គីឡូវ៉ុល ប្រវែង ៣១,៧៤គីឡូម៉ែត្រ ភ្ជាប់ពីស្ថានីយ៍ស្ទឹងឫស្សីជ្រុំក្រោមទៅភ្ជាប់ជាមួយបណ្តាញចែកចាយទីរួមខេត្តកោះកុង។
ឯកឧត្តម ស៊ុយ សែម បានមានប្រសាសន៍បញ្ជាក់ថា ក្នុងអភិវឌ្ឍគម្រោងវារីអគ្គិសនី ឬស្សីជ្រុំក្រោមនេះ ពិតជាបានផ្តល់ផលប្រយោជន៍ ជូនជាតិមាតុភូមិ រួមចំណែកក្នុងការបង្កើតមុខរបរជូនប្រជាជន បង្កើតបានប្រាក់ចំណូលចូលរដ្ឋ ជាពិសេសបង្កើនសមត្ថភាព ផ្គត់ផ្គង់អគ្គិសនីប្រកបដោយស្ថេរភាព គុណភាព និងតំលៃសមរម្យ បង្កើនកំរិតឯករាជ្យភាពរបស់កម្ពុជា ក្នុងការផ្គត់ផ្គង់អគ្គិសនី បង្កើនសន្តិសុខថាមពលរបស់ជាតិ កាត់បន្ថយហានិភ័យ ផ្នែកផ្គត់ផ្គង់អគ្គិសនី ដែលពឹងផ្អែកតែលើការនាំចូលប្រេង ឥន្ធនៈដើម្បីផលិតអគ្គិសនី និងបានចូលរួមចំនែកអភិវឌ្ឍសេដ្ឋកិច្ចជាតិសង្គម និងកាត់បន្ថយភាពក្រីក្ររបស់ប្រជាជន។
តាមការបញ្ជាក់ពីរដ្ឋមន្ត្រីក្រសួងរ៉ែ និងថាមពលឲ្យដឹងថា រហូតមកដល់ពេលនេះ មានការចុះកិច្ចព្រមព្រៀងប្រភពអគ្គិសនីចំនួន ១១រួចមកហើយ ដែលមានអនុភាពផ្គត់ផ្គង់សរុប ចំនួន ២១២៣មេហ្គាវ៉ាត់។ ក្នុងចំណោមប្រភពអគ្គិសនីទាំង១១នោះ មានប្រភពអគ្គិសនីចំនួន៨ ត្រូវបានដាក់ឲ្យដំណើរការរួចរាល់ហើយ ដែលអនុភាពផ្គត់ផ្គង់សរុប ១០៧២មេហ្គាវ៉ាត់ រួមមានទី១៖ ការនាំចូលអគ្គិសនីពីប្រទេសវៀតណាម តាមច្រកភ្នំដឹន ខេត្តតាកែវ (១៧០មេហ្គាវ៉ាត់) ទី២៖ ការនាំចូលពីប្រទេសថៃចំនួន ១២០មេហ្គាវ៉ាត់ ទី ៣៖ វារីអគ្គិសនីគិរីរម្យ១(១២មេហ្គាវ៉ាត់) ទី៤៖ វារីអគ្គិសនីកំចាយ (១៩៤.១មេហ្គាវ៉ាត់) ទី៥៖ វារីអគ្គិសនីគិរីរម្យ៣ (១៨មេហ្គាវ៉ាត់) ទី៦៖ វារីអគ្គិសនីស្ទឹង អាតៃ (១២០មេហ្គាវ៉ាត់) ទី ៧៖ អគ្គីសនីដើរដោយធ្យូងថ្ម (១០០មេហ្គាវ៉ាត់) និងទី ៨៖ វារីអគ្គិសនីឬស្សីជ្រុំក្រោម ៣៣៨មេហ្គាវ៉ាត់ ដែលដាក់ឲ្យដំណើរការនៅថ្ងៃនេះ៕
នាយកខុទ្ទកាល័យនាយករដ្ឋមន្ត្រី”ព្រលះ”កាសែតភ្នំពេញប៉ុស្តិ៍ផ្ទួនៗយ៉ាងចាស់ដៃ ដោយចោទថា ចុះផ្សាយបំភ្លៃការពិត
បន្ទាប់ពីសារព័ត៌មានភ្នំពេញប៉ុស្តិ៍ចុះផ្សាយកាលពីថ្ងៃទី០៨ ខែមករា ឆ្នាំ២០១៥ នៅលេខ១៣៥៣ ក្រោមអត្ថបទមួយមានចំណងជើងថា "ហូ សិទ្ធី នាយកខុទ្ទកាល័យនាយករដ្ឋមន្ត្រី ហ៊ុន សែន បានជំរុញជាដដែលទៅក្រសួងរៀបចំដែនដី នគរូបនីយកម្ម និងសំណង់ ឲ្យអ្នកស្រី សារុំ ធ្វើការសាងសង់នៅលើដីនោះ និងសរសេរទៅលោក ប៉ា សុជាតិវង្ស អនុញ្ញាតឲ្យអ្នកស្រី សារុំ ជាតំណាងប្រជាពលរដ្ឋ១៦៣គ្រួសារ ចាក់ដីនៅលើដីទំហំ៩.៩៩២ម៉ែត្រក្រឡា ដើម្បីសាងសង់ផ្ទះ" រួចមក ឯកឧត្តម ហូ សិទ្ធី នាយកខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជារដ្ឋមន្ត្រីប្រតិភូអមនាយករដ្ឋមន្ត្រី បានសម្តែងនូវប្រតិកម្មយ៉ាងខ្លាំងក្លា ហើយបានចោទប្រកាន់ការចុះផ្សាយរបស់កាសែតភ្នំពេញប៉ុស្តិ៍នេះ ជាការបំភ្លៃការពិត គ្មានសុចរិតភាព ធ្វើឲ្យប៉ះពាល់ដល់កិត្តិយសរបស់ឯកឧត្តម ។
ជាមួយនឹងប្រតិកម្មភ្លាមៗនោះ ឯកឧត្តម ហូ សិទ្ធី បានចេញលិខិតផ្លូវការចុះថ្ងៃទី០៨ ខែមករា ឆ្នាំ២០១៥ ជម្រាបជូនលោកនិពន្ធនាយកសារព័ត៌មានភ្នំពេញប៉ុស្តិ៍ ដោយបានបញ្ជាក់ថា ឯកឧត្តមមិនមានសមត្ថកិច្ចទៅបញ្ជាក្រសួងរៀបចំដែនដី នគរូបនីយកម្ម និងសំណង់ ឬក៏អាជ្ញាធររាជធានីភ្នំពេញដើម្បីឲ្យធ្វើកិច្ចការបែបនេះទេ ហើយខុទ្ទកាល័យសម្តេចតេជោនាយករដ្ឋមន្ត្រីមានសមត្ថកិច្ចត្រឹមតែចេញលិខិតទៅស្ថាប័នពាក់ព័ន្ធដើម្បីពិនិត្យ ឬបើចាំបាច់សុំឲ្យលើកយោបល់ជូនសម្តេចតេជោនាយករដ្ឋមន្ត្រីពិនិត្យសម្រេចដ៏ខ្ពង់ខ្ពស់ ។ លើសពីនេះ ឯកឧត្តមស្នើឲ្យលោកនិពន្ធនាយកសារព័ត៌មានភ្នំពេញប៉ុស្តិ៍នេះមានសេចក្តីក្លាហានចុះផ្សាយនូវលិខិតរបស់ឯកឧត្តមនៅលើទំព័រកាសែតទៀតផង ។
នៅថ្ងៃទី០៨ ខែមករា ឆ្នាំ២០១៥នោះដែរ ឯកឧត្តម ហូ សិទ្ធី បានចេញលិខិតលើកទី២របស់ឯកឧត្តមជម្រាបជូនលោកនិពន្ធនាយកសារព័ត៌មានភ្នំពេញប៉ុស្តិ៍ ដោយផ្ញើជូននូវច្បាប់ចម្លងនៃលិខិតរបស់ឯកឧត្តមដែលបានផ្ញើជូនឯកឧត្តម ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ កាលពីថ្ងៃទី០៥ ខែមករា ឆ្នាំ២០១៥ ដែលកាសែតភ្នំពេញប៉ុស្តិ៍បានចុះផ្សាយបំភ្លៃថា ឯកឧត្តមបានចេញបញ្ជាដល់ឯកឧត្តម ប៉ា សុជាតិវង្ស ដើម្បីឲ្យលោកនិពន្ធនាយកពិនិត្យពិចារណាលើលិខិតទី២នេះ តើវាជា"បញ្ជា"ឬជា"ដីកាបញ្ជូន" ។
ដោយសារលោកនិពន្ធនាយកសារព័ត៌មានភ្នំពេញប៉ុស្តិ៍ខកខានមិនបានចុះផ្សាយតាមសំណូមពរ នូវលិខិតទី២របស់ឯកឧត្តម ហូ សិទ្ធី នោះ ទើបឯកឧត្តម ហូ សិទ្ធី បានចេញលិខិតសាជាថ្មីទៀតចុះថ្ងៃទី១២ ខែមករា ឆ្នាំ២០១៥ ដោយបានចោទប្រកាន់ថា ការចុះផ្សាយរបស់សារព័ត៌មានភ្នំពេញប៉ុស្តិ៍ គឺជាការមួលបង្កាច់ដោយចេតនាមកលើរូបឯកឧត្តម ប៉ុន្តែឯកឧត្តមបានបញ្ជាក់ថា ឯកឧត្តមនឹងមិនប្តឹងផ្តល់ទៅស្ថាប័នតុលាការទេ ដោយឯកឧត្តមយល់ឃើញថា វាងាយពេកសម្រាប់ជ័យជម្នះរបស់ឯកឧត្តមនៅក្នុងរឿងក្តីមួយនេះ ដ្បិតព័ស្តុតាងដែលឯកឧត្តមអាចនឹងបង្ហាញជូនតុលាការវាច្បាស់លាស់រហូតដល់លោកនិពន្ធនាយកមិនអាចប្រកែកបាន ។ ប៉ុន្តែអ្វីដែលឯកឧត្តមចង់បាន គឺសុំឲ្យលោកនិពន្ធនាយកសារព័ត៌មានភ្នំពេញប៉ុស្តិ៍ធ្វើការសុំទោសដល់សាធារណមតិកម្ពុជា និងអន្តរជាតិ ដោយអំពើបំភ្លៃភូតកុហកបោកប្រាស់របស់សារព័ត៌មានភ្នំពេញប៉ុស្តិ៍ ។
មជ្ឈដ្ឋានអ្នកតាមដានសេរីភាពបញ្ចេញមតិតាមរយៈសារព័ត៌មាននៅកម្ពុជា បានសម្តែងនូវការភ្ញាក់ផ្អើលដែរថា ច្បាស់ណាស់ជំហរនយោបាយរបស់កាសែតភ្នំពេញប៉ុស្តិ៍ គឺមានទំនោរគាំទ្រទៅលើគណបក្សប្រជាជនកម្ពុជា ដែលជាគណបក្សនយោបាយកាន់កាប់អំណាចនៅកម្ពុជា ដែលក្នុងនោះឯកឧត្តម ហូ សិទ្ធី ក៏ជាសមាជិកគណៈកម្មាធិការកណ្តាលគណបក្សប្រជាជនកម្ពុជាមួយរូបដែរ ក្រៅពីបានកាន់តំណែងជារដ្ឋមន្ត្រីប្រតិភូអមនាយករដ្ឋមន្ត្រី និងជានាយកខុទ្ទកាល័យនាយករដ្ឋមន្ត្រី តើចុះហេតុអ្វីឯកឧត្តម ហូ សិទ្ធី មានប្រតិកម្មខ្លាំងក្លាដល់ថ្នាក់ហ្នឹងទៅលើកាសែតភ្នំពេញប៉ុស្តិ៍ ឬក៏ការចុះផ្សាយរបស់កាសែតភ្នំពេញប៉ុស្តិ៍ពិតជាមានកំហុសធ្ងន់ធ្ងរប៉ះពាល់ដល់កិត្តិយសរបស់ឯកឧត្តម ហូ សិទ្ធី ប្រាកដមែន ? ៕
ព្រះមហាក្សត្រ តែងតាំងលោក ផៃ ប៊ុនឈឿន ជាទីប្រឹក្សាផ្ទាល់នាយករដ្ឋមន្ត្រី
ភ្នំពេញ: ព្រះករុណា ព្រះបាទសម្តេចព្រះ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជក្រឹត្យ ត្រាស់បង្គាប់ តែងតាំងលោក ផៃ ប៊ុនឈឿន អតីតអភិបាល នៃគណៈអភិបាល ខេត្តកណ្តាល បច្ចុប្បន្ន ជាអនុរដ្ឋលេខាធិការ ក្រសួង មហាផ្ទៃ ជាទីប្រឹក្សាផ្ទាល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី មានឋានៈស្មើរដ្ឋមន្ត្រី បន្ថែមលើមុខងារបច្ចុប្បន្ន។
សម្តេចអគ្គមហាសេនាបតីតេជោ ហ៊ុន សែន ត្រូវទទួលបន្ទុកអនុវត្ត ព្រះរាជក្រឹត្យនេះ ចាប់ពីថ្ងៃឡាយព្រះហស្តលេខា តទៅ។ នេះបើយោងតាម ព្រះរាជក្រឹត្យ ចុះថ្ងៃទី៣០ ខែធ្នូ ឆ្នាំ២០១៤ ដែលត្រូវបានចម្លងផ្សព្វផ្សាយ កាលពីថ្ងៃទី៥ ខែមករា ឆ្នាំ២០១៥៕
សម្តេចអគ្គមហាសេនាបតីតេជោ ហ៊ុន សែន ត្រូវទទួលបន្ទុកអនុវត្ត ព្រះរាជក្រឹត្យនេះ ចាប់ពីថ្ងៃឡាយព្រះហស្តលេខា តទៅ។ នេះបើយោងតាម ព្រះរាជក្រឹត្យ ចុះថ្ងៃទី៣០ ខែធ្នូ ឆ្នាំ២០១៤ ដែលត្រូវបានចម្លងផ្សព្វផ្សាយ កាលពីថ្ងៃទី៥ ខែមករា ឆ្នាំ២០១៥៕
Subscribe to:
Posts (Atom)